1, 2. (a) Ncinzi bantu ba Jehova ncobali kukkomanina kucita kuzwa kaindi? (b) Ncinzi Jehova ncakkomanina kapati?

BABELESI ba Jehova kuzwa kaindi, balakkomana kuyaka maanda aatembaula izina lyakwe. Mucikozyanyo, bana Israyeli bakalijisi luyandisisyo lwakutola lubazu mukuyaka tente lyakubunganina alimwi akutondezya bwaabi kwiinda mukusanga zintu zyakubelesya.—Kul. 35:30-35; 36:1, 4-7.

² Jehova taboni zintu zibelesyegwa mukuyaka maanda kuti zyalo kuzigama nzyezipa kuti zina lyakwe lilemekwe, alimwi tazili nzyezintu nzyabona kuti zilayandika kapati kwiinda. (Mt. 23:16, 17) Pele cintu cipati Jehova ncakkomanina, icipego ciinda zyoonse icipa kuti alemekwe, nkumukomba nkobacita babelesi bakwe, kubikkilizya amuuya wabo wakulyaaba akubeleka kwabo cabusungu mumulimo. (Kul. 35:21; Mk. 12:41-44; 1 Ti. 6:17-19) Kaambo aaka kalayandika kapati. Ino nkaambo nzi? Nkaambo maanda alakonzya kuyakwa mpoonya alimwi alakonzya kunyonyooka. Mucikozyanyo, tente lyakubunganina alimwi atempele taziciko. Maanda aayo akaloba, pele Jehova talubi bwaabi alimwi amilimo yababelesi bakwe basyomeka balo ibakagwasyilizya mayake aayo.—Amubale 1 Bakolinto 15:58; Bahebulayo 6:10.

3. Ncinzi ncotutiilange-lange mucibalo eeci?

³ Babelesi ba Jehova mazuba aano abalo babeleka canguzu kuyaka maanda aakukombela. Alimwi ncotwacita kale ansi aabusolozi bwa Mwami wesu Jesu Kristo, cilagambya ncobeni! Cilalibonya ncobeni kuti Jehova wakuleleka kusoleka kwesu. (Int. 127:1) Mucibalo eeci, tulalanga-langa milimo imwi iyacitwa alimwi amboyapa kuti izina lya Jehova lilemekwe. Alimwi tulamvwa kuzwa kuli bamwi ibabeleka mukuzuzikizya mulimo ooyu.

4. (a) Nkaambo nzi ncotuyandika masena aambi aakukombela? (b) Nkaambo nzi mitabi imwi yabikkwa antoomwe amitabi iimbi kupanga mutabi omwe? (Amubone kabbokesi kakuti “ Mulimo Wakuyaka Mitabi—Kucinca Kweelana Aziyandika.”)

⁴ Mbubwenya mbotwakabandika mu Cibalo 16, Jehova uyanda kuti katuswaangana kutegwa katukomba. (Heb. 10:25) Miswaangano yesu taiyumyi buyo lusyomo lwesu pele alimwi ipa kuti luyandisisyo ndotujisi mumulimo wakukambauka lukomene. Mbwaayaabuya mazuba aamamanino, Jehova wazumanana kuutola ambele mulimo wakukambauka. Nkakaambo kaako bantu banji balaboola mumbunga yakwe mwaka amwaka. (Is. 60:22) Akaambo kakuvwula kwabalelwa ba Bwami, kuyandika  maanda azibelesyo zimbi zyakubelesya mukusimba mabbuku aamba zya Bbaibbele. Alimwi tuyandika maanda manji aakukombela.

5. Nkaambo nzi izina lyakuti Ŋanda ya Bwami ncoleelela? (Amubone akabbokesi kakuti “ Cikombelo ca Mumuni Mupya.”)

⁵ Kumatalikilo aabantu ba Jehova bamazuba aano, Basikwiiya Bbaibbele bakabona kuti bakali kuyandika maanda aakuswaanganina aabageme. Kulibonya kuti busena bumwi bwakusaanguna bwakukombela bwakali ku West Virginia, mu U.S.A., mumwaka wa 1890. Kuzikusika kuma 1930, bantu ba Jehova bakaliyakide kale naa kubambulula maanda aakukombela aali mbwaabede, pele maanda aayo tanaakali kwiitwa azina lilibedelede. Mumwaka wa 1935, Mukwesu Rutherford wakaswaya cisi ca Hawaii, kwalo ikwakali kuyakwa ŋanda yakukombela alimwi amaofesi aamutabi mapya. Ciindi naakabuzyigwa mboyakali kuyakwiitwa ŋanda eeyi, Mukwesu Rutherford wakavwiila kuti: “Mbwaanga mulimo ngotucita ngwakukambauka makani mabotu aa Bwami, sena inga tiiceelela kuyiita kuti ‘Ŋanda ya Bwami’?” (Mt. 24:14) Izina eeli ilyeelela tiilyakali kuyakupegwa buyo kuŋanda eeyi yakukombela, pele lyakali kuyakubelesyegwa  akumaanda aakukombela aambi aabelesyegwa ambungano zyabantu ba Jehova nyika yoonse mbwiizulwa.

6, 7. Ino mulimo wakuyaka Maanda aa Bwami muciindi buyo cisyoonto kwapa kuti kube nzi?

⁶ Kuzikusika mumyaka yamuma 1970, Maanda aa Bwami aambi akali kuyandika kapati. Kutegwa penzi eeli limane, bakwesu bakucisi ca United States, bakatalisya nzila yakuyaka maanda mabotu cakufwambaana mumazuba buyo masyoonto. Kuzikusika mu 1983, Maanda aa Bwami aatandila ku 200 akayakwa mu United States amu Canada. Kutegwa mulimo ooyu uzuzikizyigwe, bakwesu bakatalika kupanga makkomiti aakuyaka aacooko. Nzila eeyi yakabeleka kabotu kapati cakuti mu 1986, Kabunga Keendelezya kakazumizya bubambe oobu, mpoonya kusika mu 1987, kwakali makkomiti aamayake aacooko aasika ku 60 mucisi ca United States. * Kuzikusika mu 1992, kwakapangwa aambi makkomiti mucisi ca Argentina, Australia, France, Germany, Japan, Mexico, South Africa, alimwi aku Spain. Kwaamba masimpe, bakwesu ibayaka Maanda aa Bwami alimwi a Maanda Aakucitila Miswaangano Mipati bayandika kugwasya, nkaambo kubeleka mulimo ooyu ncibeela camulimo uusetekene.

⁷ Maanda aa Bwami aaya aakali kuyakwa cakufwambaana, akapa bumboni bubotu mumasena mwaakayakilwa. Mucikozyanyo, muteende umwi mucisi ca Spain, wakajisi cibalo cakuti “Faith Moves Mountains” (Lusyomo Luzyula Malundu). Kujatikizya kuyaka Maanda aa Bwami mudolopo lya Martos, muteende ooyu wakabuzya kuti: “Ino cikonzyeka buti kuti bantu ibazwa muzyooko ziindene-indene [mu Spain] balyaabe kuboola kuno ku Martos kutegwa bazikuyake ŋanda cakufwambaana, iiboneka  kabotu alimwi kabakamantene munzila iitanabwenwe munyika eeyi muzwide bantu baliyanda?” Cibalo cakaingula kwiinda mukwaamba majwi aakaambwa a Kamboni umwi sikugwasyilizya aakuti: “Kaambo kapati nkakuti tuyiisyigwa aa Jehova.”

8. Mbubambe nzi ibwakazumizyigwa a Kabunga Keendeelezya mumwaka wa 1999, alimwi ino nkaambo nzi?

⁸ Mwaanda wamyaka wa 20 nowakali kuya kumamanino, bantu banji muzisi zitavwubide bakaboola mumbunga ya Jehova. Mbungano zyamumasena aaya zyakacita ncozyakali kukonzya kuyaka maanda aakukombela. Pele muzisi zimwi, bakali kuyandika kuliyumya nkaambo bakali kufwubaazyigwa akaambo kakuti Maanda aa Bwami aamumasena aaya tanaakali kuboneka kabotu ikuti akozyanisyigwa amasena aakukombela aazikombelo zimbi. Nokuba boobo, kutalikila mumwaka wa 1999, Kabunga Keendelezya kakabikka bubambe bwakutolaambele mulimo wakuyaka Maanda aa Bwami muzisi zitavwubide. Mali aakazwa kuzisi zivwubide akabelesyegwa kutegwa kube “kweelana.” (Amubale 2 Bakolinto 8:13-15.) Alimwi bakwesu abacizyi kuzwa mumasena aambi bakalisungula kuti bagwasyilizye mumulimo ooyu.

9. Mulimo nzi iwakali kulibonya mbuli kuti taukonzyi kucitwa, pele ncinzi cazuzikizyigwa?

⁹ Kumatalikilo, mulimo wakali kulibonya mbuli kuti inga taukonzyi kucitwa. Lipooti yamu 2001 yakatondezya kuti Maanda aa Bwami aainda ku 18,300 akacili kuyandika muzisi zitavwubide izili 88. Nokuba boobo, kwiinda mukugwasyigwa amuuya wa Leza alimwi a Mwami wesu Jesu Kristo, taakwe mulimo uutakonzyeki. (Mt. 19:26) Mumyaka iibalilwa ku 15, kuzwa  mu 1999 kusika mu 2013, bantu ba Leza bakayaka Maanda aa Bwami aasika ku 26,849 kaali cibeela camulimo ooyu. * Jehova wazumanana kuulongezya mulimo wakukambauka, aboobo kuzikusika mu 2013 kwakacili kuyandika Maanda aa Bwami aambi aatandila ku 6,500 muzisi eezyi zitavwubide, alimwi mwaka amwaka kuyandika aambi.

10-12. Mbuti kuyaka Maanda aa Bwami mbokwapa kuti izina lya Jehova lilemekwe?

¹⁰ Mbuti kuyakwa kwa Maanda aa Bwami mapya mbokwapa kuti izina lya Jehova lilemekwe? Lipooti imwi kuzwa kuofesi yamutabi yakucisi ca Zimbabwe yakaamba kuti: “Mumwezi omwe buyo kuzwa ciindi Ŋanda ya Bwami noyamana kuyakwa, mweelwe wabantu bajanika kumiswaangano ulayungizyika ziindi zyobilo.” Muzisi zinji, kulibonya kuti bantu balawayawaya kuyanzana andiswe kusikila ciindi nokwayakwa busena bwakukombela buboneka kabotu. Nokuba boobo, mboyamanina buyo kuyakwa Ŋanda ya Bwami, bantu balavwula, mpoonya ŋanda ilaceya alimwi inga kuyandika kuyaka iimbi. Pele takuli buyo kuboneka kabotu kwamaanda eesu ikupa kuti bantu kababoola kuli Jehova. Luyando lwini-lwini lwa Bunakristo lwabaabo ibayaka maanda aaya, alwalo lulabajatikizya bantu mbobaibona mbunga yakwe. Amubone zikozyanyo zisyoonto.

¹¹ Indonesia. Mwaalumi umwi iwakali kulangilila kuyakwa kwa Ŋanda ya Bwami naakazyiba kuti boonse ibakali kubeleka bakali basikulisungula, wakagambwa kapati akwaamba kuti: “Ma! Nywebo nobantu mulagambya kapati! Ndabona umwi aumwi mbwabeleka amoyo woonse alimwi kamukkomene nokuba kuti tamubbadelwi. Ndiyeeya kuti kunyina cikombelo cimbi icili mbuli cikombelo canu!”

¹² Ukraine. Mukaintu umwi iwakali kwiinda abusena mpobakali kuyaka Ŋanda ya Bwami buzuba abuzuba, wakazyiba kuti ibakali kubeleka Mbaakamboni ba Jehova alimwi akuti bakali kuyaka Ŋanda ya Bwami. Wakaamba kuti: “Ndakamvwa kujatikizya Bakamboni ba Jehova kuzwa kumusyoonto wangu mucizyi walo iwakaba Kamboni. Kubona mulimo wakuyaka ooyu, ndakasala kuti andime ndibe umwi wambabo. Ndabona kuti kuli luyando.” Mukaintu ooyu wakazumina kwiiya Bbaibbele mpoonya wakabbapatizyigwa mu 2010.

13, 14. (a) Ncinzi ncomwaiya kujatikizya ncobakacita banabukwetene bamwi nobakamana kulangilila zyakali kucitika noyakali kuyakwa Ŋanda ya Bwami? (b) Ncinzi ncomukonzya kucita kutegwa busena bwanu bwakukombela kabulemeka izina lya Jehova?

¹³ Argentina. Banabukwetene bamwi bakasikila mukwesu iwakali kulanganya mayake a Ŋanda ya Bwami. Mulumi wakamba kuti: “Twali kumulangilila lyoonse mbomwali kubeleka alimwi . . . twasala kuti twiiye kujatikizya Leza muŋanda eeyi.” Mpoonya wakabuzya kuti: “Ncinzi ncotweelede kucita kutegwa tweelele kujanika kumiswaangano abusena buno?” Banabukwetene aaba bakazumina kwiiya Bbaibbele alimwi akwaamba kuti ccita buyo kuti abalo bamukwasyi wesu bazumizyigwa kutola lubazu. Bakwesu bakakkomana kapati alimwi bakakuzumina kulomba ooku.

¹⁴ Ambweni kunyina nomwakaba acoolwe cakugwasya kuyaka Ŋanda ya Bwami momuswaanganina, pele nzinji nzyomukonzya  kucita kugwasyilizya busena bwanu bwakukombela kutegwa bulemeke izina lya Jehova. Mucikozyanyo, mulakonzya kutola lubazu cabusungu kutamba ziiyo zyanu zya Bbaibbele, bantu mbomuswaya munyendo zyakupilukila alimwi abantu buyo bambi kutegwa bajanike kumiswaangano ku Ŋanda ya Bwami. Alimwi mulijisi coolwe cakutola lubazu mukusalazya alimwi akubamba busena bwanu bwakukombela. Ikuti mwabikka bubambe, mulakonzya kusanga kugwasyilizya mulimo wakulanganya Ŋanda ya Bwami njomubelesya naa kusanga kutegwa kuyakwe maanda ambi aakukombela munyika yoonse. (Amubale 1 Bakolinto 16:2.) Milimo yoonse eeyi ipa kuti izina lya Jehova litembaulwe.

15-17. (a) Ino mbaani kanji-kanji ibabeleka mulimo wakuyaka? (b) Ncinzi ncomwaiya kuzwa kutwaambo ntobakaamba banabukwetene bamwi ibakabelekela mumulimo wakuyaka wakunze aacisi?

¹⁵ Mulimo mupati uucitwa wakuyaka Maanda aa Bwami, Maanda Aakucitila Miswaangano Mipati alimwi amitabi, ucitwa abakwesu abacizyi bakubusena ooko. Nokuba boobo, kanji-kanji balagwasyigwa abakwesu abacizyi ibazwa kuzisi zimbi ibajisi luzyibo mukuyaka. Basikulisungula bamwi baubya-ubya buumi bwabo kutegwa bacikonzye kubelekela kuzisi zimbi mumilimo iisiyene-siyene yakuyaka kwansondo izili mbozibede. Bamwi basala kubeleka kwamyaka minji, kuzwa kubusena bumbi akuya kubusena bumbi kuyandika kuyaka.

¹⁶ Kuli bulumbu alimwi abuyumuyumu bujanika kwiinda mukubeleka mulimo wakuyaka kunze aacisi. Mucikozyanyo, ba Timo aba Lina, babeleka muzisi zinji zyaku Asia, Europe alimwi aku South America mumulimo wakuyaka Maanda aa Bwami, Maanda Aakucitila Miswaangano Mipati, alimwi amitabi. Ba Timo bakaamba kuti: “Mumyaka iili 30 yainda, bali kundicinca kwakubelekela kwainda buyo myaka yobilo.” Ba Lina balo bakakwatwa kuli ba Timo myaka iili 25 yainda, bakaamba kuti:  “Ndabeleka aba Timo muzisi izili kkumi ziindene-indene. Kuyandika ciindi cili mbocibede kuti muzyibile musyobo wazyakulya, busena, mwaambo mupya, alimwi acilawo cipya cakukambaukila alimwi akujana balongwe bapya.” * Sena kusoleka kwabo kulijisi mpindu? Ba Lina bakaamba kuti: “Buyumuyumu bwapa kuti tulongezyegwe kapati. Twalubona luyando lwa Bunakristo alimwi akusamausya alimwi twabona kuti Jehova ulatulanganya caluyando. Alimwi twabona kuzuzikizyigwa kwacisyomezyo ca Jesu ncaakaambila basikwiiya bakwe icijanika mulugwalo lwa Maako 10:29, 30. Twalongezyegwa amyaanda yamyaanda yabakwesu, bacizyi alimwi abamamama bakumuuya.” Ba Timo bakaamba kuti: “Citupa kukkutila kapati kubelesya luzyibo lwesu mumakanze aayandika kapati, kutola lubazu mumulimo wakuyungizya lubono lwa Mwami.”

¹⁷ Ba Darren aba Sarah, ibagwasyilizya mumulimo wakuyaka mu Africa, Asia, Central America, Europe, South America alimwi amucooko ca South Pacific, balimvwa kuti nzyobatambula nzinji kwiinda nzyobapa. Nokuba kuti kuli buyumuyumu mbobajana, ba Darren bakaamba kuti: “Ncoolwe kubeleka abakwesu ibazwa mumasena aaindene-indene nyika yoonse mbwiizulwa. Ndabona kuti luyando ndotujisi kuli Jehova luli mbuli katambo ikazinguluka nyika yoonse kutegwa katuswaanganye.” Ba Sarah bakaamba kuti: “Ndaiya zinji kuzwa kubakwesu abacizyi ibajisi zilengwa ziindene-indene! Kubona mbobalyaaba kubelekela Jehova candikulwaizya kuzumanana kubelekela Leza kusikila mpondigolela.”

18. Mbuti businsimi bulembedwe mulugwalo lwa Intembauzyo 110:1-3 mbobwazuzikizyigwa?

¹⁸ Mwami Davida wakasinsima kuti, nokuba kuti balelwa ba Bwami bwa Leza bayaanya buyumuyumu, balakonzya ‘kulyaaba camoyo woonse’ kutegwa basumpule ziyandika zya Bwami. (Amubale Intembauzyo 110:1-3.) Boonse aabo ibajatikizyidwe mumulimo wakugwasyilizya Bwami, balatola lubazu mukuzuzikizya majwi aaya aabusinsimi. (1 Ko. 3:9) Maanda aamitabi minji, myaanda yamyaanda ya Maanda Aakucitila Miswaangano Mipati alimwi azyuulu zyuulu zya Maanda aa Bwami nyika yoonse mbwiizulwa, mbumboni bulibonya bwakuti Bwami bwa Leza mbwancobeni alimwi bulalela lino. Eelo kaka ncoolwe citaliboteli kubelekela Mwami Jesu Kristo mumulimo uupa kuti Jehova alemekwe kapati kweelana ambwayelede kulemekwa!