1-3. Mmunyi muvua Yezu muenze bua mudimu wa diyisha utangalake? Bualu ebu budi bujula nkonko kayi?

 MUNKATSHI mua bidimu bibidi, Yezu wakayisha mu Galela mujima. (Bala Matayi 9:35-38.) Wakaya mu bimenga ne mu misoko ya bungi, ulongesha mu nsunagoga ne uyisha lumu luimpe lua Bukalenge. Muaba wonso uvuaye uyisha, bisumbu bia bantu bivua bilua kudiye. Yezu wakamona ne: ‘bia kunowa bivua bia bungi,’ ne bivua bikengela bena mudimu ba bungi.

² Yezu wakalongolola bua kutangalaja mudimu wa kuyisha. Mushindu kayi? Pavuaye mutume bapostolo bende 12 “bua kuyisha Bukalenge bua Nzambi.” (Luka 9:1, 2) Bapostolo bavua mua kuikala badiebeja mushindu kayi uvuabu mua kukumbaja mudimu eu. Kumpala kua Yezu kubatumaye, wakabapesha ne dinanga tshintu kampanda tshivua Tatuende wa mu diulu mumupeshe pende, mmumue ne: dilongesha.

³ Bualu ebu budi bujula nkonko eyi: Ndilongesha kayi divua Yezu mupetele kudi Tatuende? Ndilongesha kayi divua Yezu mupeshe bapostolo bende? Lelu eu, Mukalenge Masiya mmulongeshaku bayidi bende bua kukumbajabu mudimu wabu anyi? Bikalabi nanku, mmushindu kayi?

4. Nkuepi kuvua Yezu mulongeshibue kudi Tatuende ne ndîba kayi?

⁴ Yezu wakaleja patoke ne: Tatuende ke uvua mumulongeshe. Pavuaye uyisha wakamba ne: “Ndi ngakula malu aa anu muvua Tatu muandongeshe.” (Yone 8:28) Ndîba kayi divuabu balongeshe Yezu? Bavua bamulongeshile penyi? Bidi bimueneka ne: Muanabute wa Nzambi eu wakatuadija kupeta dilongesha edi katupa kîpi panyima pa difukibua diende. (Kolos. 1:15) Pavua Muana eu ku luseke lua Tatuende mu diulu, wakenza bidimu bungi kabuyi kubala uteleja “Muyishi” munene ne utangila bivuaye wenza. (Yesh. 30:20) Nunku, Muana eu wakapeta dimanya ditambe buimpe dia ngikadilu ya Tatuende, midimu yende ne malu avuaye mulongolole.

5. Ndilongesha kayi divua Tatu mupeshe Muana pa bidi bitangila mudimu wa diyisha uvuaye ne bua kuenza pa buloba?

⁵ Mu tshikondo tshiakanyine, Yehowa wakalongesha Muanende mudimu uvuaye ne bua kuenza pa buloba. Tukonkononayi mulayi wa buprofete udi uleja malanda avua pankatshi pa Muyishi munene ne Muanende muanabute. (Bala Yeshaya 50:4, 5.) Mulayi wa buprofete eu udi uleja ne: Yehowa  uvua ujula Muanende “ku dinda ku dinda.” Difuanyikija edi didi difila lungenyi lua mulongeshi udi ujula mulongi wende ne dinda dinda bua kumulongesha. Mukanda kampanda udi umvuija Bible udi wamba ne: “Mbienze anu bu ne: Yehowa . . . udi umubueja mu kalasa bu mulongi, ne umulongesha tshidiye ne bua kuyisha ne mushindu wa kuyisha.” Mu kalasa ka mu diulu aka, Yehowa wakalongesha Muanende “tshia kuamba ne tshia kuakula.” (Yone 12:49) Tatu uvua mua kuikala kabidi muleje Muanende mushindu wa kulongesha. a Pavua Yezu pa buloba, wakenza mudimu bimpe ne malu avuabu bamulongeshe bua kukumbaja mudimu wende wa kuyisha ne wa kulongesha bayidi bende bua kukumbajabu mudimu wabu wa diyisha.

6, 7. a) Ntshinyi tshivua Yezu mulongeshe bapostolo bende, ne bualu ebu buvua bubambuluishe bua kuenza tshinyi? b) Yezu wakenza bua bayidi bende ba lelu bapete dilongesha kayi?

⁶ Anu mudibi bileja ku ntuadijilu kua nshapita eu, ntshinyi tshivua Yezu mulongeshe bapostolo bende? Bilondeshile Matayi nshapita wa 10, wakabaleja malu masunguluke a kuenza mu mudimu wa diyisha bu mudi adi alonda aa: muaba wa kuyisha (mvese 5, 6), mukenji wa kuyisha (mvese wa 7), mushinga wa kueyemena Yehowa (mvese wa 9, 10), mua kutuadija muyuki ne bantu (mvese 11-13), tshia kuenza pavuabu babenga kubateleja (mvese wa 14, 15) ne tshivuabu mua kuenza pavuabu babakengesha (mvese wa 16-23). b Dilongesha ditoke divua Yezu mupeshe bapostolo adi diakabambuluisha bua kuikala bantunga-mulongo mu mudimu wa diyisha lumu luimpe mu bidimu lukama bia kumpala.

⁷ Netuambe tshinyi bua lelu eu? Yezu, Mukalenge wa Bukalenge bua Nzambi, mmupeshe bayidi bende mudimu mutambe bunene, bua kuyisha “lumu luimpe elu lua Bukalenge pa buloba bujima budi bantu basombe bua luikale bujadiki kudi bisamba bionso.” (Mat. 24:14) Mukalenge mmutulongeshaku bua kukumbaja mudimu eu anyi? Eyowa. Mu diulu mudiye amu, Mukalenge mmuenze bua bayidi bende bapete dilongesha bua mushindu wa kuyisha pambelu pa tshisumbu ne mua kuambula majitu a pa buawu munda muatshi.

8, 9. a) Kalasa ka mudimu wa Nzambi kavua ne tshipatshila kayi tshinene? b) Mmunyi mudi tshisangilu tshia munkatshi mua lumingu tshikuambuluishe?

⁸ Bulongolodi bua Yehowa mbuenze mudimu ne mpuilu, mpungilu ne bisangilu bia tshisumbu, bu mudi: Tshisangilu tshia Mudimu bua kulongesha bantu ba Nzambi bua mudimu wa kuyisha. Kadi kutuadijila mu bidimu bia 1940, bana betu ba balume badi balombola biro bietu bidi bilombola mudimu wa pa buloba bujima bakalongolola tulasa tushilashilangane bua kulongesha bana betu.

⁹ Kalasa ka Mudimu wa Nzambi. Anu mutuvua bamone mu nshapita mushale, bakatuadija kuenza kalasa aka mu 1943. Tshipatshila tshia kalasa aka tshivuaku anu tshia kulongesha balongi bua kulua bangamba-malu bimpe mu bisangilu anyi? Tòo. Tshipatshila tshinene tshia kalasa aka tshivua tshia kulongesha bantu ba Nzambi bua kuenzabu mudimu ne tshipedi tshiabu tshia kuakula bua kutumbisha Yehowa mu mudimu wa diyisha. (Mus. 150:6) Kalasa aka kavua kambuluisha bana  betu bonso ba balume ne ba bakaji bavua badifundishamu bua kuikalabu bamanyishi bimpe ba Bukalenge. Mpindieu tudi tupeta dilongesha dia nunku mu tshisangilu tshia munkatshi mua lumingu.

10, 11. Nganyi udi mua kudifundisha mu Kalasa ka Gilada lelu? Kalasa aka kadi ne tshipatshila kayi?

¹⁰ Kalasa ka malu a mu Bible ka Gilada. Kalasa kadibu babikila lelu ne: Kalasa ka malu a mu Bible ka Gilada kakatuadija mu Dimue dia 1 ngondo 2 wa 1943. Kalasa aka kavua kenza nangananga bua kulongesha bampanda-njila ne bana betu bakuabu badi mu mudimu wa ku dîba ne ku dîba bua kuya kuenza mudimu wa bumisionere muaba kampanda. Kadi kutuadijila mu ngondo wa 10 wa 2011, badi mua kudifundisha mu kalasa aka anu kudi bana betu bakadi mu mushindu kampanda wa midimu ya pa buayi ya ku dîba ne ku dîba, bu mudi: bampanda-njila ba pa buabu, batangidi bena ngendu ne bakaji babu, bena mu dîku dia Betele ne bamisionere badi kabayi banji kubuela mu kalasa aka to.

¹¹ Malu adibu balonga mu kalasa aka adi ne mushinga kayi? Mulongeshi kampanda wa kale udi wandamuna ne: “Mbua kukolesha ditabuja dia balongi ku diambuluisha dia dilonga dimpe dia Dîyi dia Nzambi ne bua kubambuluisha bua kukolesha ngikadilu ya buena Kristo idibu nayi dijinga bua kutantamena ntatu idibu bapeta mu midimu yabu. Kabidi, tshipatshila tshia nshindamenu tshia malu adibu balonga mu kalasa aka ntshia kukolesha dijinga dia balongi dia kuenza mudimu wa kumanyisha lumu luimpe.”—Ef. 4:11.

12, 13. Mmunyi mudi Kalasa ka Gilada kambuluishe mu mudimu wa diyisha udi wenzeka pa buloba bujima? Fila tshilejilu.

¹² Mmunyi mudi Kalasa ka Gilada kambuluishe mudimu wa diyisha udi wenzeka pa buloba bujima? Katshia ku 1943, mbalongeshe bantu bapite pa 8500 mu kalasa aku, c ne bamisionere badi balonge kalasa aka mbenze mudimu mu matunga mapite pa 170. Bamisionere mbenze mudimu bimpe ne dilongesha didibu bapete, badi bayisha ne tshisumi ne balongesha bantu bakuabu bua kuenza muomumue. Misangu ya bungi, bamisionere batu bantunga-mulongo mu mudimu mu miaba itu bamanyishi bakese ba Bukalenge peshi kabayimu.

¹³ Tukonkonone tshivua tshienzeke mu Japon muvua mudimu wa kuyisha mumueneke bu muimane panyima pa Mvita mibidi ya buloba bujima. Mu ngondo wa 8 wa 1949, muvua bamanyishi muinshi mua 10. Kadi ku ndekelu kua tshidimu atshi, bamisionere 13 bavua babuele mu Kalasa ka Gilada bavua bayishamu ne tshisumi. Bamisionere bakuabu ba bungi bakalonda. Ku ntuadijilu, bamisionere bavua batamba kuyisha mu bimenga binene; pashishe bakaya mu bimenga bikuabu. Bamisionere bavua bakankamija balongi babu ne bantu bakuabu ne muoyo mujima bua kuluabu bampanda-njila. Didienzeja ne muoyo mujima dia bamisionere diakapatula bipeta bimpe. Lelu, kudi bamanyishi ba Bukalenge bapite pa 216 000 mu Japon, ne bantu batue ku 40 pa lukama mbampanda-njila. d

14. Tulasa tushilashilangane tua malu a Nzambi tudi tshijadiki tshinene tshia tshinyi? (Tangila kabidi kazubu ka ne: “ Tulasa tudi tulongesha bamanyishi ba Bukalenge.”)

¹⁴ Tulasa tua malu a Nzambi tukuabu. Kalasa ka bampanda-njila, Kalasa ka malu a mu Bible bua bena dibaka ne Kalasa ka malu a mu Bible bua bana betu ba balume bajike,  ntulasa tudi tuambuluishe aba bavua badifundishamu bua kukola mu nyuma ne kuikala bantunga-mulongo ba tshisumi mu mudimu wa kumanyisha lumu luimpe. e Tulasa tuonso tua malu a Nzambi etu ntshijadiki tshinene tshia ne: Mukalenge wetu mmulongolole bimpe bayidi bende bua kukumbajabu mudimu wabu.—2 Tim. 4:5.

15. Bantu badi ne majitu mu tshisumbu mbasue kuidikija Yezu mushindu kayi?

¹⁵ Vuluka mulayi wa buprofete wa Yeshayi udi uleja mudi Yezu ulongeshibua kudi Nzambi. Mu kalasa ka mu diulu aka, Muana uvua mulonge ‘mua kukuatshisha muntu mupungile ne dîyi.’ (Yesh. 50:4) Yezu wakenza mudimu ne bualu buvuaye mulonge; pavuaye pa buloba, wakakolesha bantu bavua “batata ne midimu mikole ne bambule majitu manene.” (Mat. 11:28-30) Bana betu ba balume badi ne majitu mu tshisumbu badi bidikija Yezu padibu bakolesha bena Kristo nabu. Bua bualu ebu, mbenze tulasa tushilashilangane bua kuambuluisha bana betu ba balume bakumbane bua kuambulabu bimpe majitu abu.

16, 17. Kalasa ka Mudimu wa Bukalenge kadi ne tshipatshila kayi? (Tangila kabidi note.)

 ¹⁶ Kalasa ka Mudimu wa Bukalenge. Bavua benza kalasa aka bua musangu wa kumpala mu dia 9 ngondo 3 wa 1959, mu South Lansing mu New York. Bavua babikile batangidi bena ngendu ne basadidi ba tshisumbu bua kubuela mu kalasa kavua kenza ngondo mujima aka. Pashishe, bakatuadija kuenza kalasa kavua kenzeka mu Anglais aka mu miakulu mikuabu, ne kalasa aka kakatuadija kuenzeka ku kakese ku kakese pa buloba bujima. f

¹⁷ Annuaire des Témoins de Jéhovah wa mu 1962 wakamba bua tshipatshila tshia Kalasa ka Mudimu wa Bukalenge ne: “Mu buloba ebu mudi bantu bikale ne bia bungi bia kuenza, mukulu mu tshisumbu tshia Bantemu ba Yehowa udi ne bua kuikala muntu udi ne bulongame mu nsombelu wende bua kutabalela bimpe bena mu tshisumbu bonso ne kuikala dibenesha kudibu. Kena ne bua kuikala muntu udi ulengulula dîku diende anu bua kutabalela tshisumbu to, kadi udi ne bua kuikala ne meji mimpe. Bushuwa, mbapeshe basadidi ba tshisumbu ba pa buloba bujima mpunga muimpe wa kudisangisha pamue mu Kalasa ka Mudimu wa Bukalenge bua kupeta dilongesha  diabambuluisha bua kuenza anu tshidi Bible wamba bua mutangidi enze.”—1 Tim. 3:1-7; Tito 1:5-9.

18. Mmunyi mudi Kalasa ka Mudimu wa Bukalenge kapetesha bantu ba Nzambi bonso masanka?

¹⁸ Kalasa ka Mudimu wa Bukalenge kadi kapetesha bantu ba Nzambi bonso masanka. Mushindu kayi? Padi bakulu ne basadidi ba mudimu batumikila malu adibu balonge mu kalasa aka, badi bakolesha bena kuitabuja nabu anu muvua Yezu muenze. Padi mukulu peshi musadidi wa mudimu ukuambila mêyi mimpe, ukuteleja ne ntema peshi ukukumbula bua kukukolesha, kutuku wanyisha anyi? (1 Tes. 5:11) Bana betu badi bakumbane ba nunku badi bushuwa dibenesha kudi bisumbu biabu.

19. Ntulasa tukuabu kayi tudi Komite wa Dilongesha ulombola? Bua tshinyi mbenze tulasa etu?

¹⁹ Tulasa tua malu a Nzambi tukuabu. Komite wa dilongesha wa Kasumbu kaludiki udi ulombola tulasa tukuabu tudi tulongesha bana betu ba balume badi ne majitu mu bulongolodi. Tulasa etu ntuenza bua kuambuluisha bana betu ba balume badi ne majitu, bu mudi: bakulu mu tshisumbu, batangidi bena ngendu ne bena mu komite ya filiale bua kuambulabu majitu a bungi adibu nawu bimpe. Malongesha adibu bangatshile mu Bible aa adi akankamija bana betu ba balume bua kulamabu buena Kristo buabu ne bua kutumikilabu mêyi manene a mu Bible mu mushindu udibu benzela mikoko ya mushinga idi Yehowa mubapeshe bua kulama malu.—1 Pet. 5:1-3.

20. Bua tshinyi Yezu wakamba ne: tuetu bonso tudi ‘balongeshibue kudi Yehowa’?

²⁰ Bidi bimueneka patoke ne: Mukalenge Masiya mmuenze bua bayidi bende balongeshibue bimpe. Malongesha onso mmafumine ku mutu matangile kuinshi, mmumue ne: Yehowa mmulongeshe Muanende, ne Muana mmulongeshe bayidi bende. Ke bualu kayi Yezu wakamba ne: tuetu bonso tudi ‘balongeshibue kudi Yehowa.’ (Yone 6:45; Yesh. 54:13) Tudisuikayi bua kutumikila malongesha adi Mukalenge wetu mutupeshe. Tuvulukayi ne: tshipatshila tshinene tshia malongesha onso aa ntshia kutuambuluisha bua tuikale bakole mu nyuma bua tumona mua kukumbaja mudimu wetu wa diyisha bimpe.