1, 2. (a) Ania ti insungbat ni Kabsat Russell iti ministro a mayat a mangammo no kasano a masupsuportaran iti pinansial ti aktibidad dagiti Estudiante ti Biblia? (b) Ania ti usigentayo iti daytoy a kapitulo?

 NAMINSAN, ni Kabsat Charles T. Russell ket inasitgan ti maysa a ministro ti Reformed Church a mayat a mangammo no kasano a masupsuportaran iti pinansial ti aktibidad dagiti Estudiante ti Biblia.

“Saankami nga agkolkolekta,” kuna ni Kabsat Russell.

“Pangal-alaanyo ngarud iti pondoyo?” insaludsod ti ministro.

“No ibagak kenka, baka saanka a mamati,” insungbat ni Russell. “No umay makigimong dagiti tattao, awan ti makitada a panagkolekta. Ngem makitada nga adda dagiti paggastuan isu nga ibagada iti bagida, ‘Dakkel la ketdi ti nagastosda iti daytoy a pasdek . . . Kasanoak ngata a makatulong?’”

Kasla saan a mamati ti ministro iti imbaga ni Kabsat Russell.

“Ibagbagak kenka ti agpayso,” intuloy ni Kabsat Russell. “Talaga nga isalsaludsodda kaniak no kasanoda a makatulong. No adda bendision ti maysa, kayatna nga usaren dayta agpaay iti Apo. Ngem no awan ti mabalinna, apay koma a pilitenmi a mangted?” a

² “Agpayso” ti imbaga ni Kabsat Russell. Nabayagen a mangmangted ti ili ti Dios iti boluntario a donasion a mangsuporta iti pudno a panagdaydayaw. Iti daytoy a kapitulo, usigentayo ti sumagmamano nga ulidan iti Biblia ken iti kaaldawantayo. Bayat nga usigentayo no pagtataudan ti pondo ti aktibidad ti Pagarian ita, nasayaat nga isaludsod ti tunggal maysa kadatayo, ‘Kasanok a maipakita a supsuportarak ti Pagarian?’

3, 4. (a) Agtalek ni Jehova kadagiti agdaydayaw kenkuana a mangaramid iti ania? (b) Kasano nga impakita dagiti Israelita a supsuportaranda ti panagibangon iti tabernakulo?

³ Agtalek ni Jehova kadagiti pudno nga agdaydayaw kenkuana. Ammona a no maikkanda iti gundaway, siraragsak nga ipakitada ti debosionda babaen ti boluntario a panangted. Usigentayo ti dua nga ulidan iti pakasaritaan ti Israel.

⁴ Kalpasan nga inruar ni Jehova dagiti Israelita manipud Egipto, imbagana kadakuada a mangibangonda iti mayakar-akar a tolda, wenno tabernakulo, a pagdaydayawanda. Adu a materiales ti  kasapulan para iti tabernakulo ken kadagiti alikamenna. Imbilin ni Jehova ken ni Moises nga ikkanna dagiti Israelita iti gundaway a mangsuporta iti proyekto babaen ti panangikunana a ‘tunggal maysa a situtulok ti pusona mangyeg koma iti kontribusion’ maipaay ken Jehova. (Ex. 35:5) Ania ti reaksion dagiti Israelita, a nabiit pay a nagsagaba iti “tunggal kita ti panangadipen”? (Ex. 1:14) Naan-anay a sinuportaranda dayta. Situtulokda a nangted iti balitok, pirak, ken dadduma pay a napateg a sanikuada, a ti kaaduan kadagita ket mabalin nga inted dagiti dati nga apoda nga Egipcio. (Ex. 12:35, 36) Ad-adu pay ketdi ti inted dagiti Israelita ngem iti kasapulan ta uray la ‘napawilandan’ a mangnayon pay iti dayta.​—Ex. 36:4-7.

5. Ania ti inaramid dagiti Israelita idi inikkan ida ni David iti gundaway a tumulong iti pannakaibangon ti templo?

⁵ Agarup 475 a tawen kalpasanna, nangted ni David iti kontribusion manipud iti ‘sanikuana’ tapno masuportaran ti pannakaibangon ti templo, ti kaunaan a permanente a sentro ti pudno a panagdaydayaw ditoy daga. Kalpasanna, inikkanna dagiti padana nga Israelita iti gundaway a tumulong babaen ti panangikunana: “Siasino ti agboluntario tapno punnuenna ti imana ita nga aldaw iti sagut a maipaay ken Jehova?” Kas sungbat, “nangipaayda kadagiti boluntario a daton ken Jehova” buyogen ti naan-anay a puso. (1 Cron. 29:3-9) Kas panangbigbig iti pudno a gubuayan dagiti kontribusion, kinuna ni David iti kararagna ken ni Jehova: “Aggapu kenka ti amin a banag, ket manipud iti bukodmo nga ima nangtedkami kenka.”​—1 Cron. 29:14.

6. Apay a kasapulan ti kuarta iti pannakaitungpal ti trabaho ti Pagarian? Ania dagiti saludsod a tumaud?

⁶ Saan a pinilit ni Moises wenno ni David ti ili ti Dios a mangted iti kontribusion. Naimpusuan ti panangtedda. Komusta met ngay ita? Ammotayo nga agkasapulan iti kuarta ti pannakaitungpal ti trabaho ti Pagarian ti Dios. Dakkel ti magastos iti panagipablaak ken panagiwaras iti Biblia ken kadagiti literatura a naibatay iti Biblia, iti panagibangon ken panangmantener kadagiti lugar a pagdaydayawan ken kadagiti pasilidad ti sangay, ken iti panangsaranay kadagiti kapammatiantayo no adda didigra. Ti ngarud napateg a saludsod ket: Pagtataudan dagiti kasapulan a pondo? Masapul kadi a piliten dagiti pasurot ti Ari a mangted?

7, 8. Apay a ti ili ni Jehova ket saan nga umar-araraw wenno dumawdawat iti kuarta?

⁷ Saan a tinulad ni Kabsat Russell ken dagiti kakaduana ti gagangay nga ar-aramiden dagiti relihion ti Kakristianuan nga agur-ur-or iti kuarta. Iti maikadua a ruar ti Watch Tower, iti babaen ti subtitulo a “Do You Want ‘Zion’s Watch Tower’?” (“Kayatyo Kadi ti ‘Zion’s Watch Tower’?”) kinuna ni Kabsat Russell: “Patienmi a supsuportaran ni JEHOVA ti ‘Zion’s Watch Tower.’ Gapuna, pulos a saanto a dumawat wenno umararaw iti tulong ti tao. No Daydiay nagkuna: ‘Amin a balitok ken pirak kadagiti bambantay kukuak,’ ket isardengnan ti mangted kadagiti  kasapulan a pondo, maawatanmi a panawenen tapno isardengmi ti agipablaak.” (Hag. 2:7-9) Kalpasan ti nasurok a 130 a tawen, nagtultuloy latta Ti Pagwanawanan ken ti organisasion a mangipabpablaak iti dayta!

⁸ Saan a dumawdawat ti ili ni Jehova iti kuarta. Saanda nga agkolkolekta wenno agur-ur-or. Saanda met nga agpapaay-ayam iti bingo, aglaklako iti uray ania, wenno agpapa-raffle tapno makapataudda iti pondo. Al-alagadenda ti nabayagen a kinuna ti Watch Tower: “Pulos a saanmi nga imbilang a maitutop ti panagur-or iti kuarta agpaay iti Apo, kas iti ar-aramiden ti dadduma a relihion . . . Para kadakami, ti kuarta a napataud babaen ti nagduduma a pamay-an ti panagur-or iti nagan ti Apo ket makaparurod ken saanna nga anamongan. Saan met a bendisionan ti Apo dagiti nangted wenno dagiti trabaho a naitungpal dayta.” b

9, 10. Ania ti maysa a rason no apay a mangmangtedtayo iti boluntario a kontribusion?

⁹ Kas iturayan ti Pagarian ita, awan ti mangpilpilit kadatayo a mangted no di ket siraragsak nga us-usarentayo ti kuartatayo ken ti dadduma pay a sanikuatayo a mangsuporta kadagiti aktibidad ti Pagarian. Apay a situtuloktayo a mangted? Usigentayo ti tallo a rason.

¹⁰ Umuna, mangmangtedtayo iti boluntario a kontribusion gapu ta ay-ayatentayo ni Jehova ken kayattayo nga aramiden ti “makaay-ayo kadagiti matana.” (1 Juan 3:22) Talaga a maay-ayo ni Jehova iti agdaydayaw kenkuana a naimpusuan ti panangtedna. Usigentayo ti kinuna ni apostol Pablo maipapan iti Nakristianuan a panangted. (Basaen ti 2 Corinto 9:7.) Ti pudno a Kristiano ket saan nga agkedked wenno mapilpilit a mangted. Imbes ketdi, mangted gapu ta dayta ti ‘inkeddeng ti pusona.’ c Kayatna a sawen, mangted kalpasan a matingitingna no ania ti kasapulan ken no kasano a makatulong. Napateg ken ni Jehova ti kasta a panangted gapu ta ti “Dios ayatenna ti naragsak a manangited.” Kastoy ti kuna ti sabali a patarus: “Ti Dios ayatenna ti mangted a siaayat.”

11. Ania ti mangtignay kadatayo a mangipaay iti kasayaatan a sagut ken ni Jehova?

¹¹ Maikadua, mangmangtedtayo iti material a kontribusion kas panagyamantayo ken ni Jehova kadagiti adu a bendisionna. Usigentayo ti mamagpanunot a prinsipio iti Mosaiko a Linteg. (Basaen ti Deuteronomio 16:16, 17.) No tumabunoda iti tallo a tinawen a piesta, ti tunggal Israelita a lalaki ket masapul a mangted iti sagut “a mairukod iti pamendision [a naawatna manipud ken] ni Jehova.” Gapuna, sakbay a tumabuno iti piesta, naimpusuan nga ikeddeng ti tunggal lalaki ti kasayaatan a sagut a maipaayna sigun iti bendision a naawatna. Umasping iti dayta, no mennamennaentayo ti adu a pamay-an a panangbendision kadatayo ni Jehova, matignaytayo a mangipaay kenkuana iti kasayaatan a saguttayo. Ipakita ti naimpusuan a saguttayo, a pakairamanan  ti material a kontribusion, no kasano ti panangapresiartayo iti bendision nga inted ni Jehova kadatayo.​—2 Cor. 8:12-15.

12, 13. Kasano a ti boluntario a kontribusiontayo ipakitana nga ay-ayatentayo ti Ari, ken kasano kaadu ti ited ti tunggal maysa?

¹² Maikatlo, dagiti boluntario a kontribusion ipakitana nga ay-ayatentayo ni Jesu-Kristo nga Ari. Kasano? Kitaenyo no ania ti kinuna ni Jesus kadagiti adalanna iti maudi a rabii ti biagna ditoy daga. (Basaen ti Juan 14:23.) ‘Ti asinoman nga agayat kaniak, tungpalennanto ti saok,’ kuna ni Jesus. Ti ‘sao’ ni Jesus ramanenna ti bilinna a mangikasaba iti naimbag a damag maipapan iti Pagarian iti intero a daga. (Mat. 24:14; 28:19, 20) Tungtungpalentayo dayta a ‘sao’ babaen ti panangaramidtayo iti amin a kabaelantayo​—ti panangusar iti tiempo, pigsa, ken sanikuatayo​—a mangitandudo iti trabaho a panangikasaba iti Pagarian. Iti kasta, maipakitatayo nga ay-ayatentayo ti Mesianiko nga Ari.

¹³ Wen, kas nasungdo nga iturayan ti Pagarian, naimpusuan a kayattayo nga ipakita ti panangsuportatayo iti Pagarian babaen ti panangted iti pinansial a kontribusion. Kasano? Dayta ket personal a desision. Ited ti tunggal maysa ti kasayaatan a maipaayna.  Nupay kasta, adu kadagiti kapammatiantayo ti awan unay mabalinna. (Mat. 19:23, 24; Sant. 2:5) Ngem maliwliwada ta ammoda a napateg ken Jehova ken iti Anakna ti uray bassit laeng a kontribusion a naggubuay iti puso.​—Mar. 12:41-44.

14. Iti adu a tawen, ania ti ibagbaga dagiti Saksi ni Jehova no itukonda dagiti literatura?

¹⁴ Iti adu a tawen, ibagbaga dagiti Saksi ni Jehova nga adda ti kontribusion dagiti ituktukonda a literatura a naibatay iti Biblia. Nalaka laeng ti naisingasing a kontribusion tapno makaala iti literatura uray dagiti awan mabalinna. Siempre, no kasla interesado ti bumalay ngem awan ti maitedna a kontribusion, sidadaan dagiti agibumbunannag iti Pagarian a mangibati iti literatura. Naimpusuan a tarigagayanda a maaddaan iti literatura dagiti napasnek a tattao a mayat a mangbasa iti dayta tapno magunggonaanda.

15, 16. (a) Nangrugi idi 1990, ania a panagbalbaliw ti inaramid ti Bagi a Manarawidwid mainaig kadagiti ituktukontayo a literatura? (b) Kasano ti pannakaited dagiti boluntario a donasion? (Kitaenyo met ti kahon a “ Pakaus-usaran Dagiti Donasiontayo?”)

¹⁵ Idi 1990, binalbaliwan ti Bagi a Manarawidwid ti wagas a panangitukontayo kadagiti literatura. Nangrugi iti dayta a tawen, iti Estados Unidos, amin a literatura ket maituktukonen babaen ti boluntario a donasion. Kuna ti maysa a surat para iti amin a kongregasion iti dayta a pagilian: “Dagiti magasin ken literatura ket maipaay kadagiti agibumbunannag ken interesado a tattao nga awan ti makiddaw wenno naikeddeng a gatad nga itedda tapno makaalada iti literatura. . . . Mabalin a mangted iti donasion ti siasinoman a mayat tapno masupusopan dagiti paggastuan iti trabahotayo a panangisuro. Ngem uray awan ti maited ti maysa, mabalin a maikkan latta iti literatura.” Dayta nga urnos linawlawaganna a ti trabahotayo ket boluntario ken narelihiosuan ken agserbi kas pammaneknek a “saantayo a managilako iti sao ti Dios.” (2 Cor. 2:17) Idi agangay, ti urnos maipapan iti boluntario a donasion ket naipatungpal met kadagiti sangay iti intero a lubong.

¹⁶ Kasano ti pannakaited dagiti boluntario a donasion? Kadagiti Kingdom Hall dagiti Saksi ni Jehova, adda dagiti kahon a pagitinnagan iti kontribusion a naikabil iti paset a saan unay a nakadkadlaw. Dagiti indibidual mabalinda nga itinnag iti dayta dagiti donasionda wenno ipatulodda a direkta iti maysa kadagiti legal a korporasion nga us-usaren dagiti Saksi ni Jehova. Tinawen nga adda artikulo iti Pagwanawanan a mangilawlawag no kasano a maaramid dagiti kasta a boluntario a donasion.

17-19. Ilawlawagyo no kasano a maus-usar dagiti naidonar a pondo para iti (a) sangalubongan a trabaho, (b) panagibangon iti Kingdom Hall iti intero a lubong, ken (c) paggastuan ti kongregasion.

¹⁷ Sangalubongan a trabaho. Mausar dagiti pondo a pangsupusop kadagiti paggastuan iti pannakaitungpal ti sangalubongan a trabaho a panangasaba. Karaman iti daytoy dagiti magasto iti panangipablaak kadagiti literatura a maiwaras iti intero a lubong, panagibangon ken panangmantener kadagiti sanga nga opisina, ken para kadagiti nagduduma a teokratiko nga eskuelaan. Maysa  pay, maus-usar dagitoy a pondo tapno maipaay ti kasapulan dagiti misionero, agdaldaliasat a manangaywan, ken special pioneer. Kanayonanna, maus-usar met dagiti donasiontayo a pangsaranay kadagiti kapammatiantayo no adda didigra. d

¹⁸ Panagibangon iti Kingdom Hall iti intero a lubong. Mausar dagiti pondo a pangtulong kadagiti kongregasion a masapul a maibangonan wenno matarimaan ti Kingdom Hall-na. Uray no adda maaw-awat a kontribusion, kasapulan latta ti ad-adu a pondo a pangtulong kadagiti dadduma a kongregasion. e

¹⁹ Paggastuan ti kongregasion. Mausar dagiti pondo para iti pannakausar ken pannakamantener ti Kingdom Hall. Mabalin nga irekomenda dagiti panglakayen a ti dadduma a pondo ket maipatulod iti sanga nga opisina a mausar iti sangalubongan a trabaho. No maaramid dayta, mangidatag dagiti panglakayen iti resolusion nga anamongan ti kongregasion. No maaprobaran, maipatulod ti nairekomenda a pondo. Ti kabsat a mangas-asikaso iti kuarta ti kongregasion ket binulan a mangaramid iti financial report, a maibasa iti kongregasion.

20. Kasanom a maidaydayaw ni Jehova babaen ti “napapateg a bambanagmo”?

²⁰ No usigentayo amin a ramanen ti panangitungpal iti trabaho a panangikasaba iti Pagarian ken panagaramid iti adalan iti intero a lubong, matignaytayo a ‘mangidaydayaw ken ni Jehova iti napapateg a bambanagtayo.’ (Prov. 3:9, 10) Ti napapateg a bambanagtayo ramanenna ti pisikal, mental, ken naespirituan nga abilidadtayo. Sigurado a kayattayo nga usaren a naan-anay dagitoy iti trabaho ti Pagarian. Ngem laglagipentayo a ti napapateg a bambanag ramanenna met ti material a sanikuatayo. Determinadotayo ngarud koma a mangted iti kabaelantayo, sigun iti ipalubos ti kasasaadtayo. Dagiti boluntario a donasiontayo ket pakaidayawan ni Jehova ken pakakitaan a supsuportarantayo ti Mesianiko a Pagarian.