1, 2. a) ¿Mbaʼépa ojapo vyʼápe Ñandejára siervokuéra ymaite guive? b) ¿Mbaʼépa iñimportanteve Jehovápe g̃uarã?

 YMAITE guive Jehová siervokuéra omopuʼã lugár ombotuicha hag̃ua Ñandejára réra. Por ehémplo, umi isrraelíta kyreʼỹme omopuʼã vaʼekue pe tavernákulo ha pojerápe omeʼẽ opa mbaʼe oñekotevẽva ojejapo hag̃ua (Éx. 35:30-35; 36:1, 4-7).

² Jehová nopensái umi materiál de konstruksión iñimportantetereiha ni ombotuichaha chupe (Mat. 23:16, 17). La haʼe oguerohorýva ningo isiervokuéra ombaʼapo kyreʼỹramo, iguáporõ ha oadoráramo chupe hekoitépe. Péva haʼe hína pe rregálo iporãvéva Jehovápe g̃uarã (Éx. 35:21; Mar. 12:41-44; 1 Tim. 6:17-19). ¿Mbaʼérepa iñimportánte jaikuaa upéva? Pórke umi konstruksión oñembyai ha ndojeporuvéi. Por ehémplo pe tavernákulo ha pe témplo ndaiporivéima koʼág̃a. Upéicharamo jepe, Jehová siémpre imanduʼa pe traváho ojapo vaʼekuére isiervokuéra ha mbaʼéichapa ipojera hikuái (elee 1 Corintios 15:58; Hebreos 6:10).

3. ¿Mbaʼépa jahecháta ko kapítulope?

³ Ko tiémpope ñande jaservíva Jehovápe ñambaʼapo jejopy avei ñamopuʼã hag̃ua umi lugár jaadorahápe chupe. Ha hetaiterei mbaʼéma jahupyty Rréi Jesucristo poguýpe. Ojekuaa porãiterei Jehová ñanevendesiha ñañehaʼã haguére (Sal. 127:1). Ko kapítulope jahecháta mbykymínte umi mbaʼe jajapómava ha mbaʼéichapa ombotuicha Jehovápe. Jahechamíta avei mbaʼépa heʼi ñane ermanokuéra ombaʼapo vaʼekue oñemopuʼã hag̃ua umi lugár jaadorahápe Jehovápe.

4. a) ¿Mbaʼérepa ñaikotevẽ lugár jaadora hag̃ua Jehovápe? b) ¿Mbaʼérepa oñemboty umi sukursál ha opyta peteĩva kárgopente? (Ehecha pe rrekuádro “ Ñamopuʼã sukursalkuéra oñekotevẽhápe”.)

⁴ Jahecha haguéicha kapítulo 16-pe, Jehová oipota ñañembyaty jaadora hag̃ua chupe (Heb. 10:25). Umi rreunión omombarete ñande jerovia ha ñanemomýi japredika hag̃ua kyreʼỹme. Koʼã ára pahápe Jehová omboapurave pe predikasión ha upéicha rupi hetaiterei hénte oñemoag̃ui iñorganisasiónre  káda áño (Is. 60:22). Péro heta hetavévo umi oservíva Jehovápe oñekotevẽ hetave lugár oñeimprimi hag̃ua puvlikasionkuéra ha avei salón ñañembyaty hag̃ua.

5. ¿Mbaʼérepa opyta porã pe téra Salón del Reino? (Ehecha avei pe rrekuádro “ Pe Iglésia de la Nuéva Lus”.)

⁵ Ymaite guive umi Estudiánte de la Biblia ohechakuaa oikotevẽha umi lugár imbaʼe teéva oñembyaty hag̃ua. Umi primeroite oñemopuʼã vaʼekue apytépe oĩne raʼe peteĩ ojejapóva áño 1890-pe Virgina Occidentálpe (Estados Unidos). Áño 1930 rire Jehová puévlo omopuʼã térã ombopyahúma heta lugár, péro umíva neʼĩra oñembohéra. Upéi 1935-pe ermáno Rutherford oho Hawáipe. Upépe oñemopuʼã hína kuri peteĩ sukursál ha salón pyahu. Upérõ peteĩ ermáno oporandu ermáno Rútherfordpe mbaʼéichapa oñembohérata upe lugár. Haʼe heʼi: “¿Mbaʼépa ere chupe ñahenóiramo ‘Salón del Reino’? Pórke upévango la jajapóva, jaikuaauka umi notísia porã oñeʼẽva pe Rréinore” (Mat. 24:14). ¡Ajépa opyta porãite upe téra! Tiémpo riremi  oñehenóima upéicha entéro salón oiporúvape kongregasionkuéra ko yvy tuichakuére.

6, 7. ¿Mbaʼépa ojehupyty oñemopuʼãvo Salón del Reino unos kuánto díapente?

⁶ Áño 1970 rire ojekuaa pyaʼeterei ofaltapaha Salón del Reino. Upémarõ umi ermáno Estados Unidospegua ohecha mbaʼéichapa ikatu ojejapo umi lugár iporãva unos kuánto díapente. Áño 1983-pe Estados Unidos ha Canadápe oñemopuʼãma péicha 200 salónrupi. Ojapo hag̃ua ko traváho tuichaitéva oñemoĩ umi komite rrehionál de konstruksión. Ojehechávo péicha oñembaʼapo porãitereiha, pe Kuérpo Governánte 1986-pe odesidi iporãtaha ojesegi ojejapo péicha. Áño 1987-pe oĩma 60 Komite Rrehionál de Konstruksión Estados Unídospe. a Áño 1992-pe oĩma peichagua komite Alemania, Argentina, Australia, Brasil, España, Francia, Italia, Japón, México, Noruega, Sudáfrica ha Suéciape. Añetehápe ñaipytyvõ vaʼerã ñane ermanokuéra ombaʼapóvape omopuʼã hag̃ua Salón del Reino ha de Asambléa. Pe traváho ojapóva hikuái ningo Jehovápe g̃uarã.

⁷ Umi hénte ohechávo umi salón oñemopuʼãha unos kuánto díapente, oñeʼẽ porãiterei Jehová puévlore. Por ehémplo Espáñape peteĩ diário onohẽ peteĩ artíkulo hérava “Pe ojeroviáva omomýi montáña”. Upépe oñeñeʼẽ peteĩ konstruksión ojejapo vaʼekuére siuda de Mártospe. Heʼi: “Ko múndope umi hénte ijehénte opensa. Péro Mártospe  ou heta persóna diferénte lugárgui [Espáñagui], gratiete ombaʼapo, ojesakrifika ha ojapo pyaʼeterei peteĩ traváho hekoitépe ha iporãitereíva. ¿Mbaʼéicha piko ojejapo upéva?”. Okontesta hag̃ua ko porandu pe diário onohẽ la heʼi vaʼekue peteĩ ermáno ombaʼapóva konstruksiónpe. Haʼe heʼi: “Oréve ningo orerekomboʼe Jehová. Upéicha rupínte ikatu rojapo koʼã mbaʼe”.

8. ¿Mbaʼépa odesidi Kuérpo Governánte 1999-pe, ha mbaʼérepa?

⁸ Áño 2000 mboyve umi tetã imboriahúvape hetaiterei hénte oñemoag̃ui Jehová organisasión rehe. Umi kongregasión ojapo ikatumíva omopuʼã hag̃ua salón, péro sapyʼánte ipínta mboriahueterei la isalonkuéra, koʼýte oñekomparávo umi ótro tupão ha témplore. Upéicha rupi oĩ oñembohory vaíva hesekuéra. Péro 1999-pe Kuérpo Governánte odesidi oñepytyvõtaha oñemopuʼã hag̃ua salón umi tetã imboriahúvape. Ha enterove ‘oreko joja’ hag̃ua, umi tetã iplatavéva okolavora umi imboriahuvévandi (elee 2 Corintios 8:13-15). Avei oĩ ermáno ha ermána diferénte tetãgui oñekuaveʼẽva ombaʼapo hag̃ua umi konstruksiónpe.

9. ¿Mbaʼe tembiapópa haʼetévaicha tuichaitereíva, péro mbaʼépa ojehupyty?

⁹ Ñepyrũrã pe traváho haʼete tuichaitereíva. Áño 2001-pe ojejapo peteĩ infórme heʼíva oñekotevẽha 18.300 salón 88 tetã imboriahúvape. Péro ndaipóri ikatuʼỹva jajapo Ñandejára espíritu ha ñande Rréi Jesucristo ñanepytyvõramo  (Mat. 19:26). Áño 1999 guive 2013 peve Ñandejára puévlo omopuʼãma 26.849 salón. b Jehová osegi ovendesi pe predikasión, upévare áño 2013-pe oñekotevẽ gueteri 6.500 salón pyahu koʼã tetãme. Ha káda áño heta hetave oñekotevẽ.

10-12. ¿Mbaʼéichapa ñamombaʼeguasu Jehovápe ñamopuʼãvo umi salón?

¹⁰ ¿Mbaʼéichapa ñamombaʼeguasu Jehovápe ñamopuʼãvo salón pyahu? Pe sukursál oĩva Zimbábuepe omombeʼu: “Un mes ojejapopa rire peteĩ Salón el dóvle hetave umi oúva rreunionhápe”. Heta tetãme umi hénte ndohoséi jepi rreunionhápe ojejapóramo peteĩ lugár ivaimívape. Péro oñemopuʼãramo peteĩ Salón del Reino, tiémpo riremínte hetaiterei la oúva ha oñekotevẽ jeýma peteĩ ipyahúva. Upéicharamo jepe, la hénte ou ohayhúgui Jehovápe, ndahaʼéi iporãgui umi lugár. Umi omopuʼãva umi salón ohechauka ojoayhu añeteha ha upéva omomýi la héntepe opensa porã hag̃ua Jehová organisasión rehe. Jahechami unos kuánto ehémplo.

¹¹ Indonesia. Peteĩ karai ojesareko kuri oikóvo umi ombaʼapóvare omopuʼã hag̃ua peteĩ Salón del Reino. Oikuaávo enterovéva voluntarioha ha ndokovraiha hikuái itraváhore, osẽ heʼi: “Ahecharamoiterei la pejapóva. Pembaʼapo pende pyʼaite guive, vyʼápe ha ndapekovrái. Ndaiporichéne ótro rrelihión peẽichagua”.

¹² Ucrania. Peteĩ kuñakarai ohasa káda día peteĩ konstruksión ypýrupi ha opilla umi ombaʼapóva upépe haʼeha testígo de Jehová. Haʼekuéra omopuʼã peteĩ Salón del Reino. ¿Mbaʼéichaiko oikuaa? Haʼe heʼi: “Che ermána ningo testígo de Jehová, ha haʼe omombeʼuʼimi jepi chéve la pejapóva. Ahechávo mbaʼéichapa pembaʼapo, che aimese avei pende apytépe. Ahecha mbaʼéichapa pehechauka pejoayhuha pejapóva rupive”. Upe rire haʼe oñepyrũ ostudia la Biblia ha ojevautisa 2010-pe.

13, 14. a) ¿Mbaʼépa ojapo peteĩ matrimónio ohechávo pe konstruksión, ha mbaʼépa ñanemboʼe upéva? b) ¿Mbaʼépa rejapokuaa ne salón omombaʼeguasu hag̃ua Jehová réra?

¹³ Argentina. Peteĩ karai ha hembireko oñemboja pe ermáno omotenondévare pe konstruksión. Pe karai heʼi: “Rohecha mbaʼéichapa pembaʼapo ha upévare ore avei rojuse koʼápe roaprende hag̃ua Ñandejáragui”. Upéi oporandu: “¿Mbaʼépa rojapo vaʼerã roju hag̃ua pene rreunionhápe?”. Pe matrimónio oñepyrũ ostudia la Biblia péro oipota ifamiliakuéra entéro ostudia. Umi ermáno vyʼápe heʼi chupekuéra ndaiporimoʼãiha provléma.

¹⁴ Oiméramo nde ndaikatúi raʼe reipytyvõ oñemopuʼã hag̃ua pene salón; ani rejepyʼapy, ikatu gueteri rejapo heta mbaʼe upe lugár omombaʼeguasu hag̃ua Jehová réra. Por ehémplo ikatu reinvita kyreʼỹme ne estudiantekuérape, umi rrevisíta térã ótro héntepe oho hag̃ua rreunionhápe. Ikatu  avei rembaʼapo remyatyrõ ha remopotĩ hag̃ua pe lugár. Rekalkuláramo nde gastokuéra ikatu rekolavora ojereko porã hag̃ua pe salón. Térã upe pláta ikatu ojeporu oñemopuʼã hag̃ua Salón del Reino hetave lugárpe ko yvy tuichakuére (elee 1 Corintios 16:2). Opa koʼã mbaʼe ombotuicha Jehová réra.

15-17. a) ¿Mávapa la ojapóva hetave traváho umi konstruksiónpe? b) ¿Mbaʼépa heʼi umi ombaʼapómava de voluntário, ha mbaʼépa ñaaprende chuguikuéra?

¹⁵ Oñemopuʼãta jave Salón del Reino, de Asambléa ha sukursál heta traváho oñekotevẽva ojapo umi ermáno ha ermána oikóva upe lugárpe. Péro pyʼỹinte ou ermáno ivaléva konstruksiónpe ótro tetãgui. Koʼãva apytépe oĩ umi oñemotiémpova ou hag̃ua oipytyvõ unas kuánta semána, ótro katu oñekuaveʼẽ ombaʼapo hag̃ua heta áñore ha ova umi lugár oñekotevẽhápe.

¹⁶ Umi ermáno oviaháva ótro tetãme oipytyvõ hag̃ua konstruksiónpe, ohasa jepi heta mbaʼe ijetuʼúva. Péro heta mbaʼe porã avei ohupyty hikuái. Por ehémplo, Timo ha Lina oviaháma Ásiape, Europa ha Sudaméricape omopuʼã hag̃ua Salón del Reino, de Asambléa ha sukursál. Timo omombeʼu: “Umi 30 áño ohasa vaʼekuépe oñemeʼẽ chéve peteĩ asignasión pyahu káda dos áñorupi”. Lina ojapóma 25 áño omenda hague Timo rehe. Ko ermána heʼi: “Rombaʼapóma oñondive 10 tetãme. Sapyʼánte ijetuʼu rojepokuaa diferénte tembiʼúre, oĩ lugár haku térã roʼyetereiha. Oñeñeʼẽ diferénte idiómape, ropredika vaʼerã diferénte lugárpe, ha ndoroikuaái jepi avavépe upe rohohápe”. c ¿Mbaʼépa ohupyty hikuái péicha ojesakrifika haguére? Pe ermána heʼi: “Umi  mbaʼe ijetuʼúva rapykuéri rohupyty heta vendisión. Rohecha mbaʼéichapa umi ermáno orerayhu ha orerresivi porã ha avei rohechakuaa Jehová orerayhuetereiha. Ikatu roʼe oñekumpliha Jesús opromete vaʼekue idisipulokuérape Marcos 10:29, 30-pe. Cien vése roreko hetave sy, ermáno ha ermána Jehová puévlope”. Pe ermáno heʼive: “Roñeñandu porãiterei ikatúgui roipytyvõ pe tembiapo iñimportantevévape. Péicha oñemboheta hetave umi mbaʼe orekóva ipoguýpe ñande Rréi”.

¹⁷ Darren ha Sarah ombaʼapóma avei konstruksiónpe África, Asia, Centroamérica, Europa, Pacífico sur ha Sudaméricape. Haʼekuéra heʼi: “La ore rojapóva ndahaʼéi jey mbaʼeve rombojojátaramo umi mbaʼe porã rorresivívare”. Sapyʼánte ijetuʼu hendivekuéra péro Darren heʼi: “Ambaʼapo diferénte ermánondi ko yvy tuichakuére ha upéva peteĩ rregálo iporãitereíva. Ahecha mbaʼéichapa enterove jahayhu Jehovápe ha upéva ñanemoag̃ui ojuehe”. Sarah katu heʼi: “Hetaiterei mbaʼéma aaprende umi ermáno oikóvagui diferénte tetãme. Ahechávo mbaʼéichapa ojesakrifika hikuái oservi hag̃ua Jehovápe, chekyreʼỹve avei ajapo hag̃ua upéicha”.

18. ¿Mbaʼéichapa oñekumpli hína pe profesía oĩva Salmo 110:1-3-pe?

¹⁸ Rréi David heʼíma vaʼekue Ñandejára puévlo ombaʼapotaha kyreʼỹme pe Rréino rehehápe, ijetuʼúramo jepe sapyʼánte la situasión (elee Salmo 110:1-3). Entéro ombaʼapóva koʼãichagua traváhope okumpli hína ko profesía (1 Cor. 3:9). Ko múndo tuichakuére oñemopuʼãma heta sukursál, Salón del Reino ha Asambléa. Upéva ohechauka porãiterei Ñandejára Rréino oexistiha ha ogovernamaha. Ajépa javyʼaite ikatu haguére jaservi Rréi Jesucrístope ha jajapo peteĩ traváho ombotuicháva Jehovápe haʼe omereseháicha.