1, 2. (a) Ano an maiha na nga ginbubuhat han mga surugoon ni Jehova nga nakakapalipay ha ira? (b) Ano an pinakaimportante kan Jehova?

HADTO pa man, an maunungon nga katawohan ni Jehova nakakabiling hin kalipay ha mga pagtukod nga nagdadayaw han iya ngaran. Pananglitan, an mga Israelita malipayon nga nakigbahin ha pagtukod han tabernakulo ngan hura nga nagtagana hin materyales para hito.—Eks. 35:30-35; 36:1, 4-7.

² Para kan Jehova, diri an materyales ha pagtukod an nagpapasidungog gud ha iya, diri liwat ito an pinakaimportante para ha iya. (Mat. 23:16, 17) An pinakaimportante kan Jehova—an regalo nga nagpapasidungog gud ha iya—amo an pagsingba ha iya han iya mga surugoon, upod na an ira kinaburut-on ngan may kadasig nga pagbuhat. (Eks. 35:21; Mar. 12:41-44; 1 Tim. 6:17-19) Importante ito nga kamatuoran. Kay ano? Tungod kay an mga tinukod naguguba la. Pananglitan, an tabernakulo ngan templo diri na naeksister. Pero diri hinngangalimtan ni Jehova an pagkamahinatagon ngan pagkamaduruto han iya maunungon nga mga surugoon nga sinuporta ha pagtukod hito.—Basaha an 1 Corinto 15:58; Hebreo 6:10.

3. Ano an aton rirepasuhon hini nga kapitulo?

³ An mga surugoon ni Jehova yana maduruto liwat ha pagtukod hin mga lugar han pagsingba. Ngan urusahon gud an aton nahimo ha bulig han giya han aton Hadi nga hi Jesu-Kristo! Klaro nga ginbibendisyonan ni Jehova an aton pangalimbasog. (Sal. 127:1) Hini nga kapitulo, rirepasuhon naton an pipira han aton proyekto ha pagtukod ngan kon paonan-o ito nagpapasidungog kan Jehova. Tatagdon liwat naton an komento han pipira nga nagin bahin hito.

4. (a) Kay ano nga nagkikinahanglan kita hin dugang nga lugar han pagsingba? (b) Kay ano nga gintarampo an pipira nga sanga nga opisina? (Kitaa an kahon nga “ Mga Sanga nga Opisina—Nagpapahiuyon ha mga Pagbag-o.”)

⁴ Sugad han ginhisgotan ha Kapitulo 16, ginsugo kita ni Jehova nga magkatirok para ha pagsingba. (Heb. 10:25) An mga katirok diri la nagpaparig-on han aton pagtoo, nagdudugang liwat ito han aton kadasig ha pagsangyaw. Samtang nag-iikatarapos an kataposan nga mga adlaw, padayon nga ginpapadagmit ni Jehova an buruhaton. Tungod hito, yinukot an nasulod  ha iya organisasyon kada tuig. (Isa. 60:22) Samtang nagtitikadamu an sakop han Ginhadian, nagtitikadaku an panginahanglan hin mga imprintahan para han Kasuratanhon nga mga literatura ngan hin mga lugar han pagsingba.

5. Kay ano nga angayan an ngaran nga Kingdom Hall? (Kitaa liwat an kahon nga “ New Light nga Singbahan.”)

⁵ Ha tinikangan pa la, nasantop na han mga Estudyante han Biblia an panginahanglan ha pagkaada kalugaringon nga katirokan. Baga hin an usa han siyahan nga lugar ha pagsingba gintukod ha West Virginia, E.U.A., han 1890. Pag-abot han dekada han 1930, damu na nga katirokan an natukod o naayad han katawohan ni Jehova, pero waray pa hira igintatawag hito. Han 1935, binisita hi Bugto Rutherford ha Hawaii diin may gintutukod nga katirokan ha sapit han bag-o nga sanga nga opisina. Han pakianhan kon ano an itatawag hito, hiya binaton: “Diri ba angay ini tawagon nga ‘Kingdom Hall,’ kay ito an aton ginbubuhat, nagsasangyaw han maopay nga sumat han Ginhadian?” (Mat. 24:14) Katapos hito, Kingdom Hall na gihap an  igintawag ha kadam-an nga katirokan han mga kongregasyon han mga Saksi ni Jehova ha bug-os nga kalibotan.

6, 7. Ano an epekto han madagmit-matukod nga mga Kingdom Hall?

⁶ Han dekada han 1970, madagmit nga nagdaku an panginahanglan hin Kingdom Hall. Tungod hito, an kabugtoan ha Estados Unidos naghimo hin paagi basi makagtukod hin maopay ngan praktikal nga bilding ha sulod la hin pipira ka adlaw. Han 1983, mga 200 na han sugad nga Kingdom Hall an natukod ha Estados Unidos ngan Canada. Ha pagbuhat han proyekto, an kabugtoan nagporma hin mga regional building committee. Tungod kay nagin epektibo ito, han 1986, gin-aprobaran ito han Nagmamando nga Lawas. Han 1987, may-ada na 60 nga Regional Building Committee (RBC) ha Estados Unidos. * Han 1992, may RBC na gihap ha Alemanya, Argentina, Australia, Espanya, Fransia, Japan, Mexico, ngan South Africa. Sadang naton suportahan an maduruto nga kabugtoan nga nagtutukod hin mga Kingdom Hall ngan mga Assembly Hall kay an ira ginbubuhat bahin han sagrado nga pagsingba.

⁷ Inin madagmit-matukod nga mga Kingdom Hall naghahatag hin maopay nga pamatuod ha komunidad. Pananglitan, usa nga peryodiko ha Espanya an may laray-ulohan nga “An Pagtoo Nakakabalhin hin mga Bukid.” May kalabotan ha pagtukod hin Kingdom Hall ha bungto han Martos, ito nga peryodiko nagpakiana: “Paonan-o nagin posible nga hinin presente nga kalibotan nga an mga tawo kalugaringon la an ginhuhunahuna, may-ada la gihap mga boluntaryo tikang ha  iba-iba nga rehiyon [han Espanya] nga nagsakripisyo pagbiyahe ngadto ha Martos basi magtukod hin bilding nga an rekord lumabaw ha ngatanan nga rekord han kalaksi, kamaopay, ngan kaorganisado?” Sugad nga baton, ginkotar han peryodiko an ginsiring han usa nga Saksi nga boluntaryo: “Nagin posible ini tungod kay kami katawohan nga natutdoan ni Jehova.”

8. Ano nga programa an gin-aprobaran han Nagmamando nga Lawas han 1999, ngan kay ano?

⁸ Ha pag-ikatarapos han ika-20 ka siglo, damu nga tawo an sinulod ha organisasyon ni Jehova ha mga lugar diin pobre an kabugtoan. Ginbuhat han lokal nga mga kongregasyon an ngatanan basi makagtukod hin katirokan. Ha pipira nga nasud, gintamay hira ngan inatubang hin diskriminasyon tungod kay an ira Kingdom Hall minos la kon itanding ha mga singbahan. Pero han 1999, gin-aprobaran han Nagmamando nga Lawas an usa nga programa ha pagpadagmit han pagtukod hin mga Kingdom Hall ha mga nasud nga nagkukuri. Puydi na gamiton an pundo han riko nga mga nasud basi magkaada “pagkasarahid.” (Basaha an 2 Corinto 8:13-15.) Ngan an kabugtoan tikang ha iba-iba nga nasud nagboluntaryo ha buruhaton.

9. Ano nga proyekto an baga hin sobra kadaku, kondi ano an aton mga nahimo?

⁹ Ha tinikangan, baga hin sobra kadaku an proyekto. Sumala ha report han 2001, sobra 18,300 nga Kingdom Hall an ginkikinahanglan ha 88 nga nagkukuri nga nasud. Kondi ha bulig han baraan nga espiritu han Dios ngan han aton Hadi nga  hi Jesu-Kristo, waray buruhaton nga imposible. (Mat. 19:26) Ha sulod hin mga 15 ka tuig, tikang han 1999 tubtob han 2013, nakagtukod kita hin 26,849 nga Kingdom Hall sugad nga bahin han programa. * Padayon nga ginbibendisyonan ni Jehova an pagsangyaw nga buruhaton. Tungod hito han 2013, nagkaada panginahanglan hin mga 6,500 nga Kingdom Hall hito nga mga nasud, ngan ha pagkayana, ginatos pa an ginkikinahanglan kada tuig.

10-12. Paonan-o an pagtukod hin mga Kingdom Hall nagpapasidungog han ngaran ni Jehova?

¹⁰ Paonan-o an pagtukod hin Kingdom Hall nagpapasidungog han ngaran ni Jehova? Usa nga report han sanga nga opisina ha Zimbabwe an nagsiring: “Diri pa nausa ka bulan katapos matukod an usa nga Kingdom Hall, kasagaran nadoble na an kadamu han natambong.” Ha damu nga nasud, baga hin nag-aalang an mga tawo pakig-upod ha aton han waray pa kita presentable nga katirokan. Kondi kon may bag-o na nga Kingdom Hall, napupuno dayon ito salit kinahanglan na liwat hin usa pa. Pero diri la an kaopay han bilding an nakakadani han mga tawo ngadto kan Jehova. Nakakaapekto liwat han ira pagtagad ha iya organisasyon an tinuod nga Kristiano nga gugma han mga boluntaryo. Tagda an pipira hini.

¹¹ Indonesia. Usa nga lalaki nga nag-inobserbar ha pagtukod hin Kingdom Hall an nahibaro nga boluntaryo an ngatanan nga nagtatrabaho didto. Hiya nagsiring: “Bilib gud ako ha iyo! Nakita ko kon paonan-o an tagsa ha iyo maduruto ngan malipayon nga nagtrabaho bisan kon waray kamo sweldo. Pagkita ko, waray na iba nga relihiyon nga pariho han iyo!”

¹² Ukraine. Usa nga babaye an adlaw-adlaw nga nalabay ha usa nga gintutukod nga bilding, ngan nahunahuna niya nga Kingdom Hall an gintutukod ngan mga Saksi ni Jehova an nagtutukod. Hiya nagsiring: “Nakabati na ako mahitungod ha mga Saksi ni Jehova tikang ha akon bugto nga Saksi. Han maobserbaran ko kon paonan-o kamo magtukod, karuyag ko na gihap magin bahin hini nga espirituwal nga pamilya. Nakita ko ha iyo an gugma nga may buhat.” Nag-aram han Biblia ini nga babaye ngan nabawtismohan han 2010.

13, 14. (a) Ano an imo nahibaroan tikang ha reaksyon han mag-asawa nga nag-inobserbar ha pagtukod hin Kingdom Hall? (b) Ano an imo mahihimo basi mapasidunggan han iyo katirokan an ngaran ni Jehova?

¹³ Argentina. Usa nga mag-asawa an nakiistorya ha bugto nga nagdudumara hin pagtukod hin Kingdom Hall. An bana nagsiring: “Gin-inobserbaran gud namon an iyo pagtukod hin bilding, ngan . . . karuyag namon mahibaro mahitungod ha Dios dinhi hini nga katirokan.” Katapos hiya nagpakiana: “Ano an sadang namon buhaton basi magin kwalipikado pagtambong ha mga katirok dinhi?” Kinarawat hin pag-aram ha Biblia ini nga mag-asawa ha kondisyon nga api an ira bug-os nga pamilya. Syempre, malipayon nga umuyon an kabugtoan.

¹⁴ Bangin waray ka makapribilehiyo pagbulig ha pagtukod han iyo Kingdom Hall, pero daku la gihap an imo mahihimo  basi mapasidunggan han iyo katirokan an ngaran ni Jehova. Pananglitan, puydi ka magin maduruto ha pangimbitar han imo estudyante ha Biblia, ginbabalik-bisita, ngan iba pa ha pagtambong ha Kingdom Hall. Puydi ka bumulig ha paglimpyo ngan pagmintinar hito. Puydi ka liwat maggahin hin kwarta basi idonar ha pagmintinar han iyo Kingdom Hall o ha pagtukod hin mga katirokan ha iba nga nasud. (Basaha an 1 Corinto 16:2.) Ini ngatanan nagdadayaw han ngaran ni Jehova.

15-17. (a) Hin-o an naghihimo han kadak-an nga buruhaton ha pagtukod? (b) Ano an imo nahibaroan tikang ha komento han mag-asawa nga nagboluntaryo ha mga proyekto ha pagtukod ha iba-iba nga nasud?

¹⁵ Kadak-an han buruhaton ha pagtukod hin Kingdom Hall, Assembly Hall, ngan sanga nga opisina ginhihimo han lokal nga kabugtoan. Kondi agsob nga ginbubuligan hira hin kabugtoan tikang ha iba nga nasud nga may eksperyensya ha konstruksyon. An iba hito nga kabugtoan naghimo hin pagbag-o ha ira kinabuhi basi makaboluntaryo hin pipira ka semana ha iba nga nasud. An iba ha sulod hin damu ka tuig ngan nagburobalhin ha iba-iba nga proyekto ha pagtukod.

¹⁶ An internasyonal nga mga proyekto ha pagtukod may mga kakurian kondi may mga bendisyon liwat. Pananglitan hira Timo ngan Lina. Nakaboluntaryo hira ha pagtukod hin mga Kingdom Hall, Assembly Hall, ngan sanga nga opisina ha mga nasud ha Asia, Europa, ngan South America. Hi Timo nagsiring: “Ha naglabay nga 30 ka tuig, haros kada duha ka tuig nagbabag-o an akon toka.” Hi Lina, an iya asawa ha 25 ka tuig na, nagsiring: “Nakagboluntaryo na ako ha napulo nga nasud kaupod kan Timo. Daku nga pangalimbasog ngan panahon an ginkikinahanglan basi makapahiuyon ha bag-o nga pagkaon,  klima, yinaknan, teritoryo ha pagsangyaw, ngan basi magkaada bag-o nga kasangkayan.” * Takos ba ito han ira mga pangalimbasog? Hi Lina nagdugang: “Bisan pa han mga kakurian, hura nga bendisyon an amon nakarawat. Naeksperyensyahan namon an gugma ngan pagkamaabiabihon han kabugtoan, pati an mahigugmaon nga pag-ataman ni Jehova. Nakita liwat namon an katumanan han saad ni Jesus ha iya mga disipulo nga nakarekord ha Marcos 10:29, 30. Nadugangan hin usa ka gatos ka pilo an amon espirituwal nga kabugtoan nga kalalakin-an ngan kababayin-an, ngan mga iroy.” Hi Timo nagsiring: “Nalilipay gud kami paggamit han amon abilidad ha pinakadungganon nga katuyoan, an pakigbahin ha pagpahaluag han panag-iya han Hadi.”

¹⁷ Hira Darren ngan Sarah, nga nagboluntaryo ha mga proyekto ha pagtukod ha Aprika, Asia, Central America, Europa, South America, ngan South Pacific, inabat nga mas damu an ira nakarawat kay han ira naihatag. Bisan pa han mga kakurian, hi Darren nagsiring: “Pribilehiyo nga makatrabaho an kabugtoan ha iba-iba nga bahin han tuna. Nakita ko nga an aton gugma kan Jehova amo an nagbubugkos ha aton ha bug-os nga tuna.” Hi Sarah nagsiring: “Damu gud an akon hinbaroan tikang ha kabugtoan nga iba an kultura! Kon nakikita ko an ira ginhihimo nga pagsakripisyo ha pag-alagad kan Jehova naaaghat ako nga padayon nga ihatag an akon gimaopayi.”

18. Paonan-o natutuman an tagna ha Salmo 110:1-3?

¹⁸ Igintagna ni Hadi David nga bisan kon umatubang hin kakurian, ‘kinaburut-on’ nga ‘ihahalad’ han mga sakop han Ginhadian an ira kalugaringon para ha intereses hito. (Basaha an Salmo 110:1-3.) An ngatanan nga nakikigbahin ha buruhaton nga nasuporta ha Ginhadian nagtutuman hito nga tagna. (1 Cor. 3:9) An mga sanga nga opisina, ginatos nga Assembly Hall, ngan yinukot nga Kingdom Hall ha bug-os nga kalibotan ebidensya nga tinuod an Ginhadian ngan nagmamando na ito yana. Daku gud nga pribilehiyo nga mag-alagad ha Hadi nga hi Jesu-Kristo ha buruhaton nga naghahatag kan Jehova hin dungog nga takos gud ha Iya!