1, 2. (a) Ngbene ye giriri, nyen la awakua ti Jéhovah aye mingi ti sara? (b) Jéhovah abâ nyen na nene ni mingi?

NGBENE ye giriri la awakua ti Jéhovah aye mingi ti leke ada so amû gonda na iri ti lo. Na tapande, na ngia na bê, amolenge ti Israël amû mbage lani na kua ti lekengo tabernacle nga ala mû aye mingi ndali ni.—Ex. 35:30-35; 36:1, 4-7.

² Jéhovah abâ pëpe aye ti lekengo na da ni wani tongana akozo ye so amû gonda na lo, wala ni la si ayeke kota mingi ahon tanga ti aye kue (Mat. 23:16, 17). Ye so lo bâ na nene ni, matabisi so amû na lo gonda ahon atanga ni kue, ayeke vorongo so awakua ti lo ayeke voro na lo, so ala sara ni na bê ti ala wani nga ala yapu na yâ ti kua ni (Ex. 35:21; Marc 12:41-44; 1 Tim. 6:17-19). So kota tënë la. Ngbanga ti nyen? Ngbanga ti so ada ayeke ngbâ lakue lakue ape. Na tapande, tabernacle ni nga na temple ni ayeke dä mbeni ape. Ada ni so ayeke dä encore ape, me Jéhovah agirisa pëpe gbâ ti aye so awakua ti lo be-ta-zo amû nga na ngangu kua ti ala ti mû maboko na lekengo ada ni.—Diko 1 aCorinthien 15:58; aHébreu 6:10.

3. Nyen la e yeke bâ ande na yâ ti chapitre so?

³ Awakua ti Jéhovah ti laso nga asara kua ngangu ti leke ando ti voro lo dä. Ye so ala sara na gbe ti komandema ti Gbia Jésus Christ ayeke biani ye ti dongo bê! A yeke polele so Jésus airi tënë nzoni na ndo ti ngangu kue so ala sara (Ps. 127:1). Na yâ ti chapitre so, e yeke fa gi ambeni mbage ti kua so ala sara nga tongana nyen la amû gonda na Jéhovah. E yeke mä nga tënë ti ambeni ita so amû mbage ti ala na kua ni so.

4. (a) Ngbanga ti nyen e yeke na bezoin ti ando ti vorongo Nzapa dä mingi? (b) Ngbanga ti nyen a bungbi ambeni filiale aga oko? (Bâ encadré “ Lekengo afiliale: Ti lingbi na bezoin ti achangement.”)

⁴ Tongana ti so e bâ na Chapitre 16, Jéhovah aye si e bungbi ndo oko ti voro lo (aHéb. 10:25). Abungbi ti e ayeke kpengba mabe ti e nga ayeke kono nzara ti fango tënë so ayeke na yâ ti e. Na ngoi so alango ti nda ni ayeke gue na li ni, Jéhovah angbâ ti pusu kua ni so na loro. Ni la, ngu oko oko, azo saki na saki ayeke ga na yâ ti bungbi ti lo (És. 60:22).  Teti so azo so aga na gbe ti Royaume ayeke mingi, kota bezoin ti leke ada ti petengo ambeti ti e ayeke dä nga. E bezoin nga ada mingi ti voro Jéhovah dä.

5. Ngbanga ti nyen iri “Da ti Royaume” alingbi na ndo ti bungbi ti e? (Bâ nga encadré “ Eglize ti fini lumière.”)

⁵ Na tongo nda ti mbaï ti awakua ti Jéhovah ti laso, aWamandango Bible akomanse lani ti bâ so ala yeke na bezoin ti wara ando ti ala wani ti sara bungbi dä. E lingbi ti tene so akozo da so e leke ti voro Nzapa dä ayeke lani na Virginie-Occidentale, na États-Unis, na ngu 1890. Ti si na ngu 1930, awakua ti Jéhovah aleke ada nga ala leke peko ti ada mingi ndali ti abungbi. Me ala zia mbeni mbilimbili iri na ndo ni ape. Na ngu 1935, Ita Rutherford ague na Hawaii, na ndo so a leke lani mbeni da na tere ti fini filiale ni. Tongana aita ahunda lo ti hinga iri so a yeke zia na ndo ti da ni, Ita Rutherford atene: “Ala pensé so a yeke nzoni e zia iri ‘Da ti Royaume’ ape? Teti so a yeke ye so e yeke sara la, so ayeke ti fa nzoni tënë ti Royaume.” (Mat. 24:14). Hio, a zia iri so na  ndo ti da ni so, me nga na ndo ti mingi ti ando so acongrégation ti awakua ti Jéhovah ayeke sara kua na ni na ndo ti dunia kue.

6, 7. Lekengo aDa ti Royaume hio hio aga na aye wa?

⁶ Na yâ ti angu so aga na peko ti ngu 1970, bezoin ti aDa ti Royaume akiri aga kota. Ti kaï bezoin so, aita na États-Unis asigigi na mbeni kode ti leke gi na yâ ti alango mingi ape apendere da so ayeke lingbi na kua ti e. Ti si na ngu 1983, a leke mara ti aDa ti Royaume tongaso nduru na 200 na États-Unis nga na Canada. Ti sara kua ni so, aita ato nda ti zia na sese akomite so ayeke bâ lege ti lekengo ada. Ndali ti so kode so alë lengo mingi, na ngu 1986, Bebungbi ayeda na ni tongana kode ti kua ti bungbi ti e. Ti si na ngu 1987, a yeke wara lani akomite so 60 na États-Unis. * A si na ngu 1992 a zia nga akomite so na Afrique du Sud, Allemagne, Argentine, Autriche, Espagne, France, Japon nga na Mexique. Ti tâ tënë ni, a lingbi e gonda akpengba ita so aleke aDa ti Royaume nga na aDa ti Assemblée ndali ti kua so ala sara so, a yeke nga kusala so ayeke teti Nzapa.

⁷ Kode ti lekengo aDa ti Royaume hio hio so aga na nzoni tënë ti témoin na yâ ti ando so a leke ni dä. Mbeni mbeti-sango na Espagne azia mama-tene ti lo tongaso: “Mabe apusu ahoto.” Mbeti-sango ni ahunda tënë so na ndo ti lekengo mara ti aDa ti Royaume tongaso na gbata ti Martos: “Na yâ ti dunia so, so azo apensé gi na ala wani so, nyen la asara si azo ti ambage nde nde ti Espagne alondo, na bê ti  ala wani, aga na Martos ti leke mbeni da so ahunzi hio, so ayeke pendere nga so a leke yâ ti kua ni nzoni mingi ahon atanga ni kue?” Article ni akiri tënë na fango peko ti tënë ti mbeni ita, a tene: “A yeke tongaso ngbanga ti so Jéhovah la ayeke fa ye na e.”

8. Na ngu 1999, Bebungbi ayeda na fini kapa wa? Ngbanga ti nyen?

⁸ Na ngoi so e yeke ga lani nduru na ngu 2000, azo mingi ayeke ga na yâ ti bungbi ti Jéhovah na yâ ti akodoro so ayeke na mosoro mingi ape. Acongrégation ti akodoro ni so apika li ti ala lani ti leke ando ti bungbi. Me na yâ ti ambeni kodoro ni, azo ahe aita wala abâ ala na sioni lê ndali ti so aDa ti Royaume ti ala ayeke agbagbara da, tongana a haka ni na ambeni da ti vorongo nzapa. Ye oko, a to nda ni na ngu 1999, Bebungbi ayeda na mbeni kapa ti lekengo aDa ti Royaume, hio hio, na yâ ti akodoro so ayeke na mosoro mingi ape. A mû nginza so ayeke na akodoro ti mosoro ti zia ndali ni si “ye ni alingbi tere”. (Diko 2 aCorinthien 8:13-15). Aita-koli na aita-wali ti ambeni kodoro amû tere ti ala, na bê ti ala wani, ti sara kua ni so.

9. Kua wa la akpa lani mbeni ye so ayeke hon ngangu ti zo? Me nyen la e sara?

⁹ Na tongo nda ni, kua ni akpa mbeni ye so ahon ngangu ti zo. Mbeni tondo na ngu 2001 atene so a bezoin aDa ti Royaume ahon 18 300 na yâ ti akodoro 88 so ayeke na  mosoro mingi ape. Ye oko, ndali ti so yingo ti Nzapa na Gbia Jésus Christ ayeke dä, mbeni kua ti karango zo ayeke dä ape (Mat. 19:26). Gi na yâ ti angu 15, ti londo na ngu 1999 ti si na ngu 2013, awakua ti Nzapa aleke aDa ti Royaume 26 849 na yâ ti kapa so. * Jéhovah angbâ ti zia tufa ti lo na ndo ti kua ti fango tënë, ni la si ngbene ye na ngu 2013, e yeke lakue na bezoin ti aDa ti Royaume 6 500 na yâ ti akodoro so. Laso, ngu oko oko, a yeke na bezoin ti aDa ti Royaume 100 na ndo ni.

10-12. Tongana nyen la kua ti lekengo aDa ti Royaume amû gonda na iri ti Jéhovah?

¹⁰ Tongana nyen la lekengo afini Da ti Royaume so amû gonda na iri ti Jéhovah? Mbeni tondo ti filiale ti Zimbabwe asara tënë so: “Gi na yâ ti nze oko so aga na peko ti lekengo mbeni fini Da ti Royaume, wungo ti azo so ayeke ga na bungbi ahon fani use.” Na yâ ti akodoro mingi, azo ayeke gi bê ti ala ti sara bungbi na e tongana mbeni nzoni ndo ti vorongo Nzapa ayeke dä pëpe. Me, tongana a hunzi ti leke mbeni Da ti Royaume, hio yâ ni asi na a hunda ti leke mbeni fini ni nde. Ye oko, a yeke pëpe gi pendere ti da ni la agboto azo na Jéhovah. Tâ ndoye ti Chrétien so ayeke na popo ti azo so ayeke leke ada ni so la si achangé bango ndo so azo ayeke na ni na mbage ti bungbi ti lo. Zia e bâ ambeni tapande ni.

¹¹ Indonésie. Na ngoi so mbeni koli so ayeke bâ kua ti lekengo mbeni Da ti Royaume aga ti hinga so azo ti kua ni kue aga na bê ti ala wani ti sara kua ni so, lo tene: “Ala yeke tâ nde mingi! Mbi bâ tongana nyen la ala oko oko ayeke sara kua na bê kue nga na ngia, atâa so ala yeke wara nginza ndali ni ape. Mbi pensé so mbeni bungbi ti Nzapa ti lingbi na ti ala so ayeke dä ape!”

¹² Ukraine. Mbeni wali so ayeke hon lâ na lâ na tere ti mbeni Da ti Royaume so a yeke leke ni, ahinga so azo ti sarango kua ni ayeke aTémoin ti Jéhovah nga so a yeke Da ti Royaume la ala yeke leke so. Lo tene: “Ita ti mbi ti wali so aga Témoin ti Jéhovah la asara tënë ti aTémoin ti Jéhovah na mbi. Na bango kua ti lekengo da ni so, mbi tene so mbi nga mbi ye ti duti na yâ ti sewa ti yingo so. Ge la mbi bâ ndoye na lê ti mbi.” Wali so ayeda lani ti manda Bible nga lo wara batême na ngu 2010.

13, 14. (a) So mbeni koli na wali ti lo ayeda ti manda Bible na peko ti so ala bâ ye so ayeke pasêe na place ti lekengo Da ti Royaume afa na mo nyen? (b) Nyen la mo lingbi ti sara ti tene ndo so mo yeke voro Jéhovah dä amû gonda na lo?

¹³ Argentine. Mbeni koli na wali ti lo aga nduru na mbeni ita-koli so ayeke bâ lege ti kua ti lekengo mbeni Da ti Royaume. Koli ni atene na lo: “A ninga awe la lê ti e ayeke na ndo ti kua ti lekengo da so na . . . e mû desizion ti manda ye na ndo ti Nzapa na yâ ti da ni so.” Lo kiri lo hunda: “Nyen la e lingbi ti sara ti wara lege ti sara bungbi ge?” Koli na wali so ayeda ti manda Bible me gi tongana sewa ti ala kue si asara ni. Na ngia, aita ayeda na tënë ti ala ni.

 ¹⁴ Peut-être mo wara lege ape ti mû mbage na kua ti lekengo Da ti Royaume so mo yeke sara bungbi dä. Me, mo lingbi ti sara ambeni ye si ndo so mo yeke voro Nzapa dä amû gonda na Jéhovah. Na tapande, mo lingbi ti tisa, na ngia na bê, azo so mo yeke manda Bible na ala, avizite ti mo nga na ambeni zo ni nde, ti ga na abungbi na Da ti Royaume ni so. Lege azi nga na mo ti sara si ndo ni angbâ propre nga nzoni. Tongana mo leke tere ti mo nzoni kozo, mo lingbi ti mû offrande ti tene a bâ na lege ti Da ti Royaume ni nga ti tene a leke ambeni ndo ti vorongo Nzapa dä na ambeni kodoro. (Diko 1 aCorinthien 16:2.) Akua so akiri amû gonda na iri ti Jéhovah.

15-17. (a) Azo wa la ayeke sara kota mbage ti kua ti e ti lekengo ada? (b) Tënë so aita-koli na awali ti ala so ayeke sara kua ti lekengo ada ti e na akodoro nde nde atene afa na mo nyen?

¹⁵ Mingi ti akua ti lekengo aDa ti Royaume, aDa ti Assemblée nga na afiliale, a yeke aita ti kodoro ni la ayeke sara ni. Me, fani mingi, ambeni ita-koli na aita-wali ti ambeni kodoro nde, so ahinga akode ti lekengo dä, ayeke mû maboko na ala. Ambeni aita ni so, aleke tere ti ala ti tene ala sara kua ni so na akodoro nde nde teti ayenga mingi. Ti ambeni, ala yeda ti sara kua ni so teti ngu mingi. Tongana mbeni kua ni ahunzi awe, ala yeke gue na mbeni nde.

¹⁶ Kua ti lekengo ada na akodoro nde nde ayeke na akpale ti lo me ayeke ga na aye ti nzoni nga. Bâ tapande ti Timo na Lina. Ala voyagé na akodoro ti Asie, Poto nga na Amerika ti Mbongo ti sara kua ti lekengo aDa ti Royaume, aDa ti Assemblée nga na afiliale. Timo atene: “Na yâ ti angu 30 so ahon, mbi sara kua ni na akodoro nde nde, mingi ni ngu use use.” Lina, so lo na Timo asara mariage a sara angu 25 awe,  atene: “Mbi na Timo e sara kua na yâ ti akodoro bale-oko. A hunda ngangu nga na ngoi mingi ti te afini kobe, ti gbu lê ti ndowa wala dê, ti tene fini yanga ti kodoro, ti fa tënë na mbeni fini ndo nga ti wara afini kamarade.” * Ye kue so ala sara so ayeke senge senge? Lina atene: “Akpale so e wara aga na akota ye ti nzoni. Aita ti e aChrétien aye e, ayamba e nga e bâ tongana nyen la Jéhovah ayeke bâ lege ti e na ndoye. E bâ nga tongana nyen la tënë so Jésus atene na adisciple ti lo, na Marc 10:29, 30, aga tâ tënë. E wara aita ti koli, aita ti wali nga na amama ti yingo fani ngbangbo mingi.” Timo atene: “Bê ti e anzere mingi ti sara kua na akode ti e ndali ti aye so ayeke nzoni mingi, ti mû mbage na konongo yâ ti aye ti Gbia ti e.”

¹⁷ Darren na Sarah, amû maboko na akusala ti lekengo ada na Afrika, Asie, Bê ti Amerika, Poto, Amerika ti Mbongo nga na mbage ti mbongo ti Pacifique. Ala bâ so ala wara aye mingi ahon aye so ala mû ni. Atâa akpale so Darren awara, lo tene: “A nzere na mbi ti sara kua na tere ti aita ti mbi ti akodoro nde nde. Mbi bâ so oko ndoye so e yeke na ni na mbage ti Jéhovah ayeke tongana mbeni kamba so angoro tere ti sese kue na atingbi e oko.” Sarah atene ti lo, a tene: “Mbi manda aye mingi na mbage ti aita ti akodoro nde nde! Na bango aye kue so ala zia ti sara na Jéhovah, bê ti mbi apusu mbi ti mû ye ti nzoni kue so mbi yeke na ni.”

18. Tongana nyen la prophétie ti Psaume 110:1-3 ayeke ga tâ tënë?

¹⁸ Gbia David atene giriri so azo so ayeke na gbe ti Royaume ti Nzapa ayeke mû tere ti ala, na bê ti ala wani, ti sara na akua ti Royaume ni, atâa akpale so ala yeke wara. (Diko Psaume 110:1-3.) Azo kue so ayeke mû maboko na akua ti Royaume ayeke fa so atënë so aga tâ tënë laso (1 aCor. 3:9). Ada ti afiliale, aDa ti Assemblée ngbangbo mingi nga na aDa ti Royaume saki mingi na ndo ti sese kue afa polele so Royaume ti Nzapa ayeke tâ ye nga so ayeke sara kua. So kota pasa si e yeke na ni ti sara na Gbia Jésus Christ na yâ ti mbeni kua so amû gonda so alingbi biani na Jéhovah!