1, 2. 1) ¿Tuku lipaxuwakgonit putum kilhtamaku xlakskujnin Jehová? 2) ¿Tuku lu xlakaskinka akxilha Jehová?

 XLAKSKUJNIN Jehová lata makgasata lipaxuwakgo akxni tlawakgo tuku limalankikgo xtukuwani. Akgtum liʼakxilhtit, israelitas xatapaxuwan makgtayanankgolh xlakata xtatlawalh tabernáculo chu mastakgolh tuku xʼamaka litlawakan (Éx. 35:30-35; 36:1, 4-7).

² Jehová ni lakpuwan pi tuku litlawakan pukgalhtawakga wa tuku tlakg maxki lilanka, na ni wa tuku tlakg xlakaskinka akxilha (Mat. 23:16, 17). Wata tuku tlakg xlakaskinka akxilha, tuku tlakg malanki nixawa atanu, wa takaknin nema maxkikgo xlakskujnin, tuku xatapaxuwan wi tuku tlawakgo chu palha skujnikgo (Éx. 35:21; Mar. 12:41-44; 1 Tim. 6:17-19). Uma lu xlakaskinka. ¿Tuku xlakata? Xlakata chuna la lalh ktabernáculo chu ktemplo, tuku tatlawa ni putum kilhtamaku makgapala. Maski uma tuku xtlawakanit lakgsputkgolh, Jehová chuntiyaku lakapastaka tuku mastakgolh chu xtaskujut xlakskujnin xlakata xkatlawaka (kalikgalhtawakga 1 Corintios 15:58 chu Hebreos 6:10).

3. ¿Tuku naʼakxilhaw kʼuma capítulo?

³ La uku, xlakskujnin Jehová na lu skujaw xlakata natlawayaw niku nakakninaniyaw Dios chu tuku tlawanitaw xlakata kiMapakgsinakan Jesucristo kinkapulaliman, lu kaks lilakawanaw. Liwana tasiya pi Jehová sikulunatlawanit kintaskujutkan (Sal. 127:1). Kʼuma capítulo naʼakxilhaw kaj makgapitsi tuku tlawakgonit chu la malankikgonit Jehová. Na naʼakxilhaw tuku wankgo makgapitsin natalan tiku makgtlawakgonit uma taskujut.

4. 1) ¿Tuku xlakata tlakg talakaskin niku nakakninaniyaw Jehová? 2) ¿Tuku xlakata kamalakchuwaka makgapitsi sucursales? (Kaʼakxilhti recuadro « Tlawakan sucursales: Talakgpali la talakaskin».)

⁴ Chuna la akxilhwi kcapítulo 16, Jehová lakaskin pi natamakxtumiyaw xlakata nakakninaniyaw (Heb. 10:25). Tamakxtumit ni kaj matliwakglha kintakanajlakan, na tlawa pi tlakg xatapaxuwan nalichuwinanaw Dios. Chuna la tlakg talakatsuwinimaw xaʼawatiya kilhtamaku, Jehová tlakg malakapalima xtaskujut. Wa xlakata lhuwa miles latamanin akgatunu  kata talakatsuwinikgo xkachikin Dios (Is. 60:22). Akxni tlakg talhuwikgo tiku tapakgsinikgo Tamapakgsin, tlakg talakaskin imprentas nema natlawakgo likgalhtawakga. Chu na tlakg talakaskin niku nakakninanikan Dios.

5. ¿Tuku xlakata lu tlan tukuwani Salón del Reino? (Na kaʼakxilhti recuadro « Xpusikulan Xasasti Xkgakganat».)

⁵ Lata xapulana, xLikgalhtawakgananin Biblia akxilhkgolh pi xtalakaskin niku xtamakxtumikgolh. Max kkata 1890 tlawaka xapulana kVirginia Occidental (Estados Unidos). Kdécada 1930, lhuwa xkatlawakanita o xlakkaxtlawakanita, pero xtalakaskin xkawilinika xtukuwanikan. Kkata 1935, tala Rutherford lakgapaxialhnalh Hawái, niku xtatlawama akgtum sucursal chu niku xtamakxtumikan. Ama kilhtamaku chatum tala kgalhskilh tala Rutherford la xwanika uma chiki, chu xla kgalhtinalh: «¿Ni lakpuwana pi xlimapakwiw “Salón del Reino” [Pukgalhtawakga xla xTatayananin Jehová]? Chu wa tuku tlawayaw, lichuwinanaw xalakwan xalaksasti xlakata Tamapakgsin» (Mat. 24:14).  ¡Lu tlan tukuwani! Ni kajwatiya uma pukgalhtawakga chuna xʼamaka limapakuwikan, wata putum congregaciones niku tamakxtumikgo xkachikin Jehová.

6, 7. ¿La kitaxtunit xlakata lakkaxwilikanit lakapala natatlawa Pukgalhtawakga?

⁶ Kdécada 1970 tlakg talakaskin Pukgalhtawakga. Wa xlakata natalan xalak Estados Unidos lakkaxwilikgolh la lakapala chu lakstlan xtlawakgolh pukgalhtawakga. Kkata 1983, Estados Unidos chu Canadá limaklakaskinkgolh uma chu xlitlawakgonita max akgtiy ciento pukgalhtawakga. Xlakata xtlawakgolh uma lanka taskujut, natalan tsukukgolh lakkaxwilikgo comités regionales de construcción. Lu tlan kitaxtulh tuku lakkaxwilika, kata 1986 Lakgkgolotsin tiku Pulalinkgo xtatayananin Jehová tsukukgolh maklakaskinkgo; kkata 1987 xʼanan 60 Comités Regionales de Construcción (CRC) kʼEstados Unidos. a Kkata 1992 xwilakgolha umakgo comités kʼAlemania, Argentina, Australia, Brasil, España, Francia, Italia, Japón, México, Noruega, Sudáfrica chu kSuecia. Xlikana, natalan tiku lhuwa skujkgo xlakata natlawakgo Pukgalhtawakga chu Salones de Asamblea talakaskin nakamakgtayayaw, xlakata na skujnimakgo Dios.

⁷ Niku lakapala katlawakanit pukgalhtawakga lu tlan kalichuwinankanit. Maktum periódico xalak España, título «Takanajla kamalakxija kasipijni», lichuwinalh akxni tlawaka akgtum Pukgalhtawakga kMartos (Jaén) chu kgalhskininalh: «¿Tuku xlakata kʼuma kakilhtamaku niku latamanin xakstukan kapaxkikan, tiku xalak tanu tanu kachikin [xalak  España] ankgo kMartos niku ni kaxokgonikan xlakata [...] lakapala natlawakgo, liwana natlawakgo chu liwana kalakkaxwilikanit?». Xlakata nalikgalhtinan, lichuwinalh tuku wa chatum tiku makgtlawalh uma taskujut: «Chuna ktlawayaw xlakata wa Jehová tiku kinkamasiyaniyan».

8. ¿Tuku programa lakkaxwilikgolh Lakgkgolotsin tiku Pulalinkgo xTatayananin Jehová kkata 1999 chu tuku xlakata?

⁸ Akxni ksputma siglo XX, lhuwa latamanin tanukgolh kxkachikin Jehová kpaíses niku ni lu kgalhikgo tumin. Congregaciones xalak uma países fuerza tlawakgolh xlakata xtlawakgolh xpukgalhtawakgakan, pero milh kilhtamaku kalikgalhkgamananka chu kalilakgmakganka xlakata niku xtamakxtumikgo ni lu tlan xwanit la xla amakgapitsi takanajla. Pero, lata kata 1999, tiku Pulalinkgo xtatayananin Jehová lakkaxwililh tuku xmakgtayanalh xlakata tlakg lakapala xkatlawaka Pukgalhtawakga kpaíses niku ni lu anan tumin. Chu xlakata «lakxtum nalay», tsukuka maklakaskinkan tumin xalak países niku tlakg xʼanan (kalikgalhtawakga 2 Corintios 8:13-15). Nachuna, xwilakgolh natalan lakchixkuwin chu lakpuskatin xalak atanu países tiku xatapaxuwan makgtayanankgolh.

9. ¿Tuku taskujut lu lanka xtasiya chu tuku kitaxtulh?

⁹ Xapulana xtasiya pi lu lanka taskujut xwanit, xlakata akgtum tamakatsin nema tlawaka kata 2001 wa pi xtalakaskin liwaka 18,300 pukgalhtawakga k88 países niku  ni lu xʼanan tumin. Pero xlakata xtamakgtay espíritu santo chu kiMapakgsinakan Jesucristo, ni anan tuku nila tatlawa (Mat. 19:26). Lata kata 1999 asta 2013, kaj akgkukitsis kata, xkachikin Dios tlawanit 26,849 pukgalhtawakga chu limaklakaskima tuku lakkaxwilikanit la nakatlawakan. b Jehová chuntiya sikulunatlawama la talichuwinama Tamapakgsin, chu kkata 2013 xtalakaskinku 6,500 Pukgalhtawakga kʼumakgolh países chu kata kata tlakg talakaskin.

10-12. ¿La tamalankima Jehová xlakata tatlawama Pukgalhtawakga?

¹⁰ ¿La malanki Jehová akxni katlawakan xalaksasti pukgalhtawakga? Akgtum xtamakatsin sucursal xalak Zimbabue wan: «Tlakg lhuwa tiku tamakxtumikgo akxni kajku akgtum papaʼ titaxtu lata tlawakan akgtum Pukgalhtawakga». Klhuwa países, latamanin ni lu amputunkgo komo ni lu tlan niku tamakxtumikan. Pero akxni tlawakan Pukgalhtawakga, lakapala tatsama chu talakaskin natlawaparakan atanu. Pero, latamanin ni kajwatiya lilakgtalakatsuwikgo Jehová xlakata la tasiyakgo Pukgalhtawakga. Xlakata xaxlikana tapaxkit nema lalimasiyani tiku tlawakgo, na lu kamakgtaya latamanin xlakata la akxilhkgo xkachikin Dios. Kaʼakxilhwi makgapitsi.

¹¹ Indonesia. Akxni chatum chixku tiku xʼakxilhma la tlawaka Pukgalhtawakga katsilh pi putum tiku kskujmakgo ni xkaxokgonimaka, wa: «Lu kaks kilamalakawaniyaw. Kakxilhnit la minchatunukan xliputum minakujkan chu xatapaxuwan skujatit maski ni kaxokgonikanatit. Klakpuwan pi ni anan atanu takanajla la wixin».

¹² Ucrania. Chatum puskat tiku chali chali xtitaxtu niku xtlawamaka pukgalhtawakga lakpuwa pi tiku kskujmakgo xtatayananin Jehová xwankgonit chu tuku xtlawamakgo Pukgalhtawakga xʼama wan. Xla wa: «Kintala tsumat xtatayana Jehová xwanit, wa xlakata kkatsilh tuku tlawakgo. Akxni kakxilhli tuku xtlawamakgolh, na kmakgtapakgsiputulh kʼuma familia xaʼespiritual. Unu kakxilhnit pi lapaxki». Alistalh makgamakglhtinalh akgtum takgalhtawakga xalak Biblia chu tamunulh kkata 2010.

13, 14. 1) ¿Tuku kinkamasiyaniyan tuku wa akgtum tamakgaxtokgat akxni akxilhli pi xtlawamaka pukgalhtawakga? 2) ¿La namakgtayanana xlakata mimpukgalhtawakga namalanki Jehová?

¹³ Argentina. Akgtum tamakgaxtokgat lakgtalakatsuwilh tala tiku xpulalima niku xtlawamaka Pukgalhtawakga. Xachixku wa: «Kakxilhnitaw la skujpatit chu [...] klakpuwanitaw pi unu kkatsiniputunaw xlakata Dios». Alistalh kgalhskininalh: «¿Tuku kilitlawatkan xlakata tlan nakminaw ktamakxtumit?». Tamakgaxtokgat makgamakglhtinankgolh takgalhtawakga xalak Biblia, pero wankgolh pi putum familia xkamakgalhtawakgeka. Natalan xatapaxuwan chuna tlawakgolh.

¹⁴ Max wix nitu makgtlawapat Pukgalhtawakga niku tamakxtupiya; maski chuna, tlan namakgtayanana xlakata pukgalhtawakga  namalanki xtukuwani Jehová. Pulaktum wa xatapaxuwan nakawaniya atanu latamanin xlakata nataʼankgoyan ktamakxtumit, akgtum liʼakxilhtit, tiku kamakgalhtawakgayaw chu tiku lakgatikgo tuku kawaniyaw. Na tlan namakgtayanana akxni kaxtlawakan chu akxni kaxakakan. Komo nalakkaxwiliya tuku kgalhiya, tlan xatapaxuwan namastaya xlakata nalikaxtlawakan pukgalhtawakga niku tamakxtupiya o xlakata tlakg natlawakan pukgalhtawakga kʼatanu países (kalikgalhtawakga 1 Corintios 16:2). Putum umakgolh malankikgo xtukuwani Jehová.

15-17. 1) ¿Tiku tlakg tlawakgo taskujut akxni tatlawa pukgalhtawakga? 2) ¿Tuku kinkamasiyaniyan tuku wankgo tiku tamakgaxtokgkgonit nema makgtlawakgonit Pukgalhtawakga klhuwa países?

¹⁵ Akxni katlawakan Pukgalhtawakga xla xTatayananin Jehová, Salones de Asamblea chu sucursales wa makgtayanankgo natalan tiku anta wilakgolh. Pero na kamakgtayakgo natalan xalak makgapitsi países tiku lu katsinikgo tlawakgo chiki. Makgapitsi umakgolh natalan lakkaxwilikgonit xlakata namakgtayanankgo akglhuwa semanas kʼatanu países; amakgapitsi lakkaxwilikgonit pi akglhuwa kata namakgtayanankgo chu kamalakgachakan klhuwa países.

¹⁶ Akxni makgtlawakan pukgalhtawakga kʼamakgapitsi países lu tuwa pero na limin tapaxuwan. Akgtum liʼakxilhtit, Timo chu Lina, kilakgonit kpaíses xalak Asia, Europa chu Sudamérica xlakata natlawakgo Pukgalhtawakga, Salones de Asambleas chu sucursales. Timo wan: «Puxamakaw kata nema kmakgtayanama, xʼakgatiyun kata kilakgpalitilhakan». Lina tiku puxamakitsisa kata tatamakgaxtokgnit Timo, wan: «Akxtum kskujnitaw 10 país. Talakaskin lhuwa litliwakga chu kilhtamaku xlakata nalismaniya liwat,  lonkgni o lhkakna, tachuwin chu tanu tanu niku nalichuwinana Dios chu xlakata nakgalhiya miʼamigos». c ¿Tlan kakitaxtuninit xlakata tuku tlawakgonit? Lina wan: «Tuku tuwa ktitaxtunitaw kinkalimininitan laklanka tasikulunalin. Natalan kinkapaxkikgonitan, tlan kinkamakgamakglhtinankgonitan chu tapaxkit nema kinkakgalhiniyan Jehová. Na kgantaxtunit kkilatamatkan tuku Jesús kawanilh kstalaninanin nema wi kMarcos 10:29, 30. Kkgalhiyaw tlakg lhuwa natalan chu kintsekan xaʼespiritual». Timo na wan: «Lu tlan klimakgkatsiyaw xlakata kmaklakaskinaw tuku tlan ktlawayaw ktlakg xatlan taskujut: tlakg lhuwa natlawakan tuku xla Tamapakgsin».

¹⁷ Darren chu Sarah, tiku makgtlawakgonit pukgalhtawakga kʼÁfrica, Asia, Centroamérica, Europa, el Pacífico sur chu kSudamérica, lakpuwankgo pi tlakg lhuwa tuku kamaxkikanit nixawa tuku tlawakgonit. Maski titaxtukgonit tuku nitlan, Darren wan: «Akgtum tasikulunalin xlakata kkataskuja natalan xalak tanu tanu kachikinin. Kakxilhnit pi tapaxkit nema kgalhiniyaw Jehová xtachuna kgantum tasiw nema litamakgswitnit Katiyatni chu makxtum kinkatlawayan». Sarah wan: «Lhuwa tuku kimasiyanikgonit natalan xalak atanu kachikinin. Akxni kakxilha pi wi tuku limakgxtakgkgo xlakata naskujnikgo Jehová kimakgtaya xlakata tlakg nakskujnani Jehová».

18. ¿La kgantaxtuma tuku xlichuwinankanit kSalmo 110:1-3?

¹⁸ Mapakgsina David wa pi maski kskujnin xTamapakgsin Dios xʼamakgo titaxtukgo taʼakglhuwit, «xatapaxuwan» xʼamakgo makgtayanankgo kxtaskujut Tamapakgsin (kalikgalhtawakga Salmo 110:1-3, TNM). Putum tiku makgtayanankgo kxtaskujut Tamapakgsin makgantaxtimakgolh uma tachuwin (1 Cor. 3:9). Lhuwa sucursales, Salones de Asambleas chu akglhuwa mil Pukgalhtawakga xla xTatayananin Jehová xlikalanka katiyatni, limasiya pi xTamapakgsin Dios xaxlikana chu pi mapakgsinamaja. Lu lanka talakgalhaman xlakata skujniyaw Mapakgsina Jesucristo kʼakgtum taskujut nema maxki kakni Jehová nema lakgchan.