1, 2. (a) Ano nga kabudlayan ang gin-atubang sang mga Cristiano sa Judea? (b) Ano nga buhat sang gugma ang naeksperiensiahan sang mga Cristiano sa Judea?

 MGA 46 C.E. sadto kag may daku nga tiggulutom sa Judea. Ang Judiyo nga mga disipulo sang Cristo wala sing inugbakal sang tuman ka mahal kag diutay lang nga suplay sang uyas. Gutom na sila kag daw wala na sing paglaum. Pero, malapit na lang nila maeksperiensiahan ang proteksion ni Jehova nga wala pa gid anay maagihan sang bisan sin-o nga disipulo sang Cristo sadto. Ano ang matabo?

² Bangod sa kaluoy nila sa Judiyo nga mga Cristiano sa Jerusalem kag Judea, ang Judiyo kag Gentil nga mga Cristiano sa Antioquia sa Siria nagpangolekta sing pondo para sa ila mga masigkatumuluo. Dayon nagpili sila sing duha ka responsable nga utod nga sanday Bernabe kag Saulo sa pagdala sang bulig sa mga gulang sang kongregasyon sa Jerusalem. (Basaha ang Binuhatan 11:27-30; 12:25.) Sigurado nga natandog gid ang mga utod sa Judea sa sining buhat sang gugma nga ginhimo sang ila mga utod sa Antioquia!

3. (a) Paano ang katawhan sang Dios sa moderno nga tion nagailog sa mga Cristiano sadto sa Antioquia? Maghatag sing halimbawa. (Tan-awa man ang kahon nga “ Ang Aton Una nga Masangkad nga Pagbulig sa Moderno nga Tion.”) (b) Ano nga mga pamangkot ang binagbinagon naton sa sini nga kapitulo?

³ Ang natabo sang unang siglo C.E. amo ang una nga narekord nga pagbulig sang mga Cristiano nga nagaistar sa isa ka bahin sang kalibutan sa mga Cristiano sa iban nga bahin sang kalibutan. Ginailog man naton subong ang halimbawa sang aton mga utod sa Antioquia. Kon mahibaluan naton nga may mga masigkatumuluo kita nga gin-agyan sang kalamidad ukon kabudlayan, nagabulig kita. a Para mahangpan naton kon paano ini naangot sa aton ministeryo, binagbinagon naton ang tatlo ka pamangkot: Ngaa ginatamod naton ang pagbulig kon may kalamidad subong bahin sang aton ministeryo? Ano ang katuyuan sini? Paano kita nagabenepisyo sa ministeryo sang pagbulig?

4. Ano ang ginsiling ni Pablo sa mga taga-Corinto parte sa Cristianong ministeryo?

⁴ Sa iya ikaduha nga sulat sa mga taga-Corinto, ginpaathag ni Pablo nga ang ministeryo sang mga Cristiano may duha ka bahin. Bisan pa hinaplas nga mga Cristiano ang iya ginsulatan, ang iya ginsiling naaplikar man sa “iban nga mga karnero” sang Cristo. (Juan 10:16) Ang isa ka bahin sang aton ministeryo, ang  “ministeryo sa pagpasag-uli,” amo ang aton pagbantala kag pagtudlo. (2 Cor. 5:18-20; 1 Tim. 2:3-6) Ang ikaduha amo ang ministeryo nga ginahimo naton para sa aton mga masigkatumuluo. Espesipiko nga ginpatuhuyan ini ni Pablo subong “ministeryo sang pagbulig.” (2 Cor. 8:4) Ang ekspresyon nga “ministeryo sa pagpasag-uli” kag “ministeryo sang pagbulig” pareho nga naggamit sang tinaga nga “ministeryo” nga ginbadbad halin sa Griegong tinaga nga di·a·ko·niʹa. Ano ang ginapahangop sini?

5. Ano ang ginapahangop sang pagtawag ni Pablo sa pagbulig kon may kalamidad subong isa ka ministeryo?

⁵ Paagi sa paggamit sing isa lang ka tinaga sa duha ka hilikuton, ginlakip ni Pablo ang pagbulig kon may kalamidad sa iban pa nga porma sang ministeryo nga ginahimo sang Cristianong kongregasyon. Antes sini nagsiling sia: “May nanuhaytuhay nga ministeryo, apang may isa lang ka Ginuo; kag may nanuhaytuhay nga buluhaton, . . . Apang ini tanan ginahimo sang isa lang ka espiritu.” (1 Cor. 12:4-6, 11) Ang matuod, gin-angot ni Pablo ang nanuhaytuhay nga ministeryo sang kongregasyon sa “sagrado nga pag-alagad.” b (Roma 12:1, 6-8) Indi makatilingala nga para kay Pablo nagakaigo gid nga maghatag sing tion para “mag-alagad sa mga balaan”!—Roma 15:25, 26.

6. (a) Subong sang ginpaathag ni Pablo, ngaa ang pagbulig kon may kalamidad bahin sang aton pagsimba? (b) Ilaragway kon paano karon ginahimo ang pagbulig sa bilog nga kalibutan. (Tan-awa ang kahon nga “ Kon Mag-abot ang Kalamidad!”)

⁶ Ginpaathag ni Pablo sa mga taga-Corinto kon ngaa ang pagbulig kon may kalamidad bahin sang ila ministeryo kag pagsimba kay Jehova. Talupangda ang iya pangatarungan: Ang mga Cristiano nagahatag sing bulig bangod ‘mapinasakupon sila sa maayong balita tuhoy sa Cristo.’ (2 Cor. 9:13) Gani bangod sang ila handum nga iaplikar ang mga panudlo sang Cristo, ginabuligan sang mga Cristiano ang ila mga masigkatumuluo. Ang kaayo nga ila ginhimo para sa ila mga utod, siling ni Pablo, isa gid ka ekspresyon sang “wala tupong nga kaayo sang Dios.” (2 Cor. 9:14; 1 Ped. 4:10) Gani ang Watchtower nga Disiembre 1, 1975, nagkomento parte sa pag-alagad sa aton mga utod nga nagakinahanglan, nga nagalakip sang pagbulig kon may kalamidad. Nagsiling ini: “Indi naton dapat pagduhaduhaan nga importante gid para kay Jehova nga Dios kag sa iya Anak nga si Jesucristo ini nga sahi sang pag-alagad.” Huo, ang pagbulig kon may kalamidad isa gid ka importante nga porma sang sagrado nga pag-alagad.​—Roma 12:1, 7; 2 Cor. 8:7; Heb. 13:16.

7, 8. Ano ang una nga katuyuan sang aton ministeryo sang pagbulig? Ipaathag.

⁷ Ano ang mga katuyuan sang aton ministeryo sang pagbulig? Ginpatalupangod ni Pablo ini nga pamangkot sa iya ikaduha nga sulat sa mga taga-Corinto. (Basaha ang 2 Corinto 9:11-15.) Ginpadaku niya sa sini nga mga bersikulo ang tatlo ka panguna nga katuyuan, ukon tulumuron, nga malab-ot naton sa pagpakigbahin sa “ministeryo sa pag-alagad sa publiko,” nga amo ang pagbulig kon may kalamidad. Isaisahon naton ini.

⁸ Una, ang aton ministeryo sang pagbulig nagahimaya kay Jehova. Sa lima ka bersikulo nga ginkutlo sa ibabaw, talupangda kon daw ano kasunson nga ginpatuhoy ni Pablo ang  igtalupangod sang iya mga utod kay Jehova nga Dios. Ginpahanumdom sila sang apostol parte sa ‘pagpasalamat sa Dios’ kag sa “madamo nga pagpasalamat sa Dios.” (Bersikulo 11, 12) Ginsambit man niya nga bangod sa pagbulig “ginahimaya [sang mga Cristiano] ang Dios” kag ginadayaw ang “wala tupong nga kaayo sang Dios.” (Bersikulo 13, 14) Kag gintapos ni Pablo ang iya pagbinagbinag sa ministeryo sang pagbulig paagi sa pagsiling: “Pasalamatan naton ang Dios.”​—Bersikulo 15; 1 Ped. 4:11.

9. Paano ang aton pagbulig kon may kalamidad makapabag-o sa hunahuna sang iban? Maghatag sing halimbawa.

⁹ Kaangay ni Pablo, ang pagbulig kon may kalamidad ginakabig man sang mga alagad sang Dios karon subong kahigayunan nga mahimaya si Jehova kag mapatahom ang iya panudlo. (1 Cor. 10:31; Tito 2:10) Sa pagkamatuod, may daku gid ini nga papel agod madula ang negatibo nga mga pagpati sang iban parte kay Jehova kag sa iya mga Saksi. Bilang halimbawa: Ang isa ka babayi nga nagaistar sa lugar nga gin-agyan sang bagyo may karatula anay sa iya balay nga nagasiling: “Ginadumilian Diri ang mga Saksi ni Jehova.” Nian isa ka adlaw, nakita niya nga ginakay-o sang mga boluntaryo ang naguba nga balay sa pihak nga karsada. Pila ka adlaw nga ginpanilagan niya ang mga mainabyanon nga nagaulubra didto, kag sang ulihi ginkadtuan niya para hibaluon kon sin-o sila. Sang nahibaluan niya nga mga Saksi ni Jehova gali sila, nagdayaw gid sia kag nagsiling, “Nagsala gid ako parte sa inyo.” Ano ang resulta? Ginkakas niya ang karatula sa iya puertahan.

10, 11. (a) Ano nga mga halimbawa ang nagapakita nga ginalab-ot naton ang ikaduha nga katuyuan sang aton pagbulig? (b) Ano nga publikasyon ang nagabulig sa mga boluntaryo? (Tan-awa ang kahon nga “ Dugang nga Gamit Para sa mga Boluntaryo sa Pagbulig.”)

¹⁰ Ikaduha, ‘ginaaman naton sing maayo ang mga kinahanglanon’ sang aton mga masigkatumuluo. (2 Cor. 9:12a) Gusto gid naton buligan ang aton mga utod nga nagaantos kag mahatag ang ila insigida nga mga kinahanglanon. Ngaa? Bangod ang mga katapo sang Cristianong kongregasyon “isa lang ka lawas,” kag “kon ang isa ka bahin nagaantos, ang tanan nga bahin nagaantos man.” (1 Cor. 12:20, 26) Gani, bangod sang ila utudnon nga pagpalangga kag kaawa, madamo nga kauturan ang nag-untat sang ila ginhimo, nagkuha sang ila kagamitan, kag nagkadto sa mga lugar sang kalamidad para buligan ang ila mga masigkatumuluo. (Sant. 2:15, 16) Halimbawa, pagkatapos sang tsunami sa Japan sang 2011, ang sanga talatapan sa United States nagpadala sing sulat sa mga Regional Building Committee sa United States, nga nagapamangkot kon bala “may pila ka kalipikado nga utod” nga puede magbulig sa pagpatindog liwat sang mga Kingdom Hall didto. Ano ang ila sabat? Sa sulod lang sang pila ka semana, halos 600 ang gusto magbulig—kag nagpasugot nga magkadto sa Japan sa ila kaugalingon nga gasto! “Nakibot gid kami sa ila sabat,” siling sang sanga talatapan sa United States. Sang ginpamangkot sang isa ka utod sa Japan ang isa ka boluntaryo halin sa iban nga pungsod kon ngaa nagkadto sia para magbulig, nagsabat sia: “Ang amon mga utod sa Japan bahin sang ‘amon lawas.’ Nabatyagan namon ang ila kasakit kag pag-antos.” Bangod sang ila masinakripisyuhon nga gugma, ginarisgo pa gani kon kaisa sang mga boluntaryo ang ila kabuhi sa pagbulig sa ila mga masigkatumuluo. c​—1 Juan 3:16.

 ¹¹ May mga indi man Saksi nga nagaapresyar sang aton pagbulig. Halimbawa, sang gin-agyan sang kalamidad ang estado sang Arkansas, U.S.A., sang 2013, ginreport sang pamantalaan ang madasig nga aksion sang mga Saksi nga boluntaryo, paagi sa pagsiling: “Naorganisar gid sang mga Saksi ni Jehova ang ila mga boluntaryo amo nga makapanghikot sila sing maayo kag epektibo kon may kalamidad.” Huo, subong sang ginpatalupangod ni apostol Pablo, ‘nagaaman kita sing maayo’ para sa aton mga utod nga nagakinahanglan.

12-14. (a) Ngaa importante gid nga malab-ot naton ang ikatlo nga katuyuan sang aton pagbulig kon may kalamidad? (b) Ano nga mga komento ang nagapadaku nga importante gid ang pagpadayon liwat sa espirituwal nga mga hilikuton?

¹² Ikatlo, ginabuligan naton ang mga biktima nga makabalik sa ila espirituwal nga rutina. Ngaa importante ini? Si Pablo nagsiling nga ang mga nagabaton sing bulig mapahulag nga maghatag sing “madamo nga pagpasalamat sa Dios.” (2 Cor. 9:12b) May iban pa bala nga paagi nga mapasalamatan sang mga biktima si Jehova sangsa makabalik gilayon tubtob posible sa ila espirituwal nga rutina? (Fil. 1:10) Ang Watchtower sang 1945, nagsiling: “Gin-aprobahan ni Pablo . . . ang pagpangolekta sang amot bangod nagabulig ini . . . sa mga Cristiano sa materyal agod nga makapakigbahin sila sing mas hilway kag mapagsik sa pagpanaksi nga hilikuton ni Jehova.” Amo man gihapon ang aton katuyuan subong. Paagi sa pagpakigbahin liwat sa pagbantala, indi lamang mapalig-on sang aton mga utod ang ila mga kaingod kundi ang ila man kaugalingon.—Basaha ang 2 Corinto 1:3, 4.

¹³ Binagbinaga ang komento sang pila nga nakabaton sing bulig, nakapakigbahin liwat sa ministeryo, kag napabakod. “Pagpakamaayo gid sa amon pamilya ang pagbantala,” siling sang isa ka brother. “Bisan sa makadali nalipatan namon ang amon mga problema samtang ginalugpayan namon ang iban.” Ang isa ka sister nagsiling: “Paagi sa pagpokus sa espirituwal nga hilikuton wala na ako nagkonsentrar sa kagulub-an sang akon palibot. Nakabatyag ako sing seguridad.” Ang isa pa ka sister nagsiling: “Madamo nga butang ang indi naton makontrol, pero ang ministeryo nakahatag sing direksion sa akon pamilya. Ang pagsugid sa iban sang amon paglaum sa bag-ong kalibutan nagpalig-on sang amon pagsalig nga ang tanan nga butang magabag-o sa ulihi.”

¹⁴ Ang pagtambong sa mga miting isa pa ka espirituwal nga hilikuton nga dapat padayunon gilayon sang aton mga utod tubtob posible. Binagbinaga ang natabo kay Kiyoko, isa ka sister nga manug-60 anyos. Pagkatapos sang tsunami, wala gid sing nabilin sa iya luwas lang sa iya bayo kag sandal nga ginasuksok, kag wala na sia makahibalo kon ano ang himuon. Dayon ginsilingan sia sang isa ka gulang nga mahiwat sila sang ila regular nga miting sa iya salakyan. Si Kiyoko nagsiling: “Ang gulang kag ang iya asawa, kag ang isa ka sister kag ako nagpungko sa iya salakyan. Simple lang ang miting, pero daw milagro kay nalipatan ko ang tsunami. Nakabatyag ako sing kalinong sa hunahuna. Ginapakita sini nga miting ang gahom sang Cristianong pagpakig-upod.” Ang isa pa ka sister nga nagtambong sa miting pagkatapos sang  kalamidad, nagkomento: “Nakabulig ini sa akon nga makabatas!”—Roma 1:11, 12; 12:12.

15, 16. (a) Ano nga benepisyo ang mahimo mabaton sang mga Cristiano sa Corinto kag sa iban pa nga lugar bangod sang ila pagbulig? (b) Paano nakabenepisyo ang mga nagaboluntaryo sa pagbulig subong?

¹⁵ Sang ginbinagbinag ni Pablo ang ministeryo sang pagbulig, ginpaathag man niya sa mga taga-Corinto ang mga benepisyo nga mabaton sang mga Cristiano nga nagapakigbahin sa sini. Nagsiling sia: “Lakip ang pag-ampo para sa inyo, ginapahayag nila [ang Judiyo nga mga Cristiano sa Jerusalem nga nakabaton sing bulig] ang ila pagpalangga sa inyo bangod sa wala tupong nga kaayo sang Dios sa inyo.” (2 Cor. 9:14) Huo, ang kaalwan sang mga taga-Corinto magapahulag sa Judiyo nga mga Cristiano nga mangamuyo para sa ila mga utod sa Corinto, lakip ang mga Gentil, kag labi nga magapalangga sa ila.

¹⁶ Gin-aplikar sang Watchtower nga Disiembre 1, 1945, ang ginsambit ni Pablo nga mga benepisyo sang pagbulig subong paagi sa pagsiling: “Kon ang isa ka grupo sang nakadedikar nga katawhan sang Dios mag-amot para sa kinahanglanon sang iban nila nga grupo, hunahunaa ang paghiusa nga mahimo sini!” Amo gid sini ang naeksperiensiahan subong sang mga boluntaryo. “Sa tion sang pagbulig, nabatyagan ko nga nangin mas suod pa gid ako sa akon mga utod,” siling sang gulang nga nagbulig sa mga nabahaan. Ang isa ka sister nga nakabaton sing bulig nagsiling, “Ang aton paghiliutod isa ka sampol sang Paraiso sa duta.”—Basaha ang Hulubaton 17:17.

17. (a) Paano ang Isaias 41:13 naaplikar sa aton pagbulig kon may kalamidad? (b) Magsambit sing pila ka halimbawa sang pagbulig nga nagapadungog kay Jehova kag nagapalig-on sang aton paghiusa. (Tan-awa man ang kahon nga “ Ang mga Boluntaryo Halin sa Bilog nga Kalibutan Nagabulig.”)

 ¹⁷ Kon mag-abot ang mga boluntaryo sa lugar sang kalamidad, nabatyagan gid sang nabiktima nga mga utod ang kamatuoran sang saad sang Dios: “Ako si Jehova nga imo Dios nagauyat sang imo tuo nga kamot, ang Isa nga nagasiling sa imo, ‘Indi ka mahadlok. Buligan ko ikaw.’” (Isa. 41:13) Ang isa ka sister nga nakaluwas nagsiling: “Daw nadulaan ako sing paglaum sang nakita ko ang kagulub-an, pero gin-untay ni Jehova ang iya kamot. Indi ko mapaathag ang bulig nga nabaton ko sa mga kauturan.” Sang gin-agyan sang kalamidad ang ila lugar, ang duha ka gulang nagsulat para sa kongregasyon nga ila ginaalagaran: “Daku nga kasakit ang gindala sang linog, pero naeksperiensiahan namon ang bulig ni Jehova paagi sa aton mga kauturan. Nabasa na namon sadto ang parte sa bulig kon may kalamidad, pero lain gid gali kon maeksperiensiahan mo ini mismo.”

18. Ano ang dapat mo himuon kon gusto mo makigbahin sa pagbulig kon may kalamidad? (Tan-awa man ang kahon nga “ Ginpauswag Sini ang Direksion sang Iya Kabuhi.”)

¹⁸ Gusto mo bala matilawan ang kalipay sa pagbulig kon may kalamidad? Kon amo, dumduma nga ang mga boluntaryo masami ginapili halin sa mga nagatukod sing mga Kingdom Hall. Ihambal sa inyo mga gulang nga luyag mo magpil-ap sang application form. Ang isa ka gulang nga eksperiensiado sa pagbulig kon may kalamidad nagpahanumdom: “Magkadto lang sa lugar nga nahalitan kon may opisyal ka na nga imbitasyon halin sa Disaster Relief Committee.” Sa amo, ang aton pagbulig mangin organisado.

19. Paano ang mga boluntaryo nakabulig sing daku sa pagpamatuod nga mga disipulo gid kita sang Cristo?

¹⁹ Sa pagkamatuod, ang pagbulig kon may kalamidad isa ka talalupangdon nga paagi sa pagtuman sang sugo sang Cristo nga “maghigugmaanay.” Paagi sa pagpakita sini nga gugma, ginapamatud-an naton nga mga disipulo gid kita sang Cristo. (Juan 13:34, 35) Daw ano gid nga pagpakamaayo nga madamo kita sing handa nga mga boluntaryo nga nagapadungog kay Jehova samtang ginabuligan nila ang mga mainunungon nga nagasakdag sa Ginharian sang Dios!