1-3. Jesus okwa li a tamununa mo ngahelipi oilonga yokuudifa, naasho otashi pendula omapulo elipi?

JESUS okwa kala ta udifa muGalilea oule womido mbali. (Lesha Mateus 9:35-38.) Okwa udifila moilando nomomikunda dihapu onghundana iwa yOuhamba nokuhonga meeshinagoga. Keshe opo a li ta udifile, eemhunga dovanhu oda li hadi uya okupwilikina kuye. Nomolwaasho, okwa tile, “oilya oi li po ihapu,” osho tashi ulike kutya opa li pa pumbiwa ovateyi vahapu.

² Onghee hano, Jesus okwa li a ninga omalongekido opo oilonga yokuudifa i dule okutamununwa mo. Tete, okwa li a tuma ovayapostoli vaye 12 ‘va ka udife ouhamba waKalunga.’ (Luk. 9:1, 2) Ovayapostoli otashi dulika va li tave lipula kombinga yanghee ve na okulonga oshilonga osho. Ndele fimbo Jesus ine va tuma, okwa li e va deula pahole, ngaashi ashike naye a deulwa kuXe womeulu.

³ Osho otashi pendula omapulo ngaashi kutya: Jesus okwa li a pewa edeulo la tya ngahelipi kuXe? Okwa li a pa ovayapostoli vaye edeulo la tya ngahelipi? Mbela nokunena Ohamba yopaMessias ohai deula ovashikuli vayo opo va dule okuwanifa po oukalele wavo? Ngeenge osho, ohai shi ningi ngahelipi?

4. Onaini nopeni Jesus a hongelwa kuXe?

⁴ Jesus okwa li a dimina filufilu kutya okwa hongwa kuXe. Pefimbo loukalele waye wokombada yedu, okwa tile: ‘Osho Tate e shi longa nge, osho ashike handi shi tongo.’ (Joh. 8:28) Onaini nopeni Jesus a hongelwa kuXe? Kape na omalimbililo kutya okwa hovela okuhongwa diva konima eshi a shitwa e li omudalwa wotete waKalunga. (Kol. 1:15) Eshi a li puXe meulu, okwa kala ta pwilikine oule womido dihapudihapu nokutala nhumbi Xe, oo e li ‘Omuhongi Munenenene,’ ta ningi oinima. (Isa. 30:20, NW) Oshidjemo, okwe lihonga shihapu kombinga yomaukwatya, oilonga nosho yo omalalakano aXe.

5. Jesus okwa li a hongwa shike kuXe shi na sha noukalele oo a li ta ka wanifa po kombada yedu?

⁵ Lwanima, Jehova okwa li a honga Omona kombinga youkalele oo e ke mu lineekelela kombada yedu. Tala kexunganeko olo tali popi nghee Omuhongi Munenenene a li ha hongo  Omona waye omudalwa wotete. (Lesha Jesaja 50:4, 5.) Exunganeko olo ola ti kutya Jehova okwa li ha pendula Omona “keshe ongula.” Omupopyofano oo otau yandje ediladilo lomuhongi oo ha pendula omuhongwa waye ongula inene opo e mu honge. Embo limwe li na sha nomauyelele a pamba Ombibeli ola ti: ‘Oku shi popya pafaneko, Jehova okwa li he mu twala kofikola ngaashi omunafikola noku mu honga osho e na okuudifa nonghee e na oku shi ninga.’ Jehova okwa li ha hongo Omona waye mofikola oyo yopafaneko yomeulu shi na sha naasho e “noku shi popya naashi [e] noku shi tonga.” (Joh. 12:49) Okwa li yo a honga Omona nhumbi e na okuhonga ovanhu. * Eshi Jesus a li kombada yedu, okwa li a tula moilonga osho a hongwa kuXe mokuwanifa po oukalele waye, nokudeula yo ovashikuli vaye va dule okuwanifa po oukalele wavo.

6, 7. (a) Jesus okwa li a deula ngahelipi ovayapostoli vaye, naasho oshe va kwafela va dule okuninga shike? (b) Jesus okwa shilipaleka kutya ovashikuli vaye ova mona edeula la tya ngahelipi kunena?

⁶ Jesus okwa li a deula ngahelipi ovayapostoli vaye ngaashi sha popiwa metetekelo? PaMateus etukulwa 10, okwa li e va pa omalombwelo okondadalunde e na sha noukalele, oo a kwatela mo oinima ngaashi: openi ve na oku ka udifila (ovelishe 5, 6), etumwalaka olo ve na okuudifa (ovelishe 7), nghee sha fimana okukala ve lineekela muJehova (ovelishe 9, 10), nghee ve na okukundafana novaneumbo (ovelishe 11-13), nghee ve na okuungaunga naavo vehe na ohokwe (ovelishe 14, 15) nosho yo nghee ve na okuungaunga nomapataneko (ovelishe 16-23). * Edeulo olo nouyelele oo owa li wa kwafela ovayapostoli va dule okukwatela komesho oilonga yokuudifa onghundana iwa pefimbo olo.

⁷ Ongahelipi kunena? Jesus, oo paife e li Ohamba yOuhamba waKalunga, okwa pa ovashikuli vaye oshinakuwanifwa sha kwata moiti shokuudifa “evangeli eli louhamba . . . li ningile oiwana aishe ondombwedi.” (Mat. 24:14) Kunena Ohamba oyo ohai tu deula ngoo opo tu dule okulonga oilonga oyo ya fimanenena? Osho naanaa. Nonande Ohamba oyo oi li meulu, otai shilipaleke kutya ohatu deulwa nawa opo tu dule okuudifila vamwe onghundana iwa nonghee tu na okuwanifa po oinakuwanifwa ye likalekelwa meongalo.

8, 9. (a) Elalakano la fimanenena lOfikola yOkudeula Ovaudifi olilipi? (b) Okwoongala kwomokati koshivike okwe ku kwafela ngahelipi?

⁸ Ehangano laJehova ola kala tali longifa oyoongalele nokwoongala kweongalo, unene tuu Okwoongala kwoPailonga, opo li tu deulile oukalele. Ndele okuhovela mo 1940 nasha, ovamwatate ovo tava kwatele komesho keembelewa detu da kula ova li va hovela okuunganeka pa kale eefikola dihapu doku tu deula.

⁹ Ofikola yOkudeula Ovaudifi. Ngaashi sha tumbulwa metukulwa la tetekela, ofikola oyo oya hovela mo 1943. Mbela elalakano lofikola oyo ola li ashike okudeula ovanafikola va  kale ve shii okuyandja nawa oipopiwa meongalo? Hasho. Elalakano la fimanenena lofikola oyo ola li okudeula oshiwana shaJehova shi dule oku mu tanga moukalele. (Eps. 150:6) Edeulo olo nouyelele oo owa li wa kwafela ovayapostoli va dule okukwatela komesho oilonga yokuudifa onghundana iwa pefimbo olo. Paife edeulo olo ohali yandjwa okupitila mokwoongala kwomokati koshivike.

10, 11. Mopaife, oolyelye tava dulu okuya kOfikola yaGilead, nelalakano lofikola oyo olilipi?

¹⁰ Ofikola yOmbibeli yoWatchtower yaGilead. Ofikola oyo oya li ya hovela mOmaandaxa, 1 Februali 1943. Potete, oya li ya nuninwa okudeula ovakokolindjila nosho yo ovalongi vefimbo li yadi vakwao va ninge ovatumwa nova tuminwe koitukulwa i lili noku lili mounyuni. Ndele okudja muOktoba 2011, oya hovela okukala ashike hai tambula ovo ve li nale moilonga yefimbo li yadi ye likalekelwa, ngaashi ovakokolindjila ve likalekelwa, ovapashukili ovaendi novakulukadi vavo, Ovabetel nosho yo ovatumwa ovo inava enda nale mofikola oyo.

¹¹ Elalakano lofikola oyo olashike? Omumwatate umwe oo a honga efimbo lile mofikola oyo okwa ti: “Okupameka eitavelo lovanafikola okupitila mokukonakona moule Eendjovo daKalunga noku va kwafela va kulike omaukwatya opamhepo oo va pumbwa opo va dule okuungaunga nomupondo nomashongo oo hava shakeneke eshi tava wanifa po oinakuwanifwa yavo. Elalakano layo limwe vali la fimana olo okukwafela ovanafikola va kale va halelela okukufa ombinga moilonga yokuudifa.” — Ef. 4:11.

12, 13. Ofikola yaGilead oya xumifa komesho ngahelipi oilonga yetu yokuudifa mounyuni aushe? Yandja oshihopaenenwa.

¹² Ofikola yaGilead oya xumifa komesho ngahelipi oilonga yetu yokuudifa mounyuni aushe? Okudja mo 1943, mofikola oyo * omwa deulwa ovanhu va konda po 8 500, ovo va tuminwa koilongo i dulife pe 170 mounyuni aushe va ka longe ve li ovatumwa. Ovatumwa ohava tula moilonga osho ve lihonga, hava tula po oshihopaenenwa shiwa shokulonga nouladi moukalele nokudeula vamwe va ninge sha faafana. Peemhito dihapu, ovatumwa ova kala tava kwatele komesho oilonga yokuudifa koitukulwa oko ku na ovaudifi vOuhamba vanini ile kuhe na sha.

¹³ Diladila kwaasho sha li sha ningwa po muJapani, omo ovaudifi va li va efa okuudifa moipafi pefimbo lOita Itivali yOunyuni. MuAuguste 1949, muJapani omwa li ovaudifi vOvajapani inava konda pomulongo. Ndele okuuya pexulilo lodula oyo, omwa hangwa mwa tuminwa ovatumwa 13 ovo va deulwa kofikola yaGilead. Lwanima omwa ka tuminwa vali ovatumwa vahapu. Potete, ovatumwa ova li tava yandje unene elitulemo koilando oyo inenenene, nomokweendela ko kwefimbo ove ke lihanena moilando imwe i lili. Ova kala tava ladipike ovakonakonimbibeli vavo nosho yo vamwe va ninge ovakokolindjila, noilonga yavo youladi oya li ya etifa oidjemo  iwa. Paife muJapani omu na ovaudifi va konda po 216 000, novaudifi eeperesenda hanga 40 ove li ovakokolindjila. *

14. Eefikola dehangano otadi yandje oumbangi wa kola u na sha nashike? (Tala yo oshimhungu “ Eefikola odo hadi deula ovakalele vOuhamba,” epandja 188.)

¹⁴ Eefikola dikwao dehangano. Ofikola yOkudeula Ovakokolindjila, Ofikola yOmbibeli yOkudeula Ovalihomboli Ovakriste nOfikola yOmbibeli yOkudeula Ovamwatate Inava Hombola oda kwafela ovaudifi va kulike omaukwatya opamhepo nova kale tava kwatele komesho nouladi oilonga yokuudifa. * Eefikola odo otadi yandje oumbangi wa kola kutya Ohamba yetu otai tu kwafele tu wanife po nawa oukalele wetu. — 2 Tim. 4:5.

15. Ovamwatate voshinakuwanifwa ohava kala va hala okuhopaenena ngahelipi Jesus?

¹⁵ Oto dimbuluka exunganeko laJesaja olo tali popi nhumbi Jesus a li ha hongwa kuXe? Ofikola oyo yomeulu yopafaneko oya kwafela Jesus a kale e “nounongo okuyakula nokutwa ouladi ava va loloka.” (Jes. 50:4) Okwa li a tula moilonga osho e li honga; fimbo a li kombada yedu okwa li ha tulumukifa ovo hava ‘longo nova lolokifwa.’ (Mat. 11:28-30)  Ngaashi Jesus, ovo tava kwatele komesho ohava kala va hala okutulumukifa oilyo yeongalo. Nomolwaasho, opa totwa eefikola di lili noku lili opo ovamwatate ovo va kwafelwe va dule okuyakula nawa ovaitaveli vakwao.

16, 17. Elalakano lOfikola yOukalele wOuhamba olilipi? (Tala yo eshangelo lopedu.)

¹⁶ Ofikola yOukalele wOuhamba. Ofikola oyo oya li ya ningwa oshikando shotete mo 9 Marsa 1959, muSouth Lansing, muNew York. Pomhito oyo, okwa li kwa shivwa ovapashukili ovaendi novapiya vomaongalo va pewe edeulo oule womwedi. Lwanima, oya ka kala tai ningwa momalaka amwe e lili, shihe fi ashike mOshiingilisha noya ka hovela okukala tai ningwa mounyuni aushe. *

¹⁷ Embo limwe lokomudo (1962 Yearbook of Jehovah’s Witnesses) ola li la yelifa elalakano lOfikola yOukalele wOuhamba la ti: “Mounyuni ou we lipyakidila, omunhu oo e li omupashukili meongalo lEendombwedi daJehova okwa pumbwa okukala he liunganeke nawa opo a dule okuyandja elitulemo la wana koilyo aishe yeongalo noku i kwafela. Pefimbo opo tuu opo, ke na okulipwililikila eemhumbwe doukwaneumbo waye, ndele oku na okulongifa eendunge dokuyoolola. Kau fi  tuu oufembanghenda munene kovapiya vomaongalo okushivwa mounyuni aushe ve uye kOfikola yOukalele wOuhamba opo va deulwe va dule okulonga oilonga oyo Ombibeli ya ti oi na okulongwa komupashukili!” — 1 Tim. 3:1-7; Tit. 1:5-9.

18. Atusheni tu li oshiwana shaKalunga ohatu mono ouwa ngahelipi mOfikola yOukalele wOuhamba?

¹⁸ Atusheni tu li oshiwana shaKalunga ohatu mono ouwa mOfikola yOukalele wOuhamba. Ngahelipi mbela? Ngeenge ovakulunhuongalo novayakuliongalo tava tula moilonga osho ve lihonga mofikola oyo, ohava tulumukifa ovaitaveli vakwao ngaashi naanaa Jesus a li ha ningi. Mbela iho shi pandula ngeenge omukulunhuongalo ile omuyakuliongalo, oo e na ko nasha naave, te ku hekeleke, ta pwilikine kwoove nelitulemo ile e uya oku ku talela po nelalakano loku ku twa omukumo? (1 Tes. 5:11) Ovalumenhu va tya ngaho kave li tuu enangekonoupuna keongalo!

19. Okomitiye yOkuhonga yOlutuwiliki ohai pashukile eefikola dimwe vali dilipi, nelalakano leefikola odo olilipi?

¹⁹ Eefikola dikwao. Okomitiye yOkuhonga yOlutuwiliki ohai pashukile eefikola dikwao odo hadi deula ovamwatate voinakuwanifwa, ngaashi ovakulunhuongalo, ovapashukili ovaendi noilyo yEekomitiye dOitaimbelewa, opo va kale hava wanifa po nawa oinakuwanifwa yavo. Eefikola odo dopaMbibeli ohadi ladipike ovamwatave ovo opo va kale tave lipashukile pamhepo nova tule moilonga omafinamhango Ombibeli eshi tava ungaunga needi daJehova di na ondilo odo ve lineekelelwa. — 1 Pet. 5:1-3.

20. Omolwashike sha yeleka eshi Jesus a ti kutya aveshe ova “longwa kuKalunga,” nowa tokola toko okuninga shike?

²⁰ Osha yela filufilu kutya Ohamba yopaMessias oya shilipaleka kutya ovashikuli vayo ova deulwa nawa. Edeulo alishe olo ohali di pombada kuJehova okupitila mOmona waye. Onghee hano, osha yeleka eshi Jesus a ti kutya aveshe ova “longwa kuKalunga.” (Joh. 6:45; Jes. 54:13) Natu kaleni twa lenga edeulo olo hatu pewa okupitila mOhamba yetu. Natu dimbulukweni yo kutya elalakano lehongo olo oku tu kwafela tu kale twa pama pamhepo opo tu dule okuwanifa po nawa oukalele wetu.