ជំពូកទី១៧
ការបង្ហាត់បង្រៀនអ្នកបម្រើរាជាណាចក្រព្រះ
១-៣. តើលោកយេស៊ូបានពង្រីកកិច្ចផ្សព្វផ្សាយយ៉ាងដូចម្ដេច ហើយតើនេះធ្វើឲ្យយើងមានសំណួរអ្វីខ្លះ?
អស់រយៈពេលពីរឆ្នាំ លោកយេស៊ូបានផ្សព្វផ្សាយនៅតំបន់កាលីឡេ។ (សូមអាន ម៉ាថាយ ៩:៣៥-៣៨) លោកបានទៅក្រុងនិងភូមិជាច្រើន ដោយបង្រៀននៅក្នុងសាលាប្រជុំនិងផ្សព្វផ្សាយដំណឹងល្អអំពីរាជាណាចក្រព្រះ។ កន្លែងណាដែលលោកទៅ មនុស្សតែងចោមរោមលោក។ លោកយេស៊ូសង្កេតឃើញថា៖ «ផលដំណាំដែលត្រូវប្រមូលមានច្រើនមែន» ហើយត្រូវការកម្មករថែមទៀតដើម្បីជួយប្រមូលផលដំណាំនោះ។
២ លោកយេស៊ូបានរៀបចំដើម្បីពង្រីកទំហំនៃការផ្សព្វផ្សាយនោះ។ តើតាមរបៀបណា? គឺលោកបានចាត់សាវ័ក១២នាក់«ឲ្យទៅផ្សព្វផ្សាយអំពីរាជាណាចក្ររបស់ព្រះ»។ (លូក. ៩:១, ២) ពួកសាវ័កប្រហែលជាមានសំណួរអំពីរបៀបបំពេញកិច្ចការនោះ។ មុនលោកយេស៊ូចាត់ពួកគេទៅ លោកបានបង្ហាញសេចក្ដីស្រឡាញ់ដោយផ្ដល់អ្វីមួយដែលបិតារបស់លោកបានផ្ដល់ឲ្យលោកផងដែរ ពោលគឺការបង្ហាត់បង្រៀន។
៣ នេះធ្វើឲ្យយើងមានសំណួរមួយចំនួនដូចជា តើលោកយេស៊ូបានទទួលការបង្ហាត់បង្រៀនអ្វីខ្លះពីបិតារបស់លោក? តើលោកយេស៊ូបានផ្ដល់ការបង្ហាត់បង្រៀនអ្វីខ្លះដល់អ្នកកាន់តាមលោក? ហើយចុះយ៉ាងណាសព្វថ្ងៃនេះវិញ តើស្តេចនៃរាជាណាចក្ររបស់មេស្ស៊ីបានបង្ហាត់បង្រៀនអ្នកកាន់តាមលោកឲ្យបំពេញកិច្ចបម្រើឬទេ? បើលោកបានបង្ហាត់បង្រៀនពួកគេមែន តើលោកបានបង្រៀនពួកគេតាមរបៀបណា?
«ខ្ញុំនិយាយអ្វីៗដែលបិតានៅស្ថានសួគ៌បានបង្រៀនខ្ញុំ»
៤. តើលោកយេស៊ូបានត្រូវបង្ហាត់បង្រៀនដោយបិតាលោកនៅកន្លែងណា និងនៅពេលណា?
៤ លោកយេស៊ូបានមានប្រសាសន៍យ៉ាងច្បាស់ថា បិតារបស់លោកបានបង្រៀនលោក។ ក្នុងអំឡុងកិច្ចបម្រើរបស់លោកយេស៊ូ លោកមានប្រសាសន៍ថា៖ «ខ្ញុំនិយាយអ្វីៗដែលបិតានៅស្ថានសួគ៌បានបង្រៀនខ្ញុំ»។ (យ៉ូន. ៨:២៨) តើលោកយេស៊ូបានត្រូវបង្ហាត់បង្រៀនដោយបិតាលោកនៅកន្លែងណា និងនៅពេលណា? តាមមើលទៅ លោកយេស៊ូដែលជាបុត្រច្បងរបស់ព្រះចាប់ផ្ដើមទទួលការបង្ហាត់បង្រៀនមិនយូរក្រោយពីលោកបានត្រូវបង្កើត។ (កូឡ. ១:១៥) បុត្រព្រះបានចំណាយពេលអស់រាប់លានឆ្នាំជាមួយនឹងបិតាលោកនៅស្ថានសួគ៌ ដោយស្ដាប់និងសង្កេតមើលបិតាលោកដែលជាគ្រូ ដែលគ្មាន‹គ្រូឯណាប្រៀបផ្ទឹមនឹងទ្រង់បាន›ឡើយ។ (យ៉ូប ៣៦:២២) ជាលទ្ធផល បុត្រព្រះបានទទួលការអប់រំដ៏ប្រសើរបំផុតអំពីគុណសម្បត្ដិ កិច្ចការ និងគោលបំណងរបស់បិតាលោក។
៥. តើបិតាបានបង្ហាត់បង្រៀនបុត្រលោកអ្វីខ្លះអំពីកិច្ចបម្រើដែលលោកត្រូវធ្វើនៅផែនដី?
៥ នៅពេលកំណត់ ព្រះយេហូវ៉ាបានបង្រៀនបុត្ររបស់លោកអំពីកិច្ចបម្រើដែលបុត្រលោកត្រូវធ្វើនៅផែនដី។ សូមពិចារណាទំនាយមួយដែលបញ្ជាក់ទំនាក់ទំនងរវាងគ្រូដ៏ឧត្តមបំផុត និងបុត្រច្បងរបស់លោក។ (សូមអាន អេសាយ ៥០:៤, ៥) ទំនាយនោះចែងថា ព្រះយេហូវ៉ាបានដាស់បុត្រលោក«រាល់តែព្រឹក»។ ការព័ណ៌នានេះធ្វើឲ្យនឹកឃើញគ្រូដែលដាស់សិស្សរាល់ព្រឹកដើម្បីបង្រៀនគាត់។ ឯកសារយោងមួយអំពីគម្ពីរបញ្ជាក់ថា៖ «ព្រះយេហូវ៉ា . . . ហាក់ដូចជានាំ[បុត្រ]លោកចូលសាលារៀនដូចជាសិស្សម្នាក់ ហើយបង្រៀនលោកនូវអ្វីដែលលោកត្រូវផ្សព្វផ្សាយ»។ នៅស្ថានសួគ៌ដែលប្រៀបដូចជា«សាលា»របស់បុត្រលោក នោះព្រះយេហូវ៉ាបានបង្រៀនលោកនូវ‹អ្វីដែលលោកត្រូវប្រាប់ និងអ្វីដែលលោកត្រូវនិយាយ›។ (យ៉ូន. ១២:៤៩) បិតាក៏បានបង្រៀនបុត្រលោកអំពីរបៀបបង្រៀនផងដែរ។ a កាលដែលលោកយេស៊ូនៅផែនដី លោកបានអនុវត្តអ្វីដែលលោកបានរៀនឲ្យបានប្រយោជន៍ច្រើនបំផុត មិនគ្រាន់តែដោយបំពេញកិច្ចបម្រើរបស់លោកប៉ុណ្ណោះទេ តែដោយបង្ហាត់បង្រៀនអ្នកកាន់តាមលោកឲ្យបំពេញកិច្ចបម្រើរបស់ពួកគេដែរ។
៦, ៧. (ក) តើលោកយេស៊ូបានបង្ហាត់បង្រៀនសាវ័ករបស់លោកអំពីអ្វី ហើយតើនោះបានជួយពួកគេឲ្យធ្វើអ្វីខ្លះ? (ខ) នៅសព្វថ្ងៃនេះ តើលោកយេស៊ូបានចាត់ចែងឲ្យប្រាកដថាអ្នកកាន់តាមលោកបានទទួលការបង្ហាត់បង្រៀនបែបណា?
៦ តើលោកយេស៊ូបានបង្ហាត់បង្រៀនសាវ័ករបស់លោកអំពីអ្វីខ្លះ? យោងទៅតាមម៉ាថាយជំពូកទី១០ លោកយេស៊ូបានផ្ដល់ការណែនាំជាក់លាក់អំពីការផ្សព្វផ្សាយ រួមទាំងចំណុចដូចតទៅនេះថា: ត្រូវផ្សព្វផ្សាយនៅកន្លែងណា (ខ៥និង៦) ត្រូវផ្សព្វផ្សាយអំពីអ្វី (ខ៧) ត្រូវទុកចិត្តលើព្រះយេហូវ៉ា (ខ៩និង១០) របៀបដែលត្រូវនិយាយជាមួយនឹងម្ចាស់ផ្ទះ (ខ១១-១៣) របៀបដែលត្រូវប្រព្រឹត្តពេលដែលមនុស្សមិនចង់ស្ដាប់ (ខ១៤និង១៥) និងអ្វីដែលត្រូវធ្វើពេលមានការបៀតបៀន (ខ១៦-២៣)។ b ការបង្ហាត់បង្រៀនជាក់លាក់ដែលលោកយេស៊ូបានផ្ដល់ឲ្យសាវ័ករបស់លោក បានធ្វើឲ្យពួកគេមានសមត្ថភាពនាំមុខកិច្ចផ្សព្វផ្សាយដំណឹងល្អនៅសតវត្សរ៍ទី១ គ.ស.។
៧ ចុះយ៉ាងណាវិញសព្វថ្ងៃនេះ? លោកយេស៊ូជាស្តេចនៃរាជាណាចក្ររបស់ព្រះ បានផ្ដល់ភារកិច្ចដ៏ធំបំផុតដល់អ្នកកាន់តាមលោក គឺការផ្សព្វផ្សាយ«ដំណឹងល្អនេះ . . . នៅគ្រប់ទីអាស្រ័យនៅផែនដី ដើម្បីឲ្យប្រជាជាតិទាំងឡាយបានឮ»។ (ម៉ាថ. ២៤:១៤) តើស្តេចបានបង្ហាត់បង្រៀនយើងឲ្យធ្វើកិច្ចការដ៏សំខាន់បំផុតនេះឬទេ? លោកពិតជាបានបង្ហាត់បង្រៀនយើងមែន! ពីស្ថានសួគ៌ ស្តេចបានចាត់ចែងឲ្យប្រាកដថាអ្នកកាន់តាមលោកបានទទួលការបង្ហាត់បង្រៀនអំពីរបៀបផ្សព្វផ្សាយក្រៅក្រុមជំនុំ និងអំពីរបៀបបំពេញភារកិច្ចពិសេសក្នុងក្រុមជំនុំ។
ការបង្ហាត់បង្រៀនអ្នកបម្រើឲ្យផ្សព្វផ្សាយដំណឹងល្អ
៨, ៩. (ក) តើអ្វីជាគោលបំណងសំខាន់បំផុតនៃសាលាកិច្ចបម្រើផ្សាយ? (ខ) តើតាមរបៀបណាកិច្ចប្រជុំក្នុងអំឡុងសប្ដាហ៍បានជួយអ្នកឲ្យមានប្រសិទ្ធភាពច្រើនជាងក្នុងកិច្ចបម្រើ?
៨ តាំងពីយូរយារមកហើយ អង្គការរបស់ព្រះយេហូវ៉ាបានប្រើសន្និបាត មហាសន្និបាត និងកិច្ចប្រជុំក្នុងក្រុមជំនុំ ដូចជាការប្រជុំអប់រំកិច្ចបម្រើជាដើម ដើម្បីបង្ហាត់បង្រៀនរាស្ត្ររបស់ព្រះឲ្យបំពេញកិច្ចផ្សព្វផ្សាយ។ ក៏ប៉ុន្តែ ក្រោយឆ្នាំ១៩៤០ បងប្អូនដែលនាំមុខនៅមន្ទីរចាត់ការចាប់ផ្ដើមរៀបចំការបង្ហាត់បង្រៀនតាមរយៈសាលាផ្សេងៗ។
៩ សាលាកិច្ចបម្រើផ្សាយ: ដូចយើងបានរៀននៅជំពូកទី១៦នោះ សាលាកិច្ចបម្រើផ្សាយចាប់ផ្ដើមនៅឆ្នាំ១៩៤៣។ តើគោលបំណងនៃសាលានេះត្រឹមតែបង្ហាត់បង្រៀនសិស្សដើម្បីថ្លែងសុន្ទរកថាដែលមានប្រសិទ្ធភាពនៅកិច្ចប្រជុំក្រុមជំនុំប៉ុណ្ណោះឬ? មិនមែនទេ។ គោលបំណងនៃសាលានោះគឺដើម្បីបង្ហាត់បង្រៀនរាស្ត្ររបស់ព្រះឲ្យចេះប្រើសមត្ថភាពនិយាយដើម្បីសរសើរព្រះយេហូវ៉ាក្នុងកិច្ចបម្រើផ្សាយ។ (ទំនុក. ១៥០:៦) សាលានោះបង្កើនសមត្ថភាពបងប្រុសបងស្រីទាំងអស់គ្នាដែលបានចុះឈ្មោះក្នុងសាលានោះឲ្យមានប្រសិទ្ធភាពច្រើនជាងក្នុងកិច្ចបម្រើរាជាណាចក្រ។ នៅសព្វថ្ងៃនេះ ការបង្ហាត់បង្រៀនដូចនោះបានត្រូវផ្ដល់ឲ្យតាមរយៈកិច្ចប្រជុំក្នុងអំឡុងសប្ដាហ៍។
១០, ១១. សព្វថ្ងៃនេះ តើអ្នកណាអាចចូលសាលាគីលាត ហើយតើវគ្គសិក្សានៅសាលានោះមានគោលបំណងអ្វី?
១០ សាលាគម្ពីរគីលាតនៃសមាគមប៉មយាម: សាលាដែលសព្វថ្ងៃនេះហៅថាសាលាគម្ពីរគីលាតនៃសមាគមប៉មយាម បានចាប់ផ្ដើមនៅថ្ងៃទី១ ខែកុម្ភៈ ឆ្នាំ១៩៤៣។ នៅដើមដំបូង គោលបំណងនៃសាលានោះគឺបង្ហាត់បង្រៀនអ្នកត្រួសត្រាយពេញពេលនិងអ្នកឯទៀតដែលបម្រើពេញពេល ដើម្បីធ្វើជាសាសនទូតនៅប្រទេសផ្សេង។ ប៉ុន្តែតាំងពីខែតុលា ឆ្នាំ២០១១ អ្នកដែលអាចចូលរួមបានមានតែអ្នកដែលកំពុងចូលរួមក្នុងកិច្ចបម្រើពេញពេលពិសេសប៉ុណ្ណោះ ពោលគឺអ្នកត្រួសត្រាយពិសេស អ្នកធ្វើដំណើរត្រួតពិនិត្យនិងប្រពន្ធ អ្នកបម្រើនៅបេតអែល និងសាសនទូតដែលមិនទាន់ចូលរួមសាលានោះ។
១១ តើវគ្គសិក្សានៅសាលាគីលាតមានគោលបំណងអ្វី? អ្នកបង្ហាត់បង្រៀនយូរឆ្នាំម្នាក់នៅសាលានោះឆ្លើយថា៖ «គោលបំណងគឺដើម្បីពង្រឹងជំនឿរបស់សិស្ស តាមរយៈការសិក្សាបណ្ដាំរបស់ព្រះយ៉ាងស៊ីជម្រៅ និងដើម្បីជួយពួកគេឲ្យមានគុណសម្បត្ដិគ្រប់គ្រាន់ដើម្បីបំពេញកិច្ចបម្រើរបស់ពួកគេ។ គោលបំណងសំខាន់មួយទៀតនៃសាលានោះ គឺដើម្បីជំរុញចិត្តសិស្សឲ្យចង់ចូលរួមយ៉ាងខ្លាំងក្នុងការផ្សាយដំណឹងល្អ»។—អេភ. ៤:១១
១២, ១៣. តើសាលាគីលាតមានឥទ្ធិពលយ៉ាងណាទៅលើកិច្ចផ្សព្វផ្សាយទូទាំងពិភពលោក? សូមឲ្យឧទាហរណ៍។
១២ តើសាលាគីលាតមានឥទ្ធិពលយ៉ាងណាទៅលើកិច្ចផ្សព្វផ្សាយទូទាំងពិភពលោក? តាំងពីឆ្នាំ១៩៤៣ បងប្អូនជាង៨.៥០០នាក់បានទទួលការបង្ហាត់បង្រៀននៅសាលានោះ c ហើយសាសនទូតដែលបានរៀននៅសាលានោះបានបម្រើនៅជាង១៧០ប្រទេសទូទាំងពិភពលោក។ សាសនទូតអនុវត្តការបង្ហាត់បង្រៀនដែលពួកគេបានទទួល ដោយទុកគំរូល្អស្តីអំពីការខ្នះខ្នែងផ្សព្វផ្សាយ។ ពួកគេក៏ជួយអ្នកឯទៀតឲ្យធ្វើដូច្នោះដែរ។ ក្នុងករណីជាច្រើន សាសនទូតជាអ្នកដែលបាននាំមុខកិច្ចផ្សព្វផ្សាយនៅកន្លែងដែលមិនសូវមានអ្នកផ្សព្វផ្សាយអំពីរាជាណាចក្រឬមិនមានអ្នកផ្សព្វផ្សាយសោះ។
១៣ សូមពិចារណាអំពីអ្វីដែលបានកើតឡើងនៅប្រទេសជប៉ុន។ ក្នុងអំឡុងសង្គ្រាមលោកលើកទី២ សឹងតែគ្មានការផ្សព្វផ្សាយសោះ។ មកដល់ខែសីហា ឆ្នាំ១៩៤៩ មានអ្នកផ្សាយតិចជាង១០នាក់នៅប្រទេសជប៉ុន។ ក៏ប៉ុន្តែ មកដល់ដំណាច់ឆ្នាំនោះ មានសាសនទូត១៣នាក់ដែលបានរៀននៅសាលាគីលាត កំពុងផ្សព្វផ្សាយនៅទីនោះ។ ក្រោយមក សាសនទូតច្រើននាក់ទៀតបានមក។ នៅដើមដំបូង សាសនទូតបានផ្ដោតអារម្មណ៍ទៅលើការផ្សព្វផ្សាយនៅក្រុងធំៗ។ ក្រោយមក ពួកគេបានផ្សព្វផ្សាយនៅក្រុងឯទៀត។ សាសនទូតទាំងនោះបានលើកទឹកចិត្តសិស្សគម្ពីររបស់ពួកគេ និងអ្នកឯទៀតឲ្យត្រួសត្រាយ។ ការខ្នះខ្នែងរបស់សាសនទូតបានបង្កើតផលច្រើន។ ឥឡូវមានអ្នកផ្សព្វផ្សាយរាជាណាចក្រជាង២១៦.០០០នាក់នៅប្រទេសជប៉ុន ហើយជិត៤០ភាគរយជាអ្នកត្រួសត្រាយ! d
១៤. តើសាលាផ្សេងៗរបស់អង្គការព្រះជាភ័ស្តុតាងច្បាស់លាស់អំពីអ្វី? (សូមមើលដែរនូវប្រអប់ដែលមានចំណងជើងថា« សាលាផ្សេងៗដែលបង្ហាត់បង្រៀនអ្នកបម្រើរាជាណាចក្រព្រះ»)
១៤ សាលាឯទៀតរបស់អង្គការព្រះ: សាលាសម្រាប់អ្នកត្រួសត្រាយ សាលាបង្ហាត់បង្រៀនប្ដីប្រពន្ធខាងគម្ពីរ និងសាលាបង្ហាត់បង្រៀនបងប្អូនប្រុសនៅលីវខាងគម្ពីរ បានជួយអ្នកដែលចូលរួមឲ្យពង្រឹងចំណងមិត្តភាពជាមួយនឹងព្រះ ហើយនាំមុខយ៉ាងខ្នះខ្នែងក្នុងកិច្ចផ្សព្វផ្សាយ។ e សាលាទាំងអស់នេះជាភ័ស្តុតាងច្បាស់លាស់ដែលបង្ហាញថា ស្តេចរបស់យើងបានជួយអ្នកកាន់តាមលោកឲ្យមានគ្រប់លក្ខណៈដើម្បីបំពេញកិច្ចបម្រើ។—២ធី. ៤:៥
ការបង្ហាត់បង្រៀនបងប្អូនប្រុសៗដើម្បីបំពេញភារកិច្ចពិសេស
១៥. តើបុរសដែលមានភារកិច្ចទទួលខុសត្រូវចង់ធ្វើតាមគំរូអ្វីរបស់លោកយេស៊ូ?
១៥ សូមគិតអំពីទំនាយរបស់អេសាយដែលបញ្ជាក់ថាលោកយេស៊ូនឹងត្រូវបង្ហាត់បង្រៀនដោយព្រះ។ ក្នុង«សាលា»ស្ថានសួគ៌នោះ បុត្រព្រះបានរៀនរបៀប‹ប្រើពាក្យសំដី ជ្រោងមនុស្សគ្រាកចិត្តឡើង›។ (អេ. ៥០:៤) លោកយេស៊ូបានអនុវត្តការណែនាំនោះ។ កាលដែលលោកនៅផែនដី លោកបានធ្វើឲ្យអ្នកដែល«នឿយហត់ហើយមានបន្ទុកធ្ងន់» មានកម្លាំងចិត្តឡើងវិញ។ (ម៉ាថ. ១១:២៨-៣០) តាមគំរូរបស់លោកយេស៊ូ បុរសដែលមានភារកិច្ចទទួលខុសត្រូវចង់ធ្វើឲ្យបងប្អូនមានកម្លាំងចិត្តឡើងវិញ។ ដើម្បីសម្រេចគោលបំណងនោះ សាលាផ្សេងៗបានត្រូវរៀបចំឡើង ដើម្បីជួយបងប្រុសៗដែលមានគុណសម្បត្ដិគ្រប់គ្រាន់ឲ្យមានប្រសិទ្ធភាពច្រើនជាងក្នុងការបម្រើបងប្អូនរួមជំនឿ។
១៦, ១៧. តើអ្វីជាគោលបំណងនៃសាលាកិច្ចបម្រើរាជាណាចក្រ? (សូមមើលកំណត់សម្គាល់ដែរ)
១៦ សាលាកិច្ចបម្រើរាជាណាចក្រ: វគ្គសិក្សាដំបូងបង្អស់នៃសាលានេះ បានត្រូវធ្វើឡើងនៅថ្ងៃទី៩ ខែមីនា ឆ្នាំ១៩៥៩ នៅក្រុងសោតឡានស៊ីង រដ្ឋញូវយ៉ក។ អ្នកធ្វើដំណើរត្រួតពិនិត្យព្រមទាំងអ្នកចាត់ចែងកិច្ចការពួកអ្នកចាស់ទុំបានត្រូវអញ្ជើញឲ្យចូលរួមវគ្គសិក្សាមួយខែនោះ។ ក្រោយមក វគ្គសិក្សានោះបានត្រូវបកប្រែពីភាសាអង់គ្លេសទៅជាភាសាផ្សេងៗ ហើយបន្ដិចម្ដងៗ បងប្រុសៗទូទាំងពិភពលោកចាប់ផ្ដើមទទួលការបង្ហាត់បង្រៀនពីសាលានោះ។ f
បងឡយដ៍ បារីកំពុងបង្រៀននៅសាលាកិច្ចបម្រើរាជាណាចក្រ នាប្រទេសជប៉ុន ឆ្នាំ១៩៧០
១៧ ស្តីអំពីគោលបំណងនៃសាលាកិច្ចបម្រើរាជាណាចក្រ សៀវភៅប្រចាំឆ្នាំនៃសាក្សីព្រះយេហូវ៉ា សម្រាប់ឆ្នាំ១៩៦២ បានចែងថា៖ «ក្នុងពិភពលោកដ៏រវល់ខ្លាំងនេះ អ្នកត្រួតពិនិត្យក្នុងក្រុមជំនុំរបស់សាក្សីព្រះយេហូវ៉ា ត្រូវជាបុរសដែលរៀបចំជីវិតរបស់ខ្លួនដើម្បីយកចិត្តទុកដាក់យ៉ាងត្រឹមត្រូវចំពោះបងប្អូនទាំងអស់ក្នុងក្រុមជំនុំ ហើយធ្វើជាពរសម្រាប់ពួកគេ។ ក៏ប៉ុន្តែពួកគេមិនត្រូវជួយក្រុមជំនុំរហូតដល់ភ្លេចយកចិត្តទុកដាក់ចំពោះក្រុមគ្រួសាររបស់ខ្លួនទេ ផ្ទុយទៅវិញពួកគេត្រូវចេះពិចារណា។ អ្នកចាត់ចែងកិច្ចការពួកអ្នកចាស់ទុំពីប្រទេសផ្សេងៗមានឱកាសដ៏អស្ចារ្យណាស់ គឺពួកគេអាចជួបជុំគ្នានៅសាលាកិច្ចបម្រើរាជាណាចក្រ ដើម្បីទទួលការបង្ហាត់បង្រៀនឲ្យចេះបំពេញកិច្ចការដែលគម្ពីរចែងថាអ្នកត្រួតពិនិត្យគួរបំពេញ!»។—១ធី. ៣:១-៧; ទីត. ១:៥-៩
១៨. តើតាមរបៀបណារាស្ត្រទាំងឡាយរបស់ព្រះទទួលប្រយោជន៍ពីសាលាកិច្ចបម្រើរាជាណាចក្រ?
១៨ រាស្ត្រទាំងឡាយរបស់ព្រះបានទទួលប្រយោជន៍ពីសាលាកិច្ចបម្រើរាជាណាចក្រ។ តើពួកគេបានទទួលប្រយោជន៍យ៉ាងដូចម្ដេច? ពេលអ្នកចាស់ទុំនិងជំនួយការខាងកិច្ចបម្រើអនុវត្តអ្វីដែលពួកគាត់បានរៀននៅសាលានោះ ពួកគាត់ធ្វើឲ្យបងប្អូនរួមជំនឿមានកម្លាំងចិត្តឡើងវិញ ដូចលោកយេស៊ូបានធ្វើឲ្យអ្នកឯទៀតមានកម្លាំងចិត្តឡើងវិញដែរ។ ពេលអ្នកចាស់ទុំឬជំនួយការខាងកិច្ចបម្រើ សរសើរអ្នក ស្ដាប់អ្នក ឬមកលេងផ្ទះរបស់អ្នកដើម្បីលើកទឹកចិត្ត នោះធ្វើឲ្យអ្នកសប្បាយណាស់ មែនទេ? (១ថែ. ៥:១១) បុរសដែលមានគុណសម្បត្ដិបែបនេះ ពិតជាធ្វើឲ្យក្រុមជំនុំទទួលពរមែន!
១៩. តើគណៈកម្មាធិការខាងការបង្រៀន ត្រួតពិនិត្យសាលាអ្វីទៀត ហើយតើសាលាទាំងនោះមានគោលបំណងអ្វី?
១៩ សាលាឯទៀតរបស់អង្គការព្រះ: គណៈកម្មាធិការខាងការបង្រៀននៃគណៈអភិបាល ត្រួតពិនិត្យសាលាឯទៀតដែលបង្ហាត់បង្រៀនបងប្អូនប្រុសៗឲ្យទទួលខុសត្រូវក្នុងអង្គការយើង។ សាលាទាំងនេះបានត្រូវរៀបចំឡើងដើម្បីជួយបងប្រុសៗដែលមានភារកិច្ចជាអ្នកចាស់ទុំ អ្នកធ្វើដំណើរត្រួតពិនិត្យ និងសមាជិកគណៈកម្មាធិការការិយាល័យសាខា ឲ្យបំពេញភារកិច្ចរបស់ខ្លួនដោយប្រសិទ្ធភាពច្រើនជាង។ វគ្គសិក្សាដែលមានមូលដ្ឋានលើគម្ពីរទាំងនេះ លើកទឹកចិត្តបងប្រុសៗឲ្យរក្សាចំណងមិត្តភាពជាមួយនឹងព្រះ ហើយអនុវត្តគោលការណ៍គម្ពីរក្នុងរបៀបដែលពួកគេប្រព្រឹត្តចំពោះចៀមជាទីស្រឡាញ់ដែលព្រះយេហូវ៉ាបានផ្ញើទុកនឹងពួកគេ។—១ពេ. ៥:១-៣
សាលាបង្ហាត់ខាងកិច្ចបម្រើដំបូង នៅប្រទេសម៉ាឡាវី នាឆ្នាំ២០០៧
២០. ហេតុអ្វីលោកយេស៊ូអាចមានប្រសាសន៍ថាយើងទាំងអស់គ្នា‹បានត្រូវបង្រៀនដោយព្រះយេហូវ៉ា› ហើយតើអ្នកតាំងចិត្តធ្វើអ្វី?
២០ យើងអាចឃើញច្បាស់ថា ស្តេចដែលជាមេស្ស៊ីបានចាត់ចែងឲ្យប្រាកដថាអ្នកកាន់តាមលោកបានទទួលការបង្ហាត់បង្រៀនដ៏ល្អប្រសើរ។ ការបង្ហាត់បង្រៀនទាំងអស់នោះបានត្រូវធ្វើឡើងតាមលំដាប់ថ្នាក់ គឺព្រះយេហូវ៉ាបានបង្ហាត់បង្រៀនបុត្រលោក ហើយបុត្រលោកបានបង្ហាត់បង្រៀនអ្នកកាន់តាមលោក។ ហេតុនេះហើយបានជាលោកយេស៊ូអាចមានប្រសាសន៍ថា យើងទាំងអស់គ្នា‹បានត្រូវបង្រៀនដោយព្រះយេហូវ៉ា›។ (យ៉ូន. ៦:៤៥; អេ. ៥៤:១៣) សូមឲ្យយើងតាំងចិត្តទទួលប្រយោជន៍ច្រើនបំផុតពីការបង្ហាត់បង្រៀនដែលស្តេចរបស់យើងបានរៀបចំឲ្យយើង។ ម្យ៉ាងទៀត សូមឲ្យយើងចាំមិនភ្លេចថា គោលបំណងនៃការបង្ហាត់បង្រៀននេះ គឺដើម្បីជួយយើងឲ្យរក្សាចំណងមិត្តភាពជាមួយនឹងព្រះ ហើយជាលទ្ធផលយើងអាចបំពេញកិច្ចបម្រើរបស់យើងគ្រប់ជំពូក។
a ហេតុអ្វីយើងដឹងថាបិតាបានបង្រៀនបុត្រលោកអំពីរបៀបបង្រៀន? សូមពិចារណាថាលោកយេស៊ូបានប្រើឧទាហរណ៍ជាច្រើនពេលដែលលោកបង្រៀន។ នេះគឺសមស្របតាមទំនាយដែលបានត្រូវកត់ទុករាប់រយឆ្នាំមុនលោកយេស៊ូកើតនៅផែនដី។ (ទំនុក. ៧៨:២; ម៉ាថ. ១៣:៣៤, ៣៥) ព្រះយេហូវ៉ាជាអ្នកដឹកនាំឲ្យសរសេរទំនាយនោះ។ ដូច្នេះនេះបញ្ជាក់ថាលោកបានសម្រេចចិត្តជាយូរទុកជាមុនថា បុត្ររបស់លោកនឹងបង្រៀនដោយប្រើឧទាហរណ៍។—២ធី. ៣:១៦, ១៧
b ប៉ុន្មានខែក្រោយមក លោកយេស៊ូបាន«រើសចិតសិបនាក់ទៀត ក៏ចាត់គេជាគូៗ» ដើម្បីផ្សព្វផ្សាយ។ លោកក៏បានបង្ហាត់បង្រៀនពួកគេដែរ។—លូក. ១០:១-១៦
c បងប្អូនខ្លះបានចូលរួមសាលាគីលាតលើសពីម្ដង។
d ដើម្បីដឹងថែមទៀតថាសាសនទូតពីសាលាគីលាតមានឥទ្ធិពលយ៉ាងណាទៅលើកិច្ចផ្សព្វផ្សាយទូទាំងពិភពលោក សូមមើលសៀវភៅសាក្សីព្រះយេហូវ៉ាពួកអ្នកប្រកាសរាជាណាចក្ររបស់ព្រះ (Jehovah’s Witnesses—Proclaimers of God’s Kingdom) ជំពូកទី២៣។
e សាលាទាំងពីរដែលរៀបរាប់ចុងក្រោយនោះបានត្រូវជំនួសដោយសាលាបង្ហាត់បង្រៀនអ្នកផ្សាយដំណឹងល្អអំពីរាជាណាចក្រព្រះ។
f ឥឡូវអ្នកចាស់ទុំទាំងឡាយទទួលការបង្ហាត់បង្រៀនពីសាលាកិច្ចបម្រើរាជាណាចក្រដែលមានរយៈពេលខុសៗគ្នា ហើយត្រូវរៀបចំឡើងពីរបីឆ្នាំម្ដង។ តាំងពីឆ្នាំ១៩៨៤ ជំនួយការខាងកិច្ចបម្រើក៏ទទួលការបង្ហាត់បង្រៀននៅសាលានោះដែរ។
លោកអ្នកក៏ប្រហែលជាចូលចិត្តដែរ
ទស្សនាវដ្ដី
ចូរពង្រាប«ផ្លូវដែលជើងឯងដើរ»ដើម្បីជឿនទៅមុខ
តើតាមរបៀបណាអ្នកអាចដកឧបសគ្គចេញ ហើយសម្រេចគោលដៅរបស់អ្នកក្នុងកិច្ចបម្រើព្រះ?
ទស្សនាវដ្ដី
ចូរជួយអ្នកឯទៀតឲ្យប្រើសមត្ថភាពទាំងអស់របស់ពួកគាត់
តើតាមរបៀបណាយើងអាចជួយប្អូនប្រុសវ័យក្មេង ឬបងប្អូនប្រុសដែលទើបនឹងទទួលការជ្រមុជទឹកឲ្យជឿនទៅមុខ?
