1, 2. (a) I bika bilonga bengidi ba Yehova tamba kala? (b) I bika bikwete Yehova na bulēme?

 BENGIDI ba kikōkeji ba Yehova i bobake byūbakwa bitumbija dijina dyandi. Kimfwa, bene Isalela bāingile na bupyasakane mwingilo wa kūbaka kipema ne kupāna byabuntu bya kutūla ku lūbako.—Div. 35:30-35; 36:1, 4-7.

² Yehova katalangapo byūbakwa bu byo bintu bibajinji bimutumbija, aa, kadi kebimonangapo bu byo bya mvubu kutabuka. (Mat. 23:16, 17) Kine kitēle’ko Yehova mutyima mpata, i kyabuntu kimutūmbija kipityile byonso, ke butōtyi bumutōta bengidi bandi kadi, kubadila’mo ne mutyima wabo wa kwituma ne bupyasakane bwabo mu mwingilo. (Div. 35:21; Mako 12:41-44; 1 Tm. 6:17-19) Buno i bubine bwa kamweno kutabuka. Mwanda waka? Mwanda kūbaka kushilulanga, kadi kupwanga. Kimfwa, kipema ne tempelo pano kebikidi’kopo. Lūbako lubwanya kulekibwa, ino Yehova aye kedilwepo buntu ne bukomo bwa bengidi bandi ba kikōkeji bākwatakenye lūbako pa kala.—Tanga 1 Kodinda 15:58; Bahebelu 6:10.

3. I bika byotusa kumona mu uno shapita?

³ Bengidi ba Yehova dyalelo nabo i bengile bininge mu kūbaka bifuko pa kutōtela. Bintu byotulongele mu buludiki bwa Mulopwe wetu Yesu Kidishitu i bitulumukwa! Bine, Yehova i mwesele bukomo bwetu. (Ñim. 127:1) Mu uno shapita, tusa kumona’mo mingilo mityetye’tu yalongelwe ne muswelo oitumbije Yehova. Tusa kwimvwana ne binenwa bya bantu bamo baingile mu uno mwingilo.

4. (a) Mwanda waka tusakilwa bifuko bivule bya kutōtela’po? (b) Mwanda waka misambo imo yatyangilwe? (Tala kapango “ Lūbako lwa Musambo—Kujadika Mungya Bisakibwa.”)

⁴ Monka motwesambile’kyo mu Shapita 16, Yehova usakanga twibungile pamo mwanda wa kumutōta. (Bah. 10:25) Kubungakana kwetu kukomejanga lwitabijo lwetu ne kwitutonona tusapule bininge. Pano penda pafula mafuku a mfulo, Yehova upēlakanyanga uno mwingilo. O mwanda mwaka ne mwaka, bantu tununu ne tununu batwelanga mu bulongolodi bwandi. (Isa. 60:22) Byenda bivudila’ko babikalwa ba Bulopwe, o mwanda mobo a  kutampila’mo mabuku esambila pa Bible nao asakilwa kuvudijibwa. Kadi tusakilwa ne bifuko bivule bya kutōtela’po.

5. Mwanda waka dijina Njibo ya Bulopwe i difwaninwe? (Tala ne kapango “ Kipwilo kya Mwinya Mupya.”)

⁵ Ku ngalwilo kwa mānga ya bantu ba Yehova ba mu ano mafuku, Befundi ba Bible bashilwile kumona’mba basakilwa bifuko bivule byabo byabō bya kupwidila’mo. Bimweka’mba kifuko kibajinji kya kutōtela’po kyobaūbakile i kyokya kya mu Virjini wa Kushika, États-Unis, mu 1890. Dya mu myaka ya 1930, bantu ba Yehova baūbakile nansha kulongolola mobo mavule, ino bino bifuko bya kupwidila’po byadi kebyainikilwe dijina dya kwibishiyañanya. Ino mu 1935, Tutu Rutherford waendele mu Hawaii, mwadi mūbakwa njibo imo koku nako bobaka bilo mipya ya musambo. Pobaipangwile Tutu Rutherford dijina difwaninwe kwitwa kino kyūbakwa, walondolwele amba: “Mwene i biyampe twiite bu ‘Njibo ya Bulopwe,’ mwanda byo abyo byotulonga, tusapulanga myanda miyampe ya Bulopwe?” (Mat. 24:14) Kepaijijepo dino dijina dyendele’mo dyashilula kutelelwa ne  bifuko bivule bya kutōtela’po byadi bingidijibwa na bipwilo bya bantu ba Yehova ntanda yonso.

6, 7. Le kūbaka bukidibukidi Mobo a Bulopwe i kulete bika?

⁶ Dya mu myaka ya 1970, kisakibwa kyabaila’ko mpata bya kūbaka Mobo a Bulopwe. Pa kupwa kino kisakibwa, batutu mu États-Unis batūdile’ko manwa a mwa kūbakila mobo mayampe, kadi mafwaninwe, mu mafuku matyetye. Dya mu 1983, kwaūbakilwe kala kintu kya Mobo a Bulopwe 200 mu États-Unis ne mu Kanada. Pa kuvuija uno mwingilo, batutu babundile makomite a lūbako lwa mu mwaba. Ano manwa aendekele biyampe, enka nenki mu 1986, Kitango Kyendeji kyashimatyija ino mpangiko, kadi mu 1987, kwabundilwe kala Makomite a Lūbako lwa mu Mwaba (CCR) 60 mu États-Unis. a Mu 1992, ano Makomite atūdilwe ne mu Afrika wa Kunshi, Alemanye, Arjantine, Eshipanye, Franse, Jampani, Meksike, ne mu Ostrali. Bine, tufwaninwe kukwatakanya bano banabetu bengila bininge pa kūbaka Mobo a Bulopwe ne a Bitango, mwanda mwingilo obengila ubadilwa mu mingilo ijila.

⁷ Kūbaka Mobo a Bulopwe bukidibukidi namino kuletanga bukamoni butulumukwa mu bibundi moobakilwa. Kimfwa, julunale umo wa mu Eshipanye walupwile mutwe wa mwanda unena’mba, “Lwitabijo Lutundulula Ngulu.” Uno julunale, pa kwisambila pa kūbakwa kwa Njibo ya Bulopwe mu kibundi kya Martos, waipangwile amba: “Le bibwanika namani mu ino ntanda ya katwe-kobe, bantu ba kwiswila ba mu bibundi palapala [bya mu Eshipanye] bāye  mu Martos kūbaka ino njibo bukidibukidi, mu muswelo mufike’po, kadi muteakanibwe kutabuka?” Ino julunale yalondolwele na kupituluka mu binenwa bya Kamoni umo wa kwituma amba: “Shi byabwanikile, i mwanda twi bantu bafundijibwe na Yehova.”

8. Le i mpangiko’ka yaitabijibwe na Kitango Kyendeji mu 1999, ne mwanda waka?

⁸ Dya ku mfulo kwa myaka ya katwa ka 20, bantu i batūtyikile mu bulongolodi bwa Yehova mu matanda mudi banabetu ba misokwe mityetye. Bipwilo bya mu matanda’a byalongele mungya bukomo bwabyo bwa kūbaka bifuko pa kutōtela. Mu matanda amo, baūminine kufutululwa ne kusañunwa pa mwanda wa yabo Njibo ya Bulopwe mizobe, mipitwe na bifuko bikwabo bya kutōtela’po. Ino, ku ngalwilo kwa 1999, Kitango Kyendeji kyaitabije kwikale mpangiko ya kūbaka bukidibukidi Mobo a Bulopwe mu matanda enda ashidimuka. Matanda mavule mashidimuke aletele lupeto amba kwikale “kwenzankana.” (Tanga 2 Kodinda 8:13-15.) Kadi batutu ne bakaka ba kwituma batambile mu matanda palapala mwanda wa kukwasha ku uno mwingilo.

9. I mwingilo’ka wadi umweka bwa mukomo, ino i mufikidije bika?

⁹ Ku ñanjilo, uno mwingilo wadi umweka bu mukomo. Lapolo wa mu 2001 walombwele amba kusakilwa Mobo a Bulopwe 18 300 mu matanda mashidimuke 88. Ino, i kutupu mwingilo ukomena mushipiditu wa Leza ne Mulopwe wetu Yesu Kidishitu. (Mat. 19:26) Mu kintu kya myaka 15,  tamba mu 1999 kufika mu 2013, bantu ba Leza baubakile Mobo a Bulopwe 26 849 mu ino mpangiko. b Yehova weselanga nyeke mwingilo wa busapudi, o mwanda mu 2013, kwadi kukisakilwa Mobo a Bulopwe kintu kya 6 500 mu ano matanda, kadi pano, mwaka ne mwaka kusakilwanga mobo makwabo tutwa na tutwa.

10-12. Le lūbako lwa Mobo a Bulopwe i lutumbije namani dijina dya Yehova?

¹⁰ Le kūbakwa kwa ano Mobo a Bulopwe mapya i kutumbije dijina dya Yehova namani? Lapolo imo ya bilo ya musambo wa Zimbabwe inena’mba: “Divule dine shi tubapu kūbaka Njibo ya Bulopwe mipya, mu kweji umo’tu, bantu batanwa ku kupwila bavudilanga’ko pabidi.” Mu matanda mavule, bantu bavule beluñanga netu pa kupwa kumona’mba kubaikala kifuko kiyampe kya kutōtela’po. Shi Njibo imo ya Bulopwe ibaūbakwa, kepejengapo kala ke kusakilwa mikwabo. Ino, ke’nkapo mumwekelo wa byūbakwa ukokela bantu kudi Yehova. Buswe bwa binebine bwa bwine Kidishitu bwiswele boba bobaka ano mobo budi na lupusa pa muswelo umona bantu bulongolodi bwandi. Tala’tu bimfwa bityetye.

¹¹ Indonezi. Muntu umo wadi ubandila lūbako lwa Njibo imo ya Bulopwe pa kujingulula’mba bonso i bengidi ba kwituma bitupu, wanene amba: “Banwe’ko mwi bantu batulumukwa kashā! Nemumone mwingila muntu ne muntu na mutyima onso kadi na nsangaji, nansha byokebemufutangapo lupeto. Namone’mba i kutupu kipwilo kikwabo kidi bwa kyenu!”

¹² Ikrene. Mwana-mukaji umo wadi upityilanga difuku ne difuku kubwipi na pobakilwa Njibo ya Bulopwe, wafudile ku kunena’mba bano bobaka’ba i Batumoni ba Yehova ne kino kyobobaka i Njibo ya Bulopwe. Wanene amba: “Naimvwene myanda ya Batumoni ba Yehova kudi nkasami mwana-mukaji wadi nandi Kamoni. Ponamwene mobobakila, natyipile nami kwikala mu kino kisaka kya ku mushipiditu. Namone amba muno mo mudi buswe.” Uno mwana-mukaji waitabije kwifunda Bible, wabatyijibwa mu 2010.

13, 14. (a) I mwanda’ka ukankamika owamona mu byalongele ba mulume ne mukaji pa kupwa kumona mingilo pa kifuko pobakilwa Njibo ya Bulopwe? (b) Le i bika byobwanya kulonga pa kusaka’mba kifuko kyenu kyomutōtela’po kitumbije dijina dya Yehova?

¹³ Arjantine. Ba mulume ne mukaji bamo bafwenene tutu utala kifuko kyūbakilwa’po Njibo ya Bulopwe. Mulume wanene amba, “Twadi tutala na katentekeji momubakila, ino . . . twakwete butyibi bwa kwifunda myanda ya Leza mu kino kifuko.” Kupwa waipangula’mba, “Le i bika byotufwaninwe kulonga pa kusaka betwitabije netu kupwila pano?” Ba mulume ne mukaji baitabije kwifunda Bible, amba napo poso’nka shi kisaka kyonso kidi’po. Banabetu baitabija na nsangaji byalombele kino kisaka.

¹⁴ Padi kwatenwepo paūbakilwe Njibo ya Bulopwe yomupwidila’mo, ino nansha nabya, ubwanya kulonga bivule na kukwasha ku kulama kifuko kyomutōtela’po amba  kitumbije dijina dya Yehova. Kimfwa, ubwanya kwita na nsangaji bifundwa bya Bible, bantu bojokela’ko, ne bantu bakwabo bāye kupwila nobe ku Njibo ya Bulopwe. Kadi udi na muswelo wa kukwasha ku kukundula ne kulama kifuko kyetu kya kutōtela’po. Shi upange bintu senene, ukabwanya kupāna byabuntu bya kulama nabyo Njibo ya Bulopwe yomupwidila’mo nansha bya kukwasha ku kūbaka bifuko bya uno muswelo mu bipindi bikwabo bya ntanda. (Tanga 1 Kodinda 16:2.) Ino mingilo yonso ikwashanga ku kutumbija dijina dya Yehova.

15-17. (a) I bāni bavuijanga mingilo mivule ya mu lūbako? (b) Le i ñeni’ka yowaboila ku binenwa bya ba mulume ne mukaji baingile mu mwingilo wa lūbako lwa ntanda yonso?

¹⁵ Mingilo mivule ya Mobo a Bulopwe, Mobo a Bitango, ne mobo a misambo ingilwanga na batutu ne bakaka ba mu kibundi’mwa. Inoko divule, bakwashibwanga na batutu ne bakaka batambile mu matanda makwabo badi na bwino mu lūbako. Bengidi bamo ba kwituma beteakenye mwa kukengidila mu mpangiko ya lūbako mu matanda makwabo mu bula bwa mayenga mavule. Bangi nabo baitabije kwingila myaka mivule, badi bobaka koku, ke badi koku.

¹⁶ Mwingilo wa lūbako ntanda yonso udi na bikoleja byao, ino kadi uletanga bya buyabuya. Kimfwa, ba Timo ne Lina, bajokolokele mu Azia, Bulaya, ne mu Amerika wa Kunshi bobaka Mobo a Bulopwe, Mobo a Bitango, ne mabilo a musambo. Timo unena’mba, “Mu myaka 30 ipityile’i, nadi nshintanga mingilo kupwa kwa myaka ibidi yonso.” Lina, wasongelwe na Timo pano ke padi myaka 25, unena’mba: “Twaingile na Timo mu matanda palapala dikumi.  Bilombanga bukomo bukatampe ne kitatyi pa kwibidila bidibwa bipya, luvula lupya, ludimi lupya, mwaba mupya wa kusapula’mo, ne kwikala na balunda bapya.” c Le baeselwe mu bukomo bwabo? Lina unena’mba, “Makambakano etuletele madyese mavule.” Twemwenine buswe bwa bwine Kidishitu ne kizaji kadi twamwene mwitulamina Yehova na buswe. Kadi twamwene kufikidila kwa mulao wa Yesu wālaile balondi bandi udi mu Mako 10:29, 30. Twaikele na batutu, bakaka, ne balolo ku mushipiditu misunsa katwa.” Timo unena’mba, “Twi baloelelwe kwingidija bwino bwetu ku mwingilo muyampe, mwingilo wa kutandabula bintu bya Mulopwe.”

¹⁷ Darren ne Sarah, bakweshe ku mwingilo wa lūbako mu Afrika, Amerika wa pa Bukata, Amerika wa Kunshi, Azia, Bulaya, ne mu Pasifike wa Kunshi, i bamone amba byobatambwile i bipite byobapēne. Nansha byobatenwe na makambakano, Darren unena’mba: “Dyadi dyese dikatampe kwingila na banabetu ba mu matanda meshileshile. Namwene amba buswe botuswele Yehova budi pamo bwa monji ujokolokele umbuo, witulunga umbumo.” Sarah unena’mba: “Nefundile bivule ku batutu ne bakaka ba bibidiji palapala! Ponamwene kwipāna kwabo mu mwingilo wa Yehova, nakankamikilwe nami ñendelele kumupa bilumbuluke byonso byondi nabyo.”

18. Le bupolofeto budi mu Mitōto 110:1-3 bufikidilanga namani?

¹⁸ Mulopwe Davida wānene mu bupolofeto amba nansha shi babikalwa ba Bulopwe bwa Leza abatanwa na makambakano, “[bakepāna] abo bene ku mityima tō” ku kwingidila tumweno twa Bulopwe. (Tanga Mitōto 110:1-3.) Boba bonso bepēne mu mwingilo wa kukwatakanya Bulopwe bafikidijanga bino binenwa bya bupolofeto. (1 Ko. 3:9) Bungi bwa mabilo a musambo, tutwa na tutwa twa Mobo a Bitango, ne tununu makumi twa Mobo a Bulopwe kujokoloka ntanda yonso tuletanga bukamoni kebupatanibwa bulombola’mba, Bulopwe bwa Leza i bwa bine ne amba pano buludikanga. Bine tudi na dyese dya kwingidila Mulopwe Yesu Kidishitu mu uno mwingilo upa Yehova ntumbo mine yafwaninwe!