1-3. ¿Imatam Jesucristoqa ruwarqa achka runakunaman Diosmanta yachachinanpaq?

 JESUCRISTOM Diosmanta willakustin lliw Galilea llaqtapi iskay watapuni purirqa (leey Mateo 9:35-38). Achka llaqtakunamanwan llaqtachakunaman rispanmi Diosmanta willakurqa hinaspa huñunakunanku wasikunapi yachachirqa. Mayman riptinpas achka runakunam uyariqku. Chaymi nirqa: “Achkallañam kachkan cosechanapaqqa, cosechaqkunam ichaqa aslla”, nispa.

² ¿Imatam Jesusqa ruwarqa achka runakunaman Diosmanta yachachiyta munaspan? 12 apostolninkunatam Dios imayna kamachimunanmanta willakunankupaq kacharqa (Luc. 9:1, 2). Apostolkunaqa yachaytachá munarqaku Diosmanta imayna willakunankumanta. Chaymi Jesusqa Diosmanta willakunankupaq manaraq kachachkaspan kuyakuywan yachachirqa imaynata willakunankupaq, chaynatamá Jehova Diospas Jesusta yachachirqa kay pachaman manaraq kachamuchkaspan.

³ Chaynaqa tapukunchikpaschá ¿Imaynatam Jehova Diosqa Jesucristota yachachirqa? ¿Imaynatam Jesucristoqa apostolninkunata yachachirqa? ¿Yaqachu kamachiwaqninchik Jesucristoqa kay tiempopipas Diosmanta willakunapaq yachachiwachkanchik? Chayna kaptinqa ¿imaynatam yachachiwanchik?

4. ¿Maypitaq hinaspa haykapitaq Diosqa Jesucristoman yachachirqa?

⁴ Jesustaqa taytanmi yachachirqa, chaytam payqa riqsikurqa. Chaymi nirqa: ‘Taytaypa yachachiwasqallantam ñuqaqa willaykichik’, nispa (Juan 8:28). ¿Maypitaq hinaspa haykapitaq taytanqa yachachirqa?  Hanaq pachapim unanchasqanmantapacha yachachirqa (Col. 1:15). Jesucristoqa taytanpa yachachisqankunata uyaristinmi hanaq pachapi wara-waranqantin watakuna karqa (Job 36:22). Chaymi allinta yacharqa taytan imayna sunquyuq kasqanmanta, ruwasqankunamanta hinaspa imakuna ruway munasqankunamantapas.

5. ¿Imaynata yachachinanpaqmi Jesucristotaqa taytan yachachirqa?

⁵ Jehova Diosqa tanteasqan tiempopim churinman yachachirqa allpa pachaman hamuspan lliw runakunaman Diosmanta willakunanpaq. Bibliapim willakurqaña Jehova Diosqa churin Jesucristota imayna yachachisqanmanta, chay willakuymantayá yachasun (leey Isaias 50:4, 5). Imaynam taytaqa churinman yachachinanpaq sapa tutapaymanta rikcharichin, chaynam Jehova Diospas hanaq pachapi churinman yachachirqa. Bibliamanta rimaq huk qillqapim nin: “Jehova Diosmi warmachaman escuelapi yachachichkaq hina Jesucristomanqa yachachirqa runakunaman imamanta willakunanpaq hinaspa imaynata willakunanpaqpas”, nispa (Juan 12:49). Chaymantapas runakunaman imaynata yachachinanpaqmi yachachirqa. a Chaymi Jesucristoqa taytanpa yachachisqanmanta runakunaman willakurqa hinaspam qatiqninkunamanpas yachachirqa runamasinkunaman allinta yachachinankupaq.

6, 7. (1) ¿Imaynatam Jesucristoqa qatiqninkunaman yachachirqa hinaspa imapim chayqa paykunata yanaparqa? (2) ¿Imakunapaqmi Jesucristoqa yanapawachkanchik?

⁶ Kay yachachikuypa qallariyninpim qawamurqanchik Jesucristoqa Diosmanta willakunankupaq qatiqninkunaman yachachisqanmanta. ¿Imaynatam yachachirqa? Mateo libropa 10 kaq capitulonpa nisqanman hinam Jesusqa qatiqninkunaman yachachirqa: Maypi willakunankupaq (5-6 versiculonkunapi), imamanta willakunankupaq (7 versiculonpi), Jehova Diospi hapipakunankupaq (9-10 versiculonkunapi), runakunawan imayna rimanankupaq (11-13 versiculonkunapi), runakuna mana uyariyta munaptinku ima ruwanankumanta (14-15 versiculonkunapi) hinaspa qatikachasqa kaspanku ima ruwanankumantapas (16-23 versiculonkunapi). b Jesucristopa chayna yachachisqanmi qatiqninkunata yanaparqa Diosmanta allinta willakunankupaq.

 ⁷ Kay tiempopipas kamachiwaqninchik Jesucristoqa lliw qatiqninkunatam kamachiwanchik allin noticiamanta enteron allpa pachapi willakunanchikpaq (Mat. 24:14). ¿Ñuqanchiktapas yachachiwachkanchikchu allinta willakunanchikpaq? Awriki. Runakunaman Diosmanta willakunapaq hinaspa iñiqmasinchikkunatapas allinta yanapanapaqmi Jesucristoqa hanaq pachamanta yanapamuwachkanchik.

8, 9. (1) ¿Imapaqmi astawan yanapawanchik Diosmanta yachachinapaq escuelaqa? (2) ¿Imaynatam chay escuela yanapawarqanchik?

⁸ Ñawpa watakunamantaraqmi enteron pachapi Diospa llaqtanpi punta apaqkunaqa Diosmanta willakunanchikpaq huñunakuyninchikkunapi allinta yachachiwanchik. Chaymantapas 1940 watamantapacham paykunaqa tantearurqaku Diospa llaqtanpi escuelakunawan astawan yachachiwananchikpaq.

⁹ Diosmanta yachachinapaq escuela. Kay qillqapa 15 yachachikuyninpi yachamusqanchikman hinam kay escuelaqa 1943 watapi qallaykurqa. ¿Huñunakuykunapi allinta rimaspa yachachinallapaqchu chay escuelaqa yanapawarqanchik? Manam. Aswanqa Jehova Diosmanta allinta willakuspa hatunchanapaqmi (Sal. 150:6). Chay escuelapi kayninchikqa llapallanchiktam yanapawarqanchik allin yachachiq kanapaq. Kunanqa chaypaqmi yanapawasun Diospa munayninta ruwananchikpaq huñunakuy.

10, 11. (1) ¿Pikunataq kay tiempopiqa galaad escuelaman rinmanku? (2) ¿Imakunapitaq yanapan chaypi yachasqankuqa?

¹⁰ Galaad escuela. Chay escuelaqa qallaykurqa febrero 1943 watapim. Qallariyninpiqa karqa precursorkunata astawan yachachinankupaqmi, chaynapi huk law nacionkunaman rispa Diosmanta astawan willakunankupaq. Octubre 2011 watamantam ichaqa chay escuelaman rinku precursor especialkuna, betel wasipi llamkaqkuna, iñiqmasinchikkunata llaqtan-llaqtan watukuq ancianokuna señorankupiwan hinaspa chay escuelaman manaraq riq misionerokunapas.

¹¹ ¿Imakunapitaq chay escuelapi yachasqankuqa yanapan? Chay escuelapi unay watakunaña yachachiq iñiqmasinchikmi nin: “Chay escuelaman riqkunaqa Diospa palabranmantam allintapuni yachanku, chaymi yanapan astawan iñiyniyuq kanankupaq, yanapantaqmi sumaq sunquyuq kaspanku ima  sasachakuytapas atipanankupaq. Chay escuelaqa yanapantaqmi tukuy sunqunkuwan Diosmanta astawan willakunankupaqpas”, nispa (Efes. 4:11).

12, 13. ¿Imaynatam galaad escuelaqa Diosmanta enteron pachapi willakuyninchikpi yanapachkan? Japón nacionmanta rimarimuy

¹² ¿Imaynatam galaad escuelaqa Diosmanta enteron pachapi willakuyninchikpi yanapachkan? 1943 watamantapacham 8.500 iñiqmasinchikkuna chay escuelapi estudiarqaku c hinaspam 170 masnin nacionkunapi misionero kachkanku. Paykunaqa chay escuelapi yachasqankutam allinta servichikunku Diosmanta willakuspanku, chaymantapas iñiqmasinchikkunamanmi yachachinku paykuna hina ruwanankupaq. Paykunaqa Diosmanta willakuqkuna aslla kasqanku lawkunapitaqmi yanapakuchkanku.

¹³ Enteron allpa pachapi iskay kaq hatun guerra kaptinmi Japón nacionpiqa yaqa lliw iñiqmasinchikkuna Diosmanta manaña willakurqakuñachu. Agosto 1949 watapiqa manam chunkallapas karqakuchu Diosmanta willakuqkunaqa. Ichaqa chay wata tukuytam 13 misionerokuna galaad escuelamanta rirqaku tukuy tiemponkuwan Diosmanta willakunankupaq, chaymanta qipamanpas achka misionerokunaraqmi rirqaku. Qallariyninpiqa hatun llaqtakunamanmi rirqaku, hinaspam paykunaqa iñiqmasinchikkunata chaynataq biblia estudiaqkunata kallpancharqaku precursor kanankupaq. Chayna kallpanchasqankuqa allintamá yanaparqa. Kay tiemponchikpaqqa 216.000 iñiqmasinchikkunañam Japón nacionpiqa Diosmanta willakuchkanku, hinaspapas 86.400 masnin precursorkunam kachkanku. d

14. ¿Imatam qawachin Diosmanta willakunapaq yanapawaqninchik escuelakunaqa? (Qawaytaq 212 paginapi “ Diosmanta willakunapaq escuelakuna” niq yachachikuytapas).

¹⁴ Sapaq escuelakuna. Precursorkunata yanapaq escuela, casarasqa warmi-qaripaq bibliamanta escuela hinaspa solterokunapaq bibliamanta escuelakunam chayman riq iñiqmasinchikkunata yanaparqa Diosta astawan servinankupaq. e Kay escuelakuna yanapawasqanchikmi qawachiwanchik Diosmanta willakunapaqqa kamachiwaqninchik Jesucristo yachachiwasqanchikta (2 Tim. 4:5).

15. ¿Imapim ancianokunaqa Jesusta qatipakuyta munanku?

¹⁵ Jehova Dios churinman imayna yachachisqanmanta Isaiaspa qillqasqanta yuyarisun. Jesucristotaqa  taytanmi yachachirqa llakisqakunata kuyakuywan kallpanchananpaq (Is. 50:4). Chaymi Jesucristoqa kay allpapi kaspan ‘ñakariypi’ tarikuqkunata kuyakuywan yachachirqa (Mat. 11:28-30). Jesucristota qatipakuspankum Diospa llaqtanpi yanapakuq ancianokunapas iñiqmasinkunata sumaqllata kallpanchayta munanku. Chayta allinta ruwanankupaqmi kachkan ancianokunapaq escuelakuna.

16, 17. ¿Imapitaq yanapan ancianokunapaqwan siervo ministerialkunapaq escuelaqa? (Qawaytaq 6 kaq willakuytapas).

¹⁶ Ancianokunapaq hinaspa siervo ministerialkunapaq escuela. Kay escuelaqa 9 marzo 1959 watapim qallaykurqa Nueva York llaqtapi ingles rimaypi, chaypi llapan ancianokunatam nirqaku chay escuelaman huk killa rinankupaq. Watakuna pasasqanman hinataqmi huk rimaykunapipas chay escuelaqa enteron pachapi ancianokunata yanapachkan. f

¹⁷ Ancianokunapaq hinaspa siervo ministerialkunapaq escuela imapaq kasqanmantam 1962 watapi  lluqsimuq Anuario qillqapi nirqa: “Kay sasachakuy tiempopi Diospa llaqtanpi ancianokunaqa allintam tiemponkuta rakinanku ima ruwayninkunapaqpas chaynapi iñiqmasinkunata allinta yanapanankupaq. Ichaqa manam chayraykuchu wasinpi kaqkunapaq tiempochakuytaqa saqinan, aswanmi tanteoyuq kasqanta qawachinan. Enteron allpa pachapim ancianokunaqa chay escuelapi yachachisqa kanku bibliapa kamachisqanman hina ima ruwayninkutapas ruwanankupaq”, nispa (1 Tim. 3:1-7; Tito 1:5-9).

18. ¿Imaynatam ancianokunapaqwan siervo ministerialkunapaq escuelaqa llapanchikta yanapawanchik?

¹⁸ Llapallanchiktam chay escuelaqa yanapawanchik. ¿Imaynata? Ancianokunawan siervo ministerialkuna chay escuelapi yachamusqankuman hina iñiqmasinkunata yanapaspankuqa Jesucristo hinam allinta kallpanchanku. ¿Manachu agradecekunki chayna  kuyakuywan kallpanchasusqaykimanta? (1 Tes. 5:11). Kallpanchawaqninchik ancianokunaqa mayna allinmi llapallanchikpaq.

19. (1) ¿Pikunapaqtaq yachachikuymanta cuentallikuqkunaqa sapaq escuelakunata tantearqaku? (2) ¿Imapim chayqa yanapan?

¹⁹ Sapaq escuelakuna. Enteron pachapi Diospa llaqtanpi punta apaqkunam tanteanku chay sapaq escuelakunawan ancianokunata, iñiqmasinchikkunata llaqtan-llaqtan watukuq ancianokunata hinaspa betel wasipi cuentallikuqkunata astawan yachachinankupaq, chaynapi Diospa llaqtanpi allinta yanapakunankupaq. Chay escuelapi yachachikuykunaqa bibliamanta hurqusqam, chaymi yanapan iñiyninkupi allinta takyanankupaq hinaspa iñiqmasinkutapas bibliapa nisqanman hina allinta yanapanankupaq (1 Ped. 5:1-3).

20. (1) ¿Imanasqam Jesusqa nirqa: ‘Diosmi llapallanchikta yachachiwanchik’, nispa? (2) ¿Imapaqmi allinta kallpanchakunanchik?

²⁰ Kamachiwaqninchik Jesucristoqa allintam yanapawanchik yachachisqa kananchikpaq. Chay yachachikuykunaqa Jehova Diosmantam hamun, paymi churinman yachachirqa, churinñataqmi qatiqninkunaman. Chaymi churin Jesucristoqa nirqa: ‘Diosmi llapallanchikta yachachiwanchik’, nispa (Juan 6:45; Is. 54:13). Kamachiwaqninchik Jesucristopa yachachiwasqanchikwan allinta yanapachikunapaqmi kallpanchakunanchik. Chaymi yanapawanchik iñiyninchikpi qaqa hina allinta takyanapaq hinaspa Diosmanta allinta willakunanchikpaq, amayá chaytaqa qunqasunchu.