ບົດທີ 17
ຜູ້ຮັບໃຊ້ໄດ້ຮັບການຝຶກສອນຈາກລາຊະອານາຈັກ
1-3. ພະເຍຊູຂະຫຍາຍວຽກປະກາດໃຫ້ກວ້າງອອກໄປແນວໃດ ແລະເຮັດໃຫ້ເກີດຄຳຖາມຫຍັງ?
ພະເຍຊູປະກາດທົ່ວແຂວງຄາລິເລໃນລະຫວ່າງ 2 ປີ. (ອ່ານມັດທາຍ 9:35-38) ເພິ່ນໄປຫາຜູ້ຄົນໃນໝູ່ບ້ານແລະຕາມເມືອງຕ່າງໆ ເພິ່ນສອນໃນໂຮງທຳແລະປະກາດຂ່າວດີເລື່ອງລາຊະອານາຈັກ ບໍ່ວ່າເພິ່ນຈະປະກາດຢູ່ໃສ ຊາວບ້ານຊາວເມືອງກໍພາກັນໄປຟັງ. ພະເຍຊູສັງເກດເຫັນວ່າ: “ການກ່ຽວເຂົ້າມີມາກຫຼາຍ” ແລະຍັງຕ້ອງການຄົນງານອີກຈຳນວນຫຼາຍ.
2 ພະເຍຊູກຽມຂະຫຍາຍວຽກປະກາດໃຫ້ກວ້າງອອກໄປ ເພິ່ນເຮັດແນວໃດ? ເພິ່ນສົ່ງອັກຄະສາວົກ 12 ຄົນອອກໄປ “ເທສະໜາປ່າວປະກາດແຜ່ນດິນ [ລາຊະອານາຈັກ] ຂອງພະເຈົ້າ.” (ລືກາ 9:1, 2) ເຂົາເຈົ້າອາດສົງໄສວ່າຈະປະກາດແນວໃດ. ກ່ອນທີ່ພະເຍຊູຈະສົ່ງອັກຄະສາວົກອອກໄປເຮັດວຽກນີ້ ເພິ່ນກໍໄດ້ຝຶກສອນເຂົາເຈົ້າດ້ວຍຄວາມຮັກຄືກັບທີ່ເພິ່ນເຄີຍໄດ້ຮັບການຝຶກສອນຈາກພໍ່ທີ່ຢູ່ໃນສະຫວັນ.
3 ຕອນນີ້ ເຈົ້າອາດມີຄຳຖາມຫຼາຍຂໍ້ຢູ່ໃນໃຈເຊັ່ນ: ພະເຍຊູເຄີຍໄດ້ຮັບການຝຶກສອນຈາກພໍ່ຂອງເພິ່ນໃນເລື່ອງໃດແດ່? ພະເຍຊູຝຶກສອນພວກອັກຄະສາວົກເລື່ອງຫຍັງແດ່? ແລະໃນທຸກມື້ນີ້ກະສັດເມຊີໄດ້ຝຶກສອນລູກສິດຂອງເພິ່ນໃຫ້ຮູ້ວິທີປະກາດບໍ? ເພິ່ນເຮັດວິທີໃດ?
“ເຮົາໄດ້ເວົ້າຄຳທັງຫຼາຍນີ້ຕາມພະບິດາໄດ້ສັ່ງສອນເຮົາ”
4. ພະເຍຊູຮຽນຈາກພໍ່ຂອງເພິ່ນຕອນໃດແລະຢູ່ໃສ?
4 ພະເຍຊູເວົ້າໄດ້ຢ່າງເຕັມປາກວ່າພໍ່ທີ່ຢູ່ໃນສະຫວັນເປັນຜູ້ສອນເພິ່ນ. ໃນລະຫວ່າງທີ່ພະເຍຊູເຮັດວຽກຮັບໃຊ້ຢູ່ໃນໂລກ ເພິ່ນບອກວ່າ: “ເຮົາໄດ້ເວົ້າຄຳທັງຫຼາຍນີ້ຕາມພະບິດາໄດ້ສັ່ງສອນເຮົາ.” (ໂຢ. 8:28) ພະເຍຊູຮຽນຕອນໃດແລະຢູ່ໃສ? ພະເຍຊູເລີ່ມໄດ້ຮັບການຝຶກສອນບໍ່ດົນຫຼັງຈາກທີ່ເພິ່ນຖືກສ້າງຂຶ້ນມາເປັນລູກຊາຍຄົນທຳອິດຂອງພະເຈົ້າ. (ໂກໂລ. 1:15) ພະເຍຊູຢູ່ຄຽງຂ້າງພໍ່ຂອງເພິ່ນໃນສະຫວັນມາດົນຈົນບໍ່ອາດນັບເດືອນນັບປີໄດ້ ຈຶ່ງໄດ້ຟັງ ໄດ້ເຫັນ ແລະໄດ້ຮຽນຮູ້ຈາກ “ຄູອົງຍິ່ງໃຫຍ່.” (ເອຊາ. 30:20, ລ.ມ) ພະເຍຊູລູກຂອງພະເຈົ້າຈຶ່ງໄດ້ຮັບການຝຶກສອນແບບທີ່ບໍ່ເຄີຍມີມະນຸດຄົນໃດຈະທຽບໄດ້ ເຊັ່ນ: ເລື່ອງບຸກຄະລິກຂອງພໍ່ ວຽກທີ່ພໍ່ເຮັດ ແລະສິ່ງທີ່ພໍ່ຕັ້ງໃຈຈະເຮັດໃນອະນາຄົດ.
5. ພະເຢໂຫວາສອນຫຍັງກ່ຽວກັບວຽກທີ່ລູກຕ້ອງເຮັດຢູ່ໃນໂລກ?
5 ເມື່ອເຖິງເວລາ ພະເຢໂຫວາກໍສອນລູກໃຫ້ຮູ້ວ່າຈະຕ້ອງເຮັດວຽກຫຍັງແດ່ຢູ່ໃນໂລກ. ຂໍໃຫ້ຄິດເຖິງຄຳພະຍາກອນໜຶ່ງທີ່ເວົ້າເຖິງຄວາມຮັກຄວາມຜູກພັນລະຫວ່າງຄູອົງຍິ່ງໃຫຍ່ທີ່ສຸດກັບລູກຊາຍຄົນທຳອິດຂອງພະອົງ. (ອ່ານເອຊາອີ 50:4, 5) ຄຳພະຍາກອນຂໍ້ນັ້ນບອກວ່າພະເຢໂຫວາປຸກລູກຂອງພະອົງ “ມື້ເຊົ້າທຸກວັນ.” ຄຳເວົ້ານີ້ເຮັດໃຫ້ນຶກເຖິງຄູທີ່ປຸກນັກຮຽນໃຫ້ຕື່ນແຕ່ເຊົ້າເພື່ອສອນລາວ. ປຶ້ມອ້າງອີງກ່ຽວກັບຄຳພີໄບເບິນເຫຼັ້ມໜຶ່ງບອກວ່າ: ຄຳເວົ້ານີ້ “ຄືກັບວ່າພະເຢໂຫວາ . . . ພາລູກເຂົ້າໂຮງຮຽນ . . . ແລ້ວກໍສອນລູກໃຫ້ຮູ້ວ່າຈະປະກາດເລື່ອງຫຍັງແລະປະກາດແນວໃດ.” ພະເຢໂຫວາສອນລູກຂອງພະອົງໃນ “ໂຮງຮຽນ” ເທິງສະຫວັນໃຫ້ຮູ້ວ່າຈະ ‘ຕ້ອງເວົ້າຢ່າງນັ້ນແລະຕ້ອງປາກຢ່າງນີ້.’ (ໂຢ. 12:49) ແລ້ວພໍ່ກໍຍັງສອນລູກໃຫ້ຮູ້ວິທີທີ່ຈະສອນຄົນອື່ນນຳອີກ. a ໃນຂະນະທີ່ຢູ່ເທິງໂລກ ພະເຍຊູບໍ່ພຽງແຕ່ນຳຄວາມຮູ້ທີ່ໄດ້ຮຽນຈາກພໍ່ໄປໃຊ້ໃນວຽກປະກາດຂອງເພິ່ນເທົ່ານັ້ນ ແຕ່ຍັງຝຶກສອນລູກສິດໃຫ້ເຮັດວຽກຮັບໃຊ້ຂອງເຂົາເຈົ້າໄດ້ຢ່າງເກີດຜົນນຳອີກ.
6, 7. (ກ) ພະເຍຊູຝຶກສອນພວກອັກຄະສາວົກເລື່ອງຫຍັງແດ່ ແລະການຝຶກສອນນັ້ນກຽມເຂົາເຈົ້າໃຫ້ພ້ອມສຳລັບຫຍັງ? (ຂ) ພະເຍຊູເບິ່ງແຍງຜູ້ຕິດຕາມຂອງເພິ່ນໃນສະໄໝນີ້ໃຫ້ໄດ້ຮັບການຝຶກສອນເພື່ອຫຍັງ?
6 ພະເຍຊູຝຶກສອນພວກອັກຄະສາວົກເລື່ອງຫຍັງແດ່? ຕາມທີ່ບັນທຶກໄວ້ໃນມັດທາຍບົດ 10 ພະເຍຊູໃຫ້ຄຳແນະນຳທີ່ສະເພາະເຈາະຈົງເລື່ອງການປະກາດ ເຊັ່ນ: ປະກາດຢູ່ໃສ (ຂໍ້ 5, 6) ປະກາດເລື່ອງຫຍັງ (ຂໍ້ 7) ເປັນຫຍັງເຮົາຕ້ອງໄວ້ວາງໃຈພະເຢໂຫວາ (ຂໍ້ 9, 10) ຈະເວົ້າກັບຜູ້ຄົນຕາມບ້ານເຮືອນແນວໃດ (ຂໍ້ 11-13) ຈະເຮັດແນວໃດເມື່ອຖືກປະຕິເສດ (ຂໍ້ 14, 15) ແລະຈະເຮັດແນວໃດເມື່ອຖືກຂົ່ມເຫງ (ຂໍ້ 16-23). b ເມື່ອພະເຍຊູຝຶກສອນພວກອັກຄະສາວົກຢ່າງດີ ເຂົາເຈົ້າກໍພ້ອມແລ້ວທີ່ຈະເປັນຜູ້ນຳໜ້າວຽກປະກາດຂ່າວດີໃນສະໄໝສະຕະວັດທຳອິດ.
7 ແລ້ວພວກເຮົາໃນທຸກມື້ນີ້ເດ? ພະເຍຊູກະສັດຂອງລາຊະອານາຈັກພະເຈົ້າໄດ້ມອບໝາຍວຽກທີ່ສຳຄັນທີ່ສຸດໃຫ້ແກ່ຜູ້ຕິດຕາມເພິ່ນ ເຊິ່ງກໍຄື ວຽກປະກາດ ‘ຄຳປະເສີດແຫ່ງແຜ່ນດິນ [ຂ່າວດີເລື່ອງລາຊະອານາຈັກ] ຂອງພະເຈົ້າ . . . ໄປທົ່ວແຜ່ນດິນໂລກເພື່ອຈະເປັນພິຍານແກ່ພວກຕ່າງປະເທດທັງປວງ.’ (ມັດ. 24:14) ກະສັດເຍຊູໄດ້ຝຶກສອນເຮົາໃຫ້ເຮັດວຽກທີ່ສຳຄັນທີ່ສຸດນີ້ບໍ? ແນ່ນອນ! ກະສັດທີ່ຢູ່ໃນສະຫວັນເບິ່ງແຍງຜູ້ຕິດຕາມເພິ່ນ ເພື່ອເຂົາເຈົ້າຈະໄດ້ຮັບການຝຶກສອນໃຫ້ປະກາດແກ່ຄົນອື່ນໆແລະເຮັດວຽກຕ່າງໆໃນປະຊາຄົມໃຫ້ສຳເລັດ.
ຝຶກສອນຜູ້ຮັບໃຊ້ໃຫ້ປະກາດເກັ່ງຂຶ້ນ
8, 9. (ກ) ຈຸດປະສົງຫຼັກຂອງໂຮງຮຽນການຮັບໃຊ້ຕາມລະບອບຂອງພະເຈົ້າແມ່ນຫຍັງ? (ຂ) ການປະຊຸມກາງອາທິດຊ່ວຍເຈົ້າແນວໃດໃນວຽກຮັບໃຊ້?
8 ດົນນານມາແລ້ວທີ່ອົງການຂອງພະເຢໂຫວາໄດ້ຝຶກສອນປະຊາຊົນຂອງພະອົງຜ່ານທາງການປະຊຸມໃຫຍ່ແລະການປະຊຸມປະຈຳປະຊາຄົມເຊັ່ນ: ການປະຊຸມການຮັບໃຊ້ ແລະຕັ້ງແຕ່ທົດສະວັດ 1940 ພີ່ນ້ອງທີ່ນຳໜ້າເຊິ່ງຢູ່ທີ່ສຳນັກງານໃຫຍ່ໄດ້ເລີ່ມຈັດການຝຶກອົບຮົມໂດຍໃຊ້ໂຮງຮຽນຫຼາຍແບບ.
9 ໂຮງຮຽນເພື່ອການຮັບໃຊ້ຕາມລະບອບຂອງພະເຈົ້າ. ເຮົາໄດ້ຮຽນໃນບົດທີ່ຜ່ານມາວ່າໂຮງຮຽນນີ້ເລີ່ມຈັດຂຶ້ນໃນປີ 1943. ໂຮງຮຽນເພື່ອການຮັບໃຊ້ຕາມລະບອບຂອງພະເຈົ້າມີຈຸດປະສົງພຽງເພື່ອສອນນັກຮຽນໃຫ້ບັນລະຍາຍໄດ້ດີໃນການປະຊຸມເທົ່ານັ້ນບໍ? ບໍ່ແມ່ນ! ຈຸດປະສົງຫຼັກກໍຄື: ເພື່ອຝຶກສອນປະຊາຊົນຂອງພະເຈົ້າໃຫ້ຮູ້ວິທີໃຊ້ຄວາມສາມາດໃນການເວົ້າເພື່ອສັນລະເສີນພະເຢໂຫວາໃນການປະກາດ ເຊິ່ງຄວາມສາມາດນີ້ເປັນຄືກັບຂອງຂວັນທີ່ພະເຈົ້າໃຫ້ກັບເຮົາ. (ເພງ. 150:6) ໂຮງຮຽນໄດ້ນີ້ຊ່ວຍພີ່ນ້ອງທຸກຄົນທີ່ສະໝັກເປັນນັກຮຽນໃຫ້ເຮັດວຽກຮັບໃຊ້ໄດ້ດີຂຶ້ນ. ໃນຕອນນີ້ ການຝຶກອົບຮົມແບບນີ້ຈັດຂຶ້ນໃນການປະຊຸມກາງອາທິດ.
10, 11. ໃນທຸກມື້ນີ້ ມີໃຜແດ່ທີ່ອາດສະໝັກເປັນນັກຮຽນໃນໂຮງຮຽນກິລຽດໄດ້ ແລະຫຼັກສູດຂອງໂຮງຮຽນນີ້ມີຈຸດປະສົງຫຍັງ?
10 ໂຮງຮຽນວັອດທາວເວີໄບເບິນແຫ່ງກິລຽດ. ໂຮງຮຽນນີ້ເປີດສອນເມື່ອວັນຈັນທີ 1 ກຸມພາ 1943. ຈຸດປະສົງໃນຕອນທຳອິດກໍຄື: ເພື່ອຝຶກອົບຮົມໄພໂອເນຍແລະຜູ້ຮັບໃຊ້ເຕັມເວລາຄົນອື່ນໆໃຫ້ເຮັດວຽກມິດຊັນນາລີຢູ່ສະຖານທີ່ຕ່າງໆໃນທົ່ວໂລກ. ແຕ່ໃນເດືອນຕຸລາ 2011 ມີການກຳນົດວ່າຜູ້ທີ່ມີສິດສະໝັກເຂົ້າໂຮງຮຽນນີ້ຕ້ອງເປັນຜູ້ຮັບໃຊ້ເຕັມເວລາປະເພດພິເສດເທົ່ານັ້ນ ເຊັ່ນ: ໄພໂອເນຍພິເສດ ຜູ້ດູແລເດີນທາງແລະເມຍ ສະມາຊິກຄອບຄົວເບເທນ ແລະມິດຊັນນາລີທີ່ຢູ່ໃນເຂດງານເຊິ່ງຍັງບໍ່ເຄີຍເຂົ້າໂຮງຮຽນນີ້ມາກ່ອນ.
11 ຫຼັກສູດຂອງໂຮງຮຽນກິລຽດມີຈຸດປະສົງຫຍັງ? ຄູທີ່ສອນໃນໂຮງຮຽນນີ້ມາຫຼາຍປີບອກວ່າ: “ການສຶກສາຄົ້ນຄວ້າຄຳພີໄບເບິນຢ່າງລະອຽດຈະຊ່ວຍໃຫ້ນັກຮຽນມີຄວາມເຊື່ອທີ່ເຂັ້ມແຂງຫຼາຍຂຶ້ນ ພັດທະນາຄຸນລັກສະນະແບບພະເຈົ້າ ແລະເຮັດວຽກມອບໝາຍໃຫ້ສຳເລັດເຖິງແມ່ນຈະປະສົບກັບອຸປະສັກ. ຈຸດປະສົງສຳຄັນອີກຢ່າງໜຶ່ງຂອງຫຼັກສູດນີ້ກໍຄື: ເພື່ອປູກຝັງນັກຮຽນໃຫ້ມີຄວາມມຸ່ງໝັ້ນຕັ້ງໃຈຫຼາຍຂຶ້ນທີ່ຈະເຮັດວຽກປະກາດ.”—ເອເຟ. 4:11
12, 13. ໂຮງຮຽນກິລຽດສົ່ງຜົນຕໍ່ວຽກປະກາດທົ່ວໂລກແນວໃດ? ຂໍໃຫ້ຍົກຕົວຢ່າງ.
12 ໂຮງຮຽນກິລຽດສົ່ງຜົນຕໍ່ວຽກປະກາດໃນທົ່ວໂລກແນວໃດ? ຕັ້ງແຕ່ປີ 1943 ມີຫຼາຍກວ່າ 8.500 ຄົນທີ່ຈົບຈາກໂຮງຮຽນນີ້ c ແລະມິດຊັນນາລີເຫຼົ່ານັ້ນກໍໄປຮັບໃຊ້ໃນດິນແດນຕ່າງໆທົ່ວໂລກກວ່າ 170 ດິນແດນ. ເຂົາເຈົ້ານຳສິ່ງທີ່ໄດ້ຮຽນຮູ້ໄປໃຊ້ ວາງແບບຢ່າງໃນເລື່ອງຄວາມກະຕືລືລົ້ນໃນວຽກປະກາດ ແລະຝຶກສອນຄົນອື່ນໆໃຫ້ເຮັດແບບດຽວກັນ. ຫຼາຍຄັ້ງ ມິດຊັນນາລີຍັງເປັນຜູ້ທີ່ນຳໜ້າໃນເຂດງານທີ່ມີຜູ້ປະກາດໜ້ອຍຫຼາຍ.
13 ລອງມາເບິ່ງສິ່ງທີ່ເກີດຂຶ້ນໃນປະເທດຍີ່ປຸ່ນ ເຊິ່ງວຽກປະກາດເກືອບຈະຢຸດສະຫງັດໄປລະຫວ່າງສົງຄາມໂລກຄັ້ງທີ 2. ເມື່ອຮອດເດືອນສິງຫາ ປີ 1949 ພີ່ນ້ອງຜູ້ປະກາດທີ່ເປັນຄົນຍີ່ປຸ່ນມີບໍ່ຮອດ 10 ຄົນ. ເມື່ອຮອດທ້າຍປີນັ້ນ ກໍມີມິດຊັນນາລີ 13 ຄົນທີ່ຈົບຈາກໂຮງຮຽນກິລຽດທີ່ກະຕືລືລົ້ນມາຊ່ວຍ. ຈາກນັ້ນ ມິດຊັນນາລີອີກຫຼາຍຄົນກໍຕາມມາຊ່ວຍ. ຕອນທຳອິດວຽກປະກາດເນັ້ນຕາມເມືອງໃຫຍ່ໆ ຕໍ່ມາກໍແຜ່ຂະຫຍາຍອອກໄປໃນເຂດອື່ນໆນຳອີກ. ມິດຊັນນາລີສະໜັບສະໜູນນັກສຶກສາຂອງຕົນແລະຄົນອື່ນໆໃຫ້ເປັນໄພໂອເນຍ ຄວາມພະຍາຍາມຢ່າງບໍ່ທໍ້ຖອຍຂອງມິດຊັນນາລີເຫຼົ່ານັ້ນເກີດຜົນດີແທ້ໆ ເວລານີ້ໃນປະເທດຍີ່ປຸ່ນມີຜູ້ປະກາດລາຊະອານາຈັກຫຼາຍກວ່າ 216.000 ຄົນແລະເກືອບ 40 ເປີເຊັນໃນຈຳນວນນີ້ເປັນໄພໂອເນຍ! d
14. ໂຮງຮຽນຕ່າງໆຕາມລະບອບຂອງພະເຈົ້າເປັນຂໍ້ພິສູດຢ່າງໜັກແໜ້ນເລື່ອງຫຍັງ? (ເບິ່ງຂອບ “ ໂຮງຮຽນຕ່າງໆທີ່ຝຶກສອນຜູ້ປະກາດລາຊະອານາຈັກ” ໜ້າ 188)
14 ໂຮງຮຽນອື່ນໆຕາມລະບອບຂອງພະເຈົ້າ. ໂຮງຮຽນໄພໂອເນຍ ໂຮງຮຽນພະຄຳພີສຳລັບຄູ່ຜົວເມຍ ແລະໂຮງຮຽນພະຄຳພີສຳລັບຊາຍໂສດ ໄດ້ຊ່ວຍນັກຮຽນທີ່ເຂົ້າໂຮງຮຽນເຫຼົ່ານີ້ໃຫ້ພັດທະນາຄຸນລັກສະນະແບບຄລິດສະຕຽນແລະນຳໜ້າໃນວຽກປະກາດຢ່າງຂະຫຍັນຂັນແຂງ. e ໂຮງຮຽນທັງໝົດນີ້ເປັນຂໍ້ພິສູດທີ່ໜັກແໜ້ນວ່າ ກະສັດຂອງເຮົາຝຶກສອນຜູ້ທີ່ຕິດຕາມເພິ່ນໃຫ້ເຮັດວຽກປະກາດໄດ້ຢ່າງມີປະສິດທິພາບ.—2 ຕີໂມ. 4:5
ຝຶກສອນພີ່ນ້ອງຊາຍເພື່ອເຮັດໜ້າທີ່ຮັບຜິດຊອບພິເສດ
15. ພີ່ນ້ອງຊາຍທີ່ມີໜ້າທີ່ຮັບຜິດຊອບຕ່າງໆຢາກຮຽນແບບພະເຍຊູແນວໃດ?
15 ຂໍໃຫ້ນຶກເຖິງຄຳພະຍາກອນຂອງເອຊາອີທີ່ບອກວ່າ ພະເຍຊູໄດ້ຮັບການຝຶກສອນຈາກພະເຈົ້າ ແລະຢູ່ “ໂຮງຮຽນ” ໃນສະຫວັນ ພະເຍຊູລູກຂອງພະເຈົ້າໄດ້ຮຽນຮູ້ວິທີເວົ້າ “ຊູແຮງ [ໃຫ້ກຳລັງໃຈ] ຄົນທີ່ອ່ອນແຮງ.” (ເອຊາ. 50:4) ພະເຍຊູນຳສິ່ງທີ່ໄດ້ຮຽນຮູ້ມາໃຊ້ຢູ່ໃນໂລກ ເພິ່ນເຮັດໃຫ້ຄົນທີ່ “ອິດເມື່ອຍຈາກການແບກພາລະໜັກ, ທ.ປ.” ໃຫ້ຮູ້ສຶກສົດຊື່ນ. (ມັດ. 11:28-30) ຄົນທີ່ມີໜ້າທີ່ຮັບຜິດຊອບຕ່າງໆກໍຢາກຮຽນແບບພະເຍຊູແລະຢາກເຮັດໃຫ້ພີ່ນ້ອງຮູ້ສຶກສົດຊື່ນຄືກັນ. ດັ່ງນັ້ນ ອົງການຈຶ່ງເປີດໂຮງຮຽນຕ່າງໆເພື່ອຝຶກສອນພີ່ນ້ອງຊາຍທີ່ມີຄຸນສົມບັດໃຫ້ເຮັດວຽກຮັບໃຊ້ພີ່ນ້ອງຄລິດສະຕຽນໄດ້ດີຍິ່ງຂຶ້ນ.
16, 17. ຈຸດປະສົງຂອງໂຮງຮຽນພະລາຊະກິດແມ່ນຫຍັງ? (ເບິ່ງໄຂເງື່ອນ)
16 ໂຮງຮຽນພະລາຊະກິດ. ຊັ້ນຮຽນທຳອິດຂອງໂຮງຮຽນນີ້ເລີ່ມຂຶ້ນວັນທີ 9 ມີນາ 1959 ທີ່ເມືອງເຊົາແລນຊິງ ລັດນິວຢອກ ຜູ້ດູແລເດີນທາງລວມທັງຜູ້ຮັບໃຊ້ປະຊາຄົມ (ປັດຈຸບັນຄືຜູ້ປະສານງານຄະນະຜູ້ເຖົ້າແກ່) ໄດ້ຮັບເຊີນໃຫ້ເຂົ້າໂຮງຮຽນນີ້ເປັນເວລາ 1 ເດືອນ. ຕໍ່ມາໄດ້ມີການແປຫຼັກສູດຂອງໂຮງຮຽນພະລາຊະກິດເປັນພາສາອື່ນໆນຳອີກ ແລະຄ່ອຍໆເປີດຝຶກອົບຮົມພີ່ນ້ອງຊາຍໃນປະເທດຕ່າງໆທົ່ວໂລກ. f
ພີ່ນ້ອງລອຍ ແບຣີ ສອນໃນໂຮງຮຽນພະລາຊະກິດທີ່ປະເທດຍີ່ປຸ່ນໃນປີ 1970
17 ປຶ້ມປະຈຳປີຂອງພະຍານພະເຢໂຫວາ 1962 (ພາສາອັງກິດ) ໄດ້ເວົ້າເຖິງຈຸດປະສົງຂອງໂຮງຮຽນນີ້ວ່າ: “ໃນໂລກທີ່ວຸ່ນວາຍນີ້ຜູ້ດູແລໃນປະຊາຄົມຂອງພະຍານພະເຢໂຫວາຕ້ອງຮູ້ຈັກຈັດຊີວິດຂອງຕົນເອງໃຫ້ເປັນລະບຽບ ເພື່ອຈະສາມາດເອົາໃຈໃສ່ພີ່ນ້ອງໃນປະຊາຄົມຕາມທີ່ຈຳເປັນແລະເປັນປະໂຫຍດຕໍ່ເຂົາເຈົ້າ. ຜູ້ດູແລຕ້ອງເປັນຄົນມີເຫດຜົນ ບໍ່ໝົກມຸ້ນແຕ່ເຮັດວຽກໃນປະຊາຄົມຈົນລະເລີຍຄົນໃນຄອບຄົວຂອງຕົວເອງ ນີ້ເປັນໂອກາດພິເສດທີ່ຜູ້ຮັບໃຊ້ປະຊາຄົມໃນທົ່ວໂລກຈະໄດ້ຮັບການຝຶກອົບຮົມນຳກັນໃນໂຮງຮຽນພະລາຊະກິດ ເຊິ່ງຈະຊ່ວຍເຂົາເຈົ້າໃຫ້ສາມາດເຮັດໜ້າທີ່ຂອງຕົນໄດ້ດີຕາມທີ່ພະຄຳພີສະໜັບສະໜູນໃຫ້ເຮັດ!”—1 ຕີໂມ. 3:1-7; ຕິໂຕ 1:5-9
18. ປະຊາຊົນທັງໝົດຂອງພະເຢໂຫວາໄດ້ຮັບປະໂຫຍດຈາກໂຮງຮຽນພະລາຊະກິດແນວໃດ?
18 ປະຊາຊົນທັງໝົດຂອງພະເຢໂຫວາໄດ້ຮັບປະໂຫຍດຈາກໂຮງຮຽນພະລາຊະກິດແນວໃດ? ເມື່ອຜູ້ເຖົ້າແກ່ແລະຜູ້ຊ່ວຍງານຮັບໃຊ້ນຳສິ່ງທີ່ໄດ້ຮຽນຮູ້ໄປໃຊ້ ເຂົາເຈົ້າກໍກຳລັງຮຽນແບບພະເຍຊູຄື: ເຮັດໃຫ້ພີ່ນ້ອງຮູ້ສຶກສົດຊື່ນ. ເຈົ້າຮູ້ສຶກຂອບໃຈບໍທີ່ຜູ້ເຖົ້າແກ່ແລະຜູ້ຊ່ວຍງານຮັບໃຊ້ມາໃຫ້ກຳລັງໃຈເຈົ້າ ເວົ້າປອບໂຍນແລະພ້ອມຈະຟັງເຈົ້າ? (1 ເທ. 5:11) ຜູ້ຊາຍທີ່ມີຄຸນສົມບັດແບບນີ້ເປັນຂອງຂວັນທີ່ມີຄ່າສຳລັບປະຊາຄົມ!
19. ຄະນະກຳມະການຝ່າຍການສອນໄດ້ເບິ່ງແຍງໂຮງຮຽນຫຍັງອີກ ແລະຈຸດປະສົງຂອງໂຮງຮຽນເຫຼົ່ານັ້ນແມ່ນຫຍັງ?
19 ໂຮງຮຽນອື່ນໆຕາມລະບອບຂອງພະເຈົ້າ. ຄະນະກຳມະການຝ່າຍການສອນຂອງຄະນະກຳມະການປົກຄອງ ເບິ່ງແຍງໂຮງຮຽນອື່ນໆທີ່ຝຶກສອນພີ່ນ້ອງຊາຍເຊິ່ງມີໜ້າທີ່ຮັບຜິດຊອບຕ່າງໆໃນອົງການ. ໂຮງຮຽນເຫຼົ່ານັ້ນມີຈຸດປະສົງເພື່ອຊ່ວຍຜູ້ເຖົ້າແກ່ໃນປະຊາຄົມ ຜູ້ດູແລເດີນທາງ ແລະສະມາຊິກຄະນະກຳມະການສາຂາໃຫ້ເຮັດໜ້າທີ່ຮັບຜິດຊອບຂອງລາວໄດ້ຢ່າງເຕັມຄວາມສາມາດ. ຫຼັກສູດທີ່ໃຊ້ຄຳພີໄບເບິນນີ້ເປັນຫຼັກສະໜັບສະໜູນພີ່ນ້ອງຊາຍໃຫ້ມີຄວາມເຊື່ອທີ່ໝັ້ນຄົງ ແລະສະໜັບສະໜູນໃຫ້ນຳຫຼັກການຈາກຄຳພີໄບເບິນໄປໃຊ້ເມື່ອຕ້ອງເອົາໃຈໃສ່ເບິ່ງແຍງແກະທີ່ມີຄ່າຫຼາຍ ເຊິ່ງພະເຢໂຫວາໄດ້ຝາກໄວ້ກັບເຂົາເຈົ້າ.—1 ເປ. 5:1-3
ໂຮງຮຽນຝຶກອົບຮົມເພື່ອວຽກຮັບໃຊ້ຊັ້ນຮຽນທຳອິດໃນປະເທດມາລາວີໃນປີ 2007
20. ເປັນຫຍັງພະເຍຊູຈຶ່ງເວົ້າໄດ້ວ່າເຮົາທຸກຄົນໄດ້ “ຮັບການສອນຈາກພະເຢໂຫວາ” ແລະເຈົ້າຕັ້ງໃຈຈະເຮັດຫຍັງ?
20 ເຫັນໄດ້ແຈ້ງວ່າ ກະສັດເມຊີໄດ້ເອົາໃຈໃສ່ເບິ່ງແຍງຜູ້ຕິດຕາມເພິ່ນໃຫ້ໄດ້ຮັບການຝຶກສອນເປັນຢ່າງດີສະເໝີ. ການຝຶກສອນນີ້ເລີ່ມຈາກເທິງລົງລຸ່ມຄື: ພະເຢໂຫວາຝຶກພະເຍຊູລູກຂອງພະອົງ ແລະພະເຍຊູກໍຝຶກຜູ້ຕິດຕາມເພິ່ນ ດັ່ງນັ້ນ ພະເຍຊູຈຶ່ງເວົ້າໄດ້ວ່າເຮົາທຸກຄົນໄດ້ “ຮັບການສອນຈາກພະເຢໂຫວາ, ລ.ມ.” (ໂຢ. 6:45; ເອຊາ. 54:13) ຂໍໃຫ້ເຮົາຕັ້ງໃຈເພື່ອຈະໄດ້ຮັບປະໂຫຍດຫຼາຍທີ່ສຸດຈາກການຝຶກອົບຮົມຕ່າງໆທີ່ກະສັດເຍຊູກຽມໄວ້ໃຫ້ເຮົາ ແລະຂໍໃຫ້ເຮົາຈື່ໄວ້ວ່າ ຈຸດປະສົງສຳຄັນຂອງການຝຶກສອນເຫຼົ່ານີ້ກໍເພື່ອຊ່ວຍເຮົາໃຫ້ມີຄວາມເຊື່ອທີ່ເຂັ້ມແຂງຕໍ່ໆໄປ ແລະເຮົາຈະເຮັດວຽກຮັບໃຊ້ໃຫ້ສຳເລັດຄົບຖ້ວນໄດ້.
a ເຮົາຮູ້ໄດ້ແນວໃດວ່າພະເຢໂຫວາສອນລູກຂອງພະອົງໃຫ້ຮູ້ວິທີສອນ? ລອງຄິດເບິ່ງ ພະເຍຊູໃຊ້ຕົວຢ່າງປຽບທຽບຫຼາຍເລື່ອງໃນການສອນ ເລື່ອງນີ້ໄດ້ເກີດຂຶ້ນແທ້ຕາມຄຳພະຍາກອນທີ່ຂຽນໄວ້ຫຼາຍຮ້ອຍປີກ່ອນທີ່ເພິ່ນຈະມາເກີດເປັນມະນຸດ. (ເພງ. 78:2; ມັດ. 13:34, 35) ເຫັນໄດ້ແຈ້ງວ່າ ພະເຢໂຫວາເຊິ່ງເປັນຜູ້ຂຽນຄຳພະຍາກອນໄດ້ຕັ້ງໃຈໄວ້ກ່ອນແລ້ວວ່າຈະໃຫ້ລູກຂອງພະອົງສອນໂດຍໃຊ້ຕົວຢ່າງປຽບທຽບ.—2 ຕີໂມ. 3:16, 17
b ບໍ່ເທົ່າໃດເດືອນຫຼັງຈາກນັ້ນ ພະເຍຊູໄດ້ຝຶກສອນລູກສິດອີກ 70 ຄົນໃຫ້ໄປປະກາດແລ້ວເພິ່ນກໍ “ສົ່ງອອກໄປເປັນຄູ່ໆ, ລ.ມ.”— ລືກາ 10:1-16
c ພີ່ນ້ອງບາງຄົນໄດ້ເຂົ້າໂຮງຮຽນກິລຽດຫຼາຍກວ່າ 1 ຄັ້ງ.
d ສຳລັບລາຍລະອຽດເພີ່ມເຕີມກ່ຽວກັບຜົນງານທີ່ໜ້າປະທັບໃຈຂອງມິດຊັນນາລີທີ່ຈົບຈາກໂຮງຮຽນກິລຽດເຊິ່ງຮັບໃຊ້ໃນເຂດງານທົ່ວໂລກ ຂໍໃຫ້ເບິ່ງບົດ 23 ຂອງປຶ້ມພະຍານພະເຢໂຫວາ—ຜູ້ປະກາດລາຊະອານາຈັກຂອງພະເຈົ້າ (ພາສາອັງກິດ).
e ປັດຈຸບັນ ໂຮງຮຽນພະຄຳພີສຳລັບຄູ່ຜົວເມຍແລະໂຮງຮຽນພະຄຳພີສຳລັບຊາຍໂສດໄດ້ປ່ຽນເປັນໂຮງຮຽນຜູ້ປະກາດລາຊະ ອານາຈັກ.
f ປັດຈຸບັນ ຜູ້ເຖົ້າແກ່ທຸກຄົນຈະໄດ້ເຂົ້າຝຶກອົບຮົມໃນໂຮງຮຽນພະລາຊາກິດເຊິ່ງອາດຈະເປີດຝຶກອົບຮົມທຸກໆ 2-3 ປີ ຕາມເວລາທີ່ກຳນົດໃນແຕ່ລະເທື່ອ. ຕັ້ງແຕ່ປີ 1984 ຜູ້ຊ່ວຍງານຮັບໃຊ້ກໍໄດ້ຮັບການຝຶກສອນໃນໂຮງຮຽນນີ້ຄືກັນ.
