1-3. Xi biʼniʼ Jesús para guireeche diidxaʼ guiráʼ lugar, ne xi rucaani laanu guinabadiidxanu.

 BICHEECHE Jesús diidxaʼ chupa iza guidubi naca Galilea (biindaʼ Mateo 9:35-38). Guyebe ndaaniʼ stale guidxihuiiniʼ ne guidxi roʼ para gusiidibe ndaaniʼ ca sinagoga sticaʼ ne para gucheechebe ca diidxaʼ nacubi ne galán stiʼ Reinu. Ra tiica chebe rinanda stale binni laabe. Laaca laabe guniʼbe «ma stale binni cabeza si ucaa diaga stiidxa Dios. Tu güi ni nga huaxiéʼ».

² Xi biʼniʼ Jesús para guireeche diidxaʼ guiráʼ lugar. Biseendabe 12 apóstol stibe chigüicaʼ de Reinu stiʼ Dios (Luc. 9:1, 2). Zándaca guníʼ ique ca apóstol ximodo gúnicaʼ dxiiñaʼ que. Ngue runi, ante guseendaʼ Jesús ca apóstol stiʼ bisiidiʼ laacabe ximodo gúnicabe ni cásica bisiidiʼ Bixhoze laa guibáʼ.

³ Cani bizéʼtenu ca rucaa cani laanu guinabadiidxanu: Xi bisiidiʼ Jiobá Xiiñiʼ. Ximodo bisiidiʼ Jesús ca apóstol stiʼ. Ne ca dxi stinu riʼ, ñee cusiidiʼ Rey gulí Dios ca xpinni ti ganda gucheechecaʼ diidxaʼ la? Pa zacá ni, ximodo rúnibe ni.

4. Padxí ne paraa bisiidiʼ Bixhoze Jesús laa.

⁴ Jesús guníʼ bisiidiʼ Bixhoze laa. Dxi bicheechebe diidxaʼ guniʼbe: «Rinié ni bisiidi Bixhoze naa» (Juan 8:28). Padxí ne paraa bisiidiʼ Bixhózebe laabe yaʼ. Nanna dxíchinu cásipeʼ biluxe bizáʼ Bixhózebe laabe bizulú bisiidiʼ laabe (Col. 1:15). Stale mil iza bicaadiaga Jesús Bixhoze «Ni jma nanna gusiidiʼ» ne biiyabe xi guiráʼ runi (Is. 30:20). Ngue runi, Jiobá si nga gunda bisiidiʼ laabe guiráʼ ca guenda ni gúpabe, ca dxiiñaʼ bíʼnibe ne bisiidiʼ laabe xii nga cani naguixhe ique guni.

5. Xi bisiidiʼ Jiobá Xiiñiʼ ti gucheeche diidxaʼ lu Guidxilayú riʼ.

⁵ Ora bidxiña dxi, bisiidiʼ Jiobá Xiiñiʼ modo guni dxiiñaʼ stiʼ dxi gueeda lu Guidxilayú riʼ. Guidúʼyanu ti profecía ni culuíʼ ximodo guyuu Jesús né Bixhoze (biindaʼ Isaías 50:4, 5). Textu ca rusihuinni casi ñaca nucuaaniʼ Jiobá Xiiñiʼ guiráʼ siadóʼ. Ca diidxaʼ riʼ cuchaagacani dxiiñaʼ biʼniʼ Jiobá ne dxiiñaʼ  runi ti maestru ni rucuaaniʼ tuuxa ni cusiidiʼ guiráʼ siadóʼ para gusiidiʼ laabe xiixa cosa nacubi. Ti libru ni rusiene ni cá lu Biblia bizeeteʼ: «Jiobá [...] yené laabe scuela casi ñácabe ti baʼduscuela ne rusiidiʼ laabe xi naquiiñeʼ guiniʼbe ora chigucheechebe diidxaʼ ne ximodo gúnibe ni». Ra scuela ni nuu guibáʼ bisiidiʼ Jiobá Xiiñiʼ xi guiníʼ (Juan 12:49). Ne laaca gudxi Jiobá laabe ximodo gusiidibe. a Dxi guyuu Jesús lu Guidxilayú riʼ, jneza modo biquiiñebe guiráʼ ni biziidibe, cásica para gucheechebe diidxaʼ ne zaqueca para gusiidibe ca discípulo stibe gúnicaʼ ni.

6, 7. 1) Xi bisiidiʼ Jesús ca apóstol stiʼ, ne xiñee bíʼnibe ni. 2) Ne xi cayuni Jesús para gusiidiʼ laanu yanna.

⁶ Maca bizéʼtenu bisiidiʼ Jesús ca apóstol stiʼ modo gucheechecaʼ diidxaʼ. Ximodo bíʼnibe ni yaʼ. Lu capítulo 10 stiʼ Mateo cuzeeteʼ xi guiráʼ gudxi Jesús laacabe gúnicabe: paraa gucheechecabe diidxaʼ (versículo 5 ne 6), xi gábicabe binni (versículo 7), guni crécabe zacané Jiobá laacabe (versículo 9 ne 10), ximodo guiniʼnécabe binni (versículo 11 dede 13), xi gúnicabe ora qué naʼ tuuxa gucaadiaga laacabe (versículo 14 ne 15) ne xi gúnicabe ora sananda binni laacabe (versículo 16 dede 23). b Guiráʼ ni bisiidiʼ Jesús ca discípulo stiʼ para gucheechecaʼ diidxaʼ gucaneni laacaʼ ti sanírucaʼ lu dxiiñaʼ bidiibe laacaʼ.

⁷ Yanna, xi zanda guininu ca dxi stinu riʼ yaʼ. Jesús, Rey stiʼ Reinu stiʼ Dios, maʼ bisaana lu nanu gúninu ti dxiiñaʼ nabé risaca, ne laani nga güinu «stiidxa Dios de idubi naca guidxilayú para ganna irá xixé guidxi modo runi mandar» (Mat. 24:14). Ñee cusiidiʼ Jesús laanu gúninu dxiiñaʼ stinu la? Cusiidiʼ pue. Neca nuube guibáʼ, huasiidibe laanu ximodo gucheechenu diidxaʼ ne ximodo gúninu dxiiñaʼ gudiicabe laanu ndaaniʼ neza binni ridagulisaa.

8, 9. 1) Xi para guca Scuela stiʼ cani Rucheeche Diidxaʼ. 2) Ximodo huayacané reunión ni raca ndaaniʼ semana lii ganda gucheecheluʼ diidxaʼ jma jneza.

⁸ Maʼ raca stale iza huaquiiñeʼ Jiobá guiráʼ ca guendaridagulisaa ni rápanu, casi Guendaridagulisaa stiʼ Dxiiñaʼ Stinu, para gusiidiʼ xquidxi modo gucheeche diidxaʼ. Ne dede lu década stiʼ 1940, gudixhe ca xpinni Cristu ni ruuyaʼ modo raca dxiiñaʼ ndaaniʼ yoo Betel ni nuu Estados Unidos chuʼ caadxi scuela ni gacané guiziidiʼ ca xpinni Cristu.

⁹ Scuela sti cani Rucheeche Diidxa. Casi bidúʼyanu lu capítulo ni gudídinu ca, bizulú scuela riʼ lu iza 1943. Ñee guca scuela riʼ para si gacané ni ca xpinni Cristu gudiicaʼ libana sicarú ndaaniʼ neza binni ridagulisaa la? Coʼ. Purtiʼ scuela riʼ guca ni para gacaneni guiráʼ cani nuu ndaaniʼ xquidxi Dios guiziidicaʼ modo guiniʼcaʼ ti gusisácacaʼ Jiobá ora gucheechecaʼ  diidxaʼ (Sal. 150:6). Pur scuela riʼ, guiráʼ cani gucuá lá luni biziidicaʼ gucheechecaʼ diidxaʼ jma jneza. Yanna riʼ, laaca caziidicabe gucheechecabe diidxaʼ lu reunión ni raca ndaaniʼ semana.

10, 11. Tuu nga cani zanda cheʼ Scuela stiʼ Galaad ne xi riziidicabe lu scuela riʼ.

¹⁰ Scuela stiʼ Galaad stiʼ Watchtower. Scuela riʼ bizulú guca ni lunes 1 stiʼ febrero iza 1943. Primé guca ni para gusiidini ca precursor ne xcaadxi xpinni Cristu ni jma rucheeche diidxaʼ checaʼ de misioneru ndaaniʼ gadxé gadxé guidxi. Peru dede lu beeu octubre iza 2011, bizulú guca invitar ca precursor especial, ca binnigola ni riganna ca neza binni ridagulisaa ne xheelacaʼ, cani runi dxiiñaʼ Betel ne cani cayuni dxiiñaʼ de misioneru peru caʼruʼ cheʼ scuela riʼ.

¹¹ Xi riziidicabe lu Scuela stiʼ Galaad. Ti hermanu ni maʼ xadxí de rusiidiʼ lu scuela riʼ guníʼ sicaríʼ: «Riduʼndaʼ chaahuidu Stiidxaʼ Dios ti gacanedu cani caziidiʼ iguidxi fe sticaʼ ne racanedu laacabe gusihuínnicabe ca guenda stiʼ Dios ti ganda guni huantárcabe guiráʼ ni guidxaagalúcabe ra chigacanécabe. Ne laaca rusíʼdidu laacabe ximodo gucheechecabe diidxaʼ né stale gana» (Efes. 4:11).

12, 13. Ximodo huayacané Scuela stiʼ Galaad guireeche diidxaʼ lu guidubi naca Guidxilayú. Bizeeteʼ ti ejemplu.

¹² Ñee huayacané Scuela stiʼ Galaad guireeche diidxaʼ lu guidubi naca Guidxilayú la? Huayacaneni pue. Purtiʼ dede lu iza 1943 huasiidini jma de 8,500 xpinni Cristu c ne huaseendaʼ scuela riʼ misioneru ndaaniʼ jma de 170 guidxi roʼ. Ca xpinni Cristu riʼ huaquiiñecaʼ guiráʼ ni biziidicaʼ purtiʼ rucheechecaʼ diidxaʼ né stale gana ne rusiidicaʼ xcaadxi guni zaqueca. Stale biaje laacabe nga ni jma zaniruʼ lade cani rucheecheʼ diidxaʼ ca lugar ra nuu huaxiéʼ xpinni Cristu.

¹³ Guzéʼtenu ni bizaaca ndaaniʼ guidxi Japón, ti lugar ra bicueezacabe guireeche diidxaʼ de yoo pur yoo dxi cayaca Segunda Guerra Mundial. Lu beeu agosto iza 1949 guyuu 10 si ni rucheeche diidxaʼ ndaaniʼ guidubi naca guidxi riʼ. Peru ra ziluxe iza que maʼ nuu 13 misioneru cucheeche diidxaʼ raqué. Despué guyé jma misioneru ndaaniʼ guidxi que. Primé la? gudixhe íquecabe gucheechecabe diidxaʼ ndaaniʼ ca guidxi roʼ napa Japón, despué guyécabe ndaaniʼ xcaadxi guidxihuiiniʼ. Ca misioneru que guluucaʼ gana ca binni ni ruundanecaʼ ne xcaadxi de cani rucheeche diidxaʼ gácacaʼ precursor. Guiráʼ dxiiñaʼ bíʼnicabe que gucaneni stale binni. Yanna riʼ maʼ nuu jma de 216,000 ni rucheeche diidxaʼ ndaaniʼ guidxi Japón, ne casi 40% de laacaʼ nácacaʼ precursor. d

14. Xi rusihuinni ca scuela ni rudii xquidxi Dios laanu (biiyaʼ cuadru ni láʼ « Ca scuela ra rusiidiʼ Dios laanu» yaza 188).

¹⁴ Xcaadxi scuela napa xquidxi Dios. Scuela stiʼ ca precursor regular, Scuela para ca guendaxheelaʼ ni naca xpinni Cristu ne Scuela ra riziidiʼ ca hombre ni caʼruʼ guichaganáʼ gúnicaʼ xhiiñaʼ Dios huayacanécani ca xpinni Cristu guiziidicaʼ jma de Stiidxaʼ Dios ne sanírucaʼ ora gucheechecaʼ diidxaʼ né  stale gana. e Guiráʼ scuela rudii xquidxi Dios laanu rusihuínnicani cusiidiʼ Rey stinu laanu para gucheechenu diidxaʼ jma jneza (2 Tim. 4:5).

15. Ximodo rinanda ca hermanu ni napa xiixa guenda ndaaniʼ xquidxi Dios ejemplu stiʼ Jesús.

¹⁵ Guietenaláʼdxinu profecía ni bicaa Isaías ra culuíʼ modo cusiidiʼ Dios Xiiñiʼ. Ndaaniʼ scuela ni nuu guibáʼ, biziidiʼ Jesús gacané cani maʼ bidxaga (Is. 50:4). Dxi guyuu Jesús lu Guidxilayú riʼ, bisihuínnibe guiráʼ ni biziidibe ra gudixhedxibe ladxidóʼ «irá ni ma bidxaga de cuyubi modo guia ladxidóʼ» (Mat. 11:28-30). Cásica biʼniʼ Jesús, guiráʼ ca hermanu ni napa xiixa guenda ndaaniʼ xquidxi Dios laaca zanda quixhedxicaʼ ladxidóʼ cani ridagulisaanecaʼ. Nga runi, maʼ nuu stale scuela ni zanda gusiidiʼ laacabe gánnacabe modo gúnicabe ni.

16, 17. Ximodo racané Scuela stiʼ Xhiiñaʼ Reinu laanu (laaca zanda gúʼyaluʼ nota stini).

¹⁶ Scuela stiʼ Xhiiñaʼ Reinu. Primé clase stiʼ scuela riʼ bizulú ni 9 stiʼ marzo iza 1959 ndaaniʼ guidxi South Lansing (Nueva York), ne bindaa ni ti beeu. Raqué guca invitar guiráʼ  ca viajante ne ca siervu stiʼ ca binni ridagulisaa (yanna maʼ runibiaʼnu laacabe casi Binnigola ni ruuyaʼ dxiiñaʼ ni runi grupu de binnigola). Cumu primé que inglés si nuu cursu que la? despué bitiixhicabe ni lu xcaadxi diidxaʼ ne chaahuidugá gucané scuela que xcaadxi hermanu ni nuu lu guidubi naca Guidxilayú. f

¹⁷ Lu Anuario stiʼ iza 1962, ni biree lu diidxaʼ inglés cusiene xi para guca Scuela stiʼ Xhiiñaʼ Reinu: «Nabé nuu xhiiñaʼ binni ndaaniʼ Guidxilayú riʼ, nga runi ni gaca binnigola ndaaniʼ ti neza binni ridagulisaa stiʼ ca testigu stiʼ Jiobá naquiiñeʼ quixhe chaahuiʼ guiráʼ ni runi ti ganda gacané ca binni ridagulisaa. Peru laaca cadi pur gápabe laacaʼ gusaana de gacanebe binnilídxibe, sínuque naquiiñeʼ gusihuínnibe riníʼ íquebe jneza lu cani rúnibe. Lu guidubi naca Guidxilayú caziidiʼ ca siervu stiʼ ca binni ridagulisaa lu Scuela stiʼ Xhiiñaʼ Reinu modo na Biblia naquiiñeʼ guni ca binnigola xhiiñacaʼ» (1 Tim. 3:1-7; Tito 1:5-9).

18. Ximodo ribeendú guiráʼ xpinni Dios ni galán lu Scuela stiʼ Xhiiñaʼ Reinu.

 ¹⁸ Guiráʼ xpinni Dios huabeenducaʼ ni galán lu Scuela stiʼ Xhiiñaʼ Reinu. Xiñee rininu zacá yaʼ. Purtiʼ ora rinanda ca binnigola ne ca siervu ministerial ni riziidicaʼ lu scuela ca la? racanécabe cani naná nuu ladxidóʼ ne riguucabe gana laacaʼ cásica biʼniʼ Jesús. Ñee cadi dxandíʼ rusisácaluʼ ora chiganna ti binnigola o ti siervu ministerial lii ne guiníʼ diidxaʼ ni uguu ganna lii ne gucaadiaga lii la? (1 Tes. 5:11.) Ca binnigola ca nácacaʼ ti ndaayaʼ para ca binni ni ridagulisaanecaʼ.

19. Xi xcaadxi scuela runi tender Comité de Enseñanza, ne xi para guca cani.

¹⁹ Xcaadxi scuela napa xquidxi Dios. Comité de Enseñanza stiʼ Grupu ni Zaniruʼ cayuuyaʼ xcaadxi scuela ni racané ca xpinni Cristu ni napa dxiiñaʼ lade ca binni ridagulisaa. Ca scuela ca guca cani para gacanécani ca hermanu, casi ca binnigola de neza binni ridagulisaa, superintendente de circuito ne Comité de Sucursal, ti ganda gúnicaʼ xhiiñacaʼ jma jneza. Ca scuela ni rusiidiʼ de lu Biblia riʼ racanécani ca xpinni Cristu chuʼcaʼ jma gaxha de Dios ne chinándacaʼ ca conseju stini ora gápacaʼ ca dendxuhuiiniʼ bidii Dios laacaʼ (1 Ped. 5:1-3).

20. Xiñee guníʼ Jesús cusiidiʼ Jiobá guiranu, ne xi naguixhe íqueluʼ gúniluʼ.

²⁰ Pur cani maʼ bidúʼyanu ca, rihuinni dxíchica racalaʼdxiʼ Rey stinu gusiidiʼ guiranu. Guiráʼ ni rizíʼdinu zeeda cani de Jiobá purtiʼ laabe bisiidibe Xiiñibe, ne Xiiñibe cusiidiʼ ca discípulo stiʼ. Ngue runi, Jesús guníʼ Jiobá nga cusiidiʼ guiranu (Juan 6:45; Is. 54:13). Naquiiñeʼ quixhe íquenu chinándanu guiráʼ cani cusiidiʼ Rey stinu laanu. Cadi guiaandaʼ laanu para chuʼnu jma gaxha de Jiobá ti gucheechenu diidxaʼ jma jneza nga guiráʼ ni cazíʼdinu riʼ.