1, 2. a) ¿Imatan Diosta serviqkuna ñawpaq tiempomantaraq kusikuywan ruwarqanku? b) ¿Imatan Jehová Dios aswan allinpaq qhawarin?

 DIOSTA serviqkunaqa ñawpaqmantaraqmi kusikuywan yupaychana wasikunata hatarichirqanku, chhaynapi Diospa sutin hatunchasqa kananpaq. Israelitakunaqa kusikuywanmi yanapakurqanku Dios yupaychana karpata ruwaypi, chayta ruwanapaq ima necesitakusqantapas tukuy sonqomantan qorqanku (Éx. 35:30-35; 36:1, 4-7).

² Jehová Diosqa manan ninchu: “Sutiy hatunchasqa kananpaqqa allin materialwanmi yupaychana wasikunata hatarichinaykichis, chaytan ñoqaqa aswan allinpaq qhawarini” nispaqa (Mat. 23:16, 17). Chhaynaqa, ¿imatan Jehová Dios aswan allinpaq qhawarin? Payqa aswan allinpaqqa qhawarin siervonkuna payta yupaychasqankutan, imatapas tukuy sonqomanta ruwaq kasqankuta, allin llank’aq kasqankutapas (Éx. 35:21; Mar. 12:41-44; 1 Tim. 6:17-19). Chhayna kasqanqa ancha importanten, ¿imarayku? Wasikunaqa manan wiñaypaqchu, ñawpaq tiempopi ruwasqanku Dios yupaychana karpapas templopas manañan kanñachu. Ichaqa manaña kapunñachu chaypas, Jehová Diosqa manan qonqanchu siervonkuna chay ruwaypi tukuy sonqomanta yanapakusqankuta, qoykukuq kasqankutapas (leey 1 Corintios 15:58; Hebreos 6:10).

3. ¿Imakunamantan kay capitulopi yachasun?

³ Kay tiempopipas Diosta serviqkunaqa mana sayk’uspan yupaychana wasikunata hatarichishanchis. Lliw chay ruwakusqanqa ancha admirakunapaqmi, chaykunataqa rey Jesucristoq yanapayninwanmi ruwarqanchis. Sut’itan reparanchis lliw ruwasqanchispi Jehová Dios bendeciwasqanchista (Sal. 127:1). Kay capitulopin yachasun wakin ruwasqanchiskunamanta, chaykuna Diospa sutinta imaynatachus hatunchasqanmantapas. Chaymantapas yachasunchismi wakin iñiqmasinchiskuna chaykunapi yanapakuspa imayna sientekusqankumanta.

4. a) ¿Imaraykun aswan askha huñunakuna wasikunata necesitanchis? b) ¿Imaraykun askha sucursalkuna wisq’akurqan? (Qhaway “ Necesitakusqanman hina cambiokunata ruwakun” nisqa recuadrota.)

⁴ 16 capitulopi yachasqanchis hina, Jehová Diosqa munanmi huñunakuspa payta yupaychananchista (Heb. 10:25). Huñunakuykunaqa manan iñiynillanchispichu yanapawanchis, aswanpas kallpachawallanchistaqmi kusikuywan predicacionpi yanapakunanchispaq. Diospa p’unchayninqa ñan chayamushanña, chaymi Jehová Diosqa usqhaylla predicananchispaq yanapawashanchis. Chayraykun sapa wata waranqanpi runakuna Diospa llaqtanman hamushanku (Is. 60:22). Chhayna askhataq yapakushan chayqa, astawanmi necesitakushan qelqakunata ruwanapaq imprentakuna huñunakuna wasikunapas.

5. ¿Imaraykun “Salón del Reino” nisqa suti ancha sumaq? (Qhawallaytaq “ ‘K’anchay’ nisqa sutiyoq iglesia” nisqa recuadrota.)

⁵ Ñawpaq watakunamantaraqmi Biblia estudiaqkunaqa repararqanku Diosta yupaychanapaq wasi necesitakusqanta. Yaqachus hina ñawpaq kaqta 1890 watapi hatarichirqanku Virginia Occidental (Estados Unidos) llaqtapi.  1930 watakunapaqqa askha yupaychana wasikunatan hatarichirqanku allicharqanku ima, ichaqa manan ima sutiwanpas reqsisqachu karqan. 1935 watapin Rutherford iñiqmasinchis Hawái llaqtata rirqan, chaypin huk huñunakuna wasita hatarichisharqanku hinallataq huk sucursaltapas. Chay kutipin huk iñiqmasinchis Rutherford iñiqmasinchista tapurqan: “¿Ima sutiwanmi kay wasi reqsisqa kanqa?”, nispa. Rutherford iñiqmasinchistaq kutichirqan: “Diospa gobiernonmanta allin willakuykunatataq willanchis chayqa, ancha allinmi kanman ‘Salón del Reino’ (Diospa gobiernonpa wasin) nisqa sutiwan reqsiy”, nispa (Mat. 24:14). Chayqa ancha sumaq sutin karqan. Pisi tiempollamantan pachantinpi llapa iñiq t’aqakuna chay sutita churarqanku huñunakunanku wasiman. a

6, 7. ¿Imatan hukkuna nirqanku huñunakuna wasikunata usqhaylla hatarichisqanchista rikuspa?

⁶ 1970 watakunapaqqa astawanraqmi huñunakuna wasikunata necesitakurqan. Chayraykun Estados Unidos nacionmanta iñiqmasinchiskuna yacharqanku imaynatachus sumaq huñunakuna wasikunata usqhaylla hatarichiyta. Chaymi 1983 watapaqqa Estados Unidos hinallataq Canadá nacionkunapipas yaqa 200 huñunakuna wasikunataña hatarichirqanku. Askha huñunakuna wasikunata necesitakusqanraykun, iñiqmasinchiskunaqa akllayta qallarirqanku huñunakuna wasikunata hatarichiymanta encargakuqkunata. Chay ruwasqankuqa ancha allinmi karqan, chaymi 1986 watapi umalliq t’aqa chay ruwaymanta  encargakurqan; 1987 watapaqqa Estados Unidos nacionpin 60 t’aqakunaña karqan, sapanka t’aqapin huñunakuna wasikunata hatarichiymanta encargakuqkuna kasharqan. b 1992 watapaqqa Alemania, Argentina, Australia, Brasil, España, Francia, Italia, Japón, México, Noruega, Sudáfrica, Suecia nacionkunapiqa ñan karqanña huñunakuna wasikunata hatarichiymanta encargakuqkuna. Dios yupaychana wasikunata hatarichiqkunataqa yanapananchismi, paykunapas Diosta servispan chaykunata ruwanku.

⁷ Iñiqmasinchiskunaqa askha nacionkunapin usqhaylla huñunakuna wasikunata hatarichirqanku, chayta rikuspan huk runakunapas anchata admirakurqanku. España nacionpin huk periodicopi lloqsimurqan “Iñiyqa orqokunatan kuyurichin” nisqa willakuy. Chaypin rimarqan Martos (Jaén) llaqtapi huk huñunakuna wasita hatarichisqankumanta, chay periodicon nirqan: “Kay tiempopi runakunaqa allinnillankutan astawanqa maskhanku, ichaqa [kay España nacionpin] tukuy ladokunamanta askha runakuna Martos llaqtaman rirqanku huk wasita hatarichinankupaq, chay runakunaqa gratisllan chaypi llank’arqanku, hinaspapas paykunaqa allin organizasqa kaspan usqhaylla chayta hatarichirqanku. ¿Imaraykutaq paykunaqa chayta ruwanku?”, nispa. Chaytaqa kikin periodicon kutichirqan, ichaqa huk iñiqmasinchispa  nisqanta willaspa, nirqanmi: “Chaytaqa ruwayku Jehová Diospa yachachisqan llaqta kasqaykuraykun”, nispa.

8. ¿Ima programatan umalliq t’aqa ruwarqan 1999 watapi? ¿Imaraykun chayta ruwarqan?

⁸ 1900 watakuna tukuytan pisi qolqeyoq nacionkunapi askha runakuna Diospa llaqtanman haykumurqanku. Chay nacionkunapi tiyaq iñiqmasinchiskunaqa atisqankuman hinallan hatarichirqanku huñunakunanku wasikunata. Ichaqa mayninpiqa wakin runakunan paykunamanta burlakurqanku, ¿imarayku? Huñunakusqanku wasi mana allin materialkunawan ruwasqa kasqanrayku. Ichaqa 1999 watamantapachan, umalliq t’aqa huk programata ruwarqan pisi qolqeyoq nacionkunapi huñunakuna wasikunata usqhaylla hatarichinankupaq. Pisichikuq nacionkunata yanapanankupaqqa qhapaq nacionkunamanta iñiqmasikunan qolqeta huñurqanku apachinankupaq (leey 2 Corintios 8:13-15). Chaymantapas huk nacionkunamanta askha iñiqmasinchiskunan tukuy sonqomanta llank’aysikurqanku.

9. ¿Ima ruwaymi mana atinapaq hina karqan? Ichaqa, ¿atikurqanchu ruwakuyta?

⁹ 2001 watapin willakurqan 88 pisi qolqeyoq nacionkunapi 18.300 huñunakuna wasikunata necesitakusqanta, qallariypiqa mana atinapaq hinan qhawarikurqan. Ichaqa Diospa yanapayninwan hinallataq rey Jesucristoq yanapayninwanqa tukuy imapas atikunmi (Mat. 19:26). 1999 watamanta 2013 watakaman, 15 watallapi Diospa llaqtanqa chay programa ruwasqanwan 26.849 huñunakuna wasikunata hatarichirqan. c Predicaciontaqa Diosmi bendecishan, chaymi 2013 watapaqqa pisi qolqeyoq nacionkunapi 6.500 huñunakuna wasikunaraq necesitakurqan, sapa watataq pachakninpi huñunakuna wasikunata necesitakun.

10-12. ¿Imaynapin huñunakuna wasikunata hatarichikusqan Jehová Diosta hatunchan?

¹⁰ ¿Imaynapin huñunakuna wasikunata hatarichikusqan Jehová Diosta hatunchan? Zimbabue nacionmanta sucursalmi nirqan: “Huk mosoq huñunakuna wasita hatarichikuqtinqa huk killa qhepallamanmi aswan askha runakuna hamuyta qallarinku”, nispa. Yaqachus hina askha nacionkunapiqa huk sumaq huñunakuna wasi kaqtinña runakunaqa huñunakuyta munanku. Chaymi huk mosoq huñunakuna wasi hatarichikuqtinqa usqhaylla hunt’apunku, hinaspan huktañataq necesitakun. Ichaqa, ¿huñunakunanchis wasikuna munay kasqanraykullachu runakuna Diosman asuykunku? Manan. Huñunakuna wasikunata hatarichiqkuna anchata munanakusqankupas runakunatan kallpachan. Yachasun wakinmanta.

 ¹¹ Indonesia. Huk runan sapa kutilla qhawasqa huk huñunakuna wasita hatarichishasqankuta, chaypi llank’aqkuna mana qolqellapaq llank’asqankuta yacharuspataq nirqan: “Qankunaqa ancha admirakunapaqmi kankichis. Repararqanin tukuy sonqowan kusisqa llank’asqaykichista, manataqmi pagotapas chaskinkichischu. Qankuna hinaqa manachus hina mayqen religionpas kanchu”, nispa.

¹² Ucrania. Huk señoran sapa p’unchay puriq huk huñunakuna wasita hatarichisqanku qayllanta, payqa repararqanmi chaypi llank’aqkuna Jehová Diospa testigonkuna kasqanta. Paymi nirqan: “Ñañayqa Testigon, paymi Testigokunamanta willawarqan. Chay huñunakuna wasita hatarichisqankuta rikuspan decidikurqani Testigo kanaypaq. Repararqanin mana simillawanchu munanakusqankuta”, nispa. Chay señoraqa qhepamanmi Bibliata estudiarqan, 2010 watapitaq bautizakurqan.

13, 14. a) ¿Imaraykun huk casarasqa warmi-qhari Biblia estudiayta munarqan? ¿Imatan chaymanta yachanchis? b) ¿Imakunatan ruwawaq huñunakusqayki wasi Diospa sutinta hatunchananpaq?

¹³ Argentina. Huñunakuna wasita hatarichishaqtinkun, huk casarasqa warmi-qhari chaypi encargakuq iñiqmasinchisman qayllaykurqan. Hinaspan qosan nirqan: “Rikusharqaykun kay wasita hatarichishasqaykichista, hinaspan [...] decidikurqayku kay wasipi Diosmanta yachanaykupaq”, nispa. Chay qhepamantaq iñiqmasinchista tapurqan: “¿Imatan ruwaykuman qankunawan kuska huñunakunaykupaq?”, nispa. Paykunaqa Bibliatan estudiananku karqan, ichaqa paykunaqa kaytan nirqanku: “Ñoqaykuqa estudiasaqku familiaykupas estudiasqayku ratopi chaypi kananta munallaqtiykichismi”, nispa. Iñiqmasinchiskunaqa kusisqan nisqankuman hina ruwarqanku.

 ¹⁴ Huñunakusqayki wasita ruwashaqtinkuqa manapaschá yanapakurqankichu, chaywanpas yanapakuwaqmi huñunakusqayki wasi Diospa sutinta hatunchananpaq. ¿Imakunatan ruwawaq? Estudioykikunata, revisitata ruwasqayki runakunata, huk runakunatapas invitawaqmi huñunakuykunaman hamunankupaq. Chaymantapas yanapakuwaqmi huñunakusqayki wasi limpiolla allin allichasqalla kashananpaq. Donacionkunata churaspapas yanapakuwaqmi huñunakusqayki wasi allin allichasqalla kashananpaq otaq pachantinpi huñunakuna wasikunata hatarichinapaq, chaytaqa ruwawaq ñawpaqmantaraq allinta yuyaykuspan (leey 1 Corintios 16:2). Llapa chay ruwaykunaqa Jehová Diospa sutintan hatunchan.

15-17. a) ¿Pikunan astawan yanapakunku huñunakuna wasita hatarichinapaq? b) ¿Imatan yachasunman pachantinpi huñunakuna wasikunata hatarichiypi yanapakuqkunaq nisqankumanta?

¹⁵ Huñunakuna wasikunata, asambleakunata ruwanapaq wasikunata, sucursalkunata ima hatarichishaqtinkuqa chay llaqtapi tiyaq iñiqmasinchiskunan astawanqa yanapakunku. Ichaqa paykunataqa huk nacionkunamanta iñiqmasikunan yanapanku, paykunaqa wasikuna hatarichiypin experienciayoq kanku. Chay iñiqmasikunaqa allintan organizakunku askha semanakuna huk hatun llank’aypi kanankupaq. Hukkunataq askha wata tukuy sonqomanta llank’anku, mayman kachasqankumantaq viajanku.

¹⁶ Pachantinpi huñunakuna wasikunata hatarichiyqa manan facilchu, ichaqa chaykunapi yanapakuyqa anchatan kusichiwanchis. Timo iñiqmasinchisqa Lina esposanwanmi Asia, Europa, Sudamérica ladokunapi huñunakuna wasikunata, asambleakunata ruwanapaq wasikunata, sucursalkunata ima hatarichirqanku. Timo nin: “Kay 30 watakuna pasasqanpiqa sapa iskay watamanta hinan huk ladomanñataq kachawarqanku”, nispa. Lina iñiqmasiqa 25 watañan Timo iñiqmasiwan casarasqa kashan, paymi nin: “Timo qosaywanmi 10 nacionkunapi llank’arqayku. Sapanka nacionqa hukniraymi, wakinqa q’oñi wakintaq chiri, mikhunapas huk clasen, rimasqanku simipas manan kaqllachu, chaymantapas mosoq amigokunatan tarinayki, chaykunaman yachakunapaqqa kallpata tiempota iman necesitakun”, nispa. d ¿Allinchu karqan lliw chay ruwasqanku? Lina nin: “Sasachakuykunaña karqan chaypas, askha bendicionkunatan chaskirqayku. Sut’itan repararqayku iñiqmasikuna qorpachakuq munakuq ima kasqankuta, Jehová Dios ñoqaykuta cuidawasqankutapas. Chaymantapas rikurqaykun Marcos 10:29, 30 textopi Jesuspa prometesqan hunt’akusqanta. Kunanqa pachakninpin  kan espiritual turaykuna, ñañaykuna, mamaykuna ima”, nispa. Timo nin: “Ñoqaykuqa tukuy yachasqaykutan utilizashayku Diospa gobiernonpa kaqninkuna astawan yapakamunanpaq, chayta ruwasqaykumantan ancha kusisqa kashayku”, nispa.

¹⁷ Darren iñiqmasiqa Sarah esposanwanmi África, Asia, Centroamérica, Europa, Pacífico sur, Sudamérica ladokunapi yupaychana wasikunata hatarichiypi yanapakurqanku, paykunaqa repararqankun ima qosqankumantapas aswan askhataraq chaskisqankuta. Sasachakuykunapiña tarikurqanku chaypas, Darren iñiqmasinchis nin: “Ñoqaykuqa askha nacionkunamanta iñiqmasikunawanmi llank’arqayku, chayqa ancha kusikunapaqmi karqan. Chaypin repararqani Jehová Diosta munakuy huk waskha hina kasqanta, chay waskhan pachantinpi llapa iñiqmasikunata hukllachawashanchis”, nispa. Sarah nin: “Imaymanatan yacharqani huk nacionniyoq iñiqmasikunamanta. Paykunaqa huk ruwaykunata saqesparaqmi kallpachakunku Diosta servinankupaq, chayta rikuyqa anchatan kallpachawan tukuy atisqayta ruwaspa Jehová Diosta servishanallaypaq”, nispa.

18. ¿Imaynatan hunt’akushan Salmo 110:1-3 textopi kaq profecía?

¹⁸ Rey Davidmi ñawpaqmantaraq willarqan Diosta serviqkuna sasachakuykunapiña tarikuspapas mana obligasqalla Diospa gobiernonrayku llank’anankuta (leey Salmo 110:1-3). Diospa gobiernonpaq llank’aqkunaqa chay profeciatan hunt’ashanku (1 Cor. 3:9). Kunanqa pachantinpin askha sucursalkuna kashan, asambleakunata ruwanapaq wasikunaqa pachakninpin kashan, huñunakuna wasikunataq waranqanpi kashan, chaykunawanqa sut’itan reparanchis Diospa gobiernon cheqaq kasqanta kamachikushasqanta ima. Yupaychana wasikunata hatarichiyqa Jehová Diospa sutintan hatunchan, ñoqanchistaq chay ruwaypi yanapakushanchis rey Jesucristota servispa, chay ruwaytaqa ancha allinpaqmi qhawarinchis.