1, 2. (a) Aha do hasusaan na masa tu halak Kristen di Judea? (b) Aha do pangurupion na nidapot ni halak Kristen di Judea?

 TAON 46 M, masa ma haleon potir di Judea. Ndang tartuhor ni halak Kristen Jahudi na di Judea be gandum alani argana jala maol luluan. Alani i, masa ma haraparon. Ndang sadia leleng, sian na so panagaman dihilala nasida ma pangurupion ni Jahowa. Aha do na masa?

² Asi do roha ni halak Kristen Jahudi dohot na so Jahudi na adong di Antiokia dohot di Siria mangida hasusaan ni halak Kristen Jahudi di Jerusalem dohot di Judea. Dipapungu ma hepeng hombar tu na tarbahen nasida, jala ditongoshon marhite si Barnabas dohot si Saulus asa dipasahat tu angka sintua di Jerusalem. (Jaha Ulaon ni Apostel 11:27-30; 12:25.) Tontu las situtu do roha ni halak Kristen di Judea mangida pangurupion na pinatudu ni halak Kristen sian Antiokia!

3. (a) Songon dia do naposo ni Debata saonari mangihuthon ulaon ni halak Kristen di Antiokia? Lehon ma tudosan. (Ida ma kotak ” Pangurupion na Gumodang na Parjolo Sahali di Tingkinta On”.) (b) Aha do sungkunsungkun na laho taulas di pasal on?

³ On ma na parjolo sahali disurat di Bibel taringot tu halak Kristen na maringanan di sada luat, manongos pangurupion tu halak Kristen di luat na asing. Jala cara on diihuthon halak Kristen saonari. Tingki hona mara donganta sahaporseaon, rade do hita mangurupi nasida. a Asa boi taantusi partalian ni mangalehon pangurupion tu na hona mara dohot tu pangkobasion ulaon Harajaon, taulas ma tolu sungkunsungkun na hombar tu pangurupionta. Boasa tadok i pangkobasion? Aha do na tinujuna? Songon dia do hita mandapot laba sian ulaon on?

4. Aha do didok si Paulus tu halak Kristen di Korint taringot tu pangkobasion?

⁴ Surat ni si Paulus na paduahon tu halak Korint, patorangkon dua ulaon na hombar tu pangkobasionta. Nang pe surat on ditujuhon tu halak Kristen na miniahan, alai saonari hata i marlaba tu ’birubiru ni Kristus na asing’. (Joh. 10:16) Ulaon na parjolo, i ma ”tohonan [pangkobasion] pardengganan” laho marbarita dohot mangajari.  (2 Kor. 5:18-20; 1 Tim. 2:3-6) Ulaon na paduahon, i ma mangurupi angka dongan sahaporseaon. Si Paulus mandok na mangulahon on ”parsidohot mangurupi angka na badia”. (2 Kor. 8:4) Hata ”[pangkobasion] pardengganan” dohot ”mangurupi angka na badia” mamangke hata na sarupa di bagasan hata Junani, i ma di·a·ko·niʹa. Aha do lapatan ni hata on?

5. Boasa dipatudos si Paulus pangurupion tu na hona mara tu angka ulaon pangkobasion di huria?

⁵ Ala dipangke do hata Junani na sarupa laho manggombarhon dua ulaon on, dipatudos si Paulus ma pangurupion tu na hona mara tu angka ulaon pangkobasion di huria. Mulana, didok ibana do, ”Marasingasing do parhobason alai sada do Tuhan sihobasan. Marragamragam do pambahenan halongangan, . . . Alai Tondi na sasada i do mambahen i sude.” (1 Kor. 12:4-6, 11, Bibel siganup ari) Dipatudos si Paulus do muse ragam ni ulaon di huria tu pelean tu Debata. b (Rom 12:1, 6-8) Alani i, dihilala si Paulus ma ringkot ni mangalehon tingkina laho ’manarihon angka na badia i’!​—Rom 15:25, 26.

6. (a) Songon na nidok ni si Paulus, boasa pangurupion tu na hona mara sada pelean tu Debata? (b) Patorang ma songon dia pangurupion tu na hona mara dipatupa di liat portibi on saonari. (Ida ma kotak ” Tingki Masa Mara”)

⁶ Diurupi si Paulus do halak Korint mangantusi molo pangurupion tu na hona mara, i ma sada ulaon pangkobasion dohot panombaon tu Debata. Taparrohahon ma tudosan on: Dilehon halak kristen do pangurupion ”ala ni pangoloion ni roha[nasida], laho mangkatindangkon barita na uli na sian Kristus”. (2 Kor. 9:13) Alani i, molo diurupi halak Kristen donganna sahaporseaon, on patuduhon nasida mangulahon ajaran ni Kristus. Si Paulus mandok, on diulahon ala ”marningot asi ni roha na sumurung na sian Debata”. (2 Kor. 9:14; 1 Ptr. 4:10) Taringot on, The Watchtower 1 Desember 1975 mandok, ”Ingkon pos do rohanta tu Debata Jahowa dohot tu AnakNa Jesus Kristus na mangkatindangkon ringkot ni ulaon pangkobasion on.” Tangkas ma, sada pelean na arga do ulaon pangurupion tu na hona mara.​—Rom 12:1, 7; 2 Kor. 8:7; Heb. 13:16.

7, 8. Aha do na parjolo na tinuju ni pangurupion tu na hona mara? Patorang ma.

⁷ Aha do na tinuju ni ulaon pangurupion tu na hona mara? Dialusi si Paulus do on di bagasan surat na paduahon tu halak Korint. (Jaha 2 Korint 9:11-15.) Dipaboa si Paulus do adong tolu na tinuju ni ”ulaon guguan” manang pangurupion tu na hona mara. Taparrohahon ma na tolu on.

⁸ Na parjolo, pangurupion i parohon sangap tu Jahowa. Tingki patorangkon ayat i, jotjot do si Paulus manaringoti taringot tu Jahowa. Dipaboa ibana do tu nasida molo on patuduhon ”hamauliateon tu Debata” jala  ”hamauliateon ni na torop tu Debata”. (Ayat 11, 12) Didok do muse molo diurupi nasida na hona mara, on patuduhon ”dipasangap [nasida] Debata” jala dipuji nasida ma ”asi ni roha na sumurung na sian Debata”. (Ayat 13, 14) Jala di ujung ni hatorangan ni si Paulus taringot tu pangurupion i, didok ibana do, ”Mauliate ma tu Debata.”​—Ayat 15; 1 Ptr. 4:11.

9. Songon dia do ulaon pangurupion tu na hona mara boi mambahen muba pingkiran ni halak tu Sitindangi? Bahen ma tudosan.

⁹ Songon si Paulus, dipatudos naposo ni Debata do pangurupion tu na hona mara, songon dalan laho pasangaphon Jahowa jala mambahen marsangap Hata ni Debata. (1 Kor. 10:31; Tit. 2:10) Jotjot do pangurupion on mambahen muba pingkiran ni halak na marsogo ni roha tu Jahowa dohot angka SitindangiNa. Umpamana: Sahalak borua na tading di luat na hona mara alani halisungsung, mambahen tanda di pintuna ”Ndang Manjangkon Sitindangi Ni Jahowa”. Diida ibana ma lambok ni angka na mangurupi paturehon jabu ni hombar jabuna. Alani i, sungkunsungkun ma rohana, jala didapothon ibana ma. Diboto ma, Sitindangi Ni Jahowa do na mangurupi i gabe hona ma tu rohana, jala didok ma, ”Sala do hape pamingkirionku taringot tu hamu saleleng on.” Ujungna, dibolongkon ma tanda na binahenna i.

10, 11. (a) Aha do na patuduhon na tagohi hahurangan ni angka dongan na hona mara? Bahen tudosan. (b) Aha do publikasi na mangurupi donganta di ulaon pangurupion tu na hona mara? (Ida ma kotak ” Alat na Mangurupi Donganta di Ulaon Pangurupion tu na Hona Mara”.)

¹⁰ Na paduahon, tagohi ma ”hahurangan” ni dongan sahaporseaon. (2 Kor. 9:12a) Mansai lomo do rohanta manggohi na porlu di dongan na marsitaonon. Boasa? Ala ’sada daging’ do sude ruas ni huria jala molo ”mangae sada ruas, rap mangae ma saluhut ruas i”. (1 Kor. 12:20, 26) Alani holong dohot basa ni roha tu angka dongan, dipahombar do tingki dohot parkarejoan nasida asa boi mangurupi dongan na hona mara. (Jak. 2:15, 16) Umpamana, dung masa tsunami di Jepang taon 2011, pintor ditongoshon kantor cabang Amerika Serikat do surat tu Panitia Pembangunan Regional di Amerika Serikat. Disungkun ma adong do ”angka donganta na malo” jala rade mangurupi ulaon pajongjongkon Bale Harajaon di Jepang. Aha do hasilna? Ndang sadia leleng, nunga adong 600 halak na mandaftar jala rade do nasida laho tu Jepang mangurupi mamangke hepengnasida sandiri! Didok cabang Amerika Serikat ma, ”Godang situtu do na ro mandaftar.” Tingki disungkun sahalak donganta di Jepang boasa olo angka donganta ro sian na dao ro mangurupi, dialusi ma, ”’Sada daging’ do hami dohot angka dongan na di Jepang. Diantusi hami do hasusaan ni nasida.” Alani holong ni angka dongan, rade do nasida mangurupi jala sipata mangalehon hosana humongkop dongan sahaporseaonna. c​—1 Joh. 3:16.

 ¹¹ Dohot do angka na so Sitindangi marlas ni roha alani pangurupion on. Umpamana, dung masa halisungsung di Arkansas, AS, taon 2013, sada koran paboahon taringot tu hatop ni pangurupion na ro sian Sitindangi Ni Jahowa. Didok ma, ”Diatur organisasi ni Sitindangi Ni Jahowa do asa hatop jala denggan nasida mangalehon pangurupion.” Songon na didok si Paulus, ”tapatuk [tagohi]” do angka na porlu di dongan.

12-14. (a) Boasa ringkot mangurupi dongan na hona mara mangulahon ulaon partondion? (b) Songon dia do hatorangan ni angka donganta patuduhon na ringkot mangulahon ulaon partondion?

¹² Na patoluhon, taurupi do na hona mara asa boi muse mangulahon ulaon partondion. Boasa ringkot on? Didok si Paulus do, taronjar do roha ni halak na manjalo pangurupion i patuduhon ”hamauliateon . . . tu Debata”. (2 Kor. 9:12b) Dalan na dumenggan patuduhon hamauliateon tu Jahowa, i ma molo pintor rade nasida mangulahon ulaon di partondion. (Plp. 1:10) Taon 1945, The Watchtower mandok, ”Ditolopi si Paulus do . . . ulaon guguan i mangurupi . . . angka dongan manggohi na ringkot di pardagingon jala mangurupi nasida marhiras ni roha marbarita.” On dos songon na tinuju ni ulaonta saonari. Marhite ulaon marbarita ndang holan patoguhon halak na dijumpangi angka donganta na hona mara, alai dohot do dirinasida sandiri.​—Jaha 2 Korint 1:3, 4.

¹³ Taparrohahon ma hatorangan ni halak na mandapot pangurupion, boi marbarita na uli muse, jala lam togu haporseaonnasida dung mangulahon i. Didok sahalak donganta baoa, ”Pasupasu do di keluarganami molo marbarita na uli. Ala marsitutu mangapuli halak na asing, gabe ndang holsoan be hami.” Sahalak donganta borua mandok, ”Molo hutujuhon rohangku tu ulaon partondion, ndang huingot be angka na sega na binahen ni mara i. On mambahen dame pangkilalaanku.” Donganta borua na asing mandok, ”Godang do na masa ndang alani gogonta. Alai, marbarita na uli patoguhon keluarganami. Paboahon pangkirimon tu sasahalak patoguhon haporseaonku na laho patupaon ni Debata do sude gabe imbaru.”

¹⁴ Asing ni marbarita, ringkot do muse nasida laho tu parpunguan. Taida ma na masa tu si Kiyoko, donganta borua na marumur 50-an. Tingki tsunami, habis do sude artana, asing ni pangkean dohot solop na pinangkena. Ndang diboto be songon dia asa boi tongtong mangolu. Ro ma sahalak sintua paboahon parpunguan na dibahen di motorna. Didok si Kiyoko, ”Rap hundul do ahu dohot sintua i, tungganeboruna, dohot sahalak donganta borua di motor i. Nang pe ndang songon na somal parpunguan i diulahon, alai boi do mago satongkin i sian  pingkirannami tsunami i. Dame ma huhilala. Tutu ma, lam margogo do molo rap marpungu.” Donganta borua na asing muse mandok, ”Sada dalan haluaon do di ahu angka parpunguan i!”​—Rom 1:11, 12; 12:12.

15, 16. (a) Aha do laba na dapot ni halak Kristen di Korint dohot di luat na asing sian pangurupion tingki masa mara? (b) Songon dia do hita boi mandapot laba sian pangurupion tingki masa mara saonari on?

¹⁵ Dipatorang si Paulus do muse tu halak Korint laba na dapot ni nasida dohot angka dongan na asing ala mangurupi na hona mara. Ibana mandok, ”Ditangiangkon do hamu, jala masihol do nasida di hamu, marningot asi ni roha na sumurung na sian Debata tu hamu.” (2 Kor. 9:14) Tangkas ma, basa ni roha ni halak Korint, mangonjar roha ni halak Kristen Jahudi laho manangiangkon halak Kristen di Korint, dohot ma i halak na so Jahudi jala lam dihaholongi ma nasida.

¹⁶ The Watchtower 1 Desember 1945 paboahon laba ni pangurupion tu na hona mara di tingkinta on, ”Tingki rade naposo ni Debata di sada luat mangurupi dongan di luat na asing na hona mara, pingkirhon ma songon dia on mambahen huria lam marsada!” On ma na dihilala angka na parsidohot mangurupi dongan na hona mara. Sahalak sintua na mangurupi dongan na hona banjir mandok, ”Parsidohot mangurupi dongan na hona mara mambahen lam solhot paralealeonku tu angka dongan.” Sahalak donganta borua na manjangkon pangurupion i  mandok, ”Sada ni rohanta patuduhon songon na di Paradeiso.”​—Jaha Poda 17:17.

17. (a) Songon dia do Jesaya 41:13 hombar tu ulaon pangurupion tu na hona mara? (b) Patorang ma pigapiga pangurupion tu na hona mara boi parohon sangap tu Jahowa jala patoguhon paralealeonta. (Ida ma kotak ” Sukarelawan di Liat Portibi On Parohon Dame ni Roha”.)

¹⁷ Tingki ro sukarelawan tu inganan na hona mara, dihilala angka donganta na hona mara i ma sintong ni janji ni Bibel, ”Ai ahu do Jahowa Debatam, na maniop tanganmu siamun, jala na mandok tu ho: Unang ho mabiar, ahu do mangurupi ho.” (Jes. 41:13) Sahalak donganta borua mandok, ”Nang pe susa huhilala, alai diurupi Jahowa do ahu. Ndang tarhatahon godang ni pangurupion na hujalo sian angka dongan.” Dung masa mara di sada luat, dua halak sintua mambahen surat taringot tu huria na diurupi nasida, ”Susa do pangkilalaannami alani lalo on. Alai, pangurupion ni Jahowa marhite angka dongan patoguhon hami. Hea do dijaha hami taringot tu pangurupion tu na hona mara, alai huhilala hami ma saonari.”

18. Aha do na porlu ulahononmu molo naeng parsidohot tu ulaon pangurupion tu na hona mara? (Ida ma kotak ” On Manontuhon Dalan ni Ngoluna”.)

¹⁸ Olo do hamu marlas ni roha ala mangurupi na hona mara? Ingot ma, somalna sukarelawan na dipillit, i ma donganta na hea parsidohot tu ulaon pajongjongkon Bale Harajaon. Alani i, paboa ma tu sintua molo hamu naeng mangisi formulir tu ulaon i. Sahalak sintua na marpengalaman di ulaon pangurupion on paboahon, ”Laho ma hamu tu inganan na hona mara molo nunga dijou Panitia Penanggulangan Bencana.” Molo taihuthon i, boi ma taratur diulahon pangurupion tu na hona mara.

19. Songon dia do ulaon pangurupion tu na hona mara patuduhon molo hita sisean ni Kristus?

¹⁹ Cara na denggan patuduhon parenta ni Kristus taringot tu ”masihaholongan”, i ma mangalehon pangurupion tu na hona mara. Molo taulahon i, tapatudu ma hita sisean ni Kristus. (Joh. 13:34, 35) Pasupasu do di hita ala godang donganta na rade mangurupi dongan na marsihohot tu Harajaon ni Debata jala parohon sangap tu Jahowa!