1, 2. (a) Unsay problema sa mga Kristohanon sa Judea? (b) Unsang kapahayagan sa gugma ang ilang nasinati?

MGA 46 C.E. niadto, ug dihay gutom sa Judea. Mahal kaayo ang mga prisyo sa pagkaon kay gamay rag suplay, mao nga dili makapalit ang Hudiyong mga tinun-an ni Kristo. Sila gipanggutom ug nameligrong kurawon. Pero hapit na ang proteksiyon ni Jehova sa paaging wala pa sukad masinati sa mga tinun-an ni Kristo. Unsay hapit nang mahitabo?

² Kay naluoy sa gigutom nga mga Kristohanong Hudiyo sa Jerusalem ug Judea, nangolektag pondo ang mga Kristohanong Hudiyo ug Hentil sa Antioquia sa Sirya para sa ilang isigkamagtutuo. Unya nagpili silag duha ka kasaligang brader, si Bernabe ug Saulo, aron ihatod ang hinabang ngadto sa mga ansiyano sa kongregasyon sa Jerusalem. (Basaha ang Buhat 11:27-30; 12:25.) Nalipay gyod ang nanginahanglang mga igsoon sa Judea sa gipakitang gugma sa mga igsoon sa Antioquia!

3. (a) Giunsa pagsundog sa mga igsoon karon ang ehemplo sa mga Kristohanon sa Antioquia? Paghatag ug pananglitan. (Tan-awa sab ang kahon nga “ Atong Unang Dakong Proyekto sa Paghatag ug Hinabang sa Modernong Panahon.”) (b) Unsang mga pangutana ang hisgotan niini?

³ Kana ang unang narekord nga hitabo sa unang siglo C.E. diin ang mga Kristohanon sa usa ka lugar nagpadalag hinabang sa mga Kristohanon sa laing lugar. Atong gisunod karon ang ehemplo sa mga igsoon sa Antioquia. Dihang masayran nato nga nakaagom ug katalagman o pagsulay ang mga igsoon sa laing lugar, motabang kita nila. * Aron masabtan ang koneksiyon sa pagpanghatag ug hinabang ug sa ubang kalihokan sa ministeryo, hisgotan nato ang tulo ka pangutana: Nganong giisip nato ang paghatag ug hinabang ingong ministeryo? Unsay mga tumong sa atong pagpanghatag ug hinabang? Sa unsang paagi kita makabenepisyo niana?

4. Unsay giingon ni Pablo bahin sa ministeryo sa mga Kristohanon?

⁴ Sa iyang ikaduhang sulat sa mga taga-Corinto, gipatin-aw ni Pablo nga ang ministeryo sa mga Kristohanon may duha ka bahin. Bisag ang sulat ni Pablo maoy para sa dinihogang mga Kristohanon, ang iyang mga pulong maaplikar sab sa “ubang mga karnero” karon. (Juan 10:16) Usa ka  bahin sa atong ministeryo ang “ministeryo sa pagpasig-uli,” ang buluhatong pagsangyaw ug paghimog tinun-an. (2 Cor. 5:18-20; 1 Tim. 2:3-6) Ang laing bahin mao ang pag-alagad para sa isigkamagtutuo. Gitawag kana ni Pablo nga ‘ministeryo sa pagpanghatag’ ug hinabang. (2 Cor. 8:4) Nianang duha ka ekspresyon, “ministeryo sa pagpasig-uli” ug ‘ministeryo sa pagpanghatag,’ ang pulong “ministeryo” gihubad gikan sa Gregong pulong nga di·a·ko·niʹa. Nganong makahuloganon kana?

5. Nganong haom ang pagtawag ni Pablo sa paghatag ug hinabang ingong ministeryo?

⁵ Dihang gigamit ni Pablo ang usa ka pulong para sa duha ka kalihokan, iyang gigrupo ang paghatag ug hinabang uban sa laing matang sa ministeryo nga gihimo sa kongregasyon. Una pa niana, siya miingon: ‘Adunay nagkadaiyang mga pag-alagad [o, ministeryo], apan adunay mao ra nga Ginoo; ug adunay nagkadaiyang mga pagpalihok [o, buluhaton], apan gihimo sa usa ug mao ra nga espiritu.’ (1 Cor. 12:4-6, 11) Sa pagkatinuod, gikonektar ni Pablo ang nagkadaiyang ministeryo sa kongregasyon sa “sagradong pag-alagad.” * (Roma 12:1, 6-8) Dili katingad-ang gibati niyang haom ang paggahig panahon “aron alagaran ang mga balaan”!—Roma 15:25, 26.

6. (a) Sa gipatin-aw ni Pablo, nganong bahin sa atong pagsimba ang paghatag ug hinabang? (b) Isaysay kon giunsa paghimo karon ang paghatag ug hinabang sa tibuok kalibotan. (Tan-awa ang kahong “ Dihang May Katalagman!” panid 214.)

⁶ Gitabangan ni Pablo ang mga taga-Corinto nga masabtan kon nganong bahin sa ilang ministeryo ug pagsimba kang Jehova ang paghatag ug hinabang. Matikdi ang iyang pangatarongan: Mohatag ang mga Kristohanon ug hinabang kay sila “mapinasakopon sa maayong balita bahin kang Kristo.” (2 Cor. 9:13) Busa kay gustong mosunod sa mga pagtulon-an ni Kristo, ang mga Kristohanon motabang sa isigkamagtutuo. Miingon si Pablo nga ang ilang mga buhat sa kaluoy para sa mga igsoon nagpasundayag sa “labawng dili-takos nga kalulot sa Diyos.” (2 Cor. 9:14; 1 Ped. 4:10) Bahin sa pag-alagad sa nanginahanglang mga igsoon, apil ang paghatag ug hinabang, ang Bantayanang Torre sa Hunyo 1, 1976 miingon: “Dili gayod kita magduhaduha nga si Jehova nga Diyos ug iyang Anak si Jesu-Kristo tinuod nga nagpabili niining matanga sa pag-alagad.” Oo, ang paghatag ug hinabang maoy bililhong matang sa sagradong pag-alagad.—Roma 12:1, 7; 2 Cor. 8:7; Heb. 13:16.

7, 8. Unsay unang tumong sa ministeryo sa pagpanghatag? Ipatin-aw.

⁷ Unsay mga tumong sa atong ministeryo sa pagpanghatag? Gitubag kana ni Pablo sa iyang ikaduhang sulat sa mga taga-Corinto. (Basaha ang 2 Corinto 9:11-15.) Sa maong mga bersikulo gipasiugda ni Pablo ang tulo ka tumong sa “ministeryo niini nga publikong pag-alagad,” nga mao, ang paghatag ug hinabang. Tagsatagsa natong hisgotan kini.

⁸ Una, kini makadayeg kang Jehova. Matikdi nga sa lima ka bersikulo, kadaghan maghisgot si Pablo kang Jehova nga  Diyos. Ang apostol nagpahinumdom kanila nga “mahatagan ug mga pasalamat ang Diyos” ug sa “paghatag ug mga pasalamat ngadto sa Diyos.” (Bersikulo 11, 12) Siya naghisgot nga ang paghatag ug hinabang sa mga Kristohanon ‘nakahimaya sa Diyos’ ug nakadayeg sa “labawng dili-takos nga kalulot sa Diyos.” (Bersikulo 13, 14) Ug gitapos ni Pablo ang paghisgot bahin niini sa pag-ingon: “Salamat sa Diyos.”—Bersikulo 15; 1 Ped. 4:11.

9. Sa unsang paagi ang pagtabang nakausab sa hunahuna sa mga tawo? Paghatag ug pananglitan.

⁹ Sama kang Pablo, ang mga alagad sa Diyos karon nag-isip sa pagtabang ingong kahigayonan sa paghimaya kang Jehova ug pagdayandayan sa iyang mga pagtulon-an. (1 Cor. 10:31; Tito 2:10) Gani, tungod niana nawala ang negatibong opinyon sa daghan bahin kang Jehova ug sa mga Saksi. Pananglitan: Usa ka babaye sa lugar nga gihapak ug bagyo nagbutang ug karatula sa pultahan: “Gidili ang mga Saksi ni Jehova.” Unya usa ka adlaw nakakita siya sa mga boluntaryo nga nag-ayo sa nagubang balay atbang sa karsada. Sa daghang adlaw iyang napanid-an ang mahigalaong mga boluntaryo, busa iyang giadto sila aron sa pagsusi. Pagkahibalo niyang sila mga Saksi, nakabilib siya ug miingon, “Sayop ang akong impresyon ninyo.” Unsay resulta? Gitangtang ang karatula.

10, 11. (a) Unsang pananglitan ang nagpakita nga nakab-ot nato ang ikaduhang tumong sa paghatag ug hinabang? (b) Unsang publikasyon ang makatabang sa mga boluntaryo? (Tan-awa ang kahong “ Dugang Galamiton Para sa mga Boluntaryo.”)

¹⁰ Ikaduha, atong “dagayang masangkapan ang mga panginahanglan” sa isigkamagtutuo. (2 Cor. 9:12a) Gusto natong itagana ang dihadihang panginahanglan ug mohupay sa pag-antos sa mga igsoon. Ngano? Kay ang mga igsoon sa kongregasyon bahin sa “usa ka lawas,” ug “kon ang usa ka sangkap nagaantos, ang tanang ubang mga sangkap magaantos uban niini.” (1 Cor. 12:20, 26) Busa tungod sa inigsoong pagbati ug kaluoy, daghang igsoon karon mohunong sa ilang naandang kalihokan, mag-empake sa ilang mga himan, ug molarga ngadto sa lugar nga naigo sa katalagman aron motabang. (Sant. 2:15, 16) Pananglitan, dihang ang Japan naigo sa tsunami niadtong 2011, ang branch office sa United States misulat sa ilang mga Regional Building Committee, nga nangutana kon duna bay “pipila ka brader nga may kahanas” nga makatabang sa pag-ayog mga Kingdom Hall didto. Unsay tubag? Sa pipila ra ka semana, duolag 600 ang miaplay ug miuyon nga moadto sa Japan sa kaugalingong gasto! “Nasorpresa kaayo mi sa ilang sanong,” mikomento ang branch office sa United States. Dihang gipangutana sa Japanese nga brader ang langyawng boluntaryo kon nganong siya mitabang, siya mitubag: “Ang mga igsoon sa Japan bahin sa ‘among lawas.’ Gibati namo ang ilang kasakit ug pag-antos.” Tungod sa masakripisyohong gugma, ipameligro pa usahay sa mga boluntaryo ang ilang kinabuhi aron makatabang sa isigkamagtutuo. *—1 Juan 3:16.

 ¹¹ Ang mga dili Saksi nagpasalamat sab sa atong paghatag ug hinabang. Pananglitan, human maigog bagyo ang estado sa Arkansas, U.S.A. niadtong 2013, gireport sa usa ka mantalaan ang dali nga pagtabang sa mga boluntaryong Saksi, nga miingon: “Maayo kaayong pagkaorganisar ang mga boluntaryong Saksi ni Jehova maong nakatabang dayon sila panahon sa katalagman.” Tinuod gyod ang giingon ni apostol Pablo, “dagayang masangkapan” nato ang nanginahanglang mga igsoon.

12-14. (a) Nganong importanteng makab-ot ang ikatulong tumong sa paghatag ug hinabang? (b) Unsay pipila ka komento nga nagpakitang importante ang pagpadayon sa espirituwal nga mga kalihokan?

¹² Ikatulo, kita motabang sa mga nag-antos aron makabalik dayon sila sa espirituwal nga rutina. Nganong importante kini? Si Pablo nag-ingon nga kadtong gitabangan madasig sa paghatag ug “mga pasalamat ngadto sa Diyos.” (2 Cor. 9:12b) Dili ba ang mga biktima sa katalagman mas makapahayag ug pasalamat kang Jehova kon makabalik dayon sila sa espirituwal nga rutina? (Filip. 1:10) Ang Watchtower sa 1945 miingon: “Uyon si Pablo . . . nga mangolektag kontribusyon kay kadto nakatabang . . . sa materyal nga panginahanglan sa mga igsoon ug busa sila mas madasig sa pagpakigbahin sa buluhatong pagsaksi bahin kang Jehova.” Kana gihapon ang atong tumong karon. Dihang manangyaw na sab ang mga igsoon, makapalig-on sila sa naguol nilang mga silingan, apil sa ilang kaugalingon.—Basaha ang 2 Corinto 1:3, 4.

¹³ Niay mga komento niadtong natabangan, nakasangyaw na sab, ug napalig-on tungod niana. “Panalangin sa among pamilya ang pagsangyaw,” usa ka brader miingon. “Nalimtan namog kadiyot ang mga problema dihang gihupay namo ang uban.” Usa ka sister miingon: “Nalimtan nako ang kagun-oban sa palibot dihang nagpokus ko sa espirituwal nga kalihokan. Kadto nakapalig-on gyod nako.” Ang laing sister miingon: “Daghang butang ang dili namo kontrolado, pero ang ministeryo naghatag direksiyon sa among pamilya. Ang pagsangyaw sa gisaad nga bag-ong kalibotan nakapalig-on sa among pagtuo nga bag-ohon gyod ang tanang butang.”

¹⁴ Angayng makabalik dayon sa pagtambong ug mga tigom ang nag-antos nga mga igsoon. Tagda ang nahitabo kang Kiyoko, sister nga kapig 55 anyos. Tapot ra sa lawas ang nasalbar niya sa tsunami, maong nalibog siya unsaon pagpanginabuhi. Dayon giingnan siya sa usa ka ansiyano nga himoon ang tigom sa iyang sakyanan. Si Kiyoko miingon: “Nanglingkod mi sa sakyanan—ako, ang ansiyano, iyang asawa, ug laing sister. Simple ra ang tigom pero, samag milagro, nalimtan nako ang tsunami ug mibati kog kalinaw sa hunahuna. Nakita nakong makatabang gyod ang pagpakig-uban sa mga igsoon.” Bahin sa mga tigom human sa katalagman, usa pa ka sister miingon: “Kana nakatabang nako sa paglahutay!”—Roma 1:11, 12; 12:12.

15, 16. (a) Unsay nadawat nga benepisyo sa mga Kristohanon sa Corinto ug sa ubang lugar tungod sa ilang pagtabang? (b) Sa unsang paagi kita susamang nakabenepisyo niana karon?

¹⁵ Sa paghisgot ni Pablo sa ministeryo sa paghatag ug hinabang, iyang gipatin-aw sab sa mga taga-Corinto ang mga benepisyo nga nadawat sa mga nakigbahin niana. Siya miingon: “Uban ang pangamuyo alang kaninyo sila [mga Kristohanong Hudiyo sa Jerusalem nga nakadawat sa hinabang] nangandoy alang kaninyo tungod sa labawng dili-takos nga kalulot sa Diyos nganha kaninyo.” (2 Cor. 9:14) Ang mga Kristohanong Hudiyo nadasig gyod nga mag-ampo para sa mga igsoong Hudiyo ug Hentil sa Corinto tungod sa ilang pagkamahinatagon, ug mas gimahal nila sila.

¹⁶ Sa pag-aplikar sa mga pulong ni Pablo bahin sa mga benepisyo sa paghatag ug hinabang karon, ang Watchtower sa Disyembre 1, 1945, miingon: “Dihang ang usa ka grupo sa katawhan sa Diyos moamot para sa panginahanglan sa laing grupo, pagkadakog epekto niana sa ilang panaghiusa!” Naeksperyensiyahan kana sa mga boluntaryo karon. “Tungod niini mas nasuod ko sa mga igsoon,” miingon ang ansiyanong nakatabang panahon sa baha. Kini ang giingon sa mapasalamatong sister nga natabangan, “Tungod sa atong panag-igsoonay, samag nagpuyo na ta sa Paraisong yuta.”—Basaha ang Proverbio 17:17.

17. (a) Sa unsang paagi natuman ang Isaias 41:13 sa pagpanghatag ug hinabang? (b) Paghatag ug mga pananglitan nga kini nakahimaya kang Jehova ug nakapahiusa kanato. (Tan-awa sab ang kahong “ Boluntaryo Gikan sa Lainlaing Bahin sa Kalibotan Nagdalag Kahupayan.”)

 ¹⁷ Pag-abot sa mga boluntaryo sa lugar nga naigo sa katalagman, ang nag-antos nga mga igsoon ilabinang makasinati sa katumanan sa saad sa Diyos: “Ako, si Jehova nga imong Diyos, nagahawid sa imong tuong kamot, ang Usa nga nag-ingon kanimo, ‘Ayaw kahadlok. Ako magatabang kanimo.’” (Isa. 41:13) Human masalbar sa katalagman, usa ka sister miingon: “Pagkakita nako sa kadaot, nawad-an kog paglaom, pero gitunol ni Jehova ang iyang kamot. Dili mahubit sa mga pulong ang tabang nga akong nadawat.” Human mapayhag sa linog ang ilang lugar, duha ka ansiyano misulat bahin sa gibati sa ilang mga igsoon sa kongregasyon: “Naguol mi pag-ayo tungod sa linog, pero nasinati namo ang tabang ni Jehova pinaagi sa mga igsoon. Sa una, amo ra ning nabasahan, pero karon amo na kining nasinatian.”

18. Unsay imong himoon aron makaapil ka sa pagpanghatag ug hinabang? (Tan-awa sab ang kahong “ Kini Nakahatag ug Direksiyon sa Iyang Kinabuhi.”)

¹⁸ Gusto ba nimong matilawan ang kalipay sa pagpanghatag ug hinabang? Kon oo, hinumdomi nga ang mga boluntaryo sagad pilion gikan sa mga boluntaryo sa pagpanukod ug Kingdom Hall. Busa sultihi ang mga ansiyano nga gusto kang moaplay. Usa ka ansiyano nga eksperyensiyado na niini nagpahinumdom: “Ayawg adto sa lugar nga naigo sa katalagman kon dili ka pa makadawat ug opisyal nga imbitasyon gikan sa Disaster Relief Committee.” Sa maong paagi, magmahapsay ang atong buluhaton.

19. Sa unsang paagi nakatabang ang mga boluntaryo sa pagpakita nga kita tinuod nga mga tinun-an ni Kristo?

¹⁹ Ang paghatag ug hinabang maoy talagsaong paagi sa pagsunod sa sugo ni Kristo nga “maghigugmaay sa usag usa.” Ang pagpakita sa maong gugma magpasundayag nga kita tinuod nga mga tinun-an ni Kristo. (Juan 13:34, 35) Panalangin gyod kanato ang daghang boluntaryo nga naghimaya kang Jehova samtang naghatag ug hinabang sa maunongong mga tigsuportar sa Gingharian sa Diyos!