1, 2. (a) Bakalume ba Yehoba batendekele kala kuba ka? (b) Ñanyi bintu byanemeka Yehoba?

BAKALUME ba Yehoba batendekele kala kushimika bishimikwa bileta munema pa jizhina janji. Kyakumwenako, bena Isalela baingijileko mwingilo wa kushimika tente wa lusambakeno wa Lesa kabiji bapaine bya kushimikila na muchima yense.—Lupu. 35:30-35; 36:1, 4-7.

² Yehoba kechi umona amba bintu byo bengijisha pa kushimika byo byakilamo kunema ne. (Mat. 23:16, 17) Bino bintu byanemeka Yehoba ke kumupopwela ku bakalume banji ne kwingila mwingilo wanji na muchima wa kwipana kabiji na mukoyo. (Lupu. 35:21; Mako 12:41-44; 1 Timo. 6:17-19) Kino kishinka kyanema bingi. Mambo ka? Mambo bishimikwa kechi bikajijila ne. Kyakumwenako, tente wa lusambakeno ne nzubo ya Lesa bifwako. Nangwa kya kuba bino bishimikwa bifwako, bino Yehoba kechi walubako bumpanyi ne mingilo yaingijile bakalume banji bakishinka batundaikile mwingilo wa kushimika ne.—Tangai 1 Kolinda 15:58; Bahebelu 6:10.

3. Ñanyi bintu byo tusakwisambapo mu kino kitango?

³ Ne lelo jino, Bakalume ba Yehoba bengila bingi kushimika mapunzha a kupopwelapo. Bintu byo twauba na mambo a lutangijilo lwa Mfumu Yesu Kilishitu ke byakukumya bingi. Yehoba wapesha mingilo yetu. (Sala. 127:1) Mu kino kitango, tusakwisamba pa mingilo imo yaubiwa ne byo yaleta munema kwi Yehoba. Kabiji tusakumona ne byaambapo bantu bamo baingijilepo mu ino mingilo.

4. (a) Mambo ka o tukebela mazubo akwabo a kupopwelamo? (b) Mambo ka o bavwangila maofweshi a musampi? (Monai ne kakitenguluzha ka kuba’mba “Kushimika Misampi na Mambo a Kubayilako kwa Mwingilo.”)

⁴ Byonka byo twafunjile mu Kitango 16, Yehoba ukeba’mba tupwilenga pamo na kumupopwela. (Hebe. 10:25) Kupwila kwetu kechi kukoseshatu lwitabilo lwetu ne, bino ne kwitulengela kwikala na kizaku kya kusapwila. Mu ano moba a kupelako, Yehoba watwajijila kukwasha mwingilo kuyilako palutwe. Na mambo a bino, bantu babena kuvujilakotu mu jibumba janji pa mwaka pa mwaka. (Isa. 60:22) Kuvujilako  kwa bangikazhi ba Bufumu kwalengela kwikala na bishimikwa bikwabo bya kupulintilamo mabuku alumbulula Baibolo. Kabiji kubena kukebewa ne mapunzha akwabo a kupopwelapo.

5. Mambo ka jizhina ja kuba’mba Nzubo ya Bufumu o jayilamo? (Monai ne kakitenguluzha ka kuba’mba “Chechi wa Kyeya Kyakatataka.”)

⁵ Kufumatu ne kala, bantu ba Yehoba Bafunda Baibolo bakebelenga kwikala na bishimikwa byabo bene bya kupopwelamo. Mpunzha itanshi ya kupopwelamo yo bashimikile yajinga mu West Virginia, U.S.A., mu 1890. Mu myaka ya mu ma 1930, bantu ba Yehoba bashimikile nangwa kuwamisha bishimikwa byavula, bino ano mapunzha kechi akijinga na jizhina ne. Nangwa byonkabyo, mu 1935 Mulongo Rutherford wayile ku Hawaii ko bashimikilenga ofweshi wa musampi wakatataka pamo na kishimikwa kya kupopwelamo. Byo bamwipwizhe byo bakatelanga kino kishimikwa, Mulongo Rutherford wakumbwile’mba: “Byo kiji kuba’mba tusapwila mambo awama a Bufumu, nanchi kechi twafwainwa  kwikitelanga’mba ‘Nzubo ya Bufumu ne nyi?’” (Mat. 24:14) Jino jizhina kechi jajingatu ja kino kishimikwa kyo bashimikilenga ne, bino jo jo batendekele kwingijisha pa kutela mapunzha a kupopwelapo engijisha bipwilo bya bantu ba Yehoba mwaya ntanda yonse.

6, 7. Nga kushimika Mazubo a Bufumu mu mobatu acheche kwalengela ka?

⁶ Byo kyafikilenga mu ma 1970, Mazubo a Bufumu avula akebewenga. Na mambo a bino, balongo ba mu United States batendekele kwingijisha jishinda jawama ja kushimikilamo Mazubo a Bufumu mu mobatu acheche. Mu 1983, mu United States ne mu Canada mwashimikilwe Mazubo a Bufumu a uno mutundu pepi 200. Pa kuba’mba bengile bulongo uno mwingilo, balongo balengele tuvoto twa bantungi ba mpunzha. Jino jishinda jaingijile bingi bulongo kya kuba mu 1986, Jibumba Jitangijila jaswishishe luno lunengezho kutwajijila kabiji mu 1987, mu United States mwajinga Tuvoto twa Bantungi ba Mpunzha 60. * Mu mwaka wa 1992, mu byalo nabiji Argentina, Australia, France, Germany, Japan, Mexico, South Africa ne Spain namo basajijilemo Tuvoto twa Bantungi ba Mpunzha. Twafwainwa kutundaikanga bano balongo bashimika Mazubo a Bufumu ne Mazubo a Kubuñenamo mambo mwingilo ye bengila ke lubaji lwa mwingilo wazhila.

⁷ Ano Mazubo a Bufumu o bashimikanga mu mobatu acheche, alengejile bantu ba mu nyaunda kutambwila bukine. Mu pepala wa byambo wa ku Spain mwajinga mutwe wa  kuba’mba “Lwitabilo Lulengela Kuvilula Mitumba.” Pa kwamba pa Nzubo ya Bufumu yashimikilwenga mu muzhi wa Martos, pepala wa byambo waambile’mba: “Mu kino kyalo muji bantu betemwa, bakonsha kwipana byepi kufuma ku mapunzha apusana pusana a Spain kwiya ku Martos na kushimika nzubo yawama bulongo mu kimyetu kicheche saka bakwatankana?” Pa kukumbula bino, mu kino kibaaba mwajinga byambo byaambile Kamonyi wamwingilo wipana amba: “Kino kyakonsheka mambo Yehoba ye witufunjisha.”

8. Mu 1999, ñanyi lunengezho lwakatataka lwaswishishe Jibumba Jitangijila, kabiji mambo ka?

⁸ Ku mpelo ya myaka kitota kya bu 20, mu byalo muji balongo bayanji, bantu batendekele kuvujilako mu jibumba ja Yehoba. Balongo baingijile na ngovu kushimika mapunzha a kupopwelapo. Na mambo a kuba Mazubo a Bufumu kechi amwekanga bulongo pa kwiesakanya na machechi akwabo ne, mu byalo bimo batendekele kwibaseka ne kwibamanyika. Nangwa byonkabyo, kutendeka mu 1999, Jibumba Jitangijila jaswishishe mutanchi wa kushimikilamo Mazubo a Bufumu mu byalo biyanji. Mali afumine mu byalo biji na mali apainwe pa kuba’mba “kwikale kwesakana.” (Tangai 2 Kolinda 8:13-15.) Kabiji balongo ne banyenga kufuma mu byalo bikwabo bepaine kwingila mwingilo.

9. Ñanyi mwingilo wamwekele kukatazha, pano bino, bintu ka byafuminemo?

⁹ Kimye kitanshi, uno mwingilo wamwekele kukatazha. Kwesakana na sawakya wa mu 2001, wamwesheshe kuba’mba  kwakebewenga Mazubo a Bufumu 18,300 mu byalo 88 biyanji. Pano bino, na bukwasho bwa mupashi wa Lesa ne Mfumu wetu aye Yesu Kilishitu, kafwako kintu kyakatazha ne. (Mat. 19:26) Pa myaka 15 yapitapo ko kuba’mba kufuma mu 1999 kufika mu 2013, bantu ba Lesa bashimika Mazubo a Bufumu 26,849. * Yehoba watwajijila kupesha mwingilo wa kusapwila, kya kuba mu 2013 kwakebewenga Mazubo a Bufumu 6,500 mu byonka bino byalo kabiji pa mwaka pa mwaka kubena kukebewa bipwilo byavula.

10-12. Kushimika kwa Mazubo a Bufumu kwaleta byepi munema ku jizhina ja Yehoba?

¹⁰ Nga uno mwingilo wa kushimika Mazubo a Bufumu waleta byepi munema pa jizhina ja Yehoba? Sawakya wafumine ku ofweshi wa musampi wa ku Zimbabwe waambile’mba: “Panyuma ya kushimika Nzubo ya Bufumu mu ñondo umotu, bantu batanwa kukupwila bavujilako.” Mu byalo byavula, bantu kechi bakeba kupwila ne atweba umvwe kechi paji kishimikwa kya kupopwelamo kyawama ne. Bino umvwe bashimika Nzubo ya Bufumu, bantu beeya na kupwila bavula bingi kya kuba bashimikilapo ne ikwabo. Pano bino, kechi kumwekatu bulongo kwa kishimikwa kulengela bantu kwiya kwi Yehoba ne. Bino ke butemwe bwikala pa bena Kilishitu babena kushimika ano Mazubo a Bufumu bulengela bantu kupimpula byo bamona jibumba ja Lesa. Twayai twisambeko pa byakumwenako bimo.

¹¹ Ku Indonesia. Mwanamulume umo wamwenengako byo bashimikilenga Nzubo ya Bufumu byo ayukile kuba’mba bonse baingijilenga kechi bafola ne, waambile’mba: “Anweba bantu mwankumisha bingi. Namona byo mubena kwingila na muchima umo ne na lusekelo nangwa kya kuba kechi mufola ne. Kafwako bupopweshi bukwabo buji nobe bwenu ne!”

¹² Mu Ukraine. Mwanamukazhi wapitanga jonse po bashimikilenga Nzubo ya Bufumu wayukile kuba’mba baingijilenga bajinga Bakamonyi ba kwa Yehoba kabiji amba bashimikilenga Nzubo ya Bufumu waambile’mba: “Nkasami wa mukazhi waikele Kamonyi ye wambujile pa Bakamonyi ba kwa Yehoba. Byo namwene byo bashimikilenga, nakebelenga kwikala mu kino kisemi kya ku mupashi. Namona byo mwitemwa.” Uno mwanamukazhi watendekele kufunda Baibolo kabiji wabatizhiwe mu 2010.

13, 14. (a) Ñanyi bintu byo mwafunjilako ku byaubile bamulume ne mukazhi kimye kyo bamwene byo bashimikilenga Nzubo ya Bufumu? (b) Mwakonsha kuba byepi pa kuba’mba mpunzha yenu ya kupopwelapo iletenga munema ku jizhina ja Yehoba?

¹³ Mu Argentina. Bamulume ne mukazhi bayile ku mulongo watajilenga pa kushimika Nzubo ya Bufumu. Mwatawanji waambile’mba, “tubena kumona byo mubena kushimika Nzubo ya Bufumu kabiji tubena kukeba kufunda pe Lesa mu ino nzubo.” Waipwizhe kuba’mba, “Twafwainwa kuba byepi pa kuba’mba tupwilenga pano?” Bano bamulume ne mukazhi bakebelenga kufunjila pamo Baibolo na kisemi kyabo. Balongo baswile kwibafunjisha.

 ¹⁴ Kampe kechi mwajinga na kimye kya kushimikako Nzubo ya Bufumu mo mupwila ne, pano bino mwakonsha kwingilako mingilo ikwabo pa mpunzha yo mupopwelapo pa kuba’mba iletenga munema ku jizhina ja Yehoba. Kyakumwenako, mwakonsha kwitako bo mufunjisha Baibolo, bantu bo mubwelako na kumona jibiji ne bantutu bakwabo kwiya na kupwila pa Nzubo ya Bufumu. Kabiji mwakonsha ne kukwashako kuwamisha ne kulama bulongo mpunzha ya kupopwelapo. Inge mwanengezhezha jimo mali, mwakonsha ne kupana bupe bwa kuwamishishamo Nzubo ya Bufumu mo mupwila nangwa kupana bupe pa kuba’mba bashimike mazubo a kupopwelamo mwaya ntanda. (Tangai 1 Kolinda 16:2.) Ino mingilo yonse inemeka jizhina ja Yehoba.

15-17. (a) Bañanyi bengila pakatampe mu mwingilo wa kushimika? (b) Ñanyi bintu byo mwafunjilako ku byaambile bantu baji mu masongola baingilapo mu mwingilo wa kushimika mu byalo byavula?

¹⁵ Balongo ne banyenga ba mu kyokyo kyalo bo bengila mingilo yabaya pa kushimika Mazubo a Bufumu, Mazubo a Kubuñenamo ne misampi. Pano bino, bebakwasha ku balongo ne banyenga bafuma ku byalo bikwabo bayuka ino mingilo. Bamo balongo baleka mingilo yabo pa kuba’mba baye na kukwasha kushimika pa milungu yavula. Bakwabo bepana kwingila ino mingilo pa myaka yavula saka bavilaukatu.

¹⁶ Mwingilo wa kushimika mu byalo muji bingi makatazho, pano bino mufuma bintu byawama. Kyakumwenako, ba Timo ne ba Lina bapitañana mu byalo byavula nabiji Asia, Europe, ne South America na kwingila mu mwingilo wa kushimika Mazubo a Bufumu, Mazubo a Kubuñenamo ne misampi. Ba Timo baambile’mba, “Pa myaka 30 yapitapo, bantumanga kuya na kwingijila kukwabo panyuma ya myaka  ibiji.” Panyuma ya kupitapo myaka 25 saka besongola kala ne ba Lina, baambile’mba: “Naingila ne ba Timo mu byalo 10. Papita kimye kyabaya pa kuba’mba tupijilwe na bya kuja, mpunzha, mulaka, nyaunda ya kusapwilamo ne kulenga balunda.” * Nanchi mwafuma byawama nyi? Ba Lina baambile’mba, “Mu makatazho mwafuma mapesho avula bingi. Twamona butemwe bwa bwina Kilishitu byo buji ne Yehoba byo etulama. Twamona ne kufika kwa mulaye Yesu ye aambijile baana banji ba bwanga uji mu Mako 10:29, 30. Tuji na balongo, banyenga ne bainetu ba ku mupashi bavula.” Ba Timo baambile’mba, “Kituletela bingi lusekelo pa kwingijisha busendwe bwetu mu mingilo yakilamo kunema ne kukwashako kutwala palutwe bintu bya Mfumu.”

¹⁷ Ba Darren ne ba Sarah baingijileko mu mwingilo wa kushimika mu Africa, Asia, Central America, Europe, South America, ne mu South Pacific, bashiinwa amba batambwila bintu byavula kukila byo bapana. Nangwa kya kuba bapichilenga mu makatazho, ba Darren baambile’mba: “Ke kintu kyawama bingi kwingila na balongo baji mu byalo byapusana pusana. Namona bantu ba Yehoba byo twakwatankana ntanda yonse na mambo a kutemwa Yehoba.” Ba Sarah baambile’mba: “Nafunjilako bintu byavula ku balongo ne banyenga baji na bisho byapusana pusana. Kumona byo bepana pa kwingijila Yehoba kwandengela kutwajijila kumwingijila papelela bulume bwami.”

18. Bungauzhi bwanembwa mu Salamo 110:1-3 bubena kufika byepi?

¹⁸ Mfumu Davida waambijile jimo kuba’mba nangwa kya kuba bangikazhi bakapitanga mu makatazho, “bakepana na muchima yense” kutundaika Bufumu. (Tangai Salamo 110:1-3.) Bonse bengilako mu mwingilo wa kutundaika Bufumu babena kufikizha bino byambo bya bungauzhi. (1 Ko. 3:9) Bishimikwa byavula bya maofweshi a musampi, Mazubo a Kubuñenamo ne Mazubo a Bufumu aji mwaya ntanda yonse amwesha kuba’mba Bufumu bwa Lesa bwa kine kabiji bubena kulama. Byo kyawamapo kwingijila Mfumu aye Yesu Kilishitu mu mwingilo unemeka Yehoba!