1-3. a) ¿Imatan Jesús ruwarqan huk llaqtakunapipas predicakunanpaq? b) ¿Ima tapuykunatan kay estudiopi kutichisun?

 JESUSQA Galilea llaqtapin iskay watata predicarqan (leey Mateo 9:35-38). Payqa askha llaqtakunapin purirqan Diospa gobiernonmanta predicaspa sinagogakunapi yachachispa ima. May predicasqanpipas Jesusmanqa askha runakunan qayllaykuqku, chaymi nirqan: “Cosechanaqa askhapunin”, nispa. Payqa yacharqanmi askha predicaqkuna necesitakusqanta.

² Jesusqa munarqanmi huk llaqtakunapipas predicakunanta. Chaymi 12 apostolninkunata kacharqan “Diospa qhapaqsuyunmanta willamunankupaq” (Luc. 9:1, 2). Apostolkunaqa “¿imaynatan kayta ruwasaqku?” nispachá tapukurqanku. Chayraykun Jesusqa manaraq kachashaspa paykunata sumaqta yachachirqan imaynatachus predicananku kasqanta, Jesustapas Diosmi chayta yachachirqan.

³ Ichaqa, ¿imaynatan Jehová Dios churin Jesusta yachachirqan? ¿Imaynatan Jesús apostolninkunata yachachirqan? Kay tiempopipas, ¿imaynatan rey Jesucristo yanapawashanchis predicananchispaq?

4. ¿Hayk’aqmi Jehová Dios churinta yachachiyta qallarirqan? ¿Maypin yachachirqan?

⁴ Jesusqa sut’itan rikuchirqan yachachiqnin Jehová Dios kasqanta. Kay pachapi kashaspan kayta nirqan: “Yayaq yachachiwasqallantan willaykichis”, nispa (Juan 8:28). ¿Hayk’aqmi Jehová Dios churinta yachachiyta qallarirqan? ¿Maypin yachachirqan? Diosqa Jesustan ñawpaqta kamarqan, chaymi Jesustaqa kamasqa kasqan qhepallaman yachachiyta qallarirqan (Col. 1:15). Jesusqa hanaq pachapin waranqa waranqa watakuna Taytanwan kuska tiyarqan, chaypin payqa ‘yachachiqninta’ uyarisharqan, ruwasqantapas qhawasharqan (Is. 30:20).  Jesusqa imaymanatan yacharqan, ichaqa chaykunataqa yacharqan Taytan imayna kasqanmanta, ruwasqankunata qhawasqanmanta, Taytan imakuna ruway munasqanmanta iman. Manan pipas Jesús hinaqa yachachisqa karqanchu.

5. ¿Imakunatan Jehová Dios churinman yachachirqan kay pachapi predicananpaq?

⁵ ¿Yachachirqanchu Jehová Dios churinta imayna predicayta? Arí, chaytaqa akllasqan tiempopin ruwarqan. Huk profecian willawanchis imaynatachus Jesús yachachiqnin Jehová Dioswan kawsasqanta (leey Isaías 50:4, 5). Chay profeciaq nisqanman hinaqa, Jehová Diosmi churinta ‘sapa paqar’ rikch’achiq. Diosqa Jesuswan kaytapas ruwanman hinan karqan: Huk profesor kaspan sapa p’unchay tempranota alumnon Jesusta rikch’achirqan yachachinanpaq. Huk qelqan chaymanta rimaspa nin: “Jehová Diosqa [...] huk alumnota hinan [Jesusta] escuelaman aparqan, chaypitaq yachachirqan imamanta predicayta imayna predicayta ima”, nispa. Chay escuelapin Jehová Diosqa churinta yachachirqan ‘imaynatachus rimananta imatachus ninantapas’ (Juan 12:49). Chaymantapas Jehová Diosqa churintan yachachirqan allin yachachiq kananpaq. a Kay pachapi kashaspan Jesusqa Taytanpa yachachisqanman hinapuni predicarqan, ichaqa chay yachasqantaqa qatikuqninkunamanpas yachachirqanmi, chhaynapi paykunapas allinta predicanankupaq.

6, 7. a) ¿Imakunatan Jesús apostolninkunaman yachachirqan? b) ¿Imapaqmi apostolkuna preparasqa kasharqanku? c) ¿Imakunata ruwananchispaqmi Jesús kay tiempopi preparawarqanchis?

⁶ ¿Imakunatan Jesús apostolninkunaman yachachirqan? Mateo 10 capitulopi nisqanman hina, Jesusqa kaykunatan yachachirqan: maypi predicayta (5, 6 versiculokunapi), imamanta predicayta (7 versiculopi), Diospi confiayta (9, 10 versiculokunapi), runakunawan imayna rimayta (11-13 versiculokunapi), runakuna mana uyarikuqtinku ima ruwayta (14, 15 versiculokunapi), qatiykachasqa kaspa ima ruwaytapas (16-23 versiculokunapi). b Jesusqa sut’itan qatikuqninkunaman willarqan imatachus ruwanankuta, chhaynatan paykunata prepararqan predicacionta aparinankupaq.

⁷ Kay tiempopipas rey Jesusqa huk hatun llank’anatan qowarqanchis. Payqa kamachiwarqanchismi ‘allin willakuykunata kay pachantinpi willananchispaq’ (Mat. 24:14). ¿Yachachiwarqanchischu Jesús chay hatun llank’ayta imayna ruwayta? Arí, yachachiwarqanchismi. Hanaq pachamantapachan Jesusqa encargakurqan qatikuqninkuna  allin preparasqa kanankupaq, chhaynapi allin predicaqkuna kanankupaq iñiq t’aqa ukhupipas allinta llank’anankupaq.

8, 9. a) ¿Imapaqmi ruwakurqan Bibliamanta allin yachachiq kanapaq escuela? b) ¿Imaynatan chawpi semana huñunakuy yanaparqasunki allin predicaq kanaykipaq?

⁸ Diospa llaqtanqa unayñan asambleakunawan hinallataq predicayta yachanapaq huñunakuywanpas cristianokunata preparashan allinta predicanankupaq. Ichaqa 1940 watakunamantapachan escuelakunawan ima preparashan.

⁹ Bibliamanta allin yachachiq kanapaq escuela. Ñawpaq capitulopi yachasqanchis hina, chay escuelaqa 1943 watapin qallarirqan. ¿Discurso qoyllatachu chay escuelapi yachachirqanku? Manan. Chhaynaqa, ¿imapaqmi chay escuela ruwakuyta qallarirqan? Chay escuelaqa astawanmi matriculasqakunata prepararqan predicacionpi allinta rimaspa Diosta hatunchanankupaq (Sal. 150:6). Chaymantapas allin yachachiq kanankupaqmi yanaparqan. Kunanpas kaq preparacionllatataqmi chaskinchis chawpi semana huñunakuyninchispi.

10, 11. a) ¿Pikunan riyta atinkuman Galaad escuelaman? b) ¿Imapaqmi Galaad escuela ruwakuyta qallarirqan?

¹⁰ Galaad escuela. Chay escuelaqa qallarirqan 1943 watapi 1 febrero killapin. Ñawpaqpiqa chay escuelan precursorkunata hinallataq tukuy tiemponkuwan Diosta serviqkunatapas prepararqan huk nacionkunaman rispa predicanankupaq. Ichaqa 2011 watapin octubre killamantapacha chayqa cambiarqan, kunanqa chay escuelamanmi rinkuman precursor especialkuna, watukuq umallikuna esposankuwan, betelitakuna, chay escuelaman mana riq misionerokunapas.

¹¹ ¿Imapaqmi Galaad escuela ruwakuyta qallarirqan? Huk iñiqmasinchismi chay escuelapi askha watakuna yachachirqan, paymi nin: “Chaypi estudiantekunaqa Bibliatan allinta estudianku, chaytaqmi yanapan allin iñiyniyoq kanankupaq. Hinaspapas allin runa kaytan yachanku maypiña servispapas allinta llank’anankupaq. Chaymantapas chay escuelan estudiantekunata yanapan sonqomantapuni predicayta munanankupaq”, nispa (Efes. 4:11).

12, 13. ¿Imaynatan Galaad escuela pachantinpi predicación aparikunanpaq yanapakurqan? Willay.

¹² ¿Imaynatan Galaad escuelaq kasqanwan pachantinpi predicación aparikurqan? 1943 watamantapachan  8.500 más iñiqmasinchiskuna chay escuelapi preparasqa karqanku, c paykunataq 170 más nacionkunapi misionero kaspa servirqanku. Chay misionerokunaqa Galaad escuelapi yachasqankuman hinan ruwarqanku, tukuy sonqowanmi predicarqanku hukkunatapas yachachirqankun kaqllata ruwanankupaq. Paykunaqa askha kutipin pisi predicaqkunaq kasqan ladokunapi karqanku, chaykunapin predicacionta aparirqanku.

¹³ Yachasun Japón nacionpi sucedesqanmanta. Segunda Guerra Mundial kasqan tiempopin predicacionqa yaqalla chinkapurqan. 1949 watapi agosto killapiqa manan 10 predicaqkunallapas karqanchu Japón nacionpi. Ichaqa chay wata tukuypaqmi Galaad escuelamanta 13 misionerokuna Japón nacionman rirqanku, chaypitaq tukuy tiemponkuwan predicarqanku. Chay qhepamantaq hukkunapas rirqanku. Qallariypiqa hatun llaqtakunallapin predicarqanku; qhepamanmi ichaqa huk llaqtakunamanpas rirqanku. Chay misionerokunaqa kusikuywanmi estudiantekunata hukkunatapas kallpacharqanku precursor kanankupaq. ¿Iman karqan chayta ruwasqankurayku? Kunanqa Japón nacionpiqa 216.000 más predicaqkunan kashan, paykunamanta yaqa kuskantaq precursorkuna kanku. d

14. ¿Imatan sut’ita reparanchis escuelakuna kasqanwan? (Qhawallaytaq “ Diosta serviqkunata preparaq escuelakuna” nisqa recuadrota.)

¹⁴ Huk escuelakuna. Precursorkunapaq escuela, casarasqa cristianokunapaq escuela, soltero qharikunapaq escuelapas askha cristianokunatan yanaparqan allin iñiyniyoq kanankupaq predicacionta tukuy sonqowan pusarinankupaqpas. e Lliw chay escuelakunan sut’ita reparachiwanchis allinta predicananchispaq rey Jesucristo preparawasqanchista (2 Tim. 4:5).

15. ¿Imata ruwanankupaqmi Diospa llaqtanpi umallikuna kallpachakunku?

¹⁵ Yuyarisun Isaías qelqapi tarikuq profeciata, chaypin willashan Jehová Dios churin Jesusta yachachisqanmanta. Chay hanaq pacha escuelapin Diosqa Jesusta ‘allinta yachachirqan sayk’usqata siminwan kallpachaspa sonqochananpaq’ (Is. 50:4). Kay pachapi kashaspan Jesusqa Diospa yachachisqanman hina ruwarqan, payqa ‘llapa sayk’usqakunata q’episapakunata’ iman yanaparqan (Mat. 11:28-30). Jesusta qatikuspan Diospa llaqtanpi umallikunapas kallpachakunku iñiqmasinkuta munakuywan sonqochanankupaq yanapanankupaq  ima. Chayraykun paykunapaq askha escuelakuna ruwakuyta qallarirqan, chhaynapi iñiqmasinkuta aswan allinta yanapanankupaq.

16, 17. ¿Imapaqmi ruwakuyta qallarirqan nombrasqa qharikunapaq escuela? (Willakuytawan qhaway.)

¹⁶ Nombrasqa qharikunapaq escuela. Chay escuelaqa 1959 watapin 9 marzo killapi qallarirqan South Lansing (Nueva York) llaqtapi. Chaymanqa invitarqanku watukuq umallikunata hinallataq iñiq t’aqamanta encargakuqkunata iman (kunanqa paykunatan reqsikun “umallikunaq llank’ayninpi yanapakuq umalli” nispa), chay escuelaqa huk killapin aparikurqan. Chay qhepamanmi chaypi yachachikusqanta inglés simimanta huk simikunaman t’ikrarqanku, hinan pisi-pisimanta pachantinpi iñiqmasikunata preparakurqan. f

¹⁷ ¿Imapaqmi chay escuela ruwakuyta qallarirqan? Anuario de los Testigos de Jehová para 1962 nisqa qelqan nirqan: “Kay pachapi runakunaqa imaymana ruwanayoqmi kashanku, chaymi iñiq t’aqapi umallikunaqa  tiemponkuta allinta t’aqananku llapa iñiqmasikunata allinta yanapanankupaq, chhaynapi iñiqmasikunapas paykunawan kusisqa kanankupaq. Chaymantapas umallikunaqa allin yuyaywanmi imatapas ruwananku, manan familiankutaqa saqerparinkumanchu iñiq t’aqata yanapanankuraykuqa. Pachantinpi iñiq t’aqamanta encargakuqkunaqa atinkun riyta nombrasqa qharikunapaq escuelaman, chaypin allin preparasqa kanqaku Bibliaq nisqanman hina allinta llank’anankupaq”, nispa (1 Tim. 3:1-7; Tito 1:5-9).

18. ¿Imaynapin nombrasqa qharikunapaq escuela llapa iñiqmasikunaq allinninpaq?

¹⁸ Nombrasqa qharikunapaq escuelaqa Diospa llaqtanpi llapa iñiqmasikunaq allinninpaqmi, ¿imaynapi? Umallikunapas yanapakuq qharikunapas chay escuelapi yachasqankuman hina ruwaqtinkuqa Jesuspa ruwasqanta hinan ruwanqaku, hinan llapa iñiqmasikuna kallpachasqa sonqochasqa ima sientekunqaku. ¿Manachu kusisqa sientekunchis huk umalli otaq yanapakuq  qhari sumaqta rimapayawaqtinchis, tukuy yuyaywan uyariwaqtinchis, otaq wasinchisman hamuspa kallpachawaqtinchis? Arí kusikunchismi (1 Tes. 5:11). ¡Ancha kusisqan kashanchis chay nombrasqa qharikunamanta!

19. ¿Mayqen escuelakunatawanmi yachachikuymanta encargakuqkuna qhawarinku? ¿Imapaqmi chay escuelakuna ruwakuyta qallarirqan?

¹⁹ Huk escuelakuna. Umalliq t’aqamanta yachachikuymanta encargakuqkunaqa huk escuelakuna aparikusqantapas qhawarinkun, chay escuelakunaqa Diospa llaqtanpi hatun llank’aykunata apariqkunapaqmi. Paykunan kanku iñiq t’aqamanta umallikuna, watukuq umallikuna, sucursalmanta encargakuqkuna ima. Chay escuelakunan iñiqmasikunata yanapashan ruwayninkuta allinta hunt’anankupaq, allin iñiyniyoq kashanallankupaq, Jehová Diospa ovejankunata munakuywan Bibliaq nisqanman hina yanapanankupaqpas (1 Ped. 5:1-3).

20. ¿Imaraykun Jesús nirqan: ‘Llapanchismi Diospa yachachisqan kanchis’, nispa? ¿Imata ruwananchispaqmi kallpachakunanchis?

²⁰ Chaywanmi sut’ita reparanchis qatikuqninkuna allin preparasqa kanankupaq rey Jesucristo encargakusqanta. Lliw yachaypas Jehová Diosmantan hamun, Diosmi churinta yachachirqan, churintaq qatikuqninkunata yachachirqan. Chayraykun Jesusqa nirqan: ‘Llapanchismi Diospa yachachisqan kanchis’, nispa (Juan 6:45; Is. 54:13). Chhaynaqa kallpachakusun reyninchis Jesucristo qowasqanchis yanapaykunawan yanapachikunanchispaq. ¿Imapaqmi chaykuna ruwakun? Allin iñiyniyoq kashanallanchispaqmi, chhaynapi Dios serviyninchista allinta hunt’ananchispaq.