1-3. Finshi Yesu acitile pa kuti umulimo wa kushimikila uye pa ntanshi, kabili fipusho nshi nalimo twingayipusha?

PA MYAKA ibili Yesu alishimikile imbila nsuma mu Galili monse. (Belengeni Mateo 9:35-38.) Aliile mu misumba na mu mishi kabili alesambilisha mu masunagoge no kubila imbila nsuma iya Bufumu. Ilyo aleshimikila, abantu abengi baleya kuli ena mu kukutika. Yesu aebele abasambi bakwe ati: “Ukulobolola kukalamba,” lelo ababomfi bena nabacepa.

² Yesu alicitilepo fimo pa kuti umulimo wa kushimikila wingatwalilila ukuya pa ntanshi. Finshi acitile? Atumine abatumwa bakwe 12 “mu kushimikila pa Bufumu bwa kwa Lesa.” (Luka 9:1, 2) Abatumwa bafwile balikwete ifipusho pa fya kubomba umulimo uo abapeele. Ilyo ashilabatuma, abalile abasambilisha nga filya fine Wishi wa mu muulu amusambilishe.

³ Nomba kuti twayipusha atuti: Finshi ifyo Yesu bamusambilishe kuli Wishi? Finshi Yesu asambilishe abatumwa bakwe? Inga muno nshiku, bushe Imfumu Mesia yalisambilisha abakonshi baiko? Finshi yabasambilisha?

“Filya Fine Tata Ansambilishe, E fyo na ine Nanda”

4. Ni lilali Yesu bamusambilishe kuli Wishi, kabili ni kwi bamusambilishishe?

⁴ Yesu aliilandile fye umwine ukuti Wishi e wamusambilishe. Ilyo aleshimikila atile: “Filya fine Tata ansambilishe, e fyo na ine nanda.” (Yoh. 8:28) Ni lilali kabili ni kwi uko Wishi amusambilishishe? Apo libeli, atampile ukumusambilisha ilyo fye abumbilwe. (Kol. 1:15) Ilyo aali na Wishi ku muulu, pa myaka iminshimpendwa alekutika no kusambilila kuli “Kasambilisha Uwapulamo.” (Esa. 30:20) Ici calengele ukuti, Umwana asambilile amasambililo ayo umuntu nangu umo ashingafikako. Asambilile imibele ya kwa Wishi, imibombele yakwe e lyo no kwishiba ubufwayo bwakwe.

5. Finshi Lesa asambilishe Umwana wakwe pa mulimo amupeele ukubomba pe sonde?

⁵ Ilyo inshita yalinga yafikile, Yehova alisambilishe Umwana wakwe ifya kubomba umulimo wa kushimikila pe sonde. Natulande pa busesemo ubulanda pa fyo Kasambilisha Uwapulamo aleumfwana no Mwana wakwe. (Belengeni Esaya 50:4, 5.) Ubusesemo butila Yehova aleshibusha Umwana wakwe “cila lucelo.” Aya mashiwi yalenga twatontonkanya pali kafundisha  uushibusha umwana we sukulu lucelocelo pa kuti atendeke ukumusambilisha. Icitabo cimo icilanda pali Baibolo citila: “Cali kwati Yehova . . . atwele Yesu mu kalasi no kutendeka ukumusambilisha ifyo ali no kulashimikila nga filya kafundisha asambilisha umwana we sukulu.” Kanshi Yehova alisambilishe Umwana ifyo alingile “ukulanda no kusosa.” (Yoh. 12:49) Na kabili, Wishi alipeele umwana wakwe amafundisho pa fya kusambilisha. * Ilyo Yesu ali pe sonde, aleshimikila bwino pantu alikonkele ifyo Wishi amusambilishe kabili na o alisambilisheko abasambi bakwe ifyo asambilile pa kuti baleshimikila bwino.

6, 7. (a) Bushe Yesu asambilishe shani abatumwa bakwe, kabili ifyo abasambilishe fyabafwile shani? (b) Masambililo ya musango nshi Yesu apeela abasambi bakwe muno nshiku?

⁶ Bushe Yesu asambilishe shani abatumwa bakwe nga fintu tulandilepo pa ntendekelo ya cino cipandwa? Mu ilembo lya kwa Mateo icipandwa 10, Yesu alyebele abasambi bakwe ifyo balingile ukulashimikila imbila nsuma. Yesu alisambilishe abasambi bakwe ukwa kushimikila (ifikomo 5, 6), ubukombe ubo bali no kulabila (icikomo 7), ukucetekela Yehova ilyo baleshimikila (ifikomo 9, 10), ifya kucita nga bafika pa ng’anda ya muntu (ifikomo 11-13), ifya kucita nga abantu bakaana ubukombe (ifikomo 14, 15), ne fya kucita nga balebacusha (ifikomo 16-23). * Ifyo Yesu asambilishe abasambi bakwe fyalibafwile nga nshi pali ilya nshita ukulashimikila bwino imbila nsuma.

⁷ Inga ifwe muno nshiku? Yesu, Imfumu ya Bufumu bwa kwa Lesa, alipeela abasambi bakwe umulimo wacindama nga nshi uwa kubila “imbila nsuma iya Bufumu . . . ku bantu bonse aba pe sonde ku kuba ubunte ku nko shonse.” (Mat. 24:14) Bushe Imfumu yesu yalitusambilisha ifya kubomba uyu mulimo wacindama? Ee, yalitusambilisha! Nangu ca kutila Yesu aba ku muulu, alishininkisha ukuti abasambi bakwe balesambilishiwa ifya kushimikila e lyo ne fya kubomba imilimo imbi iyaibela mu cilonganino.

Ukusambilisha Abantu Ukuba Bakashimikila

8, 9. (a) Mulandu nshi Isukulu lya Butumikishi Ilya Bulesa lyabeleleko? (b) Bushe ukulongana kwa mukati ka mulungu kwamwafwa shani ukulabila bwino imbila nsuma?

⁸ Ukutula fye na kale, icilonganino ca kwa Yehova calibomfya ukulongana kukalamba no kulongana kwa pa cilonganino, pamo nga Ukulongana kwa Mulimo ku kusambilisha abantu ba kwa Lesa ifya kushimikila. Na kabili ukutula muli ba 1940, bamunyinefwe abaletungulula pa maofeshi yakalamba batampile ukupekanya amasukulu yalekanalekana aya kusambilisha abantu ba kwa Lesa.

⁹ Isukulu lya Butumikishi Ilya Bulesa. Nga fintu twalandilepo mu cipandwa cafumineko, ili isukulu lyatendeke mu mwaka wa 1943. Bushe ili isukulu lyabeleleko fye ukusambilisha abasambi ifya kulanda bwino amalyashi mu cilonganino? Iyo. Icikalamba sana ico kwabelele ili isukulu, kwafwa abantu ba kwa Lesa ukusambilila ifya kulumbanya Yehova ilyo baleshimikila. (Amalu. 150:6) Ili isukulu lyalyafwile aba bwananyina  bonse abalembesha mu isukulu ukuba abafikapo ukubomba umulimo wa Bufumu. Pali lelo aba bwananyina basambilila ifya kubomba bwino umulimo wa kubila imbila nsuma mu kulongana kwa mukati ka mulungu.

10, 11. Pali ino inshita, bushe ni bani abaya kwi Isukulu lya Gileadi, kabili finshi basambilila muli ili Isukulu?

¹⁰ Isukulu lya Gileadi. Isukulu lya Gileadi lyatendeke pali Cimo, pa 1 February mu 1943. Ico batendekele ili isukulu, kusambilisha bapainiya na babomfi ba nshita yonse bambi pa kuti baleya mu kubomba bumishonari mu fyalo fimbi. Lelo ukutendekela mu October mu 2011, abaya kwi Sukulu lya Gileadi ni balya fye ababa kale mu mulimo wa nshita yonse uwaibela pamo nga bapainiya baibela, bakangalila benda na bena mwabo, ababombela pa musambo e lyo na bamishonari abashaya ku Isukulu lya Gileadi.

¹¹ Bushe ifyo abaya ku Isukulu lya Gileadi basambilila fibafwa shani? Munyinefwe umo uwasambilisha muli ili isukulu pa myaka iingi atile: “Ifyo basambilila mu Cebo ca kwa Lesa filakosha nga nshi icitetekelo cabo, kabili filabafwa ukukwata imibele ya bumupashi iibafwa ukwishiba ifya kucita nga bakwata amafya mu mulimo wabo. E lyo kabili ili isukulu lilabafwa ukutendeka ukulafwaisha ukushimikila imbila nsuma.”—Efes. 4:11.

12, 13. Bushe Isukulu lya Gileadi lyalenga shani umulimo wa kushimikila ukuya pa ntanshi? Langilileni.

¹² Bushe Isukulu lya Gileadi lyalenga shani umulimo wa kushimikila ukuya pa ntanshi? Ukutula fye mu 1943, bamunyinefwe ne nkashi ukucila pali 8,500 balipita muli ili isukulu, * kabili aba bamishonari balibatuma mu fyalo fyalekanalekana ukucila pali 170. Aba bamunyinefwe balakonka sana ifyo basambilile ica kuti balaba abacincila nga nshi mu kushimikila e lyo balasambilisha bamunyinabo pa kuti nabo baleshimikila bwino. Ilingi line bamishonari balebombela mu ncende umushaba bakasabankanya nelyo umwaba fye abanono.

¹³ Tontonkanyeni pa fyacitike mu Japan umo umulimo wa kushimikila wabwelele sana pa nshi ilyo kwali Inkondo ya Calo iya Bubili. Mu mweshi wa August mu 1949, bakasabankanya abena Japan abali muli ici calo tabafikile na 10. Lelo ilyo uyu mwaka walepwa, bamishonari 13 abafumine ku Isukulu lya Gileadi balitendeke ukushimikila mu kucincila muli ici calo. Bamishonari na bambi abengi balibatumine kuli ici calo. Pa kubala, bamishonari babikile sana amano ku kushimikila mu misumba iikalamba, pa numa batendeke ukuya na mu misumba imbi iinono. Aba bamishonari balikoseleshe abo balesambisha Baibolo e lyo na bakasabankanya bambi ukubombako bupainiya. Ifi bamishonari bacitile fyalibombele bwino nga nshi. Pali ino nshita mu Japan mwaba bakasabankanya ukucila na pali 216,000 kabili pali aba, mupepi na hafu ni bapainiya ba nshita yonse! *

14. Bushe amasukulu twakwata mu kuteyanya yaba bushininkisho bwa cinshi? (Moneni na kabokoshi kaleti “Amasukulu Ayakansha Bakabilisha ba Mbila Nsuma” pe bula 188.)

¹⁴ Amasukulu ya bulesa na yambi. Amasukulu pamo nga Isukulu lya Bapainiya, Isukulu lya Bena Kristu Abaupana, e lyo  na Isukulu lya Bamunyinefwe Abashimbe, yalyafwa bamunyinefwe abapitamo ukuba Abena Kristu abakosa. Na kabili, aya masukulu yalibafwa ukuba abacincila mu kushimikila. * Aya masukulu yonse yatulanga fye ukuti Imfumu yesu ilatusambilisha pa kuti tuleshimikila bwino.—2 Tim. 4:5.

Ukusambilisha Bamunyinefwe Abakwata Imilimo Iyaibela

15. Ni muli finshi abaume abapeelwa imilimo yaibela balingile ukulapashanya Yesu?

¹⁵ Bushe muleibukisha ubusesemo bwa kwa Esaya ubwacilanda pali Yesu ukuti balimusambilishe kuli Lesa? Ilyo Lesa alesambilisha Yesu, Umwana alisambilile ‘ifya kwasuka abanaka ku cebo’ icisuma. (Esa. 50:4) Ilyo Yesu ali pano isonde, ifyo Wishi amusambilishe e fyo alecita, alisansamwishe “abalecula.” (Mat. 11:28-30) Kanshi bakangalila balingile ukupashanya Yesu, bafwile ukulasansamusha aba bwananyina. Uyu e mulandu kwabela amasukulu yalekanalekana ayakwafwa bamunyinefwe abafikapo ukuti balebomba bwino umulimo wabo.

16, 17. Mulandu nshi Isukulu lya Butumikishi bwa Bufumu lyabelako? (Moneni na futunoti.)

¹⁶ Isukulu lya Butumikishi bwa Bufumu. Ikalasi lya kubalilapo lyatendeke pa 9 March mu 1959, mwi tauni lya South Lansing, mu New York. Bakangalila benda e lyo na babomfi ba  mu filonganino balibetile kuli ili Isukulu ilya mweshi umo ilyali mu ciNgeleshi. Pa numa, ili isukulu lyatampile ukubela na mu ndimi shimbi, e lyo kabili mu kupita kwa nshita, batampile ukusambilisha bamunyinefwe icalo fye conse. *

¹⁷ Icitabo ca 1962 Yearbook of Jehovah’s Witnesses calandile pa mulandu ili isukulu lyatendekele ukuti: “Muli ici icalo, abantu baliba abapamfiwa nga nshi. Kanshi kangalila mu cilonganino ca Nte sha kwa Yehova alingile ukwishiba bwino ukuteyanya ifintu pa kuti engalasakamana bwino aba mu cilonganino no kubafwa. Pa nshita imo ine talingile ukulekelesha aba mu ng’anda yakwe pa mulandu wa milimo ya mu cilonganino, lelo alingile ukuba na mano ayatuntulu. Kanshi mu calo conse, ababomfi ba mu filonganino balikwata ishuko lyaibela ilya kulongana pamo ku kukanshiwa mu Isukulu lya Butumikishi bwa Bufumu ilibafwa ukubomba ifyo Baibolo yalanda ukuti e fyo bakangalila balingile ukulabomba!”—1 Tim. 3:1-7; Tito 1:5-9.

18. Bushe ababomfi ba kwa Lesa bonse banonkelamo shani mu Isukulu lya Butumikishi bwa Bufumu?

¹⁸ Ababomfi ba kwa Lesa bonse balinonkelamo nga nshi mu Isukulu lya Butumikishi bwa Bufumu. Banonkelamo shani?  Baeluda na babomfi batumikila nga bakonka ifyo basambilila muli ili isukulu, baleshiba ifya kusansamusha aba bwananyina nga filya fine Yesu alecita ku basambi bakwe. Bushe tamutemwa nga ca kuti eluda nangu umubomfi utumikila alanda nenu cikuuku cikuuku, nga alekutikisha ilyo mulelanda, nangu nga amutandalila ku kumukoselesha? (1 Tes. 5:11) Ala lipaalo nga nshi ukukwata bakangalila ba musango uyu mu cilonganino!

19. Masukulu nshi na yambi ayo Komiti ya Kusambilisha iye Bumba Litungulula yapekanya, kabili cinshi kwabela aya masukulu?

¹⁹ Amasukulu ya bulesa na yambi. Komiti ya Kusambilisha iye Bumba Litungulula yalipekanya amasukulu na yambi umo basambilisha bamunyinefwe bakwata imilimo mu kuteyanya. Aya amasukulu yabelako ukwafwa bamunyinefwe abakwata imilimo mu kuteyanya pamo nga baeluda, bakangalila benda, ababa mu ma Komiti ya Musambo, pa kuti bengalabomba bwino imilimo yabo. Aya masukulu ayasambilisha bamunyinefwe Baibolo yalabafwa ukukosa mu fya kwa Lesa no kulakonka Amalembo ilyo balecema umukuni uo Lesa abapeela.—1 Pet. 5:1-3.

20. Mulandu nshi Yesu alandile ukuti ifwe bonse ‘tukasambilishiwa kuli Yehova’?

²⁰ Ukwabula no kutwishika, Imfumu Mesia ilafwaya ukuti abakonshi baiko basambilishiwa bwino. Filya fine Yehova asambilishe Umwana wakwe, Umwana na o alisambilisha abasambi bakwe. E mulandu wine Yesu alandiile amashiwi ya kuti bonse “bakasambilishiwa kuli Yehova.” (Yoh. 6:45; Esa. 54:13) Kanshi ifwe bonse tulingile ukulafwaisha ukusambilishiwa ne Mfumu yesu mu masukulu yatupekanishisha ayo twingasangwako. E lyo kabili tufwile ukulaibukisha ukuti icikalamba ico aya masukulu yabelako kutwafwa ukutwalilila abakosa mu fya kwa Lesa pa kuti twingalabomba bwino imilimo Lesa atupeela.