1, 2. (a) San den tru futuboi fu Yehovah lobi fu du langa ten kaba? (b) San prenspari gi Yehovah?

LANGA ten kaba den tru futuboi fu Yehovah lobi fu bow konmakandra presi di e gi glori na en nen. Fu eksempre, nanga prisiri den Israelsma ben yepi fu bow a tabernakel èn nanga den heri ati den gi sani fu bow en.​—Eks. 35:30-35; 36:1, 4-7.

² Ma gi Yehovah, den sani di den gebroiki fu bow, no ben de den moro prenspari sani di ben gi en grani èn den no ben de den moro warti sani tu (Mat. 23:16, 17). A moro bigi gudu di sma kan gi Yehovah èn a moro prenspari sani di den kan du gi en, na fu anbegi en nanga den heri ati. Disi wani taki tu dati den musu de klariklari fu du iniwan wroko di a e aksi fu den èn den musu du dati fayafaya (Eks. 35:21; Mark. 12:41-44; 1 Tim. 6:17-19). A sani disi prenspari srefisrefi. Fu san ede? Nowan konmakandra presi e tan fu ala ten. Fu eksempre, a tabernakel nanga a tempel no de moro. Ma awinsi den no de moro, toku Yehovah no frigiti den futuboi fu en di ben gi sani nanga den heri ati èn di yepi fu bow den konmakandra presi disi.​—Leisi 1 Korentesma 15:58; Hebrewsma 6:10.

3. San wi o luku na ini a kapitel disi?

³ Den disiten futuboi fu Yehovah wroko tranga tu fu bow presi pe den kan anbegi en. A moi srefisrefi fu si san den du ondro a tiri fu Kownu Yesus Krestes! A krin taki Yehovah blesi a muiti di den meki (Ps. 127:1). Na ini a kapitel disi wi o luku wan tu sani di den bow èn fa dati gi grani na Yehovah. Wi o leisi tu san son sma taki di yepi nanga den wroko disi.

4. (a) Fu san ede moro konmakandra presi de fanowdu? (b) Fu san ede den tapu son bijkantoro? (Luku a faki „ Den e bow bijkantoro pe a de fanowdu”.)

⁴ Soleki fa wi si na ini kapitel 16, dan Yehovah wani taki wi musu kon makandra fu anbegi en (Hebr.  10:25). Den konmakandra no e tranga wi bribi nomo, ma den e gi wi deki-ati tu fu du a preikiwroko nanga moro faya. Na ini den lasti dei disi Yehovah e meki a wroko disi go na fesi moro esi. Dati meki hondrohondro sma e kon na ini en organisâsi ibri yari (Yes. 60:22). Fu di moro sma e saka densrefi ondro a tiri fu a Kownukondre, meki moro presi de fanowdu fu meki den buku fu wi di e taki fu Bijbel. Wi abi moro presi fanowdu tu pe wi kan anbegi wi Gado.

5. Fu san ede a fiti fu kari den konmakandra presi fu wi Kownukondre zaal? (Luku sosrefi a faki „ A Nyun Leti Kerki”.)

⁵ Frukufruku kaba den Bijbel Ondrosukuman bigin si taki den ben musu abi den eigi konmakandra presi. Soleki fa a sori, dan wan fu den fosi konmakandra presi di den bow ben de na ini 1890 na West Virginia na ini Amerkankondre. Na ini den yari baka  1930 a pipel fu Yehovah ben bow wan tu zaal noso den ben meki den kon bun baka, ma den no ben gi den wan nen ete. Ma na ini 1935 Brada Rutherford ben go na Hawai pe den ben e meki wan konmakandra presi makandra nanga wan nyun bijkantoro. Di den aksi Brada Rutherford fa den ben musu kari a konmakandra presi, a taki: „Wi e preiki a bun nyunsu fu a Kownukondre, a no so? We, fu di dati na a wroko di wi e du, meki mi denki taki wi musu kari en ’Kownukondre zaal’, yu no feni?” (Mat. 24:14) Na so a konmakandra presi dati kisi a nen dati di fiti srefisrefi èn a no langa baka dati furu fu den konmakandra presi fu den gemeente fu a pipel fu Yehovah na heri grontapu ben kisi a nen dati tu.

6, 7. San ben de a bakapisi di den brada na ini Amerkankondre orga sani fu man bow Kownukondre zaal na ini wan tu dei nomo?

⁶ Na ini den yari baka 1970 moro nanga moro Kownukondre zaal ben de fanowdu. Fu dati ede den brada na ini Amerkankondre orga sani fu man bow bun èn moi Kownukondre zaal na ini wan tu dei nomo. Na ini 1983 den ben bow sowan 200 fu den sortu Kownukondre zaal disi na ini Amerkankondre nanga Kanada. Fu man du a wroko disi moro bun, den brada bigin seti grupu na difrenti presi fu bow  den zaal disi. Sani ben e waka so bun, taki na ini 1986 a Tiri Skin bigin kari den grupu disi Bowkomte. Na ini 1987 yu ben abi sowan 60 Bowkomte na ini Amerkankondre. * Na ini 1992 den ben seti Bowkomte tu na ini Argentinia, Australia, Doisrikondre, Fransikondre, Meksikow, Spanyorokondre, Yapan, nanga Zuid-Afrika. A no de fu taki dati wi wani horibaka gi den brada nanga sisa di e bow Kownukondre zaal nanga Kongreshal, fu di den e wroko so tranga gi Yehovah.

⁷ Di den Kotoigi bigin bow den Kownukondre zaal so esi, dan dati hari a prakseri fu furu sma. Fu eksempre, wan koranti na ini Spanyorokondre ben abi wan artikel di ben taki fu a bow-wroko fu wan Kownukondre zaal na ini a foto Martos. A ben taki: „Fa a kan taki na ini a grontapu disi pe sma e denki densrefi nomo, sma de di e komoto na difrenti presi [fu Spanyorokondre] fu bow wan zaal so esi, so moi èn na so wan orga fasi sondro taki sma e pai den srefi?” Na ini na artikel wan fu den Kotoigi di ben yepi nanga a bow-wroko, piki: „A wan-enkri piki tapu na aksi disi, na taki wi na sma di kisi leri fu Yehovah.”

8. Sortu sani a Tiri Skin seti na ini 1999, èn fu san ede?

⁸ Syatu fosi a yari 2000 moro nanga moro sma ben e kon na ini Yehovah organisâsi na ini den kondre pe den brada nanga sisa no abi so furu moni. Den gemeente ben e pinapina fu bow presi fu hori konmakandra. Ma na ini sonwan fu den kondre disi sma ben e spotu Kotoigi èn den ben kisi wan takru nen, fu di den konmakandra presi dati no ben de noti te yu ben o teki en gersi nanga den tra kerki. Fu dati ede na ini 1999 a Tiri Skin seti sani fu bow moro Kownukondre zaal na ini den kondre pe den brada nanga sisa no abi so furu moni. Den brada nanga sisa fu den gudu kondre ben e gi moni fu „tapu den nowtu” fu den wan na ini den pôti kondre. (Leisi 2 Korentesma 8:13-15.) Brada nanga sisa fu tra kondre ben go yepi tu nanga a bow-wroko na ini den kondre disi.

9. Sortu wroko den brada ben denki taki den no ben o man du, ma san den du teleki now?

⁹ Na ini a bigin a ben gersi leki den no ben o man du a wroko disi. Na ini 2001 den ben si taki moro leki 18.300 Kownukondre zaal ben de fanowdu na ini 88 pôti kondre. Ma nanga a yepi fu a yeye fu Gado èn wi Kownu Yesus Krestes wi man du ala sani (Mat. 19:26). Fu 1999 te 2013, sobun na ini sowan 15 yari nomo, Gado pipel bow 26.849 Kownukondre zaal na ini den pôti kondre disi. * Fu di Yehovah e tan blesi a preikiwroko fu wi, meki na ini 2013 sowan 6500 Kownukondre zaal ben de fanowdu ete na ini den kondre disi. Ma now den brada kon si taki boiti den 6500 Kownukondre zaal disi, hondrohondro Kownukondre zaal de fanowdu ete ibri yari.

10-12. Fa a bow fu den nyun Kownukondre zaal meki Yehovah nen kisi glori?

¹⁰ Fa a bow fu den nyun Kownukondre zaal meki Yehovah nen kisi glori? A bijkantoro fu Zimbabwe taki: „Nofo tron a de so taki wán mun baka te wan nyun Kownukondre zaal bow, tu tron so furu sma e kon na den konmakandra.” A sori leki na ini furu kondre den sma no wani kon na den konmakandra fu Yehovah Kotoigi, solanga den no abi wan bun konmakandra presi. Ma te wi bow wan Kownukondre zaal, dan esi-esi a e kon span so te, taki wan trawan de fanowdu. Ma a no den moi Kownukondre zaal wawan e meki taki sma wani sabi moro fu Yehovah. Te den e si fa wi leki Kresten e sori trutru lobi gi makandra  te wi e bow den zaal, dan sma e denki bun fu na organisâsi fu wi tu. Luku wan tu eksempre.

¹¹ Indonesia. Wan man ben e luku fa den Kotoigi e bow wan Kownukondre zaal. Di a kon yere taki den Kotoigi ben wroko sondro fu kisi pai, a taki: „Mi no man bribi! Mi si fa ibriwan fu unu e wroko nanga un heri ati èn nanga prisiri aladi unu no e kisi pai. Mi no denki taki wan tra kerki de leki di fu unu!”

¹² Ukraini. Wan uma ben e pasa ibri dei na wan presi pe den ben e bow wan Kownukondre zaal. Bakaten a kon sabi taki na Yehovah Kotoigi ben e bow a Kownukondre zaal. A taki: „Mi sisa ben fruteri mi fu Yehovah Kotoigi èn bakaten a tron wan tu. Now di mi e si fa unu e bow, mi srefi wani de wan sisa fu unu tu. Dyaso mi e si trutru lobi.” Na uma disi bigin studeri Bijbel èn a dopu na ini 2010.

13, 14. (a) San yu leri fu na ondrofenitori fu a trowpaar di ben e luku fa Kotoigi ben e bow wan Kownukondre zaal? (b) Fa yu kan sorgu taki a konmakandra presi fu yu e meki Yehovah nen kisi glori?

¹³ Argentinia. Wan trowpaar ben go na a brada di ben e teki fesi na a bow fu wan Kownukondre zaal. A masra ben taki: „Ala ten wi e luku fa unu e bow èn . . . wi bosroiti taki na a presi disi wi wani leri moro fu Gado.” Dan a aksi: „San wi musu du fu man kon na den konmakandra dyaso?” A trowpaar agri fu bigin studeri Bijbel nanga den Kotoigi, ma soso efu den Kotoigi ben o wani studeri nanga den tra sma fu den osofamiri tu. Nanga prisiri den brada agri fu du disi.

¹⁴ Kande yu no ben abi a grani fu yepi bow a  Kownukondre zaal pe yu e go, ma toku yu kan du furu fu sorgu taki a presi disi e gi glori na Yehovah nen. Fu eksempre, nanga prisiri yu kan kari den Bijbelstudie fu yu, den gobaka nanga tra sma fu kon nanga yu na den konmakandra na ini a Kownukondre zaal. Yu kan yepi krin a zaal tu èn yu kan yepi fu sorgu taki ala sani tan bun na ini a zaal. Efu yu e seti sani bun, dan yu o man poti moni na wan sei fu yepi pai gi den kostu fu a Kownukondre zaal pe yu e go, noso yu kan gi moni tu fu yepi bow konmakandra presi na ini tra kondre. (Leisi 1 Korentesma 16:2.) Ala den sani disi e meki taki Yehovah nen e kisi glori.

15-17. (a) Suma e du a moro bigi pisi fu a bow-wroko? (b) San yu leri fu den sani di den brada nanga sisa taki di yepi nanga a bow-wroko na difrenti kondre?

¹⁵ Te den e bow den Kownukondre zaal, kongreshal nanga bijkantoro na ini difrenti kondre, dan na den brada nanga sisa fu den kondre dati e du a moro bigi pisi fu a wroko. Ma nofo tron den e kisi yepi fu brada nanga sisa fu tra kondre di sabi du bow-wroko. Sonwan fu den brada nanga sisa disi seti den libi na so wan fasi, taki den kan go na tra kondre wan tu wiki langa fu yepi nanga den bow-wroko drape. Trawan seti sani fu man du a wroko disi furu yari langa. Na so den e go fu a wan kondre na a trawan fu yepi nanga a bow-wroko.

¹⁶ A no makriki fu du bow-wroko na ini so furu kondre, ma toku den e kisi furu blesi. Fu eksempre, Timo nanga Lina go na difrenti kondre na ini Asia, Europa nanga Zuid-Amerika fu yepi bow Kownukondre zaal, kongreshal nanga bijkantoro. Timo taki: „Na ini den 30 yari di pasa, mi ben abi fu go yepi bow na wan tra kondre ibri tu yari.” Lina di trow nanga Timo 25 yari kaba, taki: „Mi nanga Timo go na tin difrenti kondre. A wroko e teki furu krakti nanga ten fu yu. Yu musu leri nyan tra sortu nyanyan, yu musu kon gwenti a weer nanga a preikiwroko na ini a nyun kontren èn yu musu meki nyun mati.” * Ma yu denki taki a muiti di den meki ben de fu soso? Lina taki: „A no ben makriki gi wi, ma wi kisi bigi blesi. Den brada nanga sisa teki wi na ini oso èn den sori so furu lobi gi wi. Wi firi taki Yehovah lobi wi  trutru. Wi ondrofeni san Yesus pramisi den bakaman fu en na ini Markus 10:29, 30. Wi kisi wán hondro tron moro brada, sisa nanga mama.” Timo taki: „Wi e prisiri trutru taki wi man gebroiki den koni di wi abi fu bow moro sani gi wi Kownu. Disi na a moro bun wroko di de.”

¹⁷ Darren nanga Sarah yepi nanga a bow-wroko na Afrika, Asia, Europa, Mindri-Amerika, a Stille Zuidzee nanga Zuid-Amerika. Den feni taki a wroko di den du no doro den someni blesi di den kisi. Aladi a no ben makriki gi den, toku Darren taki: „A de wan grani fu wroko nanga brada nanga sisa na difrenti presi na grontapu. A lobi di wi alamala abi gi Yehovah de leki wan titei di e tai wi alamala kon na wán.” Sarah taki: „Mi leri so furu fu den brada nanga sisa fu difrenti kulturu! Te mi e si fa den e du so furu muiti fu dini Yehovah, dan mi srefi wani du ala muiti tu.”

18. Fa a profeititori fu Psalm 110:1-3 e kon tru?

¹⁸ Kownu David ben taki na ini wan profeititori dati den sma di saka densrefi ondro a tiri fu Gado Kownukondre ben o „de klariklari” fu horibaka gi Kownukondre afersi awinsi a no ben o makriki. (Leisi Psalm 110:1-3.) Ala sma di e du wan wroko di e horibaka gi a Kownukondre e meki den wortu fu David kon tru (1 Kor. 3:9). Te wi e prakseri den someni bijkantoro, den hondrohondro kongreshal, nanga den dusundusun Kownukondre zaal di wi bow na heri grontapu, dan wi e si krin taki Gado Kownukondre na wan trutru sani èn taki a e tiri nownow. A de wan bigi grani fu yepi Kownu Yesus Krestes fu du wan wroko di e gi Yehovah a grani di a musu kisi!