1, 2. Ano an haloy nang ginigibo kan mga lingkod ni Jehova? (b) Ano an pinapahalagahan ni Jehova?

 HALOY nang nagtutugdok an maimbod na mga lingkod ni Jehova nin mga edipisyo na nagtataong kaumawan sa pangaran niya. Halimbawa, maugmang nakikabtang an mga Israelita sa pagtugdok kan tabernakulo asin bukas-palad na nagtao nin materyales para diyan.—Ex. 35:30-35; 36:1, 4-7.

² Para ki Jehova, bako an mismong materyales an panginot na nagtataong onra sa saiya, ni iyan man an pinakamahalaga sa saiya. (Mat. 23:16, 17) An pinapahalagahan ni Jehova—an nangungurog sa gabos na regalo na nagtataong onra sa saiya—iyo an pagsamba kan mga lingkod niya, kaiba na an pagigin andam na maglingkod asin kaigutan sa pagtrabaho. (Ex. 35:21; Mar. 12:41-44; 1 Tim. 6:17-19) Mahalaga iyan. Taano? Huling temporaryo sana an mga edipisyo. Halimbawa, mayo na an tabernakulo asin an templo. Dawa siring, dai nalilingawan ni Jehova an pagkabukas-palad asin pagpapagal kan maimbod na mga lingkod niya na nagsuportar sa pagtugdok kaiyan.—Basahon an 1 Corinto 15:58; Hebreo 6:10.

3. Ano an rerepasuhon ta sa kapitulong ini?

³ Mahigos man an mga lingkod ni Jehova sa presenteng panahon sa pagtugdok nin mga pasilidad para sa pagsamba. Asin pambihira nanggad an nagigibo ta huli sa paggiya kan satong Hading si Jesu-Cristo! Malinaw nanggad na binebendisyunan ni Jehova an satong paghihinguwa. (Sal. 127:1) Sa kapitulong ini, rerepasuhon ta an nagkapirang haman nang proyekto asin kun paano iyan nagtataong onra ki Jehova. Maaaraman ta man an sinabi nin nagkapira na nagtabang sa paghaman kaiyan.

4. (a) Taano ta kaipuhan niyato nin mas dakul na pasilidad para sa pagsamba? (b) Taano ta pinagsararo an nagkapirang sangang opisina? (Hilingon an kahon na “ Pagtugdok nin Sangang Opisina Huli sa Nagbabagong Pangangaipo.”)

⁴ Arog kan pinag-ulayan sa Kapitulo 16, kahagadan ni Jehova na magtiripon kita para sa pagsamba. (Heb. 10:25) Napapakusog kaiyan bako sana an satong pagtubod kundi pati an pagmawot tang maghulit. Mantang naghaharani an katapusan kan huring mga aldaw, padagos na pinaparikas ni Jehova an gibuhon na iyan. Bilang resulta, ginatos na ribo an naglalaog sa organisasyon niya kada taon. (Isa. 60:22) Huli sa pagdakul kan mga sakop kan Kahadian,  kaipuhan nin mas dakul na pasilidad sa pag-imprenta nin mga literatura na basado sa Bibliya. Kaipuhan ta man an mas dakul na pasilidad para sa pagsamba.

5. Taano ta angay an pangaran na Kingdom Hall? (Hilingon man an kahon na “ An Simbahan na New Light.”)

⁵ Kan inot na mga taon sa kasaysayan kan mga lingkod ni Jehova sa presenteng panahon, nahiling kan Mga Estudyante sa Bibliya na kaipuhan nindang magkaigwa nin sadiring hall para sa pagtiripon. Minalataw na an saro sa inot na mga pasilidad itinugdok sa West Virginia, E.U.A., kan 1890. Kan dekada nin 1930, may naitugdok o nahirahay na sindang mga hall, pero dai pa iyan nin pangaran. Pero kan 1935, nagdalaw si Brother Rutherford sa Hawaii, na duman nagtutugdok nin hall na kabtang nin sarong bagong sangang opisina. Kan haputon siya kun ano an maninigong iapod sa edipisyong ini, nagsimbag siya: “Ano daw kun apudon tang ‘Kingdom Hall,’ huling iyan an ginigibo ta, an paghuhulit kan maugmang bareta kan Kahadian?” (Mat. 24:14) Dai nahaloy, an angay na pangaran na iyan an iinapod bako sana sa partikular na hall na  idto kundi sa kadaklan na hall para sa pagtiripon kan mga kongregasyon kan mga lingkod ni Jehova sa bilog na kinaban.

6, 7. Ano an nagin resulta huli sa marikas na pagtugdok nin mga Kingdom Hall?

⁶ Kan dekada nin 1970, marikas na nagdadakul an kinakaipuhan na Kingdom Hall. Huli kaiyan, may ginibong episiyenteng pamamaagi an mga tugang sa Estados Unidos tanganing makatugdok nin magayon asin praktikal na mga edipisyo sa laog nin pira sanang aldaw. Kan 1983, mga 200 kaiyan an naitugdok sa Estados Unidos asin Canada. Tanganing mahaman an proyekto, pinunan kan mga tugang na mag-organisar nin mga regional building committee. Epektibong marhay an pamamaaging ini kaya kan 1986, pormal na inaprubaran kan Namamahalang Grupo an areglo, asin kan 1987, may 60 nang Regional Building Committee (RBC) sa Estados Unidos. a Kan 1992, nagnombra man nin mga RBC sa Alemania, Aprika del Sur, Argentina, Australia, España, Hapon, Mejico, asin Pransia. Maninigo nanggad na suportaran ta an mahigos na mga tugang na nagtutugdok nin mga Kingdom Hall asin Assembly Hall, huling an ginigibo ninda kabtang nin sagradong paglilingkod.

⁷ An mga Kingdom Hall na ini na marikas na ikinatugdok marahayon na patotoo sa mga komunidad na pinagtugdukan kaiyan. Halimbawa, an sarong peryodiko sa España may headline na “Paagi sa Pagtubod Naililipat an Kabukidan.” Mapadapit sa pagtugdok nin Kingdom Hall sa banwaan nin Martos, naghapot iyan: “Paano nagin posible na sa presenteng kinaban na ini na lakop an pagkamakasadiri, nagsakripisyong magbiyahe pa-Martos an mga boluntaryo  hali sa lain-lain na rehiyon [kan España] tanganing itugdok an sarong edipisyo na nakakalabi sa gabos na rekord nin pagtugdok kun dapit sa rikas, pagigin tamang-tama, asin organisado?” Nagsimbag iyan paagi sa pagkotar sa sinabi nin sarong Saksing boluntaryo: “An totoo, nagibo mi iyan huling kami mga lingkod na tinutukduan ni Jehova.”

8. Kan 1999, anong bagong programa an inaprubaran kan Namamahalang Grupo, asin taano?

⁸ Sa pagtatapos kan ika-20 siglo, dakul an nagraralaog sa organisasyon ni Jehova sa kadagaan na diyan limitado an kakayahan kan mga tugang sa pinansiyal. Ginibo kan lokal na mga kongregasyon an makakaya ninda sa pagtugdok nin mga hall para sa pagtiripon. Pero sa ibang nasyon, kaipuhan nindang tagalan an panunuya asin diskriminasyon huling simple sana an mga Kingdom Hall ninda kun ikukumparar sa ibang pasilidad para sa pagsamba. Minsan siring, puon 1999, inaprubaran kan Namamahalang Grupo an sarong sistema na maparikas sa pagtugdok nin mga Kingdom Hall sa nagpoprogresong kadagaan. Ginagamit an mga pondo hali sa mas mayayaman na kadagaan para magkaigwa nin ‘pagkasarama’ o pagpantay-pantay. (Basahon an 2 Corinto 8:13-15.) Asin nagboboluntaryo an mga tugang hali sa ibang kadagaan para magtabang sa trabaho.

9. Anong trabaho an garo baga dakulaon, pero ano an nagibo na?

⁹ Kan primero, garo baga dakulaon an trabaho. Ipinahiling nin sarong report kan 2001 na labing 18,300 na Kingdom Hall an kaipuhan sa 88 nagpoprogresong nasyon. Pero, huli sa suporta kan  banal na espiritu nin Diyos asin kan satong Hading si Jesu-Cristo, daing gibuhon na imposible. (Mat. 19:26) Sa laog nin mga 15 taon, puon 1999 sagkod 2013, nakatugdok an mga lingkod nin Diyos nin 26,849 Kingdom Hall bilang kabtang kan sistemang ini. b Padagos na binebendisyunan ni Jehova an paghuhulit, kaya puon 2013 mga 6,500 pang Kingdom Hall an kaipuhan sa mga nasyon na iyan, asin sa presente ginatos pa an kaipuhan kada taon.

10-12. Paano nagtataong onra sa pangaran ni Jehova an pagtugdok nin mga Kingdom Hall?

¹⁰ Paano nagtataong onra sa pangaran ni Jehova an pagtugdok kan bagong mga Kingdom Hall na iyan? Nagsabi an sarong report hali sa sangang opisina sa Zimbabwe: “Sa laog nin sarong bulan pagkatugdok nin bagong Kingdom Hall, parating nadodoble an nag-aatender sa mga pagtiripon.” Sa dakul na nasyon, garo baga nag-aalangan na makiasosyar sa sato an mga tawo sagkod na dai kita nin angay na pasilidad para sa pagsamba. Pero, pag may naitugdok nang Kingdom Hall, madali iyan na napapano kaya kaipuhan giraray nin saro pa. Minsan siring, bako sana an itsura kan mga edipisyo an nakakaakit sa mga tawo na rumani ki Jehova. An tunay na Kristiyanong pagkamuot na ipinapahiling kan mga nagtutugdok kaiyan may epekto man sa paghiling nin mga tawo sa organisasyon niya. Isip-isipa an pirang halimbawa.

¹¹ Indonesia. Kan maaraman nin sarong lalaki na nagmamasid sa itinutugdok na Kingdom Hall na boluntaryo an gabos na nagtatrabaho diyan, sinabi niya: “Talagang kahanga-hanga kamo! Nahiling ko kun gurano kaugma saka kaudok sa buot na nagtatrabaho an kada saro saindo, dawa ngani dai kamo pigbabayadan. Sa hiling ko, dai nang ibang relihiyon na arog nindo!”

¹² Ukraine. Aroaldaw na nag-aagi an sarong babayi sa sarong itinutugdok na Kingdom Hall asin aram niya na Mga Saksi ni Jehova an nagtatrabaho duman. Sinabi niya: “Naaraman ko an dapit sa Mga Saksi ni Jehova sa tugang kong babayi na nagin saro man sainda. Huli sa naobserbaran ko sa pagtugdok na ini, gusto ko na man na mapabilang sa espirituwal na pamilyang ini. Namamasdan ko digdi an pagkamuot na ipinapahiling ninda.” Nag-ako siya nin pag-adal sa Bibliya asin nabawtismuhan kan 2010.

13, 14. (a) Ano an nanudan mo sa reaksiyon nin sarong mag-agom pagkatapos na maobserbaran an mga aktibidad sa lugar na itinutugdok an sarong Kingdom Hall? (b) Ano an magigibo mo sa Kingdom Hall nindo para siyertong matawan nin onra an pangaran ni Jehova?

¹³ Argentina. Sarong mag-agom an nagrani sa brother na nangangataman sa lugar na itinutugdok an Kingdom Hall. Sinabi kan agom na lalaki, “Pig-oobserbaran ming marhay an pagtugdok nindo, asin . . . gusto ming makanuod dapit sa Diyos sa lugar na ini.” Dangan naghapot siya, “Ano an dapat ming gibuhon para makaatender sa mga pagtiripon digdi?” Inako kan mag-agom an alok na pag-adal sa Bibliya, pero sa kondisyon na dapat kaiba an bilog na pamilya. Maugmang nag-uyon an mga tugang.

¹⁴ Tibaad dai ka man nagkapribilehiyong tumabang sa pagtugdok kan Kingdom Hall nindo, pero dakul ka pang magigibo para makatabang na matawan kaiyan nin onra an pangaran ni Jehova. Halimbawa, puwede mong entusiyastikong imbitaran an mga tinutukduan  mo sa Bibliya, dinadalaw liwat, asin iba pa na mag-atender sa mga pagtiripon nindo sa Kingdom Hall. May oportunidad ka man na tumabang sa paglinig asin pagmentenar kaiyan. Apuwera kaiyan, puwede kang magtao nin donasyon para sa pag-asikaso kan Kingdom Hall nindo o pagtugdok kaiyan sa ibang parte kan kinaban. (Basahon an 1 Corinto 16:2.) Gabos ini nakakadagdag sa kaumawan kan pangaran ni Jehova.

15-17. (a) Siisay an naggigibo kan kadaklan na trabaho sa pagtugdok? (b) Ano an nanudan mo sa sinabi kan mga mag-agom na naglilingkod sa internasyonal na mga proyekto nin pagtugdok?

¹⁵ An kadaklan na trabaho sa pagtugdok nin mga Kingdom Hall, Assembly Hall, asin pasilidad nin sangay ginigibo kan mga tugang na taga duman sa lugar kan proyekto. Pero sa parati, tinatabangan sinda nin mga tugang hali sa ibang mga nasyon na eksperyensiyado diyan. Inaareglar nin iba an iskedyul ninda tanganing makapagboluntaryo nin nagkapirang semana sa internasyonal na proyekto. An iba pa andam na maglingkod nin dakul na taon sa magkakasunod na asignasyon.

¹⁶ May iba man na kadipisilan an pagtrabaho sa internasyonal na pagtugdok, pero igwa man iyan nin nakakakontentong balos. Halimbawa, nagbiyahe si Timo asin Lina sa mga nasyon sa Amerika del Sur, Asia, saka Europa para tumabang sa pagtugdok nin mga Kingdom Hall, Assembly Hall, pati sangang opisina. Sabi ni Timo, “Kun ia-average sa nakaaging 30 taon, nagbabago an asignasyon ko kada duwang taon.” Nagsabi si Lina, na 25 taon nang kasal ki Timo: “Nakapaglingkod na ako kaiba ni Timo sa 10 nasyon. Kaipuhan an urog na kusog asin dakul-dakul na panahon para matuod sa bagong kakanon, bagong klima, bagong lengguwahe, saka bagong teritoryo sa paghuhulit pati tanganing magkaigwa nin bagong mga katuod.” c Sulit daw an paghihinguwa? “ An kadipisilan,” sabi ni Lina, “nagresulta sa darakula nanggad na bendisyon samo. Naeksperyensiyahan mi an Kristiyanong pagkamuot asin pag-istimar saka an mamumuton na pag-ataman samo ni Jehova. Nahiling mi man an kautuban kan panuga ni Jesus sa mga disipulo niya na nasa Marcos 10:29, 30. Duminakol pa nin sanggatos na beses an samong espirituwal na mga tugang na lalaki asin babayi saka ina.” Sabi ni Timo, “Kontento nanggad kami huling ginagamit mi an samong kakayahan para sa pinakamarahay na katuyuhan paagi sa pagtabang sa pagpahiwas kan mga pagsadiri kan Hadi.”

¹⁷ Para ki Darren asin Sarah, na nagtabang sa mga proyekto nin pagtugdok sa Amerika del Sur, Amerika Sentral, Aprika, Asia, Europa, asin Timog Pasipiko, mas dakul an nakakamtan ninda kisa sa itinatao ninda. Sa ibong kan kadipisilan na naeksperyensiyahan ninda, nagsabi si Darren: “Sarong pribilehiyo na magtrabaho kaiba kan mga tugang sa lain-lain na parte kan kinaban. Nahiling ko na an pagkamuot ta ki Jehova garo lubid na nakapurupot sa kinaban asin nakabugkos sato gabos.” Sabi ni Sarah: “Dakul nanggad akong nanunudan sa mga tugang na lain-lain an kultura! Huling nahihiling ko an mga pagsakripisyo ninda sa paglilingkod ki Jehova, namomotibar akong padagos na gibuhon an pinakamakakaya ko.”

18. Paano nauutob an hula na nasa Salmo 110:3?

¹⁸ Ihinula ni Hading David na dawa mapaatubang sa mga kadipisilan an mga sakop kan Kahadian nin Diyos, ‘gikan sa buot nindang ipepresentar an saindang sadiri’ tanganing maglingkod para sa intereses kan Kahadian. (Basahon an Salmo 110:3, NW.) d May kabtang sa kautuban kan propetikong mga tataramon na iyan an gabos na kalabot sa gibuhon na nagsusuportar sa Kahadian. (1 Cor. 3:9) An dakulon na edipisyo sa mga sangang opisina, ginatos na Assembly Hall, asin manampulong ribong Kingdom Hall sa bilog na kinaban nahihiling na ebidensiya na totoo saka namamahala na an Kahadian nin Diyos. Pribilehiyo tang maglingkod sa Hading si Jesu-Cristo sa gibuhon na nagtatao ki Jehova kan onra na maninigo nanggad sa saiya!