1, 2. (a) Kasi ŵateŵeti ŵa Yehova ŵakukondwa kuchitachi? (b) Kasi chakuzirwa chomene kwa Yehova ntchivichi?

KWAMBA kale, ŵateŵeti ŵa Yehova ŵakukondwa kovwirapo pa mulimo wa kuzenga uwo ukuchindika zina lake. Mwachiyelezgero, Ŵaisrayeli ŵakajipeleka na mtima wose pa mulimo wa kupanga chihema, ndipo ŵakapeleka vyawanangwa vinandi.—Eks. 35:30-35; 36:1, 4-7.

² Ivyo ŵanthu ŵakupeleka pa mulimo wa kuzenga, pavyekha vingamuchindika yayi Yehova. Nakuti ndivyo ni vyakuzirwa chomene yayi kwa Yehova. (Mat. 23:16, 17) Chakuzirwa chomene kwa Yehova ntchakuti ŵateŵeti ŵake ŵakumusopa mwaunenesko kweniso ŵakujipeleka pa mulimo wakuzenga. (Eks. 35:21; Mrk. 12:41-44; 1 Tim. 6:17-19) Fundo iyi njakupulikikwa. Chifukwa ivyo vyazengeka vikukhalilira yayi. Mwachiyelezgero, pasono chihema na tempile kulije. Nangauli vinthu ivi kulije, kweni Yehova wakuŵaluwa yayi ŵateŵeti ŵake awo ŵakajipeleka kuchita mulimo uwu.—Ŵerengani 1 Ŵakorinte 15:58; Ŵahebere 6:10.

3. Kasi tiwonenge vichi mu mutu uwu?

³ Mazuŵa ghano, ŵateŵeti ŵa Yehova ŵakulimbikira kuzenga malo ghakusoperapo. Ndipo Yesu Khristu watovwira kuchita ntchito yikuru. Yehova watumbika nadi mulimo withu. (Sal. 127:1) Mu mutu uwu, tiwonenge mulimo uwo tachita, kweniso umo ukuchindikira Yehova. Tiwonengeso ivyo ŵanji awo ŵachitako mulimo uwu ŵakuyowoya.

4. (a) Chifukwa wuli pakukhumbikwa nyumba zinandi zakusoperamo? (b) Chifukwa wuli ŵakusanuzga maofesi ghanyake? (Wonani bokosi la mutu wakuti “ Kuzenga Maofesi gha Munthavi na Kusintha Vinyake.”)

⁴ Nga umo tikasambilira mu Mutu 16, Yehova wakukhumba kuti ŵateŵeti ŵake ŵawunganenge. (Heb. 10:25) Maungano ghakutikhozga na kutikhukiska kupharazga. Apo mazuŵa ghaumaliro ghali pafupi kumara, Yehova wakutovwira kuti tipharazge mwaluŵiro. Lekani ŵanthu ŵanandi ŵakwiza mu gulu la Yehova chaka chilichose.  (Yes. 60:22) Pakuti ŵanthu ŵanandi ŵakwiza mu gulu, pakukhumbikwa nyumba zinandi zakupangiramo mabuku na zakusoperamo.

5. Chifukwa wuli zina lakuti Nyumba ya Ufumu ndakwenelera? (Wonaniso bokosi la mutu wakuti, “ Tchalitchi la Ungweru Uphya.”)

⁵ Ŵasambiri ŵa Baibolo ŵakawona kuti ŵakukhumbikwira malo ghawo na ghawo ghakusoperamo. Vikuwoneka kuti nyumba yakwamba yakusoperamo yikazengeka ku West Virginia, U.S.A., mu 1890. Kufika m’ma 1930, ŵanthu ŵa Yehova ŵakaŵa kuti ŵazenga na kunozga nyumba zinandi. Kweni nyumba izi zikaŵavya zina lenecho. Ndipouli, mu 1935, Mubali Rutherford wakaluta ku Hawaii, uko ŵakazenganga nyumba yinyake pamoza na ofesi ya munthavi. Ŵabali ŵakamufumba kuti waŵaphalire zina la nyumba iyi. Mubali Rutherford wakati: “Kasi chingaŵa chakwenelera yayi kuyichema ‘Nyumba ya Ufumu’? Nkhuwona kuti zina ili likukolerana na mulimo wa kupharazga makani ghawemi gha Ufumu uwo tikuchita.” (Mat. 24:14)  Pamasinda, nyumba zose izo ŵateŵeti ŵa Chiuta ŵakuwunganamo zikamba kumanyikwa na zina ili.

6, 7. Ntchivichi chikuchitika chifukwa chakuti Nyumba za Ufumu zikuzengeka mwaluŵiro?

⁶ Kufika m’ma 1970, pakakhumbikwanga Nyumba za Ufumu zinandi. Ntheura ŵabali ku America ŵakasanga nthowa yipusu yakuzengera nyumba ziwemi mu mazuŵa ghachoko waka. Kuzakafika mu 1983, ŵakaŵa kuti ŵazenga Nyumba za Ufumu pafupifupi 200, mu United States na Canada. Kuti mulimo uwu wende makora, ŵabali ŵakapanga makomiti ghakulaŵilira vyakuzenga. Ivi vikawovwira chomene, mwakuti mu 1986, Wupu Wakulongozga ukazomerezga ndondomeko iyi. Kufika mu 1987, mu America mukaŵa makomiti 60. * Ndipo mu 1992, ku Argentina, Australia, France, Germany, Japan, Mexico, South Africa, na Spain nako ghakaŵako makomiti agha. Ŵabali aŵa ŵakulimbikira kuzenga Nyumba za Ufumu na Malo Ghakuchitirapo Maungano. Ntheura tikwenera kovwirana nawo, chifukwa ntchito iyo ŵakuchita nayo njakupatulika.

⁷ Pakuti Nyumba za Ufumu zikuzengeka mwaluŵiro, ŵanthu awo ŵakuwona ŵakuchitira ukaboni. Mu tawuni ya Martos ku Spain, mu nyuzipepara yinyake mukaŵa nkhani ya mutu wakuti: “Chipulikano Chikusezga Mapiri.” Mu nkhani iyi mukaŵa fumbo lakuti: ‘Mu charu ichi ŵanandi ŵakujighanaghanira ŵekha, kweni ntchivichi chomene chikatuma ŵanthu kwiza ku Martos, na kuzenga  nyumba yiwemi, mwaluŵiro, kweniso mwakukolerana?’ Pakuzgora fumbo ili, nyuzipepara yikalemba ivyo Kaboni uyo wakazengako wakayowoya. Iyo wakati: “Ivi vikuchitika chifukwa chakuti taŵanthu ise tikusambizgika na Yehova.”

8. Kasi Wupu Wakulongozga ukazomerezga vichi mu 1999, ndipo chifukwa wuli?

⁸ M’ma 1990, mu vyaru vikavu ŵanthu ŵanandi ŵakathilimukiranga ku gulu la Yehova. Ntheura ŵabali ŵakayezganga kuzenga nyumba zakusoperamo. Kweni mu vyaru vinyake ŵanthu ŵakaŵasekanga, chifukwa nyumba izi zikawonekanga makora yayi pakuyaniska na matchalitchi. Ntheura mu 1999, Wupu Wakulongozga ukazomerezga kuti Nyumba za Ufumu zizengeke na mu vyaru vikavu wuwo. Ŵabali mu vyaru visambazi ŵakapeleka ndalama kuti paŵe “kuyana.” (Ŵerengani 2 Ŵakorinte 8:13-15.) Ndipo ŵabali ŵanji mu vyaru vinyake ŵakajipeleka kuti ŵawovwirepo pa mulimo wakuzenga.

9. Kasi ni mulimo wuli uwo ukawonekanga nga ungachitika yayi, kweni kasi ntchivichi chachitika?

⁹ Pakwamba, vikawoneka nga mulimo uwu ungachitika yayi. Mu 2001, Nyumba za Ufumu zakujumpha 18,300 zikakhumbikwanga mu vyaru vikavu 88. Kweni vyose ni vyamachitiko chifukwa Yehova na Themba lithu Yesu Khristu ŵakutovwira. (Mat. 19:26) Kwamba mu 1999 m’paka mu 2013, ŵanthu ŵa Yehova ŵazenga Nyumba za Ufumu 26,849. * Yehova wachali kutumbika mulimo wa  kupharazga mu vyaru vikavu, mwakuti mu 2013, pakakhumbikwanga nyumba zinyakeso pafupifupi 6,500. Ndipo chaka chilichose pakukhumbikwa Nyumba za Ufumu zakujumpha 100.

10-12. Kasi mulimo wa kuzenga Nyumba za Ufumu wachindika wuli zina la Yehova?

¹⁰ Kasi mulimo wa kuzenga Nyumba za Ufumu wachindika wuli zina la Chiuta? Lipoti linyake lakufuma ku ofesi ya munthavi ya ku Zimbabwe likati: “Kanandi para mwezi umoza wajumphapo kufuma apo Nyumba ya Ufumu yazengekera, chiŵelengero chikusazgikira kaŵiri.” Vikuwoneka kuti mu vyaru vinyake ŵanthu ŵakwamba kuwungana nase para tazenga Nyumba za Ufumu. Para Nyumba ya Ufumu yamara waka kuzengeka, yikuchedwa yayi kuzura, nakalinga mbwenu pakukhumbikwaso yinyake. Icho chikuŵakopa ntchakuti nyumba izi zikuwoneka makora. Kweni paliso chinyake icho chikuguzira ŵanthu mu gulu la Yehova. Awo ŵakuzenga nyumba izi ŵakutemwana. Ntheura ŵanthu ŵakuliwona mwakwenelera gulu la Yehova. Tiyeni tiwone viyelezgero vichoko waka.

¹¹ Indonesia. Munthu munyake wati wamanya kuti wose awo ŵakazenganga Nyumba ya Ufumu ŵakajipeleka waka, wakati: “Mwaŵanthu imwe mukunitindika chomene. Mukugwira ntchito na mtima wose, kweni mukupokerapo chilichose cha! Nkhuwona kuti palije mpingo wakuyana na winu!”

¹² Ukraine. Mwanakazi munyake uyo wakajumphanga apo ŵakazenganga Nyumba ya Ufumu, wakafikapo kuti awo ŵakazenganga ŵakaŵa Ŵakaboni ŵa Yehova. Kweniso wakamanya kuti ŵakuzenga Nyumba ya Ufumu. Iyo wakati: “Munung’una wane nayo ni Kaboni, ndipo wakaniphalirapo vya Ŵakaboni ŵa Yehova. Nkhati nawona umo ŵakagwiliranga ntchito, nkhadokera kuŵa yumoza wawo. Nkhawona kuti ŵanthu aŵa ŵakutemwana nadi.” Wakazomera kusambira Baibolo ndipo wakabatizika mu 2010.

13, 14. (a) Kasi mbumba yinyake yikachita wuli yati yawona umo ntchito ya kuzenga yikenderanga? (b) Kasi mungawovwira wuli kuti malo ghakusoperapo ghachindikenge zina la Chiuta?

¹³ Argentina. Dada munyake na muwoli wake ŵakiza kwa mubali uyo wakalaŵiliranga mulimo wakuzenga Nyumba ya Ufumu. Ŵakamuphalira kuti: “Tikuwona umo ntchito yinu ya kuzenga iyi yikwendera. Taghanaghana kuti . . . tisambire vya Chiuta mu nyumba iyi.” Pamasinda, mwanalume wakati: “Kasi tingachita wuli kuti tiŵe ŵakwenelera kuŵapo pa maungano ghinu?” Ŵanthu aŵa ŵakazomera kuti ŵabali ŵasambire nawo Baibolo, chikuru ŵanozgeka kusambizga mbumba yose. Ŵabali ŵakazomera.

 ¹⁴ Panji mukazengako yayi Nyumba ya Ufumu ya mpingo winu, kweni mungawovwira kuti malo agha ghachindikenge zina la Chiuta. Mungachemerako awo mukusambira nawo Baibolo, ŵakunweka, na ŵanyake kuti ŵazakawungane namwe. Mungawovwiraso kuti malo agha ghalutilire kuwoneka makora. Ntheura mungasungirathu kandalama pamphepete, na kupeleka kuti kawovwire kupwelelera Nyumba ya Ufumu panji kuzenga Nyumba za Ufumu mu vyaru vinyake. (Ŵerengani 1 Ŵakorinte 16:2.) Vyose ivi vikovwira kuti zina la Chiuta lichindikike.

15-17. (a) Kasi mbanjani awo ŵakugwira ntchito yikuru pa mulimo wa kuzenga? (b) Kasi mwasambirako vichi ku mbumba izo zikajipeleka pa mulimo wa kuzenga?

¹⁵ Pakuzenga Nyumba za Ufumu, Malo Ghakuchitirapo Maungano, na maofesi gha munthavi, ntchito yikuru ŵakuchita mbabali na ŵadumbu ŵa uko ntchito iyo yikuchitikira. Kweni kuti ŵachite makora ntchito iyi, ŵakovwirika na ŵabali na ŵadumbu ŵakufuma mu vyaru vinyake awo ŵakuyimanya makora ntchito iyi. Ŵanji ŵakuleka dankha ntchito zawo, na kuluta mu vyaru vinyake kukawovwira masabata ghachoko waka. Kweni ŵanji ŵakuteŵetera vyaka vinandi mu vyaru vyakupambanapambana.

¹⁶ Nangauli vinyake vikuŵa vyakusuzga pa ntchito iyi, kweni ŵabali ŵakukondwa chifukwa ŵakutumbikika. Timo na Lina, ŵachitapo mulimo uwu ku Asia, Europe, na South America. Ndipo Timo wakati, “Mu vyaka 30 ivyo vyajumpha, ŵakakaŵanga yayi kunitumizga ku ntchito zinyake. Kanandi ivi vikachitikanga para namara vyaka viŵiri.” Lina, uyo wakatorana na mfumu wake Timo vyaka 25 ivyo  vyajumpha, nayo wakati: “Nateŵeterapo na Timo mu vyaru 10. Pakutora nyengo kuti wamunthu uzgoŵere chakurya chachilendo, malo, chiyowoyero, chigaŵa chakupharazgako, kweniso ŵabwezi.” * Kasi ŵakaphyoka pawaka? Lina wakati: “Nangauli masuzgo ghakaŵangapo, kweni tikatumbikika chomene. Ŵabali na ŵadumbu ŵakatitemwanga, ndipo ŵakatipokeleranga makora. Kweniso tikajiwonera tekha umo Yehova wakutitemwera na kutipwelelera. Tawonaso umo mazgu gha Yesu gha pa Mariko 10:29, 30 ghakufiskikira. Tili na ŵabali, ŵadumbu, na ŵamama ŵanandi ŵauzimu.” Timo wakati: “Tikukondwa chomene kuti tikovwirapo na maluso ghithu kuti vinthu vya Fumu viŵe vinandi.”

¹⁷ Darren na Sarah ŵachitapo mulimo uwu ku Africa, Asia, Central America, Europe, South America, na ku South Pacific. Iwo ŵakuti ŵasanga vinandi kuluska ivyo ŵapeleka. Nangauli pakaŵa masuzgo ghanyake, kweni Darren wakati: “Ni mwaŵi wapadera chomene kuteŵetera na ŵabali ŵa mu vyaru vinandi. Pakuti tose tikutemwa Yehova, tili ŵakukolerana pa charu chose.” Sarah wakati: “Nasambira vinandi ku ŵabali na ŵadumbu ŵakupambanapambana. Para nkhuwona umo ŵakujipelekera pakuteŵetera Yehova, nkhukhuka kuti nane nilutilire kuchita vyose ivyo ningafiska.”

18. Kasi uchimi wa pa Salmo 110:1-3 ukufiskika wuli?

¹⁸ Themba Davide likati visuzge viti wuli, ŵateŵeti ŵa Yehova ‘ŵazamujipeleka na mtima wose.’ (Ŵerengani Salimo 110:1-3.) Wose awo ŵakuchitako mulimo wa Ufumu ŵakufiska uchimi uwu. (1 Kor. 3:9) Pali ukaboni wakukwana wakuti Ufumu wa Chiuta uliko ndipo ukuwusa. Tili na maofesi gha munthavi ghanandi, Malo Ghakuchitirapo Maungano, na Nyumba za Ufumu. Ni mwaŵi wapadera chomene kuteŵetera Themba lithu Yesu Khristu pa mulimo uwo ukuchindika Yehova.