1-3. Moota xeeni Yesu uulaanyinhe awe muteko woolaleerya nto makoho xeeni anikhumelela?

ETTHU yowiiraka iyaakha piili, Yesu aahilaleerya muttetthe wotheene wa oGalileya. (Mmusome Matheyo 9:35-38.) Owo aahixekurya mittetthe suulupale ni saamukhaani, aixuttihaka musinagoga ni alaleyaka ihapari sooreera sa Omwene. Khula opuro aalaleerya awe, atthu yaanimurukurerya. Owo aahimmye so: ‘Ohepha khorere mmatta” ni wira yaanitthuneya anamuteko anceene.

² Yesu aahipaka marehereryo wira wuulaanihe muteko woolaleerya. Moota xeeni? Owo aahaaruma arumeyi awe 12 orowa “olaleya Omwene wa Muluku”. (Luk. 9:1, 2) Owehasa wene arumeyi ale yaaniikoha moota yaarowa aya owerya ovara saana muteko ola. Ohinatthi waaruma, Yesu moophenta aahaavaha etthu emosa yeeyo aavahiwe awe ni Tiithi awe a wiirimu, eyo piiyo, owiixuttiha.

³ Vano annikhumelela makoho manceene ntoko ala: Yesu aaxuttihiwe sai ni Tiithi awe? Xeeni Yesu aawiixuttinhe awe arummwa awe? Nave olelo-va, niireke Omwene wa Mesiya onniwiixuttiha atthareli awe wira avareke saana muteko aya wa orummwa? Vakhala wira ti siiso, onipaka sai eyo?

4. Yesu aaxuttihiwa ni Tiithi awe wuuwi ni opuro xeeni?

⁴ Yesu aaheemererya wira owo aaxuttihiwe ni Tiithi awe. Okathi aalaleerya awe, aahimmye so: “Miyo kinnilaleya itthu sikixuttihalyaya Atithi”. (Yoh. 8:28) Yesu aaxuttihiwe woowi ni okathi xeeni? Oxuttihiwa wawe waapacenrye nuumala owo opatuxiwa, ntoko Mwaana Oopacerya a Muluku. (aKol. 1:15) Okathi aarya awe ni Tiithi awe wiirimu, Yesu aahiviriha iyaakha sihinkontareya onwiriyanaka ni onwehexexa “Mwiixuttihi Muulupale”. (Yes. 30:20) Nto eyo yaahimwiiriha Yesu oxuttihiwa mwa enamuna yootepexa oreera, mwa mikhalelo, miteko ni soolakela sa Tiithi awe.

5. Etthu xeeni Tiithi awe aamwiixuttinhe awe Mwanawe voohimya sa muteko aarowa awe ovara?

⁵ Mwa okathi wooreerela, Yehova aahimwiixuttiha Mwanawe itthu sotheene saarowa awe ovara elapo ya vathi. Muthokorerye eprofesia enihimya wiiraana wa Mwiixuttihi Muulupalexa ni  Mwanawe oopacerya. (Mmusome Yesaya 50:4, 5.) Ela enooniherya wira Yehova aaninvenxa Mwanawe “khula oxa”. Masu awo anooniherya etthu enipaka awe prusoori onvenxaka naxikola awe wira omwiixuttihe khula vasiisu. Musuweli mmosa atthokiheryaka yoolepa ela onihimya so: “Yehova . . . ammukuxa ntoko siisaale mwaana oniroihiwa oxikola, nto khiyamwiixuttiha enamuna ni masu ene olaleerya”. Nto “exikola” eyo ya wiirimu, Yehova aahimwiixuttiha Mwanawe ele yaarowa awe “ohimya ni olaleya”. (Yoh. 12:49) Nave Tiithi aahimulakiherya Mwanawe enamuna ya wiixuttiha. * Okathi aaryaawe valaponi Yesu aahirumeela saana itthu saaxuttihiwe awe ohiya paahi okathi waalaleerya awe, masi-tho okathi aawiixuttiha awe atthareli awe ovara muteko aya.

6, 7. (a)Yesu aawiixuttinhe exeeni arumeyi awe, eyo yaakhalihenrye ovara muteko xeeni? (b) Mwiixuttiho xeeni Yesu oniphavela awe wira arumeyi awe akhalaneke mahiku ahu ala?

⁶ Vano Yesu aawiixuttiha exeeni arummwa awe, ntoko sihimmwale aya wanipacerya? Moovarihana ni Matheyo ekapitulu 10, owo aahiwiixuttiha itthu soowiiweya saana sa olaleerya, itthu ntoko iya: opuro woolaleerya (iversu 5, 6), ihapari sene (eversu 7), otthuneya waya omuroromela Yehova (iversu 9, 10), moota woolavulana ni atthu (iversu 11-13), moota wowaakhula ale yaakhoota wiiwa (iversu 14, 15), ni etthu yoopaka yaalupatthiwaka (iversu 16-23). * Malakiheryo awo oowiiwanyeya Yesu aavanhe awe arummwa awe, yaahakhaliherya wuulaanyiha muteko woolaleerya eseekulu yoopacerya EC.

⁷ Nto etthu xeeni enipakiwa olelo-va? Yesu, Mwene a Omwene wa Muluku, ohaavaha atthareli awe muteko wootepexa wunnuwa, eyo piiyo, olaleerya ‘ihapari sorera sa Omwene mulaponi mothene, wira atthu othene esuwele’. (Math. 24:14) Niireke Mwene ahu onniniixuttiha moota woovara muteko ola wootepexa otthuneya? Aayo! Oryeene wiirimu, Mwene ahu onnittittimiherya wira atthareli awe yiixuttihiwe saana enamuna ya waalaleerya atthu ari ota wa muloko ni moota woovara miteko sa vameekha aya mmulokoni.

8, 9. (a) Yoolakela xeeni yuulupale yaarina aya Exikola ya Orummwa wa Muluku? (b) Moota xeeni mithukumano sa eriyari ya esumana sinookhaliheryayani?

⁸ Nikhuuru nootthokiheya na Yehova okhuma khalai ninnirumeela mithukumano sa asembeleya, sa muttetthe ni mmulokoni, ntoko Muthukumano wa Orummwa, wira owiixuttihe atthu a Muluku ovara muteko woolaleerya. Okhuma iyaakha sa 1940, anna anihoolela muteko wa olumwenku wotheene yaahipacerya olokiherya ixikola soovirikana wira awiixuttihe anna.

⁹ Exikola ya Orummwa wa Muluku. Ntoko soonale ahu muru ovinre, exikola ela epaceriwe mwaakha wa 1943. Niireke yoolakela ya exikola ela yaari owiixuttiha anna osuwela opaka myaha sooloka mmulokoni paahi? Nnaari. Yoolakela ya exikola ela yaari: owiixuttiha atthu a Muluku wira arumeeleke saana eparakha ya owerya olavula wira anvuwihe Yehova okathi woolaleerya. (Esal. 150:5) Exikola ela enniwiiniha nikuruta anna ni  arokora yaawo yiilepinhe wira avareke saana muteko woolaleerya Vano anniinihiwa nikuruta nno ni mithukumano sa eriyari ya esumana.

10, 11. Atthu xeeni mahiku ala akhanle owiilepiha Exikola ya oGileadi, ni yoolakela xeeni erina aya ale anisoma exikola eyo?

¹⁰ Exikola ya oGileadi Enimwiixuttiha Biibiliya. Exikola eyo epacerihiwe nihiku noomorela muteko, 1 a Feverero, 1943. Exikola ele yaapakeliwe waaxuttiha mapioneero ni atthu akina yaavara muteko wa orummwa wa okathi wotheene wira aroihiweke ovara muteko wa omisionaario khula nipuro na olumweneku ola. Masi okhuma Outubro 2011, aneemereriwa okela exikola ela atthu yaale anivara muteko wa orummwa wa okathi wotheene a vameekha aya, eyo piiyo, mapioneero a vameekhaaya, axitokweene ooweetteetta ni axaaraya, maBethelita ni mamisionaario yaawo nlelo ahinarowe exikola ela.

¹¹ Yoolakela xeeni erina aya itthu sinisommwa Exikola ya oGileadi? Munna onisomiha exikola eyo okhuma khalai onaakhula so: “Olipiha waamini wa anaxikola awo orweela mwa yoosoma yoomalela ya Nuulumo na Muluku ni waakhaliherya okhalana mikhalelo sa omunepani seiyo sinitthuneya wira aweryeke ovara saana muteko aya”. Etthu ekina eniixuttihiwa aya anaxikola ale ori okhalana yootthuna yuulupale ya ovara muteko woolaleerya”.​—aÉf. 4:11.

12, 13. Mireerelo xeeni Exikola ya oGileadi ekumihenrye aya mmuteko woolaleerya olumwenku wotheene? Nvahe ntakiheryo.

¹² Mireerelo xeeni ekumihenrye aya Exikola ya oGileadi olumwenku wotheene mmutekoni wa olaleerya? Okhuma mwaakha wa 1943, atthu aniphiyerya 8.500 aasomihiwa exikola ela, * nave mamisionaario anikhuma exikola ela annirumeela elapo sowiiraka 170 olumwenku wotheene. Mamisionaario annivarihela muteko oratteene ele eniixuttihiwa aya, avahaka ntakiheryo nooloka na okhalela nthiti muteko woolaleerya ni waakhaliherya anna akina wira apakeke etthu emosaru. Mapuro manceene, mamisionaario awo ahuulaanyiha muteko woolaleerya vanaamwi yaari anamalaleerya vakhaani wala yahaakhanle.

¹³ Muthokorereye ele yaakhumelenle oJapão, weiwe muteko woolaleerya waamalamanle awe okathi wa Ekhotto ya Nenli ya Olumwenku Wotheene. Agosto 1949, oJapão yaari anamalaleerya 10 paahi. Wuukiseryani wa eyaakha ele, mamisionaario yaakhuma oGileadi yahikhalela nthiti muteko woolaleerya oJapão. Nto yaahirwa mamisionaario makina. Mamisionaario ale yaapacenrye olaleerya ipooma suulupale nto muhoolo mwaya khiyarowa mittetthe sikina. Mamisionaario ale yaanalipiha ale yaasomiha aya Biibiliya wira akeleke muteko wa opioneero. Wiimananiha wa mamisionaario ale waahikumiherya mireerelo. Olelo-va, aakhala anamalaleerya a Omwene anivikana 216.000 oJapão, nto waattamela 40 pursento mwa anamalaleerya awo, mapioneero! *

14. Etthu xeeni yuulupale enooniherya aya ixikola sa Muluku? (Nwehe-tho ekaaxa eni “ Ixikola Siniwiixuttiha Arumeyi a Omwene”.)

¹⁴ Ixikola Sikina sa Muluku. Exikola ya Muteko wa Opioneero, Exikola ya Biibiliya ya maKristau Oothelana, ni Exikola ya Biibiliya ya Anna Oohithela, sihaakhaliherya anna awo wunnuwa  momunepani ni okhalela nthiti muteko woolaleerya. * Ixikola iyo sa Muluku sinnooniherya wira Mwene onniwiixuttiha atthareli awe ovara muteko aya.​—2 Tim. 4:5.

15. Mwa inamuna xeeni anna arina miritti mmulokoni akhanle aya omutakiha Yesu?

¹⁵ Muupuwele eprofesia ya Yesaya yeeyo enilavula sa wiixuttihiwa wa Yesu ni Muluku. Mwa “exikola” eyo ya wiirimu, Mwaana aahiixutta olavula masu oomuhakalaliha ole oripiwe murima’. (Yes. 50:4) Yesu aahivarela muteko wiixuttihiwa iwo orye ene valaponi, owo aahaalipiha ale yaari ‘okhulumuwa ni yaalemeliwe muritti mulupale’. (Math. 11:28-30) Amutakihaka Yesu, anna yaale arina miritti mmulokoni anniphavela waalipiha anna ni arokora a mmulokoni. Wira awerye opaka eyo, soopakiwa ixikola sinceene wira saakhaliheryeke anna oothanliwa waarumeela oratteene annaya.

16, 17. Yoolakela xeeni erina aya Exikola ya Orummwa wa Omwene? (Nwehe-tho enoota.)

¹⁶ Exikola ya Orummwa wa Omwene. Exikola ela epacenrye 9 a Março, 1959, muttetthe wa South Lansing, Nova York. Yaanilattuliwa axitokweene ooweetteetta ni arumeyi a muloko wira  yampake kursu a mweeri ntero. Nuumala-vo, kursu owo aanitaphuleliwa mmattaava makina, nto exikola ele khupacerya wuulaana olumwenku wotheene yaakhaliheryaka anna anceene. *

¹⁷ Ohimyaka sa Exikola ya Orummwa wa Omwene Anuário das Testemunhas de Jeová de 1962 (Englexi), onihimya so: “Olumwenku ola wowaatta itthu sinilya okathi, mutokweene a muloko wa anamoona a Yehova, ohaana okhala mutthu oowiitthokiha saana wira owerye waakhaliherya ni waareeliha anna otheene a mmulokoni. Ekeekhai wira owo khoneemereriwa ohicalela etthoko awe wira okhapeleleke muloko paahi, masi onnitumereriwa okhala mutthu a miruku. Tthiri miloko sa olumwenku wotheene sinnittottela mureerelo vaavo vanikhalana aya nna awo owiixuttihiwa Exikola ya Orummwa wa Omwene yaawo anivara muteko aya moovarihana ni ele Biibiliya enihimya awe!”​—1 Tim. 3:1-7; Tito 1:5-9.

18. Moota xeeni Atthu otheene a Muluku anittottela aya muraarelo Exikola ya Orummwa wa Omwene?

¹⁸ Atthu otheene a Muluku annittottela mureerelo ele eniixuttiwa Exikola ya Orummwa wa Omwene. Moota xeeni? Vaavo axitokweene  ni arummwa anivarihela aya muteko ele yiixuntte aya oxikola, awo anniwerya waakhaliherya annaya ntoko Yesu siirale awe. Niireke nyuwo khamunisiveliwai vaavo vaniiwa anyu masu ooreera wala oxukuriwa ni mutokweene wala murummwa oorumeela oophenta? (1 aTes. 5:11) Anna awo oophwanelela tthiri annikumiherya mareeliho mmulokoni!

19. Ixikola xeeni sinikumiheriwa ni Ekomisau ya Wiixuttiha, nto sipakiwe wira sivareke muteko xeeni?

¹⁹ Ixikola sikina sa Muluku. Ekomisau ya Wiixuttiha ya Nikhuuru Noolamulela ennihoolela ixikola soovirikana siniwiixuttiha anna arina miritti sa nikhuuru na Muluku. Ixikola iyo sipakeliwe waakhaliherya anna arina miritti ntoko axitokweene a mmulokoni, ooweetteetta ni anna anirumeela Ekomisau ya efiliyaali wira aweryeke ovara miteko saya oratteene. Akursu awo anikhuma mBiibiliyani annaatumererya anna awo okhala oolipa momunepani ni ottharihela miruku sa mBiibiliyani okathi anikhapelela aya ipwittipwitthi sa Yehova sirummwale aya osuka.​—1 Ped. 5:1-3.

20. Xeeni Yesu aahimmye awe wira ottheene ahu “niinxuttihiwa” ni Yehova, ni exeeni enilakela anyu opaka okhuma olelo orowa ohoolo?

²⁰ Moohaaniherya, Mwene a Omwene wa Mesiya onniwiixuttiha atthareli awe. Mwiixuttiho owo wotheene onikhuma wiirimu, okhala wira Yehova omwiixuttinhe Mwanawe, nto Mwaana owo oowiixuttinhe atthareli awe. Tivonto Yesu aahimyale awe wira atthu otheene aniixuttihiwa ni Yehova. (Yoh. 6:45; Yes. 54:13) Nrowe nittottele mureerelo ixikola iyo sinivahiwa ahu ni Mwene ahu. Nave, nuupuweleke wira yoolakela yuulupale ya ixikola iya ori onikhaliherya wira nikhaleke oolipa momunepani wira nivareke saana muteko wa Muluku.