1, 2. (a) Kiko ta algu ku sirbidónan di Yehova for di den pasado a hasi ku hopi plaser? (b) Kiko ta loke Yehova realmente ta apresiá?

 FOR di den pasado Yehova su sirbidónan leal ku plaser a traha edifisionan ku ta trese alabansa pa su nòmber. Tuma, por ehèmpel, e israelitanan. Ku masha entusiasmo nan a yuda traha e tabernakel, i nan a kontribuí generosamente ku e materialnan pa hasi e trabou.—Éks. 35:30-35; 36:1, 4-7.

² Pero no ta e material di konstrukshon Yehova ta konsiderá komo e kos prinsipal ku ta dun’é onor ni komo e kos ku mas e ta balorá. (Mat. 23:16, 17) Loke Yehova realmente ta apresiá, esta, e regalo ku mas ta dun’é onor, ta e adorashon ku su sirbidónan ta rindi na dje, inkluso nan spiritu boluntario i e trabou ku nan ta hasi ku masha entusiasmo. (Éks. 35:21; Mar. 12:41-44; 1 Tim. 6:17-19) E echo ei ta importante. Dikon? Pasobra edifisionan t’ei awe i mañan nan no t’ei mas. Por ehèmpel, e tabernakel i e tèmpel no ta eksistí mas. Pero maske e strukturanan ei no t’ei mas, Yehova no a lubidá e generosidat i trabou duru di su sirbidónan leal ku a apoyá e konstrukshonnan ei.—Lesa 1 Korintionan 15:58; Hebreonan 6:10.

3. Kiko nos lo repasá den e kapítulo akí?

³ E sirbidónan di Yehova den nos tempu tambe a traha duru pa konstruí lugánan di adorashon. Anto loke nos a logra bou di guia di nos Rei Hesukristu ta realmente remarkabel! Ta bisto ku Yehova a bendishoná nos esfuersonan. (Sal. 127:1) Den e kapítulo akí nos lo repasá djis algun di e trabounan ku e rumannan a hasi i nos lo wak kon esei a trese onor pa Yehova. Tambe nos lo repasá e komentarionan di algun ruman ku a yuda hasi e tipo di trabou akí.

4. (a) Dikon nos tin mester di mas lugá pa adorá Yehova? (b) Dikon a konsolidá vários sukursal? (Wak e kuadro “ Konstrukshon di Sukursal Ta Adaptá na Nesesidatnan Nobo.”)

⁴ Manera nos por a mira den Kapítulo 16, Yehova ke pa nos reuní huntu pa ador’é. (Heb. 10:25) Nos reunionnan no solamente ta fortalesé nos fe sino tambe nan ta duna nos mas  entusiasmo pa e trabou di prediká. Segun ku e último dianan ta avansá, Yehova ta sigui aselerá e trabou ei. Komo resultado, sientos di míles di hende ta basha bini na su organisashon tur aña. (Isa. 60:22) Mas grandi e kantidat di siudadano di Reino bira, mas lugá di imprenta nos mester pa produsí literatura basá riba Beibel. Tambe nos mester di mas lugá pa adorá Yehova.

5. Dikon e nòmber Salòn di Reino ta na su lugá? (Wak tambe e kuadro “ E Iglesia Lus Nobo.”)

⁵ Na prinsipio di e era moderno di e pueblo di Yehova, Studiantenan di Beibel a kuminsá mira e nesesidat di tin nan propio lugánan di reuní. Parse ku un di e promé lugánan di adorashon ku nan mes a konstruí tabata na Wèst Virginia, Merka, na 1890. Ya pa dékada di 1930, e pueblo di Yehova tabatin un kantidat di lugá pa reuní ku nan a traha òf renobá; ma e lugánan ei no tabatin un nòmber spesífiko. Pero na 1935, Ruman Rutherford a bishitá Hawai, kaminda nan tabata traha un lugá di reuní banda di e ofisina nobo di sukursal. Ora e  rumannan a puntra Ruman Rutherford kon lo mester yama e edifisio, el a bisa nan: “Boso no ta kere ku nos mester yam’é ‘Salòn di Reino,’ ya ku ta esei nos ta hasi akinan, prediká e bon notisia di e Reino”? (Mat. 24:14) No a tarda muchu ku tur lugá di reuní ku e kongregashonnan di e pueblo di Yehova tabata usa rònt mundu a haña e nòmber masha apropiá ei.

6, 7. Ki efekto Salònnan di Reino di konstrukshon rápido tabatin den e komunidatnan kaminda a traha nan?

⁶ Den dékada di 1970, e nesesidat pa Salònnan di Reino a oumentá rápidamente. Pues, e rumannan na Merka a desaroyá un método efisiente pa traha edifisionan bunita i práktiko den apénas un par di dia. Ya pa 1983, nan a traha rònt di 200 di e Salònnan di Reino ei na Merka i Canada. Pa por a hasi e trabou bon, e rumannan a kuminsá forma komiténan regional di konstrukshon. E método akí a funshoná asina bon ku na 1986 Kuerpo Gobernante a formalisá e areglo, i ya pa 1987 tabatin 60 Komité Regional di Konstrukshon na Merka. a Pa 1992, ya nan a nombra e komiténan ei tambe den paisnan manera Alemania, Argentina, Australia, Fransia, Hapon, México, Spaña i Suráfrika. Un kos ta sigur, e rumannan ku ta traha duru pa konstruí Salòn di Reino i Salòn di Asamblea meresé nos apoyo, ya ku e trabou ku nan ta hasi ta un parti di sirbishi sagrado.

⁷ E Salònnan di Reino di konstrukshon rápido akí tabata duna tremendo testimonio den e komunidatnan kaminda a traha nan. Por ehèmpel, un korant na Spaña tabatin e titular “Fe Ta Move Seru.” E korant a komentá riba e konstrukshon rápido di un Salòn di Reino na e stat Martos i a puntra: “Kon  ta posibel den e mundu djawe—ku ta drei riba egoismo—ku boluntarionan di vários region [di Spaña] ta bini Martos sin spera niun ganashi, djis pa nan realisá un proyekto di konstrukshon ku a kibra tur rèkòrt pa loke ta rapides, perfekshon i organisashon?” Pa kontestá e pregunta ei, e artíkulo a sita e palabranan di un di e boluntarionan Testigu di Yehova: “Esei ta posibel pasobra nos ta un pueblo siñá pa Yehova.”

8. Ki programa nobo Kuerpo Gobernante a aprobá na 1999, i dikon?

⁸ Segun ku siglo 20 tabata yega su fin, hende tabata basha bini na e organisashon di Yehova den paisnan kaminda e rumannan tabatin poko rekurso. E kongregashonnan lokal tabata hasi loke nan tabata por pa traha lugánan pa reuní. Pero den algun pais, nan mester a soportá bofon i prehuisio pasobra e Salònnan di Reino lokal tabata hopi primitivo kompará ku otro lugánan di adorashon. Ma na 1999 Kuerpo Gobernante a aprobá un programa pa aselerá trahamentu di Salòn di Reino den paisnan den desaroyo. Nan a pone fondonan disponibel di paisnan mas próspero pa asina kompensá e nesesidat i trese “un balansa.” (Lesa 2 Korintionan 8:13-15.) Ademas, boluntariamente rumannan di otro pais a ofresé pa yuda ku e trabou.

9. Ki tarea a parse un reto grandi, pero kiko e rumannan a logra hasi?

⁹ Na promé instante e tarea tabata parse un reto grandi. Na 2001, un informe a revelá ku tabatin mester di mas ku 18.300 Salòn di Reino den 88 pais den desaroyo. Pero ku e  sosten di Dios su spiritu i di nos Rei Hesukristu, niun tarea no ta imposibel. (Mat. 19:26) Den mas o ménos 15 aña, di 1999 pa 2013, e pueblo di Dios a traha 26.849 Salòn di Reino komo parti di e programa akí. b Yehova a sigui bendishoná e trabou di prediká, di manera ku pa 2013 ainda tabatin mester di un 6.500 Salòn di Reino den e paisnan ei, i aktualmente mester di sientos mas tur aña.

10-12. Kon trahamentu di Salòn di Reino a trese onor pa e nòmber di Yehova?

¹⁰ Kon trahamentu di e Salònnan di Reino nobo ei a trese onor pa e nòmber di Yehova? Un informe di e sukursal di Zimbabwe ta bisa: “Denter di un luna ku nos traha un Salòn di Reino nobo, asistensia na reunion por lo general ta bira dòbel.” Parse ku den hopi pais, e hendenan no ta masha dispuesto pa asosiá ku nos sino te ora ku nos tin un lugá apropiá di adorashon. Anto unabes nos traha un Salòn di Reino, e ta yena umbes i djis despues mester di un otro salòn. Pero no ta djis e aparensia di e lugánan so ta hala hende na Yehova. Loke tambe ta influensiá e manera ku hende ta mira su organisashon ta e berdadero amor kristian ku e rumannan ku ta traha e salònnan ta demostrá. Konsiderá algun ehèmpel.

¹¹ Indonesia. Ora un hòmber ku tabata opservá e konstrukshon di un Salòn di Reino a haña sa ku tur e trahadónan tabata boluntario, el a bisa: “Boso sí ta realmente asombroso! Mi a mira kon kada un di boso ta traha kontentu i ku henter boso alma, maske boso no ta wòrdu pagá. Segun mi, no tin niun otro religion manera esun di boso!”

¹² Ukrania. Un señora ku tur dia tabata pasa dilanti di e proyekto di konstrukshon di un Salòn di Reino a yega na e konklushon ku e trahadónan lo mester tabata Testigunan di Yehova i ku e lugá lo mester a bai bira un Salòn di Reino. Despues el a konta: “M’a tende di Testigunan di Yehova for di mi ruman muhé ku a bira Testigu. Opservando e trabou di konstrukshon ei, m’a disidí ku mi tambe ke forma parti di e famia spiritual akí. Aki m’a mira amor den akshon.” E señora a aseptá un estudio di Beibel i a batisá na 2010.

13, 14. (a) Kiko bo a siña for di e reakshon di un pareha kasá despues ku nan a opservá e aktividatnan na e lugá kaminda tabata traha un Salòn di Reino? (b) Kiko bo por hasi pa sòru pa bo Salòn di Reino trese onor pa e nòmber di Yehova?

¹³ Argentina. Un pareha kasá a aserká e ruman hòmber ku tabata supervisá e proyekto di konstrukshon di un Salòn di Reino. E esposo a bis’é: “Nos a bin ta opservá boso aktividatnan di konstrukshon hopi djaserka, i . . . nos a disidí ku nos ke siña tokante Dios den e lugá akí.” Anto el a puntra e ruman: “Kiko nos tin ku hasi pa nos por tin mag di asistí na e reunionnan akinan?” E pareha a aseptá un estudio di Beibel, pero nan a pone un kondishon: Henter e famia mester por partisipá den e estudio. Ku plaser e rumannan a aseptá e kondishon ei.

¹⁴ Kisas bo no tabatin e privilegio di a yuda traha e Salòn di Reino kaminda bo ta reuní, pero tòg tin hopi kos ku bo por  hasi pa sòru pa bo lugá di adorashon lokal trese onor pa e nòmber di Yehova. Por ehèmpel, bo por ekstendé un invitashon kaluroso na bo studiantenan di Beibel, rebishitanan i hende en general pa asistí huntu ku bo na e reunionnan na Salòn di Reino. Tambe bo por yuda limpia i mantené bo lugá di adorashon. Si bo pone algu un banda, lo bo por hasi un donashon pa yuda kubri e gastunan di bo Salòn di Reino òf un donashon pa yuda traha e lugánan di adorashon akí den otro parti di mundu. (Lesa 1 Korintionan 16:2.) Tur e aktividatnan ei ta trese mas alabansa pa e nòmber di Yehova.

15-17. (a) Ken ta hasi gran parti di e trabou di konstrukshon? (b) Kiko bo a siña for di e komentarionan di e parehanan ku a traha riba proyektonan di konstrukshon internashonal?

¹⁵ Rumannan lokal, tantu hòmber komo muhé, ta esnan ku ta hasi gran parti di e trabou di traha Salòn di Reino, Salòn di Asamblea i fasilidatnan di sukursal. Pero hopi biaha nan ta haña yudansa di rumannan di otro pais ku tin eksperensia den trabou di konstrukshon. Algun di e boluntarionan ei a organisá nan asuntunan di tal manera ku nan por traha riba un proyekto internashonal pa un sierto kantidat di siman. Otro rumannan a pone nan mes disponibel pa sirbi pa hopi aña, bayendo di un asignashon di konstrukshon pa otro.

¹⁶ E trabou di konstrukshon internashonal ta presentá algun reto úniko, pero tambe e ta duna bunita rekompensa. Por ehèmpel, Timo ku Lina a biaha pa paisnan manera Asia, Europa i Suramérika pa traha riba konstrukshon di Salòn di Reino, Salòn di Asamblea i fasilidatnan di sukursal. Timo a bisa: “Durante e último 30 añanan, mi asignashon tabata kambia, komo promedio, kada 2 aña.” Lina a kasa ku Timo 25 aña pasá,  i el a konta: “M’a sirbi huntu ku Timo den 10 pais. Ta kosta hopi energia i tempu pa kustumbrá ku kuminda nobo, klima nobo, idioma nobo, teritorio nobo pa prediká i tambe pa sera amistatnan nobo.” c Pero esei tabata bale la pena? Segun Lina: “Ta nèt e retonan a trese e bendishonnan di mas grandi pa nos. Nos a eksperensiá amor i hospitalidat kristian i a sinti Yehova su kuido amoroso. Tambe nos a mira kon loke Hesus a primintí su disipelnan, i ku ta pará skirbí na Marko 10:29 i 30, a kumpli. Nos a risibí 100 biaha mas tantu ruman hòmber, ruman muhé i mama spiritual.” Timo a bisa: “Nos ta sinti un satisfakshon profundo di por usa nos abilidatnan pa e propósito di mas noble ku ta eksistí, esta, pa por yuda ekspandé e pertenensianan di nos Rei.”

¹⁷ Darren ku Sarah, kendenan a yuda ku proyektonan di konstrukshon na Afrika, Asia, Europa, Sentroamérika, Sur Pasífiko i Suramérika, ta sinti ku nan a haña mas ku loke nan a duna. Apesar di e retonan ku nan a konfrontá, Darren a bisa: “Tabata un privilegio di por a traha ku rumannan di vários parti di mundu. M’a nota ku e amor ku nos tur tin pa Yehova ta manera un hilu ku ta ekstendé rònt e globo i ku ta uni nos tur huntu.” Sarah a bisa: “M’a siña masha hopi for di rumannan di diferente kultura! Ora mi mira e sakrifisionan ku nan ta hasi pa sirbi Yehova, mi ta sinti mi motivá pa sigui duna lo mihó di mi parti.”

18. Kon e profesia na Salmo 110:1-3 ta kumpliendo awe?

¹⁸ Rei David a profetisá ku apesar ku siudadanonan di e Reino di Dios lo a haña nan ku reto, nan lo a ‘pone nan mes disponibel’ pa sirbi e interesnan di e Reino. (Lesa Salmo 110:1-3.) Tur ruman ku ta enbolbí den trabou ku ta apoyá e Reino ta yuda kumpli ku e palabranan profétiko ei. (1 Kor. 3:9) Un gran kantidat di edifisio di sukursal, sientos di Salòn di Asamblea i dies di míles di Salòn di Reino rònt mundu ta un prueba palpabel ku e Reino di Dios ta real i ta goberná aworakí. Esta un gran privilegio nos tin di por sirbi Rei Hesukristu den un trabou ku ta duna Yehova e onor ku e meresé asina tantu!