1, 2. 1) Jehová Diosan servirinakapajja, ¿kunsa nayratpachajj wali kusisit lurapjjäna? 2) ¿Kunas Diosatakejj jukʼamp askejja?

 DIOSAR taqe chuyma servirinakajja, wali kusisitaw nayratpachajj Jehová Diosan sutip jachʼañchir yupaychañ utanak lurawayapjje. Sañäni, tabernáculo lurasiñapatakejja, taqe chuymaw israelitanakajj irnaqtʼapjjäna ukat yänakapampis yanaptʼapjjarakïnwa (Éxo. 35:30-35; 36:1, 4-7).

² ¿‘Kunanakampitï aka yupaychañ utajj lurasiwayki ukanakaw jachʼañchitu’ sasat Jehová Diosajj sispacha? Janiwa. Ukat ukanakas janirakiw Jupatakejj jukʼamp wakiskirïkiti (Mat. 23:16, 17). Jan ukasti, kunjamsa servirinakapajj Jupar yupaychapjje ukaw Diosatakejj jukʼamp askejja, ukat sipansa janiw kunas Jupar jukʼamp jachʼañchkaspati. Yanaptʼañ munir chuymanïñasa ukat Jupatak wal irnaqtʼañ munañasa, Diosatakejj wali askipuniwa (Éxo. 35:21; Mar. 12:41-44; 1 Tim. 6:17-19). ¿Kunatsa uk yatiñajj wakisi? Utanakajj janiw wiñayatakïkiti. Amuytʼañataki, tabernaculosa templosa janiw jichhürunakan utj-jjeti, ukampis uka utanakan taqe chuym irnaqtʼapkäna ukat yänakapamp yanaptʼapkäna uka servirinakapatjja, Diosajj janipuniw armaskiti (1 Corintios 15:58 ukat Hebreos 6:10 liytʼañataki).

3. ¿Kunsa aka yatichäwin yatjjataskañäni?

³ Jichhürunakanjja, Jehová Diosan servirinakapajj ukhamarakiw Jupar yupaychañatak utanak lurañatakejj wal chʼamachastanjja. Ukat Jesucristo Reyisamp pʼeqtʼatajj kuntï jichhakam lurasiwayki ukanak uñjañajja, wali muspharkañawa. Cheqas Jehová Diosaw chʼamachasitasar bendeciwayi (Sal. 127:1). Tantachasiñ Utanak lurasajj kunas jikjjatasiwayi ukat kunjamsa ukanakajj Jehová Diosar jachʼañchawayi, ukwa aka yatichäwin mä qawqhanak uñjaskañäni. Ukat uka utanak lurasiñapatak yanaptʼawayapki uka jilat kullakanakat yaqhepajj kamsapjjesa ukwa uñjaskarakiñäni.

4. 1) ¿Kunatsa Diosar yupaychañatak jukʼamp utanakajj munasi? 2) ¿Kunatsa yaqhep sucursalanakajj jistʼantasiwayi? (“ Wakisitarjamaw sucursalanakajj lurasi” siski uka recuadro uñjjattʼäta.)

⁴ Kunjamtï 16 yatichäwin uñjaniwayktanjja, Jupar yupaychañasataki tantachasiñaswa Diosajj muni (Heb. 10:25).  Cheqas Jehová Diosar jukʼamp confiyañataki ukat Jupan arunakap jukʼamp yatiyañ munañasatakiw tantachäwinakajj yanaptʼistu. Ukat niyakejjay akapachan tukusiñapajj wali jakʼankchejja, jukʼamp yatiyapjjañapatakiw Jehová Diosajj servirinakapar chʼamañchtʼaski. Ukatwa sapa marajj waranq waranqa jaqenakajj Diosan markapar mantasipki (Isa. 60:22). Cheqansa, Diosan Reinopamp apnaqatäpki uka jaqenakajj urut urutjamaw jukʼamp jiljjattaski, ukhamajj Bibliat apstʼat qellqatanak lurañataki imprentanakasa ukat Diosar yupaychañatak utanakasa, jukʼampiw munasiraki.

5. Salón del Reino siski uka sutejja, ¿kunatsa wali askïpacha? (“ Machaq Qhana Iglesia” siski uka recuadro uñjjattʼäta.)

⁵ Nayratpachaw Bibliat Yatjjatirinakajj jupanakan lurat tantachasiñ uta utjañap wakisitap amuyapjjäna. Amuyatajja, 1890 maranwa Virgina Occidental (Estados Unidos) sat markan nayrïr Tantachasiñ Utajj lurasïna. 1930  maranakatakejja, walja Tantachasiñ Utanakaw machaqata jan ukajj wasitat lurasjjäna, ukampis uka utanakajj janiw mä sutimp uñtʼatäpkänti. 1935 maranjja, Rutherford jilatajj Hawái sat markaruw saräna, ukanjja mä machaq sucursala ukat Tantachasiñ Utaw lurasiskäna. Kunapachatï mä jilatajj ‘¿kuna sutimpis uka utajj uñtʼatäni?’ sasin Rutherford jilatar jisktʼäna ukhajja, jupajj akham sänwa: “¿Janit ‘Salón del Reino’ [aymara arunjja, ‘Reinon Utapa’] sutimp uñtʼatäspa? Cheqas Reinon suma yatiyäwinakapwa jiwasajj yatiytanjja” sasa (Mat. 24:14). ¡Uka sutejj wali askipunïnwa! Mä qawqha tiempotjja, walja markanakanwa Tantachasiñ Utanakajj uka sutimp uñtʼasjjäna. a

6, 7. Tantachasiñ Utanaka jankʼak lurasajja, ¿kuna askinakas jikjjatasiwayi?

⁶ Khä 1970 maranakanjja, jukʼamp Tantachasiñ Utanakaw munasjjäna. Ukatwa Estados Unidos markan Diosan markap sarayapkäna uka jilatanakajja, kunjamsa yäparu ukat suma lurtʼat Tantachasiñ Utanakajj mä qawqha tiemponak lurasispa uk amuytʼapjjäna. Ukarjamajja, niya 200 Tantachasiñ Utanakaw Estados Unidos ukat Canadá sat markanakan 1983 maratakejj lurasjjäna. Jukʼamp lurañajj utjaskakïnwa, ukatwa jilatanakajj comités regionales de construcción sat gruponak utjañap amtapjjäna. Uka gruponkirinakajj walja Tantachasiñ Utanak lurasiñapatakiw yanaptʼapjjäna, ukatwa 1986 maran Oraqpachan Jilïr Irpirinakajj uka gruponak sum uttʼayjjapjjäna. 1987 maranjja,  Comité Regional de Construcción ukajj 60 gruponakaw Estados Unidos markan utj-jjäna. b 1992 maratakejja, Alemania, Argentina, Australia, Brasil, España, Francia, Italia, Japón, México, Noruega, Sudáfrica ukat Suecia markanakanwa ukham gruponakajj utjarakïna. Cheqas jachʼa tantachäwinak apaski uka utanaka ukat Tantachasiñ Utanak lurañataki wal chʼamachasipki uka jilat kullakanakarojja, yanaptʼañasawa. Ukham irnaqtʼasaw jupanakajj Jehová Diosar yupaychapjjaraki.

⁷ Tantachasiñ Utanak jankʼak lurasiwayki ukanakajja, Jehová Diosar jachʼañchañatakiw yanaptʼawayaraki. Amuytʼañataki, “Iyawsäwisajj jachʼa qollunaksa onjjtayaspawa” sat pʼeqeñchäwiw mä periodicon España sat markan mistüna, ukanjja kunjamsa Martos (Jaén) markan mä Tantachasiñ Utajj lurasiskäna ukaw qhanañchasïna. Ukajj akham sänwa: “Akapachanjja, jupanakan askipakwa jaqenakajj thaqhapjje. Ukhamajja, ¿kunatsa jaqe masipat llakisisa ukat qollqe jan katoqañ suyasajj [España sat markat] kunayman cheqanakat walja jaqenakajj Martos markar sarawayapjje? Jupanakajj jankʼaki, yäparu ukat sum wakichtʼasisaw akan irnaqtʼawayapjje. Jichhakamajja, janiw ukham irnaqtʼañajj uñjasiwaykiti” sasa. Ukan yanaptʼir mä jilatajj uka toqet kamsänsa ukwa periodicojj akham qellqarakïna: “Jehová Diosamp yatichat mä markäpjjtwa. Ukatwa ukham irnaqtʼapjjta” sasa.

8. Oraqpachan Jilïr Irpirinakajja, ¿kun lurañsa 1999 maran amtapjjäna, ukat kunatsa?

⁸ Kawkïr markanakantï jilat kullakanakajj pisin jakasipki uka cheqanakanjja, walja jaqenakaw 1900 maranak tukuyarojj Diosan markapar mantawayapjje. Ukatwa uka markankir jilat kullakanakajj Tantachasiñ Utanak lurañatak wal chʼamachasipjjäna, ukampis uka utanakajj yaqha iglesianakat sipansa janiw suma lurtʼatapunïpkänti, ukhamajj jiskʼachata ukat yaqhachataw awisajj jilat kullakanakajj uñjasipjjäna. Ukampis 1999 maranwa Oraqpachan Jilïr Irpirinakajj uka markankir jilat kullakanakarojj jukʼamp Tantachasiñ Utanak lurapjjañapatak yanaptʼañ amtapjjäna. Ukatakejj mä programa uttʼayapjjäna, ukarjamajja, jila qollqenïpki uka markankir jilat kullakanakan churatanakapampiw pisin jakasipki uka markanakan Tantachasiñ Utanakajj lurasiñapäna, ukhamat ‘taqenis mayakïñasataki’ (2 Corintios 8:13-15 liytʼañataki). Ukat yaqha markankir jilat kullakanakaw uka markanakaru yanaptʼir sarañ amtapjjarakïna.

9. ¿Kun lurañas jan tukuyañjamäkäna, ukat kunas qhepat pasäna?

⁹ Pisin jakasir 88 markanakanwa 18.300 Tantachasiñ Utanak lurañajj wakisi sasaw 2001 maran yatiyasïna. ‘Janiw tukuykañäniti’ sañjamänwa. Ukampis Diosan qollan ajayupampi ukat Jesucristo Reyisan yanaptʼapampejja, janiw kunas chʼamäkiti (Mat. 19:26). 1999 marata 2013 marakamajja, 26.849 Tantachasiñ Utanakwa Diosan servirinakapajj pisin jakasipki uka markanakan uka programamp lurawayapjje. c Ukat niyakejjay Jehová Diosajj Jupan arunakap yatiyktan ukarojj wal yanaptʼaskchejja, 2013 maratakejj 6.500 Tantachasiñ Utanak lurasiñapaw uka markanakan wakisiskakïna. Cheqansa, marat maratjamaw jukʼamp Tantachasiñ Utanak lurañajj wakisi.

10-12. Machaq Tantachasiñ Utanak lurañajja, ¿kunjamsa Jehová Diosar jachʼañchawayi?

¹⁰ Machaq Tantachasiñ Utanak lurañajja, ¿kunjamsa Jehová Diosar jachʼañchi? Zimbabue markankir sucursalajj akham sasaw yatiyäna: “Mä machaq Tantachasiñ Utajj luraski ukhat mä phajjsirojja, tantachasipkäna ukhat mä ukhampiw tantachasjjapjje” sasa. Walja markanakanjja, kunapachatï Diosar yupaychañatak utanakajj jan sumäpki ukhajja, jaqenakajj janjamakiw ukanakar sarañ munapkiti. Ukampis mä machaq Tantachasiñ Utajj lurasjje ukhajja, walja jaqenakaw ukar sarañ qalltapjje ukat yaqha ukham lurañaw wakisiraki. Ukhamarusa, jaqenakajj janiw uka utanakan suma lurtʼatäpjjatap uñjasakejj Jehová Diosar jakʼachasipkiti. Jan ukasti, Tantachasiñ Utanak lurir jilat kullakanakajj kunja munasirïpjjesa, uk uñjasaw jaqenakajj Diosan markapar wali askit uñjapjjaraki. Ukwa jichhajj mä qawqhanak uñjaskañäni.

 ¹¹ Indonesia. Kunjamsa jilat kullakanakajj Tantachasiñ Uta lurasipkäna ukwa mä chachajj sapür uñjäna. Ukat pago katoqañ jan suyasa trabajirïpjjatap yatisajja, akham sänwa: “¡Jumanakar uñjañajj wali muspharkañawa! Janis pago katoqapkstajja, taqe chuyma ukat wali kusisit irnaqtʼirwa sapa maynir uñjapjjsma. Janiw jumanakjam yaqha religionajj utjpachati” sasa.

¹² Ucrania. Mä warmejja, sapüruw Tantachasiñ Utajj lurasiskäna uka cheqnam pasirïna. Ukat akham sasaw amuyäna: ‘Jupanakajj Jehová Diosan Qhanañchirinakapäpjjpachawa ukat mä Tantachasiñ Utwa lurasipkpacha’ sasa. Qhepatjja, uka warmejj akham sarakïnwa: “Kullakajajj Jehová Diosan Qhanañchiripawa ukat jupaw jupanakat parlirïtu. Jilat kullakanakajj kunjamsa Tantachasiñ Uta lurapjjäna uk uñjasaw jupanakamp mä familjam Diosar serviñ amtawaytjja. Jupanakajj luratanakapampiw munasirïpjjatap uñachtʼayapjje” sasa. Uka warmejj Bibliat yateqañwa qalltäna ukat 2010 maranwa bautisasjjarakïna.

13, 14. 1) Tantachasiñ Utajj kunjamsa lurasïna uk uñjasajja, ¿mä chacha warmejj kamsapjjänsa, ukat kunsa ukajj uñachtʼayistu? 2) Tantachasiñ Utajj Jehová Diosan sutip jachʼañchañapatakejja, ¿kunjamsa jumajj yanaptʼasma?

¹³ Argentina. Tantachasiñ Uta lurasiñapatak pʼeqtʼkäna uka jilatampiw mä chacha warmejj parltʼapjjäna. Chachajj akham sänwa: “Kunjamsa jumanakajj irnaqtʼapjjta uk sumwa nanakajj uñjawayapjjta [...]. Ukat ‘akanwa Diosat yateqañäni’ sasaw warmijamp amtawayapjjta” sasa. Uka chachajj akham sasaw jilatar jisktʼarakïna: “Akan tantachasiñatakejja, ¿kun lurapjjañajas wakisi?” sasa. ‘Bibliat yatjjatapjjañamawa’ satajja, ‘iyaw’ sasaw chacha warmejj sapjjäna, ukampis ‘familpachaw yatjjatañ munapjjerista’ sasaw sapjjarakïna. Uk istʼasajj wali kusisitaw jilat kullakanakajj yatichañ qalltapjjäna.

 ¹⁴ Jumajj tantachaskta uka utan lurasiñapatakejj inas jan yanaptʼawaykstati. Ukampis Jehová Diosan sutip jachʼañchañapatakejja, ¿kunjamsa yanaptʼasma? Nayraqatjja, Bibliat yateqerinakamaru, jukʼamp yateqañ munapki ukanakaru ukat yaqha jaqenakaruw tantachäwinakar jutapjjañapatak taqe chuym invittʼasma. Ukatjja, Tantachasiñ Utan qʼomäñapataki ukat suma uñjatäñapatakiw yanaptʼarakisma. Maysa toqetjja, jumajj tantachaskta uka utan sumäskakiñapataki ukat yaqha cheqanakan ukham utanak lurasiñapatakiw qawqha qollqempis yanaptʼasma uk sum amuytʼasisin amtarakisma (1 Corintios 16:2 liytʼañataki). Taqe ukanak lurasaw Jehová Diosan sutip jachʼañchasma.

15-17. 1) Tantachasiñ Utanaka ukat yaqha ukhamanak lurasiñapatakejja, ¿khitinakas jukʼamp yanaptʼapjje? 2) Yaqha markanakar yanaptʼir sarapkäna uka jaqechat jilat kullakanakatjja, ¿kunsa yateqassna?

¹⁵ Markankir jilat kullakanakaw Tantachasiñ Utanaka, sucursalanaka ukat jachʼa tantachäwinak apaski uka utanak lurasiñapatakejj jukʼamp yanaptʼapjje. Ukampis yaqha markankiri ukat utanak lurir jilat kullakanakaw uka markanakar yanaptʼir sarapjjaraki. Ukanakat yaqhepajja, uka markanakan Tantachasiñ Utanak lurañatakiw walja semananak tiempo apstʼasipjje. Yaqhepajja, walja maranak yanaptʼañwa amtapjjaraki, ukham yanaptʼasajj mä markat yaqha markaruw sarawayapjje.

¹⁶ Yaqha markanakaru yanaptʼir sarapki uka jilat kullakanakajja, kunayman jan walinakanwa uñjasipjje, ukampis wali kusisitäpjjewa. Timo jilatampit ukat Lina esposapampit parltʼañäni. Jupanakajj Asia, Europa ukat Sudamérica sat cheqanakaruw Tantachasiñ Utanaka, sucursalanaka ukat jachʼa tantachäwinak apaski uka utanak lurañan yanaptʼañatak sarawayapjje. Timo jilatajj akham siwa: “Aka 30 maranakanjja, niya pä maratwa mä markat yaqha markar yanaptʼañatak sarawayapjjta” sasa. Lina kullakajj 25 maranakaw Timo jilatamp jaqechatäjje. Kullakajj akham siwa: “Esposojampejj 10 markanakanwa yanaptʼawayta. Cheqansa, kunayman arunakaw sapa markan utji, manqʼanakas mayj mayjawa, yaqhep cheqanakajj juntʼu, jan ukajj thaya ukhamarakiwa, yatiyañas janiw kikpäkiti, taqe ukanakar yatinoqtañatakejj wal chʼamachasiña ukat tiempow munasi. Yaqha amigonak jikjjatañatakis chʼamachasiñaw wakisiraki” sasa. d ¿Inamayakit ukham chʼamachasipjjpachäna? Lina kullakajj akham siwa: “Jan walinakan uñjasisajja, jukʼamp bendicionanakwa katoqawayapjjta. Cristiano jilat kullakanakajj kunja munasirïpjjesa, katoqtʼasirïpjjesa ukat kunjamsa Jehová Diosajj wali munasiñamp uñjawayapjjetu ukwa qhan  amuyapjjta. Ukat kuntï Jesusajj Marcos 10:29, 30 qellqatan arkirinakapar siskäna, uka arunakan cheqätapwa uñjawayapjjarakta. Diosan markapanjja, walja jilanaka, kullakanaka ukat taykanakaw utjapjjetu” sasa. Timo jilatajj akham sarakiwa: “Kunanakatï Diosan Reinopan utjki ukanakan jukʼamp jiltañapataki kuntï lurañ yatipkta ukanakamp yanaptʼasajja, wali kusisitapuniw jikjjatasipjjta. Ukham yaqha aski luräwejj janiw utjkaspati” sasa.

¹⁷ Darren jilatampit Sarah esposapampit amuytʼarakiñäni. Jupanakajj África, Asia, Centroamérica, Europa, el Pacífico sur ukat Sudamérica sat cheqanakanwa yanaptʼawayapjje. ‘Kuntï churapkta ukat sipansa, jukʼampwa katoqawayapjjta’ sasaw jupanakajj sapjje. Jan walinakansa uñjasiwayapjjchejja, Darren jilatajj akham siwa: “Walja markanakata jilat kullakanakamp chika irnaqañajj wali askipunïnwa. Jehová Diosar munasiñajja, mä wiskhäkaspas ukhamwa Oraqpachankir jilat kullakanakamp mayachtʼistu” sasa. Sarah kullakajj akham sarakiwa: “Kunayman costumbrenakani jilat kullakanakatjja, wal yateqawayta. Jupanakajj Jehová Diosar serviñatakiw wal chʼamachasipjje. Uk uñjañaw taqe chʼamajampi Diosar serviskakiñatak chʼamañchtʼitu” sasa.

18. Salmo 110:3 qellqatan jikjjataski uka profeciajja, ¿kunjamsa jichhürunakan phoqasiski?

¹⁸ Jan walinakan uñjaskasasa, Diosan Reinopamp apnaqatäpki ukanakajj ‘taqe chuymaw’ uka Reinor yanaptʼapjjani, sasaw David reyejj mä profecian arsüna (Salmo 110:3 liytʼañataki). e Taqe khitinakatï Diosan Reinopar kunayman toqeta yanaptʼapki ukanakajja, uka profecian phoqasiñapatakiw yanaptʼasipki (1 Cor. 3:9). Jachʼa tantachäwinak apañataki patak patak utanakasa, waranq waranqa Tantachasiñ Utanakasa ukat walja sucursalanakasa, Diosan Reinopan utjatapa ukat apnaqjjatapwa qhan uñachtʼayistu. Jehová Diosar jachʼañchiri luräwinakan yanaptʼasa Jesucristo Reyisar serviñajj wali askipuniwa.