SULA MAR 20
Konyo Joma Oyudo Masira
1, 2. (a) En chandruok mane ma ne omako Jokristo ma ne ni Judea? (b) To nonyisgi hera kod ng’wono e yo mane?
WADOG ane chien nyaka e higa mar 46 e kinde Jokristo mokwongo ka ne kech malich ni Judea. Chiemo ne obedo matin ahinya, kendo Jo-Yahudi ma ne gin jolup Kristo ne ok nyal nyiewo chiemo nikech bech chiemo ne tek. Kech ne kayogi ahinya. Kata kamano, Jehova noyawonegi yor konyruok moro makende. En ang’o ma ne otimore?
2 Ne nitie Jokristo ma ne ni Antiokia e piny Siria ma ne ochoko pesa mondo gikonygo jowetegi ma ne a e alwora mag Jerusalem kod Judea nikech lit kod chandruok ma ne gikaloe. Kae to ne giyiero owete ariyo motegno ma gin Barnaba gi Saulo mondo oter konygo ir jodongo ma ne ni Jerusalem. (Som Tich Joote 11:27-30; 12:25.) Parie apara kaka owete ma Judea nomor nikech hera kod ng’wono ma Jokristo wetegi ma Antiokia nonyisogi!
3. (a) Ere kaka jotich Nyasaye ma kindegi luwo ranyisi mar Jokristo ma Antiokia? Chiw ane ranyisi. (Ne sanduk ma wiye wacho ni “ Konyo Joma Oyudo Masira—Kinde ma ne Okwong Time e Okang’ Malach.”) (b) Gin penjo mage ma wadwaro nono e sulani?
3 Mano e kinde mokwongo ma Jokristo ne ooro ne Jokristo wetegi ma a kuonde mamoko kony. E kindewagi, pod waluwo ranyisi ma Jokristo ma Antiokia noketonwa. Sama wawinjo ni jowetewa ma a kuonde mamoko oyudo masira kata ni gin e chandruok moro, waikore konyogi kinde duto. a Mondo wang’e kaka konyo joma oyudo masira otudore gi tijewa mamoko mag lamo Nyasaye, we wanon ane penjo moko adek e wi tijno: Ang’o momiyo konyo joma oyudo masira en achiel kuom yore mag tiyo ne Nyasaye? Ang’o momiyo wakonyo joma oyudo masira? Gin gueth mage mosiko ma wayudo sama wakonyo joma oyudo masira?
Gimomiyo Konyo Joma Oyudo Masira En Yor Tiyo ne Nyasaye
4. En ang’o ma Jaote Paulo nonyiso Jokristo ma ne ni Korintho e wi tiyo ne Nyasaye?
4 E barua mar ariyo ma jaote Paulo ne ondiko ne Jokristo ma ne ni Korintho, ne olero yore moko ariyo ma Jokristo tiyogo ne Nyasaye. Kata obedo ni nowuoyo gi Jokristo mowal, wachno pod konyo “rombe mamoko” mag Kristo e kindewagi. (Joh. 10:16) Tich mokwongo ma Jokristo timo en ‘tich mar konyo ji loso winjruokgi gi Nyasaye,’ ma en tij lendo kod puonjo ji Muma. (2 Kor. 5:18-20; 1 Tim. 2:3-6) Tich mar ariyo ma gitimo en konyo Jokristo wetegi. Paulo noluongo tijno ni ‘tich mikonyogo joma ler.’ (2 Kor. 8:4) Ka ipimo 2 Jo-Korintho 5:18 kod 8:4, ibiro fwenyo ni e wes ariyogo, oti gi wach mar “tich.” Wach molok ni “tich,” en di a ko niʹa e dho Grik. Ndiko mag Dho-Grik odhi gi di a ko niʹa e wes ariyogo duto. Dibed ni ang’o momiyo oti gi wach achiel e wes ariyogo duto?
5. Ang’o momiyo Paulo nowacho ni konyo joma oyudo masira en achiel kuom tije ma dwarore e kanyakla mar Jokristo?
5 Kuom tiyo gi wach achiel e dho Grik e lero moro ka moro kuom tije ariyogo, Paulo nonyiso ni tich mar konyo joma oyudo masira en achiel kuom tije ma dwarore e kanyakla mar Jokristo. Par ni ka pok nowuoyo e wi wechego, nowacho niya: “Nitie migepe mopogore opogore mag konyo ji, to e ma Ruodhwa pod en achiel, . . . to Nyasaye achiel e ma pod timogi giduto ei ng’ato ka ng’ato.” (1 Kor. 12:4-6, 11) Mano e momiyo Paulo lero ni gik ma watimo mondo wasirgo kanyakla en yor tiyo ne Nyasaye. b (Rumi 12:1, 6-8) Kare e gin Paulo notemo matek mondo ‘oti ne joma ler ka okonyogi’!—Rumi 15:25, 26.
6. (a) Ka luwore gi paro ma Paulo ne nigo, ang’o momiyo wanyalo wacho ni konyo joma oyudo masira en achiel kuom yore mag tiyo ne Nyasaye? (b) Ler ane kaka watimoga tich mar konyo joma oyudo masira e piny ngima. (Ne sanduk ma wiye wacho ni, “ Sama Masira Oneno!”)
6 Paulo nokonyo Jokristo ma Korintho mondo ging’e ni tiyo ne Nyasaye kendo lame oriwo konyo joma oyudo masira. Ne ane paro ma ne en-go: Jokristo ma konyo jowetegi moyudo masira timo kamano nikech ‘gitimo ka luwore gi wach maber ma giyalo e wi Kristo.’ (2 Kor. 9:13) Omiyo, Jokristo konyo jowetegi nikech giketo chunygi kuom luwo puonj mag Kristo. Paulo ne owacho ni gik mabeyo ma Jokristo timo ne jowetegi nyiso ni ‘ng’wono mogundho mar Nyasaye opong’ kuomgi.’ (2 Kor. 9:14; 1 Pet. 4:10) Gaset mar The Watchtower ma Desemba 1, 1975 nowuoyo e wi tich ma Jokristo timo ne jowetegi sama masira oneno. Gasedno nowacho niya: “Onego wabed gadier ni Jehova Nyasaye kaachiel gi Yesu Kristo ogeno ahinya kony ma wakonyogo jowetewa moyudo masira.” Kuom adier, konyo joma oyudo masira en achiel kuom yore mag tiyo ne Nyasaye.—Rumi 12:1, 7; 2 Kor. 8:7; Hib. 13:16.
Gimomiyo Wakonyo Joma Oyudo Masira
7, 8. Achiel kuom gik momiyo wakonyo joma oyudo masira en ang’o? Ler ane.
7 Ang’o momiyo wakonyo jowetewa moyudo masira? Paulo miyowa dwoko mar penjono e barua mar ariyo ma ne ondiko ne Jokristo ma ne ni Korintho. (Som 2 Jo-Korintho 9:11-15.) E wesgo duto, Paulo nyisowa gik moko adek ma wachopo sama watimo “tich mar konyo ji,” ma en konyo joma ochando. We wanon ane moro ka moro kuomgi.
8 Mokwongo, konyo ji miyo Jehova duong’. Ibiro fwenyo ni Jaote Paulo ka ne wuoyo gi Jokristo wetene e ndiko mar Jo-Korintho sula mar 9, notemo konyogi mondo giket pachgi kuom Jehova Nyasaye. E wes mar 11 kod 12, owacho ni gik ma watimo “miyo ji goyo ne Nyasaye erokamano,” kendo ‘miyo ji gundho gi erokamano ne Nyasaye.’ E wes mar 13 kod 14, owacho ni kinda ma Jokristo keto e konyo ji ‘miyo Nyasaye duong’,’ kendo miyo ji herowa nikech “ng’wono mogundho mar Nyasaye mopong’ ahinya kuomwa.” Kosewacho wechego duto, Jaote Paulo tieko e wes mar 15 niya: “Erokamano odhi ne Nyasaye.”—1 Pet. 4:11.
9. Ang’o momiyo wanyalo wacho ni kony ma wakonyogo joma oyudo masira nyalo loko yo ma ji nenowago?
9 Mana kaka Paulo, jotich Jehova ma kindegi bende neno kony ma gikonyogo jowetegi moyudo masira kaka achiel kuom yore mag miyo Jehova duong’, kendo mano nyiso ni waluwo chikene. (1 Kor. 10:31; Tito 2:10) Kiwacho adier, kony ma wakonyogo joma oyudo masira nyaloga miyo joma nigi paro maricho e wi Joneno mag Jehova obed gi paro mowinjore. Be ing’eyo gimomiyo wawacho kamano? Ne ane ranyisini: Nitie dhako moro modak e alwora ma masira mar kodh yamo mager notimoree ma ne ok dwar Joneno ahinya. Nobawo gimoro e dhoode mondik niya: “Ok Wadwar Joneno mag Jehova Kae.” Chieng’ moro noneno ka jomoko konyo e gero ot moro ma ne koth oketho machiegni gi kama ne odakie. Kuom odiechienge moko ka jogo ne tiyo kanyo, nofwenyo ni gin joma oherore ahinya, kendo nodwaro ng’eyo ni jogo ne gin ng’a gini. Bang’ ka ne oseyudo ni gin Joneno mag Jehova, wachno ne omore ahinya mi owacho niya: “Kare asebedoga gi paro marach kuomu, to kare un mana joma beyo!” Be ing’eyo gima dhakono notimo bang’ mano? Nogolo gima ne obawo e dhoodecha.
10, 11. (a) Gin ranyisi mage ma nyiso ni wachiwo gik mabeyo ne Jokristo wetewa moyudo masira? (b) En ang’o moselos ne joma chiwo kony e kinde masira? (Ne sanduk ma wiye wacho ni, “Brosua Molos ne Joma Chiwo Kony Kuonde ma Masira Otimoree.”)
10 Mar ariyo, sama wakonyo ji, mano nyiso ni ‘wachiwo ne joma ler e yo maber.’ (2 Kor. 9:12a) Wagombo ahinya konyo jowetewa sama gidwaro kony, kendo dwokonegi chien pek ma gin-go. Ang’o momiyo? En nikech Jokristo duto ma ni e kanyakla mag Joneno mag Jehova e piny ngima gin “ringruok achiel,” kendo “ka fuoni achiel winjo lit, mamokogo duto winjo lit kanyachiel kode.” (1 Kor. 12:20, 26) Omiyo, hera ma waherogo Jokristo wetewa miyo wayie loko chenrowa, kendo weyo dijewa mondo wadhi wakonygi sama masira oyudogi. (Jak. 2:15, 16) Kuom ranyisi, bang’ ka tsunami moro nosetimore e piny Japan e higa mar 2011, ofis Joneno ma nitie e piny Amerka nooro barua ne Komiti Mochung’ ne Tije Gedo e Alwora ma kono ka gikwayo mondo “owete manok molony” ochiwre mondo gidhi giger Ute Romo ma ne okethore e piny Japan. Ne giyudo dwoko mane? Ji ma hawo 600 nochiwore mondo gikony, kendo ne giyie kata mana chulo pes ndege kigin mondo gidhi e piny Japan! Owete ma ne tayo e ofis ma Amerka nowacho niya: “Yo ma ji ne ochiworego ne omako dhowa ahinya.” Ka ne owadwa moro ma a piny Japan ne openjo achiel kuom owete ma Amerka gimomiyo noyie biro Japan mondo okonygi, owadwano nodwoke niya: “Wan ‘ringruok achiel’ gi owetewa ma Japan. To mano e momiyo wawinjo malit sama giwinjo malit.” Nikech hera matut ma Jokristo nigo, giikorega kata mana tho mondo gires jowetegi. c—1 Joh. 3:16.
11 Joma ok gin Joneno bende mor ahinya gi tich ma watimo mar konyo joma oyudo masira. Kuom ranyisi, bang’ ka masira moro ne osetimore Arkansas e piny Amerka e higa mar 2013, gaset moro nolero kaka Joneno ma ne ochiwore nochopo mapiyo kama masira ne otimoreeno. Gasedno ne owacho kama: “Joneno mag Jehova ochano maber joma chiwore e kinde ma masira oneno, to mano miyo ginyalo chiwo kony ma dwarore e yo mapiyo kaka nyalore.” Adier, mana kaka Paulo nowacho, wachiwo gik mabeyo ne Jokristo wetewa moyudo masira.
12-14. (a) Ang’o momiyo konyo joma oyudo masira mondo gidog e wang’e e weche mag lamo en gima duong’ ahinya? (b) Gin ang’o gini ma jomoko osewacho ma lero gimomiyo bedo modich e weche mag lamo sama masira otimore en gima ber?
12 Mar adek, wakonyo joma oyudo masira mondo gidog e wang’e e weche mag lamo. Ang’o momiyo mano en gima duong’? Jaote Paulo nowacho ni ka wakonyo joma oyudo masira, mano miyo ‘gigundho gi erokamano ne Nyasaye.’ (2 Kor. 9:12b) Donge ber ndi sama waneno ka joma oyudo masira mor kendo goyo ne Jehova erokamano nikech kony ma osekonygigo omiyo gidok e chenro ma ne gin-go mag lamo Jehova? (Fil. 1:10) E higa mar 1945, gaset mar The Watchtower nowacho niya: “Paulo nopwodho . . . chenro mar choko chiwo nikech chiwogo ne konyo . . . Jokristo ma nochando gige ringruok mondo giland wach maber ka gitegno, kendo ka gin gi chuny mokue.” Mano e gimomiyo wan be wakonyo Jokristo wetewa e kindegi. Sama Jokristo wetewa ma oyudo masira onwang’o teko mi gidhi nyime lendo, mano tegogi gin giwegi kod joma gilendonegi.—Som 2 Jo-Korintho 1:3, 4.
13 Nitie Jokristo mang’eny mosekony e kinde masira mi giyudo teko mar dhi nyime lendo kaka yande gitimo. Ne ane gima moko kuomgi osewacho. Owadwa moro nowacho niya: “Joodwa ne mor ahinya dhi e tij lendo kendo, nikech sama ne wahoyo jomamoko, mano ne dwoko parruok ma ne wan-go chien.” Nyaminwa moro to nowacho niya: “Dok e tij Nyasaye nomiyo pacha obedo modich. Koro ne ok asik ka aparo mana masira ma notimore. Mano ne omiyo abedo gi chuny mokue.” Nyaminwa machielo nowacho niya: “Kata obedo ni onge gima ne wanyalo timo mondo walok chal ma ne wantieree, tij lendo nokonyo joodwa ahinya. Sama ne wawuoyo gi jomamoko e wi geno ma wan-go, ne wamedo bedo gadier ni Nyasaye chieng’ nokel piny ma jaber ma onge chandruok moro amora.”
14 Chenro machielo ma dwarore ni Jokristo moyudo masira odogie mapiyo en dhi e chokruoge mag lamo. Ne ane gima ne otimore ne nyaminwa moro miluongo ni Kiyoko ma ne hike hawo 60. Chieng’ moro tsunami notimore e pinygi mi olalo gimoro amora ma ne en-go mak mana opato gi lewni ma ne en-go e dende. Ne okia ni ochak gi kanye. Kae to owadwa moro ma jaduong’-kanyakla ma nigi mtoka ne onyise ni koro ne gidhi timo chokruoge e mtoke. Nyaminwa Kiyoko wacho niya: “Ne wabet e i mtoka ji ang’wen—An, nyaminwa moro, jaduong’-kanyaklano, kod jaode. Kata obedo ni ne wan joma nok kamano, chokruogno nokonya golo pacha kuom tsunami ma ne oa timoreno. Nawinjo ka pacha okue. Chokruogno nokonya neno teko ma riwruok gi Jokristo wetewa nigo.” Nyaminwa moro ma bende ne odhi e chokruok bang’ masira moro nowacho niya: “Chokruok e ma ne okonya nano!”—Rumi 1:11, 12; 12:12.
Konyo Joma oyudo Masira Kelo Gueth Mosiko
15, 16. (a) En ber mane ma Jokristo ma Korintho kod Jokristo mamoko ne nyalo yudo kuom konyo jowetegi mochando? (b) To nade e kindewagi?
15 Ka ne Jaote Paulo ndiko ne Jokristo ma ne ni Korintho e wi wach konyo joma ochando, noleronegi gueth ma joma chiwo kony yudo, kod ma joma ikonyo be yudo. Nowacho niya: “Kuom sayo ma gisayonugo (tiende ni Jokristo ma Jo-Yahudi ma ne a Jerusalem), ginyiso hera ma giherougo nikech ng’wono mogundho mar Nyasaye mopong’ ahinya kuomu.” (2 Kor. 9:14) Ee, kony ma Jokristo ma ne ni Korintho ne dhi oro ne Jokristo ma Jo-Yahudi ne dhi chwalo Jo-Yahudigo mondo olam ne owetegi ma ne ni Korintho kendo gidhi nyime herogi kaachiel gi jowetegi ma ne ok gin Jo-Yahudi.
16 Gaset mar The Watchtower ma Desemba 1, 1945 nolero kaka wanyalo tiyo gi weche ma Paulo nowacho e kindewagi. Gasedno nowacho niya: “Parie apara winjruok ma nyalo bedo e kind jotich Nyasaye sama gikonyo jowetegi mochando!” Mano e gima timorega ne joma konyo e kinde ma masira oneno. Jaduong’-kanyakla moro ma ne osekonyo e kinde ma pi ne oketho kamoro wacho niya: “Konyo jowetewa osemiyo amedo bedo osiepegi ahinya.” Nyaminwa moro ma bende osekonyo jomamoko wacho niya: “Riwruokwa mar owete en gima ber miwuoro. Paradiso mosingnwa kende e ma oloye!”—Som Ngeche 17:17.
17. (a) Chenrowa mar konyo joma oyudo masira chopo nade weche ma ni e ndiko mar Isaiah 41:13? (b) Chiw ane ranyisi moko ma nyiso kaka tijwa mar konyo joma oyudo masira miyo Jehova duong’, kendo tego winjruok ma ni e kindwa. (Ne sanduk ma wiye wacho ni, “ Joma Chiwore e Piny Ngima Mondo Gikony Joma Oyudo Masira.”)
17 Sama owete ma odhi konyo joma oyudo masira ochopo kama masira otimoree, Jokristo wetewa modak kuondego nenoga gi wang’gi kaka weche ma Jehova singo e Isaiah 41:13 timore gadier. Jehova singo e ndikono niya: ‘An Jehova Nyasachi, anamak lweti marachwich kawachoni ni, “We luor, anakonyi.”’ Bang’ ka nyaminwa moro nosetony e masira moro ma ne otimore, nowacho niya: “Chunya nonyosore ahinya nikech masirano ne oketho gik mang’eny, kata kamano, Jehova nomako lweta. Owete nokonya gi kony mokalo awacha.” Bang’ ka yiengni mar piny ne osetimore e alwora moro, jodong-kanyakla moko ariyo ne ochiwo ripot e lo kanyaklagi ka giwacho niya: “Masirano nowewa gi lit mang’eny, kata kamano, Jehova nokonyowa kotiyo gi Jokristo wetewa. Chon ne wasomoga asoma e bugewa kaka owetewa konyoga joma oyudo masira; wang’ni to waneno gi wang’wa!”
In Be Inyalo Chiwori
18. Ang’o minyalo timo kidwaro chiwori konyo kuonde ma masira otimoree? (Ne bende sanduk ma wiye wacho ni, “ Tijno Noloko Kit Ngimane.”)
18 Be diher bilo mor kod gueth ma biro ka ng’ato oriwo lwedo tich mar konyo joma oyudo masira? Ka en kamano, ber king’eyo ni jo migweloga mondo okony e tijno ng’enyne gin joma konyoga e tij gero Ute Romo. Omiyo, nyis jodong-kanyaklau ni diher pong’o fom mar joma chiwore konyo e tij gedo. Jaduong’-kanyakla moro mosekonyo nyading’eny e tij konyo joma oyudo masira chiwo paro niya: “Kik idhi e alwora ma masira otimore ka pok Komiti Makonyo e Kinde Masiche ogweli mondo itim kamano.” Mano miyo tijwa mar konyo joma oyudo masira timore e yo mochanore.
19. Ere kaka owetewa gi nyiminewa mochiwore e konyo joma oyudo masira nyiso ni wan jolup Kristo madier?
19 Kuom adier, achiel kuom yore ma waluwogo chik Kristo ma wacho ni ‘wabed gi hera e kindwa’ en konyo jowetewa moyudo masira. Timo kamano nyiso ni wan jolup Kristo madier. (Joh. 13:34, 35) Wamor ahinya ni wan gi owete gi nyimine mang’eny ma miyo nying Jehova duong’ kokalo kuom kony ma gichiwo sama owetewa momakore gi Pinyruodh Nyasaye oyudo masira. To mano doko gueth!
a Sulani wuoyo ahinya-ahinya e wi kony ma wachiwo ne Jokristo wetewa. Kata kamano, joma ok gin Joneno bende yudoga kony ma kamago kowuok kuomwa.—Gal. 6:10.
b Paulo notiyo gi di·aʹko·nos sama ne owuoyo e wi ‘jokony-tich’ e kanyakla.—1 Tim. 3:12.
c Ne sula ma wiye wacho ni, “Kusaidia Familia Yetu ya Waamini Katika Bosnia,” ma yudore e gaset mar Mnara wa Mlinzi ma Novemba 1, 1994, ite mag 23-27.
