1, 2. (a) Kico sirbidornan di Jehova semper a haci cu goso? (b) Kico Jehova realmente ta balora?

 SEMPER Jehova su sirbidornan leal cu goso a traha edificionan cu ta duna honor na su nomber. Tuma por ehempel, e Israelitanan. Cu hopi entusiasmo nan a yuda traha e tabernakel, y nan a contribui generosamente cu e materialnan pa haci e trabou.—Exo. 35:30-35; 36:1, 4-7.

² Pero no ta material di construccion Jehova ta haya cu ta e cos principal cu ta dun’e honor, ni esey no ta e cos cu mas e ta balora. (Mat. 23:16, 17) Loke Jehova realmente ta balora y loke ta dun’e honor ta e adoracion cu su sirbidornan ta rindi na dje, incluso nan spirito boluntario y e trabou cu nan ta haci cu hopi entusiasmo. (Exo. 35:21; Mar. 12:41-44; 1 Tim. 6:17-19) E detaye ey ta importante. Dicon? Pasobra edificionan t’ey awe y mañan nan no t’ey mas. Por ehempel, e tabernakel y e tempel no ta existi mas. Pero maske e structuranan ey no t’ey mas, Jehova no a lubida e generosidad y trabou duro di su sirbidornan leal cu a apoya construccion di e tabernakel y e tempel.—Lesa 1 Corintionan 15:58; Hebreonan 6:10.

3. Kico nos lo repasa den e capitulo aki?

³ E sirbidornan di Jehova den nos tempo tambe a traha duro pa construi luganan di adoracion. Anto loke nos a logra bou di guia di nos Rey Hesucristo ta realmente remarcabel. Ta bisto cu Jehova a bendiciona nos esfuerso. (Sal. 127:1) Den e capitulo aki nos lo repasa djis algun di e trabounan cu e rumannan a haci y nos lo wak con esey a duna honor na Jehova. Tambe nos lo repasa e comentarionan di algun ruman cu a yuda haci e tipo di trabou aki.

4. (a) Dicon nos tin mester di mas luga pa adora Jehova? (b) Dicon a consolida varios sucursal? (Wak e cuadro “ Construccion di Sucursal Ta Adapta na e Necesidadnan.”)

⁴ Manera nos por a mira den Capitulo 16, Jehova kier pa nos reuni pa ador’e. (Heb. 10:25) Nos reunionnan no solamente ta fortalece nos fe, sino tambe nan ta motiva nos pa participa  den e trabou di predica. Segun cu e ultimo dianan ta pasa, Jehova ta sigui acelera e trabou ey. Como resultado, cientos di miles di hende ta drenta su organisacion tur aña. (Isa. 60:22) Mas grandi e cantidad di ciudadano di Reino bira, mas luga di imprenta nos mester pa produci literatura basa riba Bijbel. Tambe nos mester di mas luga pa adora Jehova.

5. Dicon e nomber Salon di Reino ta apropia? (Wak tambe e cuadro “ E Iglesia Luz Nobo.”)

⁵ Na principio di e era moderno di e pueblo di Jehova, Studiantenan di Bijbel a cuminsa mira e necesidad di tin nan propio luganan di reuni. Parce cu un di e prome luganan di adoracion cu nan mes a construi tabata na West Virginia, Merca, na 1890. Ya pa decada di 1930, e pueblo di Jehova tabatin un cantidad di luga pa reuni cu nan a traha of renoba; pero ainda e luganan ey no tabatin un nomber specifico. Na 1935 esey a cambia ora cu Ruman Rutherford a bishita Hawai, caminda nan tabata trahando un luga di reuni banda di e oficina nobo di sucursal. Ora e rumannan a puntra Ruman Rutherford con lo  mester yama e edificio, el a bisa nan: “Boso no ta pensa cu nos mester yam’e ‘Salon di Reino’, ya cu ta esey nos ta haci, predica e bon noticia di e Reino?” (Mat. 24:14) No a tarda hopi cu tur e luganan di reuni cu e congregacionnan di e pueblo di Jehova tabata uza rond mundo a haya e nomber ey.

6, 7. Kico nos a logra cu construccion rapido di Salonnan di Reino den e comunidadnan caminda a traha nan?

⁶ Den decada di 1970, e necesidad pa Salonnan di Reino a aumenta rapidamente. Pues, e rumannan na Merca a bin cu un metodo eficiente pa traha edificionan bunita y practico den apenas un par di dia. Ya pa 1983, nan a traha rond di 200 di e Salonnan di Reino ey na Merca y Canada. Pa por a haci e trabou bon, e rumannan a cuminsa forma comitenan regional di construccion. E metodo aki a funciona asina bon cu na 1986 Cuerpo Gobernante a oficialisa e areglo, y na 1987 tabatin 60 Comite Regional di Construccion na Merca. a Ya pa 1992, nan a nombra e comitenan ey tambe den paisnan manera Alemania, Argentina, Australia, Francia, Japon, Mexico, Spaña y Sur Africa. Un cos ta sigur, e rumannan cu ta traha duro pa construi Salon di Reino y Salon di Asamblea merece nos apoyo, ya cu e trabou cu nan ta haci ta parti di sirbishi sagrado.

⁷ E construccion rapido di e Salonnan di Reino aki tabata duna tremendo testimonio den e comunidadnan caminda a traha nan. Por ehempel, un corant na Spaña tabatin e titular “Fe Ta Move Montaña.” E corant a haci e siguiente pregunta tocante e construccion rapido di un Salon di Reino na e stad  Martos: “Con ta posibel den e mundo egoista aki cu boluntarionan di varios region [di Spaña] ta bin Martos, sin ningun interes personal, pa un proyecto di construccion cu a kibra record di rapidez, perfeccion y organisacion?” Pa contesta e pregunta ey, e articulo a cita e palabranan di un di e boluntarionan testigo di Jehova: “Esey ta posibel pasobra ta Jehova ta educa su pueblo.”

8. Kico Cuerpo Gobernante a aproba na 1999, y dicon?

⁸ Segun cu siglo 20 tabata yegando su final, un gran cantidad di hende tabata drenta e organisacion di Jehova den paisnan caminda e rumannan tabatin poco recurso. E congregacionnan local tabata haci loke nan tabata por pa traha luganan di reuni. Pero den algun pais, nan mester a soporta bofon y prehuicio pasobra e Salonnan di Reino local tabata hopi primitivo compara cu otro luganan di adoracion. Pero na 1999 Cuerpo Gobernante a aproba un programa pa acelera trahamento di Salon di Reino den paisnan den desaroyo. Nan a pone fondonan disponibel di paisnan mas prospero pa asina compensa e necesidad y trece “un balansa.” (Lesa 2 Corintionan 8:13-15.) Ademas, boluntariamente rumannan di otro pais a ofrece pa yuda cu e trabou.

9. Ki tarea a parce un reto grandi, pero kico e rumannan a logra haci?

⁹ Na prome instante e tarea tabata parce un reto grandi. Na 2001, un informe a revela cu tabatin mester di mas cu 18.300 Salon di Reino den 88 pais den desaroyo. Pero cu e  sosten di Dios su spirito santo y di nos Rey Hesucristo, niun tarea no ta imposibel. (Mat. 19:26) Den mas o menos 15 aña, di 1999 pa 2013, e pueblo di Dios a traha 26.849 Salon di Reino como parti di e programa aki. b Jehova a sigui bendiciona e trabou di predica, di manera cu na 2013 ainda tabatin mester di un 6.500 Salon di Reino den e paisnan ey, y tur aña mester di cientos mas.

10-12. Con construccion di Salon di Reino a duna honor na e nomber di Dios?

¹⁰ Con construccion di e Salonnan di Reino nobo ey a duna honor na e nomber di Dios? Un informe di e sucursal di Zimbabwe ta bisa: “Dentro di un luna cu nos traha un Salon di Reino nobo, asistencia na reunion por lo general ta bira dobel.” Parce cu den hopi pais, e hendenan no ta dispuesto pa asocia cu nos sino te ora cu nos tin un luga apropia di adoracion. Anto unabes nos traha un Salon di Reino, esaki ta yena mesora y un poco tempo despues mester di un otro salon. Pero no ta solamente e apariencia di e luganan ta atrae hende na Jehova. Loke tambe ta influencia e manera cu hende ta mira su organisacion ta e berdadero amor cristian cu e rumannan cu ta traha e salonnan ta demostra. Laga nos wak algun ehempel.

¹¹ Indonesia. Ora un homber cu tabata observa e construccion di un Salon di Reino a haya sa cu tur e trahadornan tabata boluntario, el a bisa: “Boso si ta asombroso. Mi a mira con cada un di boso ta traha contento y cu henter boso alma, maske boso no ta wordo paga. Segun mi, no tin niun otro religion manera esun di boso.”

¹² Ucrania. Un señora cu tur dia tabata pasa dilanti di e proyecto di construccion di un Salon di Reino a yega na e conclusion cu e trahadornan mester tabata testigonan di Jehova cu ta trahando un Salon di Reino. Despues el a conta: “M’a tende di testigonan di Jehova for di mi ruman muher cu a bira Testigo. Observando e trabou di construccion ey, m’a dicidi cu mi tambe kier forma parti di e famia spiritual aki. Akinan si m’a mira hende ta mustra amor.” E señora a acepta un estudio di Bijbel y a batisa na 2010.

13, 14. (a) Kico bo a siña for di e reaccion di un pareha casa cu a observa e actividadnan na e luga caminda tabata traha un Salon di Reino? (b) Kico bo por haci pa percura pa bo Salon di Reino duna honor na e nomber di Dios?

¹³ Argentina. Un pareha casa a acerca e ruman homber cu tabata supervisa e proyecto di construccion di un Salon di Reino. E esposo a bis’e: “Nos a observa boso actividadnan di construccion, y ... nos a dicidi cu nos kier siña tocante Dios den e luga aki.” Anto el a puntra e ruman: “Kico nos tin cu haci pa nos por asisti na e reunionnan akinan?” E pareha a acepta un estudio di Bijbel, pero nan a pone un condicion: Henter e famia mester participa den e estudio. Cu placer e rumannan a acepta e condicion ey.

¹⁴ Kisas bo no tabatin e privilegio di yuda traha e Salon di Reino caminda bo ta reuni, pero toch tin hopi cos cu bo por  haci pa percura pa bo luga di adoracion local duna honor na e nomber di Dios. Por ehempel, bo por extende un invitacion caluroso na bo studiantenan di Bijbel, rebishitanan y hende en general pa asisti hunto cu bo na e reunionnan na Salon di Reino. Tambe bo por yuda limpia y mantene bo luga di adoracion. Si bo pone algo un banda, lo bo por haci un donacion pa yuda cubri e gastonan di bo Salon di Reino of yuda traha e luganan di adoracion aki na otro parti di mundo. (Lesa 1 Corintionan 16:2.) Tur e actividadnan ey ta trece mas alabanza pa e nomber di Dios.

15-17. (a) Ken ta haci gran parti di e trabou di construccion? (b) Kico bo a siña for di e comentarionan di e parehanan cu a traha riba proyectonan di construccion internacional?

¹⁵ Rumannan local, tanto homber como muher, ta esnan cu ta haci gran parti di e trabou di construccion di Salon di Reino, Salon di Asamblea y facilidadnan di sucursal. Pero hopi biaha nan ta haya yudansa di rumannan di otro pais cu tin experencia den trabou di construccion. Algun di e boluntarionan ey a organisa nan asuntonan di tal manera cu nan por traha riba un proyecto internacional pa un cierto cantidad di siman. Otro rumannan a pone nan mes disponibel pa sirbi pa hopi aña, bayendo di un asignacion di construccion pa otro.

¹⁶ E trabou di construccion internacional ta trece algun reto unico, pero tambe esaki ta trece bunita recompensa. Por ehempel, Timo cu Lina a biaha pa paisnan manera Asia, Europa y Sur America pa traha riba construccion di Salon di Reino, Salon di Asamblea y facilidadnan di sucursal. Timo a bisa: “Durante e ultimo 30 añanan, mi asignacion tabata cambia, como promedio, cada 2 aña.” Lina kende a casa cu Timo 25 aña pasa  a conta: “M’a sirbi hunto cu Timo den dies pais. Ta costa hopi energia y tempo pa custumbra cu cuminda nobo, clima nobo, idioma nobo, teritorio nobo pa predica y tambe pa cera amistadnan nobo.” c Pero esey tabata bale la pena? Segun Lina: “Ta net e retonan ey a trece e bendicionnan di mas grandi pa nos. Nos a experencia amor y hospitalidad cristian y a sinti Jehova su cuido amoroso. Tambe nos a mira con loke Hesus a priminti su discipelnan na Marco 10:29 y 30 a cumpli. Nos a ricibi 100 biaha mas tanto ruman homber, ruman muher y mama spiritual.” Timo a bisa: “Nos ta sinti un satisfaccion profundo di por uza nos habilidadnan pa e proposito di mas noble cu ta existi, esta, pa por yuda expande e pertenencianan di nos Rey.”

¹⁷ Darren cu Sarah, kendenan a yuda cu proyectonan di construccion na Africa, Asia, Europa, America Central, Sur Pacifico y Sur America, ta sinti cu nan a haya mas cu loke nan a duna. A pesar di e retonan cu nan a confronta, Darren a bisa: “Tabata un privilegio di por a traha cu rumannan di varios parti di mundo. M’a nota cu e amor cu nos tur tin pa Jehova ta manera un hilo cu ta pasa rond di e globo y cu ta uni nos tur.” Sarah a bisa: “M’a siña masha hopi for di rumannan di diferente cultura. Ora mi mira e sacrificionan cu nan ta haci pa sirbi Jehova, mi ta sinti mi motiva pa sigui duna lo mihor di mi parti.”

18. Con e profecia na Salmo 110:1 te cu 3 ta cumpliendo awe?

¹⁸ Rey David a profetisa cu a pesar cu ciudadanonan di e Reino di Dios lo a haya nan cu reto, nan lo a “pone [nan] mes disponibel” pa sirbi e interesnan di e Reino. (Lesa Salmo 110:1-3.) Tur ruman cu ta envolvi den trabou cu ta apoya e Reino ta yuda cumpli cu e palabranan profetico ey. (1 Cor. 3:9) Un gran cantidad di edificio di sucursal, cientos di Salon di Asamblea y dies di miles di Salon di Reino rond mundo ta un prueba palpabel cu e Reino di Dios ta real y ta gobernando aworaki. Esta un gran privilegio nos tin di por sirbi nos Rey Hesucristo den un trabou cu ta duna Jehova e honor cu e merece asina tanto!