1-3. Kasano a pinalawa ni Jesus ti trabaho a panangasaba, a mangibangon kadagiti ania a saludsod?

 DUA a tawen a nangasaba ni Jesus iti intero a Galilea. (Basaen ti Mateo 9:35-38.) Napan iti adu a siudad ken purok, nangisuro kadagiti sinagoga ken inkasabana ti naimbag a damag maipapan iti Pagarian. Nagdudupudop dagiti tattao iti sadinoman a nangasabaanna. Kuna ni Jesus a “dakkel ti anien” ken kasapulan ti ad-adu a trabahador.

² Inyurnos ni Jesus a palawaen ti trabaho a panangasaba. Kasano? Babaen ti panangibaonna iti 12 nga apostolna a ‘mangikasaba iti pagarian ti Dios.’ (Luc. 9:1, 2) Mabalin nga adda idi saludsod dagiti apostol no kasanoda nga aramiden daytoy a trabaho. Isu a sakbay nga imbaonna ida, siaayat a nangipaay ni Jesus iti banag nga impaay kenkuana ti nailangitan nga Amana​—panangsanay.

³ Ti saludsod ket: Ania a pannakasanay ti inawat ni Jesus manipud iti Amana? Kasano a sinanay ni Jesus dagiti apostolna? Komusta met ngay ita​—sansanayen kadi ti Mesianiko nga Ari dagiti pasurotna a mangitungpal iti ministerioda? No wen, kasano?

4. Kaano ken sadino a nasursuruan ni Jesus babaen ti Amana?

⁴ Imbaga ni Jesus nga isu ket sinursuruan ti Amana. Kabayatan ti ministeriona, kinuna ni Jesus: “Kas iti insuro kaniak ni Ama sawek dagitoy a banag.” (Juan 8:28) Kaano ken sadino a nasursuruan ni Jesus? Nabatad a nangrugi ti pannakasanayna di nagbayag kalpasan ti pannakaparsuana kas inauna nga Anak ti Dios. (Col. 1:15) Bayat ti kaadda ni Jesus iti sibay ni Amana, di mabilang ti panawen a panagimdeng ken panangpaliiwna iti ‘Naindaklan a Manangisuro.’ (Isa. 30:20) Kas resultana, isu ket naaddaan iti awan kapadana nga edukasion maipapan kadagiti kualidad, aramid, ken panggep ti Amana.

5. Ania nga instruksion ti inted ti Ama iti Anak maipapan iti ministerio nga itungpalna ditoy daga?

⁵ Iti umiso a tiempo, sinuruan ni Jehova ti Anakna maipapan iti ministeriona ditoy daga. Usigentayo ti padto a mangipakita iti relasion ti Naindaklan a Manangisuro ken ti inauna nga Anakna. (Basaen ti Isaias 50:4, 5.) Kuna ti padto a “binigat” a ririingen ni Jehova ti Anakna. Dayta a termino iladawanna ti maysa a mannursuro  a nasapa a mangriing iti estudiantena tapno suruanna. Kuna ti maysa a reperensia ti Biblia: “Ni Jehova . . . kas man la ipanna ni Jesus iti eskuelaan kas maysa nga estudiante sa isurona no ania ti ikasabana ken no kasano.” Iti dayta a “nailangitan” nga eskuelaan, insuro ni Jehova iti Anakna ti ‘ibaga ken sawenna.’ (Juan 12:49) Nangted pay ti Ama iti instruksion iti Anakna no kasano ti mangisuro. a Idi adda ni Jesus ditoy daga, impakatna ti pannakasanayna saan laeng nga iti panangitungpalna iti ministeriona no di pay ket iti panangsanay kadagiti pasurotna a mangitungpal iti ministerioda.

6, 7. (a) Kasano a sinanay ni Jesus dagiti apostolna, ken kasano a nakatulong daytoy kadakuada? (b) Ania a pannakasanay ti sinigurado ni Jesus nga awaten dagiti pasurotna iti kaaldawantayo?

⁶ Kas nadakamat iti rugi daytoy a kapitulo, kasano a sinanay ni Jesus dagiti apostolna? Sigun iti Mateo kapitulo 10, nangted iti espesipiko nga instruksion a pakairamanan dagiti sumaganad: no sadino ti pangasabaanda (bersikulo 5, 6), no ania a mensahe ti ikasabada (bersikulo 7), ti pateg ti panagtalekda ken ni Jehova (bersikulo 9, 10), no kasanoda nga asitgan dagiti bumalay (bersikulo 11-13), no ania ti aramidenda no di umawat ti bumalay (bersikulo 14, 15), ken no maidadanesda (bersikulo 16-23). b Ti panangsanay nga impaay ni Jesus ket nakatulong kadagiti apostolna a mangidaulo iti trabaho a panangikasaba iti naimbag a damag idi umuna a siglo C.E.

⁷ Komusta met ngay ita? Ni Jesus, nga Ari ti Pagarian ti Dios, inikkanna dagiti pasurotna iti kapatgan nga annongen​—ti panangikasaba iti “naimbag a damag ti pagarian . . . iti intero a mapagnaedan a daga maipaay a pangsaksi kadagiti amin a nasion.” (Mat. 24:14) Sinanaynatayo kadi ti Ari a mangitungpal iti daytoy a kapatgan a trabaho? Wen! Manipud langit, sinigurado ti Ari a masanay dagiti pasurotna no kasano ti mangasaba ken no kasano nga itungpal dagiti naisangsangayan a responsabilidad a kakuykuyog daytoy.

8, 9. (a) Ania ti kangrunaan idi a panggep ti Teokratiko nga Eskuelaan ti Panagministro? (b) Kasano a nakatulong kenka ti Teokratiko nga Eskuelaan ti Panagministro nga agbalin a mas epektibo iti ministerio?

⁸ Nabayagen nga us-usaren ti organisasion ni Jehova dagiti asamblea, kombension, ken gimong ti kongregasion​—kas iti Gimong ti Serbisio​—a mangsanay iti ili ti Dios para iti ministerio. Nupay kasta, nangrugi idi 1940’s, nangyurnos dagiti kakabsat a mangidadaulo iti hedkuarter iti panangsanay babaen kadagiti nagduduma nga eskuelaan.

⁹ Teokratiko nga Eskuelaan ti Panagministro. Kas naammuantayo iti napalabas a kapitulo, nangrugi ti pannakaikondukta daytoy nga eskuelaan idi 1943. Ti laeng kadi panggep daytoy nga eskuelaan ket tapno masanay dagiti estudiante a mangipaay kadagiti epektibo a palawag kadagiti gimong ti kongregasion? Saan. Saan a nagbaliw ti kangrunaan a panggep daytoy nga eskuelaan​—tapno masanay ti ili ti Dios a mangusar iti sagutda nga agsao a mangidaydayaw ken ni Jehova iti ministerio. (Sal. 150:6)  Amin a kakabsat a nagpalista idi iti daytoy nga eskuelaan ket natulongan nga agbalin a mas epektibo a ministro ti Pagarian. Ita, maipapaayen daytoy a pannakasanay babaen ti gimong iti tengnga ti lawas.

10, 11. Siasino itan ti mabalin nga ageskuela iti Gilead School, ken ania ti panggep daytoy nga eskuelaan?

¹⁰ Watchtower Bible School of Gilead. Ti maaw-awagan itan a Watchtower Bible School of Gilead ket nangrugi iti aldaw ti Lunes, Pebrero 1, 1943. Idi damo, nairanta daytoy nga eskuelaan a mangsanay kadagiti payunir ken dadduma pay nga agserserbi iti amin a tiempo nga agbalin a misionero iti sadinoman a paset ti lubong. Ngem nangrugi idi Oktubre 2011, dagiti maawis iti daytoy nga eskuelaan ket dagiti laengen agserserbi kas special pioneer, agdaldaliasat a manangaywan ken dagiti assawada, Bethelite, ken misionero a saan pay a nakapagadal iti daytoy nga eskuelaan.

¹¹ Ania ti panggep ti Gilead School? Kuna ti maysa a nabayagen nga instruktor: “Tapno mapabileg ti pammati dagiti estudiante babaen ti nauneg a panangadal iti Sao ti Dios ken tapno mapatanor dagiti naespirituan a kualidad a kasapulanda, iti kasta, mapagballigianda dagiti karit iti panangitungpalda kadagiti annongenda. Ti maysa pay a napateg a panggep daytoy nga eskuelaan ket tapno maparayray ti tarigagay dagiti estudiante a makiraman iti trabaho a panagebanghelio.”​—Efe. 4:11.

12, 13. Ania ti epekto ti Gilead School iti sangalubongan a trabaho a panangasaba? Mangtedkayo iti pagarigan.

¹² Ania ti epekto ti Gilead School iti sangalubongan a trabaho a panangasaba? Manipud idi 1943, nasuroken a 8,500 ti nasanay iti daytoy nga eskuelaan. c Dagiti misionero a nasanay iti Gilead ket nagserbi iti nasurok a 170 a dagdaga iti intero a lubong. Inusar a naimbag dagiti misionero ti pannakasanayda, mapagulidanan ti kinaregtada iti ministerio ken sinanayda dagiti dadduma a mangaramid met iti kasta. Iti adu a kasasaad, dagiti misionero ti mangidadaulo iti trabaho kadagiti lugar a manmano, no adda man, ti agibumbunannag iti Pagarian.

¹³ Usigentayo ti napasamak iti Japan. Gistay naisardeng ti organisado a panangasaba iti publiko bayat ti Sangalubongan a Gubat II. Idi Agosto 1949, awan pay sangapulo ti agibumbunannag iti Japan. Ngem iti ngudo dayta a tawen, adda 13 a misionero a nasanay iti Gilead nga okupado a mangaskasaba sadiay. Adu pay a misionero ti nagsangpet. Idi damo, kadagiti laeng dadakkel a siudad ti nangaskasabaan dagiti misionero ngem idi agangay, immakarda kadagiti dadduma pay a siudad. Naimpusuan a pinaregta dagiti misionero dagiti iyad-adalanda ken ti dadduma pay nga agpayunir. Nagsayaat ti resulta ti kinapinget dagiti misionero. Ita, nasuroken a 216,000 ti mangiwarwaragawag iti Pagarian iti Japan, ken agarup 40 a porsiento kadakuada ti agserserbi kas payunir! d

14. Dagiti teokratiko nga eskuelaan ket nabatad a pammaneknek ti ania? (Kitaenyo met ti kahon a “ Dagiti Eskuelaan a Pakasanayan Dagiti Ministro ti Pagarian.”)

¹⁴ Dadduma pay a teokratiko nga eskuelaan. Ti Pioneer Service School, Bible School for Christian Couples, ken ti Bible School for Single Brothers tinulonganna dagiti estudiante a rumang-ay iti naespirituan ken agbalin a naregta a mangidaulo iti trabaho a panagebanghelio. e Amin dagitoy a teokratiko nga eskuelaan ket  nabatad a pammaneknek a ti Ari naan-anay nga insaganana dagiti pasurotna a mangitungpal iti ministerioda.​—2 Tim. 4:5.

15. Iti ania a pamay-an a dagiti lallaki nga addaan iti responsabilidad tultuladenda ni Jesus?

¹⁵ Subliantayo ti padto ni Isaias maipapan iti panangisuro ti Dios ken ni Jesus. Iti dayta a nailangitan nga “eskuelaan,” nasursuro ti Anak no kasano a sungbatan iti umiso a sao daydiay nabannog. (Isa. 50:4) Inyaplikar ni Jesus dayta nga instruksion; ket bayat ti kaaddana ditoy daga, binang-aranna dagidiay “mabambannogan ken madagdagsenan.” (Mat. 11:28-30) Kas panangtulad ken Jesus, dagiti lallaki nga addaan iti responsabilidad kayatda a bang-aran dagiti kakabsatda. Tapno maaramidda dayta, naipasdek ti nagduduma nga eskuelaan a tumulong kadagiti kualipikado a kakabsat nga agbalin a mas epektibo iti panagserbida kadagiti kapammatianda.

16, 17. Ania ti panggep ti Kingdom Ministry School? (Kitaenyo met ti footnote.)

¹⁶ Kingdom Ministry School. Nangrugi idi Marso 9, 1959 ti umuna a klase daytoy nga eskuelaan iti South Lansing, New York. Naawis nga ageskuela iti makabulan dagiti agdaldaliasat a  manangaywan ken dagiti adipen ti kongregasion. Di nagbayag, ti Ingles a kurso ket naipatarus iti dadduma pay a lengguahe ken in-inut a nasanay iti daytoy nga eskuelaan dagiti kakabsat a lallaki iti intero a lubong. f

¹⁷ Maipapan iti panggep ti Kingdom Ministry School, kuna ti 1962 Yearbook of Jehovah’s Witnesses: “Iti daytoy okupado unay a lubong, ti manangaywan iti kongregasion dagiti saksi ni Jehova ket masapul a daydiay makabael a mangorganisar iti biagna tapno maipaayanna iti maitutop nga atension ti amin a kakabsat ken agbalin a bendision iti kongregasion. Nupay kasta, saan a rumbeng a baybay-anna ti pamiliana tapno laeng maasikasona ti kongregasion no di ket agbalin koma a balanse. Anian a naisangsangayan nga oportunidad ti naipaay kadagiti adipen ti kongregasion [koordineytor ti bagi dagiti panglakayen itan] iti intero a lubong a maaw-awis iti Kingdom Ministry School tapno masanayda a mangitungpal iti kuna ti Biblia a rumbeng nga aramiden ti maysa a manangaywan!”​—1 Tim. 3:1-7; Tito 1:5-9.

18. Kasano a mabembenepisiaran ti intero nga ili ti Dios iti Kingdom Ministry School?

¹⁸ Mabembenepisiaran ti intero nga ili ti Dios iti Kingdom Ministry School. Kasano? No iyaplikar dagiti panglakayen ken  ministerial nga adipen dagiti nasursuroda iti daytoy nga eskuelaan, agbalinda a kas ken Jesus a makapabang-ar kadagiti kapammatianda. Ap-apresiarem kadi ti naayat a panglakayen wenno ministerial nga adipen a nadungngo ti panagsasaona, sidadaan a dumngeg, ken bumisbisita tapno paregtaennaka? (1 Tes. 5:11) Talaga a bendision iti kongregasion dagiti kasta a kualipikado a lallaki!

19. Ania pay nga eskuelaan ti imatmatonan ti Teaching Committee, ken ania ti panggep dagita nga eskuelaan?

¹⁹ Dadduma pay a teokratiko nga eskuelaan. Imatmatonan ti Teaching Committee ti Bagi a Manarawidwid ti dadduma pay nga eskuelaan a mangsanay kadagiti kakabsat a lallaki nga addaan iti responsabilidad iti organisasion. Dagita nga eskuelaan ket nairanta a tumulong kadagiti responsable a kakabsat​—panglakayen iti kongregasion, agdaldaliasat a manangaywan, ken miembro ti Branch Committee​—nga agbalin a mas epektibo iti panangibaklayda kadagiti adu a responsabilidadda. Dagitoy a kurso a naibatay iti Biblia paregtaenna dagiti kakabsat a lallaki a mangtaginayon iti espiritualidadda ken mangyaplikar kadagiti Nainkasuratan a prinsipio iti pannakilangenda iti napateg nga arban ni Jehova a naitalek kadakuada.​—1 Ped. 5:1-3.

20. Apay a naikuna ni Jesus nga amintayo ket “sinursuruan ni Jehova,” ken ania ti determinado nga aramidem?

²⁰ Nalawag a sigsiguraduen ti Mesianiko nga Ari a masanay a naimbag dagiti pasurotna. Amin a pannakasanaytayo ket naggapu ken ni Jehova. Ni Jehova sinanayna ti Anakna, ti Anak sinanayna dagiti pasurotna. Dayta ti gapuna a kinuna ni Jesus nga amintayo ket “sinursuruan ni Jehova.” (Juan 6:45; Isa. 54:13) Determinadotayo ngarud koma a manggundaway a naan-anay iti pannakasanay nga ipapaay ti Aritayo​. Ken laglagipentayo a ti kangrunaan a panggep daytoy a panangsanay ket tapno matulongantayo nga agtalinaed a natibker iti naespirituan, iti kasta, naan-anay a maitungpaltayo ti ministeriotayo.