1, 2. a) Hal baa pĩndã, bõe n da noom sẽn tũud-b a Zeova wã? b) La a Zeova nifẽ bõe n tar yõod n yɩɩda?

SẼN tũud-b a Zeova wã sã n paam n na n me roog a waoogr yĩnga, noom-b lame. La rẽ pa sɩng masã ye. Israyɛll nebã me ra kõo kũun wʋsgo, la b tʋm ne yẽesem sɛk-roogã tilgr wakate.—Yik. 35:30-35; 36:1, 4-7.

² B sã n me roog a Zeova waoogr yĩnga, a pa get tɩ yaa teed nins b sẽn tall n me wã n waoogd-a ye. Pʋd n pa teedã n tar yõod n yɩɩd ye. (Mat. 23:16, 17) Bũmb ning sẽn waoogd a Zeova n tɩ yɩɩdã yaa a nin-buiidã sẽn na n tigim taab n pẽg-a wã, n paas b sẽn sak n kõ kũun ne yamleoogo, la b tʋm ne b pãng fãa wã. (Yik. 35:21; Mark 12:41-44; 1 Tɩm. 6:17-19) Woto n tar yõod n yɩɩda. Bõe yĩnga? Bala roog wat n kʋdgame, a tõe n lʋɩɩme menga. Wala makre, sɛk-roogã ne wẽnd-doogã fãa pa ket ye. La baa ro-kãensã sẽn pa le be wã, a Zeova ket n tẽra kũunã wẽn-sakdbã sẽn kõ wã, la b tʋʋm-toogã.—Karm-y 1 Korẽnt dãmb 15:58; Hebre dãmb 6:10.

3. Bõe yell la d na n gom sag-kãngã pʋgẽ?

³ Rũndã-rũndã me, a Zeova nin-buiidã tʋmda wʋsgo, n met rot n tigimd taab n waoogd-a. Rĩm a Zezi Kirist sẽn sõng tõnd tɩ d tõog n maan bũmb nins rẽ wɛɛngẽ wã sɩd seka pẽgre. Hakɩka, a Zeova ninga d modgrã barka. (Yɩɩl 127:1) Sag-kãngã pʋgẽ, d na n goma tʋʋm kẽer d sẽn zoe n tʋm yelle, la rẽ sẽn kɩt t’a Zeova paam waoogr to-to. Sẽn paase, d na n togsa neb sãnda sẽn yeele, neb sẽn kẽes b toog rotã meeb pʋgẽ.

4. a) Bõe yĩng tɩ yaa tɩlae tɩ d paam tigsg zĩis n paase? b)  Bõe yĩng tɩ b rɩk Betɛll dãmb n fãoog taaba? (Ges-y zĩ-gũbrã sẽn yet tɩ “ Betɛll dãmbã meeb wɛɛngẽ, siglgã tʋmda ne yam.”)

⁴ Wa d sẽn yã sak 16 pʋgẽ wã, a Zeova ratame tɩ d tigimd taab n waoogd-a. (Heb. 10:25) Tigissã kengda d raoodo. La pa rẽ bal ye. Sõngdame tɩ d paamd yẽesem koɛɛgã mooneg pʋgẽ n paasdẽ. Dũni-kãngã sẽn dabd a saabã, a Zeova kɩtame tɩ d tʋʋmdã tar yãngre, hal tɩ neb tus ka tɛk kaoogd n wat a siglgã pʋgẽ yʋʋmd fãa. (Ezai 60:22) Rĩungã  poorẽ dãmbã sõor sẽn fɩɩgdã, yaa tɩlae tɩ d paam sɛb yiisg zĩis n paase, n yiisd d sɛbã sẽn wɛgsd Biiblã goamã. D leb n data rot n paase, n tigimd taab n waoogd a Zeova.

5. Bõe yĩng tɩ d sẽn boond zĩig ning d sẽn tigimd taabã tɩ Rĩung roogã zemse? (Ges-y zĩ-gũbrã sẽn yet tɩ “ Vẽenemã egiliizi.”)

⁵ Biiblã Zãmsdbã bãnga pĩnd-pĩnd tɩ b tog n paama b toorẽ rot n tigimd taaba. Wõnda tigsg roog ning b sẽn me yʋʋmd 1890, Virzini Oksɩdãntall sẽn be Etazĩni wã naaga pipi rot nins b sẽn me wã. Yʋʋmd 1930 wã poor tɩ rot a Zeova nin-buiidã sẽn me bɩ n maneg waoogame. La b ra nan pa mi b sẽn na n bool tigissã rot to-to ye. Yʋʋmd 1935 wã, saam-biig a Rutherford kẽnga Hawayi. B ra meta tigsg roog n na n yɛgl Betɛllã. B soka saam-biig a Rutherford n na n bãng b sẽn tog n pʋd roogã yʋʋr ningã. A leoka woto: “Sẽn mik tɩ yaa Wẽnnaam Rĩungã koe-noog la d moondã, yãmb pa tagsd tɩ d tog n pʋd-a lame tɩ ‘Rĩung roog’ sɩda?” (Mat. 24:14) Yʋ-kãngã sɩd zemsame! Pa ro-kãng bal la b  bool woto ye. Dũniyã gill zugu, d wae n boonda zĩis nins a Zeova Kaset rãmbã sẽn tigimd taabã tɩ Rĩung roogo.

6, 7. Saam-biisã sẽn bao yam tɩ Rĩung rotã meeb lebg tʋʋl-tʋʋllã sõngame tɩ b tõog n maan bõe?

⁶ Yʋʋmd 1970 wã poor tɩ maneg n lebga tɩlae tɩ d paam Rĩung rot wʋsg n paase. Rẽ n so tɩ Etazĩni saam-biis bao yam sẽn na n sõng tɩ Rĩung rotã meeb lebg tʋʋl-tʋʋlle, n yaa neer la kell n zemse. Yʋʋmd 1983 wã ne a ta tɩ rẽ sõngame tɩ b tõog n me Rĩung rot bãmb 200 Etazĩni ne Kanada. Sẽn na yɩl tɩ tʋʋmdã kẽng taoore, saam-biisã lugla sul sẽn na n get Rĩungã rot meeb yelle. B sẽn sigl tʋʋmdã woto wã yãka nenga, hal tɩ Siglgã taoor lʋɩtb yãk yam yʋʋmd 1986, n na n tolg n ges rẽ yelle. Yʋʋmd 1987 wã tɩ yaa Rĩung rotã meeb sul 60 la b lugl Etazĩni. * Yʋʋmd 1992 ne a ta tɩ b lugla sul-kãens buud Afirikdisiid, Alemayn, Arzãntin, Ɛspayn, Fãrense, Megsik, Ostrali, la Zapõ. Sɩd-sɩdã, saam-biis nins sẽn tʋmd wʋsgo, n met Rĩung rot la tigis-kãsems rotã segda ne teelgo, bala yaa tʋʋmd sẽn waoogd a Zeova.

⁷ Rĩung rotã meeb sẽn yɩ tʋʋl-tʋʋll la sõma wã kɩtame tɩ yagsã pẽg a Zeova Kaset rãmbã. Wala makre, Ɛspayn zʋrnall a ye n gom Martos tẽngã Rĩung roog meeb yelle. Zʋrnallã yeelame tɩ “Tẽeb sersda tãmse.” Goamã pʋgẽ, b yeela woto: “Pa sɩd ye! Dũni kãngã nebã sẽn yaa b mens yell bal n pak-bã la Ɛspayn tẽns toɛy-toɛy neb sak n tog sor n wa Martos, n na n sõng n me roogo? Rẽ me, roogã  meeb yɩɩ tʋʋl-tʋʋlle, n kell zemse, tɩ tʋʋmdã me sigl sõma. D zɩ n yã a buud ye.” Zʋrnallã wilga a Zeova Kaset rãmbã manesmã võore. Yaa d saam-biig a ye gomd la a lebg n dɩke. A yeela woto: “Koɛɛg-koɛɛg bala, yaa d sẽn yaa nin-buiid sẽn paamd zãmsg a Zeova nugẽ wã yĩnga.”

8. Yʋʋmd 1999 wã, Siglgã taoor lʋɩtb Sullã sakame tɩ b sigl na-kẽndr bʋgo, la yɩɩ bõe yĩnga?

⁸ Yʋʋmd 2000 wã sẽn wa n kolgdẽ wã, neb kʋʋng sẽn be tẽns sẽn pa tar laog wʋsg pʋsẽ lebga a Zeova Kaset rãmba. Saam-biisã ra maanda b sẽn tõe sẽn na yɩl n me Rĩung roto. La zĩis kẽere, nebã ra makda Rĩungã rot ne tũudum a taabã rotã, n yaand saam-biisã, Rĩungã rot sẽn da pa lebd be wã yĩnga. Yʋʋmd 1999 wã tɛka, Siglgã taoor lʋɩtb Sullã sakame tɩ b sigl na-kẽndr buud sẽn na n sõng tɩ b tõog n me Rĩung rot wʋsg tẽns nins sẽn pa tar laog wʋsgã pʋgẽ. Saam-biis nins sẽn be tẽns sẽn tar laog pʋgẽ wã lobda ligdi, sẽn na yɩl n lek sẽn pa tar-bã, tɩ b fãa “zeng taaba.” (Karm-y 2 Korẽnt dãmb 8:13-15.) Tẽns a taab saam-biis me sakda ne yamleoog n wa sõng ne meebã.

9. Sɩngrẽ wã, bõe la b ra get tɩ yaa toogo? Bõe la b tõog n sɩd maane?

⁹ Sɩngrẽ wã, ra wõnda bũmb sẽn yaa toogo. Yʋʋmd 2001 wã, b geelame n mik tɩ yaa sẽn yɩɩd Rĩung rot 18300 la b tog n me tẽns 88 sẽn pa tar laog wʋsg pʋgẽ. La sẽn mik tɩ d Rĩm a Zezi Kirist sõngda tõndo, tɩ vʋʋsem sõngã me be ne-dã, bũmb kae d sẽn pa tõe ye. (Mat. 19:26) Yʋʋmd  1999 n tãag 2013, rat n yeel tɩ sẽn zems yʋʋm 15 pʋgẽ bala, na-kẽndrã sõnga Wẽnnaam nin-buiidã tɩ b me Rĩung rot 26849. * A Zeova ket n ningda koɛɛgã mooneg barka. Rẽ n so tɩ yʋʋmd 2013 wã d mikame tɩ d rata sẽn ta Rĩung rot 6500 tẽns nins sẽn pa tar laog wʋsgã pʋsẽ. Masã, yʋʋmd fãa yaa Rĩung rot kobs la d rat n paase.

10-12. Wãn to la Rĩung rotã meeb waoog a Zeova yʋʋrã?

¹⁰ Wãn to la Rĩung rotã meeb waoog a Zeova yʋʋrã? Zimbabwe Betɛllã toola siglgã sebr n yeel woto: “Naoor wʋsgo, d sã n me Rĩung roogo, kiuug pʋgẽ, tigingã neb sõor fɩɩgdame n ta pĩndã naoor a yiibu.” Tẽns wʋsg pʋgẽ, wõnda yaa d sã n wa paam n me Rĩung roog la nebã sakd n wat tigissã. D sã n me roogã, tao-tao bal tɩ pitame hal tɩ yaa tɩlae tɩ d me a to. La pa roogã neermã n kɩtd tɩ nebã wat a Zeova nengẽ ye. Sẽn yɩɩd fãa, yaa saam-biis nins sẽn sõngd ne meebã zems-n-taarã. Sɩd me, b zems-n-taarã sẽn tar pãng to-to wã lingda nebã, tɩ b sɩng masã n nong a Zeova siglgã. Bɩ d ges makr a wãna.

¹¹ Ẽndonezi: Rao a ye n da gũusd n get Rĩung roog meebo. A sẽn wa n bãng tɩ tʋm-tʋmdbã fãa tʋmda ne yamleoogo, n pa reegd yaoodã, a yeelame: “Yãmb mengã tolg n yaa toore! Ned kam fãa tʋmda ne a sũur fãa, la ne sũ-noogo, baa ne y sẽn pa reegd yaoodã. M pa tagsd tɩ yãmb tũudmã to le beeme ye!”

¹² Ikrɛn: Saam-biis n da met roogo, tɩ pag a ye ra nong n pɩʋʋgd be. A wa n bãnga a toor tɩ yaa a Zeova Kaset rãmba, la tɩ tog n yaa Rĩung roog la b sẽn metã. A yeelame: “Mam tão sẽn lebg a Zeova Kaset soab n da zoe n gom a Zeova Kaset rãmbã yell ne maam. Mam sẽn ges tʋʋmdã, ma-me yãka yam n na n lebg a Zeova Kaset soaba. B nonglmã yaa hakɩka.” Pagã sakame n zãms Biiblã, n deeg lisg yʋʋmd 2010.

13, 14. a) Raoã ne a pagã sẽn da gũusd n get Rĩungã roog meebã sẽn yeel bũmb ningã wilgda tõnd bõe? b) Bõe la y tõe n maane, tɩ y Rĩungã roog kell n yɩ zĩig sẽn waoogd a Zeova yʋʋrã?

¹³ Arzãntin: Rĩung roog la b ra meta, tɩ rao a ye ne a pag kolg n na n gom ne saam-biig ning sẽn get meebã yellã. Raoã yeelame: “Tõnd da gũusda wakat fãa n get yãmb tʋʋmdã. D . . . ratame n bãng Wẽnnaam sõma. Rẽ n so tɩ d yãk yam n na n wat ka.” Rẽ poore, a sokame: “Bõe la d tog n maane, tɩ y sak tɩ d wat y tigissã?” Raoã ne a pagã sakame n na n zãms Biiblã, la b yeelame tɩ yaa saam-biisã sã n na n sakame tɩ zakã neb fãa naage. Saam-biisã sũy yɩɩ noogo.

¹⁴ Tõe tɩ yãmb pa paam n sõng n me y Rĩungã roog ye. La y tara y sẽn tõe n maane, n sõng tɩ kell n yɩ zĩig sẽn waoogd a Zeova yʋʋrã. Wala makre, y tõe n boonda neb  nins sẽn zãmsd Biiblã ne yãmbã, neb nins y sẽn tʋgd n kaagdẽ wã, la neb a taab tɩ b wat Rĩungã roogẽ, n naagd yãmb n kelgd sõssã. Y tõeeme me n sõngd ne roogã pɩɩsgo, a yẽesg la a zãabo. Y sã n kẽgsd ligdi, y na n tõogame me n kõt yamleoog kũun y Rĩungã roog yell gesg yĩnga, bɩ tẽns a taab Rĩung rot meeb yĩnga. (Karm-y 1 Korẽnt dãmb 16:2.) Woto fãa sõngdame t’a Zeova yʋʋrã paamd waoogre.

15-17. a) D sã n na n me roogo, tʋm-tʋmdbã wʋsg nong n yaa ãnd dãmba? b) Saam-biis sẽn gilgd tẽns toor-toor siglgã rot meeb yĩngã sẽn yeelã wilgda tõnd bõe?

¹⁵ D sã n na n me Rĩung roogo, tigis-kãseng roog bɩ Betɛlle, tʋm-tʋmdbã wʋsg nong n yaa tẽngã saam-biis la saam-bi-pogse. La naoor wʋsgo, tẽns a taab neb sẽn tar minim rotã meeb pʋgẽ n wat n sõng-ba. B wʋsg toeema bũmb kẽer b vɩɩmã pʋgẽ, tɩ rẽ kɩt tɩ b tõe n kẽng tẽn-taag n tɩ sõng ne tʋʋmã kiis a wãna. Sãnda me sakame n na n kẽes b meng zãng tʋʋmdã pʋgẽ yʋʋm ka tɛka, n gilgd tẽns toor-toor siglgã rot meeb yĩnga.

¹⁶ Gilgd tẽns toor-toor n met siglgã rotã tara a zu-loeese, la barkã yaa wʋsgo. Wala makre, a Timo ne a pag a Lina kẽnga Aazi, Amerikdisiid la Erop n tɩ me Rĩung roto, tigis-kãsems rot la Betɛll dãmba. A Timo yeela woto: “Yʋʋm 30 pʋgẽ, mam gilga tẽns toor-toore. M da maanda sẽn zems yʋʋm a yiib tẽng fãa pʋgẽ.” A Timo ne a Lina sẽn kẽ kãadmã yaa yʋʋm 25 masã. A Lina yeelame: “Mam tũu a Timo n gilg tẽns piiga. Woto baooda keelem. Sẽn paase, tẽns kẽer yaa waoodo, tɩ sãnda yaa tʋʋlgo. Rɩbdã,  buud-goamã, moonegã zĩis la baa zo-rãmbã toeemdame. Yɩl n minim rẽ fãa kaoosdame.” * La b modgrã pa yɩ zaalem ye. Ad a Lina sẽn yeele: “Baa ne zu-loe-kãensã fãa, barkã d sẽn paamã pa tõe n bãng n bilg ye. Saam-biisã reegda tõnd ne nonglem, t’a Zeova me get d yell sõma. D yãame t’a Zezi sẽn pʋlem bũmb ning Mark 10:29, 30 wã sɩd pidsdame. D paama ba-bi-rap la ba-bi-pogs ne ma rãmb naoor koabga.” A Timo me yeelame: “D sẽn paam n tõe n dɩk d minimã n tʋm tʋʋmd sẽn ka to wã, rat n yeel tɩ n sõng tɩ Rĩmã paoongã paasã, d sũy yaa noog wʋsgo.”

¹⁷ A Darren ne a Sarah me gilga Aazi, Afirik, Amerikdisiid, Amerik Sãntrall, Erop, la Pasifikdisiid n sõng n me siglgã roto. B yeelame tɩ bãmb getame tɩ b sẽn paamã yɩɩda b sẽn kõ wã. Baa ne zu-loeesã, a Darren yeelame: “D tʋmda ne dũniyã tẽns toɛy-toɛy saam-biisi. Woto yaa bark tɛkẽ. D sɩd bãngame tɩ nonglem ning sẽn be a Zeova nin-buiidã sʋk dũniyã gill zugã yaa wa wĩir sẽn loe-d ne taab tɩ d lebg bũmb a yembre.” A Sarah yeelame: “Mam zãmsa bũmb wʋsg tẽns toor-toorã saam-biisã la saam-bi-pogsã nengẽ! M sã n get modgr nins b sẽn maand n tũud a Zeova wã, ma-me rat n ket n tʋmda a Zeova tʋʋmdã m pãng tɛka.”

18. Wãn to la Yɩɩl Sõamyã 110:1-3 goamã pidsd rũndã-rũndã?

¹⁸ Rĩm a Davɩɩd ra pĩnd n togsame tɩ baa ne zu-loeesã, Wẽnnaam Rĩungã poorẽ dãmb na n ‘dɩka b mens n kõ ne yamleoogo,’ n tʋm Rĩungã tʋʋmã. (Karm-y Yɩɩl Sõamyã 110:1-3.) Neb nins fãa sẽn tʋmd tʋʋm sẽn teend Rĩungã sõngdame t’a Davɩɩd gomdã pidsdẽ. (1 Kor. 3:9) Dũniyã gill zugu, d sẽn tõog n me Betɛll dãmb wʋsgo, tigis-kãsems rot kobse, la Rĩung rot tusa wã yaa kaset sẽn wilgd vẽeneg tɩ Wẽnnaam Rĩungã sɩd beeme, la t’a Rĩmã rɩta naam masã. Hakɩka, a Zeova sɩd segda ne waoogre. D sẽn paam n tʋmd tʋʋm sẽn teend Rĩm a Zezi Kirist la waoogd a Zeova wã yaa zu-zẽkr meng-menga.