1-3. Mbuti Jesu mbwaakaukomezya mulimo wakukambauka, alimwi mibuzyo nzi iibuzyigwa?

KWAMYAKA yobilo, Jesu wakali kukambauka mu Galilaya moonse. (Amubale Matayo 9:35-38.) Wakali kuswaya muminzi amutunzi, akuyiisya muzikombelo alimwi akukambauka makani mabotu aa Bwami. Kufwumbwa nkwaakali kukambaukila, makamu aabantu akali kumutobela. Jesu naakabona kuti kuyandika babelesi banji, wakaamba kuti: “Mulimo wakutebula mupati.”

² Jesu wakabikka bubambe bwakukomezya mulimo wakukambauka. Ino wakacita buti oobo? Kwiinda mukutuma baapostolo bakwe ibali 12 “kuyookambauka Bwami bwa Leza.” (Lk. 9:1, 2) Baapostolo balakonzya bakali kulibuzya kujatikizya mbobakali kuyakuubeleka mulimo ooyu. Katanabaambila kuti baunke, Jesu wakabapa cintu cimwi ncobakamupa Bausyi bakujulu munzila yaluyando—lwiiyo.

³ Pele kuli mibuzyo minji iikonzya kubuzyigwa, mbuli yakuti: Ndwiiyo nzi Jesu ndwaakatambula kuzwa kuli Bausyi? Ino Jesu wakabayiisya nzi baapostolo bakwe? Mbuti kujatikizya mazuba aano—sena Mwami Mesiya wabayiisya basikumutobela kubeleka mulimo wakukambauka? Ikuti naa mboobo, ino muunzila nzi?

4. Ndilili alimwi nkukuli Jesu nkwaakayiisyilwa a Bausyi?

⁴ Jesu lwakwe wakaamba kuti wakayiisyigwa a Bausyi. Mumulimo wakwe, Jesu wakaamba kuti: “Mbubonya mbwaakandiyiisya Taata ndilaamba makani aaya.” (Joh. 8:28) Ino ndilili alimwi nkukuli Jesu nkwaakayiila? Kuboneka kuti kuyiisyigwa kwakatalika kuzwa buyo naakalengwa kali Mwana wa Leza mutaanzi kuzyalwa. (Kol. 1:15) Kali a Bausyi kujulu, Mwana wakakkala myaka iitabaliki kaswiilila alimwi akulangilila “Mwiyi” ncaakali kucita. (Is. 30:20) Akaambo kaceeci, Mwana wakatambula lwiiyo lubotu lwamumilimo lutakonzyi kweelanisyigwa alimwi akuzyiba makanze aa Bausyi.

5. Malailile nzi Usyi ngaakapa Mwanaakwe kujatikizya mulimo wakukambauka ngwaakali kuyakucita aanyika?

⁵ Muciindi ceelede, Jehova wakayiisya Mwanaakwe kujatikizya mulimo ngwaakali kuyakubeleka ano anyika. Amubone businsimi bwaamba cilongwe icili akati ka Mwiiyi Mupati a Mwanaakwe mutaanzi kuzyalwa. (Amubale Isaya 50:4, 5.) Businsimi bwaamba kuti Jehova wakali kumubusya Mwanaakwe  “cifumo acifumo.” Majwi aaya atondezya muzeezo wamwiiyi uubusya mwanaakwe sicikolo mafwumofwumo kutegwa amuyiisye. Bbuku limwi ilyaamba zyamu Bbaibbele lyakati: “Cili mbuli kuti Jehova . . . ulamubweza mwanaakwe akumuyiisya mbuli sicikolo ncayelede kukambauka alimwi ambwakonzya kucita boobo.” “Kucikolo” eeco cakujulu, Jehova wakayiisya Mwanaakwe kujatikizya ‘nzyaakeelede kwaamba akukanana.’ (Joh. 12:49) Alimwi Bausyi bakamupa malailile Mwana aajatikizya mbwayelede kuyiisya. * Naakali anyika, Jesu wakalubelesya lwiiyo munzila iili kabotu kutali buyo mukubeleka mulimo wakwe pele alimwi amukuyiisya basikumutobela mbobakali kukonzya kuzuzikizya mulimo wabo wakukambauka.

6, 7. (a) Ndwiiyo nzi Jesu ndwaakapa baapostolo bakwe alimwi ino lwakabagwasya kucita nzi? (b) Ino ndwiiyo nzi Jesu ndwaasinizya kuti lwapegwa kuli basikumutobela?

⁶ Ino ndwiiyo nzi Jesu ndwaakapa baapostolo bakwe kweelana ambokwaambwa kumatalikilo aacibalo? Kweelana acaandaano ca Matayo 10, wakabapa malailile aacigaminina aajatikizya mulimo wakukambauka, kubikkilizya amalailile amwi aaya aatobela aajatikizya: kwakukambaukila (kapango 5 a 6), mulumbe wakukambauka (kapango 7), ncociyandika kusyoma Jehova (kapango 9 a 10), mbobasikilwa bantu (kapango 11-13) cakucita kuti naa kwaba kutatambulwa (kapango 14 a 15), alimwi acakucita ikuti kwaba kupenzyegwa (kapango 16-23). * Lwiiyo lubotu Jesu ndwaakapa baapostolo bakwe lwakabagwasya kutolaambele mulimo wakukambauka makani mabotu mumwaanda wamyaka wakusaanguna C.E.

⁷ Mbuti kujatikizya mazuba aano? Jesu Mwami wa Bwami bwa Leza, wapa basikumutobela mulimo uuyandika kapati wakukambauka ‘makani mabotu aa Bwami . . . munyika yoonse kuti bube bumboni kumisyobo yoonse.’ (Mt. 24:14) Sena Mwami watuyiisya mbotweelede kuubeleka mulimo ooyu uuyandika kapati? Inzya, watuyiisya! Kali kujulu, Jesu wasinizya ncobeni kuti basikumutobela batambula lwiiyo lwa mbobakonzya kukambaukila bantu alimwi ambobakonzya kuzuzikizya mikuli yabo yaalubazu kumwi kababeleka mulimo ooyu.

8, 9. (a) Ino mulimo nzi mupati ngocakajisi Cikolo Camulimo Weendelezyegwa a Leza? (b) Ino muswaangano uucitwa mukati kansondo wamugwasya buti kucizyiba kabotu kukambauka?

⁸ Kwamyaka minji mbunga ya Jehova yalikubelesya miswaangano yabbazu, yacooko alimwi amiswaangano yambungano—mbuli Muswaangano Wamulimo—kuyiisya bantu ba Leza mulimo wakukambauka. Nokuba boobo, kuzwa mumyaka yamuma 1940, bakwesu basololela baku maofesi mapati bakatalika kubikka bubambe bwakuyiisya kwiinda muzikolo zisiyene-siyene.

⁹ Cikolo Camulimo Weendelezyegwa a Leza. Mbubwenya mbotwakabona mucibalo cainda, cikolo eeci cakatalika kucitwa mumbungano zyoonse mumwaka wa 1943. Sena makanze aacikolo eeci akali aakugwasya buyo basicikolo kucizyiba kabotu kupa makani lyamiswaangano yambungano? Peepe.  Makanze mapati aacikolo eeci akali aakugwasya bantu ba Leza kubelesya cipego cabo cakwaambaula kutembaula Jehova mumulimo wakukambauka. (Int. 150:6) Cikolo eeci cigwasya bakwesu abacizyi ibali mucikolo kutegwa babe Bakambausi ba Bwami bacibwene. Mazuba aano lwiiyo luli boobu lulapegwa kwiinda mumuswaangano uucitwa mukati kamvwiki.

10, 11. Mbaani lino ibakonzya kunjila Cikolo ca Gileadi, alimwi ino cikolo eeci cijisi makanze nzi?

¹⁰ Cikolo ca Gileadi. Cikolo iciitwa kuti Cikolo ca Gileadi mazuba aano cakatalika mu Muhulo February 1, 1943. Kumatalikilo, cikolo eeci cakali cakuyiisya bapainiya ababelesi baciindi coonse bamwi kubeleka mulimo wabumisyinali mumasena aasiyene-siyene munyika. Pele kutalikila mu October 2011, ibakonzya kunjila cikolo eeci mbabelesi babeleka mulimo waalubazu, nkokuti bapainiya baalubazu, balangizi beendeenda abamakaintu babo, aabo ibabeleka mulimo waa Bbeteli, alimwi abamisyinali ibatananjila cikolo eeci.

¹¹ Ino Cikolo ca Gileadi cijisi makanze nzi? Mwiiyi umwi wacikolo eeci wakaindi wakaingula kuti: “Nkuyumya lusyomo lwa basicikolo kwiinda mukwiiya Jwi lya Leza cakulomya alimwi akubagwasya kuba aamicelo yamuuya iiyandika kutegwa bazwidilile mubuyumuyumu mbobayaanya mumulimo wabo. Alimwi makanze amwi aayandika kapati aacikolo eeci ngakugwasya basicikolo kuuyandisisya kapati mulimo wakukambauka.”—Ef. 4:11.

12, 13. Mbubotu nzi ibwajanika mumulimo wakukambauka nyika yoonse mbwiizulwa akaambo ka Cikolo ca Gileadi? Amupe cikozyanyo.

¹² Mbubotu nzi bwajanika mumulimo wakukambauka nyika yoonse akaambo ka Cikolo ca Gileadi? Kuzwa mumwaka wa 1943, bantu bainda ku 8,500 bayiisyigwa mucikolo eeci, * alimwi bamisyinali ibakanjila cikolo eeci babelekela mumasena aainda ku 170 nyika yoonse mboizulwa. Bamisyinali balubelesya kabotu lwiiyo lwabo, ikupa cikozyanyo cibotu cakuba basungu mumulimo wakukambauka alimwi akuyiisya bamwi. Kanji-kanji, bamisyinali bagwasya kapati mumasena muli basikumwaya ba Bwami basyoonto naa mutakwe basikumwaya.

¹³ Amubone cakacitika ku Japan, kwalo kukambauka kubuleya nokwakaima ciindi ca Nkondo Yabili Yanyika Yoonse. Kusikila mu August 1949, basikumwaya bamucisi ca Japan bakali basyoonto kapati cakuti tiibakali kusika akukkumi. Nokuba boobo, kuzikusika kumamanino aamwaka, bamisyinali ibakanjila cikolo ca Gileadi ibali 13 bakajisi bubi kukambauka mu Japan. Bamisyinali banji bakatobela. Akusaanguna, bamisyinali bakali kubikkila kapati maano mumadolopo mapati, mukuya kwaciindi bakatalika kusika amumadolopo amwi. Bamisyinali bakali kubakulwaizya kuzwa ansi aamoyo bantu mbobakali kuyiisya alimwi abamwi kutalika mulimo wabupainiya. Busungu bwabamisyinali bwakazyala micelo mibotu. Mazuba aano kuli basikumwaya ba Bwami ibainda ku 216,000 mucisi ca Japan, alimwi 40 pesenti yabasikumwaya mbapainiya! *

14. Ino zikolo zyamulimo zipa bumboni nzi bupati? (Amubone kabbokesi kakuti: “ Zikolo Iziyiisya Bakambausi ba Bwami.”)

¹⁴ Zikolo azimbi zyamulimo. Cikolo Camulimo Wabupainiya, Cikolo Cakwiiya Bbaibbele ca Banabukwetene Banakristo,  Cikolo Cakwiiya Bbaibbele ca Bakwesu Batakwete, zyabagwasya aabo ibali muzikolo kuba bayumu kumuuya alimwi akusololela cabusungu mumulimo wakukambauka. * Zyoonse zikolo zyamulimo eezyi mbumboni bupati butondezya kuti Mwami wesu wabagwasya ncobeni basikumutobela kuzuzikizya mulimo wabo wakukambauka.—2 Ti. 4:5.

15. Ino bamaalumi ibali mumikuli bayanda kumwiiya munzila iili buti Jesu?

¹⁵ Amuyeeye kujatikizya businsimi bwa Isaya ibwaamba Jesu kuti uyiisyigwa a Leza. ‘Mucikolo’ eeco cakujulu, Mwana ‘wakacizyiba kwaamba majwi aakugwasya bakateede.’ (Is. 50:4) Jesu wakaatobela malailile naakali anyika, wakabakatalusya aabo ‘bakakatede akulemenwa.’ (Mt. 11:28-30) Mukwiiya Jesu, bamaalumi ibajisi mikuli bayanda kuti babe bantu bakatalusya Banakristonyina. Kutegwa eeci cikonzyeke, zikolo zinji zyabambwa kugwasya bakwesu beelela kuti babe basungu mukubelekela basyominyina.

16, 17. Mbaani ibayiisyigwa mu Cikolo Camulimo wa Bwami, alimwi ino makanze nzi aacikolo eeci? (Amubone majwi aamunsi.)

¹⁶ Cikolo Camulimo wa Bwami. Kkilasi yakusaanguna yacikolo eeci yakatalika mu March 9, 1959 ku South Lansing, New York. Balangizi beendeenda alimwi ababelesi bambungano  bakatambwa kujanika kutegwa batambule lwiiyo ilwakali kutola mwezi omwe. Mukuya kwaciindi, izyakali kuyiigwa mucikolo eeci zyakasandululwa kuzwa mu Chingisi kutolwa mumyaambo imbi, alimwi asyoonto-syoonto, bakwesu nyika yoonse mbwiizulwa bakatalika kuyiisyigwa kwiinda mucikolo eeci. *

¹⁷ Kujatikizya makanze aa Cikolo Camulimo wa Bwami, 1962 Yearbook of Jehovah’s Witnesses yakaamba kuti: “Munyika eeyi iijisi bubi mulangizi mumbungano weelede kuba muntu uukonzya kweendelezya buumi bwakwe kutegwa acikonzye kubikkila maano boonse ibali mumbungano alimwi akuba muntu uugwasya. Aciindi ncimunya, takonzyi kuba muntu uutabikkili maano mukwasyi wakwe kutegwa alanganye mbungano, pele weelede kubelesya muuya wakuba muntu uusimide. Eelo kaka eeco ncoolwe citaliboteli ncobapegwa babelesi bambungano nyika yoonse mbwiizulwa cakujanika ku Cikolo Camulimo wa Bwami akupegwa lwiiyo luyakubagwasya kucita ceeco Bbaibbele ncolyaamba kuti mulangizi ncayelede kuzuzikizya!”—1 Ti. 3:1-7; Tit. 1:5-9.

18. Ino bantu ba Leza boonse bagwasyigwa buti a Cikolo Camulimo wa Bwami?

 ¹⁸ Bantu ba Leza boonse bagwasyigwa a Cikolo Camulimo wa Bwami. Munzila nzi? Ciindi baalu abakutausi nobatobela nzyobaiya kucikolo, balakatalusya basyominyina mbuli Jesu mbwaakali kucita. Tulabalumba baalu abakutausi akaambo kamajwi aabo mabotu, kuswiilila, kukulwaizya kwabo alimwi akutulanganya nkobacita. (1 Te. 5:11) Bakwesu beelela aaba ncilongezyo mumbungano mobabede!

19. Nzikolo nzi zimbi nzyoilanganya Kkomiti Iilanganya Ziyiisyigwa, alimwi ino zikolo eezyo zyakabambilwa nzi?

¹⁹ Zikolo zimbi zyamulimo. Kkomiti Iilanganya Ziyiisyigwa ya Kabunga Keendelezya ilalanganya zikolo zimbi ziyiisya bakwesu ibajisi mikuli mumbunga. Zikolo eezyi zibambilidwe kugwasya bakwesu ibajisi mikuli—baalu bambungano, balangizi beendeenda alimwi abamu Kkomiti Yamutabi—kucikonzya kuzuzikizya mikuli yabo minji njobajisi. Lwiiyo oolu iluyeeme a Bbaibbele lukulwaizya bakwesu kuyaambele kumuuya alimwi akubelesya njiisyo zyamu Bbaibbele nobeendelezya mbelele zya Jehova nzyaabapa kuti balanganye.—1 Pe. 5:1-3.

20. Nkaambo nzi Jesu ncaakaambila kuti ‘tuyiisyigwa aa Jehova,’ alimwi ino mukanzide kucita nzi?

²⁰ Masimpe, Bwami bwa Mesiya bwasinizya ncobeni kuti basikumutobela bayiisyigwa kabotu. Lwiiyo loonse oolu lwakatalikila kujulu: Jehova wakayiisya Mwanaakwe, alimwi Mwanaakwe wayiisya basikumutobela. Nkakaambo kaako Jesu ncaakaambila kuti toonse ‘twakayiisyigwa a Jehova.’ (Joh. 6:45; Is. 54:13) Atuzumanane kuba amakanze aakugwasyigwa alwiiyo Mwami wesu ndwatupa. Alimwi mutalubi kuti makanze aalwiiyo oolu ngakutugwasya kuba bayumu kumuuya kutegwa tuzuzikizye mulimo wesu wakukambauka.