1-3. Paonan-o ginpahaluag ni Jesus an pagsangyaw nga buruhaton, ngan ano nga mga pakiana an nabangon?

DUHA ka tuig nga nagsangyaw hi Jesus ha bug-os nga Galilea. (Basaha an Mateo 9:35-38.) Kinadto hiya ha damu nga syudad ngan baryo basi magtutdo ha mga sinagoga ngan magsangyaw han maopay nga sumat han Ginhadian. Diin man hiya kumadto, an mga tawo nagpupurundok ha iya. “Damu an aranihon,” siring ni Jesus, ngan dugang nga magburuhat an ginkikinahanglan.

² Naghimo hi Jesus hin kahikayan basi mapahaluag an pagsangyaw nga buruhaton. Paonan-o? Pinaagi ha pagsugo han iya 12 nga apostol “nga magsangyaw han Ginhadian han Dios.” (Luc. 9:1, 2) Posible nga may mga pakiana an mga apostol kon paonan-o bubuhaton ito. Salit antes hira palakton, ginsubad ni Jesus an ginbuhat ha iya han iya langitnon nga Amay. Iya mahigugmaon nga ginbansay hira.

³ Yana, nabangon an damu nga pakiana: Paonan-o ginbansay hi Jesus han iya Amay? Paonan-o ginbansay ni Jesus an iya mga apostol? Ngan kumusta man yana—ginbabansay ba han Mesianiko nga Hadi an iya mga sumurunod ha pagtuman han ira ministeryo? Kon oo, paonan-o?

4. Kakan-o ngan diin gintutdoan hi Jesus han iya Amay?

⁴ Ginkarawat ni Jesus nga gintutdoan hiya han iya Amay. Durante han iya ministeryo, hiya nagsiring: “An igintutdo ha akon han Amay amo an akon ginyayakan.” (Juan 8:28) Diin ngan kakan-o hi Jesus gintutdoan? Matin-aw nga kumarawat hiya hin pagbansay katapos hiya larangon sugad nga suhag nga Anak han Dios. (Col. 1:15) Ha sulod hin diri maihap nga katuigan kaupod han iya Amay ha langit, namati hiya ngan nag-obserbar ha Gihitaasi nga Instruktor. (Isa. 30:20) Sugad nga resulta, kinarawat hiya han waray katupong nga edukasyon mahitungod han mga kalidad, buhat, ngan katuyoan han iya Amay.

5. Ano nga instruksyon an iginhatag han Amay ha Anak mahitungod han ministeryo nga pagbubuhaton han Anak dinhi ha tuna?

⁵ Han inabot an husto nga takna, gintutdoan ni Jehova hi Jesus mahitungod han iya ministeryo dinhi ha tuna. Tagda an tagna nga naghuhulagway han relasyon han Gihitaasi nga Instruktor ngan han iya suhag nga Anak. (Basaha an Isaias 50:4, 5.) Ito  nasiring nga ginsasangpit ni Jehova an iya Anak “ha ikinaaga.” Naghuhulagway ini han ideya mahitungod hin magturutdo nga aga-aga pa nga nagsasangpit han iya estudyante basi tutdoan. Usa nga reperensya ha Biblia an nasiring: ‘Sugad hin gindadara hiya ni Jehova ha eskwelahan pariho hin estudyante, ngan gintututdoan kon ano an iya isasangyaw ngan kon paonan-o ito bubuhaton.’ Dida hito nga “eskwelahan” ha langit, gintutdoan hiya ni Jehova “kon ano an . . . igyayakan ngan igtututdo.” (Juan 12:49) Gintagan liwat hiya hin instruksyon kon paonan-o magtutdo. * Samtang nakanhi ha tuna, gin-gamit ni Jesus ito nga pagbansay diri la ha pagtuman han iya ministeryo kondi ha pagbansay liwat han iya mga sumurunod ha pagtuman han ira ministeryo.

6, 7. (a) Ano nga pagbansay an iginhatag ni Jesus ha iya mga apostol, ngan nagsangkap ito ha ira ha pagbuhat han ano? (b) Ano nga pagbansay an ginsisiguro ni Jesus nga nakakarawat han iya mga sumurunod yana?

⁶ Paonan-o ginbansay ni Jesus an iya mga apostol, sugad han gin-unabi kanina? Sumala ha Mateo kapitulo 10, naghatag hiya hin espisipiko nga mga instruksyon, sugad han: kon diin magsasangyaw (bersikulo 5, 6), an mensahe nga isasangyaw (bersikulo 7), an panginahanglan ha pagsarig kan Jehova (bersikulo 9, 10), kon paonan-o makikiistorya (bersikulo 11-13), an hihimoon kon may-ada diri kumarawat (bersikulo 14, 15), ngan an bubuhaton kon may paglutos (bersikulo 16-23). * Tungod ha pagbansay ni Jesus, nasangkapan an mga apostol ha pagpanguna ha pagsangyaw han maopay nga sumat han siyahan nga siglo C.E.

⁷ Kumusta man yana? Iginhatag ni Jesus, an Hadi han Ginhadian han Dios, ha iya mga sumurunod an pinakaimportante nga toka, an pagsangyaw han “maopay nga sumat han Ginhadian . . . ha bug-os nga inuukyan nga tuna sugad nga pamatuod ha ngatanan nga nasud.” (Mat. 24:14) Ginbabansay ba kita han Hadi para hinin pinakaimportante nga toka? Oo! Tikang ha langit, ginsisiguro han Hadi nga an iya mga sumurunod nakarawat hin pagbansay kon paonan-o magsasangyaw ngan kon paonan-o tutumanon an ira mabug-at nga mga responsabilidad ha kongregasyon.

8, 9. (a) Ano an nangunguna nga katuyoan han Teokratiko nga Eskwelahan ha Ministeryo? (b) Paonan-o an Teokratiko nga Eskwelahan ha Ministeryo nakabulig ha imo nga magin mas epektibo ha ministeryo?

⁸ Hadto pa man, ginagamit na han organisasyon ni Jehova an mga asembleya, kombensyon, ngan katirok ha kongregasyon—sugad han Katirok ha Pag-alagad—ha pagbansay han iya katawohan ha pagministeryo. Kondi tikang ha dekada han 1940, an mga nangunguna ha headquarters nag-organisar hin iba-iba nga eskwelahan nga magtatagana hin pagbansay.

⁹ Teokratiko nga Eskwelahan ha Ministeryo. Ha Kapitulo 16, hinbaroan naton nga ini nga eskwelahan nagtikang dumarahon han 1943. Gin-organisar la ba ini basi bansayon an mga estudyante ha pagpresenta hin mag-opay nga bahin ha kongregasyon? Diri. An nangunguna nga katuyoan hini nga eskwelahan waray magbag-o—an pagbansay ha katawohan ni Jehova nga gamiton an ira abilidad ha pagyakan ha pagdayaw ha iya ha ministeryo. (Sal. 150:6) Ginsasangkapan hini an mga nakaenrol nga magin mas epektibo nga  ministro han Ginhadian. Yana, igintatagana ini nga pagbansay pinaagi han katirok ha butnga han semana.

10, 11. Hin-o an mahimo makaeskwela ha Gilead School yana, ngan ano an katuyoan hini?

¹⁰ Watchtower Bible School of Gilead. An gintatawag yana nga Watchtower Bible School of Gilead nagtikang han Pebrero 1, 1943, adlaw han Lunes. Ha tinikangan, an katuyoan hini nga eskwelahan amo an pagbansay ha mga payunir ngan ha iba nga aada ha bug-os-panahon nga pag-alagad nga magin misyonero ha iba-iba nga dapit han kalibotan. Kondi tikang han Oktubre 2011, an gin-iimbitar na la hini nga eskwelahan amo adton aada na ha espesyal nga bug-os-panahon nga pag-alagad sugad han mga espesyal payunir, nagbibiyahe nga paramangno ngan an iya asawa, Bethelite, ngan misyonero nga waray pa makaeskwela hini.

¹¹ Ano an katuyoan han Gilead School? Usa nga maiha na nga instruktor an binaton: “Basi parig-unon an pagtoo han mga estudyante pinaagi han detalyado nga pag-aram han Pulong han Dios ngan basi buligan hira ha pagkultibar han espirituwal nga mga kalidad nga ira pagkikinahanglanon ha pag-atubang han mga kakurian ha ira toka. Importante liwat nga katuyoan han eskwelahan an pagpasilsil ha mga estudyante han mas hilarom nga hingyap ha pakigbahin ha pag-ebanghelyo.”—Efe. 4:11.

12, 13. Ano an naibulig han Gilead School ha pagsangyaw ha bug-os nga kalibotan? Paghatag hin ehemplo.

¹² Ano an naibulig han Gilead School ha pagsangyaw nga buruhaton ha bug-os nga kalibotan? Tikang han 1943, sobra 8,500 na an nabansay hini nga eskwelahan, * ngan sobra 170 na nga nasud an napadad-an hin mga naggradwar hini. Ginpapahimulosan han mga misyonero an pagbansay ha ira; nagin susbaranan hira ha pagin madasigon ha ministeryo ngan nagbansay ha iba ha pagbuhat hin pariho. Kasagaran nga mga misyonero an nangunguna ha buruhaton ha mga lugar nga pipira la o waray magwarali han Ginhadian.

¹³ Pananglitan ha Japan. Han Girra ha Kalibotan II, haros waray na nagsasangyaw didto, ngan han Agosto 1949, waray na magnapulo an ira magwarali. Kondi pag-ikatarapos hito nga tuig, maduruto nga nagsangyaw didto an 13 nga misyonero tikang ha Gilead. Damu pa nga misyonero an sinunod. Ha tinikangan, nagpokus hira ha dagku nga syudad; ngan ha urhi, binalhin hira ha iba nga syudad. Gin-aghat nira an ira mga estudyante ngan an iba pa nga magpayunir. Maopay gud an resulta han ira pangalimbasog. Yana, sobra 216,000 na an magwarali han Ginhadian ha Japan, ngan haros 40 porsyento hini an payunir! *

14. An teokratiko nga mga eskwelahan marig-on nga ebidensya han ano? (Kitaa liwat an kahon nga “ Mga Eskwelahan nga Nagbabansay ha mga Ministro han Ginhadian,” ha pahina 188.)

¹⁴ Iba pa nga teokratiko nga eskwelahan. An Pioneer Service School, Bible School for Christian Couples, ngan Bible School for Single Brothers nakakabulig ha mga nakaeskwela hini nga mag-uswag ha espirituwal ngan magin susbaranan ha madasigon nga pag-ebanghelyo. * Ini nga teokratiko nga mga eskwelahan marig-on nga ebidensya nga ginsasangkapan gud han  Hadi an iya mga sumurunod ha pagtuman han ira ministeryo.—2 Tim. 4:5.

15. Ha ano nga paagi ginsusubad hi Jesus han mga may responsabilidad ha kongregasyon?

¹⁵ Nahinunumdoman mo ba an tagna ni Isaias nga naghuhulagway kan Jesus sugad nga gintututdoan han Dios? Hito nga “eskwelahan” ha langit, hinbaroan han Anak “kon ano an [iya] igsisiring, basi makahatag [hiya] hin kusog hadton mga ginugul-an.” (Isa. 50:4, Maopay nga Sumat) Ginbuhat ni Jesus an iya hinbaroan. Salit han nakanhi hiya ha tuna, iya gintagan hin kapahuwayan an “kinakapoy ngan binubug-atan.” (Mat. 11:28-30) Ha pagsubad kan Jesus, karuyag han kalalakin-an nga may responsabilidad ha kongregasyon nga makahatag hin kapahuwayan ha ira kabugtoan. Tungod hito, gin-organisar an iba-iba nga eskwelahan basi mabuligan an kwalipikado nga kabugtoan nga magin mas epektibo ha pag-alagad ha ira mga igkasi-tumuroo.

16, 17. Ano an katuyoan han Kingdom Ministry School? (Kitaa liwat an footnote.)

¹⁶ Kingdom Ministry School. An siyahan nga klase hini nga eskwelahan gindumara han Marso 9, 1959, ha South Lansing,  New York. An nagbibiyahe nga mga paramangno pati an mga congregation servant gin-imbitar pagtambong ha usa ka bulan nga klase. Ini nga klase nga ha siyahan gindumara ha Ingles, ha urhi iginhubad ha iba-iba nga yinaknan ngan gindumara ha pagbansay ha kabugtoan ha iba-iba nga bahin han kalibotan. *

¹⁷ May kalabotan ha katuyoan han Kingdom Ministry School, an 1962 Yearbook of Jehovah’s Witnesses nagsiring: “Hinin sagipo hinduro nga kalibotan, an usa nga paramangno ha kongregasyon han mga saksi ni Jehova kinahanglan usa nga lalaki nga organisado ha iya kinabuhi basi makaghatag hin igo nga atensyon ha ngatanan ha kongregasyon ngan magin bendisyon ha iba. Kondi, diri niya sadang pabay-an an iya pamilya tungod la ha pagmangno ha kongregasyon, pero kinahanglan may-ada hiya maopay nga panhunahuna. Daku nga pribilehiyo an iginhatag ha mga congregation servant ha bug-os nga kalibotan nga makaeskwela ha Kingdom Ministry School basi makakarawat hin pagbansay nga mabulig ha ira ha pagtuman han Kasuratanhon nga responsabilidad han mga paramangno!”—1 Tim. 3:1-7; Tito 1:5-9.

18. Paonan-o an ngatanan han katawohan han Dios nakakapahimulos ha Kingdom Ministry School?

 ¹⁸ An ngatanan han katawohan han Dios nakakapahimulos ha Kingdom Ministry School. Ha ano nga paagi? Kon gin-aaplikar han mga tigurang ngan mga ministeryal an ira hinbabaroan ha eskwelahan, nakakahatag hira hin kapahuwayan ha ira igkasi-tumuroo pariho kan Jesus. Diri ba ginpapabilhan mo an makonsiderasyon nga mga pulong, mapinairon nga pagpamati, o makapadasig nga pagbisita han mahigugmaon nga tigurang o ministeryal? (1 Tes. 5:11) Bendisyon gud inin kwalipikado nga kalalakin-an ha kongregasyon!

19. Ano nga iba pa nga eskwelahan an gindudumara han Teaching Committee, ngan ano an katuyoan hito nga mga eskwelahan?

¹⁹ Iba pa nga teokratiko nga eskwelahan. An Teaching Committee han Nagmamando nga Lawas an nagdudumara ha iba pa nga eskwelahan nga naghahatag hin pagbansay ha kabugtoan nga may responsabilidad ha organisasyon. Ito nga mga eskwelahan gindisenyo ha pagbulig ha mga tigurang, nagbibiyahe nga mga paramangno, ngan mga membro hin Komite han Sanga basi magin mas epektibo ha pagtuman han ira responsabilidad. An igintututdo dinhi basado ha Biblia ngan nag-aaghat ha ira ha pagtipig han ira espirituwalidad ngan ha pag-aplikar han Kasuratanhon nga mga prinsipyo ha ira pakig-upod ha presyoso nga mga karnero nga igintapod ni Jehova ha ira.—1 Ped. 5:1-3.

20. Kay ano nga nakasiring hi Jesus nga kita ngatanan ‘natutdoan ni Jehova’? Determinado ka nga buhaton an ano?

²⁰ Matin-aw, ginsisiguro han Mesianiko nga Hadi nga an iya mga sumurunod ginbabansay hin maopay. Ini ngatanan nga pagbansay tikang kan Jehova. Iya ginbansay an iya Anak, ngan ginbansay han Anak an iya mga sumurunod. Salit husto hi Jesus ha pagsiring nga kita ngatanan ‘natutdoan ni Jehova.’ (Juan 6:45; Isa. 54:13) Hinaot magin determinado kita nga pahimulosan an ngatanan nga pagbansay nga igintatagana han Hadi—ini man ha Teokratiko nga Eskwelahan ha Ministeryo, ha iba nga mga katirok han kongregasyon, o ha bisan ano han mga eskwelahan nga ginhisgotan hini nga kapitulo. Ngan hinumdoman naton nga an nangunguna nga katuyoan hini nga mga pagbansay amo an pagbulig ha aton nga makagtipig hin marig-on nga espirituwalidad basi bug-os nga matuman naton an aton ministeryo.