1, 2. (a) Sa anong kasakitan napaatubang an mga Kristiyano sa Judea? (b) Anong kapahayagan nin pagkamuot an naeksperyensiyahan ninda?

 MGA 46 C.E. kaidto, asin grabe an tiggutom sa Judea. An mga Judio duman na mga disipulo ni Cristo dai kayang magbakal nin kakanon huling haralangkawon an presyo asin dikiton an suplay kaiyan. Grabe nanggad an gutom ninda. Minsan siring, maeeksperyensiyahan na ninda an pagprotektar ni Jehova sa paaging dai pa nahiling kaidto nin siisay man na disipulo ni Cristo. Ano daw an mangyayari?

² Huli sa kasakitan na inaagihan kan Judiong mga Kristiyano sa Jerusalem asin Judea, nagtipon nin pondo an Kristiyanong mga Judio saka Hentil sa Antioquia nin Siria para sa mga kapagtubod ninda. Dangan nagpili sinda nin duwang responsableng tugang, si Bernabe asin Saulo, para darahon an ayuda sa kamagurangan sa kongregasyon sa Jerusalem. (Basahon an Guibo 11:27-30; 12:25.) Imahinara nanggad kun paano nataros an puso kan nangangaipong mga tugang sa Judea huli sa kapahayagan na ini nin pagkamuot kan mga tugang ninda sa Antioquia!

3. (a) Paano sinusunod kan mga lingkod nin Diyos sagkod sa presenteng panahon an halimbawa kan inot na mga Kristiyano sa Antioquia? Magtao nin halimbawa. (Hilingon man an kahon na “ An Satong Inot na Dakulang Pagtao nin Ayuda sa Presenteng Panahon.”) (b) Anong mga hapot an pag-uulayan ta sa kapitulong ini?

³ An pagtaong iyan nin ayuda kan inot na siglo C.E. an inot na nakarekord na pangyayari na an mga Kristiyanong nakaistar sa sarong parte kan kinaban nagpadara nin ayuda sa mga Kristiyano na nasa ibang parte kan kinaban. Ngunyan, inaarog ta an halimbawa kan satong mga tugang sa Antioquia. Minatabang kita pag may naaraman kitang mga kapagtubod sa ibang lugar na tinamaan nin kalamidad o nag-aagi nin pagbalo. a Tanganing masabutan kun paano an pagtao nin ayuda konektado sa ibang aktibidad niyato sa ministeryo, pag-ulayan ta an tulong hapot dapit sa ministeryo na pagtao nin ayuda: Taano ta ibinibilang niyato iyan na ministeryo? Ano an mga katuyuhan kaiyan? Paano kita nakikinabang diyan?

4. Ano an sinabi ni Pablo sa mga taga Corinto dapit sa Kristiyanong ministeryo?

⁴ Sa ikaduwang surat ni Pablo sa mga taga Corinto, ipinaliwanag niya na an mga Kristiyano igwa nin ministeryo na may duwang kabtang. Minsan ngani ipinapanungod niya an surat na iyan sa linahidan na mga Kristiyano, aplikado man iyan ngunyan sa ‘ibang mga karnero’ ni Cristo. (Juan 10:16) An sarong kabtang kan satong ministeryo iyo an ‘ministeryo nin pakipag-ulian,’ an buot sabihon, an satong paghuhulit asin pagtutukdo. (2 Cor. 5:18-20, An Marahay  na Bareta Biblia; 1 Tim. 2:3-6) Kalabot sa saro pang kabtang an ministeryo na ginigibo niyato para sa mga kapagtubod ta. Espesipikong sinambit ni Pablo an “ministeryo na pagtao nin ayuda.” (2 Cor. 8:4, NW) Kun dapit sa pananaram na ‘ministeryo nin pakipag-ulian’ asin “ministeryo na pagtao nin ayuda,” an terminong “ministeryo” parehong trinadusir hali sa terminong Griego na di·a·ko·niʹa. Taano ta mahalaga iyan?

5. Taano ta mahalaga na inapod ni Pablo na sarong klase nin ministeryo an pagtao nin ayuda?

⁵ Paagi sa paggamit nin parehong Griegong termino para sa duwang gibuhon na iyan, iiniba ni Pablo an pagtao nin ayuda sa iba pang klase nin ministeryo na ginigibo ta sa Kristiyanong kongregasyon. Bago kaiyan, sinabi niya: ‘Igwa nin manlain-lain na paglilingkod [“ministeryo,” NW], alagad saro sanang Kagurangnan. Asin igwa nin manlain-lain na paggibo. Alagad ini gabos ginigibo kan iyo man sanang espiritu.’ (1 Cor. 12:4-6, 11) Sa katunayan, an manlain-lain na ministeryo sa kongregasyon ikinonektar ni Pablo sa “sagradong paglilingkod.” b (Roma 12:1, 6-8, NW) Para sa saiya, bako nanggad makangangalas na angay na gamiton an ibang kabtang kan panahon niya tanganing ‘maglingkod sa mga banal’!—Roma 15:25, 26.

6. (a) Arog kan ipinaliwanag ni Pablo, taano ta kabtang kan satong pagsamba an pagtao nin ayuda? (b) Ipaliwanag kun paano ginigibo ngunyan sa bilog na kinaban an satong pagtao nin ayuda. (Hilingon an kahon na “ Pag May Kalamidad!” sa pahina 214.)

⁶ Tinabangan ni Pablo an mga taga Corinto na masabutan kun taano ta an pagtao nin ayuda kabtang kan saindang ministeryo asin pagsamba ki Jehova. Mangnuhon an pangangatanusan niya: Ginigibo iyan kan mga Kristiyano huling ‘inuutob ninda an ebanghelyo ni Cristo.’ (2 Cor. 9:13) Kaya, huli sa pagmawot na iaplikar an mga katukduan ni Cristo, nagtatabang sinda sa mga kapagtubod ninda. Sinabi ni Pablo na an kabuutan na ginigibo ninda para sa saindang mga tugang talagang kapahayagan nin ‘labi-labing biyaya [o dai na kutana maninigong kabuutan] nin Diyos.’ (2 Cor. 9:14; 1 Ped. 4:10) Huli kaini, mapadapit sa pagtabang sa mga tugang ta na nangangaipo, na kaiba an pagtao nin ayuda, tama sanang sinabi kan The Watchtower na Disyembre 1, 1975: “Nungka kitang magduda na talagang pinapahalagahan ni Jehova Diyos asin kan Aki niyang si Jesu-Cristo an klaseng ini nin paglilingkod.” Iyo, an pagtao nin ayuda sarong mahalagang klase nin sagradong paglilingkod.—Roma 12:1, 7; 2 Cor. 8:7; Heb. 13:16.

7, 8. Ano an inot na katuyuhan kan satong ministeryo na pagtao nin ayuda? Ipaliwanag.

⁷ Ano an mga katuyuhan kan satong ministeryo na pagtao nin ayuda? Sinimbag ni Pablo an hapot na iyan sa ikaduwa niyang surat sa mga taga Corinto. (Basahon an 2 Corinto 9:11-15.) Sa mga bersikulong ini, itinampok niya an tulong panginot na katuyuhan, o pasuhan, na nagigibo ta paagi sa ‘paglilingkod [o ministeryo] na ini,’ na iyo an pagtao nin ayuda. Saro-saro tang pag-ulayan iyan.

⁸ Inot, nagpapamuraway ki Jehova an satong ministeryo na pagtao nin ayuda. Sa limang bersikulong iyan, mangnuhon kun gurano kaparating dinadara ni Pablo ki Jehova Diyos an atensiyon kan mga tugang. Ipinagirumdom sa sainda kan apostol an kapahayagan nin ‘pagpasalamat sa Diyos’ asin ‘dakul na pagpasalamat sa Diyos.’ (Bersikulo 11, 12) Sinambit niya kun paano an pagtao nin ayuda  nagpapahiro sa mga Kristiyano na ‘pamurawayon an Diyos’ asin umawon an ‘labi-labing biyaya’ [o dai na kutana maninigong kabuutan] niya. (Bersikulo 13, 14) Asin tinapos ni Pablo an pagtukar niya dapit sa ministeryo na pagtao nin ayuda paagi sa pagsabing: ‘Salamat sa Diyos.’—Bersikulo 15; 1 Ped. 4:11.

9. Paano puwedeng mabago an kaisipan nin saro huli sa satong pagtao nin ayuda? Magtao nin halimbawa.

⁹ Arog ni Pablo, para sa mga lingkod nin Diyos ngunyan, an pagtao nin ayuda oportunidad na pamurawayon si Jehova asin magin kaakit-akit an mga katukduan niya. (1 Cor. 10:31; Tito 2:10) An totoo, parating dakula an kabtang kaiyan para mahali an negatibong impresyon nin ibang tawo dapit ki Jehova asin sa saiyang mga Saksi. Bilang halimbawa: Sarong babayi na nakaistar sa lugar na tinamaan nin bagyo an may karatula sa pinto kan harong niya: “Bawal an Mga Saksi ni Jehova.” Dangan, sarong aldaw nahiling niya an mga nagtatao nin ayuda na naghihirahay nin naraot na harong sa ibong kan tinampo kahampang kan harong niya. Pirang aldaw niyang inobserbaran an makikatuod na mga nagtatrabaho, dangan nagduman siya para aramon kun siisay sinda. Kan maaraman niya na Mga Saksi ni Jehova an mga boluntaryo, naghanga siya asin nagsabi, “Nasala ako sa iniisip ko manungod saindo.” Ano an resulta? Hinali niya an karatula sa pinto kan harong niya.

10, 11. (a) Anong mga halimbawa an nagpapahiling na nagigibo ta an ikaduwang katuyuhan kan satong pagtao nin ayuda? (b) Anong publikasyon an nakakatabang sa mga nagtatao nin ayuda? (Hilingon an kahon na “ Dagdag na Kasangkapan Para sa mga Nagtataong Ayuda.”)

¹⁰ Ikaduwa, ‘hinihipnuan ta an kakulangan’ o abunda tang itinatao an mga pangangaipo nin mga kapagtubod. (2 Cor. 9:12a) Gustong-gusto tang maitao tulos an panginot na pangangaipo kan mga tugang ta para makatabang na mainaan an pagsakit ninda. Taano? Huling an mga miyembro kan Kristiyanong kongregasyon siring sa ‘sarong hawak,’ kaya ‘kun an sarong kabtang nagtitios, nadadamay an gabos na kabtang.’ (1 Cor. 12:20, 26) Huli sa pagpadangat asin pagmalasakit sa mga tugang, napapahiro tulos an dakul na tugang ngunyan na liwaton an iskedyul ninda, kuanon an mga kasangkapan ninda, asin magduman sa mga lugar na naapektaran nin kalamidad para magtao nin ayuda sa mga kapagtubod. (Sant. 2:15, 16) Halimbawa, pagkatapos nin tsunami sa Hapon kan 2011, nagsurat an sangang opisina kan Estados Unidos sa mga Regional Building Committee sa Estados Unidos para makiulay kun “may pirang kuwalipikadong tugang” na makakatabang sa pagtugdok giraray nin mga Kingdom Hall sa Hapon. Ano an simbag? Pira pa sanang semana, haros 600 na boluntaryo an nag-aplay—asin nag-uyon na magduman sa Hapon sa sadiri nindang gastos! “Dai kami makapaniwala sa reaksiyon kan mga tugang,” an sabi kan sangang opisina sa Estados Unidos. Kan haputon nin sarong brother sa Hapon an sarong nagtatao nin ayuda na hali sa ibang nasyon kun taano ta nagduman siya, nagsabi ini: “Kabtang kan ‘satong hawak’ an mga tugang digdi sa Hapon. Namamatian mi an kulog asin pagsakit ninda.” Huli sa mapagsakripisyong pagkamuot, isinasapeligro pa ngani kun minsan kan mga nagtatao nin ayuda an buhay ninda para tabangan an mga kapagtubod. c—1 Juan 3:16.

¹¹ Nagpapahalaga man an bakong mga Saksi sa satong pagtao nin ayuda. Halimbawa, pagkatapos nin sarong kalamidad sa estado  nin Arkansas, E.U.A., kan 2013, ibinareta nin sarong peryodiko an marikas na pagresponde kan boluntaryong mga Saksi: “Huli sa marahayon na pagkaorganisar kan Mga Saksi ni Jehova, epektibo asin mahusay magresponde an mga boluntaryo ninda pag may kalamidad.” Iyo, siring kan sinabi ni apostol Pablo, ‘hinihipnuan’ ta o abunda tang itinatao an pangangaipo kan satong mga tugang.

12-14. (a) Taano ta importanteng marhay na magibo an ikatulong katuyuhan kan satong pagtao nin ayuda? (b) Ano an sinabi kan mga tugang ta na nagduduon na mahalagang ipadagos an espirituwal na mga aktibidad?

¹² Ikatulo, tinatabangan ta an mga nasasakitan na makabalik sa espirituwal na rutina ninda. Taano ta importante ini? Sinabi ni Pablo na an mga tinatawan nin ayuda mapapahiro na gumibo nin ‘dakul na pagpasalamat sa Diyos.’ (2 Cor. 9:12b) Bako daw na an pinakamarahay na paagi na makapagpasalamat ki Jehova an mga nasasakitan iyo an pagbalik tulos ninda sagkod sa mapupuwede sa espirituwal na rutina? (Fil. 1:10) Sinabi kan The Watchtower kan 1945: “Inuyunan ni Pablo . . . an pagtipon nin mga kontribusyon huling natatabangan kaiyan . . . an nangangaipong mga tugang na Kristiyano na makaginhawa minsan paano sa materyal asin sa siring makapakikabtang nin mas lubos saka mas aktibo sa pagpapatotoo dapit ki Jehova.” Iyan man an katuyuhan ta ngunyan. Paagi sa paghuhulit giraray, napapakusog kan mga tugang ta bako sana an napupurisaw na mga tawo kundi pati an sadiri ninda.—Basahon an 2 Corinto 1:3, 4.

¹³ Isip-isipa an sinabi kan mga natawan nin kinakaipuhan na marhay na ayuda kaya nakakapaghulit na giraray asin napakusog huli kaiyan. “Bendisyon sa pamilya mi an paglilingkod sa langtad,” an sabi nin sarong brother. “Nalilingawan mi nguna an kahaditan sa buhay pag pinagmamaigutan ming rangahon an iba.” Sarong sister an nagsabi: “Pag nagpopokus ako sa espirituwal na aktibidad, nawawara sa isip ko an distroso sa palibot. Huli kaiyan, nakakamati ako nin katiwasayan.” Saro pang sister an nagsabi: “Minsan ngani dai mi kontrolado an dakul na bagay, may direksiyon an buhay kan pamilya ko huli sa ministeryo. Pag ipinapakipag-ulay mi sa iba an satong paglaom na bagong kinaban, minakusog an pagtitiwala mi na magigin bago an gabos na bagay.”

¹⁴ An pag-atender sa mga pagtiripon saro pang espirituwal na aktibidad na kaipuhan tulos na ipagpadagos sagkod sa mapupuwede kan nagsasakit na mga kapagtubod ta. Isip-isipa an nangyari ki Kiyoko, sarong sister na ma-60 anyos na. Huli sa tsunami, nawara an gabos na pagsadiri niya apuwera sa sulot niyang bado asin sandalyas, kaya dai na niya aram kun paano pa siya mabubuhay. Dangan sinabi sa saiya nin sarong elder na gigibuhon ninda an regular na Kristiyanong pagtiripon sa awto kaini. Sabi ni Kiyoko: “Tuminukaw sa laog kan awto an elder asin an agom niya, saka an saro pang sister pati ako. Dawa ngani simple an pagtiripon, bigla na sanang nawara sa isip ko an tsunami, na garo sarong milagro. Nagin matuninong an isip ko. Ipinahiling sa sako kan pagtiripon na iyan an puwersa nin Kristiyanong asosasyon.” Saro pang sister an nagsabi dapit sa mga pagtiripon na inatenderan niya pagkatapos nin  kalamidad: “Tinabangan ako kaiyan na makatagal!”—Roma 1:11, 12; 12:12.

15, 16. (a) Anong pakinabang an nakamtan kan mga Kristiyano sa Corinto asin sa iba pang lugar huli sa pagsuporta sa pagtao nin ayuda? (b) Paano man kita nakikinabang ngunyan sa pagtao nin ayuda?

¹⁵ Kan magsurat si Pablo dapit sa ministeryo na pagtao nin ayuda, ipinaliwanag man niya sa mga taga Corinto an mga pakinabang na makakamtan ninda asin kan ibang Kristiyano huli sa pakikikabtang diyan. Sinabi niya: ‘Sinda [an Judiong mga Kristiyano sa Jerusalem na tinawan nin tabang] na nagpamibi [para sa] saindo, [nagpapahayag nin kapadangatan sa saindo] dahil kan labi-labing biyaya [o mamumuton na kabuutan] nin Diyos sa saindo.’ (2 Cor. 9:14) Iyo, huli sa pagkamatinao kan mga taga Corinto, napahiro an Judiong mga Kristiyano na ipamibi an mga tugang ninda sa Corinto, kaiba na an mga Hentil, asin ruminarom an kapadangatan kan mga ini para sa sainda.

¹⁶ Bilang pag-aplikar kan sinabi ni Pablo dapit sa mga pakinabang kan pagtao nin ayuda sa presenteng panahon, nagsabi an The Watchtower na Disyembre 1, 1945: “Pag an dusay na mga lingkod nin Diyos sa sarong lugar nagtatabang para sa pangangaipo kan mga kapwa lingkod ninda sa ibang lugar, isip-isipa na sana an pagkasararo na bunga kaiyan!” Iyan mismo an naeeksperyensiyahan kan mga nagtatao nin ayuda ngunyan. “Paagi sa pagtao nin ayuda, urog akong nagin dayupot sa mga tugang kisa kasuarin man,” an sabi nin sarong elder na nagtabang sa mga naapektaran nin baha. Arog kaini an sabi nin sarong nagpapasalamat na sister na tinawan nin ayuda,  “Huli sa satong kasararuan nin magturugang, garo na man sana kita nasa Paraiso.”—Basahon an Talinhaga 17:17.

17. (a) Paano minaaplikar sa pagtao nin ayuda an sinabi sa Isaias 41:13? (b) Magtao nin nagkapirang halimbawa kun paano an pagtao nin ayuda nagtataong onra ki Jehova asin nagpapakusog sa satong bugkos nin pagkasararo. (Hilingon man an kahon na “ Nagtatao nin Ayuda an mga Boluntaryo Hali sa Bilog na Kinaban.”)

¹⁷ Pag minaabot an mga nagtatao nin ayuda sa lugar na tinamaan nin kalamidad, nangurugnang namamatian kan nagsasakit tang mga tugang na totoo an panuga nin Diyos: ‘Ako si Jehova na saimong Diyos, an nagkakapot kan saimong tuong kamot asin ta nagsasabi saimo: Dai ka matakot, susurugon taka.’ (Isa. 41:13) Pagkatapos na makaligtas sa kalamidad, nagsabi an sarong sister: “Nawaran ako nin paglaom kan mahiling ko an distroso, pero tinabangan ako ni Jehova. Dai ko ikaladawan an itinaong tabang sako kan mga tugang.” Pagkatapos na madistroso nin kalamidad an lugar nin duwang elder, nagsurat sinda para ipahayag an sabuot kan mga kongregasyon na pinaglilingkudan ninda: “Grabe an kulog na namatian mi huli sa linog, pero tinabangan kami ni Jehova paagi sa mga tugang. Dati nababasa mi lang an manungod sa pagtao nin ayuda, pero ngunyan nahiling mi mismo iyan.”

18. Ano an puwede mong gibuhon kun gusto mong makikabtang sa pagtao nin ayuda? (Hilingon man an kahon na “ Binago Kaiyan an Saiyang Buhay.”)

¹⁸ Gusto mo daw mamatian an kagaya-gayahan sa pagtao nin ayuda? Kun iyo, tandaan na an parating kinukua para magtao nin ayuda iyo an mga nagtatrabaho sa proyekto nin pagtugdok nin Kingdom Hall. Kaya sabihon sa mga elder nindo na gusto mong mag-fill out nin application form. Ini an pagirumdom nin sarong elder na eksperyensiyado nang marhay sa pagtao nin ayuda: “Magbiyahe ka sana pasiring sa lugar na tinamaan nin kalamidad pag naresibi mo na an opisyal na imbitasyon hali sa Disaster Relief Committee.” Sa paaging iyan, magigin organisado an satong pagtao nin ayuda.

19. Paano nakakatabang na marhay an mga nagtatao nin ayuda sa pagpatunay na kita talagang mga disipulo ni Cristo?

¹⁹ An pagtao nin ayuda marahayon nanggad na paagi nin pagkuyog ta sa pagbuot ni Cristo na ‘magkaminuruot-muutan.’ Paagi sa pagpahiling kaiyan, pinapatunayan ta na kita talagang mga disipulo niya. (Juan 13:34, 35) Bendisyon nanggad sa sato ngunyan an dakulon na tugang na andam na maglingkod asin nagpapamuraway ki Jehova mantang itinatao ninda an kaipuhan na ayuda sa mga maimbod na nagsusuportar sa Kahadian nin Diyos!