第19章
荣耀耶和华嘅建筑工程
1,2．（甲）一直以来，耶和华嘅子民都喜乐噉参与乜嘢工作？（乙）耶和华最重视嘅系乜嘢？
一直以来，耶和华嘅忠贞子民都喜乐噉参与建筑工作，为耶和华嘅名带嚟赞美。例如，以色列人积极参与建造圣幕嘅工作，而且慷慨捐出财物嚟支持呢项工程。（出埃及记35:30-35；36:1,4-7）
2 喺耶和华睇嚟，最能够荣耀佢嘅唔系建筑物本身，呢个亦都唔系佢最重视嘅。（马太福音23:16,17）耶和华最重视嘅系佢仆人对佢嘅崇拜，包括佢哋甘心乐意同热心为佢服务，呢个亦都系最能够荣耀佢嘅。（出埃及记35:21；马可福音12:41-44；提摩太前书6:17-19）点解呢一点好重要？因为建筑物唔系永恒嘅。例如，圣幕同圣殿已经唔再存在。虽然系噉，耶和华从来都冇忘记过佢嘅忠贞仆人为咗支持建筑工程而付出嘅辛劳同显出嘅慷慨。（请读哥林多前书15:58；希伯来书6:10）
3．我哋喺呢一章会回顾乜嘢？
3 同样，耶和华嘅现代子民都好努力兴建崇拜场所。我哋喺君王耶稣基督嘅指引下完成咗非凡嘅工作！好明显，耶和华的确祝福我哋嘅努力。（诗篇127:1）呢一章，我哋会回顾一啲以往完成咗嘅建筑工程，同埋呢啲工程点样荣耀耶和华。我哋都会听吓一啲曾经参与建筑工程嘅弟兄姊妹嘅心声。
建造王国聚会所
4．（甲）点解我哋需要更多崇拜场所？（乙）点解唔同嘅分部会合并？（另见附栏“ 切合需要嘅分部建筑工程”）
4 正如第16章提到，耶和华要求我哋聚集起嚟崇拜佢。（希伯来书10:25）我哋嘅聚会唔单止可以强化我哋嘅信心，而且可以使我哋更加热心传道。随住末日临近，耶和华继续加快传道工作嘅进展。每年有成千上万嘅人加入上帝嘅组织。（以赛亚书60:22）由于上帝子民数目不断增加，印刷圣经书刊嘅设施需要不断扩充，亦都需要更多嘅崇拜场所。
5．点解王国聚会所呢个名称好适合？（另见附栏“ 新光教堂”）
5 喺耶和华子民嘅现代历史早期，圣经研究者开始睇出佢哋需要有自己聚会嘅地方。1890年，其中一个最早嘅崇拜场所喺美国西弗吉尼亚州落成。到咗20世纪30年代，耶和华嘅子民已经兴建或者装修过好多聚会所，当时呢啲聚会所仲未有特别嘅名称。1935年，卢述福弟兄探访夏威夷嘅时候，有个新嘅聚会所喺度兴建紧，呢个聚会所同新嘅分部办事处系连埋一齐嘅。有人问卢述福弟兄呢座建筑物应该叫乜嘢名，佢回答话：“既然我哋做紧传讲王国好消息嘅工作，呢度系咪应该叫做‘王国聚会所’呢？”（马太福音24:14）呢个适当嘅名称唔系只有呢个聚会所专用，冇几耐，全球耶和华见证人大部分会众嘅崇拜场所都采纳呢个名称。
6,7．快速兴建嘅王国聚会所带嚟乜嘢好结果？
6 20世纪70年代，王国聚会所嘅需求迅速增长。所以，美国嘅弟兄发明咗一种快速建筑方法，可以喺几日之内起好一个又美观又实用嘅聚会所。到咗1983年，组织喺美国同加拿大兴建咗大约200个呢种聚会所。为咗完成工作，弟兄开始喺个别地区设立建筑委员会。由于呢个方法好有效，中央长老团喺1986年正式采纳呢个安排。1987年，喺美国一共成立咗60个地区建筑委员会（英语简称RBC)。 a到咗1992年，喺阿根廷、澳大利亚、法国、德国、日本、墨西哥、南非同西班牙都成立咗地区建筑委员会。弟兄姊妹为咗建造王国聚会所同大会堂而辛勤工作，佢哋所做嘅工作都系神圣服务嘅一部分，的确值得我哋大力支持。
7 呢啲快速兴建嘅王国聚会所喺当地作咗美好嘅见证。例如，西班牙嘅一份报纸有篇文章，标题叫做“可以移山嘅信心”。文章评论马尔托斯镇王国聚会所嘅建筑工程，话：“好难相信喺今日呢个充满自私精神嘅世界，竟然会有自愿者无私噉从［西班牙］各地嚟到马尔托斯，一齐参与一个建筑工程。而且佢哋嘅工作既迅速有效，又有组织性，兴建嘅建筑物仲好完善，简直系前所未见嘅。”点解佢哋做得到呢？文章引述一位志愿者嘅评论回答咗呢个问题：“原因好简单，我哋都系受耶和华教导嘅。”
资源有限地区嘅建筑工程
8．1999年，中央长老团批准咗乜嘢新计划？点解要噉做？
8 20世纪末，喺资源有限嘅地区，好多人都纷纷加入耶和华嘅组织，所以当地会众尽力兴建聚会场所。不过喺某啲资源有限嘅国家，弟兄姊妹受到嘲笑同歧视，因为当地嘅王国聚会所同其他宗教嘅崇拜场所相比之下显得好简陋。从1999年开始，为咗加快发展中国家嘅王国聚会所嘅建筑工作，中央长老团批准咗一个新嘅计划。好多嚟自较为富裕国家嘅资金会用嚟弥补资源有限地区嘅不足，使唔同嘅地区得以“均等”。（请读哥林多后书8:13-15）而且，嚟自其他国家嘅弟兄姊妹亦都会自愿参与建筑工作。
9．乜嘢工作睇嚟好艰巨？呢项工作有乜嘢成果？
9 起初，呢项工作睇嚟好艰巨。2001年嘅一份报告显示，喺88个发展中国家，需要建造嘅王国聚会所超过1万8300个。不过，有上帝嘅圣灵同君王耶稣基督嘅支持，乜嘢工作都能够成功。（马太福音19:26）喺1999年到2013年嘅15年期间，上帝嘅子民按照呢个计划已经兴建咗2万6849个王国聚会所。 b因为耶和华继续祝福传道工作，所以到咗2013年，呢啲国家仍然需要大约6500个王国聚会所。而家王国聚会所每年都有数以百计嘅新增需求。
喺资源有限嘅地区建造王国聚会所会有独特嘅挑战
10-12．王国聚会所嘅建筑工程点样为耶和华嘅名带嚟荣耀？
10 呢啲新王国聚会所嘅建筑工程点样为耶和华嘅名带嚟荣耀呢？津巴布韦（辛巴威）分部办事处嘅一份报告话：“通常，一个新嘅王国聚会所建造咗唔够一个月，嚟参加聚会嘅人数就会增加一倍。”喺好多国家，睇嚟有啲人本来唔想同我哋来往。不过，有咗体面嘅聚会所之后，佢哋就唔同嘞。新嘅王国聚会所起好之后，好快就坐满晒人，需要兴建另一个。不过，吸引人亲近耶和华嘅唔单止系建筑物本身。弟兄姊妹参与建筑工程所表现出嘅真挚爱心，亦都影响人对上帝组织嘅睇法。请睇吓以下几个例子。
11 印度尼西亚有个男人一直睇住啲工人点样兴建王国聚会所，发现佢哋都系志愿者，佢话：“你哋真系好犀利呀！我见到你哋每个人都做得好投入好开心，而且又唔收钱。我谂世上冇任何宗教组织会好似你哋噉！”
12 乌克兰有个女人每日都经过王国聚会所嘅建筑工地，佢睇得出参与兴建嘅人都系耶和华见证人，同埋佢哋起紧嘅系王国聚会所。佢话：“我听讲过耶和华见证人，因为我妹妹都系见证人。从呢项建筑工程，我睇到你哋真系好有爱心，我都决定要加入呢个属灵大家庭。”呢个女子开始学习圣经，而且喺2010年受咗浸。
13,14．（甲）有对夫妇对王国聚会所嘅建筑工程有好嘅反应，我哋从中学到乜嘢？（乙）你可以作出乜嘢贡献，使聚会所能够为耶和华嘅名带嚟荣耀？
13 阿根廷有对夫妇去见负责监督王国聚会所建筑工地嘅弟兄，丈夫话：“我哋一直好留意你哋嘅建筑工程，同埋……我哋决定要喺呢个地方学习上帝嘅知识。”佢仲话：“我哋要点样做先至符合资格参加呢度嘅聚会呢？”呢对夫妇接受咗圣经课程，但系有一个条件，就系要成家人一齐学习。弟兄好开心噉应承佢。
14 你可能冇机会参与自己王国聚会所嘅建筑工程，但你仲系可以做好多嘢，使聚会所荣耀耶和华嘅名。例如，你可以积极邀请你嘅圣经学生、续访同其他人嚟王国聚会所一齐参加聚会。你亦都有机会帮手清洁同保养王国聚会所。你仲可以做好计划，通过捐款嚟支持王国聚会所嘅开支，或者资助世界各地崇拜场所嘅建筑工作。（请读哥林多前书16:2）呢一切都可以为耶和华嘅名带嚟更多赞美。
“甘心献出自己”嘅工人
15-17．（甲）大部分参与建筑工程嘅系乜嘢人？（乙）两对夫妇参加过国际建筑工程，你可以从佢哋嘅评论学到乜嘢？
15 王国聚会所、大会堂同分部设施嘅建筑工作大部分都系由当地嘅弟兄姊妹嚟完成嘅。不过好多时，嚟自其他国家有建筑经验嘅弟兄姊妹都会帮手。有啲志愿人员安排好个人事务，可以用好几个星期嚟参与国际建筑工程。有啲甚至作出调整，可以从事呢啲工作好多年。当一个建筑工程完咗，佢哋就去下一个。
蒂莫·拉佩泰莱宁同莉娜（见第16段）
16 参与国际建筑工作要面对特别嘅挑战，不过都会使人得到好多福分，感到满足。例如，蒂莫同莉娜去过亚洲、欧洲同南美洲嘅好多国家建造王国聚会所、大会堂同分部。蒂莫话：“过去30年期间，平均每两年我就会有一个新委派。”莉娜同蒂莫结咗婚25年，佢话：“我同蒂莫喺10个唔同嘅国家服务过。我哋要用好多时间同精力去适应新嘅食物、新嘅气候、新嘅语言同新嘅传道地区，仲要结识新嘅朋友。” c噉样做值唔值得呢？莉娜话：“虽然我哋要面对各种挑战，但系我哋得到好大嘅福分。我哋见到弟兄姊妹表现嘅基督徒爱心同好客精神，感受到耶和华仁爱噉照顾我哋。同时，我哋亲眼见证到马可福音10:29,30里面耶稣对门徒嘅承诺应验。我哋得到百倍嘅属灵弟兄、姊妹同母亲。”蒂莫话：“见到君王嘅财物不断增加，而我哋可以出一分力，用自己嘅技能去支持呢份最有意义嘅工作，真系好有满足感。”
17 德伦同萨拉去过非洲、亚洲、中美洲、欧洲、南美洲同南太平洋嘅地区参与建筑工程，佢哋觉得自己得到嘅比付出嘅多好多。即使佢哋要面对挑战，但系，德伦话：“我觉得好荣幸可以同嚟自世界各地嘅弟兄姊妹一齐工作。我睇出大家都好爱耶和华，而呢种爱使我哋可以团结一致，紧密相连。”萨拉话：“我喺唔同文化背景嘅弟兄姊妹身上真系学到好多嘢！见到佢哋为咗事奉耶和华而作出嘅牺牲，激励我要继续将最好嘅献俾耶和华。”
18．诗篇110:1-3嘅预言点样应验？
18 大卫王预言过上帝王国嘅子民即使会面对各种挑战，仍然会“甘心献出自己”为王国服务。（请读诗篇110:1-3）所有参与支持王国工作嘅人都有份应验呢个预言。（哥林多前书3:9）世界各地好多分部嘅建筑物同大会堂，以及数以万计嘅王国聚会所系确凿嘅证据，证明上帝嘅王国系真实嘅，而且正喺度施行统治。耶和华配得一切嘅荣耀！我哋能够为君王耶稣基督服务，一齐参与可以荣耀耶和华嘅工作，真系好大嘅荣幸！
