1, 2. (a) Ndi mini zwe vhashumeli vha Yehova vha ḓiphina nga u zwi ita u bva kale? (b) Ndi mini zwine zwa vha zwa ndeme kha Yehova?

 NDI kale vhashumeli vha Yehova vha fulufhedzeaho vha tshi ḓiphina nga u fhaṱa zwifhaṱo zwi itaho uri dzina ḽa Mudzimu ḽi rendwe. Sa tsumbo, Vhaisiraele vho shela mulenzhe nga u fhisea kha mushumo wa u fhaṱa thebenekele nahone vha ṋekedza thundu dzavho nga mafunda.—Ek. 35:30-35; 36:1, 4-7.

² Yehova ha dzhii zwifhaṱo sa zwithu zwine zwa mu hulisa u fhira zwoṱhe kana sa zwithu zwa ndeme u fhira zwoṱhe. (Mat. 23:16, 17) Zwine zwa vha zwa ndeme kha Yehova, tshifhiwa tshine tsha mu hulisa u fhira naho tshi tshini, ndi vhurabeli vhune vhashumeli vhawe vha mu itela hone, u katela na muya wavho wa u ḓifunela na mushumo wavho wa u fhisea. (Ek. 35:21; Marko 12:41-44; 1 Tim. 6:17-19) Yeneyo ndi mbuno ya ndeme. Ndi ngani? Nga nṱhani ha uri zwifhaṱo a zwi vhi hone lwa tshoṱhe. Sa tsumbo, thebenekele na thembele a zwi tsheeho. Zwenezwo zwifhaṱo zwi nga kha ḓi vha zwi si tsheeho, fhedzi Yehova ho ngo hangwa mafunda na u ḓinetisa ha vhashumeli vhawe vha fulufhedzeaho vhe vha tikedza mushumo wa u zwi fhaṱa.—Vhalani 1 Vhakorinta 15:58; Vhaheberu 6:10.

3. Ndi mini zwine ra ḓo zwi vusulusa kha ino ndima?

³ Vhashumeli vha Yehova vha musalauno na vhone vho shuma nga maanḓa u fhaṱa fhethu ha vhurabeli. Zwe ra zwi khunyeledza nga fhasi ha vhulivhisi ha Khosi yashu Yesu Kristo zwi a swayea vhukuma! Zwi tou vha khagala uri Yehova o fhaṱutshedza vhuḓidini hashu. (Ps. 127:1) Kha ino ndima, ri ḓo vusulusa miṅwe ya mishumo ye ya itwa na nḓila ye ya hulisa ngayo Yehova. Ri ḓo dovha ra pfa zwe zwa ambiwa nga vhaṅwe vhe vha shela mulenzhe kha u khunyeledza mushumo wa u fhaṱa.

4. (a) Ndi ngani ri tshi ṱoḓa fhethu ho engedzeaho ha vhurabeli? (b) Ndi ngani ofisi dzo fhamba-fhambanaho dza davhi dzo ṱanganywa? (Sedzani bogisi “ U Fhaṱwa Ha Madavhi—U Tendelana Na Vhuimo Vhu Shandukaho.”)

⁴ Samusi zwo haseledzwa kha ndima ya 16, Yehova u ṱoḓa ri tshi kuvhangana hu u itela u mu gwadamela. (Vhaheb. 10:25) Miṱangano yashu i ri khwaṱhisa lutendo na u engedza u fhisetshela hashu u ita mushumo wa u huwelela. Samusi vhufhelo vhu tshi khou sendela, Yehova u bvela phanḓa a tshi ṱavhanyisa wonoyo mushumo. Zwenezwo zwi ita uri vhathu vha maḓana a zwigidi vha dzhene ndanguloni yawe ṅwaha muṅwe na muṅwe. (Yes. 60:22) Samusi tshivhalo  tsha vhavhusiwa vha Muvhuso tshi tshi khou engedzea, hu vha na ṱhoḓea khulwane ya fhethu ha u gandisela khandiso dzo thewaho Bivhilini. Ri dovha ra ṱoḓa fhethu ho engedzeaho ha vhurabeli.

5. Ndi ngani dzina Holo ya Muvhuso ḽo tea? (Sedzani na bogisi “ Kereke ya Tshedza Tshiswa.”)

⁵ Mathomoni a ḓivhazwakale ya vhathu vha Yehova vha musalauno, Vhagudi vha Bivhili vho thoma u vhona ndeme ya u vha na fhethu havho ha u farela muṱangano. Zwi vhonala uri fhethu ha vhurabeli ha u thoma he ha fhaṱwa ho vha hu ngei West Virginia, U.S.A., nga 1890. Nga vho-1930, vhathu vha Yehova vho vha vho no fhaṱa kana u vusulusa holo nnzhi, fhedzi henefho fhethu ha muṱangano ho vha hu sa athu u irwa dzina. Naho zwo ralo, nga 1935 Wahashu Rutherford o dalela ngei Hawaii, he ha vha hu tshi khou fhaṱwa holo khathihi na ofisi ya davhi. Musi a tshi vhudziswa uri tshenetshi tshifhaṱo tshi tea u vhidzwa u pfi mini, Wahashu Rutherford o fhindula a ri: “Zwi nga vha hani arali ra tshi vhidza ‘Holo ya Muvhuso,’ samusi ri tshi huwelela nga ha mafhungo maḓifha a Muvhuso?” (Mat. 24:14) Ḽeneḽo dzina ḽo teaho a ḽo ngo irwa yeneyo holo fhedzi, ḽo ḓo dovha ḽa irwa fhethu hunzhi hune zwivhidzo  zwa vhathu vha Yehova zwa hu shumisa u fara miṱangano u mona na shango ḽoṱhe.

6, 7. Mushumo wa u fhaṱa Holo dza Muvhuso nga u ṱavhanya wo ṋea vhuṱanzi vhufhio?

⁶ Nga vho-1970, ṱhoḓea ya Holo dza Muvhuso yo vha i tshi khou engedzea nga u ṱavhanya. Zwenezwo zwa ita uri vhahashu vha ngei United States vha wane maitele a shumaho a u fhaṱa holo dzavhuḓi na dzo teaho nga maḓuvha a si gathi fhedzi. Nga 1983 ngei United States na Canada, ho vha ho no fhaṱiwa Holo dza Muvhuso dzo raloho dzi ṱoḓaho u vha 200. U itela u khunyeledza wonoyo mushumo, vhahashu vho mbo ḓi thoma u vhumba komiti dza dzingu dza u fhaṱa. Enea maitele o shuma zwavhuḓi vhukuma lwe nga 1986, Tshigwada tshi Langaho tsha ita uri yeneyi ndugiselelo i vhe ya lwa mulayo nahone nga 1987, ho vha hu na Komiti dza Dzingu Dza U Fhaṱa dza 60 ngei United States. a Nga 1992, dzenedzi Komiti dza Dzingu dza U Fhaṱa dzo dovha dza thewa na kha mashango a ngaho Afurika Tshipembe, Argentina, Australia, Dzhapani, Dzheremane, Fura, Mexico na ngei Spain. Zwi tou vha khagala uri ri tea u tikedza vhahashu vha shumaho nga maanḓa u fhaṱa Holo dza Muvhuso na Holo dza Maguvhangano, nga nṱhani ha uri mushumo une vha khou u ita ndi tshipiḓa tsha tshumelo yo khetheaho.

⁷ Dzenedzi Holo dza Muvhuso dzine dza fhaṱwa nga u ṱavhanya dzo ṋea vhuṱanzi havhuḓi kha tshitshavha. Sa tsumbo, gurannda ya ngei Spain yo vha i na tshiṱoho tshine tsha ri: “Lutendo lu Sudzulusa Dzithavha.” Musi yeneyo gurannda i tshi amba nga ha Holo ya Muvhuso ye ya vha i tshi khou fhaṱwa ngei Martos, yo vhudzisa u ri: “Zwi ḓa hani kha ḽino shango ḽi re na vhathu vha ḓiṱoḓelaho zwavho, vhomaḓilonga vha bvaho madzinguni o fhamba-fhambanaho  [a Spain] vha ye Martos u fhaṱa tshifhaṱo tshe tsha sia vhathu vho akhamala nge tsha fhaṱwa nga u ṱavhanya, nga nḓila yavhuḓi na yo dzudzanyeaho?” Yeneyo thero yo fhindula yeneyo mbudziso nga u redza zwo ambiwaho nga muṅwe wa vhomaḓilonga wa Ṱhanzi we a ri: “Zwi a konadzea nga nṱhani ha uri ri funzwa nga Yehova.”

8. Nga 1999, Tshigwada tshi Langaho tsho tendela maitele afhio maswa nahone ndi ngani?

⁸ Musi ḓana ḽa vhu-20 ḽa miṅwaha ḽi tshi vho swika magumoni, vhathu vhanzhi vhane vha dzula mashangoni a shayaho vho dzhena nga vhunzhi ndanguloni ya Yehova. Vhahashu vha zwivhidzoni zwa henefho vho ita zwi re maanḓani avho uri vha fhaṱe fhethu ha u farela muṱangano. Fhedzi kha maṅwe mashango, vho holedzwa na u kolelwa nga nṱhani ha uri Holo dza Muvhuso dza henefho dzo vha dzi dza vhuimo ha fhasi musi dzi tshi vhambedzwa na zwiṅwe zwifhaṱo zwa kereke. Naho zwo ralo, u thoma nga 1999, Tshigwada tshi Langaho tsho tenda uri hu thomiwe mbekanyamushumo ya u ṱavhanyisa mushumo wa u fhaṱa Holo dza Muvhuso mashangoni ane a khou bvela phanḓa. Ho shumiswa tshelede ine ya bva kha maṅwe mashango uri hu vhe na u “linganyisela.” (Vhalani 2 Vhakorinta 8:13-15.) Vhahashu vha tshinnani na vha tshisadzini vha bvaho kha maṅwe mashango vho ḓiṋekedzela nga u ḓifunela kha wonoyu mushumo wa u fhaṱa.

9. Ndi mushumo ufhio we wa vhonala u muhulwane, fhedzi ndi mini zwe zwa khunyeledzwa?

⁹ U thomani, wonoyu mushumo wo vhonala u muhulwane. Muvhigo wa 2001 wo sumbedza uri ho vha hu tshi ṱoḓea Holo dza Muvhuso dzi fhiraho 18 300 mashangoni a 88 ane a khou bvela phanḓa. Naho zwo ralo, nga thikhedzo ya muya wa Mudzimu  khathihi na Khosi yashu Yesu Kristo, a hu na mushumo u sa konadzei. (Mat. 19:26) Hu sa athu u fhela miṅwaha ya 15, u bva nga 1999 u swika nga 2013, vhathu vha Mudzimu vho vha vho no fhaṱa Holo dza Muvhuso dza 26 849 vha tshi shumisa yeneyi mbekanyo. b Yehova u bvela phanḓa a tshi fhaṱutshedza mushumo wa u huwelela, lwe nga 2013 ho vha hu tshi kha ḓi ṱoḓea Holo dza Muvhuso dza 6 500 kha eneo mashango, nahone zwino hu kha ḓi ṱoḓea dziṅwe Holo dza Muvhuso nnzhi ṅwaha muṅwe na muṅwe.

10-12. Mushumo wa u fhaṱa Holo dza Muvhuso wo hulisa hani dzina ḽa Yehova?

¹⁰ Mushumo wa u fhaṱa dzenedzi Holo dza Muvhuso wo hulisa dzina ḽa Yehova nga nḓila-ḓe? Muvhigo u bvaho ofisini ya davhi ya ngei Zimbabwe wo ri: “Hu sa athu u fhela ṅwedzi muthihi hu tshi kha ḓi tou bva u fhaṱwa Holo ya Muvhuso, tshivhalo tsha vhane vha ḓa miṱanganoni tshi anzela u engedzea kavhili.” Kha mashango manzhi, zwi vhonala uri vhathu vha a teledza u ḓa miṱanganoni u swikela hu tshi vha na fhethu ho fanelaho ha vhurabeli. Naho zwo ralo, ha vhuya ha fhaṱwa Holo ya Muvhuso, i mbo ḓi ḓala nahone zwa ita uri zwi mbo ḓi ṱoḓea uri hu fhaṱwe iṅwe. Naho zwo ralo, a si mbonalo ya zwifhaṱo fhedzi ine ya kokodzela vhathu kha Yehova. Lufuno lwa vhukuma lwa Vhukriste lune lwa sumbedzwa nga vhane vha fhaṱa dziholo lu dovha lwa kwama nḓila ine vhathu vha dzhia ngayo ndangulo yawe. Ṱhogomelani tsumbo dzi si gathi.

¹¹ Indonesia. Musi muṅwe munna we a vha o ḓi lavhelesa musi hu tshi khou fhaṱwa Holo ya Muvhuso a tshi pfa uri vhashumi vhoṱhe ndi vhomaḓilonga, o ri: “Ni vhathu vha mangadzaho ngangoho! Ndo vhona nḓila ine muṅwe na muṅwe wa vhoiwe a shuma nga mbilu yawe yoṱhe ngayo nahone o takala, naho ni sa holelwi. Ndi vhona u nga a hu na dzangano ḽa vhurereli ḽine ḽa nga ḽa vhoiwe!”

¹² Ukraine. Muṅwe mufumakadzi we a vha a tshi pfuka fhethu he ha vha hu tshi khou fhaṱwa Holo ya Muvhuso ḓuvha ḽiṅwe na ḽiṅwe, o phetha nga ḽa uri vhashumi vha tea u vha vhe Ṱhanzi dza Yehova na uri hu khou fhaṱwa Holo ya Muvhuso. O ri: “Ndo vhudzwa nga ha Ṱhanzi dza Yehova nga murathu wanga, we nga murahu na ene a vha muṅwe wavho. Musi ndi tshi vhona wonoyu mushumo wa u fhaṱa, ndo mbo ḓi phetha nga ḽa uri na nṋe ndi ṱoḓa u vha muraḓo wa wonoyu muṱa wa lwa muya. Henefha ndi he nda vhona uri hu na lufuno.” Onoyu mufumakadzi o ṱanganedza pfunzo ya Bivhili nahone a lovhedzwa nga 2010.

13, 14. (a) No guda mini kha nḓila ye vhaṅwe vhavhingani vha aravha ngayo musi vha tshi vhona hu tshi fhaṱwa Holo ya Muvhuso? (b) Ni nga ita mini uri fhethu ha vhurabeli hu hulise dzina Yehova?

¹³ Argentina. Vhaṅwe vhavhingani vho ya kha wahashu we a vha a tshi khou ṱhogomela fhethu hune ha khou fhaṱiwa Holo ya Muvhuso. Wa munna o ri, “Ndi kale ro ni lavhelesa musi ni tshi khou fhaṱa nahone . . . ro phetha nga ḽa uri ri ṱoḓa u guda nga ha Mudzimu henefha fhethu.” Nga murahu a vhudzisa a ri, “Ri fanela u ita mini uri ri fanelee u ḓa henefha miṱanganoni?” Vhenevho vhavhingani vha ṱanganedza pfunzo ya Bivhili, arali fhedzi muṱa wavho woṱhe u tshi ḓo tendelwa u guda. Vhahashu vha tendelana na yeneyo khumbelo.

 ¹⁴ Ni nga kha ḓi vha ni songo shela mulenzhe kha u fhaṱwa ha Holo ya Muvhuso ine na ṱanganela khayo, fhedzi ni nga ita zwo engedzeaho uri fhethu ha vhurabeli hune na ṱanganela khaho hu hulise dzina ḽa Yehova. Sa tsumbo, ni nga ramba vhagudiswa vhaṋu vha Bivhili nga u fhisea, vhane na vhuyelela khavho na vhaṅwe vhathu uri vha ḓe vha vhe na inwi Holoni ya Muvhuso. Ni dovha na vha na tshibuli tsha u kunakisa na u ṱhogomela fhethu haṋu ha vhurabeli. Arali na vhetshela thungo masheleni, ni nga kha ḓi kona u bvisa muṋeelo wa u ṱhogomela Holo ya Muvhuso ine na ṱanganela khayo kana u ṋeela kha u fhaṱiwa ha zwenezwi zwifhaṱo zwa vhurabeli kha maṅwe mashango. (Vhalani 1 Vhakorinta 16:2.) Yeneyi mishumo yoṱhe i ita uri dzina ḽa Yehova ḽi huliswe.

15-17. (a) Ndi vhafhio vhane vha ita mushumo muhulwane wa u fhaṱa? (b) No guda mini kha tshenzhelo dza vhavhingani vhe vha shuma kha mishumo ya u fhaṱa kha maṅwe mashango?

¹⁵ Mushumo munzhi wa u fhaṱa Holo dza Muvhuso, Holo dza Maguvhangano na madavhi u itwa nga vhahashu vha tshinnani na vha tshisadzini vhane vha dzula henefho. Naho zwo ralo, vha anzela u wana thuso kha vhahashu vha tshinnani na vha tshisadzini vha re na tshenzhelo ya u fhaṱa, vha bvaho kha maṅwe mashango. Vhaṅwe vha vhenevho vhomaḓilonga vho dzudzanya vhuimo havho uri vha kone u shuma mishumo mashango-ḓavha lwa vhege dzo vhalaho. Vhaṅwe vho ḓiṋekedzela u shuma lwa miṅwaha yo vhalaho, vha tshi ita mushumo wa u fhaṱa kha ḽiṅwe shango vha tshi ya kha ḽiṅwe.

¹⁶ Mushumo wa u fhaṱa kha maṅwe mashango u na khaedu dzawo, fhedzi u dovha wa fusha. Sa tsumbo, Timo na Lina vho ya mashangoni a re Asia, Yuropa na Amerika Tshipembe u fhaṱa Holo dza Muvhuso, Holo dza Maguvhangano na ofisi dza davhi. Timo u ri: “Miṅwahani ya 30 ye nda i fhedza, nga u tou angaredza ndo vha ndi tshi ṋewa mushumo muswa nga murahu ha miṅwaha mivhili.” Lina we a vhingwa nga Timo miṅwahani ya 25 yo fhiraho, u  ri: “Ndo no shuma na Timo mashangoni a fumi. Zwi dzhia tshifhinga na nungo u ḓowela zwiḽiwa zwiswa, mutsho muswa, luambo luswa, tsimu ntswa ya u huwelela khayo u katela na khonani ntswa.” c Naa vhuḓidini havho ho vha vhuyedza? Lina u ri: “Khaedu dzo ita uri ri wane phaṱhutshedzo khulwane vhukuma. Ro tshenzhela lufuno lwa Vhukriste na mafunda nahone ro kona u zwi vhona uri Yehova u a ri ṱhogomela. Ro dovha ra vhona u ḓadzea ha fulufhedziso ḽe Yesu a ḽi ṋea vhafunziwa vhawe, ḽine ḽa wanala kha Marko 10:29, 30. Ro wana vharathu, dzikhaladzi na vhomme vhanzhi vhukuma vha lwa muya.” Timo u ri: “Ri a fushea vhukuma musi ri tshi shumisa vhutsila hashu kha mishumo ya ndeme, u shela mulenzhe kha nyengedzeo ya thundu dza Khosi.”

¹⁷ Darren na Sarah, vhe vha thusa kha mushumo wa u fhaṱa Afurika, Amerika Tshipembe, Amerika Vhukati, Asia, South Pacific na Yuropa, vho ḓipfa vho vhuyelwa vhukuma. Hu sa londwi khaedu dze vha sedzana nadzo, Darren u ri: “Yo vha i ndugelo u shuma na vhahashu vha bvaho mashangoni o fhamba-fhambanaho. Ndo zwi vhona uri lufuno lune ra funa Yehova ngalwo lu fana na harane ine ya ri ṱanganya u mona na shango ḽoṱhe.” Sarah u ri: “Ndo guda zwinzhi kha vhahashu vha tshinnani na vha tshisadzini vha mvelele dzo fhamba-fhambanaho! Musi ndi tshi vhona u ḓidzima havho zwiṅwe zwithu vha tshi itela u shumela Yehova, zwi nṱuṱuwedza uri ndi bvele phanḓa ndi tshi ita zwoṱhe zwi re maanḓani anga.”

18. Vhuporofita vhu re kha Psalme ya 110:1-3 vhu khou ḓadzea nga nḓila-ḓe?

¹⁸ Khosi Davida o porofita uri naho vhavhusiwa vha Muvhuso wa Mudzimu vha tshi ḓo sedzana na khaedu, vha ḓo “phalala vha tshi zwi funa” vha tshi itela zwithu zwi tshimbidzanaho na Muvhuso. (Vhalani Psalme ya 110:1-3.) Vhoṱhe vhane vha ita mushumo une wa tikedza Muvhuso vha shela mulenzhe kha u ḓadzisa eneo maipfi a vhuporofita. (1 Vhakor. 3:9) Zwifhaṱo zwo vhalaho zwa ofisi dza davhi, Holo nnzhi dza Maguvhangano na Holo dza Muvhuso dza zwigidi u mona na shango, ndi vhuṱanzi vhu fareaho ha uri Muvhuso wa Mudzimu ndi wa vhukuma nahone u khou vhusa zwino. Ndi ndugelo yavhuḓi lungafhani ine ra vha nayo ya u shumela Khosi Yesu Kristo kha mushumo une wa hulisa Yehova nga nḓila yo mu fanelaho!