1-3. Kumbi Yesu wangulutiska wuli panthazi nchitu yakupharazga, nanga vo wanguchita vititichitiska kujifumba mafumbu nanga?

YESU wangupharazga ku Galile kwa vyaka viŵi. (Ŵerengani Mateyu 9:35-38.) Iyu wangwenda mumisumba kweniso mizi yinandi ndipu wasambizanga ndi kupharazga uthenga wamampha wa Ufumu m’masinagoge. Ŵanthu anandi amulondonga kwekosi ko wapharazganga. Yesu wanguziŵa kuti “chivuna nchikulu” ndipu pakhumbikanga anchitu anandi.

² Yesu wangunozga kuti nchitu yakupharazga yiluti panthazi. Kumbi wanguchita wuli venivi? Iyu wangutuma akutumika ŵaki 12, “kwachimemeza Ufumu waku Chiuta.” (Luka 9:1, 2) Akutumika atenere kuti ajifumbanga kuti amugwira wuli nchitu yeniyi. Wechendaŵatumizgi, Yesu wanguŵapaska masambiru ngo iyu wangulonde kwa Awiski kuchanya.

³ Ivi vititichitiska kujifumba kuti: Kumbi ndi masambiru wuli ngo Yesu wangulonde kwa Awiski? Kumbi Yesu wanguŵasambizanji akutumika? Kumbi Yesu yo ndi Fumu Mesiya, wasambiza so ŵanthu ŵaki mazuŵa nganu kuti achiti umampha uteŵeti wawu? Nanga watiŵasambiza wuli?

4. Kumbi Yesu wangusambizika zukwanji ndi Awiski, nanga wangusambizikiya nunkhu?

⁴ Yesu wangubisa cha kuti wangusambizika ndi Awiski. Pa nyengu yo wenga pacharu chapasi, wangukamba kuti: ‘Nge ndimo andisambiziya Ada, ndilongoro venivi.’ (Yoh. 8:28) Kumbi Yesu wangusambizika zukwanji, nanga wangusambizikiya nunkhu? Iyu nge Mwana wakwamba waku Chiuta, wangwamba kusambira wati walengeka ŵaka. (Ŵakol. 1:15) Iyu wenga ndi Awiski kuchanya ndipu kwa vyaka vinandi wavwiskiyanga kweniso kuwona vo “Msambizi [Mura, NW]” wachitanga. (Yes. 30:20) Ivi vinguchitiska kuti Mwana wasambiri vinandi pa nkhani ya mijalidu, nchitu, kweniso vo Awiski akhumbanga.

5. Kumbi Awiski angumusambizanji Mwana vakukwaskana ndi uteŵeti wo wazichitanga pacharu chapasi?

⁵ Pati pajumpha nyengu, Yehova wangusambiza Mwana waki vakukwaskana ndi uteŵeti wo iyu wazichitanga pacharu chapasi. Wonani vo uchimi wo ukonkhoska ubwezi wa pakati pa Msambizi Mura ndi Mwana waki wakwamba ukamba.  (Ŵerengani Yesaya 50:4, 5.) Uchimi uwu ukamba kuti Yehova wayuskanga Mwana “mulenji ndi mulenji.” Mazu yanga tingangayeruzgiya ndi msambizi yo wayuska mwana wasukulu mlenjilenji kuti wamusambizi. Buku linyaki lakukonkhoska Bayibolo likamba kuti: “Yehova . . . wachitanga nayu vinthu nge mwana wa sukulu ndipu wamusambizanga vo wakhumbikanga kuzipharazga kweniso mo wazipharazgiyanga.” Tingakamba kuti Yehova wangusambiza Mwana waki vakwenere ‘kukamba, kweniso kulongoro.’ (Yoh. 12:49) Awiski angupaska so Mwana ulongozgi wa mo wangasambiziya. * We pacharu chapasi, Yesu wangugwiriskiya nchitu umampha vo wangusambira mwakuchita uteŵeti waki pe cha, kweni wangusambiza so akusambira ŵaki mo angachitiya umampha uteŵeti wawu.

6, 7. (a) Kumbi Yesu wanguŵasambizanji akutumika nanga masambiru ngenanga nganguŵawovya kufiskanji? (b) Kumbi Yesu wawonesesa kuti akusambira ŵaki mazuŵa nganu alonde masambiru wuli?

⁶ Kumbi Yesu wanguŵasambizanji akutumika vakukwaskana ndi uteŵeti wawu? Mwakukoliyana ndi Mateyu chaputala 10, wanguŵapaska ulongozgi wa mo angachitiya uteŵeti wawu. Iyu wanguŵakambiya, ko angachipharazga (vesi 5, 6), uthenga wakuchipharazga (vesi 7), kukhumbika kwa kuthemba Yehova (vesi 9, 10), mo angayambiya kukambiskana ndi ŵeneku nyumba (vesi 11-13), mo angachichitiya asani ŵanthu akana kulonde uthenga wawu (vesi 14, 15) ndipuso vo angachichita asani akumana ndi masuzgu (vesi 16-23). * Vo Yesu wangusambiza akutumika, vinguŵawovya kuti afiski kugwira nchitu yakupharazga m’nyengu yawu.

⁷ Nanga mazuŵa nganu? Yesu yo ndi Fumu ya Ufumu waku Chiuta, wapaska ŵanthu ŵaki nchitu yakukhumbika ukongwa yakupharazga “evangeli wenuwu wa Ufumu . . . mucharu chosi chapasi uli mbukaboni ku mitundu yosi.” (Mateyu 24:14) Kumbi Fumu yatisambiza kuti tigwiri nchitu yakukhumbika ukongwa yeniyi? Yatisambiza nadi! Chinanga kuti ye kuchanya, Fumu yiwonesesa kuti akusambira ŵaki alonde masambiru nga mo angapharazgiya kweniso mo angafiskiya maudindu ngapade m’mpingu.

8, 9. (a) Kumbi chilatu chikulu cha Sukulu ya Uteŵeti Waku Chiuta nchinthu wuli? (b) Kumbi Sukulu ya Uteŵeti Waku Chiuta yakuwovyani wuli kuti muje apharazgi alusu?

⁸ Kwamba kali, gulu laku Yehova ligwiriskiya nchitu maunganu ngakulungakulu kweniso nga mpingu nge Unganu wa Uteŵeti kuti lisambizi ŵanthu aku Chiuta mo angachitiya uteŵeti wawu. Kweni kwambiya m’ma 1940, abali wo alongozganga ku likulu lidu angwamba kujalikiska masukulu ngakupambanapambana ngakusambiza ateŵeti.

⁹ Sukulu ya Uteŵeti Waku Chiuta. Nge mo tinguwone m’Mutu 16, sukulu iyi yingwamba kuchitika mu 1943. Kumbi chilatu cha sukulu iyi nkhusambiza ŵaka ŵanthu kuti akambengi umampha nkhani pa maunganu nga mpingu?  Awa. Kwamba kali, chilatu chikulu cha sukulu iyi, nkhusambiza ŵanthu aku Chiuta mo angagwiriskiya nchitu chawanangwa cha kuŵereŵeta pakutumbika Yehova mu uteŵeti. (Sumu 150:6) Sukulu iyi yitovya abali ndi azichi wosi wo akulembeska kuti aje apharazgi a Ufumu alusu.

10, 11. Kumbi mbayani wo asere Sukulu ya Giliyadi mazuŵa nganu, nanga chilatu cha sukulu iyi nchinthu wuli?

¹⁰ Sukulu ya Giliyadi. Sukulu iyi yingwamba pa Mandi, 1 February 1943. Pakwamba, chilatu cha sukulu iyi chenga kusambiza apayiniya kweniso ateŵeti anyaki anyengu zosi kuti akaje amishonale m’vyaru vinyaki. Kweni kwamba mu October 2011, m’sukulu iyi musere ŵanthu wo achita uteŵeti wanyengu zosi wapade pe, nge apayiniya apade, akuwonere madera ndi awolu ŵawu, ateŵeti a pa Beteli, ndipuso amishonale wo ŵechendaserepu sukulu yeniyi.

¹¹ Kumbi chilatu cha Sukulu ya Giliyadi nchinthu wuli? M’bali munyaki yo waja wachisambiza m’sukulu iyi kwa nyengu yitali wangumuka kuti: “Yitovya akusambira kuti aje ndi chivwanu chakukho chifukwa asambira vinandi vakukwaskana ndi Mazu ngaku Chiuta ndipuso aja ndi mijalidu yo yingaŵawovya kuti amalanengi ndi masuzgu ngo akumana nangu pa uteŵeti wawu. Kweniso chilatu chikulu cha sukulu iyi, nkhuwovya akusambira kuti aje ndi mtima wakukhumbisiska kugwira nchitu yakupharazga.”—Ŵaef. 4:11.

12, 13. Kumbi Sukulu ya Giliyadi yawovya wuli pa nchitu yakupharazga yo yichitika pacharu chosi? Konkhoskani chakuyeruzgiyapu.

¹² Kumbi Sukulu ya Giliyadi yawovya wuli pa nchitu yakupharazga yo yichitika pacharu chosi? Kwambiya mu 1943, ŵanthu akujumpha 8,500 asambizika kali sukulu iyi, * ndipu ŵanthu ŵenaŵa ateŵetiyapu m’vyaru vakujumpha 170. Amishonale agwiriskiya nchitu umampha vo asambira ndipu achita uteŵeti mwaphamphu kweniso asambiza anyawu mo angachitiya venivi. Kanandi amishonale ateŵetiyanga m’vigaŵa vo mwenga apharazgi a Ufumu amana pamwenga ko kwengavi.

¹³ Ŵanaŵaniyani vo vinguchitika ku Japan, ko nchitu yakupharazga yinguma pa nyengu ya Nkhondu Yachiŵi ya Pacharu Chosi. Mu August 1949, ku Japan kwenga apharazgi 10 pe. Kweni kukumaliya kwa chaka ichi, amishonale 13 wo angusere Sukulu ya Giliyadi anguluta kuchiteŵete ku Japan. Pavuli paki kunguluta so amishonale anandi. Pakwamba, amishonale apharazganga ŵaka mumisumba yikuluyikulu, kweni pavuli paki angwamba kuluta so mumisumba yimanayimana. Amishonale ayesesanga kuchiska ŵanthu wo asambiranga nawu kweniso abali anyaki kuti ayambi kuchita upayiniya. Phamphu la amishonale yaŵa linguwa paŵaka cha. Sonu ku Japan kwe apharazgi a Ufumu akujumpha 216,000, ndipu apharazgi 40 pa 100, ateŵete nge apayiniya! *

14. Kumbi masukulu nga m’gulu laku Chiuta ngapereka ukaboni wuli? (Wonani so bokosi lakuti, “ Masukulu Ngo Ngasambiza Ateŵeti a Ufumu.”.)

¹⁴ Masukulu nganyaki nga gulu laku Chiuta. Ŵanthu wo asere Sukulu ya Uteŵeti wa Upayiniya, Sukulu ya Bayibolo ya Akhristu Akutorana kweniso Sukulu ya Bayibolo ya Abali  Ambula Kuto aja pa ubwezi wakukho ndi Yehova kweniso agwira nchitu yakupharazga mwaphamphu. * Masukulu ngosi nga m’gulu laku Yehova ngapereka ukaboni wakuti Fumu yidu yisambiza ŵanthu ŵaki kuti afiski uteŵeti wawu.—2 Tim. 4:5.

15. Kumbi abali wo ŵe ndi maudindu atimuyezga wuli Yesu?

¹⁵ Ŵanaŵaniyani so uchimi waku Yesaya wo ukamba kuti Yesu wangusambizika ndi Chiuta. Uchimi uwu ulongo kuti Awiski angusambiza Mwana kuti waziŵi “kumusangaluska ndi mazu yo ngwakuvuka.” (Yes. 50:4) Yesu wangugwiriskiya nchitu vo wangusambira chifukwa we pacharu chapasi, wanguwovya ‘akudinirwa [akuvuka] ndi akuzitiskika.’ (Mat. 11:28-30) Abali wo ŵe ndi maudindu ayezga Yesu chifukwa atesesa kuwovya abali ndi azichi ŵawu. Mwaviyo, pakujalikiskika masukulu nganandi ngo ngatovya abali wo ŵe ndi maudindu kuti afiski kuteŵete abali ŵawu.

16, 17. Kumbi chilatu cha Sukulu ya Uteŵeti wa Ufumu nchinthu wuli? (Wonani so mazu ngam’mphata.)

¹⁶ Sukulu ya Uteŵeti wa Ufumu. Sukulu iyi yingwamba pa 9 March, 1959, ndipu kilasi lakwamba linguchitikiya ku  South Lansing, New York. Akuwonere madera ndi vigaŵa kweniso ateŵeti a mipingu angudanika kuti azisere sukulu yeniyi yo yinguto mwezi umoza. Pavuli paki, vo vasambizikanga m’sukulu iyi vingufwatulikiya m’vineneru vinyaki, ndipu abali pacharu chosi angwamba kusambizika. *

¹⁷ Pakukonkhoska chilatu cha Sukulu ya Uteŵeti wa Ufumu, buku lidu linyaki lingukamba kuti: “Mazuŵa nganu po kwe vakutangwaniska vinandi, yo wateŵete nge wakuwonere m’mpingu wa Akaboni aku Yehova watenere kuja munthu yo wangafiska kuchita vinthu mwandondomeku ndi chilatu chakuti wafiski kuphwere ŵanthu wosi m’mpingu ndipuso kuŵawovya. Kweniso waje wakuŵanaŵana umampha ndipuso yo wangatondeka cha kuphwere banja laki chifukwa cha kutangwanika ndi vakuchitika va mpingu. Ateŵeti a mipingu pacharu chosi apaskika mwaŵi ukulu ukongwa wakusambizika m’sukulu yeniyi kuti afiski uteŵeti wawu mwakukoliyana ndi vo Bayibolo likamba.”—1962 Yearbook of Jehovah’s Witnesses; 1 Tim. 3:1-7; Tito 1:5-9.

18. Kumbi ŵanthu aku Chiuta wosi ayanduwa wuli ndi Sukulu ya Uteŵeti wa Ufumu?

 ¹⁸ Ŵanthu aku Chiuta wosi ayanduwa ndi Sukulu ya Uteŵeti wa Ufumu. Kumbi ayanduwa wuli? Ŵara ndi ateŵeti akovya ayezga Yesu pa nkhani ya kovya abali ŵawu chifukwa agwiriskiya nchitu vo asambira ku sukulu yeniyi. Kumbi muwonga asani mura pamwenga mteŵeti wakovya wakukambiyani mazu ngakuchiska, wavwisiya masuzgu nginu kweniso wakuyendiyani nge mliska? (1 Ŵat. 5:11) Abali amaudindu yaŵa ndi thumbiku ku mipingu!

19. Kumbi ndi masukulu nganyaki nanga ngo Komiti Yakuwonere Nchitu Yakusambiza yiwonere, nanga chilatu cha masukulu ngenanga nchinthu wuli?

¹⁹ Masukulu nganyaki nga gulu laku Chiuta. Komiti Yakuwonere Nchitu Yakusambiza ya Wupu Wakulongozga, yiwonere so masukulu nganyaki ngo ngasambiza abali wo ŵe ndi maudindu m’gulu laku Yehova. Masukulu ngenanga ngatovya ŵara a mpingu, akuwonere madera, ndipuso abali a mu Komiti ya Nthambi kuti afiski maudindu ngawu. Masukulu ngenanga ngatovya abali kuti alutirizgi kuja pa ubwezi wakukho ndi Yehova, kweniso kuti agwiriskiyengi nchitu fundu za m’Malemba pakuchita vinthu ndi mbereri zo Yehova wakuŵapaska kuti awoneriyengi.—1 Pet. 5:1-3.

20. Nchifukwa wuli Yesu wangakamba kuti isi tosi ‘tisambizika ndi Yehova,’ nanga imwi mukhumbisiska kuchitanji?

²⁰ Nkhani iyi yalongole limu kuti Fumu Mesiya yawonesesa kuti ŵanthu ŵaki asambizika umampha. Masambiru ngosi yanga ngakwambiya kuchanya, Yehova wangusambiza Mwana waki ndipu Mwana waki wasambiza akusambira ŵaki. Mwaviyo, mphakwenere kuti Yesu wakambi kuti isi tosi ‘tisambizika ndi Yehova.’ (Yoh. 6:45; Yes. 54:13) Tiyeni tiyesesi kugwiriskiya nchitu masambiru ngo Fumu yidu yipereka kuporote mu Sukulu ya Uteŵeti Waku Chiuta, maunganu nganyaki ngampingu kweniso masukulu nganyaki ngo takambiskana m’nkhani iyi. Tikumbukengi so kuti chilatu chikulu cha masambiru ngenanga nkhutiwovya kuti tilutirizgi kuja pa ubwezi wakukho ndi Yehova kweniso kuti tifiski uteŵeti widu.