1, 2. (a) Finshi ifyo abantu ba kwa Yehova baitemenwa ukucita ukutula fye na kale? (b) Cinshi Yehova atemwa sana ukucila pa bupe ubo ababomfi bakwe bapeela pa kukuula?

UKUTULA fye na kale abantu ba kwa Yehova abacishinka balatemwa sana ukubomba umulimo wa bukuule uucindika ishina lya kwa Lesa. Ica kumwenako fye, Abena Israele balibombeleko sana umulimo wa kukuula icikuulwa ca mushilo kabili balisangwilileko sana ifisolobelo fya kukulila.—Ukufu. 35:30-35; 36:1, 4-7.

² Ifyo Yehova atemwa sana te fisolobelo ifyo ababomfi bakwe bapeela pa kukuula ifikuulwa fya ku mupepelamo. (Mat. 23:16, 17) Lelo ifyo Yehova atemwa sana, kumona abantu bakwe balemupepa no kuipeelesha mu kubomba umulimo wakwe. (Ukufu. 35:21; Marko 12:41-44; 1 Tim. 6:17-19) Calicindama ukwishiba ici cishinka pantu ifikuulwa tafikalilila. Ku ca kumwenako, pali ino nshita icikuulwa ca mushilo ne tempele fyaliloba. Ca cine ukuti pali ino nshita takwaba itempele ne cikuulwa ca mushilo, lelo Yehova talaba ubupe ubo abantu bakwe bapeele ne fyo babombeshe pa kufikuula.—Belengeni 1 Abena Korinti 15:58; AbaHebere 6:10.

3. Finshi twalalandapo muli cino cipande?

³ Na muno nshiku mwine, ababomfi ba kwa Yehova balabombesha ukukuula ifikuulwa fya kupepelamo Yehova. Na kabili pa mulandu wa kuti tutungululwa ne Mfumu Yesu Kristu, twalikuula ifikuulwa ifingi sana ifya kupepelamo. Ukwabula no kutwishika, Yehova alatupaala. (Amalu. 127:1) Muli cino cipandwa, twalalanda pa fyo twabomba umulimo wa kukuula ne fyo walenga ukuti Yehova alecindikwa. Na kabili, twalalanda na pa fyo bamo ababomba muli uyu mulimo wa bukuule balandapo.

4. (a) Mulandu nshi twingalandila ukuti tulakabila ifikuulwa fya kupepelamo na fimbi? (b) Mulandu nshi amaofeshi ya musambo yamo bayakumbinkanishisha? (Moneni akabokoshi akaleti “ Ukukuula Amaofeshi Ya Musambo —Ukwaluka Ukwabako.”)

⁴ Nga fintu twasambilile mu Cipandwa 16, Yehova afwaya ukuti tulelongana ku kumupepa. (Heb. 10:25) Ukulongana kulalenga icitetekelo cesu cilekosa no kulenga tuleshimikila sana. Ilyo impela ya cino calo ileya ilepalama, Yehova alelenga ababomfi bakwe balebombesha mu mulimo wa kushimikila imbila nsuma. Ici cilalenga abantu abengi baleisa mu cilonganino ca  kwa Yehova cila mwaka. (Esa. 60:22) Apo abantu abalefwaya ukulatekwa no Bufumu baleya balefulilako fye, tulakabila ifikuulwa ifikalamba ifya kupulintilamo impapulo e lyo ne fifulo fya kulonganinapo ifingi.

5. Mulandu nshi twingalandila ukuti caliba icalinga ukulaita ifikuulwa tulonganinamo ukuti Ing’anda ya Bufumu? (Moneni na kabokoshi akaleti “ Icalici Lya Lubuuto Ulupya.”)

⁵ Mu kubangilila fye, ilyo abantu ba kwa Yehova aba muno nshiku batendeke, Abasambi ba Baibolo balimwene ukuti balingile ukukwata ififulo fyabo ifya kupepelapo. Pa fifulo fya kubalilapo ifyo bakuulile, cumfwika ukuti mu 1890 ku West Virginia ku calo ca America nako balikuulileko cimo. Ilyo calefika muli ba 1930, abantu ba kwa Yehova ninshi balikuula ifikuulwa nelyo baliwamya ifikuulwa ifyafulilako ifya kulonganinamo, lelo bali tabalafinika amashina. Mu 1935, munyinefwe Rutherford aile ku Hawaii, ukwali ubukuule bwa musambo upya e lyo ne cikuulwa ca kulonganinamo. Ilyo bamwipwishe ifyo balingile ukwita ici icikuulwa, munyinefwe Rutherford atile: “Apo umulimo tubomba wa kubila imbila nsuma iya Bufumu, bushe te kuti ciwame tuleciita ukuti Ing’anda ya Bufumu?”  (Mat. 24:14) Mu kupita kwa nshita ili e shina batendeke ukulaita ifikuulwa fyonse ifya kulonganinamo Inte sha kwa Yehova icalo conse.

6, 7. Busuma nshi bwafuma muli programu ya kukuula bwangu Amayanda ya Bufumu?

⁶ Muli ba 1970 Amayanda ya Bufumu yalefwaikwa icine cine, ici calengele ukuti bamunyinefwe mu calo ca America bafwayeko inshila iisuma iya kukuulilamo ifikuulwa fya kulonganinamo ifisuma mu nshiku fye ishinono. Ilyo calefika muli ba 1983, nalimo Amayanda ya Bufumu 200 ninshi yalikuulwa kale mu America na mu Canada. Pa kuti umulimo wingalabombwa bwino, bamunyinefwe balipangile amakomiti ya makuule mu fitungu ifyalekanalekana mu America. Iyi nshila yalibombele bwino sana ica kuti mu 1986, Ibumba Litungulula lyalisuminishe ukuti amakomiti yatwalilile ukulabomba, ica kuti muli ba 1987, Amakomiti ya Makuule 60 yalipangilwe mu America. * E lyo mu 1992 amakomiti na yambi yalipangilwe ku Argentina, ku Australia, ku France, ku Germany, ku Japan, ku Mexico, ku South Africa, na ku Spain. Ukulanda fye icishinka, bamunyinefwe abakuula Amayanda ya Bufumu ne Fikuulwa fya Kulonganinamo Ukulongana Kukalamba balafwaikwa ukutungililwa pantu balabombesha sana.

⁷ Aya Amayanda ya Bufumu ayakuulwa bwangu yalacitila ubunte mu bwikashi umo yakuulwa. Ku ca kumwenako, inyunshipepala iya mu calo ca Spain yakwete umutwe we lyashi uwatile, “Icitetekelo Cilasesha Impili.” Iyi nyunshipepala yalelanda pa Ng’anda ya Bufumu iyakuulilwe mwi tauni lya Martos kabili mwali ne cipusho ca kuti: “Mwacitile shani pa kuti abantu  babe abaikatana kabili baipeeleshe ukwenda ukufuma mu ncende ishalekanalekana [isha mu Spain] ukwisa ku Martos ku kukuula icikuulwa ica kuti caya ululumbi pa mulandu wa kucikuula bwangu kabili busaka busaka ukucila ifikuulwa fimbi?” Pa kwasuka ici icipusho ici icipande calandile ifyayaswike Nte umo uwabombeleko umulimo wa kukuula. Uyu munyinefwe atile: “Icikalamba icilenga nico, Yehova e utusambilisha.”

8. Mapekanyo nshi ayo Ibumba Litungulula lyasuminishe mu 1999, kabili mulandu nshi?

⁸ Ilyo imyaka ya ba 1900 yalefika ku mpela, abantu abengi mu fyalo ifipiina balitendeke ukwisa mu kuilunda ku cilonganino ca kwa Yehova. Ifilonganino ifingi fyalyeseshe na maka apo fingapesha ukukuula umwa kulonganina. Lelo mu fyalo fimbi cali icakosa pantu aba bwananyina balibapatile kabili balebapumya pantu Amayanda ya Bufumu ayo balekuula tayalemoneka bwino nga kuyalinganya kuli yambi. Lelo ukutendekela mu 1999 Ibumba Litungulula lyalisuminishe ukuti kube amapekanyo ya kukuula bwangu amayanda ya Bufumu mu fyalo ifipiina. Ifyalo ifikankaala fyatendeke ukulasangwilako indalama pa kuti kwaba “ukulingana.” (Belengeni 2 Abena Korinti 8:13-15.) Aba bwananyina ukufuma ku fyalo ifyalekanalekana bali-ipeleshe ukubombako uyu mulimo.

9. Mulimo nshi uwamoneke kwati tukafilwa ukubomba, lelo finshi twabomba?

⁹ Pa kubalilapo fye umulimo walemoneka kwati naukosa. Lipoti ya mu 2001 yalangilile ukuti, Amayanda ya Bufumu ukucila pali 18,300 yalefwaikwa mu fyalo ifipiina 88. Nomba pa mulandu wa kwafwa kwa mupashi wa kwa Lesa ne Mfumu yesu,  Yesu Kristu, takwaba icishingabomba. (Mat. 19:26) Mu myaka fye nalimo 15 ukutula mu 1999 ukushinta mu 2013, abantu ba kwa Lesa balikuula Amayanda ya Bufumu 26,849 pa mulandu wa mapekanyo ya bukuule. * Yehova alitwalilila ukupaala umulimo wa kubila imbila nsuma, kanshi ilyo umwaka wa 2013 walefika Amayanda ya Bufumu na yambi 6,500 muli ifi ifyalo yacili yalefwaikwa. Ici cilepilibula ukuti cila mwaka tulingile ukulakuula Amayanda ya Bufumu ayengi.

10-12. Bushe umulimo wa kukuula Amayanda ya Bufumu ulenga shani Yehova ukucindikwa?

¹⁰ Bushe ukukuula Amayanda ya Bufumu kwacindika shani ishina lya kwa Yehova? Iofeshi lya musambo ilya ku Zimbabwe lyatile: “Mu mweshi fye umo ilyo twatampile ukukuula Amayanda ya Bufumu abantu abengi sana balitendeke ukulaisa mu kulongana.” Cimoneka ukuti mu fyalo ifingi abantu tabalefwaya ukulaisa mu kulongana mpaka ilyo twatendeke ukukwata ififulo ifisuma ifya kupepelamo. Ing’anda ya Bufumu nga yakuulwa ilesula bwangu ica kuti na imbi yalafwaikwa. Nangu cibe fyo te kumoneka fye bwino ukwa fikuulwa ukulenga ukuti abantu baleisa kuli Yehova. Ukutemwa kwa cine uko abakuula ifi ifikuulwa balanga kulalenga abantu balafwaya ukwishiba ifingi pa cilonganino ca kwa Lesa. Katulande pa fya kumwenako fimo.

¹¹ Indonesia. Ilyo umwaume umo uwalemona uko Ing’anda ya Bufumu yalekuulwa aishibe ukuti ababomfi bonse baali bakuitemenwa, atile: “kwena imwe mwe bantu mwaliibela! Ndamona ifyo bonse mubomba no mweo onse nangu ca kuti tamufolelapo. Kwena takwaba akabungwe ka mapepo akengalingana nenu!”

¹² Ukraine. Umwanakashi uwalepita cilabushiku apo balekuula Ing’anda ya Bufumu, umwine fye eka alisondwelele ukuti abalekuula ni Nte sha kwa Yehova no kuti icikuulwa balekuula cikaba Ing’anda ya Bufumu. Atile: “Umwaice wandi alinjebelepo pa Nte sha kwa Yehova. Ilyo namwene ifyo ubukuule bwaleenda bwino, napingwilepo ukuti na ine mfwile ukuilunda kuli ici icilonganino. Nomba naliimwena ifyo balanga ukutemwa.” Uyu mwanakashi alitendeke ukusambilila Baibolo kabili mu 2010 alibatishiwe.

13, 14. (a) Finshi mwasambilila ku fyo umwaume umo no mwina mwakwe bacitile ilyo bamwene bamunyinefwe balekuula Ing’anda ya Bufumu? (b) Kuti mwacita shani pa kuti Ing’anda yenu iya Bufumu ilecindika Yehova?

¹³ Argentina. Umwaume umo no mwina mwakwe baile kuli munyinefwe uwaleyangalila ubukuule bwa Ng’anda ya Bufumu. Umulume atile, “Tulamona ifyo mubomba pa kukuula Ing’anda ya Bufumu eco . . . natupingulapo ukuti tufwile ukulaisa mu kusambilila pali Lesa pano pene.” E lyo lyena aipwishe ati, “Kuti twacita shani pa kuti tuleisa mu kulongana nenu?” Aba abaupana batile, kuti batemwa ukulasambilila Baibolo nga ca kuti bakulabasambilisha bonse capamo na bana. Bamunyinefwe balitemenwe sana kabili balisumine.

¹⁴ Limbi kuti tamwakuulileko Ing’anda ya Bufumu iyo mulonganapo, lelo fingi mwingacita pa cifulo cenu ica kupepelapo  pa kuti cingalacindika ishina lya kwa Yehova. Ku ca kumwenako, kuti muleitako abasambi benu aba Baibolo, na abo mulanshanya nabo ifya mu Baibolo libili libili, na bantu fye bambi aba mu bwikashi ukuti baleisa mu kulongana ku Ng’anda ya Bufumu. Na kabili mwalikwata ne shuko lya kupyanga no kuwamya icifulo ca kupepelapo. E lyo nga ca kuti mwapekanya bwino, kuti limbi mwalasangwilako ku kuwamya Ing’anda yenu iya Bufumu nangu kuti mwasangwilako na ku bukuule bwa fifulo fye fimbi ifya kupepelapo mu fyalo fimbi (Belengeni 1 Abena Korinti 16:2.) Iyi imilimo yonse nayo, ilalenga ishina lya kwa Yehova lilecindikwa.

15-17. (a) Ni bani babomba imilimo iingi pa kukuula? (b) Finshi mwasambilila ku baupana ababomba mu mulimo wa makuule mu fyalo fimbi?

¹⁵ Imilimo iingi iibombwa pa kukuula Amayanda ya Bufumu, Ifikuulwa fya Kulonganinamo Ukulongana Ukukalamba e lyo ne misambo, ibombwa fye na ba bwananyina abafuma mu filonganino fya cikaya. Nalyo line, balafwilishiwa na ba bwananyina abaishiba sana ubukuule abafuma ku fyalo fimbi. Bamo ababomfi bakuitemenwa balaipekanya pa kuti bengaya mu kubomba pa bukuule ku calo cimbi pa milungu iingi. Bambi nabo balaipeelesha pa myaka iingi ukulaya mu kubomba mu fyalo ifyalekanalekana.

¹⁶ Umulimo wa kubomba pa makuule mu fyalo fimbi walikwatako amafya yamo, lelo mwaliba no busuma ubwingi. Ku ca kumwenako, ba Timo na ba Lina, balyenda mu fyalo fya ku Asia, ku Bulaya, na ku South America mu kukuula Amayanda ya Bufumu, ne Fikuulwa Fikalamba ifya Kupepelamo, e lyo na maofeshi ya misambo. Ba Timo batile: “Pa myaka 30 iyo nabomba mu makuule, nga papita fye nalimo imyaka ibili balentuma ukuya mu kubombela ku calo cimbi.” Ba Lina, ba muka ba  Timo nabo batile: “Pa myaka 25 iyo twaikala na bena mwandi twalibomba mu fyalo ifyalekanalekana 10. Icifwaikwa sana kuibikilishako pa kuti ubelele ifya kulya, imiceele, icitundu balanda, icifulo ca kushimikilamo e lyo no kupanga ifibusa ifipya.” * Bushe mu kucita ifi mwaliba ubusuma? Ba Lina batile: “Amafya twapitamo yalituletela insansa ishikalamba nga nshi. Twalimona ifyo bamunyinefwe batulanga ukutemwa ne cileela, kabili twalimona ne fyo Yehova atusakamana bwino. Twalimona ne fyo ubulayo ubo Yesu alaile abasambi bakwe ubwaba pali Marko 10:29, 30 bwafikilishiwa. Twalisanga bankanshi yesu, bamunyinefwe e lyo na bafyashi abengi sana.” Ba Timo nabo batile: “Tulomfwa bwino sana ukubomfya ukulamuka kwesu ku mulimo wacindamisha, uwa kulundulula ifyuma fya Mfumu.”

¹⁷ Ba Darren na ba Sarah ababombako umulimo wa makuule mu Africa, ku Asia, ku Central America, ku Bulaya, ku South America, e lyo na ku South Pacific, bayumfwa ukuti balisambilila ifingi ukucila ifyo baishibe kale. Nangu balekwata amafya, ba Darren batile: “Lipaalo sana ukubomba na bamunyinefwe abafuma mu fyalo ifyalekanalekana. Nalimona ukuti ukutemwa twakwata ukwa kuli Yehova kwaba kwati bushishi fye ubulundanya ica kufwala cimo.” Ba Sara nabo batile: “Nalisambilila ifingi sana ku ba bwananyina abafuma ku nkulilo ishalekanalekana! Nga namona ifyo baipeelesha ukubombela Yehova na ine ndafwaya ukubombesha sana.”

18. Bushe ubusesemo ubwaba pa Amalumbo 110:1-3 bulefikilishiwa shani?

¹⁸ Imfumu Davidi yasobele ukuti nangu ca kuti abatekwa ba Bufumu bwa kwa Lesa bakalakwata amafya, “bakaipeela abene mu kuitemenwa” mu kubomba umulimo wa kwa Lesa. (Belengeni Amalumbo 110:1-3.) Bonse ababombako uyu umulimo balafikilisha aya amashiwi ya busesemo. (1 Kor. 3:9) Ifikuulwa fya maofeshi ya misambo ifyo twakwata, ukubikako na Ifikuulwa fya Kulonganinamo Ukulongana Ukukalamba, e lyo ne minshipendwa ya Mayanda ya Bufumu icalo conse bushininkisho ubukalamba nga nshi ubwa kuti Ubufumu bwa kwa Lesa bwa cine cine kabili bwalitendeka ukuteka. Ala twalikwata ishuko ilikalamba nga nshi ilya kubombela Imfumu Yesu Kristu, mu mulimo uucindika Yehova pantu alilinga ukucindika!