1, 2. (a) Antoy ebat nen Brother Russell ed samay ministron nantepet no panon ya gagastosan iray kimey na Saray Estudyante na Biblia? (b) Antoy pantongtongan tayod sayan kapitulo?

AMINSAN, tinepetan na sakey a ministro na Reformed Church si Brother Charles T. Russell no panon ya gagastosan so kimey na Saray Estudyante na Biblia.

“Agkamin balot mankokolekta,” kuan nen Brother Russell.

“Pangaalaan yoy kuarta ey?” so intepet na ministro.

“No ibagak ed sikay tua, seguradon agka manisia,” so ebat nen Russell. “No miaaral iray totoo ed sikami, anggapoy nanengneng dan ipapasan baskit. Balet naobserbaan dan wala ray panggagastosan. Kanian naisip dan, ‘Baleg so agastos ed sayan hall . . . Panon ak kasin makapangiter na anggan daiset labat?’”

Agmanisia imay ministro ed imbaga nen Brother Russell.

“Tuay ibabagak,” so kuan nen Russell. “Lanang da ak ya tetepetan, ‘Panon ak ya makapangiter na anggan daiset labat?’ No say sakey et nabendisyonan, tan walay kuarta to, usaren to itan parad Katawan. No anggapo to, akin et piliten min mangiter ey?” *

² Tua so imbaga nen Brother Russell. Nensaman ni et niyugali la na totoo na Dios so mangiter na boluntaryon kontribusyon pian nasuportaay dugan panagdayew. Diad sayan kapitulo, pantongtongan tayoy pigaran alimbawad Biblia tan saray alimbawad modernon panaon. Legan tayon aaralen no panon ya gagastosan iray kimey ed Panarian natan, maabig no itepet tayo, ‘Panon kon nipanengneng ya susuportaan koy Panarian?’

3, 4. (a) Akin ya walay talek nen Jehova ed saray mandadayew ed sikato? (b) Panon ya impanengneng na saray Israelita so suporta dad impampaalagey ed tabernakulo?

³ Walay talek nen Jehova ed saray tuan mandadayew ed sikato. Amta ton no naikdan iray pankanawnawa, maliket dan ipanengneng so debosyon da diad boluntaryon pangiter. Imanoey duaran alimbawa na saray Israelita.

 ⁴ Sanen impaway ira nen Jehova diad Ehipto, ingganggan to ran mangipaalagey na niyalis-alis a tolda odino tabernakulo pian ditan mandayew. Kaukolay materyales tan kagawaan pian nipaalagey itan. Imbaga nen Jehova ed si Moises ya ikdan toy pankanawnawa iray totoo ya suportaan so proyekto: “Siopaman a mabulos so puso to, sikato komon so mangiyakar na iyaapay [odino kontribusyon] ed Jehova.” (Exo. 35:5) Antoy reaksion na saray Israelita ya diad saman et agano nin ‘inaripen’? (Exo. 1:14) Impanengneng dan mabulbulos iran onsuporta, maliket iran angiter na balitok, pilak, tan arum ni, ya dakel ed saratan et nayarin nala dad saray amo ran Ehipsio. (Exo. 12:35, 36) Diad karakel na donasyon da, kaukolan iran ‘patundaen a mangiyakar ni na antokaman.’​—Exo. 36:4-7, NW.

5. Antoy reaksion na saray Israelita nen inikdan ira nen David na pankanawnawan mandonasyon parad pampaalagey na templo?

⁵ Kalabas na manga 475 a taon, angiter si David na ‘dilin kayamanan’ to pian walay pampaalagey ed templo, say sankaunaan ya permanentin sentro na dugan panagdayew diad dalin. Insan to inikdan na pankanawnawa iray kapara ton Israelita ya mandonasyon, intepet to: ‘Siopay mabulbulos a mangiyapay ed si Jehova?’ Bilang ebat, ‘ayadyari so puso ran angiyapay a mabulbulos ed si Jehova.’ (1 Awa. 29:3-9) Lapud binidbir nen David ya say talagan nanlapuan na saray kontribusyon et si Jehova, inkuan tod pikakasi to: “Saray amin a bengatla nanlapu ra ed sika, tan ed kayarian mo a dili angiter kami ed sika.”​—1 Awa. 29:14.

6. Akin ya kaukolan so kuarta pian nagawaan iray kimey na Panarian natan, tan anto ray nitepet tayo?

⁶ Agpinilit di Moises tan David iray totoo na Dios ya mangiter. Noagta, mabulbulos iran angiter, nanlapud puso. Natan balet ey? Amta tayo ya kaukolan so kuarta pian nagawaan iray kimey na Panarian na Dios. Baleg so kaukolan pian ni-publish tan nibunog iray Biblia tan based Biblian literatura, pian nipaalagey tan namintina iray pasen a pandayewan tan pasilidad na branch, tan pian niiter so relief ed saray kaagian ya adalan na kalamidad. Kanian, nia ray pigaran importantin tepet: Panon ya napapawala iray kaukolan ya pundo? Kaukolan kasin piliten a mangiter iray papatumbok na Ari?

7, 8. Akin et agmipapayabol odino onkekerew na kuarta iray totoo nen Jehova?

⁷ Agbalot inalig di Brother Russell tan saray kakaiba to so gagawaen na saray simbaan na Kakristianoan ya panagkolektay kuarta. Diad samay komaduan isyu na Watch Tower diad heading ya “Do You Want ‘Zion’s Watch Tower’?,” inkuan nen Russell: “‘Parad sikami, susuportaan nen JEHOVA so ‘Zion’s Watch Tower, kanian agbalot itan mipayabol odino onkerew ed totoo. Sano samay angibagan: ‘Say pilak kayarian ko, say balitok kayarian ko’ et agla mangitarya na kaukolan  iran pundo, amta min panaon la pian itunda itan a publikasyon.” (Ag. 2:7-9) Kalabas na masulok ya 130 taon, siansia nin niiimprinta so The Watchtower tan onaaligwas so organisasyon ya mangipa-publish ed satan!

⁸ Agmipapayabol iray totoo nen Jehova. Ag-ira mangipapasa na platon pankolekta odino manso-solicit. Agmet ira mangoorganisa na bingo, tiangge, odino pa-raffle pian mamawalay pundo. Mipakna rad samay abayag lan imbaga na Watch Tower: “Agmin balot impasen ya duga so pan-solicit parad kimey na Katawan, a singa gagawaen na arum . . . Parad sikami, no say pundo et inalad nanduruman paraan na panagpayabol, makaopendi itan ed Katawan, kababaing ed sikato, tan agto bendisyonan iramay mangiiter odino say kimey a gagawaen.” *

9, 10. Antoy sakey a rason no akin ya boluntaryo itayon mandodonasyon?

⁹ Bilang uuleyan na Panarian, ag-itayo napipilitan a mangiter. Imbes, maliket tayon mangiiter na kuarta tan arum nin kaykayarian tayo pian nasuportaan iray kimey ed Panarian. Akin et mabulos itayon mangiiter? Imanoey taloran rason.

¹⁰ Unona, boluntaryo itayon mandodonasyon ta inaro tayo si Jehova tan labay tayon gawaen so “makapaliket ed imaton to.” (1 Juan 3:22) Naliliketan si Jehova ed lingkor ton mabulos ya mangiiter, manlapud puso. Imanoen tayoy imbaga nen apostol Pablo nipaakar ed panangiter na saray Kristiano. (Basaen so 2 Corinto 9:7.) Say tuan Kristiano et mabulos, aliwan napipilitan ya mangiter. Sikatoy mangiiter ta “ginetma to ed puso to.” * Labay ton ibaga, gawaen to itan kayari ton inaral no antoy kaukolan tan no panon to itan ya iter. Papablien nen Jehova so ontan ya lingkor to, lapud “aaroen na Dios so maliket a mangiiter.” Oniay nabasa tayod sananey ya patalos: “Inad-aro na Dios iray totoon labalabay day mangiter.”

11. Antoy mamapakiwas ed sikatayon iter so sankamaongan ya regalo ed si Jehova?

¹¹ Komadua, mandodonasyon tayo bilang pisasalamat ed si Jehova lapud dakel ya bendisyon to. Imanoey sakey a prinsipyo ed Mosaikon Ganggan ya makatulong pian naamtaay walad puso. (Basaen so Deuteronomio 16:16, 17.) Sano onatendid taloran tinaon ya piesta so kada Israelitan laki, kaukolan toy mangiter na regalo ‘unong ed impangasi nen Jehova’ ed sikato. Kanian, antis na piesta, kaukolan ya nodnonoten na kada laki iray bendisyon ed sikato tan aralen toy walad puso to, insan mandesisyon no antoy sankamaongan ya niregalo to. Mipadpara, sano nonodnonoten tayoy dakel  ya bendisyon nen Jehova ed sikatayo, napapakiwas tayon iter so sankamaongan ya regalo. Say interon puson panregalo, kaiba lay pandonasyon na kuarta tan kaykayarian, so mangipapanengneng ed kabaleg na apresasyon tayod saray bendisyon nen Jehova ed sikatayo.​—2 Cor. 8:12-15.

12, 13. Panon ya nipapanengneng ed boluntaryon donasyon tayo so panangaro tayod Ari, tan kaunongay iter na kada sakey?

¹² Komatlo, nipapanengneng tayoy panangarod Arin Jesu-Kristo diad boluntaryon pandonasyon. Akin ya nibaga tayo itan? Imanoen so imbaga nen Jesus ed saray disipulo to diad samay labi antis na impatey to. (Basaen so Juan 14:23.) “Siopaman a mangaaro ed siak, unoren toy salitak,” so kuan to. Kaibad ‘salita’ to so ganggan ya ipulong so maong a balita na Panarian ed interon dalin. (Mat. 24:14; 28:19, 20) Uunoren tayo itan a ‘salita’ diad panggaway anggaay nayarian tayon usarey panaon, kasil, tan kaykayarian tayo pian nasuportaay panagpulong ed Panarian. Diad ontan, nipapanengneng tayoy panangarod Mesianikon Ari.

 ¹³ On, bilang matoor ya uuleyan na Panarian, labay tayon ipanengneng so interon puson suporta ed satan diad pandonasyon. Panon tayon gagawaen itan? Personal itan a desisyon. Iter na balang sakey so nasarag to. Balet, mairap bilay so dakel ed saray kaagian tayo. (Mat. 19:23, 24; Sant. 2:5) Anggaman ontan, napapaseseg ira ta amta ran papablien nen Jehova tan na Anak to so anggan melag a donasyon ya nanlapud maliket a puso.​—Mar. 12:41-44.

14. Diad loob na dakel a taon, antoy kakaukolanen sano iyoopresi na Saray Tasi nen Jehova iray literatura?

¹⁴ Diad loob na dakel a taon, walay kontribusyon na saray based Biblian literatura ya iyoopresi na Saray Tasi nen Jehova. Melag labat so kontribusyon pian anggan saray mairap bilay et makala na literatura. Siempre, no interesado so katongtong, balet anggapoy kuarta to, maliket ya iter na saray publisher so literatura. Labalabay dan iter itan ed saray interesadon manbasa tan minabang ed satan.

15, 16. (a) Manlapu nen 1990, antoy in-adjust na Mananguley ya Ulop ed paraan na pangiyoopresi tayoy literatura? (b) Panon ya gagawaen so boluntaryon panagdonasyon? (Nengnengen met so kahon ya “ Iner so Lalaen na Donasyon Tayo?”)

¹⁵ Nen 1990, in-adjust na Mananguley ya Ulop so paraan na pangiyoopresi tayoy literatura. Ginmapod saman a taon ed America, iyoopresi so amin ya literatura tayo diad boluntaryon pandonasyon. Insulat ed amin ya kongregasyon ed America: “Iter ed saray publisher tan interesadon totoo iray magasin tan arum nin literatura ya ag-onkerew odino ipalikas ya ikdan ira labat no walay espisipikon kontribusyon da. . . . No labay da, nayari ran mandonasyon parad saray gastos ed kimey tayon panagbangat, balet siansia nin ikdan iray literatura, wala may donasyon da o anggapo.” Lapud satan ya uksoyan, alinewan ya boluntaryo tan relihyoso so kimey tayo tan ‘agtayo pannenegosyoan so salita na Dios.’ (2 Cor. 2:17) Asabi panaon, satan ya uksoyan a boluntaryon pandonasyon et ginawa met lad saray branch ed interon mundo.

¹⁶ Panon ya gagawaen so boluntaryon panagdonasyon? Diad saray Kingdom Hall na Saray Tasi nen Jehova, walad gilig iray contribution box. Nayari ya ipelag ditan iray donasyon odino direktan ipawit ed sakey ed saray legal ya ahensia ya uusaren na Saray Tasi nen Jehova. Kada taon, mangiiter na instruksion so Say Panag-bantayan no panoy boluntaryon pandonasyon.

17-19. Ipaliwawa no panon ya uusaren so pundo ya indonasyon parad (a) sankamundoan a kimey, (b) panagpaalagey na Kingdom Hall ed interon mundo, tan (c) lokal iran gastos na kongregasyon.

¹⁷ Sankamundoan a kimey. Uusaren iyan pundo parad saray gastos ed interon mundon panagpulong. Kaibad gastos so pangi-publish na saray literatura ya ibunog ed interon mundo, pangipaalagey tan panmintina ed saray branch office tan Bethel home, tan saray gastos ed nanduruman teokratikon eskuelaan. Ontan met, uusaren so pundo parad  saray misionero, ombiabiahen manangasikaso, tan espisyal payunir. Uusaren met iray donasyon tayo pian mangiter na relief ed saray kaagian ya adalan na kalamidad. *

¹⁸ Panagpaalagey na Kingdom Hall ed interon mundo. Uusaren so pundo pian tulongan iray kongregasyon ya makapampaalagey odino makapan-remodel na Kingdom Hall. Lapud naaawat iran kontribusyon, walan walay pundon nausar parad arum ni ran kongregasyon. *

¹⁹ Lokal iran gastos na kongregasyon. Uusaren iyan pundo pian nabayaran so amin a gastos ed Kingdom Hall. Nayari met ya irekomenda na saray elder ya ipawit so arum ya pundo ed branch office pian nasuportaan so kimey ed interon mundo. Diad onia ran uksoyan, mangipresenta iray elder na resolusyon ed kongregasyon. No naaprobaan, ipawit so nampaknaan ya kantidad. Kada bulan, iprepara na brother ya mangaasikasod saray account na kongregasyon so financial report ya ibasad kongregasyon.

20. Panon mon nigalang si Jehova panamegley na mablin kaykayarian mo?

²⁰ No ikonsidera tayoy amin ya nakaukolan pian nasumpal so panagpulong ed Panarian tan panaggaway babangatan ed interon mundo, napakiwas itayon ‘igalang si Jehova panamegley na kaykayarian tayo.’ (Uli. 3:9, 10) Kaibad mablin kaykayarian tayo so pisikal, mental, tan espiritual ya kayamanan. Seguradon labay tayon sigpot ya usaren iraya diad kimey na Panarian. Balet tandaan ya kaibad mablin kaykayarian tayo so materyal iran bengatla. Komon ta panggunaetan tayoy mangiter na nasarag tayo. No boluntaryo itayon mandodonasyon, napapagalangan si Jehova tan nipapanengneng tayoy suporta ed Mesianikon Panarian.