第19章
榮耀耶和華嘅建築工程
1,2．（甲）一直以來，耶和華嘅子民都喜樂噉參與乜嘢工作？（乙）耶和華最重視嘅係乜嘢？
一直以來，耶和華嘅忠貞子民都喜樂噉參與建築工作，為耶和華嘅名帶嚟讚美。例如，以色列人積極參與建造聖幕嘅工作，而且慷慨捐出財物嚟支持呢項工程。（出埃及記35:30-35；36:1,4-7）
2 喺耶和華睇嚟，最能够榮耀佢嘅唔係建築物本身，呢個亦都唔係佢最重視嘅。（馬太福音23:16,17）耶和華最重視嘅係佢僕人對佢嘅崇拜，包括佢哋甘心樂意同熱心為佢服務，呢個亦都係最能够榮耀佢嘅。（出埃及記35:21；馬可福音12:41-44；提摩太前書6:17-19）點解呢一點好重要？因為建築物唔係永恆嘅。例如，聖幕同聖殿已經唔再存在。雖然係噉，耶和華從來都冇忘記過佢嘅忠貞僕人為咗支持建築工程而付出嘅辛勞同顯出嘅慷慨。（請讀哥林多前書15:58；希伯來書6:10）
3．我哋喺呢一章會回顧乜嘢？
3 同樣，耶和華嘅現代子民都好努力興建崇拜場所。我哋喺君王耶穌基督嘅指引下完成咗非凡嘅工作！好明顯，耶和華的確祝福我哋嘅努力。（詩篇127:1）呢一章，我哋會回顧一啲以往完成咗嘅建築工程，同埋呢啲工程點樣榮耀耶和華。我哋都會聽吓一啲曾經參與建築工程嘅弟兄姊妹嘅心聲。
建造王國聚會所
4．（甲）點解我哋需要更多崇拜場所？（乙）點解唔同嘅分部會合併？（另見附欄“ 切合需要嘅分部建築工程”）
4 正如第16章提到，耶和華要求我哋聚集起嚟崇拜佢。（希伯來書10:25）我哋嘅聚會唔單止可以强化我哋嘅信心，而且可以使我哋更加熱心傳道。隨住末日臨近，耶和華繼續加快傳道工作嘅進展。每年有成千上萬嘅人加入上帝嘅組織。（以賽亞書60:22）由於上帝子民數目不斷增加，印刷聖經書刊嘅設施需要不斷擴充，亦都需要更多嘅崇拜場所。
5．點解王國聚會所呢個名稱好適合？（另見附欄“ 新光教堂”）
5 喺耶和華子民嘅現代歷史早期，聖經研究者開始睇出佢哋需要有自己聚會嘅地方。1890年，其中一個最早嘅崇拜場所喺美國西弗吉尼亞州落成。到咗20世紀30年代，耶和華嘅子民已經興建或者裝修過好多聚會所，當時呢啲聚會所仲未有特别嘅名稱。1935年，盧述福弟兄探訪夏威夷嘅時候，有個新嘅聚會所喺度興建緊，呢個聚會所同新嘅分部辦事處係連埋一齊嘅。有人問盧述福弟兄呢座建築物應該叫乜嘢名，佢回答話：“既然我哋做緊傳講王國好消息嘅工作，呢度係咪應該叫做‘王國聚會所’呢？”（馬太福音24:14）呢個適當嘅名稱唔係只有呢個聚會所專用，冇幾耐，全球耶和華見證人大部分會衆嘅崇拜場所都採納呢個名稱。
6,7．快速興建嘅王國聚會所帶嚟乜嘢好結果？
6 20世紀70年代，王國聚會所嘅需求迅速增長。所以，美國嘅弟兄發明咗一種快速建築方法，可以喺幾日之内起好一個又美觀又實用嘅聚會所。到咗1983年，組織喺美國同加拿大興建咗大約200個呢種聚會所。為咗完成工作，弟兄開始喺個别地區設立建築委員會。由於呢個方法好有效，中央長老團喺1986年正式採納呢個安排。1987年，喺美國一共成立咗60個地區建築委員會（英語簡稱RBC)。 a到咗1992年，喺阿根廷、澳大利亞、法國、德國、日本、墨西哥、南非同西班牙都成立咗地區建築委員會。弟兄姊妹為咗建造王國聚會所同大會堂而辛勤工作，佢哋所做嘅工作都係神聖服務嘅一部分，的確值得我哋大力支持。
7 呢啲快速興建嘅王國聚會所喺當地作咗美好嘅見證。例如，西班牙嘅一份報紙有篇文章，標題叫做“可以移山嘅信心”。文章評論馬爾托斯鎮王國聚會所嘅建築工程，話：“好難相信喺今日呢個充滿自私精神嘅世界，竟然會有自願者無私噉從［西班牙］各地嚟到馬爾托斯，一齊參與一個建築工程。而且佢哋嘅工作既迅速有效，又有組織性，興建嘅建築物仲好完善，簡直係前所未見嘅。”點解佢哋做得到呢？文章引述一位志願者嘅評論回答咗呢個問題：“原因好簡單，我哋都係受耶和華教導嘅。”
資源有限地區嘅建築工程
8．1999年，中央長老團批准咗乜嘢新計劃？點解要噉做？
8 20世紀末，喺資源有限嘅地區，好多人都紛紛加入耶和華嘅組織，所以當地會衆盡力興建聚會場所。不過喺某啲資源有限嘅國家，弟兄姊妹受到嘲笑同歧視，因為當地嘅王國聚會所同其他宗教嘅崇拜場所相比之下顯得好簡陋。從1999年開始，為咗加快發展中國家嘅王國聚會所嘅建築工作，中央長老團批准咗一個新嘅計劃。好多嚟自較為富裕國家嘅資金會用嚟彌補資源有限地區嘅不足，使唔同嘅地區得以“均等”。（請讀哥林多後書8:13-15）而且，嚟自其他國家嘅弟兄姊妹亦都會自願參與建築工作。
9．乜嘢工作睇嚟好艱巨？呢項工作有乜嘢成果？
9 起初，呢項工作睇嚟好艱巨。2001年嘅一份報告顯示，喺88個發展中國家，需要建造嘅王國聚會所超過1萬8300個。不過，有上帝嘅聖靈同君王耶穌基督嘅支持，乜嘢工作都能够成功。（馬太福音19:26）喺1999年到2013年嘅15年期間，上帝嘅子民按照呢個計劃已經興建咗2萬6849個王國聚會所。 b因為耶和華繼續祝福傳道工作，所以到咗2013年，呢啲國家仍然需要大約6500個王國聚會所。而家王國聚會所每年都有數以百計嘅新增需求。
喺資源有限嘅地區建造王國聚會所會有獨特嘅挑戰
10-12．王國聚會所嘅建築工程點樣為耶和華嘅名帶嚟榮耀？
10 呢啲新王國聚會所嘅建築工程點樣為耶和華嘅名帶嚟榮耀呢？津巴布韋（辛巴威）分部辦事處嘅一份報告話：“通常，一個新嘅王國聚會所建造咗唔够一個月，嚟參加聚會嘅人數就會增加一倍。”喺好多國家，睇嚟有啲人本來唔想同我哋來往。不過，有咗體面嘅聚會所之後，佢哋就唔同嘞。新嘅王國聚會所起好之後，好快就坐滿晒人，需要興建另一個。不過，吸引人親近耶和華嘅唔單止係建築物本身。弟兄姊妹參與建築工程所表現出嘅真摯愛心，亦都影響人對上帝組織嘅睇法。請睇吓以下幾個例子。
11 印度尼西亞有個男人一直睇住啲工人點樣興建王國聚會所，發現佢哋都係志願者，佢話：“你哋真係好犀利呀！我見到你哋每個人都做得好投入好開心，而且又唔收錢。我諗世上冇任何宗教組織會好似你哋噉！”
12 烏克蘭有個女人每日都經過王國聚會所嘅建築工地，佢睇得出參與興建嘅人都係耶和華見證人，同埋佢哋起緊嘅係王國聚會所。佢話：“我聽講過耶和華見證人，因為我妹妹都係見證人。從呢項建築工程，我睇到你哋真係好有愛心，我都決定要加入呢個屬靈大家庭。”呢個女子開始學習聖經，而且喺2010年受咗浸。
13,14．（甲）有對夫婦對王國聚會所嘅建築工程有好嘅反應，我哋從中學到乜嘢？（乙）你可以作出乜嘢貢獻，使聚會所能够為耶和華嘅名帶嚟榮耀？
13 阿根廷有對夫婦去見負責監督王國聚會所建築工地嘅弟兄，丈夫話：“我哋一直好留意你哋嘅建築工程，同埋……我哋決定要喺呢個地方學習上帝嘅知識。”佢仲話：“我哋要點樣做先至符合資格參加呢度嘅聚會呢？”呢對夫婦接受咗聖經課程，但係有一個條件，就係要成家人一齊學習。弟兄好開心噉應承佢。
14 你可能冇機會參與自己王國聚會所嘅建築工程，但你仲係可以做好多嘢，使聚會所榮耀耶和華嘅名。例如，你可以積極邀請你嘅聖經學生、續訪同其他人嚟王國聚會所一齊參加聚會。你亦都有機會幫手清潔同保養王國聚會所。你仲可以做好計劃，通過捐款嚟支持王國聚會所嘅開支，或者資助世界各地崇拜場所嘅建築工作。（請讀哥林多前書16:2）呢一切都可以為耶和華嘅名帶嚟更多讚美。
“甘心獻出自己”嘅工人
15-17．（甲）大部分參與建築工程嘅係乜嘢人？（乙）兩對夫婦參加過國際建築工程，你可以從佢哋嘅評論學到乜嘢？
15 王國聚會所、大會堂同分部設施嘅建築工作大部分都係由當地嘅弟兄姊妹嚟完成嘅。不過好多時，嚟自其他國家有建築經驗嘅弟兄姊妹都會幫手。有啲志願人員安排好個人事務，可以用好幾個星期嚟參與國際建築工程。有啲甚至作出調整，可以從事呢啲工作好多年。當一個建築工程完咗，佢哋就去下一個。
蒂莫·拉佩泰萊寧同莉娜（見第16段）
16 參與國際建築工作要面對特别嘅挑戰，不過都會使人得到好多福分，感到滿足。例如，蒂莫同莉娜去過亞洲、歐洲同南美洲嘅好多國家建造王國聚會所、大會堂同分部。蒂莫話：“過去30年期間，平均每兩年我就會有一個新委派。”莉娜同蒂莫結咗婚25年，佢話：“我同蒂莫喺10個唔同嘅國家服務過。我哋要用好多時間同精力去適應新嘅食物、新嘅氣候、新嘅語言同新嘅傳道地區，仲要結識新嘅朋友。” c噉樣做值唔值得呢？莉娜話：“雖然我哋要面對各種挑戰，但係我哋得到好大嘅福分。我哋見到弟兄姊妹表現嘅基督徒愛心同好客精神，感受到耶和華仁愛噉照顧我哋。同時，我哋親眼見證到馬可福音10:29,30裏面耶穌對門徒嘅承諾應驗。我哋得到百倍嘅屬靈弟兄、姊妹同母親。”蒂莫話：“見到君王嘅財物不斷增加，而我哋可以出一分力，用自己嘅技能去支持呢份最有意義嘅工作，真係好有滿足感。”
17 德倫同薩拉去過非洲、亞洲、中美洲、歐洲、南美洲同南太平洋嘅地區參與建築工程，佢哋覺得自己得到嘅比付出嘅多好多。即使佢哋要面對挑戰，但係，德倫話：“我覺得好榮幸可以同嚟自世界各地嘅弟兄姊妹一齊工作。我睇出大家都好愛耶和華，而呢種愛使我哋可以團結一致，緊密相連。”薩拉話：“我喺唔同文化背景嘅弟兄姊妹身上真係學到好多嘢！見到佢哋為咗事奉耶和華而作出嘅犧牲，激勵我要繼續將最好嘅獻俾耶和華。”
18．詩篇110:1-3嘅預言點樣應驗？
18 大衛王預言過上帝王國嘅子民即使會面對各種挑戰，仍然會“甘心獻出自己”為王國服務。（請讀詩篇110:1-3）所有參與支持王國工作嘅人都有份應驗呢個預言。（哥林多前書3:9）世界各地好多分部嘅建築物同大會堂，以及數以萬計嘅王國聚會所係確鑿嘅證據，證明上帝嘅王國係真實嘅，而且正喺度施行統治。耶和華配得一切嘅榮耀！我哋能够為君王耶穌基督服務，一齊參與可以榮耀耶和華嘅工作，真係好大嘅榮幸！
