1, 2. (a) Ania ti nabayagen nga ar-aramiden dagiti adipen ni Jehova? (b) Ania ti napateg ken ni Jehova?

 NABAYAGEN a tagtagiragsaken dagiti nasungdo nga adipen ni Jehova ti agibangon kadagiti pasdek a pakaidayawan ti naganna. Kas pagarigan, sigaganetget a nakiraman dagiti Israelita iti panangibangon iti tabernakulo ken siwawadwad a nangipaayda kadagiti materiales a mausar iti dayta.​—Ex. 35:30-35; 36:1, 4-7.

² Saan a dagiti materiales iti panagibangon ti imbilang ni Jehova a kangrunaan a pakaidayawanna ken saan a dagita ti kapatgan kenkuana. (Mat. 23:16, 17) Ti napateg, wenno ti sagut a nangnangruna a pakaidayawanna, ket ti panagdaydayaw kenkuana dagiti adipenna, agraman ti kinatulok ken kinaregtada iti trabaho. (Ex. 35:21; Mar. 12:41-44; 1 Tim. 6:17-19) Apay a dayta ti napatpateg kenkuana? Gapu ta saan nga agnanayon dagiti pasdek. Kas pagarigan, awanen ti tabernakulo ken ti templo ngem saan a nalipatan ni Jehova ti kinaparabur ken kinagaget dagiti nasungdo nga adipenna a nangsuporta iti pannakaibangon dagita.​—Basaen ti 1 Corinto 15:58; Hebreo 6:10.

3. Ania ti repasuentayo iti daytoy a kapitulo?

³ Dagiti adipen ni Jehova ita sipipinget met nga agibangbangonda kadagiti pasdek a pagdaydayawan. Ken talaga a nakaad-adun ti naibanagtayo babaen ti panangiwanwan ti Aritayo a ni Jesu-Kristo! Nalawag a bembendisionan ni Jehova dagiti panangikagumaantayo. (Sal. 127:1) Iti daytoy a kapitulo, repasuentayo ti sumagmamano laeng kadagiti naibanagtayo ken no kasano a pakaidayawan daytoy ni Jehova. Maammuantayo met ti makuna ti sumagmamano kadagiti nakiraman iti daytoy a trabaho.

4. (a) Apay a kasapulantayo ti ad-adu a lugar a pagdaydayawan? (b) Apay a napagmaymaysa dagiti dadduma a sanga nga opisina? (Kitaenyo ti kahon a “ Panagibangon iti Sanga nga Opisina​—Pannakibagay iti Panagbalbaliw ti Kasasaad.”)

⁴ Kas nailawlawag iti Kapitulo 16, imbilin ni Jehova nga agtataripnongtayo tapno agdaydayaw. (Heb. 10:25) Dagiti gimong saanna laeng a pabilgen ti pammatitayo no di ket parayrayenna pay ti gagartayo a mangasaba. Bayat nga umad-adani ti panungpalan, agtultuloy a pappapartaken ni Jehova ti trabaho. Kas resultana, tinawen a ginasut a ribu ti sumsumrek iti organisasionna.  (Isa. 60:22) Bayat nga umad-adu ti iturayan ti Pagarian, dumakdakkel met ti panagkasapulan kadagiti pasilidad a pagimprentaan tapno mapataud dagiti literatura a naibatay iti Biblia. Kasapulantayo met ti ad-adu a lugar a pagdaydayawan.

5. Apay a maitutop ti awag a Kingdom Hall? (Kitaenyo met ti kahon a “ Ti New Light Church.”)

⁵ Idi rugrugi ti moderno a pakasaritaan ti ili ni Jehova, nakita dagiti Estudiante ti Biblia a kasapulan ti bukodda a pagtataripnongan. Agparang a ti maysa kadagiti immuna a lugar a pagdaydayawan ket naibangon iti West Virginia, U.S.A., idi 1890. Idi 1930’s, sumagmamano a pasdek ti naibangon wenno tinarimaan ti ili ni Jehova, ngem awan pay ti espesipiko nga awag kadagita a pagtataripnongan. Nupay kasta, idi 1935, simmarungkar ni Kabsat Rutherford iti Hawaii. Madama idi a maibangbangon ti maysa a pasdek a kaabay ti baro a sanga nga opisina. Idi naisaludsod no ania ti mayawag iti dayta a pasdek, kinuna ni Kabsat Rutherford: “Ania ngata no awagantayo iti ‘Kingdom Hall,’ yantangay dayta ti trabahotayo, ikaskasabatayo  ti naimbag a damag maipapan iti Pagarian?” (Mat. 24:14) Di nagbayag, nausar met dayta nga awag iti kaaduan a pagtataripnongan nga us-usaren dagiti kongregasion ti ili ni Jehova iti intero a lubong.

6, 7. Ania ti naipaay dagiti Kingdom Hall a napartak ti pannakaibangonna?

⁶ Idi 1970’s, ad-adda nga immadu ti kasapulan a Kingdom Hall. Kas resultana, nangbukel dagiti kakabsat iti Estados Unidos iti epektibo a pamay-an ti panagibangon kadagiti napintas ken praktikal a Kingdom Hall iti sumagmamano laeng nga aldaw. Idi 1983, agarup 200 a Kingdom Hall ti naibangon iti Estados Unidos ken Canada. Tapno maibanag ti trabaho, nangipasdek dagiti kakabsat kadagiti regional building committee. Nagsayaat daytoy a pamay-an isu nga idi 1986, ti Bagi a Manarawidwid pinagbalinna a pormal daytoy nga urnos, ket idi 1987, addan 60 a Regional Building Committee (RBC) iti Estados Unidos. a Idi 1992, adda met dagiti naipasdek nga RBC iti Argentina, Australia, France, Germany, Japan, Mexico, South Africa, ken Spain. Dagiti nagagaget a kakabsat nga agibangbangon kadagiti Kingdom Hall ken Assembly Hall maikarida iti suportatayo ta ti trabahoda ket paset ti sagrado a panagserbi.

⁷ Dagiti Kingdom Hall a napartak ti pannakaibangonna ket nakaipaay iti nagsayaat a panangsaksi iti komunidad a nakaibangonanda. Kas pagarigan, kastoy ti headline ti maysa a pagiwarnak iti Spain, “Ti Pammati Iyakarna Dagiti Bantay.” Maipapan iti pannakaibangon ti Kingdom Hall iti ili ti Martos, insaludsod ti pagiwarnak: “Iti daytoy a lubong a gagangay ti kinamanagimbubukodan,  apay nga adda dagiti boluntario iti nagduduma a rehion [ti Spain] a situtulok a napan iti Martos tapno agibangon iti pasdek nga awan ti makaatiw iti kapartak, kasayaat, ken kaorganisadona?” Nakotar iti artikulo ti sungbat ti maysa kadagiti boluntario a Saksi: “Sinursuruannakami ngamin ni Jehova.”

8. Idi 1999, ania a baro a programa ti inaprobaran ti Bagi a Manarawidwid, ken apay?

⁸ Bayat ti panagngudo ti maika-20 a siglo, adu a tattao ti sumsumrek iti organisasion ni Jehova kadagiti pagilian a pagnanaedan dagiti kakabsat a limitado ti sanikuana. Dagiti lokal a kongregasion inaramidda ti amin a kabaelanda a mangibangon kadagiti pagtataripnonganda. Ngem iti dadduma a pagilian, masapul nga ibturanda ti pannakaumsi ken panangidumduma gapu ta nanumo dagiti Kingdom Hall-da no idilig kadagiti dadduma a pasdek a pagdaydayawan. Ngem nangrugi idi 1999, inaprobaran ti Bagi a Manarawidwid ti programa a mangpapartak iti pannakaibangon dagiti Kingdom Hall kadagiti pagilian a limitado ti sanikuana. Maus-usar dagiti pondo manipud kadagiti narang-ay a pagilian tapno adda “panamagpapada.” (Basaen ti 2 Corinto 8:13-15.) Ken agbolboluntario a tumulong dagiti kakabsat manipud iti sabali a pagilian.

9. Ania a trabaho ti kasla narigat, ngem ania ti naibanag?

⁹ Idi damo, kasla narigat ti trabaho. Ipakita ti report idi 2001 a nasurok a 18,300 a Kingdom Hall ti kasapulan iti 88 a pagilian a limitado ti sanikuana. Ngem babaen ti tulong ti espiritu  ti Dios ken ti Aritayo a ni Jesu-Kristo, awan ti trabaho a saan a posible. (Mat. 19:26) Iti agarup 15 a tawen, manipud 1999 agingga iti 2013, nakaibangon ti ili ti Dios iti 26,849 a Kingdom Hall kas paset daytoy a programa. b Agtultuloy a bembendisionan ni Jehova ti trabaho a panangasaba isu nga idi 2013, kasapulan pay ti agarup 6,500 a Kingdom Hall kadagita a pagilian, ket iti agdama, ginasut ti kasapulan pay a maibangon.

10-12. Kasano a pakaidayawan ti nagan ni Jehova ti pannakaibangon dagiti Kingdom Hall?

¹⁰ Kasano a pakaidayawan ti nagan ni Jehova ti pannakaibangon dagiti baro a Kingdom Hall? Kuna ti report ti sanga nga opisina iti Zimbabwe: “Makabulan kalpasan ti pannakaibangon ti baro a Kingdom Hall, nagdoble ti bilang dagiti tumabtabuno kadagiti gimong.” Iti adu a pagilian, kasla agkedked dagiti tattao a makitimpuyog kadatayo idi awan pay ti maitutop a lugar a pagdaydayawan. Ngem idi adda naibangon a Kingdom Hall, nagalisto a napno dayta isu a masapul manen ti mangibangon iti sabali. Nupay kasta, saan laeng a ti langa ti Kingdom Hall ti pakatignayan dagiti tattao nga umadani ken ni Jehova. Ti pudpudno a Nakristianuan nga ayat nga imparangarang dagiti nangibangon kadagita apektaranna met ti panangmatmat dagiti tattao iti organisasionna. Usigentayo ti sumagmamano a pagarigan.

¹¹ Indonesia. Idi naammuan ti maysa a lalaki a mangbuybuya iti pannakaibangon ti Kingdom Hall a boluntario amin a trabahador, kinunana: “Naidumdumakayo! Nakitak a naimpusuan ken naragsakkayo nga agtrabtrabaho uray no awan ti sueldoyo. Panagkunak, awanen ti sabali a relihion a kas kadakayo!”

¹² Ukraine. Ti maysa a babai nga inaldaw a lumablabas iti pakaibangbangonan ti Kingdom Hall ammona a Saksi ni Jehova dagiti trabahador ken Kingdom Hall ti ibangbangonda. Kinunana: “Saksi ni adingko isu nga ammok ti maipapan kadagiti Saksi ni Jehova. Idi nakitak ti panagibangonyo, kayatko metten ti agbalin a paset daytoy a naespirituan a pamilia. Nakitak no kasanoyo nga ipakpakita ti ayat.” Nayadalan iti Biblia daytoy a babai ken nabautisaran idi 2010.

13, 14. (a) Ania ti masursuroyo iti reaksion ti maysa nga agassawa idi napaliiwda ti pannakaibangon ti Kingdom Hall? (b) Ania ti aramidem tapno ti lugar a pagdaydayawanyo ket pakaidayawan ti nagan ni Jehova?

¹³ Argentina. Adda maysa nga agassawa nga immasideg iti kabsat a mangimatmaton iti panagibangon iti Kingdom Hall. Kinuna ti asawa a lalaki, “Palpaliiwenmi ti panagibangonyo ket . . . inkeddengmi ti agsursuro maipapan iti Dios iti daytoy a lugar.” Sa insaludsodna, “Ania ti aramidenmi tapno mapalubosankami a makigimong ditoy?” Immanamong ti agassawa a mayadalan iti Biblia, ngem iti kondision a karaman ti intero a pamiliada. Siraragsak nga inawat dagiti kakabsat daytoy a kondision.

¹⁴ Mabalin a saanka a nakatulong iti pannakaibangon ti Kingdom Hall a paggigimonganyo, ngem adu latta ti maaramidam  tapno ti lugar a pagdaydayawanyo ket pakaidayawan ti nagan ni Jehova. Kas pagarigan, mabalinmo nga awisen a makigimong dagiti iyad-adalam, sarsarungkaram, ken ti dadduma pay. Mabalinmo met ti tumulong a mangdalus ken mangmantener iti Kingdom Hall-yo. No mangilasinka iti kuarta, mabalin nga adda maitedmo a donasion para iti pannakamantener ti Kingdom Hall-yo wenno iti pannakaibangon dagiti lugar a pagdaydayawan kadagiti dadduma a paset ti lubong. (Basaen ti 1 Corinto 16:2.) Amin dagitoy ket pakaidayawan met ti nagan ni Jehova.

15-17. (a) Siasino ti kaaduan a makiramraman iti trabaho a panagibangon? (b) Ania ti masursurom iti kinuna dagiti pagassawaan a tumultulong kadagiti proyekto a panagibangon iti intero a lubong?

¹⁵ Ti kaaduan nga agtrabtrabaho iti panagibangon kadagiti Kingdom Hall, Assembly Hall, ken pasilidad ti sanga nga opisina ket lokal a kakabsat. Nupay kasta, masansan a tultulongan ida dagiti kakabsat manipud iti sabali a pagilian nga eksperto iti panagibangon. Ti dadduma kadagiti boluntario ket nagplano a naimbag tapno makatulongda kadagiti proyekto iti intero a lubong iti sumagmamano a lawas. Adda met dagiti nakapagserbi iti adu a tawen iti nagduduma a pagilian.

¹⁶ Saan a kaskarina ti tumulong iti trabaho a panagibangon iti intero a lubong ngem mangyeg dayta iti makapnek a gunggona. Alaentayo a pagarigan da Timo ken Lina, a 25 a tawenen nga agassawa. Napanda iti Asia, Europe, ken South America tapno tumulongda nga agibangon kadagiti Kingdom Hall, Assembly Hall, ken sanga nga opisina. Kinuna ni Timo, “Iti napalabas a 30 a tawen, mabaliwan ti pakaidestinuanmi iti gistay tunggal dua a tawen.” Kinuna met ni Lina: “Sangapulo a pagilian ti nagserbianmi ken ni Timo. Adu a pigsa ken tiempo  ti mabusbosmi sakbay a mairuamkami iti baro a taraon, klima, lengguahe, ken teritoria, ken sakbay a maaddaankami iti baro a gagayyem.” c Ania ti resulta ti panagreggetda? Kinuna ni Lina: “Dagiti karit ket nangyeg iti adu a bendision. Nariknami ti Nakristianuan nga ayat ken kinamanagpadagus ken ti naayat a panangaywan ni Jehova. Nakitami pay ti kaitungpalan ti kari ni Jesus kadagiti adalanna, a nailanad iti Marcos 10:29, 30. Maminsangagasut nga immadu ti naespirituan a kakabsat ken inami.” Kinuna ni Timo: “Nakariknakami iti nauneg a pannakapnek gapu ta us-usarenmi ti abilidadmi iti katatan-okan a panggep, ti pannakiraman iti panangpaadu kadagiti sanikua ti Ari.”

¹⁷ Da Darren ken Sarah, a timmulong kadagiti proyekto a panagibangon iti Africa, Asia, Central America, Europe, South America, ken South Pacific, nariknada nga ad-adu ti inawatda ngem iti impaayda. Iti laksid dagiti karit a nakaipasanguanda, kinuna ni Darren: “Maysa a pribilehio ti makipagtrabaho kadagiti kakabsat iti nagduduma a paset ti lubong. Nakitak a ti ayattayo ken ni Jehova ket kasla lubid a nanglikmut iti globo ken namagsisilpo kadatayo.” Kinuna ni Sarah: “Adu ti nasursurok kadagiti kakabsat a nagduduma ti kulturana! Ti pannakakitak kadagiti insakripisioda tapno makapagserbida ken Jehova tinignaynak nga agtultuloy a mangaramid iti amin a kabaelak.”

18. Kasano a matungtungpal ti padto iti Salmo 110:1-3?

¹⁸ Impadto ni Ari David nga uray no makapasar iti karit dagiti iturayan ti Pagarian ti Dios, situtulok latta nga ‘idatonda ti bagbagida’ para iti interes ti Pagarian. (Basaen ti Salmo 110:1-3.) Amin a makiramraman iti trabaho a mangsuporta iti Pagarian ket tumultulong iti pannakatungpal dayta a padto. (1 Cor. 3:9) Dagiti adu a pasdek iti sanga nga opisina, ginasut nga Assembly Hall, ken pinullo ribu a Kingdom Hall iti intero a lubong ket nabatad a pammaneknek a pudpudno ken agturturayen ti Pagarian ti Dios. Talaga a maysa a pribilehio ti agserbi iti Ari a ni Jesu-Kristo babaen ti trabaho a pakaidayawan ni Jehova!