1, 2. (a) En thuolo mane ma jotich Jehova osebedo ka morgo? (b) En ang’o ma Jehova morgo moloyo?

 KUOM higni mang’eny, jotich Jehova osebedo ka mor gi thuolo mar gero ute ma kelo ne nying Jehova pak. Kuom ranyisi, ka ne igero tabenakel, Jo-Israel noriwo tijno lwedo gi ilo kendo ne gichiwo gik ma ne dwarore e gere.—Wuok 35:30-35; 36:1, 4-7.

² Gik ma kelo ne Jehova duong’ kendo ma miye mor sama wagedo ok en mana gige gedo ma wachiwo. (Mat. 23:16, 17) Gima Jehova morgo kendo ma kelone duong’ moloyo en lamo ma jotichne lamego, moriwo nyaka chiwruokgi kod kindagi. (Wuok 35:21; Mar. 12:41-44; 1 Tim. 6:17-19) Mano en wach maduong’ ahinya. Nikech ang’o? En nikech udi ok siki. Kuom ranyisi, tabenakel gi hekalu ma ne Jo-Israel ogero tinde onge. Kata kamano, wi Jehova pok owil gi kinda kaachiel gi chuny mar chiwruok ma ne jotichne onyiso ka ne giriwo tijno lwedo.—Som 1 Jo-Korintho 15:58; Jo-Hibrania 6:10.

3. Ang’o ma wadwaro nono e sulani?

³ Jotich Jehova ma kindewagi bende osebedo ka tiyo matek e gero udi mag lamo. Adier, wasegedo e okang’ malich miwuoro ka watiyo e bwo Ruodhwa Yesu Kristo! Kuom adier, Jehova osebedo ka guedho kindawa. (Zab. 127:1) E sulani, wadwaro nono moko kuom ute ma wasegero kod kaka utego osekelo ne Jehova duong’ kod pak. Bende, wabiro neno gima jomoko ma osekonyo e gedo osewacho.

4. (a) Ang’o momiyo Ute Romo mang’eny dwarore? (b) Ang’o momiyo oseriw ofise mopogore opogore? (Ne sanduk ma wiye wacho ni, “ Gero Ofisewa ka Luwore gi Dwaro ma Nitie.”)

⁴ Mana kaka ne wapuonjore e Sula mar 16, Jehova dwaro ni wachokrega ne lamo. (Hib. 10:25) Chokruogewa tego yiewa kendo konyowa medo kinda e tij lendo. Kaka giko pinyni medo kayo machiegni, Jehova dhi nyime chwalo tij lendo mondo time e okang’ mapiyo. Mano osemiyo ji gana gi gana obiro e riwruok mar oganda Jehova. (Isa. 60:22) Kaka kwan mag joma tiyo ne Jehova medore, e kaka dwarore mondo wabed  gi kuonde momedore mag goyo buge. Ute lamo mang’eny bende dwarore.

5. Ang’o momiyo nying mar Kingdom Hall owinjore gi kuondewa mag lamo? (Ne bende sanduk ma wiye wacho ni, “ Kanisa mar New Light.”)

⁵ Chakre chon, Jopuonjre Muma ne neno ni ne ber ka gibedo gi kuonde lamo maggi giwegi. Nenore ni achiel kuom ute lamo ma ne gikwongo gero ne gigero West Virginia e piny Amerka e higa mar 1890. Chop higni mag 1930, jo Jehova ne osegero kata loso ute lamo mang’eny, kata kamano, e kindego utego ne pok omi nying moro sie. E higa mar 1935, Owadwa Rutherford ne olimo Hawaii e kinde ma ne igero ofis kaachiel gi od lamo. Ka ne openj Owadwa Rutherford nying ma nonego mi od lamono, nodwoko niya: “Uneno nade ka waluonge ni Kingdom Hall? Aparo ni mano owinjore nikech tich ma watimo en yalo wach Pinyruoth?” (Mat. 24:14) Ne omi odno nyingno, kendo mapiyo nono, ute duto ma kanyakla mag Joneno mag Jehova ne chokoree e piny ngima bende ne ochak luong kamano.

6, 7. Ute Romo ma igero mapiyo osekonyo e wach mane?

 ⁶ Ka ne ochopo higni mag 1970, Ute Romo koro ne dwarore moloyo. Mondo chop dwarono, owete ma ne a e piny Amerka nochako chenro moro manyien mar gero Ute Romo mowinjore kuom odiechienge manok ahinya. Chop higa mar 1983, ne oseger Ute Romo 200 ma kamago e piny Amerka kod Kanada. Mondo tij gedo otimre e yo mochanore, owete nochako loso komiti mopogore opogore mondo ochung’ ne tij gedo e alworago. Komitigo nomiyo tich odhi maber ahinya, omiyo, e higa mar 1986, Bura Matayo nopwodho mondo chenrono koro odhi adhiya nyime. Chop higa mar 1987, ne nitie komiti 60 mochung’ ne tije gedo e alwora mopogore opogore e piny Amerka. a Higa mar 1992 noyudo ka oselos komiti ma kamago e pinje mag Argentina, Australia, France, Germany, Japan, Mexico, South Africa, kod Spain. Kuom adier, dwarore ni wasir owete gi nyimine ma tiyo gi kinda e gero Ute Romo kod Ute Chokruok mag Alwora, nikech migapgino en achiel kuom yore ma gitiyogo ne Nyasaye.

⁷ Ute Romo ma ne igero mapiyogo nokonyo e chiwo neno e gwenge ma nigerogie. Kuom ranyisi, gaset moro migoyoga e piny Spain kinde moro ne oloso sula moro ma wiye ne wacho ni “Faith Moves Mountains” (“Yie Nyalo Daro Gode”). Sulano nowuoyo kuom Od Romo ma ne oger e taon mar Martos, kae to nopenjo kama: “Obet nade ni e piny masani ma ji ok dewreeni pod jomoko nyalo chiwore kowuok e alwora mopogore opogore [e piny Spain] mondo gibi giger ot e  Martos, kendo gitimo tijno e yo mapiyo kendo mochanore e rang’iny ma pok none?” Sulano nodwoko penjono kotiyo gi weche ma achiel kuom Joneno ma nochiwore kanyo nowacho. Janenono nowacho niya: “Tijno otiyore kamano nikech jogedo gin joma Jehova opuonjo.”

8. En chenro mane ma Bura Matayo nopwodho e higa mar 1999, to nikech ang’o?

⁸ Ka ne higni mag 1900 dhi ka rumo, ji nomedore ahinya e riwruok mar oganda Jehova e pinje ma owete gi nyimine onge yuto maber. Kanyakla moko e pinjego notemo kar nyalogi mondo giger kuonde lamo. Pinje moko to ne ijaroe owetewa kendo ne ibuonogi nikech Ute Romo ma ne gichokoree ne ni piny ahinya kopim gi ute mag kanise mamoko. Kata kamano, chakre higa mar 1999, Bura Matayo nopwodho chenro mar gero Ute Romo mapiyo e pinje ma yuto nokie. Koro ne itiyo gi chiwo ma owete ma ni e pinje ma yuto berie golo e gero Ute Romo kuonde ma yuto nokie mondo “romruok obedie.” (Som 2 Jo-Korintho 8:13-15.) Owete gi nyimine ma a e pinje mopogore opogore nochiwore konyo e gedo.

9. En tich mane ma ne nenore ni ne ok dhi bedo mayot, to weche nobedo nade?

⁹ Ka ne chenrono ochako tiyo, ne nenore ka gima tijno ne ok dhi bedo mayot. Ripot moro ma nogol e higa mar 2001 nonyiso ni Ute Romo 18,300 ne dwarore e pinje 88 ma yuto nokie. Kata kamano, nikech Jehova miyowa rohone to Ruodhwa Yesu Kristo be ni kodwa, onge gima ok nyalre!  (Mat. 19:26) Kuom higni 15 kama (1999-2013), jotich Nyasaye ne ogero Ute Romo 26,849 e bwo chenroni. b Jehova osebedo ka guedho tij yalo wach maber. Omiyo, kata obedo ni higa mar 2013 noyudo ka oseger Ute Romo mang’eny kamano, pod Ute Romo 6,500 ne dwarore e pinje ma yuto nokiego. To kata mana sani, Ute Romo miche gi miche pod dwarore higa ka higa.

10-12. Ere kaka Ute Romo ma wageroga osekelo ne nying Jehova duong’ kod pak?

¹⁰ Ere kaka Ute Romo manyien migerogo osekelo ne nying Jehova duong’ kod pak? Ofiswa ma Zimbabwe nowacho kama: “Dwe achiel kende bang’ gero Od Romo, kwan mar joma biro e chokruok e Od Romono kinde mang’eny medorega nyadiriyo.” E pinje mang’eny, nenore ni ji ok ni thuolo chokore kodwa sama pod waonge gi Od Romo maber. To sa asaya motiek ger Od Romo moro, ji chako pong’e ma chop kama koro Od Romo machielo dwarore. Kata kamano, gima duong’ ma ywayo ji ir Jehova ok en mana ute ma wagerogo. Kar mano, hera madier ma Jokristo ma geroga utego nigo e ma mulo chunygi. Ne ane ranyisi moko.

¹¹ Indonesia. Ka ne dichwo moro ma nosebedo ka rango kigero Od Romo moro ofwenyo ni jogedogo te ne gin mana joma ochiwore, nowacho kama: “Umako dhoga! Aseneno kaka ng’ato ka ng’ato kuomu go tich gi kinda kod mor, kata obedo ni onge osara michulou. Ok apar ka nitie din moro machielo ma dipim gi maruni!”

¹² Ukraine. Dhako moro ma ne jakalo kama ne owete gedoe nopong’o gi wiye ni nyaka bed ni jogedogo ne gin Joneno mag Jehova kendo ni odno ne en Od Romo. Nowacho kama: “Nyamera moro lemo kodu, kendo oseganyisa weche mathoth e wi Joneno mag Jehova. Yo ma aseneno kutimogo gik moko sama ugero odni osemiyo ang’ado e chunya ni an be adwa lemo kodu. Aseneno hera gi wang’a.” Ne oyie puonjore Muma mi obatise e higa mar 2010.

13, 14. (a) Ang’o ma ipuonjori kuom gima dichwo moro gi chiege notimo bang’ neno kaka owete ne gero Od Romo moro? (b) Gin ang’o gini minyalo timo mondo Od Romo maru okel ne nying Jehova duong’?

¹³ Argentina. Dichwo moro gi chiege ne odhi ir owadwa ma ne tayo tij gero Od Romo moro. Dichwono nowacho kama: “Wasebedo ka warango kaka ugedo, kendo . . . waseng’ado ni odni e ma wadwaro puonjoree wach Nyasaye.” Kae to nopenjo kama: “Ka daher lemo kodu kae, ang’o monego atim?” Dichwo gi dhakono nowacho ni giyie puonjore Muma, to mana ka owetego oyie puonjo nyithindgi bende. Owete ne ochako puonjore kodgi gi nyithindgi duto.

¹⁴ Samoro ne ok ikonyo tich ka ne igero Od Romo ma idhiyega, kata kamano, pod nitie gik mang’eny minyalo timo mondo odno okel ne nying Jehova duong’. Kuom ranyisi, inyalo nyiso ilo mathoth sama igwelo joma ipuonjo Muma,  joma idokga limo, kod jomamoko mondo gibi e chokruok e Od Romo maru. Bende, inyalo konyo e timo ler kata loso kuonde mokethore. E wi mago, ka igo kwandi maber, inyaloga golo chiwo mondo ritgo Od Romo maru kata sirgo tij gero Ute Romo kuonde mamoko e piny ngima. (Som 1 Jo-Korintho 16:2.) Paro mochiw kaegi duto kelo ne nying Jehova duong’ kod pak.

15-17. (a) Gin ng’a gini ma timoga thoth tije mitimo sama igero utewa mag lamo? (b) Ang’o ma ipuonjori kuom weche ma owete gi nyimine moko mosechiwore gedo e pinje mopogore opogore wacho?

¹⁵ Owete ma ni e pinje migedoe e ma timoga thoth tije mitimo sama igero Ute Romo, Ute Chokruok mag Alwora, kod ofise. Kata kamano, kinde mang’eny owete gi nyimine ma nigi lony e weche gedo aga e pinje mamoko mondo okonygi. Moko kuom owete gi nyiminego ketoga dijegi moko tenge mondo gichiwre kata mana kuom jumbe manok e konyo tij gedo e pinje mamoko. Moko to chiwore kuom higni mang’eny, kendo sama tij gedo moro orumo, gidhi e machielo.

¹⁶ Owete gi nyimine mochiwore mondo oorgi giged e pinje mopogore opogore romoga gi pek moko, kata kamano, gueth to ndi. Ne ane ranyisi mar Timo gi Lina ma osedhi e pinje mag Asia, Europe, kod South America ka gikonyo e gero Ute Romo, Ute Chokruok mag Alwora, kod ofise mopogore opogore. Timo wacho kama: “Kuom higni 30 mokalo, osebed kiwilona migawo chiegni bang’ higni ariyo ka higni ariyo.” Lina chiege ma ne gikendorego higni 25 mokalo, wacho kama: “Wasedhi gi Timo e pinje apar mopogore opogore. Timo lokruok kinde ka kinde ok yot, kuom ranyisi ng’iyo  gi chiemo manyien, dak kama kor lwasi opogore, puonjruok dhok manyien, lendo e alwora manyien, kendo ng’iyo gi osiepe manyien.” c Be dibed ni kindagino osedhi nono? Ooyo. Lina wacho kama: “Pekgo osekelonwa gueth mogundho. Gisemiyo waneno kaka Jokristo wetewa nyisowa hera kendo girwakowa maber, kendo waseneno kaka Jehova ritowa maber. Bende, waseneno ka weche ma Yesu nowacho e Mariko 10:29, 30 timore e ngimawa. Ee, waseyudo owetewa, nyiminewa, kod minewa mang’eny nyadi mia.” Owadwa Timo wacho kama: “Tiyo gi lony ma wan-go e medo mwandu mag Ruodhwa kelonwa mor mogundho.”

¹⁷ Darren gi Sarah bende osekonyo e tij gedo e pinje mag Afrika, Asia, Central America, Europe, South America, gi South Pacific. Gineno ni giseyudo gueth mang’eny ma ok nyal pim gi gik ma ne giweyo mondo gichiwre. Kata obedo ni giromoga gi pek moko kinde ka kinde, Darren wacho kama: “Tiyo gi owete gi nyimine ma wuok kuonde mopogore opogore e piny ngima en dhialro makende ahinya. Asefwenyo ni hera ma ng’ato ka ng’ato kuomwa oherogo Jehova riwowa kanyachiel e piny ngima.” Sarah wacho kama: “Asepuonjora mathoth kowuok kuom Jokristo wetewa ma ne opon kuonde mopogore opogore! Sama aneno kaka gichiwore mondo giti ne Jehova, mano miya mijing’o mar dhi nyime timo duto ma anyalo e tij Jehova.”

18. Weche ma ne okor e Zaburi 110:1-3 chopo nade e kindewagi?

¹⁸ Jehova notiyo gi Ruoth Daudi e koro ni kata obedo ni raia mag Pinyruoth ne dhi romo gi pek mopogore opogore, pod ne gidhi chiwore gi chuny mohero mondo gisir tije mag Pinyruoth. (Som Zaburi 110:1-3.) Jotich Jehova duto ma timo tije motudore gi Pinyruoth chopo weche ma nokorgo. (1 Kor. 3:9) Ofisewa mang’eny kaachiel gi Ute Chokruok mag Alwora gi Ute Romo modhuro ma oseger e piny ngima nyiso maler ni Pinyruodh Nyasaye osechako locho. Wamor gi migawo ma omiwa mar timo ne Ruodhwa Yesu Kristo tije ma kelo ne Jehova duong’ kod pak. To mano kaka odhialwa!