1, 2. 1) ¿Imatataj Jehovaj kamachisnin kusiywan ruwarqankupuni? 2) ¿Imatá Jehová aswan allinpaj qhawan?

 JEHOVAJ kamachisnenqa, ñaupa tiempomantapacha may kusiywan tantakuna wasista ruwarqankupuni, chaykunataj Sutinta jatunchan. Sutʼincharinapaj, israelitasqa Dioswan tinkukuna toldota ruwaypi mayta yanapakorqanku, ruwakunanpaj imaschus necesitakusqantapis mana michʼakuspa aparqanku (Éxo. 35:30-35; 36:1, 4-7).

² ¿Tantakuna wasi imaswanchus ruwasqa kasqanchu Jehovata jatunchan? Mana. Chayrayku Jehovaqa mana chaykunatachu aswan allinpaj qhawan (Mat. 23:16, 17). Astawanqa kamachisnin yupaychasqankuta, tukuy sonqo, allintataj llankʼasqankuta aswan allinpaj qhawan (Éxo. 35:21; Mar. 12:41-44; 1 Tim. 6:17-19). Imaraykuchus ruwasqa wasisqa mana wiñaypajchu, imaynatachus Dioswan tinkukuna toldo, templopis mana wiñaypajchu karqanku ajina. Chaywanpis Jehovaqa cheqa sonqo kamachisnin chaykunata ruwakunanpaj imastachus qosqankuta, llankʼasqankutapis mana qonqapunchu (1 Corintios 15:58; Hebreos 6:10 leey).

3. ¿Imamantá kay yachaqanapi parlarisun?

³ Kunanpis Diospa kamachisnenqa, Diosta yupaychanapaj tantakuna wasista ruwaypi mayta llankʼallanchejtaj. Rey Jesucristoj yanapayninwan may chhikataña ruwasqanchejqa, tʼukunapaj jina. Chaytaj sutʼita rikuchin, kallpachakusqanchejrayku Jehová bendeciwasqanchejta (Sal. 127:1). Kay yachaqanapeqa wakillanmanta parlarisun tantakuna wasista ruwakusqanmanta, chaykuna imaynatachus Jehovata jatunchasqanmantapis. Chantá chay llankʼaypi yanapakojkuna imatachus nisqankuta qhawarisun.

4. 1) ¿Imaraykutaj Diosta yupaychanapaj Tantakuna Wasis necesitakun? 2) ¿Imaraykutaj wakin sucursalesta wisqʼakun? (“ Sucursalesta ruwakun” nisqa recuadrota qhawariy.)

⁴ Kay 16 yachaqanapi rikorqanchej jina, Jehovaqa payta yupaychanapaj tantakunanchejta munan (Heb. 10:25). Tantakuykunaqa creeyninchejta kallpachan, astawan willananchejpajtaj tanqawanchej. Jehovaqa kay qhepa pʼunchaykunapi, chay llankʼayta aswan usqhayta ñauparichishan. Chayraykutaj,  sapa wata may chhika runas Diospa llajtanman yaykushanku (Isa. 60:22). Diospa Reinonpa kamachiyninpi kajkuna astawan mirashasqankurayku, publicacionesta imprimikunanpaj wasis necesitakun, jinallataj Diosta yupaychanapaj wasispis.

5. ¿Imaraykutaj Salón del Reino nisqa suti chaypaj jinapuni? (“ Mosoj Kʼanchay Iglesia” nisqa recuadrotawan qhawariy.)

⁵ Jehovaj llajtan kay tiempopi qallarishajtin, Bibliamanta Yachaqajkunaqa tantakuna wasis necesitakusqanta repararqanku. Ñaupaj kajqa ichapis 1890 watapi, Virgina Occidental nisqapi ruwakorqa (Estados Unidos). Kay 1930 watas chaynejpaj, ashkha tantakuna wasisña ruwakorqa chayri allinchakorqa, jinapis mana sutiyojlla karqanku. Kay 1935 watapi hermano Rutherford Hawái suyuman rerqa, chaypitaj uj sucursalta, uj tantakuna wasitawan ruwakusharqa. Chay kutipi uj hermano, Rutherford hermanota taporqa ima sutitachus chay wasisman churakunanta. Hermano Rutherfordtaj kuticherqa: “¿Manachu ‘Salón del Reino’ (Tantakuna Wasi) nispa sutichasunman? Imajtinchus  Reinomanta sumaj willaykunata willashanchej” (Mat. 24:14). Chay suteqa chaypaj jinapuni karqa. Pisi tiemponmantaj Jallpʼantinpi Jehovaj llajtanpa tukuy tantakuna wasisnin, chay sutiwan rejsisqa karqanku.

6, 7. ¿Imaynatá yanaparqa pisi pʼunchaykunallapi Tantakuna Wasista ruwakunanpaj wakichikusqan?

⁶ Kay 1970 watas chaynejpi, astawan Tantakuna Wasis ruwakunan karqa. Chayrayku Estados Unidosmanta hermanos, sumaj ruwasqa kʼachitu tantakuna wasista imaynatachus pisi pʼunchaykunallapi ruwakunanpaj wakicherqanku. Kay 1983 watapajtaj, Estados Unidospi, Canadapi ima 200 tantakuna wasista jina chay wakichikusqanman jina ruwakorqa. Chay llankʼayta sumajta ruwakunanpajqa comités regionales de construcción nisqata rikhuricherqanku. Chaytaj sumajpuni kasqanrayku, 1986 watapi Diospa Llajtanta Kamachejkuna nerqanku, Comités Regionales de Construcción (CRC) nisqas kanallantapuni. Kay 1987 watapajqa Estados Unidospi, 60 Comités Regionales de Construcción nisqaña karqa. a Kay 1992 watapajtaj Alemaniapi, Argentinapi, Australiapi, Brasilpi, Españapi, Franciapi, Italiapi, Japonpi, Mexicopi, Noruegapi, Sudafricapi, Sueciapi imaña karqa. Tukuy noqanchejtaj, Tantakuna Wasista, Jatun Tantakuna Wasista ima ruwaypi kallpachakoj hermanosta yanapananchej tiyan. Imajtinchus chay llankʼaypis Diosta yupaychanapaj.

⁷ Runasqa usqhayllata tantakuna wasista ruwakusqanta rikuspa, allinta parlanku. Martos llajtapi (Jaén) uj Tantakuna  Wasita ruwakusqanmanta, Españamanta uj periódico “Creeyqa orqosta ithirichin” nisqa tituloj uranpi kayta nerqa: “Kay tiempo runasqa paykunallapi yuyanku, [España] japʼiymanta ashkha runastaj wajkunapi yuyaspa, mana pagasqallataj Martos llajtaman rinku uj ruwaypi yanapakunankupaj, chaytaj usqhayllata ruwakorqa, sumaj ruwasqataj, sumaj wakichisqataj. ¿Imaraykutaj chay jinata llankʼankuri?”, nispa. Chay tapuyman kutichispataj, chay llankʼaypi yanapakoj imatachus nisqanta qhelqarqanku, pay nerqa: “Jehovaj yachachisqan llajta kasqaykurayku chay jinata llankʼayku”, nispa.

8. ¿Imata ruwakunantataj 1999 watapi Diospa Llajtanta Kamachejkuna nerqanku, imaraykutaj?

⁸ Kay 1990 watas chaynejta, wajcha suyuspi ashkha runas Jehovaj llajtanman yaykorqanku. Chay suyusmanta hermanosqa, tantakuna wasista ruwanankupaj mayta kallpachakorqanku. Runastaj, wakin kuti asipayaj kanku, nitaj allinpajchu qhawaj kanku mana jatuchaj iglesiasta jinachu, manaqa ñaupa wasista jinalla ruwasqankurayku. Kay 1999 watamantapachataj, Diospa Llajtanta Kamachejkunaqa chay suyuspi usqhayllata Tantakuna Wasista ruwakunanta nerqanku. Chantá “tukuypata kapunampaj” qhapaj llajtasmanta qolqeta apachikunanta nerqanku (2 Corintios 8:13-15 leey). Chantapis waj suyusmanta hermanos, hermanas ima mana pagasqalla chayman yanapakoj rerqanku.

9. ¿Imataj mana atinapaj jina kasqanman rijchʼakorqa, jinapis mashkhañataj ruwakun?

 ⁹ Qallariypeqa chay llankʼay mana atinapaj jina kasqanman rijchʼakorqa. Imajtinchus 2001 watapi mashkharajchus ruwakunan kasqanmanta willakusqanman jina, 18.300 kuraj tantakuna wasista 88 wajcha suyuspi ruwakunan karqa. Jinapis Jehovaj espíritu santonwan, Reyninchej Jesucristoj yanapayninwan ima tukuy ima atikun (Mat. 19:26). Kay 1999 watamanta 2013 watakamaqa (15 wataspi jina) Diospa llajtan 26.849 tantakuna wasista ruwarqa. b Jehová willayninchejta bendecisqanrayku, 2013 watapi 6.500 Tantakuna Wasista jinaraj chay suyuspi ruwakunan karqa, sapa watataj aswan ashkha necesitakun.

10-12. ¿Imaynatá Jehovata jatunchan tantakuna wasista ruwakusqan?

¹⁰ Chay wasista ruwakusqanqa Jehovata jatunchan. Zimbabue sucursalmanta willakusqanpi kayta nin: “Tantakuna Wasi ruwakusqanmanta killanman, uj jinapiwan tantakuyman jamunku”, nispa. Ashkha suyuspeqa tantakunapaj uj sumaj wasi mana kajtin, runasqa mana riyta munallankuchu. Tantakuna Wasi ruwakojtintaj, ashkha runas tantakuykunaman rinku, chayrayku wajtawan ruwana tiyan. Runasqa mana kʼacha tantakuna wasis kasqanraykullachu Jehovaman qayllaykunku, manaqa chay wasita ruwaypi yanapakojkuna munakuyta rikuchisqankurayku. Wakinmanta parlarina.

¹¹ Indonesia. Uj runa Tantakuna Wasita ruwashasqankuta qhawasharqa. Chaypi llankʼajkuna mana pagoraykuchu llankʼasqankuta yachaytawan, kayta nerqa: “Qankunaqa tʼukuchiwankichej. Sapa ujniykichej tukuy sonqo kusiywan llankʼankichej, mana pagasojtiykichejpis. Reparasqayman jinaqa, ni mayqen religionpis qankuna jinaqa kanchu”, nispa.

¹² Ucrania. Tantakuna wasita ruwakusharqa chaynejta sapa pʼunchay uj señora pasaj. Payqa repararqa chay llankʼajkuna Jehovaj testigosnin kasqankuta, Tantakuna Wasitataj ruwashasqankuta. Pay nerqa: “Hermanayqa Jehovaj testigon, chayrayku paykunamanta uj chhikanta yacharqani. Llankʼasqankuta rikuspataj noqapis paykuna parte kayta munarqani. Rikorqanitaj munakuyninkoqa mana simillamantachu kasqanta”. Tiempowanqa Bibliamanta yachakorqa, 2010 watapitaj bautizakorqa.

13, 14. 1) ¿Imatá yachakunchej uj qhariwarmi tantakuna wasita ruwakushajtin imatachus nisqankumanta? 2) ¿Imaynatá yanapakuwaj maypichus tantakunki chay wasi Diospa sutinta jatunchananpaj?

¹³ Argentina. Uj qhariwarmeqa, Tantakuna Wasi ruwakushasqanmanta cargoyoj hermanoman chimpaykorqanku. Qosaqa ajinata nerqa: “Kay wasitaqa qhawashajtillayku ruwarqonku [...] kaypi Diosmanta yachakuyta munayku. [...] ¿Imatá ruwaykuman kaypi ruwakonqa chay tantakuykunaman jamunaykupajri?”, nispa. Chay qhariwarmeqa tukuynin familianman yachachinanku kajtillan, Bibliamanta yachakunankuta nerqanku. Hermanostaj kusiywan tukuyninkuman yachacherqanku.

 ¹⁴ Ichapis qanqa mana yanapakuyta aterqankichu, maypichus tantakushanki chaypi Tantakuna Wasi ruwakushajtin. Jinapis chay wasi Jehovaj sutinta jatunchananpaj yanapakuwaj. ¿Imaynamantá? Bibliamanta yachachishanki chay runasta, yachakuyta munajkunata, waj runastapis tantakuykunaman jamunankupaj tukuy sonqo wajyarispa. Chantapis tantakuna wasita allinchaypi, llimphuchaypi ima yanapakullawajtaj. Chantá ñaupajmantaña wakichiwaj mashkhallatapis churanaykipaj, chaytaj kanman tantakuna wasi allinchakunanpaj chayri Jallpʼantinpi waj tantakuna wasispiwan ruwakunanpaj (1 Corintios 16:2 leey). Tukuy chay ruwaykunaqa Diospa sutinta jatunchan.

15-17. 1) ¿Pikunataj tantakuna wasista ruwaypi astawan yanapakunku? 2) ¿Imatá yachakunchej waj suyuspi yanapakojkunamanta?

¹⁵ Tantakuna Wasista, Jatun Tantakuna Wasista, sucursalesta ima ruwaypeqa astawan yanapakunku, maypichus ruwakushan chay lugarmanta hermanos, hermanas ima. Chaywanpis waj suyusmanta hermanos yanapakullankutaj, pikunachus wasi ruwaymanta sumajta yachanku chaykuna. Chay hermanosmanta wakenqa, ashkha semanasta waj suyuspi llankʼanankupaj wakichikunku. Wakintaj ashkha wataspaj llankʼayta munasqankuta ninku, chayrayku tukuy ladoman kachasqa kanku.

¹⁶ Waj suyuspi tantakuna wasista ruwayqa mana atinapaj jinallachu, jinapis kusiyta apamun. Timowan Linawanqa Tantakuna Wasista, Jatun Tantakuna Wasista, sucursalesta ruwaypi yanapakunankupaj Asiaman, Europaman, Sudamericaman ima rerqanku. Timo nin: “Kay pasaj 30 wataspeqa, sapa iskay wata waj lugarman kachasqa karqani”, nispa.  Lina, pichus 25 watasña Timowan casarasqa, ajinata nin: “Chunka suyuspiña iskayniyku sirviyku. Mikhunaman, chiriman, qʼoñiman, parlaykunaman, wajkunaman ima yachakoyqa mana atikullanchu, tiempopajtaj”, nispa. c Chaywanpis ruwasqankoqa mana qhasipajchu karqa. Lina nillanpuni: “Chʼampaykunaqa, aswan ashkha bendicionesta apamuwayku. Repararqayku hermanos munakuwasqaykuta, wajyarikoj kasqankuta, Jehovapis munakuwasqaykuta. Chantapis reparallaykutaj Jesús yachachisqasninman Marcos 10:29, 30 versiculospi nisqan juntʼakusqanta. Hermanos, hermanas, tatas, mamas imaqa 100 kurajpiwan kapuwayku”. Timotaj nin: “May kusisqa kashayku tukuy yachasqaykuta Diospa Reinonta yanapanaykupaj churasqaykumanta”.

¹⁷ Darren, warmin Sarah ima chay llankʼaypi yanapakorqanku, Africapi, Asiapi, Centroamericapi, Europapi, Pacífico sur nisqapi, Sudamericapi ima. Paykunataj yuyanku qosqankumantapis astawanraj japʼisqankuta. Chʼampaykunapi rikukojtinkupis Darren nin: “May sumajpuni karqa waj suyusmanta hermanoswan llankʼayqa. Rikorqani Jehovata munakusqanchejqa uj waskha jina Jallpʼata muyuykusqanta, tukuy hermanoswantaj ujchawasqanchejta”, nispa. Chantá Sarah nin: “Waj hermanosmanta mayta yachakorqani. Jehovata sirvinankupaj mayta kallpachakusqankuta rikuspa, Jehovaman tukuy atisqayta qoyta munallanipuni”.

18. ¿Imaynatá Salmo 110:1-3 versiculospi nisqan juntʼakushan?

¹⁸ Rey Davidqa nerqa, Diospa Reinonpa kamachiyninpi kajkuna chʼampaykunapi kaspapis, tukuy sonqo jaywaykukunankuta, Reinoj llankʼayninpi yanapakunankupaj (Salmo 110:1-3 leey). Diospa Reinonrayku ima llankʼayllapipis yanapakojqa chayta juntʼashan (1 Cor. 3:9). Ashkha sucursales, ashkha Jatun Tantakuna Wasis, may chhika Tantakuna Wasistaj Jallpʼantinpi ruwakusqanqa, sutʼita rikuchin Diospa Reinon kasqantapuni, kamachishasqantañataj. Rey Jesucristota chay llankʼaypi kaspa sirveyqa may sumajpuni, imajtinchus chay ruwayqa Jehovata jatunchan.