1. ¿Baʼax tsʼaʼab tiʼ le disipuloʼob le ka tu muchʼubaʼoboʼ, yéetel baʼaxten kʼaʼabéet kaʼach tiʼob?

 LE MAʼ úuch kaʼa kuxlak Jesusoʼ tu muchʼuba u disipuloʼob utiaʼal u paklan líiʼsik u yóoloʼob. Letiʼobeʼ tu kʼaloʼob u jool le naj tuʼux yanoʼoboʼ, tumen saajkoʼob tiʼ le máaxoʼob pʼekmiloʼoboʼ. Baʼaleʼ pʼáat maʼ saajkoʼob le ka tu chíikbesuba Jesús tiʼoboʼ yéetel le ka tu yaʼalajtiʼob: «Kʼameʼex kiliʼich muukʼ» (xok Juan 20:19-22). Ka tu muchʼubaʼob tuláakʼ kʼiineʼ Jéeobaeʼ tu tsʼáaj u kiliʼich muukʼ tiʼob, leloʼ tu beetaj u muʼukʼaʼantal u fejoʼob utiaʼal u seguer u kʼaʼaytikoʼob le maʼalob péektsiloʼ (Bax. 2:1-7).

2. 1) ¿Bix u tsʼáaiktoʼon páajtalil Jéeoba, yéetel baʼaxten kʼaʼabéettoʼon? 2) ¿Baʼaxten jach unaj k-beetik le Adoración ich Familiailoʼ? (Ilawil le tsolajiloʼ bey xan le cuadro « Adoración ich Familiail».)

² Teʼ kʼiinoʼobaʼ k-aktáantik baʼaloʼob talamtak jeʼex le disipuloʼob teʼ yáax siglooʼ (1 Ped. 5:9). Maʼ xaaneʼ k-chʼaʼik saajkil tiʼ le máakoʼoboʼ, le oʼolal kʼaʼabéettoʼon u yáantaj Jéeoba utiaʼal u yantaltoʼon u muukʼil k-kʼaʼaytik le maʼalob péektsiloʼ (Efe. 6:10). Ken xiʼikoʼon teʼ muchʼtáambaloʼoboʼ k-kʼamik le páajtalil ku tsʼáaik Jéeobaoʼ. Bejlaʼeʼ cada semanaeʼ ku yantal kaʼapʼéel muchʼtáambal: Tsoltʼaan utiaʼal tuláakal yéetel U Xookil U Pʼíich Tulumil Kanan, bey xan le muchʼtáambal yáam semana ku kʼaabaʼtik Kuxtal yéetel Meyaj jeʼex Cristooʼ. a Tsʼoʼoleʼ cada jaʼabeʼ ku yantal xan óoxpʼéel asambleaʼob: junpʼéel asamblea regional yéetel kaʼapʼéel asamblea tiʼ circuito. Juntéen xan tiʼ cada jaʼabeʼ ku beetaʼal u Kʼaʼajsajil kíimik Cristo. ¿Baʼaxten jach kʼaʼabéet k-bin tiʼ tuláakal le muchʼtáambaloʼobaʼ? ¿Bix u beetaʼal kaʼach le muchʼtáambaloʼob tumen le máaxoʼob meyajtik Diosoʼ? ¿Baʼax ku chíikbesik le bix k-ilik le muchʼtáambaloʼoboʼ?

3, 4. ¿Baʼax u kʼáat Jéeoba ka u beet le máaxoʼob meyajtikoʼ? Tʼaanen tiʼ baʼaxoʼob uchaʼan.

³ Desde úuchileʼ Jéeobaeʼ tu yaʼalaj tiʼ le máaxoʼob meyajtik ka u muchʼubaʼob adoraroʼ. Jeʼex tu jaʼabil 1513 táanil tiʼ u taal Jesuseʼ, Jéeobaeʼ tu tsʼáaj u Ley tiʼ le israelitaʼoboʼ. Ichil le Leyaʼ tu yaʼaleʼ tuláakal familiaeʼ unaj u muchʼkuba cada sábado u adorart Dios yéetel u kan baʼax ku yaʼalik le Leyoʼ (Deu. 5:12; 6:4-9). Ken beetaʼak kaʼach tumen le israelitaʼob beyaʼ ku muʼukʼaʼantal u fe cada familia, ku pʼáatloʼob limpioil tu táan  Dios yéetel ku maas biskubaʼob tu yéetel. Baʼaleʼ ken xuʼuluk u muchʼkubaʼob u adorartoʼob Jéeobaeʼ ku bin kʼaasil tiʼob (Lev. 10:11; 26:31-35; 2 Cró. 36:20, 21).

⁴ Tuukulnakoʼon xan tiʼ bix tu yilil Jesús le muchʼtáambaloʼoboʼ. Letiʼeʼ suuk kaʼach u bin cada sábado teʼ sinagogaoʼ (Luc. 4:16). Ka tsʼoʼok u kíimil yéetel u kaʼa kuxtaleʼ, le disipuloʼoboʼ seguernaj u muchʼkubaʼob, kex minaʼanoʼob kaʼach yáanal u leyil le sabadooʼ (Bax. 1:6, 12-14; 2:1-4; Rom. 14:5; Col. 2:13, 14). Ken u muchʼubaʼobeʼ ku kaʼansaʼaloʼob yéetel ku paklan líiʼsik u yóoloʼob. Ku tsʼáaikoʼob xan nojbeʼenil tiʼ Dios ich payalchiʼ, ken táakpajkoʼobiʼ yéetel ken kʼaaynakoʼob (Col. 3:16; Heb. 13:15).

5. ¿Baʼaxten k-bin teʼ muchʼtáambaloʼob cada semana yéetel teʼ asambleaʼob cada jaʼaboʼ? (Ilawil xan le cuadro « Le asambleaʼob ku beetik le máaxoʼob meyajtik Diosoʼ».)

⁵ Bejlaʼa xaneʼ k-muchʼikba cada semana yéetel ku yantaltoʼon asambleaʼob cada jaʼab. Ken xiʼikoʼon tiʼ cada junpʼéeleʼ k-eʼesik táan k-tsʼáaikba tu tséel u Reino Dios. Tsʼoʼoleʼ k-kʼamik kiliʼich muukʼ yéetel k-paklan muʼukʼaʼankúuntik k-fe ken tsikbalnakoʼon yéetel u maasil. Baʼaleʼ u maas kʼaʼanaʼanileʼ k-adorartik Jéeoba, k-payalchiʼ, k-núukik le kʼáatchiʼob ku beetaʼaloʼ yéetel k-kʼaay. Kex le muchʼtáambaloʼob k-beetik maʼ jeʼex le ku beetik kaʼach le israelitaʼob yéetel maʼ bey jeʼex le ku beetik le disipuloʼob teʼ yáax siglooʼ, láayliʼ jach kʼaʼanaʼanoʼobeʼ. ¿Bix káajik le muchʼtáambaloʼob ku beetaʼal teʼ kʼiinoʼobaʼ?

6, 7. 1) ¿Baʼax oʼolal ku beetaʼal le muchʼtáambaloʼoboʼ? 2) ¿Bix kaʼach u beetaʼal le muchʼtáambaloʼob teʼ jejeláas múuchʼuliloʼoboʼ?

⁶ Ka káaj u yilik sukuʼun Charles Taze Russell jach baʼax ku kaʼansik u Tʼaan Dioseʼ, tu yilaj kʼaʼabéet u muchʼkuba yéetel  uláakʼ máakoʼob beetik beyoʼ. Tu jaʼabil 1879, Russelleʼ tu tsʼíibtaj: «Tsʼoʼok in muchʼkinba yéetel uláakʼ máaxoʼob yanoʼob Pittsburgh utiaʼal k-xakʼaltik cada domingo baʼax ku kaʼansik le Kiliʼich Tsʼíiboʼoboʼ». Le máaxoʼob xokik le revista Watch Toweroʼ aʼalaʼabtiʼob kʼaʼabéet u muchʼkubaʼob. Le oʼolal tu jaʼabil 1881, ku muchʼkubaʼob cada domingo yéetel miércoles tu kaajil Pittsburgh (Pensilvania, Estados Unidos). Le revista Watch Tower tiʼ noviembre tiʼ 1895, tu yaʼalaj baʼax u biilal le muchʼtáambaloʼobaʼ: ku beetaʼal «utiaʼal u biskuba le máaxoʼob tsaypachtik Jesusoʼ yéetel utiaʼal u paklan yaabiltikubaʼob». Bey túunoʼ ku paklan líiʼsik u yóoloʼob (xok Hebreoʼob 10:24, 25).

⁷ Ich yaʼab jaʼaboʼobeʼ jejeláas bix u beetaʼal kaʼachi yéetel chéen wa baʼax kʼiin ku yantal muchʼtáambaloʼob tiʼ le j-Xoknáaloʼob tiʼ le Bibliaoʼ. Junpʼéel carta tu túuxtaj u jaats sukuʼunoʼob Estados Unidos tu jaʼabil 1911, tu yaʼalaj: «Toʼoneʼ k-muchʼikba kex cinco u téenel cada semana». ¿Baʼax kʼiiniloʼob ku muchʼkubaʼob kaʼachi? Cada lunes, miércoles, viernes yéetel kaʼatéen tiʼ domingoʼob. Junpʼéel carta túuxtaʼab tumen le sukuʼunoʼob yanoʼob África tu jaʼabil 1914, tu yaʼalaj: «Kaʼatéen tiʼ cada meseʼ k-muchʼikba desde viernes tak domingo». Ka máan kʼiineʼ káaj u beetaʼal muchʼtáambaloʼob jeʼex le ku beetaʼal teʼ kʼiinoʼobaʼ. Koʼox ilik bix káajik u beetaʼaloʼob.

8. ¿Tiʼ baʼaxoʼob ku tʼaan le tsoltʼaanoʼob ku máansaʼal kaʼachoʼ?

⁸ Tsoltʼaan utiaʼal tuláakal. Tu jaʼabil 1880, junpʼéel jaʼab káajak u jóoʼsaʼal le revista Watch Toweroʼ, le sukuʼun Russelloʼ bin tiʼ jejeláas luʼumiloʼob utiaʼal u kʼaʼaytaj, jeʼex tu beetil Jesuseʼ (Luc. 4:43). Teʼ kʼiinoʼoboʼ tu káajsaj le muchʼtáambal ku kʼaabaʼtik Tsoltʼaan utiaʼal tuláakaloʼ. Le ka tu yaʼalaj yaan u beetik le viajeaʼ, le revista Watch Toweroʼ tu yaʼaleʼ le sukuʼun Russelloʼ «jach taak u máansik tu táan yaʼabkach máakoʼob le tsoltʼaan ‹Baʼaloʼob yaan yil yéetel u Reino Dios›». Tu jaʼabil 1911, aʼalaʼab tiʼ cada múuchʼulil ka u túuxt sukuʼunoʼob noʼojaʼanoʼob utiaʼal u máansoʼob seis tsoltʼaanoʼob teʼ múuchʼuliloʼob yanoʼob naatsʼ tiʼoboʼ, jeʼex le ku tʼaanoʼob tiʼ le juiciooʼ yéetel tiʼ u kuxtal Jesús tu kʼuboʼ. Ken tsʼoʼokok cada tsoltʼaaneʼ ku yaʼalaʼal máax kun máansik uláakʼoʼ yéetel tiʼ baʼax kun tʼaan.

9. ¿Baʼax kʼeexiloʼob tsʼoʼok u beetaʼal tiʼ le Muchʼtáambal utiaʼal tuláakaloʼ, yéetel bix jeʼel k-táakpajal teʼ muchʼtáambalaʼ?

⁹ Tu jaʼabil 1945, le revista The Watchtoweroʼ tu yaʼaleʼ teʼ Muchʼtáambal utiaʼal tuláakaloʼ yaan u máansaʼal ocho tsoltʼaanoʼob yaan yil yéetel le «baʼaloʼob talamtak ku yúuchul teʼ kʼiinoʼobaʼ». Ich yaʼab jaʼaboʼobeʼ le sukuʼunoʼoboʼ maʼ chéen tu máansoʼob le tsoltʼaanoʼob ku túuxtik le palitsil chúukaʼan u yóoloʼ, baʼaxeʼ tak le ku beetkoʼob chéen letiʼoboʼ. Baʼaleʼ tu jaʼabil 1981, aʼalaʼabtiʼob ka u máansoʼob chéen le tsoltʼaanoʼob ku túuxtaʼal tiʼ le múuchʼuliloʼoboʼ. b Yaan tiʼ le tsoltʼaanoʼoboʼ ku  yaʼalik ka táakpajak le muchʼukbaloʼoboʼ wa ka máansaʼak junpʼéel eʼesajil, baʼaleʼ tu jaʼabil 1990, aʼalaʼab ka xuʼuluk u beetaʼal beyoʼ. Tu jaʼabil xan 2008, aʼalaʼab maʼ kun xáantal 45 minutos, baʼaxeʼ chéen 30 minutos. Kex tsʼoʼok u kʼeʼexel bix u máansaʼal le tsoltʼaanoʼoboʼ, láayliʼ u muʼukʼaʼankúuntik k-fe tiʼ le baʼax ku kaʼansik le Bibliaoʼ yéetel ku kaʼansiktoʼon yaʼab baʼaloʼob yoʼolal u Reino Dios (1 Tim. 4:13, 16). Toʼoneʼ unaj k-invitartik le máaxoʼob k-bin xíimbaltoʼoboʼ bey xan le máaxoʼob maʼatech u meyajtikoʼob Dios utiaʼal ka xiʼikoʼob u yuʼuboʼob le tsoltʼaanoʼoboʼ.

10-12. 1) ¿Baʼax kʼeexiloʼob tsʼoʼok u beetaʼal tiʼ U Xookil U Pʼíich Tulumil Kanan? 2) ¿Baʼax maʼalob ka k-tukle?

¹⁰ U Xookil U Pʼíich Tulumil Kanan. Tu jaʼabil 1922, le sukuʼunoʼob ku yaʼalaʼal peregrinos tiʼob ku túuxtaʼaloʼob tumen le Sociedad Watch Tower utiaʼal u máansoʼob tsoltʼaanoʼob yéetel utiaʼal u nuʼuktoʼob le kʼaʼaytajoʼ, tu yaʼaloʼob maʼalob ka beetaʼak junpʼéel muchʼtáambal utiaʼal u xakʼalxoktaʼal U Pʼíich Tulumil Kanan. Le baʼax tu yaʼaloʼoboʼ kʼaʼami, bey túunoʼ káaj u xoʼokol ichil le semanaoʼ wa tiʼ domingoʼob.

¹¹ Le revista The Watchtower 15 tiʼ junio tiʼ 1932, tu maas tsolaj bix unaj u beetaʼal le muchʼtáambalaʼ. Utiaʼal u xoʼokol le revista jeʼex u beetaʼal tu najil Beteloʼ, tu yaʼaleʼ unaj u nuʼuktaʼal tumen juntúul sukuʼun. Tu yaʼaleʼ jeʼel u páajtal u kutal óoxtúul sukuʼunoʼob aktáan tiʼ le muchʼukbaloʼob utiaʼal u tsʼaʼabal u xokoʼob le xóotʼoloʼoboʼ. Teʼ kʼiinoʼoboʼ le xookoʼoboʼ maʼatech u taasik u kʼáatchiʼiloʼob, le oʼolal le sukuʼun nuʼuktikoʼ ku yaʼalik tiʼ le muchʼukbaloʼob ka u beetoʼob kʼáatchiʼob yaan yil yéetel le baʼax ku xoʼokloʼ, tsʼoʼoleʼ ku yaʼalik tiʼ u maasil ka u núukoʼoboʼ. Wa yaan baʼax unaj u maas tsoʼololeʼ, le sukuʼun nuʼuktik le xookoʼ ku tsolik ichil «junpʼíit tʼaanoʼob».

 ¹² Ka káajeʼ ku xoʼokol le revista kun aʼalbil tumen u maas yaʼabil le sukuʼunoʼob teʼ múuchʼuliloʼ. Baʼaleʼ le revista The Watchtower 15 tiʼ abril tiʼ 1933, tu yaʼaleʼ tuláakal le múuchʼuliloʼob unaj u xokikoʼob junpʼéeliliʼ revistaoʼ. Tu jaʼabil 1937, aʼalaʼabeʼ u xookil le revistaoʼ unaj u beetaʼal utiaʼal domingoʼob. Baʼaleʼ teʼ revista The Watchtower 1 tiʼ octubre tiʼ 1942, aʼalaʼab yaan u beetaʼal uláakʼ kʼeexoʼob tiʼ le muchʼtáambalaʼ. Yáaxeʼ tu yaʼaleʼ le xookoʼob utiaʼal xakʼaltbil teʼ múuchʼuliloʼ yaan u taasik u kʼáatchiʼiloʼob. Tu yaʼalaj xaneʼ unaj u xáantal junpʼéel hora. Tu líiʼsaj xan u yóol le sukuʼunoʼob utiaʼal u núukikoʼob le kʼáatchiʼob «chéen yéetel u tʼaanoʼoboʼ», maʼ ka u xokoʼob le baʼax ku yaʼalik le xóotʼoloʼ. U Xookil le revista U Pʼíich Tulumil Kananoʼ láayliʼ letiʼe ku meyaj bejlaʼa tiʼ le palitsil chúukpajaʼan u yóol yéetel yaan u naʼat utiaʼal u tsʼáaik le kaʼansaj ku keʼetel yéetel janal jach tu yorailoʼ (Mat. 24:45). Le oʼolal maʼalob ka k-tukle: «¿Kin líiʼskinba wa utiaʼal u Xookil U Pʼíich Tulumil Kanan ku yantal cada semanaoʼ? ¿Kin wilik wa in núukik le kʼáatchiʼob ku beetaʼaloʼ?».

13, 14. ¿Baʼax kʼeexiloʼob tsʼoʼok u beetaʼal tiʼ U Xookil le Biblia teʼ Múuchʼuliloʼ, yéetel baʼaxten jatsʼuts a wilik le muchʼtáambalaʼ?

¹³ U Xookil le Biblia teʼ Múuchʼuliloʼ. Kex tu jaʼabil 1895, tsʼokaʼaniliʼ u jóoʼsaʼal wa jaypʼéel u libroiloʼob Millennial Dawn (La Aurora del Milenio). Le sukuʼun H. N. Rahn, juntúul tiʼ le j-Xoknáaloʼob tiʼ le Biblia kajaʼan tu kaajil Baltimore (Maryland, Estados Unidos), tu yaʼalaj ka xoʼokok le Biblia teʼ muchʼtáambaloʼob kʼaj óoltaʼab bey Círculos de la Aurora. Le yáax muchʼtáambaloʼobaʼ beetaʼab tu yotoch le sukuʼunoʼob utiaʼal u yilaʼal baʼax utsiloʼob jeʼel u taaskeʼ. Baʼaleʼ tu mesil septiembre tiʼ 1895, tu luʼumil Estados Unidoseʼ yaʼab tuʼuxoʼob ku beetaʼal. Le oʼolal le revista Watch Tower tiʼ le mes jeʼeloʼ tu yaʼaleʼ kʼaʼabéet u muchʼkuba tuláakal le máaxoʼob u kʼáat u kaxtoʼob u jaajiloʼ. Le máax kun nuʼuktikoʼ unaj u yojel xook tubeel. Unaj u xokik u jaatsiʼ, tsʼoʼoleʼ ku yaʼalik ka tsoʼolok tumen le muchʼukbaloʼoboʼ. Le ken u láaj xok le xóotʼoloʼ ku xokik le tekstoʼob ku taaskoʼ. Ken u láaj xakʼalt le xookoʼ cada juntúul tiʼ le muchʼukbaloʼoboʼ ku tsolik baʼax tu kanaj.

¹⁴ Le muchʼtáambalaʼ yaʼab u téenel tsʼoʼok u kʼeʼexel u kʼaabaʼ. Tu kʼaabaʼtaj Círculos Bereanos para Estudios Bíblicos, lelaʼ beetaʼab utiaʼal u xakʼalxoktaʼal le Kiliʼich Tsʼíiboʼob jeʼex beetaʼabik tumen le disipuloʼob yanoʼob kaʼach Berea teʼ yáax siglooʼ (Bax. 17:11). Ka máan kʼiineʼ tu kʼaabaʼtaj U Xookil Libro teʼ Múuchʼuliloʼ. Baʼaleʼ bejlaʼeʼ U Xookil le Biblia teʼ Múuchʼuliloʼ, lelaʼ ku beetaʼal teʼ Najil Reinooʼ, maʼ tu yotoch le sukuʼunoʼoboʼ. Desde ka káajeʼ tsʼoʼok u xoʼokol yaʼab libroʼobiʼ, folletoʼob bey xan jujunpʼéel tiʼ u xookiloʼob U Pʼíich Tulumil Kanan.  Jeʼex úuchileʼ ku líiʼsaʼal u yóol tuláakal utiaʼal ka táakpajak teʼ muchʼtáambalaʼ. Lelaʼ tsʼoʼok u yáantaj utiaʼal u naʼataʼal le baʼaxoʼob talamtak ku kaʼansik le Bibliaoʼ. Le oʼolaleʼ, ¿suuk wa a líiʼskaba utiaʼal a táakpajliʼ?

15. ¿Baʼaxten ku beetaʼal kaʼach le Escuela utiaʼal k-Kaʼansik u Tʼaan Diosoʼ?

¹⁵ Escuela utiaʼal k-Kaʼansik u Tʼaan Dios. Le sukuʼun Carey Barber, ku meyaj kaʼach tu najil Betel Brooklynoʼ (Nueva York), tu yaʼalaj: «Tu kʼiinil lunes 16 tiʼ febrero tiʼ 1942, aʼalaʼab tiʼ tuláakal le sukuʼunoʼob ku meyajoʼob Betel ka u tsʼáa u kʼaabaʼob utiaʼal u táakpajloʼob teʼ Escuela utiaʼal k-Kaʼansik u Tʼaan Diosoʼ». Ka máan kʼiineʼ le sukuʼun Barber, táakpaj ichil le Cuerpo Gobernanteoʼ, tu yaʼaleʼ le muchʼtáambalaʼ «junpʼéel tiʼ le jach maʼalob nuʼukuloʼob tsʼoʼok u meyaj tiʼ Jéeoba utiaʼal u yáantik le máaxoʼob meyajtikoʼ». Tumen jach tu yáantaj le sukuʼunoʼob utiaʼal u kankoʼob kaʼansaj yéetel kʼaʼaytajoʼ, tu jaʼabil 1943, jóoʼsaʼab le folleto Curso en el Ministerio Teocrático. Le revista  The Watchtower 1 tiʼ junio tiʼ 1943, tu yaʼaleʼ le Escuela utiaʼal k-Kaʼansik u Tʼaan Diosoʼ beetaʼab utiaʼal u yáantaʼal le máakoʼob «u kanoʼob bix jeʼel u kʼaʼaytikoʼob le Reinooʼ» (2 Tim. 2:15).

16, 17. ¿Chéen wa ku kaʼansaʼal kaʼach máak u máans maʼalob tsoltʼaanoʼob teʼ Escuela utiaʼal k-Kaʼansik u Tʼaan Diosoʼ? Tsole.

¹⁶ Tu káajbaleʼ yaʼab sukuʼunoʼobeʼ saajkoʼob tʼaan tu táan yaʼabkach máak. Clayton Woodworth, (hijotsil) kʼaʼal cárcel u taata yéetel le sukuʼun Rutherford bey xan uláakʼ sukuʼunoʼob tu jaʼabil 1918, tu kʼaʼajsaj bix káajik u máansik u tsoltʼaan tu jaʼabil 1943. Tu yaʼalaj: «Jach talam in wilik kaʼach in máansik le tsoltʼaanoʼoboʼ. Kin wuʼuyik bey ku siʼistal in waakʼeʼ, ku tijil in chiʼ yéetel ku soʼojtal in kaal ken joʼopʼok in tʼaan». Baʼaleʼ maʼalobchaj u máansik u tsoltʼaan, le oʼolal tsʼaʼab u máans yaʼabkach tsoltʼaanoʼob. Tsʼoʼoleʼ tu kanaj kʼaʼabéet u yeʼesik kabal óolal yéetel u kʼubik u yóol tiʼ Jéeoba. Letiʼeʼ tu yaʼalaj: «Tin wileʼ u máansik máak junpʼéel tsoltʼaan jach maʼalobeʼ maʼ letiʼe  baʼax maas kʼaʼanaʼanoʼ, baʼaxeʼ u líiʼskuba tubeel yéetel u kʼubik u yóol tiʼ Jéeoba. Beyoʼ yaan u chʼenxikintaʼal yéetel kiʼimak óolal, tsʼoʼoleʼ yaan baʼax maʼalob ken u kaʼans tiʼ u maasil».

¹⁷ Tu jaʼabil 1959, aʼalaʼab tiʼ le kiikoʼob ka u tsʼáa u kʼaabaʼob utiaʼal u táakpajloʼob xan teʼ escuelaoʼ. Le kiik Edna Baueroʼ ku kʼaʼajsik bix tu yuʼubiluba le ka aʼalaʼab teʼ asambleaoʼ. Letiʼeʼ tu yaʼalaj: «Jach kʼajaʼanten bix kiʼimakchajik u yóol le kiikoʼob ka aʼalaʼab yaan u táakpajloʼob xan teʼ escuelaoʼ». Desde úuchjeakileʼ yaʼab sukuʼunoʼob yéetel kiikoʼob táakpajoʼob teʼ Escuela utiaʼal k-Kaʼansik u Tʼaan Diosoʼ. Bejlaʼeʼ láayliʼ letiʼe kaʼansaj k-kʼamik teʼ muchʼtáambal yáam semanaoʼ (Xok Isaías 54:13.)

18, 19. 1) Bejlaʼeʼ ¿bix u kaʼansaʼaltoʼon k-maas maʼalobkíint k-kʼaʼaytaj? 2) ¿Baʼaxten k-kʼaay teʼ muchʼtáambaloʼoboʼ? (Ilawil le cuadro « Kʼaayoʼob utiaʼal k-adorartik Jéeoba».)

¹⁸ U Muchʼtáambalil Kʼaʼaytaj. Tu jaʼabil 1919, ku beetaʼal muchʼtáambal utiaʼal u yilaʼal bix kun úuchul kʼaʼaytaj. Baʼaleʼ maʼ tuláakal le sukuʼunoʼob ku binoʼoboʼ, chéen le ku tʼoxkoʼob jóoʼsaʼaniloʼoboʼ. Desde tu jaʼabil 1923, chéen juntéen ku beetaʼal u Muchʼtáambalil Kʼaʼaytaj ichil junpʼéel mes, teʼeloʼ ku yaʼalaʼal tiʼ tuláakal le múuchʼulil ka xiʼikoʼ. Tu jaʼabil 1928, aʼalaʼab ka beetaʼak cada semana yéetel tu jaʼabil 1935, le revista The Watchtoweroʼ tu yaʼaleʼ le baʼax unaj u kaʼansaʼal tu Muchʼtáambalil Kʼaʼaytajoʼ unaj u chʼaʼabal teʼ jóoʼsaʼanil ku kʼaabaʼtik Director (ka máan kʼiineʼ tsʼaʼab u kʼaabaʼt Informador yéetel ka tsʼoʼokeʼ K-meeyjil tiʼ le Reinooʼ). Bey túunoʼ maʼ xáanchaj ka suukchaj u beetaʼal le muchʼtáambal tiʼ tuláakal le múuchʼuliloʼoboʼ.

¹⁹ Bejlaʼeʼ teʼ muchʼtáambal yáam semanaoʼ ku yeʼesaʼaltoʼon bix unaj k-kaʼansaj yéetel k-kʼaʼaytaj (Mat. 10:5-13). Wa ku tsʼaʼabaltech junpʼéel U juʼunil xookeʼ, ¿ka xokik yéetel ka beetik wa le baʼax ku yaʼalik utiaʼal a maas maʼalobkíintik a kʼaʼaytajoʼ?

20-22. 1) ¿Baʼaxten k-beetik u Kʼaʼajsajil kíimik Jesús? 2) ¿Baʼax utsil ku taasik u bin máak cada jaʼab teʼ Kʼaʼajsajiloʼ?

²⁰ Jesuseʼ tu yaʼalaj tiʼ le máaxoʼob tsaypachtik ka u kʼaʼajsoʼob u kʼiinil kíimik tak ken kaʼa suunakoʼ. Jeʼex u kʼiinbesajil le Pascuaoʼ, u Kʼaʼajsajil kíimik Cristoeʼ unaj u beetaʼal cada jaʼab (1 Cor. 11:23-26). Cada jaʼabeʼ u millonesil máaxoʼob ku binoʼob teʼ Kʼaʼajsajilaʼ. Lelaʼ ku kʼaʼajsik tiʼ le sukuʼunoʼob kun binoʼob kaʼan le jatsʼuts páajtalil yaantiʼob u táakpajloʼob teʼ Reinooʼ (Rom. 8:17). Ku yáantik xan le uláakʼ tamanoʼob utiaʼal ka chúukpajak u yóoloʼob u tsʼáaubaʼob tu tséel u Reyil u Reino Diosoʼ (Juan 10:16).

²¹ Le sukuʼun Russell yéetel u yéet meyajoʼoboʼ tu naʼatoʼob jach unaj u kʼiinbeskoʼob u Ookʼin Janal Yuumtsil yéetel u yojloʼob chéen juntéen unaj u beetkoʼob cada jaʼab. Le revista Watch Tower tiʼ abril tiʼ 1880, tu yaʼalaj: «Toʼoneʼ tsʼoʼok yaʼab jaʼaboʼob joʼopʼok k-kʼiinbesik le Pascua [wa Kʼaʼajsajil] way tu kaajil  Pittsburgh, [...] k-jaantik yéetel k-ukʼik le baʼaxoʼob chíikbesik u wíinklil yéetel u kʼiʼikʼel tu kʼuboʼ». Maʼ xáanchaj ka joʼopʼ u beetaʼal asambleaʼob tu kʼiinil le Kʼaʼajsajiloʼ. Tu jaʼabil 1889, letiʼe ka yáax beetaʼab junpʼéel tiʼ le asambleaʼobaʼ, teʼ kʼiin jeʼeloʼ doscientos veinticinco máakoʼob muchʼlajoʼobiʼ yéetel veintidós okjaʼanajoʼobiʼ.

²² Bejlaʼeʼ maʼatech k-beetik le Kʼaʼajsajil tu kʼiinil junpʼéel asambleaoʼ, baʼaxeʼ k-invitartik le máakoʼob ka xiʼikoʼob tu Najil Reino wa teʼ tuʼux k-muchʼikba k-beet le Kʼaʼajsajiloʼ. Tu jaʼabil 2013, maas tiʼ 19 millones máakoʼob binoʼobiʼ. Toʼoneʼ jach nojoch baʼal k-ilik k-biniʼ yéetel k-invitartik u maasil ka xiʼikoʼobiʼ. ¿Ka invitartik wa le jaytúul máakoʼob ku páajtal utiaʼal ka xiʼikoʼob teʼ Kʼaʼajsajil cada jaʼaboʼ?

23. ¿Bix unaj a wilik le muchʼtáambaloʼoboʼ?

²³ Le máaxoʼob meyajtik Jéeoba yéetel chúukaʼan óolaloʼ maʼ talam u yilik u binoʼob teʼ muchʼtáambaloʼoboʼ (Heb. 10:24, 25; 1 Juan 5:3). Rey David úuchjeakileʼ jach uts tu tʼaan u bin u adorart Jéeoba teʼ templooʼ (Sal. 27:4). Jatsʼuts u yilik u muchʼkuba yéetel u maasil máaxoʼob meyajtik Dios (Sal. 35:18). Jesús xaneʼ desde tu chichnil jach uts tu yich u bin teʼ templo tuʼux ku adorartaʼal u Taataoʼ (Luc. 2:41-49).

24. ¿Baʼax ku páajtal k-beetik ken xiʼikoʼon teʼ muchʼtáambaloʼoboʼ?

²⁴ Ken xiʼikoʼon teʼ muchʼtáambaloʼoboʼ k-eʼesik k-yaabiltmaj Jéeoba yéetel k-kʼáat k-muʼukʼaʼankúunt u fe u maasil. Tsʼoʼoleʼ k-eʼesik taak k-kanik bix jeʼel k-kuxtal yáanal u Reino Dioseʼ, lelaʼ maases teʼ muchʼtáambaloʼob yéetel teʼ asambleaʼob ku kaʼansaʼaloʼ. Baʼaleʼ ku kaʼansaʼal xan bix jeʼel u chúukpajal k-óol k-kaʼans uláakʼ máakoʼob u tsaypachtoʼob Jesucristo, le Reyoʼ (xok Mateo 28:19, 20). Le bix k-ilik le muchʼtáambaloʼoboʼ ku yeʼesik k-creertik jach tu jaajil táan u meyaj u Reino Dios. Le oʼolaleʼ unaj k-bin mantatsʼ teʼ muchʼtáambaloʼoboʼ.