1, 2. (a) Nensaman ni, anto lay labalabay ya gawaen na saray lingkor nen Jehova? (b) Antoy papablien nen Jehova?

NENSAMAN ni et labalabay la na saray matoor a lingkor nen Jehova so manpaalagey na saray bilding ya kirayeway ngaran to. Singa bilang, saray Israelita et malikeliket ya angipaalagey ed tabernakulo tan mabulbulos ya angiter na materyales parad satan.​—Exo. 35:30-35; 36:1, 4-7.

² Ag-ipapasen nen Jehova ya saray materyales labat ed panagpaalagey so mamapagalang ed sikato, tan agto met ipapasen ya saratan so sankaimportantian. (Mat. 23:16, 17) Say papablien nen Jehova tan say regalon manunan mamapagalang ed sikato et say panagdayew na saray lingkor to, kaiba lay maliket tan makulin panagkimey da. (Exo. 35:21; Mar. 12:41-44; 1 Tim. 6:17-19) Importante itan. Akin? Ta ondaan tan nasasalatan iray bilding. Singa bilang, anggapo la natan imay tabernakulo tan templo. Balet anggano naandi iraman, ag-alingwanan nen Jehova so inkamaiter tan impansagpot na saray matoor a lingkor to ya anuportad panagpaalagey.—Basaen so 1 Corinto 15:58; Hebreos 6:10.

3. Antoy pantongtongan tayod sayan kapitulo?

³ Sikatayo ran lingkor nen Jehova natan et mansasagpot met ya mangipaalagey na saray pasen a pandayewan. Tan talagan makapadinayew so agawaan tayo lapud igigiya itayo na Arin Jesu-Kristo! Malinew ya benendisyonan nen Jehova so sagpot tayo. (Sal. 127:1) Diad sayan kapitulo, pantongtongan tayoy pigaran kimey ya agawaan tayo tan no panon iratan ya amagalang ed si Jehova. Naamtaan tayo met so komento na pigarad saray akitulongan ed kimey.

4. (a) Akin a kaukolan tayoy kaaruman a pasen a pandayewan? (b) Akin et impan-merge iray pigaran branch office? (Nengnengen so kahon ya “ Konstruksion na Saray Branch​—Iyaadaptad Pankaukolan.”)

⁴ Singa apantongtongan tayod Kapitulo 16, iilaloan nen Jehova ya mantitipon tayo pian mandayew. (Heb. 10:25) Aglabat napapabiskeg na saray aral so pananisia tayo noagta napapakiwas itayo met na satan ya manpulong. Legan na kaunoran iran agew, papepelesen nen Jehova so panagpulong.  Bilang resulta, kada taon et nilibo so onloloob ed organisasyon to. (Isa. 60:22) Lapud ondadakel so uuleyan na Panarian, ondadakel met iray kaukolan ya pasilidad a mangimprintad saray nibased Biblian literatura. Kaukolan tayo met so kaaruman iran pasen a pandayewan.

5. Akin et matukoy so ngaran ya Kingdom Hall? (Nengnengen met so kahon ya “ Say New Light Church.”)

⁵ Diad panaon ni na Saray Estudyante na Biblia, amoria da lan kaukolan ya walay sarili dan pasen a pandayewan. Nayarin say sakey ed saray sankaunaan ya pasen a pandadayewan et samay impaalagey diad West Virginia, U.S.A., nen 1890. Nen 1930’s, impaalagey odino ni-renovate na totoo nen Jehova iray pigaran hall, balet diad saman et anggapo ni ngaran na saratan ya pasen a pantitiponan. Nen 1935, binmisitad Hawaii si Brother Rutherford legan ya ipapaalagey so sakey a hall diad abay na balon branch office. Nen tinepetan day Brother Rutherford no antoy itawag ed satan ya bilding, inkuan to: “Marakep amo no tawagen tayo  yan ‘Kingdom Hall,’ ta ipupulong tayoy maong a balita na Panarian, aya so gagawaen tayo, antoy nikuan yo?” (Mat. 24:14) Lapud matukoy itan ya ngaran, ag-abayag et ontan met lay intawag ed maslak a pasen a pantitiponan na saray kongregasyon na totoo nen Jehova ed interon mundo.

6, 7. Antoy epekto na maples ya panagpaalagey ed saray Kingdom Hall?

⁶ Nen 1970’s, mas dakel so kaukolan ya Kingdom Hall. Kanian, nanggawa na praktikal a paraan iray brother ed America pian makapampaalagey na marakep tan mausar iran hall diad loob labat na pigaran agew. Nen 1983, manga 200 ya Kingdom Hall so nipaalagey ed America tan Canada. Pian nitultuloy iyan kimey, angiyasain irayan brother na pigaran regional building committee. Lapud epektibo iya, nen 1986 et nandesisyon so Mananguley ya Ulop ya itultuloy la iyan uksoyan. Tan nen 1987, wala lay 60 ya Regional Building Committees (RBCs) diad America. * Nen 1992, angiyasain met ira na RBCs diad Argentina, Australia, France, Germany, Japan, Mexico, South Africa, tan Spain. Siempre, kaukolan na makukulin brother ya mangipapaalagey ed saray Kingdom Hall tan Assembly Hall so suporta tayo, lapud kabiangan na sagradon panaglingkor so kimey da.

⁷ Saray maples ya nipaalagey a Kingdom Hall et maabig a pantasi ed saray lugar ya angipaalageyan. Alimbawa, oniay headline ed sakey a newspaper ed Spain: “Napaalis na  Pananisia Iray Palandey.” Oniay intepet na satan nipaakar ed konstruksion na sakey a Kingdom Hall diad baley na Martos: “Diad sayan makasarilin mundo, iner ka akanengneng na saray boluntaryo ed nanduruman rehyon [na Spain] a mabulbulos ya onlad Martos pian ipaalagey so sakey a bilding, ya diad peles, dakep, tan inka-organisa et adaeg ni ray arum?” Inebatan lanlamang na satan ya artikulo so tepet diad impangi-quote ed imbaga na sakey a Tasin boluntaryo: “Simpli labat so ebat ed satan, sikami ray totoon imbangat nen Jehova.”

8. Nen 1999, anton balon uksoyan so inaprobaan na Mananguley ya Ulop, tan akin?

⁸ Diad pansampot na koma 20 siglo, dakel so totoon dinmapag ed organisasyon nen Jehova diad saray bansan mairap so bilay. Ginawa na saray kongregasyon so anggaay nayarian da pian makapampaalagey na saray pasen a pantitiponan. Balet diad arum a bansa, aanosan day balaw tan panaglabi ta aliwan marakep iray Kingdom Hall da no ikomparad arum a pasen a pandadayewan. Kasabi balet na 1999, inaprobaan na Mananguley ya Ulop so uksoyan ya papelesen so konstruksion na saray Kingdom Hall diad saray bansan mairap so bilay. Inter iray pundon nanlapud maaligwas a bansa pian walay “pampapara.” (Basaen so 2 Corinto 8:13-15.) Tan boluntaryon tinmulong ed kimey iray agagin tagad arum a bansa.

9. Anton kimey so singa agnasarag, balet anto lay agawaan?

 ⁹ Diad gapo, singa agnasarag so kimey. Diad sakey a report nen 2001, masulok ya 18,300 a Kingdom Hall so kaukolan diad 88 ya bansan mairap so bilay. Balet diad tulong na masanton espiritu na Dios tan na Ari tayon Jesu-Kristo, anggapoy kimey ya imposible. (Mat. 19:26) Diad ngalngali 15 taon, manlapud 1999 anggad 2013, akapampaalagey iray totoo na Dios na 26,849 a Kingdom Hall lapud sayan uksoyan. * Tuloytuloy ya bebendisyonan nen Jehova so panagpulong kanian nen 2013, kaukolan ni manga 6,500 a Kingdom Hall ed saratan a bansa. Tan diad kaplesan, nilasus ni so kaukolan kada taon.

10-12. Panon ya apagalangan so ngaran nen Jehova ed saray konstruksion na Kingdom Hall?

¹⁰ Panon ya apagalangan so ngaran nen Jehova diad impampaalagey ed saray balon Kingdom Hall? Oniay inreport na branch office ed Zimbabwe: “Diad loob na sakey bulan ya pampapaalagey ed balo iran Kingdom Hall, maslak et nadodoble so bilang na mimiaral.” Diad dakel a bansa, aglabay na totoo so miaral ta singa aliwan matukoy so pasen a pandadayewan tayo. Balet, sano nipaalagey lay sakey a Kingdom Hall, maples ya ondadakel iray mimiaral kanian kaukolan lamet so balo. Pero, aliwa labat lan say itsura na bilding so makakasagyat ed arum pian onapit ed si Jehova. Say tuan panangaro ya ipapanengneng na saramay mangipapaalagey ed hall et mangapekta met ed panmoria na totoo ed organisasyon nen Jehova. Pantongtongan tayoy pigaran alimbawa.

¹¹ Indonesia. Nen naamtaan na sakey a lakin mamapbantay ed konstruksion na sakey a Kingdom Hall ya boluntaryo so amin ya mantratrabaho, inkuan to: “Bilib ak ed sikayo! Apansin kon makulikuli tan maliket kayon amin ya mantratrabaho anggano anggapoy sueldo yo. Singa anggapo lay miparad relihyon yo!”

¹² Ukraine. Walay sakey a biin inagew-agew ya ondadalan ed ipapaalagey ya Kingdom Hall tan inisip ton Tasi nen Jehova iray mantratrabaho tan Kingdom Hall so ipapaalagey da. Inkuan to: “Nababalitaan koy nipaakar ed Saray Tasi nen Jehova ed Tasin agik. Nen naobserbaan ko yay ipapaalagey yo, labay ko met so magmaliw a kabiangan na sayan espiritual a pamilya. Anengneng koy aroan yo.” Sikatoy nampaiyaral na Biblia tan abautismoan nen 2010.

13, 14. (a) Antoy naaralan mod reaksion na sanasawan angobserbad impampaalagey ed Kingdom Hall? (b) Antoy gawaen mo pian naseguron napagalangan so ngaran nen Jehova ed pasen a pandadayewan yo?

¹³ Argentina. Walay sanasawa ya akitongtong ed brother ya mangaasikasod konstruksion na sakey a Kingdom Hall. Inkuan na asawan laki, “Oobserbaan mi kayon mangipapaalagey, tan . . . nantongtongan min labay mi manaral nipaakar ed Dios ed sayan pasen.” Insan to intepet, “Antoy gawaen mi ey pian makapiaral kami dia?” Inopresian  ira na panangiyaral na Biblia tan inawat da itan, diad sakey a kondisyon, ipila day interon pamilya da. Maliket ya inmabuloy iray brother.

¹⁴ Ompan agmo asali so akitulongan ed impampaalagey ed Kingdom Hall yo, balet wala nin siansiay nagawaan mo pian napagalangan so ngaran nen Jehova. Singa bilang, sarag mon imbitaan iray iyaaralan mo na Biblia, RV, tan arum ni ya miaral ed Kingdom Hall yo. Pankanawnawam met so mitulongan diad panlinis tan panmintina ed pasen a pandadayewan yo. No mangibiig kay kuartam, makapandonasyon ka parad Kingdom Hall yo odino parad pampaalagey ed onia ran pasen a pandadayewan ed nanduruman bansa. (Basaen so 1 Corinto 16:2.) Amin iraya et makapangidayew ed ngaran nen Jehova.

15-17. (a) Siopa ray maslak ya mankikimey ed panagpaalagey? (b) Antoy naaralan mod komento na saray sanasawan namboluntaryo ed konstruksion diad nanduruman bansa?

¹⁵ Say maslak ya mangipapaalagey ed saray Kingdom Hall, Assembly Hall, tan bilding na branch et saray agagin tagad satan a lugar. Balet mabetbet ya tutulongan ira na agagin nanlapud arum a bansa ya eksperiensyadod konstruksion. Pigarad sikara et inayos day eskedyul da pian pigay simba iran makapanboluntaryod proyekto. Saray arum et pigay taon lan manboboluntaryod konstruksion diad nanduruman bansa.

¹⁶ Aliwan mainomay itan, balet dakel so bendisyon. Singa bilang, si Timo tan Lina et akakar lad Asia, Europe, tan South America parad panagpaalagey na saray Kingdom Hall, Assembly Hall, tan branch office. Inkuan nen Timo: “Diad loob la na 30 taon, manguuman so asainmin ko ed  kada duay taon.” Inkuan nen Lina, ya 25 taon lan kasal ed si Timo: “Akapanlingkor kami la nen Timo ed 10 bansa. Kaukolay kasil tan panaon pian maka-adjust kamid balon naakan, klima, lenguahe, teritorya, tan pian makapikaaro.” * Kasin abawbawi ray impansagpot da? Inkuan nen Lina: “Asalatan na bendisyon iray sakripisyo mi. Alikna mi panangaro tan inkamaparawes na agagi, tan maaron panangasikaso nen Jehova. Apaneknekan mi met ya tua imay impormisa nen Jesus ed saray disipulo to ya nabasad Marcos 10:29, 30. Dinmakel so espiritual ya agagi tan atateng mi.” Inkuan nen Timo: “Malikeliket kami ta nauusar mi abilidad mid sankaimportantian ya gagala, say pitulongan ed kilaknab na kaykayarian na Ari.”

¹⁷ Parad si Darren tan Sarah, ya tinmulong ed saray proyekto na konstruksion diad Africa, Asia, Central America, Europe, South America, tan South Pacific, mas dakel ni naawat da nen say inter da. Anggano wala ray adalan dan irap, inkuan nen Darren: “Pribilehyok so mikimey ed agagid nanduruman bansa. Anengneng kon say panangaro mid si Jehova et singa lubir ya akapaliber ed globo a mangikakasakey ed sikamin amin.” Inkuan nen Sarah: “Dakel so naaralan kod agagi ya nandurumay kultura da! Lapud nanenengneng koy pansasakripisyo ran manlingkor ed si Jehova, napapakiwas ak met ya gawaen so anggaay nayarian ko.”

18. Panon ya nasusumpal so propesiyad Salmo 110:1-3?

¹⁸ Impasakbay nen Arin David ya anggaman ondalan ed nanduruman irap iray uuleyan na Panarian na Dios, ‘iyapay day inkasikara a mabulbulos’ parad Panarian. (Basaen so Salmo 110:1-3.) Amin ya onsusuportad kimey na Panarian et mitutulongan ed pakasumpal na satan ya propesiya. (1 Cor. 3:9) Saray dakerakel ya bilding na branch, Assembly Hall, tan Kingdom Hall ed interon mundo so paneknek ya tua so Panarian na Dios tan manuuley la itan. Talagan pribilehyo tayon panlingkoran so Arin Jesu-Kristo diad kimey ya mangiiter ed si Jehova na galang a kanepegan to!