1, 2. (a) Wahashu Russell o fhindula hani mufunzi we a vha a tshi ṱoḓa u ḓivha nga ha nḓila ine mishumo ya Vhagudi vha Bivhili ya tikedzwa ngayo? (b) Ndi mini zwine ra ḓo zwi haseledza kha yeneyi ndima?

 ḼIṄWE ḓuvha Wahashu Charles T. Russell o ḓelwa nga mufunzi wa Kereke ya Reformed, onoyo mufunzi o vha a tshi ṱoḓa u ḓivha nḓila ine mishumo i itwaho nga Vhagudi vha Bivhili ya tikedzwa ngayo nga tshelede.

 Wahashu Russell a ṱalutshedza uri: “A ri vhuyi ra ita kose-kose.”

 Onoyo mufunzi a vhudzisa a ri: “Ni wana hani tshelede?”

 Wahashu Russell a fhindula a ri: “Arali nda ni vhudza ngoho ni nga si tende. Musi vhathu vha tshi ḓa miṱanganoni yashu, a vha vhoni tshigoḓelo tsha u longela tshelede tshine tsha pfukiswa phanḓa havho. Fhedzi vha a zwi vhona uri hu ṱoḓea tshelede. Vha ḓivhudza uri, ‘Ho ṱoḓea tshelede u itela u fhaṱa heyi holo . . . Ndi nga ṋeela hani?’”

 Onoyo mufunzi a lavhelesa Wahashu Russell o mangala.

 Russell a dovha a ri: “Ndi khou ni vhudza ngoho yo fhelelaho. Na vhenevho vhathu vhane vha ḓa miṱanganoni vha mmbudzisa uri ‘Ndi nga tikedza hani uyu mushumo?’ Musi muthu e na zwiṱuku-ṱuku zwe a fhaṱutshedzwa ngazwo, u ṱoḓa u zwi shumisela Murena. Arali a si na tshelede, ri nga mu kombetshedzelani uri a i bvise?” a

² Vhukuma, Wahashu Russell o vha a tshi khou amba “ngoho yo fhelelaho.” Ndi kale vhathu vha Mudzimu vha tshi ṋeela nga u ḓifunela u itela u tikedza vhurabeli ha ngoho. Kha yeneyi ndima ri ḓo ṱolisisa dziṅwe tsumbo dza Maṅwaloni khathihi na dza ḓivhazwakale yashu ya musalauno. Musi ri tshi ṱolisisa nḓila ine mishumo ya Muvhuso ya tikedzwa ngayo nga tshelede ṋamusi, zwi ḓo vha zwavhuḓi uri muṅwe na muṅwe a ḓivhudzise uri, ‘Ndi nga sumbedza hani uri ndi tikedza Muvhuso?’

3, 4. (a) Yehova u na fulufhelo ḽifhio nga vhagwadameli vhawe? (b) Vhaisiraele vho tikedza hani u fhaṱwa ha nnḓu ya mulanga?

³ Yehova u fulufhela vhagwadameli vhawe vha ngoho. U a zwi ḓivha uri arali vha ṋewa tshibuli, vha nga sumbedza u ḓikumedza havho nga u ṋeela nga u ḓifunela. Ṱhogomelani tsumbo mbili dza ḓivhazwakale ya Isiraele.

 ⁴ Musi Yehova o no bvisa Vhaisiraele ngei Egipita, o vha vhudza uri vha fhaṱe dennde ḽi hwaleaho kana thebenekele ya vhurabeli. Ho vha hu tshi ḓo ṱoḓea tshelede nnzhi u fhaṱa tshenetsho tshifhaṱo na u ita thundu dzatsho. Yehova o laedza Mushe uri a ṋee vhathu tshibuli tsha uri vha tikedze wonoyo mushumo, a ri: “Nnyi na nnyi a ḓise mpho ya Yehova nga hune mbilu yawe ya funa.” (Ek. 35:5) Vhathu vhe vha vha vha tshi kha ḓi tou bva kha “vhupuli he vha hweswa nga vhuhali,” vho aravha hani? (Ek. 1:14) Vho tikedza wonoyo mushumo nga mbilu yoṱhe vha ṋeela musuku, siliva na zwiṅwe zwithu zwa thengo khulu—nahone vhunzhi ha zwenezwo zwithu vho vha vho zwi wana kha Vhaegipita, vhaṋe vhavho vha kale. (Ek. 12:35, 36) Vhaisiraele vho ṋeela nga zwithu zwinzhi zwe zwa vha zwi tshi ṱoḓea vha ita na u ‘thivhelwa u ḓisa dzimpho.’—Ek. 36:4-7.

5. Vhaisiraele vho aravha hani musi Davida a tshi vha ṋea tshibuli tsha u ṋeela u itela u fhaṱa thembele?

⁵ Nga murahu ha miṅwaha ya 475, Davida o ṋeela nga ‘zwawe’ u itela u tikedza u fhaṱwa ha thembele, ye ya vha i tshifhaṱo tsha u thoma tshi tshoṱhe tsha vhurabeli ha ngoho kha ḽifhasi. Nga murahu, a ṋea Vhaisiraele ngae tshibuli tsha u ṋeela, a vha vhudzisa a ri: “Ndi nnyi kha vho-inwi ane ṋamusi a ḓi-funga a ṋea Yehova nga tshanḓa tshawe?” Vhathu vha tshi aravha vha “ṋea Yehova nga mbilu-mbuya.” (1 Koron. 29:3-9) Nge Davida a vha a tshi ḓivha hune miṋeelo ya bva hone zwa vhukuma, o rabela Yehova a ri: ‘Zwoṱhe zwi bva ha Iwe ri U ṋea zwe zwa bva zwanḓani zwau.’—1 Koron. 29:14.

6. Ndi ngani hu tshi ṱoḓea tshelede uri mushumo wa Muvhuso u itwe ṋamusi, nahone hu takuwa mbudziso dzifhio?

⁶ Mushe na Davida a vho ngo kombetshedza vhathu vha Mudzimu uri vha ṋeele. Nṱhani hazwo, vhathu vho ṋeela nga u ḓifunela zwi tshi bva mbiluni. Hu pfi mini ṋamusi? Ri a zwi ḓivha zwavhuḓi-vhuḓi uri mushumo une wa khou itwa nga Muvhuso wa Mudzimu u ṱoḓa tshelede. Hu ṱoḓea tshelede nnzhi u gandisa na u phaḓaladza Dzibivhili na khandiso dzo thewaho Bivhilini, u fhaṱa na u ṱhogomela zwifhaṱo zwa miṱangano na zwa davhi na u phalala vhatendi nga riṋe nga zwifhinga zwa khombo. Nga zwenezwo, hu takuwa mbudziso dza ndeme: Tshelede i ṱoḓeaho i wanala hani? Naa vhatevheli vha Khosi vha fanela u tou kombetshedzwa uri vha ṋeele?

7, 8. Ndi ngani vhathu vha Yehova vha sa humbeli tshelede kana u luvheledza vhaṅwe vhathu uri vha vha ṋee tshelede?

⁷ Wahashu Russell na khonani dzawe a vho ngo edzisa maitele a u wana tshelede yo engedzeaho ane a anzela u itwa nga kereke dza Vhudzhagane. Kha khandiso ya vhuvhili ya magazini une wa pfi Watch Tower, nga fhasi ha tshiṱoho tshine tsha ri, “Naa Ni Ṱoḓa ‘Zion’s Watch Tower’?” Russell o ri: “Ri tenda uri ‘Zion’s Watch Tower’ i tikedzwa nga YEHOVA, nahone nga nṱhani ha zwenezwo i nga si vhuye ya humbela kana u luvheledza vhathu uri vha i tikedze. Musi Ene ane a ri: ‘Maseṱha na musuku ndi zwanga,’  a tshi kundwa uri ṋea masheleni a ṱoḓeaho, ri ḓo zwi pfesesa uri ndi tshifhinga tsha u litsha u bveledza wonoyu magazini.” (Hag. 2:7-9) Ho no fhela miṅwaha i fhiraho 130 nahone magazini wa Tshiingamo na ndangulo ine ya u gandisa zwi kha ḓi bvela phanḓa zwo khwaṱha!

⁸ Vhathu vha Yehova a vha humbeli tshelede. A vha pfukisi zwigoḓelo zwa kose-kose kana u rumela marifhi a u humbela tshelede. A vha kuvhanganyi masheleni nga u tamba mitambo ya tshelede kana nga u bvisa tshafumi u fana na dziṅwe kereke. Vha dzula vho farelela kha zwe zwa ambiwa kale nga magazini une wa pfi Watch Tower, we wa ri: “Ri vhona zwi songo tea na luthihi u humbela tshelede ya u tikedza mushumo wa Murena, u fana na dziṅwe dzikereke . . . Ri humbula uri u ṱoḓa tshelede nga maitele o fhamba-fhambanaho ri tshi khou shumisa dzina ḽa Murena washu zwi nga mu sinyusa, a nga si zwi ṱanganedze nahone zwi nga si ite uri a fhaṱutshedze vhaṋei vha yeneyo tshelede kana mushumo une wa khou itwa.” b

9, 10. Ndi tshifhio tshiṅwe tshiitisi tshine tsha ita uri ri ṋeele nga u ḓifunela?

⁹ Samusi ri vhavhusiwa vha Muvhuso ṋamusi, a zwi vhuyi zwa ṱoḓa uri ri tou kombetshedzwa uri ri ṋee. Nṱhani hazwo, ri takalela u shumisa tshelede na dziṅwe thundu dzashu u itela u tikedza mishumo ya Muvhuso. Ndi ngani ri tshi ṋea nga u ḓifunela? Kha ri ṱhogomele zwiitisi zwiraru.

¹⁰ Tsha u thoma, ri ṋeela nga u ḓifunela nga nṱhani ha uri ri funa Yehova nahone ri ṱoḓa u ita “zwine zwa mu takadza.” (1 Yoh. 3:22) Vhukuma, Yehova u takalela mugwadameli ane a ṋea zwi tshi bva mbiluni. Kha ri ṱolisise maipfi a muapostola Paulo malugana na u ṋea ha Vhukriste. (Vhalani 2 Vhakorinta 9:7.) Mukriste wa ngoho ha koloṅwi kana u kombetshedzea u ṋea. Nṱhani hazwo, u ṋea nga nṱhani ha uri o “phetha mbiluni yawe” u ita nga u ralo. c Zwenezwo zwi amba uri u ṋea nge a ṱhogomela uri hu na ṱhoḓea nahone a ṱoḓa nḓila ya u thusa. Yehova u funa muṋei o raloho, nga nṱhani ha uri “Mudzimu u funa ane a ṋea o takala.” Iṅwe ṱhalutshedzelo i ri: “Mudzimu u funa vhathu vhane vha funa u ṋea.”

11. Ndi mini tshine tsha ri sudzulusela uri ri ṋee Yehova tshifhiwa tsha nṱhesa?

¹¹ Tsha vhuvhili, ri bvisa miṋeelo hu u itela u sumbedza u livhuha phaṱhutshedzo nnzhi dzine Yehova a ri ṋea dzone. Ṱhogomelani maitele ane a ita uri ri ḓifhenḓe mbilu a wanalaho kha Mulayo wa Mushe. (Vhalani Doiteronomio 16:16, 17.) Musi munna muṅwe na muṅwe wa Muisiraele a tshi ya vhuṱamboni ha ṅwaha muṅwe na muṅwe, o vha a tshi fanela u ṋea tshifhiwa tsho “eḓanaho phaṱhutshedzo ye Yehova” a mu ṋea yone. Nga zwenezwo, munna muṅwe na muṅwe a sa athu u ya kha honoho vhuṱambo, o vha a tshi fanela u humbula nga zwe a fhaṱutshedzwa ngazwo na u ṱolisisa mbilu yawe uri a vhone tsha khwine-khwine  tshine a nga ṋeela ngatsho. Zwi fanaho na zwenezwo, musi ri tshi elekanya nḓila nnzhi dze Yehova a ri fhaṱutshedza ngadzo, ri pfa ri tshi sudzuluselwa u mu ṋea tshifhiwa tsha nṱhesa. Tshifhiwa tshashu tshi bvaho mbiluni, tshi katelaho miṋeelo yashu ya zwithu zwi vhonalaho, tshi sumbedza nḓila ine ra dzhiela ngayo nṱha phaṱhutshedzo dzine Yehova a ri ṋea dzone.—2 Vhakor. 8:12-15.

12, 13. Miṋeelo yashu ya u ḓifunela i sumbedza hani uri ri funa Khosi nahone muṅwe na muṅwe u fanela u ṋeela zwingafhani?

¹² Tsha vhuraru, nga miṋeelo yashu ya u ḓifunela, ri vha ri tshi khou sumbedza uri ri funa Khosi Yesu Kristo. Nga nḓila-ḓe? Ṱhogomelani zwe Yesu a zwi vhudza vhafunziwa vhawe vhusiku ha u fhedza ha vhutshilo hawe kha ḽifhasi. (Vhalani Yohane 14:23.) Yesu o ri: “Arali muthu a tshi mpfuna u ḓo vhulunga fhungo ḽanga.” “Fhungo” ḽa Yesu ḽi katela ndaela yawe ya uri hu huwelelwe mafhungo maḓifha a Muvhuso ḽifhasini ḽoṱhe. (Mat. 24:14; 28:19, 20) Ri vhulunga ḽeneḽo “fhungo” nga u ita zwoṱhe zwi re maanḓani ashu—nga u shumisa tshifhinga tshashu, nungo dzashu na thundu dzashu dzi vhonalaho—u tikedza mushumo wa u huwelela nga ha Muvhuso. Nga zwenezwo, ri vha ri tshi khou sumbedza uri ri funa Khosi ya Vhumessia.

 ¹³ Vhukuma, samusi ri vhavhusiwa vha Muvhuso vha fulufhedzeaho, ri ṱoḓa u sumbedza uri ri a tikedza Muvhuso zwi tshi bva mbiluni nga u bvisa miṋeelo. Ri tea u bvisa muṋeelo mungafhani? Yeneyo ndi phetho ya muthu nga eṱhe. Muṅwe na muṅwe u ṋea nga hune a nga kona ngaho. Naho zwo ralo, vhunzhi ha vhatendi nga riṋe a vha na zwinzhi zwa shango ḽino. (Mat. 19:23, 24; Yak. 2:5) Fhedzi vhathu vho raloho vha nga khuthadzwa nga u ḓivha uri Yehova na Murwa wawe vha a dzhiela nṱha zwiṱuku-ṱuku zwi bvaho mbiluni zwine vha ṋeela ngazwo.—Marko 12:41-44.

14. Lwa miṅwaha minzhi, Ṱhanzi dza Yehova vho vha vha tshi tshimbidza hani khandiso dzavho?

¹⁴ Lwa miṅwaha minzhi, Ṱhanzi dza Yehova vho vha vha tshi ṋea vhathu khandiso dzo thewaho Bivhilini musi vho thoma vha bvisa tshelede. Tshelede ya hone yo vha i ṱhukhu lwe na vhathu vha si na zwavho vha vha vha tshi kona u wana khandiso. Ndi ngoho uri arali ṋemuḓi a tshi vhonala e na dzangalelo, fhedzi a si na tshelede, vhahuweleli vha Muvhuso vho vha vha tshi mu ṋea khandiso. Vhahuweleli vho vha vha tshi tama nga mbilu yoṱhe u siela khandiso vhathu vha re na dzangalelo vhane vha nga dzi vhala na u vhuyelwa ngadzo.

15, 16. (a) Tshigwada tshi Langaho tsho ita tshanduko ifhio nga 1990 malugana na nḓila ine ra tshimbidza ngayo khandiso dzashu? (b) Miṋeelo ya u ḓifunela i itwa nga nḓila-ḓe? (Sedzani na bogisi “ Miṋeelo Yashu I Shumiswa Hani?”)

¹⁵ Nga 1990, Tshigwada tshi Langaho tsho thoma u ita tshanduko ya nḓila ine khandiso dzashu dza tshimbidzwa ngayo. U thoma nga wonoyo ṅwaha ngei United States, khandiso dzoṱhe dzo thoma u tshimbidzwa nga muṋeelo wa u ḓifunela. Vhurifhi he ha ṅwalelwa zwivhidzo zwoṱhe kha ḽeneḽo shango ho ṱalutshedza uri: “Magazini na khandiso zwi ḓo ṋewa vhahuweleli na vhathu vha re na dzangalelo nahone a vha nga humbelwi uri vha thome vha bvise tshelede yo tiwaho uri vha wane khandiso. . . . Muṅwe na muṅwe ane a takalela u ṋeela nga u ḓifunela hu u itela u badela tshinyalelo dza mushumo washu wa u funza a nga ita nga u ralo, fhedzi vhathu vha nga wana khandiso hu sa londwi uri vho ṋeela kana a vho ngo ṋeela.” Yeneyo nzudzanyo yo sumbedza uri mushumo washu ndi wa u ḓifunela na u ḓikumedza na u zwi bvisela khagala uri “a ri vhavhambadzi vha ipfi ḽa Mudzimu.” (2 Vhakor. 2:17) Nga u ya ha tshifhinga, yeneyo ndugiselelo ya muṋeelo wa u ḓifunela yo mbo ḓi thomiwa madavhini u mona na shango.

¹⁶ Miṋeelo ya u ḓifunela i itwa nga nḓila-ḓe? Holoni dza Muvhuso dza Ṱhanzi dza Yehova hu na mabogisi a miṋeelo ya u ḓifunela o vhewaho tshidele. Vhathu vha nga longela miṋeelo ya u ḓifunela khao kana vha i rumela nga ho livhaho kha ḽiṅwe ḽa madzangano a lwa mulayo ḽi shumiswaho nga Ṱhanzi dza Yehova. Ṅwaha muṅwe na muṅwe hu vha na thero kha Tshiingamo i ambaho nga ha nḓila ine miṋeelo ya u ḓifunela ya nga itwa ngayo.

17-19. Ṱalutshedzani nḓila ine miṋeelo ya u ḓifunela ya shumiswa ngayo u itela (a) mushumo wa shango ḽoṱhe, (b) u fhaṱwa ha Holo dza Muvhuso shangoni ḽoṱhe na (c) tshinyalelo dza tshivhidzo.

¹⁷ Mushumo wa shango ḽoṱhe. Tshelede i shumiselwa u badela tshinyalelo dza mushumo wa u huwelela une wa itwa shangoni  ḽoṱhe. Dzenedzo tshinyalelo dzi katela tshelede ine ya ṱoḓea hu u itela u bveledza khandiso dza u tshimbidza shangoni ḽoṱhe, u fhaṱa na u ṱhogomela ofisi dza davhi na mahaya a Bethele na u ṱhogomela tshinyalelo dza zwikolo zwa lwa ṱaḓulu zwo fhamba-fhambanaho. Zwiṅwe hafhu, yeneyi tshelede i shumiselwa u ṱhogomela tshinyalelo dza vharumiwa, vhalavhelesi vha dalelaho, na vhavulanḓila vho khetheaho. Miṋeelo yashu ya u ḓifunela i dovha ya shumiselwa u phalala vhatendi nga riṋe nga zwifhinga zwa khombo. d

¹⁸ U fhaṱiwa ha Holo dza Muvhuso shangoni ḽoṱhe. Tshelede i shumiselwa u thusa zwivhidzo u fhaṱa kana u vusulusa Holo dza Muvhuso. Musi miṋeelo i tshi khou ḓi dzhena, miṅwe i nga bviswa hu u itela u thusa zwiṅwe zwivhidzo. e

¹⁹ Tshinyalelo dza tshivhidzo. Tshelede i shuma u badela tshumelo dza Holo ya Muvhuso. Vhahulwane vha nga themendela uri iṅwe tshelede i rumelwe ofisini ya davhi ya hune vha dzula hone, uri i shumiselwe u isa phanḓa mushumo wa shango ḽoṱhe. Kha vhuimo ho raloho, vhahulwane vha ḓo ita fhungo ḽikumedzwa tshivhidzoni. Arali fhungo ḽikumedzwa ḽa ṱanganedzwa, tshelede ye tshivhidzo tsha tendelana ngayo i ḓo rumelwa. Ṅwedzi muṅwe na muṅwe, wahashu ane a ṱhogomela masheleni a tshivhidzo u ṅwala muvhigo wa dzitshelede une wa vhalelwa tshivhidzo.

20. Ni nga ṋea hani Yehova vhugala nga ‘lupfumo lwaṋu’?

²⁰ Musi ri tshi ṱhogomela zwoṱhe zwine zwa katelwa kha u ita mushumo wa u huwelela nga ha Muvhuso na wa u ita vhafunziwa ḽifhasini ḽoṱhe, ri sudzuluselea u “hulisa Yehova nga zwi re lupfumo lwa[shu].” (Mir. 3:9, 10) Zwi re lupfumo lwashu zwi katela maanḓa ashu, muhumbulo washu na vhumuya hashu. Vhukuma, ri fanela u shumisa zwenezwo zwithu nga vhuḓalo kha mushumo wa u huwelela nga ha Muvhuso. Ri songo hangwa uri zwithu zwi re lupfumo lwashu zwi katela na thundu dzashu dzi vhonalaho. Kha ri ḓiimisele u ṋea zwine ra nga kona, musi ri tshi kha ḓi kona u ita nga u ralo. Miṋeelo yashu ya u ḓifunela i hulisa Yehova nahone i sumbedza uri ri tikedza Muvhuso wa Vhumessia.