1, 2. a) Gwɛlɛya juman lo tun be Zude kerecɛnw kan? b) U kerecɛnɲɔgɔnw y’a yira cogo di ko u b’u kanu?

 SAAN 46 fan fɛ Krista tile la, kɔngɔ donna Zude mara la. Sumanw tun sɔrɔ man di minkɛ, u sɔngɔ yɛlɛla ani Yezu ka kalandenw tun tɛ se k’u san. O kama, u tɔɔrɔnin tun lo kosɔbɛ kɔngɔ bolo. O wagati la, Jehova y’u dɛmɛ cogo dɔ la u tun ma deli ka min ɲɔgɔn ye. U ye dɛmɛ juman lo sɔrɔ do?

² Yahutu minw tun ye kerecɛnw ye Zeruzalɛmu ani Zude mara la, u makari donna u kerecɛnɲɔgɔnw na minw tun be Antiyɔsi (Siri mara la). O kama, o yɔrɔ kerecɛnw (minw tun ye Yahutuw ye wo, minw tun tɛ Yahutuw ye wo), u bɛɛ ye bolomafara kɛ walisa k’u dɛmɛ. O kɔ, u y’a ɲini lannamɔgɔ fila fɛ, Barinabasi ni Sɔli, ko u ka taga o dɛmɛ di Zeruzalɛmu kafo diinan mɔgɔkɔrɔw ma (Kɛwaliw 11:27-30; 12:25 kalan). Miiri k’a filɛ Antiyɔsi balimaw ka kanuya wale ye Zude balimaw dusu sɔrɔ cogo min na, olu minw mako tun be dɛmɛ na!

3. a) Kerecɛn fɔlɔ minw tun be Antiyɔsi, Ala sagokɛlaw b’olu ka ɲɛyirali ladegi cogo di bi? Misali dɔ fɔ. (Koorilen nin lajɛ fana: “ An ye dɛmɛba fɔlɔ min lase mɔgɔw ma balawo tuma na.”) b) An bena ɲiningali jumanw lo jaabi sapitiri nin na?

³ A siɲɛ fɔlɔ lo Bibulu kɔnɔ a lakalila ko kerecɛnw ye dɛmɛ lase u balimaw ma jamana wɛrɛw la. Bi, an be Antiyɔsi kerecɛnw ladegi. N’an y’a mɛn ko gwɛlɛya wala balawo cunna an balimaw kan jamana wɛrɛw la, an be dɛmɛ lase u ma. a An be dɛmɛ min lase an balimaw ma, o ye an ka cidenya baara faan dɔ lo ye. Walisa k’a faamu o ɲɛsinna an ka cidenya baara ma cogo min na, an ka ɲiningali saba nunu jaabi: An be dɛmɛ min lase, mun na o y’an ka cidenya baara faan dɔ ye? An b’o kɛ kuun jumanw lo kama? Nafa jumanw lo be sɔrɔ o la?

4. Ciden Pol ye mun lo fɔ Korɛntikaw ye kerecɛn ka cidenya baara koo la?

⁴ Korɛntikaw ka bataki filanan kɔnɔ, Pol y’a ɲɛfɔ ko kerecɛn ka cidenya baara ye faan fila lo ye. Pol ye min fɔ, o tun ɲɛsinna kerecɛn mɔlenw lo ma. Nka bi, o kumaw ɲɛsinna ‘saga dɔ wɛrɛ’ mɔgɔw fana ma (Zan 10:16). An ka cidenya baara faan dɔ ye “cɛlabɛn baara” ye, o kɔrɔ,  ka waajuli kɛ ani ka mɔgɔw kalan (2 Kor. 5:18-20; 1 Tim. 2:3-6). An ka cidenya baara faan wɛrɛ ye “Ala ka mɔgɔw dɛmɛko” ye fana (2 Kor. 8:4). Grɛkikan kumaden di·a·ko·niʹa lo bayɛlɛmana ko “cɛlabɛn baara” ani “dɛmɛko.” O b’an dɛmɛ ka mun lo faamu do?

5. Ciden Pol ko Ala ka mɔgɔw dɛmɛko ye an ka cidenya baara faan dɔ ye. Mun na o kɔrɔtanin lo do?

⁵ Pol kɛtɔ ka gɛrɛkikan kumaden kelen fɔ ka ɲɛsin an ka cidenya baara faan fila ma, o b’a yira ko an balimaw dɛmɛko ani an be baara wɛrɛ minw kɛ kafo kɔnɔ, u fila bɛɛ kɔrɔtanin lo. A tun kɔnna k’a fɔ ko: “Baara sifa caman . . . be yen, nga Kuntigi kelen le b’o la. Koo kɛcogo caman be yen, nga . . . Nii Senuma be seko di mɔgɔ kelen kelen bɛɛ ma.” (1 Kor. 12:4-6, 11). Ciden Pol tun b’a fɔra le ko baara sifa caaman minw be kɛ kafo kɔnɔ, u bɛɛ ye an ka “batoli” senuman faan dɔw lo ye b (Ɔrɔm. 12:1, 6-8). A tɛ bari an na k’a ye ko Pol ye a ka wagati dɔ ta ka “Ala ka mɔgɔw” dɛmɛ.—Ɔrɔm. 15:25, 26.

6. a) Ka kɛɲɛ ni Pol ka ɲɛfɔli ye, mun na balimaw dɛmɛko ye an ka batoli faan dɔ ye? b) A ɲɛfɔ balimaw dɛmɛko labɛnnin lo cogo min na duniɲa kuru bɛɛ kɔnɔ bi bi nin na. (Koorilen nin lajɛ: “ Dɛmɛw labɛncogo.”)

⁶ Pol ye Korɛnti kerecɛnw dɛmɛ k’a faamu fɛɛn min kama balimaw dɛmɛko ye an ka cidenya baara ani an ka batoli faan dɔ ye. A kɔrɔsi a ye min fɔ. A ko kerecɛn minw be dɛmɛ lase u balimaw ma, u b’o kɛ, sabu u “sɔnna Krista ka kibaru diman ma ka mɛnni kɛ a fɛ.” (2 Kor. 9:13). U b’a fɛ ka Krista ka kalanw sira tagama minkɛ, o lo b’u lasun k’u kerecɛnɲɔgɔnw dɛmɛ. U be ɲumanya wale minw kɛ u balimaw ye, Pol ko o ye “Ala ka nɛɛmaba” lo ye (2 Kor. 9:14; 1 Piyɛri 4:10). An balima minw mako be dɛmɛ na, an be dɛmɛ minw lase u ma, a tun fɔra saan 1976, marisikalo tile fɔlɔ ka Kɔrɔsili Sangaso kɔnɔ (faransɛkan na) o koo la ko: “An ma ɲi ka sigasiga abada ko o baaraw kɔrɔtanin lo kosɔbɛ Jehova Ala n’a Dencɛ Yezu Krista fɛ.” Tiɲɛn na, an be dɛmɛ min lase an balimaw ma balawo tuma na, o ye batoli senuman faan dɔ lo ye min kɔrɔtanin lo kosɔbɛ.—Ɔrɔm. 12:1, 7; 2 Kor. 8:7; Eburuw 13:16.

7, 8. N’an be dɛmɛ lasera an balimaw ma balawo tuma na, an ka laɲinita fɔlɔ ye juman lo ye? A ɲɛfɔ.

⁷ An ka laɲinitaw ye mun ni mun lo ye n’an be dɛmɛ lasera an balimaw ma balawo tuma na? Pol y’o ɲiningali jaabi 2 Korɛntikaw 9:11-15 kɔnɔ (a kalan). O vɛrisew kɔnɔ, Pol y’a yira ka gwɛ ko an be baara min kɛ “Ala ka mɔgɔw ka makoɲa” kosɔn, o kɔrɔ, an be dɛmɛ min lase balawo tuma na, o be laɲinita jɔnjɔn saba dafa. An k’o laɲinitaw kelen kelen bɛɛ lajɛ.

⁸ A fɔlɔ, o dɛmɛ b’a to mɔgɔw be barika la Jehova ye. An ye vɛrise duuru minw kalan, a kɔrɔsi siɲɛ daa min na Pol ye Jehova Ala kofɔ a balimaw ye. Vɛrise 11nan na, a ko “mɔgɔ caaman ka barika la Ala ye.” Vɛrise 12nan fana na,  a ko “mɔgɔ caaman be barika la Ala ye.” O kɔ, a y’a yira ko dɛmɛ min be lase balimaw ma balawo tuma na, o b’a to u be “Ala tanu” ani k’u ka waleɲumanlɔn yira “Ala ka nɛɛmaba kosɔn.” (Vɛrise 13, 14). Pol tun be min fɔra balimaw dɛmɛko la, a y’o kuncɛ ko: “An be Ala tanu.”—Vɛrise 15; 1 Piyɛri 4:11.

9. Dɛmɛ min be lase balimaw ma balawo tuma na, cogo juman na o be se k’a to mɔgɔw b’u ka miiriya yɛlɛma an koo la? Misali dɔ fɔ.

⁹ I ko Pol, an b’a jati ko dɛmɛ min be lase balimaw ma balawo tuma na, o ye sababu ye ka bonya la Jehova n’a ka kalanw kan (1 Kor. 10:31; Titi 2:10). Tiɲɛn lo ko dɔw be ni miiriya juguw ye Jehova n’a Seerew koo la. Nka, an be dɛmɛ min lase balimaw ma balawo tuma na, o be se k’a to o mɔgɔw b’u ka miiriyaw yɛlɛma. Misali la, muso dɔ tun y’a sɛbɛ a ka daa la ko: “Jehova Seerew, aw kana don yan.” Kɔfɛ, sanfɔɲɔba dɔ ye tiɲɛni kɛ a ka mara la. O muso ye balimaw ye u be boon dɔ lalagara a ka soo ɲɛfɛ. Loon caaman na, a tora k’o balimaw kɔrɔsi u be baara kɛra ni dusudiya ye. A laban, a tagara kuma n’u ye. Tuma min na a y’a lɔn ko Jehova Seerew lo, a kabakoyara ani a ko: “Ne tun tɛ ni miiriya ɲuman ye aw koo la.” O muso tun ye min sɛbɛ k’a bila a ka daa la, a y’o bɔ yen.

10, 11. a) Koo jumanw lo b’a yira ko an be an ka laɲinita filanan dafara dɛmɛ baara koo la? b) Balima minw be dɛmɛ lase balawow tuma na, an ka gafe juman lo be olu dɛmɛ? (Koorilen nin lajɛ: “ Baarakɛminan nafaman dɔ.”)

¹⁰ A filanan, an be an balimaw mako wasa koɲuman. (2 Kor. 9:12a). An b’a fɛ k’an balimaw makoya jɔnjɔnw wasa ani ka dɔ bɔ u ka sɛgɛn na. Mun na do? Sabu kafodenw bɛɛ ye “farikolo kelen lo” ye. Ani, “ni farikolo yɔrɔ dɔ be tɔɔrɔla, tɔɔ nunu fana be tɔɔrɔ n’a ye.” (1 Kor. 12:20, 26). O la, hinɛ ani kanuya lo be balima caaman lasun bi bi nin na ka taga u kerecɛnɲɔgɔnw dɛmɛ yɔrɔ minw na balawo kɛra. U be sin ka yɛlɛmani don u ka porogramu na ani k’u ka baarakɛminanw ta ka taga yen (Zaki. 2:15, 16). Misali la saan 2011, dugukoloyɛrɛyɛrɛ kɛra kɔgɔji kɔnɔ ka tiɲɛniba kɛ Zapɔn jamana na. O kɔ, Etazini ka tɔnbolo ye lɛtɛrɛ ci kɔmitew ma minw be lɔli baaraw kun na a ka mara la. A y’a ɲini u fɛ ni “balima setigi damanin” labilanin lo ka taga dɛmɛ don ka Masaya Boonw lɔ kokura Zapɔn. Lɔgɔkun damanin dɔrɔn kɔnɔ, balima 600 ɲɔgɔn y’u tɔgɔ sɛbɛ walisa ka taga dɛmɛ don yen. U bɛɛ tun labɛnnin lo k’u ka awiyɔn biye san u yɛrɛ ma! Etazini ka tɔnbolo ko: “An kabakoyara k’a ye ko balima caaman y’u tɔgɔ di.” Zapɔn balima dɔ ye u dɔ ɲininga fɛɛn min kama a nana dɛmɛ don. A y’a jaabi ko: “An balima minw be yan Zapɔn, olu ye an ‘farikolo’ yɔrɔ dɔ lo ye. Sɛgɛn ni tɔɔrɔ minw be u kan, o be an fana tɔɔrɔ.” Kanuya min be mɔgɔ lasun k’a yɛrɛ saraka tɔɔw kosɔn, o lo ye o dɛmɛbagaw lasun k’u niin bila farati la tuma dɔw la yɛrɛ walisa k’u kerecɛnɲɔgɔnw dɛmɛ. c—1 Zan 3:16.

¹¹ An be dɛmɛ min lase mɔgɔw ma balawo tuma na, minw tɛ Jehova Seerew ye, o be nɔɔ to olu fana kan. Misali  la saan 2013, tuma min na balawo dɔ kɛra Arkansas mara la, Etazini, Jehova Seerew teliyara ka taga dɛmɛ don yen. Zurunali dɔ y’a fɔ o koo la ko: “Jehova Seerew ye labɛn min kɛ walisa k’u yɛrɛ di ka dɛmɛ don balawo tuma na, o ɲɔgɔn tɛ yen.” I ko ciden Pol tun y’a fɔ cogo min na, an balima minw mako be dɛmɛ na, an be olu ‘mako ɲɛ’ bɛrɛbɛrɛ.

12-14. a) An ka ɲi k’an balimaw dɛmɛ kuun sabanan min kosɔn, mun na a kɔrɔtanin lo kosɔbɛ an k’o dafa? b) Mun lo b’a yira ko a kɔrɔtanin lo an kana an ka Alakow dabila?

¹² A sabanan, an be kasaratɔw dɛmɛ u ka segi k’u ka Alakow daminɛ. Mun na o kɔrɔtanin lo? Pol ko dɛmɛ min be lase balimaw ma, o ben’a to u “caaman be barika la Ala ye.” (2 Kor. 9:12b). Nka walisa u ka barika la Jehova ye cogo fisaman na, fɔɔ u k’a daminɛ joona k’u ka Alakow kɛ (Filip. 1:10). A tun fɔra saan 1946 ka Kɔrɔsili Sangaso dɔ kɔnɔ (faransɛkan na) ko: “Pol sɔnna . . . ko balimaw ka bolomafaraw kɛ ɲɔgɔn kan sabu o dɛmɛ barika la . . . kerecɛn dɛsɛbagatɔw tun be se ka bololafɛn dɔw sɔrɔ. O la, u tun bena wagati ani fanga sɔrɔ k’u seen don bɛrɛbɛrɛ waajuli baara la.” An be n’o laɲinita kelen lo ye bi. N’an balimaw ye waajuli daminɛ kokura, o be u mɔgɔɲɔgɔnw ani olu yɛrɛ jija.—2 Korɛntikaw 1:3, 4 kalan.

¹³ Balima minw ye dɛmɛ sɔrɔ, u ye fanga kura sɔrɔ sabu u y’a daminɛ ka waajuli kɛ kokura. An ka olu dɔw ka lakalitaw lajɛ. Balimacɛ dɔ ko: “Waajuli ye ne ni n’ ka denbayamɔgɔw nafa. An kɛtɔ ka tɔɔw dusu saalo, o y’a to an tun tɛ miirila tugun an ka gwɛlɛyaw koo la wagati dɔ la.” Balimamuso dɔ ko: “N’ kɛtɔ ka n’ seen don bɛrɛbɛrɛ Alakow la, o y’a to tiɲɛni min kɛra, n’ tun tɛ miirila o la tugun. N’ y’a ye ko n’ latanganin lo.” Balimamuso wɛrɛ ko: “An tun tɛ ɲɛ sɔrɔla koo caaman na, nka waajuli baara y’an dɛmɛ k’a lɔn an ka ɲi ka min kɛ. An be ni jigiya min ye duniɲa kura koo la, an kɛtɔ k’o kofɔ tɔɔw ye, o y’a to an lara a la kosɔbɛ ko Ala bena fɛɛn bɛɛ kɛ kura ye.”

¹⁴ A kɔrɔtanin lo fana an balima kasaratɔw ka lajɛntaga daminɛ joona. An k’a filɛ min ye balimamuso Kiyoko sɔrɔ. A be ni saan 60 ɲɔgɔn ye. Fɔɲɔba dɔ kɛra a ka mara la ani a bɔnɛna a ka minanw bɛɛ la. Sanbara ni fani minw tun b’a kaan na, olu dɔrɔn lo tora a fɛ. O kama, a jigi tigɛra. Diinan mɔgɔkɔrɔ dɔ y’a fɔ a ye ko u bena to ka lajɛnw kɛ ale ka mobili kɔnɔ. Kiyoko ko: “Ne, o diinan mɔgɔkɔrɔ n’a muso ani balimamuso wɛrɛ sigira mobili kɔnɔ ka lajɛn kɛ. O lajɛn kɛra cogo nɔgɔman na. Nka, a y’a to n’ hakili bɔra fɔɲɔba nin kɔ pewu fɔɔ ka n’ kabakoya! N’ dusu lafiyara. O lajɛn ye n’ dɛmɛ k’a faamu ko n’an be jɛn n’an balimaw ye, o b’an barika bonya yɛrɛ le!” Balawo dɔ kɛnin kɔ, balimamuso wɛrɛ tagara lajɛnw na ani a y’a fɔ ko: “Lajɛnw ye n’ dɛmɛ ka muɲuli kɛ!”—Ɔrɔm. 1:11, 12; 12:12.

15, 16. a) Korɛnti kerecɛnw ani kerecɛn wɛrɛw ye nafa jumanw lo sɔrɔ sabu u y’u balimaw dɛmɛ? b) An fana be nafa jumanw lo sɔrɔ bi an kɛtɔ k’an balimaw dɛmɛ?

¹⁵ Ciden Pol y’a ɲɛfɔ Korɛnti kerecɛnw ni kerecɛn wɛrɛw bena nafa minw sɔrɔ u kɛtɔ k’u balimaw dɛmɛ. Zeruzalɛmu Yahutu minw tun ye kerecɛnw ye ani u ye dɛmɛ sɔrɔ, a y’a fɔ u koo la ko: “Olu fana bena Ala daali aw ye, ani k’u ka kanuya yira aw la, Ala ka nɛɛma kosɔn, a ye min kɛ aw ye.” (2 Kor. 9:14). Korɛnti kerecɛnw y’u tigɛ labila k’u kerecɛnɲɔgɔn Yahutuw sɔn k’a sɔrɔ u dɔw yɛrɛ tun tɛ Yahutuw ye. O y’a to u kerecɛnɲɔgɔn Yahutuw ye delili kɛ u ye ani u ka kanuya barika bonyana u koo la.

¹⁶ A yirala saan 1946 awirilikalo tile fɔlɔ ka Kɔrɔsili Sangaso la (faransɛkan na) ko Pol ka kumaw ɲɛsinna an ka wagati fana ma. A tun fɔra ko: “Ala ka mɔgɔw cɛma, ni balima dɔw ye dɛmɛ lase balima dɔ wɛrɛw ma, miiri k’a filɛ o b’a to u kaan be bɛn cogo min na.” Minw b’u balimaw dɛmɛ bi, olu b’o nafa lo ye jaatika! Diinan mɔgɔkɔrɔ dɔ ye dɛmɛ lase a balimaw ma sanjiba dɔ kɔ, ani a ko: “N’ kɛtɔ ka n’ balimaw dɛmɛ, o y’a to n’ magwɛrɛla u la kosɔbɛ ka tɛmɛ fɔlɔ kan.” Balimamuso dɔ ye dɛmɛ sɔrɔ ani a y’a ka waleɲumanlɔn yira ko: “Fɛɛn min bɔnin be kosɔbɛ alijɛnɛ ma, o ye an ka balimaya lo ye.”—Talenw 17:17 kalan.

17. a) An be dɛmɛ min lase balawo tuma na, cogo juman na o ɲɛsinna Ezayi 41:13 kɔnɔkumaw ma? b) Misali dɔw fɔ minw b’a yira ko an kɛtɔ k’an balimaw dɛmɛ balawo tuma na, o be nɔɔrɔ la Jehova kan ani k’an ka kelenya sabati. (Koorilen nin fana lajɛ: “ Duniɲa kuru bɛɛ la, balimaw b’u yɛrɛ di ka dɛmɛ lase balawo tuma na.”)

¹⁷ Balima minw be taga dɛmɛ lase, n’olu sera yɔrɔ minw na balawo kɛra, balima kasaratɔw be Ala ka layidu nin  tiɲɛntigiya ye cogo kɛrɛnkɛrɛnnin na: “Ne Masaba le ye aw ka Ala ye, aw bolo be ne bolo. Ne le ko aw ma: ‘Aw kana siran, ne le bena aw dɛmɛ.’ ” (Ezayi 41:13). Balimamuso dɔ kisira balawo dɔ ma ani a ko: “Tiɲɛni min bɛɛ kɛra, tuma min na n’ y’o ye, n’ jigi tigɛra. Nka Jehova ye n’ dɛmɛ. Balimaw ye n’ dɛmɛ cogo min na, o tɛ se ka fɔ.” Dugukolo yɛrɛyɛrɛla yɔrɔ dɔ la ani o kɔ, o yɔrɔ diinan mɔgɔkɔrɔ fila y’a fɔ u ka kafodenw tɔgɔ la ko: “Dugukoloyɛrɛyɛrɛ nin ye tɔɔrɔba lase an ma, nka an y’a ye ko Jehova tɛmɛna an balimaw fɛ k’an dɛmɛ. An tun delila k’a kalan ko balimaw ye dɛmɛ sɔrɔ balawo tuma na yɔrɔ dɔw la. Nka sisan, an yɛrɛ lo ye o dɛmɛ sɔrɔ.”

18. N’i b’a fɛ ka dɛmɛ don balawo tuma na, i be se ka mun lo kɛ do? (Koorilen nin fana lajɛ: “ O y’a ka ɲɛnamaya kɛcogo yɛlɛma pewu!”)

¹⁸ Yala i b’a fɛ k’a lɔn ninsɔndiya min b’a la k’i balimaw dɛmɛ balawo tuma na wa? N’o lo, a to i hakili la ko minw be dɛmɛ don ka Masaya Boonw lɔ, u ka teli k’olu lo sugandi u ka taga balima kasaratɔw dɛmɛ. O la, a fɔ i ka kafo diinan mɔgɔkɔrɔw ye ko i b’a fɛ ka demandi dɔ dafa o koo la. Diinan mɔgɔkɔrɔ dɔ min ka teli ka taga dɛmɛ lase balimaw ma balawo tuma na, ale y’a fɔ ko: “Kɔmite minw be dɛmɛ lase balimaw ma balawo tuma na, kɔnɔni kɛ o kɔmite dɔ ka kaan bɔ i ma fɔlɔ i be sɔrɔ ka taga dɛmɛ don.” O la, koow tɛna kɛ cogo ferekenin na.

19. Minw be balimaw dɛmɛ balawo tuma na, olu b’a yira cogo di ko an ye Krista ka kalanden sɔbɛw ye?

¹⁹ An kɛtɔ k’an balimaw dɛmɛ balawo tuma na, an be Krista ka cikan nin lo sira tagamana cogo ɲuman na: “Aw ka ɲɔgɔn kanu.” O kanuya wale b’a yira ko an ye Krista ka kalanden sɔbɛw lo ye (Zan 13:34, 35). Nɛɛmaba lo an fɛ ka kɛ ni balima caaman ye minw be nɔɔrɔ la Jehova kan! U b’o kɛ, u kɛtɔ k’u yɛrɛ di k’u kerecɛnɲɔgɔnw dɛmɛ ani u be dɛmɛ don Ala ka Masaya ka koow la kantigiya la.