1, 2. (a) Kon Ruman Russell a kontestá un pastor ku kier a sa kon e aktividatnan di e Studiantenan di Beibel ta ser finansiá? (b) Kiko nos lo analisá den e kapítulo akí?

 UN BIAHA un pastor di Iglesia Reformá a aserká Ruman Charles T. Russell i a puntr’é kon nan ta finansiá e aktividatnan di e Studiantenan di Beibel.

 “Nunka nos no ta pasa kolèkt,” Ruman Russell a splik’é.

 “Kon boso ta yega na fondo anto?,” e pastor a puntr’é.

 “Si mi bisa bo e bèrdat, lo bo no kere,” Ruman Russell a kontest’é. “Ora hende bini nos reunionnan, nos no ta pusha un skalchi den nan kara. Nan mes ta mira ku tin gastu. Anto nan ta bisa den nan mes: ‘E lugá akí mester ta kosta algu . . . Kon mi por kontribuí un poko plaka na e kousa akí?’”

 En bèrdat e pastor no por a kere Ruman Russell.

 Ruman Russell a sigui bis’é: “Loke mi ta bisa bo ta e simpel bèrdat. Presis asina nan ta puntra mi: ‘Kon mi por kontribuí un poko plaka na e kousa akí?’ Ora un hende haña un di bon i e tin un poko sèn, e ke us’é pa Señor. Si e no tin sèn, pakiko nos mester primié pa duna algu?” a

² Ruman Russell realmente a bisa “e simpel bèrdat.” For di den pasado e pueblo di Dios ta konosí pa su kontribushonnan boluntario pa apoyá adorashon berdadero. Den e kapítulo akí nos lo analisá algun ehèmpel bíbliko di esaki huntu ku e historia di nos tempu. Segun ku nos ta konsiderá kon e aktividatnan di Reino ta ser finansiá awe, lo ta bon pa kada un di nos puntra nos mes: ‘Kon ami por demostrá ku mi ta apoyá e Reino?’

3, 4. (a) Ki konfiansa Yehova tin den su sirbidónan? (b) Kon e israelitanan a apoyá e konstrukshon di e tabernakel?

³ Yehova tin konfiansa den su sirbidónan. E sa ku ora nan haña e oportunidat, gustosamente nan ta demostrá nan deboshon na dje pa medio di nan kontribushonnan boluntario. Konsiderá dos ehèmpel di e historia di Israel.

⁴ Despues ku Yehova a saka e israelitanan for di Egipto, el a manda nan traha un tabernakel—un tènt portátil—pa rindi  adorashon na dje. Nan tabata bai tin mester di basta rekurso pa por a traha e tènt ei ku su aksesorionan. Yehova a instruí Moises pa duna e pueblo oportunidat di apoyá e proyekto, bisando: “Esun ku su kurason ta dispuesto, lag’é hiba [un] ofrenda pa SEÑOR.” (Éks. 35:5) Kon e pueblo akí, ku poko tempu promé “tabata amargá nan bida ku trabou pisá,” a reakshoná? (Éks. 1:14) Wèl, nan a apoyá e proyekto plenamente i a kontribuí boluntariamente ku oro, plata i otro kosnan balioso. Probablemente nan a haña gran parti di e kosnan balioso ei di nan doñonan anterior, e egipsionan. (Éks. 12:35, 36) E israelitanan a duna mas di loke tabata nesesario i dado momento mester “a stòp e pueblo di hiba mas.”—Éks. 36:4-7.

5. Kon e israelitanan a reakshoná ora David a duna nan oportunidat di kontribuí pa yuda ku konstrukshon di e tèmpel?

⁵ Un 475 aña despues, David a duna kontribushon for di su “propiedat personal” pa finansiá konstrukshon di e tèmpel, e promé sentro permanente di adorashon berdadero riba tera. Anto el a duna e otro israelitanan oportunidat di duna, puntrando nan: “Ken mas ta dispuesto pa hasi un donashon boluntario pa SEÑOR awe?” Kon e pueblo a reakshoná? “Nan a duna na SEÑOR boluntariamente i di henter nan kurason.” (1 Kró. 29:3-9, BPK ) David a rekonosé e berdadero fuente di e kontribushonnan ei, pasobra el a bisa Yehova den orashon: “Tur kos ta bini for di bo i ta for di bo man nos a duna bo.”—1 Kró. 29:14.

6. Dikon tin mester di fondo pa kumpli ku e trabou di Reino awe, i esei ta lanta kua pregunta?

⁶ Ni Moises ni David no tabatin nodi di pone preshon riba e pueblo di Dios pa nan duna. Al kontrario. E hendenan a duna di kurason. Kiko di awe? Nos ta bon konsiente di e echo ku mester di sèn pa kumpli ku e trabou ku e Reino di Dios ta hasiendo. Mester di basta fondo pa publiká i distribuí Beibel i literatura bíbliko, pa traha i mantené lugánan di reuní i sukursalnan i pa duna ousilio na rumannan ora di kalamidat. Esei ta lanta algun pregunta importante: Kon nos ta yega na e fondonan nesesario? Mester preshoná siguidónan di e Rei pa nan duna?

7, 8. Dikon e pueblo di Yehova no ta kana pidi sèn?

⁷ Ruman Russell ku su kompañeronan a nenga di usa e trikinan pa rekoudá fondo ku tabata asina komun den e iglesianan di kristiandat. Den e di dos edishon di E Toren di Vigilansia, bou di e suptema “Bo Ke e ‘Toren di Vigilansia’?” Russell a deklará: “Nos ta kere ku ta YEHOVA ta esun ku ta sostené e ‘Toren di Vigilansia,’ i miéntras ku esei ta e kaso, hamas nos lo roga ni pidi hende sosten. Ora Esun ku ta bisa: ‘Tur oro i plata di e serunan ta di mi,’ stòp di perkurá e  fondonan nesesario, nos lo komprondé ku ta tempu pa stòp ku e publikashon.” (Ageo 2:7-9) Mas ku 130 aña despues, E Toren di Vigilansia i e organisashon ku ta publik’é te ainda ta tánkatan!

⁸ E pueblo di Yehova no ta kana pidi sèn. Nan no ta pasa kolèkt ni ta manda karta pa pidi donashon. Tampoko nan no ta pone wega di bingo, tene bazar òf loteria pa rekoudá fondo. Nan ta tene nan na loke E Toren di Vigilansia a bisa hopi tempu pasá: “Nunka nos no a haña ku ta apropiá pa kana pidi sèn pa apoyá e trabou di Señor, manera otronan tin kustumber di hasi . . . Nos ta di opinion ku e plaka ku hende ta rekoudá mediante e diferente formanan di pidi limosna den nòmber di nos Señor ta ofensivo i inaseptabel den su bista; e no ta bendishoná ni e hendenan ku ta duna ni e trabou ku ta ser hasí ku e plaka ei.” b

9, 10. Menshoná un motibu pakiko nos ta duna kontribushon boluntario.

⁹ Komo siudadano di Reino awe, niun hende no tin nodi di fòrsa nos pa duna. Al kontrario. Gustosamente nos ta usa nos sèn i otro rekursonan pa apoyá aktividatnan di Reino. Dikon nos ta asina dispuesto pa duna? Pa e siguiente tres motibunan.

¹⁰ Di promé, nos ta duna kontribushon boluntario pasobra nos ta stima Yehova i ke “hasi loke ta agradabel den su bista.” (1 Huan 3:22) Anto un kos ta sigur, Yehova ta keda masha kontentu ku un sirbidó di dje ku ta duna libremente, di kurason. Laga nos analisá loke apòstel Pablo a skirbi tokante dunamentu kristian. (Lesa 2 Korintionan 9:7.) Un kristian berdadero no ta un hende ku ta duna fòrsá ni kontra su deseo. Mas bien, e ta duna pasobra “el a disidí den su kurason” di hasi esei. c Es desir, e ta duna despues ku el a reflekshoná riba un nesesidat ku tin i riba kon e por satisfasé esei. Yehova ta apresiá un dunadó asina, pasobra “Dios ta stima hende ku ta duna ku alegria.” Un otro tradukshon di Beibel ta bisa: “Dios stima hende ku gusta duna.”

11. Kiko ta motivá nos pa duna Yehova e mihó regalo ku nos por dun’é?

¹¹ Di dos, nos ta duna kontribushon material komo muestra di nos gratitut na Yehova pa e tantísimo bendishonnan ku nos ta haña. Konsiderá un prinsipio den e Lei di Moises ku a stimulá hende pa saminá nan kurason. (Lesa Deuteronomio 16:16, 17.) Tur hòmber israelita mester a asistí na e tres fiestanan anual, i nan mester a duna un regalo ‘konforme e bendishon ku Yehova’ a duna nan. Pues, promé ku kada hòmber a bai e fiesta, e mester a konta kuantu bendishon el a haña i saminá su kurason pa asina disidí kiko ta e mihó regalo ku e por a hiba pa Yehova. Meskos ta konta pa nos. Ora  nos reflekshoná riba e tantísimo maneranan ku Yehova a bendishoná nos, nos ta sinti nos motivá pa dun’é lo mihó ku nos tin. Nos regalo ta un refleho di kuantu nos ta apresiá e bendishonnan ku Yehova a drama riba nos. Nos ta dun’é di kurason i esei ta inkluí nos kontribushonnan material.—2 Kor. 8:12-15.

12, 13. Kon nos kontribushonnan boluntario ta demostrá nos amor pa e Rei, i kuantu kada ken ta duna?

¹² Di tres, via nos kontribushonnan boluntario nos ta demostrá nos amor pa Rei Hesukristu. Kon asina? Tuma nota di loke Hesus a bisa su disipelnan e último anochi di su bida riba tera. (Lesa Huan 14:23.) E di: “Si un hende ta stima mi, lo e kumpli ku mi palabra.” E “palabra” di Hesus ta inkluí e mandato pa prediká e bon notisia di Reino den henter e tera. (Mat. 24:14; 28:19, 20) Nos ta kumpli ku e “palabra” ei dor di hasi tur loke ta na nos alkanse—usando nos tempu, energia i rekursonan material—pa promové e trabou di Reino. Asina nos ta demostrá nos amor pa e Rei Mesiániko.

 ¹³ Pues, komo siudadano leal di e Reino, nos ke demostrá di henter nos kurason ku nos ta apoyá e Reino dor di duna kontribushon finansiero. Kuantu kada un di nos ta kontribuí? Esei ta un desishon personal. Kada ken ta duna lo mihó ku e por. Ma hopi di nos rumannan tin masha poko rekurso. (Mat. 19:23, 24; Sant. 2:5) Un kos ku por konsolá e rumannan ei ta ku Yehova ku su Yu ta apresiá asta e kontribushonnan chikitu ku hende ta duna boluntariamente di nan kurason.—Mar. 12:41-44.

14. Pa hopi aña, kon Testigunan di Yehova tabata ofresé nan literatura?

¹⁴ Pa hopi aña, Testigunan di Yehova tabata ofresé literatura bíbliko a base di un kontribushon ku nan tabata tene mas abou posibel, ya asina asta hende ku no tabatin masha sèn por a haña nos literatura. Klaru ku si un doño di kas a mustra interes pero no tabatin moda di kontribuí, e publikadónan di Reino tabata dispuesto pa laga e literatura kuné. Nan deseo tabata pa sòru pa e literatura yega den man di hende sinsero ku por a les’é i benefisiá di dje.

15, 16. (a) Na 1990, kon Kuerpo Gobernante a kuminsá ahustá e manera ku nos tabata ofresé nos literatura? (b) Kon hende ta hasi donashon boluntario? (Wak tambe e kuadro “ Kiko Ta Pasa ku Nos Donashonnan?”)

¹⁵ Na 1990, Kuerpo Gobernante a kuminsá ahustá e manera ku nos ta ofresé nos literatura. E aña ei na Merka, e rumannan a kuminsá ofresé tur literatura kompletamente a base di donashon. Un karta dirigí na tur kongregashon den e pais a splika: “Nos lo suministrá revista i literatura na publikadónan i na e públiko interesá sin pidi, i sin sikiera sugerí, un kontribushon spesífiko komo kondishon pa risibí un publikashon. . . . Ken ku ke hasi un donashon pa kubri e gastunan di nos obra edukativo por hasi esei, pero nan por haña e literatura sea ku nan hasi un donashon òf nò.” E areglo ei a sirbi pa klarifiká e karakter boluntario i religioso di nos obra i pa mustra bon kla ku “nos no ta hasi negoshi ku e palabra di Dios.” (2 Kor. 2:17) Ku tempu a implementá e areglo di donashon boluntario rònt mundu.

¹⁶ Kon hende ta hasi donashon boluntario? Den kada Salòn di Reino di Testigunan di Yehova tin kaha di kontribushon poné diskretamente. Un persona por tira su donashon ei den òf mand’é direktamente na un di e entidatnan legal ku Testigunan di Yehova ta usa. Tur aña ta sali un artíkulo den E Toren di Vigilansia ku ta splika kon un hende por hasi e tipo di donashonnan boluntario ei.

17-19. Splika kon nos ta usa e fondonan ku nos haña (a) pa e obra mundial, (b) pa konstrukshon mundial di Salòn di Reino i (c) pa kubri e gastunan di e kongregashon lokal.

¹⁷ Obra mundial. Nos ta usa e fondonan pa kubri e gastunan enbolbí den kumpli ku e trabou di prediká mundialmente. E gastunan akí ta enserá e kosto pa hasi vários kos,  entre otro, pa produsí literatura pa distribushon mundial, pa traha i mantené sukursalnan i kasnan di Bètel i pa tene vários skol bíbliko. Ademas, nos ta usa e fondonan pa perkurá pa e misioneronan, superintendentenan di sirkuito i pioneronan spesial. Tambe nos ta usa nos donashonnan pa duna ousilio na rumannan ora di kalamidat. d

¹⁸ Konstrukshon mundial di Salòn di Reino. Nos ta usa fondo pa yuda e kongregashonnan traha òf renobá Salòn di Reino. Segun ku e kontribushonnan ta drenta, por pone mas fondo disponibel pa yuda otro kongregashonnan. e

¹⁹ Gastunan di e kongregashon lokal. Nos ta usa fondo pa kubri e gastunan pa usa i mantené e Salòn di Reino. E ansianonan lo por rekomendá pa manda algun fondo pa e sukursal lokal pa yuda promové e obra mundial. Den kasonan asina, e ansianonan ta presentá un resolushon na e kongregashon. Si e kongregashon aprob’é, nan lo manda e fondonan ku a rekomendá. Tur luna, e ruman ku ta atendé ku kuenta di kongregashon ta prepará un informe finansiero ku ta ser lesá pa e kongregashon.

20. Kon bo por onra Yehova ku bo “rikesa”?

²⁰ Ora nos reflekshoná riba tur loke e trabou mundial di prediká e Reino i di hasi disipel ta enserá, nos ta sinti nos motivá pa ‘onra Yehova ku nos rikesa.’ (Pro. 3:9, 10) Nos rikesa ta enserá nos kapasidatnan físiko, mental i spiritual. Definitivamente nos ke usa nan plenamente den e obra di Reino. Pero kòrda ku nos rikesa ta inkluí tambe nos rekursonan material. Laga nos ta determiná pa duna loke nos por, ora nos por. Nos donashonnan boluntario ta trese onor pa Yehova i ta demostrá ku nos ta apoyá e Reino Mesiániko.