1, 2. a) Tuma min na legilizi kuntigi dɔ ye balimacɛ Russell ɲininga an ka baara musakaw be sara cogo min na, a y’a jaabi cogo di? b) An bena mun lo lajɛ sapitiri nin na?

 LOON dɔ, legilizi kuntigi dɔ ye balimacɛ Charles Russell ɲininga walisa k’a lɔn Bibulu Kalandenw ka baara musakaw be sara cogo min na.

 Balimacɛ Russell y’a ɲɛfɔ a ye ko: “An tɛ wari deli mɔgɔw fɛ abada!”

 Legilizi kuntigi y’a ɲininga ko: “Aw do be wari sɔrɔ cogo di?”

 Russell y’a jaabi ko: “N’ bena min fɔ i ye, o ye tiɲɛn lo ye nka, i tɛna la n’ na. Mɔgɔw mana na an ka lajɛnw na, u t’a ye ko an be tɛmɛ tɛmɛ ni minanw ye ka wari deli mɔgɔw fɛ. Nka u b’a ye ko musakaw be yen. U b’a fɔ u yɛrɛ ye ko: ‘Boon nin tɛ ɲɛ musakaw kɔ . . . Ne be se ka dɛmɛ don cogo di?’ ”

 O diinan kuntigi ye balimacɛ Russell filɛ ani a ma la a la.

 Russell ko: “N’ be tiɲɛn yɛrɛ lo fɔra i ye ten. U be to ka n’ ɲininga ko: ‘Ne be se ka wari dɔɔni di cogo di o baara kama?’ Ni Ala ye dɔ duga ani a ye wari dɔɔni sɔrɔ, a b’a fɛ k’o di Matigi ka baara kama. Nka ni wari t’a fɛ, mun na an bena a fɔ ye ko a ka dɔ di?” a

² Balimacɛ Russell tun be min fɔra, o tun ye “tiɲɛn yɛrɛ lo ye!” Kabi wagatijan, a lɔnnin lo ko Ala sagokɛlaw b’a bɔ u yɛrɛ la le ka niliw kɛ tiɲɛn batoli kama. Sapitiri nin na, an bena dalilu dɔw lajɛ ka bɔ Bibulu kɔnɔ ani an ka wagati la minw b’o yira. An k’a filɛ Masaya ka baara musakaw be sara cogo min na bi. O lajɛtɔ, an kelen kelen bɛɛ k’an yɛrɛ ɲininga ko: “N’ be se ka dɛmɛ don cogo di Masaya ka koow la?”

3, 4. a) Mun na Jehova lanin lo a sagokɛlaw la? b) Israɛldenw ye dɛmɛ don cogo di fanibugu lɔli baara la?

³ Jehova lanin be a sagokɛla sɔbɛw la. A b’a lɔn ko ni sababu dira u ma, a ka di u ye ka niliw kɛ walisa k’a yira ko Ala koo ka di u ye. An ka koo fila lajɛ minw kɛra galen Israɛldenw ka wagati la.

 ⁴ Israɛldenw bɔnin kɔ Ezipiti, Jehova y’a fɔ u ye ko u ka fanibugu dɔ dilan batoli kama. U mako tun be bololafɛn caaman na walisa k’o fanibugu n’a kɔnɔnafɛnw dilan. Jehova y’a fɔ Musa ye ko a ka sababu di jama ma u ka se ka dɛmɛ don o baara la. A ko: “Aw ka dɔ bɔ aw bololafɛnw na k’a di Masaba ma. Mɔgɔ o mɔgɔ dusu ka di o kɛli la, o tigi ka na o di Masaba ma.” (Ɛkiz. 35:5). Jama ye o koo ta cogo di hali k’a sɔrɔ a ma mɛɛn, u tun tɔɔrɔnin lo ani “baaragwɛlɛn sifa bɛɛ” tun lara u kan? (Ɛkiz. 1:14). U ye u tɛgɛ labila ka nili caaman kɛ n’u dusu bɛɛ ye. U ye sanu, warigwɛ ani nafolofɛn wɛrɛw di. A be komi minw tun be u kun na Ezipiti, olu lo ye o fɛɛnw fanba di u ma (Ɛkiz. 12:35, 36). Fanibugu dilanbagaw mako tun be fɛɛn minw na, Israɛldenw nana n’o ye fɔɔ k’a dama tɛmɛ. O kama, a ɲinina u fɛ ko u “kana na ni foyi ye tugu.”—Ɛkiz. 36:4-7.

5. Tuma min na Dawuda ko Israɛldenw ka bolomafaraw di Alabatosoba lɔli kama, u ye mun lo kɛ do?

⁵ Saan 475 ɲɔgɔn o kɔ, Dawuda ye nafolo bɔ a yɛrɛ kun k’a di bolomafara ye Alabatosoba lɔli kama. O lo tun bena kɛ boon fɔlɔ ye dugukolo kan min lɔra tiɲɛn batoli kama. Dawuda ye sababu di Israɛldenw ma u ka nili kɛ. A y’a fɔ u ye ko: “Jɔn le be sɔn bii k’a bololafɛn di Masaba ma?” Jama “nisɔndiyara u ka boɲafɛn nunu diko la, bari mɔgɔ tun ma u karaba u ka sɔrɔ k’o kɛ Masaba ye.” (1 Til. Kib. 29:3-9). Bolomafara minw dira, Dawuda tun b’a lɔn mɔgɔ min kɛra sababu ye u y’o sɔrɔ. O lo kama a y’a fɔ Jehova ye delili la ko: “Fɛɛn bɛɛ be sɔrɔ e le barika la, e le y’o d’an ma an ka sɔrɔ k’o d’i ma.”—1 Til. Kib. 29:14.

6. Bi, mun na an mako be wari la Ala ka Masaya ka baara kama. O b’a to an b’an yɛrɛ ɲininga mun lo la?

⁶ Musa wo, Dawuda wo, u si ma Ala ka jama karaba u ka bolomafara di. Nka a diyara jama yɛrɛ lo ye u ye nili kɛ n’u dusu bɛɛ ye. Nka bi do? An b’a kala ma ko Ala ka Masaya be baara min kɛra, o tɛ ɲɛ musakaw kɔ. An mako be wari caaman na walisa ka Bibuluw n’an ka sɛbɛw bɔ, ka Masaya Boonw, Betɛli n’a ɲɔgɔnnaw lɔ ani k’u ladon ani ka dɛmɛ lase balimaw ma kasaraw tuma na. Nka, ɲiningali jɔnjɔn dɔw be yen. An mako be wari min na, an b’o sɔrɔ cogo di? Yala an ka ɲi ka wari deli Ala ka Masaya marakɔnɔmɔgɔw fɛ wa?

7, 8. Mun na Jehova sagokɛlaw tɛ wari deli mɔgɔw fɛ?

⁷ Kerecɛn tɔgɔtigiw ka legiliziw be tɛmɛ fɛɛrɛ minw fɛ walisa ka wari sɔrɔ, balimacɛ Russell n’a jɛnɲɔgɔnw banna k’o ɲɔgɔn kɛ. Kɔrɔsili Sangaso nimɔrɔ filanan kɔnɔ, cɛtigɛ nin tun be yen: “Yala i be Kɔrɔsili Sangaso dɔ fɛ wa?” Balimacɛ Russell tun y’a sɛbɛ o yɔrɔ la ko: “An lanin b’a la ko JEHOVA lo be dɛmɛ donna Kɔrɔsili Sangaso koo la. O kama, an tɛna wari deli mɔgɔw fɛ abada. Ale min b’a fɔ ko ‘warigwɛ ye ne  ta ye, sanu ye ne ta ye,’ an mako be wari min na n’a m’o di an ma, an bena a faamu ko an man ɲi ka to ka sɛbɛ nin bɔ tugun.” (Aze 2:7-9). Kabi saan 130 ni kɔ, Kɔrɔsili Sangaso bele be bɔra ani ɔriganisasiyɔn min b’a dilan, o be barika sɔrɔla!

⁸ Jehova sagokɛlaw tɛ wari deli mɔgɔw fɛ. U ka batolikɛyɔrɔw la, u tɛ tɛmɛ ni minanw ye ka wari deli ani u tɛ lɛtɛrɛw ci walisa mɔgɔw ka wari di u ma. U fana tɛ boonw lɔ k’u bila luwanse la, u tɛ fɛɛnw feere ani u tɛ kɛrmɛsiw kɛ walisa ka wari sɔrɔ. Kɔrɔsili Sangaso tun ye min fɔ kabi wagatijan, u be tugu o lo kɔ. A tun fɔra ko: “An t’a jati abada ko a bɛnnin lo ka wari deli mɔgɔw fɛ Matigi ka baara kama, i ko legilizi tɔɔw b’a kɛ cogo min na . . . An ka miiri la, ka tɛmɛ o fɛɛrɛw fɛ Matigi tɔgɔ la walisa ka wari sɔrɔ, o man di a ye ani o bɛnnin tɛ a ɲɛɛ kɔrɔ. O tɛ duga lase wari dibaga ma ani o wari dira baara min kama, Ala tɛ duga don o la.” b

9, 10. Kuun minw kama an be niliw kɛ, u dɔ ye juman ye?

⁹ An ye Ala ka Masaya marakɔnɔmɔgɔw ye minkɛ, an mako t’a la u k’an waajibiya ka nili kɛ. Nka, a yɛrɛ ka di an ye k’an ka wari n’an bololafɛnw kɛ ka dɛmɛ don Masaya ka baaraw la. Mun na a ka di an ye k’o kɛ do? An ka koo saba lajɛ.

¹⁰ A fɔlɔ, a ka di an ye ka niliw kɛ sabu Jehova koo ka di an ye ani an b’a fɛ k’a sago kɛ (1 Zan 3:22). Tiɲɛn na, a ka di Jehova sagokɛla minw ye ka nili kɛ n’u dusu bɛɛ ye, olu koo ka di a ye. An k’a filɛ ciden Pol ye min fɔ niliw koo la (2 Korɛntikaw 9:7 kalan). U tɛ kerecɛn sɔbɛ waajibiya a ka nili kɛ, ani n’a ye nili kɛ, a tɛ nimisa o la. Nka, a be nili kɛ “a yɛrɛ sago la.” c O kɔrɔ, a be kɔn ka jatiminɛ kɛ k’a filɛ ɔriganisasiyɔn mako be min na ani ale be se ka min kɛ o koo la. O tigilamɔgɔ koo ka gwɛlɛ Jehova ma sabu “mɔgɔ min be sɔnni kɛ ni nisɔndiya ye, o tigi koo le ka di” a ye. O vɛrise be se ka bayɛlɛma fana ten ko: “A ka di mɔgɔ min ye ka nili kɛ, o tigi koo ka di Ala ye.”

11. Mun lo b’an lasun k’an ka fɛɛnw bɛɛ la fisaman di Jehova ma?

¹¹ A filanan, an be niliw kɛ sabu Jehova be fɛɛn minw bɛɛ di an ma, an b’a fɛ k’a waleɲuman lɔn o kosɔn. An ka sariyakolo dɔ lajɛ Musa ka sariya kɔnɔ min b’an lasun ka miiri koɲuman ani ka koow kɛ n’an dusu bɛɛ ye (Deteronɔmu 16:16, 17 kalan). Israɛldenw tun be ɲɛnagwɛ saba kɛ saan o saan. O ɲɛnagwɛw la, cɛɛ kelen kelen bɛɛ tun ka kan ka na ‘n’a ka boɲafɛn ye ka kɛɲɛ ni Masaba a ka Ala ka dɛmɛ ye.’ O kɔrɔ ko cɛɛ kelen kelen bɛɛ tun ka ɲi ka kɔn ka miiri Jehova y’a duga cogo min na ani k’a latigɛ a dusukun na, a bena nilifɛnw bɛɛ la fisaman min di a ma. O cogo kelen na, Jehova y’an duga cogo caaman minw na,  n’an be miiri o la, o b’an lasun k’an ka fɛɛnw bɛɛ la fisaman di a ma. An be nilifɛn minw di Jehova ma n’an dusu bɛɛ ye, u dɔw ye an bololafɛnw ye. O nilifɛnw b’a yira an be Jehova waleɲuman lɔn kosɔbɛ cogo min na a ka dugaw kosɔn.—2 Kor. 8:12-15.

12, 13. An be nili minw kɛ, o b’a yira cogo di ko an be Masacɛ Yezu kanu? An kelen kelen bɛɛ be nili hakɛ juman lo kɛ?

¹² A sabanan, an b’a latigɛ ka nili minw kɛ, an b’a yira o fɛ ko an be an ka Masacɛ Yezu Krista kanu. Cogo di do? A kɔrɔsi Yezu ye min fɔ a ka kalandenw ye a ka suu laban na dugukolo kan (Zan 14:23 kalan). A ko: “Ni mɔgɔ min be ne kanu, o tigi bena ne ka kuma bato.” Yezu ka “kuma” ɲɛsinna fana a ka cii ma, a ye min di ko an ka Masaya kibaro diiman fɔ dugukolo yɔrɔ bɛɛ la (Mat. 24:14; 28:19, 20). An be Yezu ka “kuma” bato, an kɛtɔ k’an seko bɛɛ kɛ, o kɔrɔ, an ka wagati, an fanga ani an ka bololafɛnw kɛ ka dɛmɛ don Masaya waajuli baara la. O cogo la, an b’a yira ko an be Masacɛ Masiya kanu.

 ¹³ Tiɲɛn na, an ye Ala ka Masaya marakɔnɔmɔgɔ kantigiw ye. O kama, an b’a fɛ n’an dusu bɛɛ ye ka dɛmɛ don o Masaya ka koow la, an kɛtɔ ka niliw kɛ. An b’o kɛ cogo di do? An kelen kelen bɛɛ lo b’a latigɛ an bena o kɛ cogo min na. An bɛɛ b’an seko fisaman lo kɛ. See bɛrɛ tɛ an balimaw fanba ye (Mat. 19:23, 24; Zaki 2:5). Nka, o balimaw dusu ka di k’a lɔn ko u be nili minw kɛ n’u dusu bɛɛ ye, hali ni bɛrɛ tɛ, o ka di Jehova n’a Dencɛ ye.—Mariki 12:41-44.

14. Saan caaman kɔnɔ, mɔgɔw tun be se k’an ka sɛbɛw sɔrɔ cogo di?

¹⁴ Saan caaman kɔnɔ, mɔgɔw tun be bolomafaraw lo di walisa ka Jehova Seerew ka sɛbɛw sɔrɔ. An tun be bolomafara min minɛ mɔgɔw fɛ, o tun man ca. O la, hali wari bɛrɛ tɛ minw fɛ, olu tun be se k’an ka sɛbɛw sɔrɔ. Nka ni mɔgɔ dɔ tun b’an ka sɛbɛ dɔ fɛ ani wari t’a fɛ do? Weleweledalaw tun ka teli k’an ka sɛbɛ di a ma. Mɔgɔ kɔnɔgwɛ minw tun b’a fɛ k’an ka sɛbɛw kalan ani ka nafa sɔrɔ u la, weleweledalaw tun b’a fɛ n’u dusu bɛɛ ye k’an ka sɛbɛw di olu ma.

15, 16. a) Saan 1990, Koow Ɲɛnabɔla Jɛnkulu y’a daminɛ ka yɛlɛmani juman lo don an ka sɛbɛw dicogo la? b) Mɔgɔw be niliw kɛ cogo di? (Koorilen nin lajɛ fana: “ Baara jumanw lo be kɛ n’an ka niliw ye?”)

¹⁵ Saan 1990, Koow Ɲɛnabɔla Jɛnkulu y’a daminɛ ka yɛlɛmani don an ka sɛbɛw dicogo la. Kabi o saan na, Etazini jamanaw na, n’an tun y’an ka sɛbɛ di mɔgɔ dɔ ma, a tun mana min sɔrɔ, a tun be o lo di. Lɛtɛrɛ dɔ cira kafow bɛɛ ma Etazini k’a ɲɛfɔ ko: “An tɛna a ɲini weleweledalaw ni makodonmɔgɔw fɛ u ka bolomafara tigitigi dɔ di an be sɔrɔ k’an ka zurunaliw wala gafew di u ma. . . . Mɔgɔ o mɔgɔ b’a fɛ ka nili kɛ walisa ka dɛmɛ don an ka waajuli baara la, a be se k’o kɛ. Nka, a ye nili kɛ wo, a ma nili kɛ wo, an be se k’an ka sɛbɛ dɔ di a ma.” O labɛn y’a yira ka gwɛ ko an ka baara kuun ye ka mɔgɔw dɛmɛ ani ko diinanko lo. A y’a yira ka gwɛ fana ko an tɛ “Ala ka kuma kɛ jagokun ye.” (2 Kor. 2:17). Kɔfɛ, a ɲinina tɔnbolo tɔɔw fɛ duniɲa kuru bɛɛ kɔnɔ ko u ka to ka an ka sɛbɛw di o cogo la.

¹⁶ Niliw be kɛ cogo di? Jehova Seerew ka Masaya Boonw kɔnɔ, nili kɛsu dɔw ben yen. Mɔgɔw be se k’u ka niliw don yen tɔɔw ɲina ma. Wala, u be se ka sin k’u ci Jehova Seerew ka tɔnbolow dɔ ma. Saan o saan, barokun dɔ be bɔ Kɔrɔsili Sangaso kɔnɔ min b’a yira mɔgɔ be se k’a latigɛ ka niliw kɛ cogo minw na.

17-19. A ɲɛfɔ baara be kɛ cogo min na ni niliw ye koo nunu na: a) waajuli baara duniɲa kuru bɛɛ kɔnɔ, b) Masaya Boonw lɔli baara duniɲa kuru bɛɛ kɔnɔ, ani c) kafo ka musakaw.

¹⁷ Waajuli baara duniɲa kuru bɛɛ kɔnɔ. O wari be ta ka waajuli baara musakaw sara i n’a fɔ: ka sɛbɛw dilan walisa k’u jɛnsɛn duniɲa yɔrɔ bɛɛ la, ka Betɛli boonw lɔ ani k’u ladon, ani ka Alako mara lakɔli caaman kɛ. Ka fara o kan,  an be baara kɛ n’o wari ye walisa k’an janto misɔndenw, kɔrɔsibaga tagamakɛlaw ani dan na piyɔniyew la. An be nili minw kɛ, baara be kɛ n’u ye fana ka dɛmɛ lase an balimaw ma balawow tuma na. d

¹⁸ Masaya Boonw lɔli baara duniɲa kuru bɛɛ kɔnɔ. Wari dɔ be di kafow ma walisa k’u dɛmɛ k’u ka Masaya Boonw lɔ wala k’u lakuraya. Niliw lo sababu la wari be sɔrɔ ka kafo wɛrɛw dɛmɛ. e

¹⁹ Kafo ka musakaw. O wari be kɛ ka kuran, jii n’a ɲɔgɔnnaw sara kafo kɔnɔ ani ka Masaya Boon ladon. Diinan mɔgɔkɔrɔw be se k’a latigɛ k’o wari dɔ ci Tɔnbolo ma walisa ka dɛmɛ don waajuli baara la duniɲa kuru bɛɛ kɔnɔ. O koo ɲɔgɔn na, u b’a to kafodenw be ŋaniya dɔ ta kafo kɔnɔ. Ni kafodenw sɔnna ko wari hakɛ min ka ci, o lo be ci tɔnbolo ma. Kalo o kalo, balimacɛ min be kafo ka wariko kun na, ale be rapɔɔri dɔ labɛn min be kalan balimaw ye kafo kɔnɔ.

20. I be se ka Jehova bonya n’i “bolofɛnw ye” cogo di?

²⁰ Baara minw bɛɛ be kɛra walisa ka Masaya kibaro diiman fɔ ani ka mɔgɔw kɛ Krista ka kalandenw ye duniɲa kuru bɛɛ kɔnɔ, n’an miirila o la, o b’an lasun ka ‘Masaba [Jehova] boɲa n’an bolofɛnw ye.’ (Talenw 3:9, 10). An bololafɛn nafaman dɔw ye an ka fanga, an ka lɔnniya ani an be ni setigiya minw ye Alako ta fan fɛ. Siga t’a la, an b’a fɛ ka baara kɛ n’u ye bɛrɛbɛrɛ ka dɛmɛ don Masaya ka koow la. Nka an kana ɲinɛ ko an ka wari fana ye an bololafɛn nafaman dɔ ye. An be se ka min di, an k’an jija k’o di wagati min na an be se k’o kɛ. An ka niliw fɛ, an be bonya la Jehova kan ani an be dɛmɛ don Masiya ka Masaya ka baaraw la.