1, 2. (a) Hadia gabula dödö salua ba niha Keriso Yudaia? (b) Hadia waʼomasi nirasoi niha Keriso Yudaia?

 ME LUO daʼö kira-kira 46 M, alua mbaŵa lofo ba Yudaia. Ba daʼö, so ndra nifahaʼö Yesu yaʼia daʼö niha Yehuda si lö sagu wowöli gandru börö me arakhagö ahori, andrö wa ebua mböli. Olofo ira ba oi fagambö-gambö. Hizaʼi, iʼanemai larasoi wolumöʼö Yehowa si lö irai larasoi nifahaʼö Keriso tanö böʼö. Hewisa waö-waönia?

² Börö waʼahakhö dödöra niha Keriso Yehuda ba Yeruzalema hegöi ba Yudaia, laʼowuloi gefe ira niha Yehuda ba si tenga Yehuda si so ba Gandriokhia, Siria. Ba, lafili darua dalifusöda si tola monorogö tödö wolohe fanolo khö ndra satua si so ba Yeruzalema, sotöi Baranaba ba Saulo. (Baso Halöwö Zinenge 11:27-30; 12:25.) Tola takhalaigö dödö ndra talifusöda soʼamböta si so ba Yudaia börö waʼomasi niforomaʼö ndra talifusöda moroi ba Gandriokhia!

3. (a) Hewisa nono mbanua Lowalangi iadaʼa laʼoʼö duma-duma niha Keriso siföföna ba Gandriokhia? Beʼe sambua duma-duma. (Faigi kotak ” Fameʼe Tolo-Tolo Sebua si Oföna ba Ginötö Andre”.) (b) Hadia manö wanofu nifatunöda ba faza daʼa?

³ Daʼa wanolo si oföna tesura nibeʼe niha Keriso khö ndra talifusöra ba soi böʼö. Ba ginötö andre, taʼoʼö duma-duma ndra talifusöda ba Gandriokhia. Tola tabeʼe wanolo na taʼila ndra talifusöda ba mbanua böʼö si göna bencana mazui fanandraigö. a Enaʼö taʼila gamakhaitania wangodödögö fameʼe fanolo ba halöwö faʼalowalangi tanö böʼö, datatutunö tölu ngawalö wanofu sanandrösa ba halöwö fameʼe fanolo: Hana wa taʼamaedolagö ia halöwö faʼalowalangi? Hadia gohitö dödönia? Ba hewisa enaʼö so gunania khöda halöwö daʼa?

4. Hadia niwaʼö Waulo ba niha Korindro sanandrösa ba halöwö faʼalowalangi?

⁴ Ba zura Waulo si mendrua ba niha Korindro, itutunö wa so dombua ngawalö halöwö faʼalowalangi. Hewaʼae itandrösaigö ba niha Keriso si no mubayoini, moguna wehedenia andre ba ”mbiri-biri böʼö” khö Keriso iadaʼa. (Yoh. 10:16) Si oföna ”halöwö fangatulö”, yaʼia daʼö halöwö fanuriaigö ba famahaʼö. (II Kor. 5:18-20; I Tim. 2:3-6) Tanö  böʼönia moʼamakhaita ba halöwö nifaluada khö ndra talifusöda si sara lala wamati. Ifotöi Faulo ’fanolo niha niʼamoniʼö’. (II Kor. 8:4) Ngawua wehede ”halöwö fangatulö” ba ’fanolo niha niʼamoniʼö’, tehalö ia moroi ba li Yunani di·a·ko·niʹa. Hadia niʼoromaʼönia ba daʼa?

5. Hana wa iwaʼö Faulo, fanolo ba waʼaniha andrö sambua halöwö faʼalowalangi?

⁵ Börö me iʼogunaʼö ngawua wehede Yunani ba zi dombua halöwö andrö, ifagölösi Faulo halöwö fanolo ba waʼaniha ba halöwö faʼalowalangi ba mbanua niha Keriso. Fatua lö iwaʼö daʼö, imane, ’Ba no faehu halöwö, ba fagölö Zoʼaya, ba oya ngawalö halöwö, . . . Ba fefu hadia ia zimanö, ba oi eheha si fagölö.’ (I Kor. 12:4-6, 11) Iʼamaedolagö Faulo ngawalö halöwö ba mbanua niha Keriso si no amaedola halöwö ”niʼamoniʼö”. b (Rom. 12:1, 6-8) Aboto ba dödönia wa moguna ibeʼe ginötö tobali ”enoni niʼamoniʼö”!​—Rom. 15:25, 26.

6. (a) Simane nifatunö Waulo, hana wa tobali famosumange Lowalangi wameʼe fanolo ba waʼaniha? (b) Tutunö hewisa wamalua fanolo ba waʼaniha ba zi sagörö ulidanö iadaʼa. (Faigi kotak ” Na Alua Bencana!” ngaʼörö 214.)

⁶ Itolo niha Korindro Faulo enaʼö laʼila hana wa fameʼe fanolo ba waʼaniha moʼamakhaita ba halöwö faʼalowalangi hegöi famosumange Yehowa. Dataʼangeraigö atö: Labeʼe wanolo niha Keriso börö me ’lö laʼosilöʼögö duria somuso dödö andrö khö Keriso’. (II Kor. 9:13) Terou dödö niha Keriso wanolo ira talifusöra ba wamati börö me laʼoʼö wamahaʼö Keriso. Imane Faulo wa amuata nifaluara khö ndra talifusöra no tobali tandra ’waʼebua dödö Lowalangi andrö si no fahöna’. (II Kor. 9:14; I Fet. 4:10) Imane The Watchtower 1 mbaŵa si Felendrua 1975 sanandrösa ba wameʼe fanolo khö ndra talifusöda soʼamböta, ”Lö aombö dödöda me itandrösaigö khöda Lowalangi Yehowa hegöi Ononia Yesu Keriso wa moguna sibai halöwö simane daʼa.” Atulö, fameʼe fanolo ba waʼaniha no sambua halöwö niʼamoniʼö sebua böli.​—Rom. 12:1, 7; II Kor. 8:7; Heb. 13:16.

7, 8. Hadia gohitö dödö si oföna wameʼe fanolo ba waʼaniha? Tutunö.

⁷ Hadia gohitö dödö wameʼe fanolo ba waʼaniha? Ibeʼe Faulo wanema li ba zura si mendrua nibeʼenia ba niha Korindro. (Baso II Korindro 9:11-15.) Ba ayati-ayati daʼa, ifatunö Faulo wa so tölu ngawalö gohitö dödöda si tola takhamö ba ’dolo-tolo andrö ba zato’, eluahania ba wameʼe fanolo ba waʼaniha. Datafaigi ero sambu-sambua.

⁸ Si oföna, halöwö fanolo nibeʼeda tefolakhömi Yehowa. Ba zi lima ngawua ayati moroi yawa, asese idönisi dödö ndra talifusöda Faulo khö Lowalangi Yehowa. Ifasugi ba dödöra sinenge andrö ”wangandrö saohagölö khö Lowalangi” ba ’oya wangandrö saohagölö khö Lowalangi’. (Ayati 11, 12) Ifatunö wameʼe fanolo ba waʼaniha andrö tobali famarou dödö niha Keriso ba ’wanuno Lowalangi’ ba  ʼbörö waʼebua dödö Lowalangi andrö, si no fahöna’. (Ayati 13, 14) Ihalö rahu-rahu Faulo ba zi no mufatunö andre sanandrösa ba wameʼe fanolo ba waʼaniha, imane, ”Nisuno Lowalangi.”​—Ayati 15; I Fet. 4:11.

9. Hewisa wa tola faböʼö wangera-ngera niha börö wanolo nifaluada? Beʼe sambua duma-duma.

⁹ Simane Faulo, laʼila ono mbanua Yehowa ba ginötö andre wa fameʼe fanolo ba waʼaniha, inötö ba wamolakhömi Yehowa ba moturia wamahaʼönia. (I Kor. 10:31; Tit. 2:10) Fangodödögöda wameʼe fanolo zamaböʼöni fangera-ngera niha sanandrösa khö Yehowa hegöi khö ndra Samaduhuʼö. Duma-dumania: Samösa ndra alawe si toröi ba mbanua si göna bade sabölö-bölö, isura ba mbawandruhö nomonia ”Lö Matema Zamaduhuʼö Yehowa”. Samuza inötö, iʼila zohalöwö sameʼe fanolo ba waʼaniha, lafazökhi nomo ba zi tambai lala föna nomonia. Ihaogö inehesi zohalöwö andrö ba zi hauga hari, aefa daʼö möi ia ifalukhaisi. Me iʼila wa yaʼira andrö Samaduhuʼö Yehowa, ahöli-höli dödönia ba imane, ”Sindruhu fasala wangera-ngeragu khömi.” Buania? Iheta zi no isura andrö ba mbawandruhö.

10, 11. (a) Hadia manö duma-duma sangoromaʼö wa no tafalua gohitö dödö si dua ba wameʼe fanolo ba waʼaniha? (b) Hadia publikasi sanolo ira sohalöwö ba wameʼe fanolo ba waʼaniha? (Faigi kotak ” Fakake Onönöta ba Wameʼe Fanolo ba Waʼaniha”.)

¹⁰ Si dua, ’tabönökhi zambö’ khö ndra talifusöda si sara lala wamati. (II Kor. 9:12a) Omasi ita tabönökhi zoguna sabölö aösö enaʼö aoha gabula dödö ndra talifusöda. Hadia mbörö? Yaʼita banua niha Keriso no amaedola zi ”sambua boto” ba ”na so zofökhö ba zi sambua ndroto-ndroto, ba oi afökhö ba ndroto-ndroto fefu”. (I Kor. 12:20, 26) Börö waʼomasi ba faʼahakhö dödö, ato ndra talifusöda sameʼe inötö, lahalö fakake, ba möi ira ba mbanua si göna bencana wanolo ira talifusö si sara lala wamati. (Yak. 2:15, 16) Duma-dumania, me aefa tsunami ba Jepang me 2011, ifaʼoheʼö zura gödo ndraha Amerika Serikat khö Panitia Pembangunan Regional ba Amerika Serikat, lasofu hadia so ”ndra talifusöda sonekhe” somasi manolo ba wamazökhi Balai Mbanua Lowalangi ba daʼö. Hadia nifaluara? Ba zi hauga migu, arakhagö 600 ndra talifusöda samasuraʼö töira ba fao dödöra weʼamöi ba Jepang, labeʼe gefera samösa! Imane gödo ndraha Amerika Serikat, ”Lö maʼila hadia nifaluama saʼae, ato sibai ndra talifusöda zamasuraʼö töira.” Me manofu samösa dalifusöda ba Jepang khö dalifusöda sanolo moroi ba soi böʼö hana wa omasi möi ia, itema li, ”Ira talifusöma ba Jepang andre no amaedola ’mbotoma’. Marasoi waʼafökhö hegöi famakao nitaögöra.” Börö waʼomasi soroi ba dödö, andrö wa latehegö waʼaurira ba wanolo ira talifusöda si sara lala wamati. c—I Yoh. 3:16.

¹¹ Si tenga Samaduhuʼö manö laʼandrö saohagölö me so wanolo moroi khöda. Duma-dumania, me 2013 alua mbade sabölö-bölö ba negara bagian Arkansas, AS. So koran  zangombakha hewisa waʼalio ndra Samaduhuʼö Yehowa ba wameʼe fanolo imane, ”No lafaudugö halöwöra ira Samaduhuʼö Yehowa ba wanolo niha si göna abula dödö börö me no toʼölö ba tefaudu wamaluara.” Simane niwaʼö Waulo, no ’tabönökhi’ zoguna khö ndra talifusöda.

12-14. (a) Hana wa moguna tafalua gohitö dödö si tölu ba halöwö fameʼe fanolo ba waʼaniha? (b) Hadia manö niwaʼö ndra talifusöda sangoromaʼö wa tebai taböhöli wamalua halöwö wamati?

¹² Si tölu, tatolo niha si göna abula dödö enaʼö lafuli lafalua halöwö wamati. Hana wa moguna daʼa? Imane Faulo wa niha sanemaʼö fanolo tola terou dödöra ”wangandrö saohagölö khö Lowalangi”. (II Kor. 9:12b) Hadia tenga lala si sökhi daʼa ba niha si göna abula dödö, mangawuli ira ba wamalua halöwö wamati, tandra wa laʼandrö saohagölö khö Yehowa? (Fil. 1:10) Me 1945, imane The Watchtower, ”Fao dödö Waulo . . . ba wangowuloi tolo-tolo börö me daʼö zi möi fanolo . . . khö ndra talifusöda niha Keriso soʼamböta enaʼö omuso dödöra ba zoguna khöra ba lö si tobali taha-tahara wamalua halöwö khö Yehowa si fao faʼomuso dödö.” Fagölö gohitö dödöda iadaʼa. Na lafalua mangawuli halöwö fanuriaigö, tenga ha aro ndra talifusöda si göna abula dödö, tobali aro göi wamati ndra talifusöda sanolo yaʼira.​—Baso II Korindro 1:3, 4.

¹³ Faigi hadia niwaʼö niha sanema fanolo, lafuli manuriaigö, ba teʼaʼaroʼö ira wamalua daʼö. Imane talifusöda ira matua, ”No sambua howu-howu ba nösi nomoma na möiga manuriaigö. Lö aombö dödöma zalua khöma börö me mabeʼe wondrara dödö ba niha.” Imane göi talifusöda ira alawe, ”Lö uböhöli wangosambuaʼö tödögu ba wamalua halöwö famati ba lö mangoloi dödögu börö zalua ba zi fasui yaʼo. Daʼa zameʼe khögu faʼahono dödö.” Imane talifusöda ira alawe böʼö, ”Oya zi tebai tafalua ba waʼauri andre, tobali halöwö fanuriaigö zameʼe fanuturu lala ba nösi nomogu. Na ufatunö ba niha gulidanö si bohou, daʼö zameʼe khögu faʼafaduhu dödö wa fefu hadia ia oi tebohouni.”

¹⁴ Halöwö wamati tanö böʼö sinangea larasoi ira talifusöda si göna abula dödö yaʼia daʼö feʼamöi ba gangowuloa. Faigi zalua khö Kiyoko, talifusöda ira alawe sarakhagö 50-an ndröfinia me luo daʼö. Me alua tsunami, taya fefu gokhötania, ha baru ba sandrala nifakenia zi toröi ba lö iʼila hadia zalua ba waʼaurinia. Aefa daʼö, samösa zatua sokubaloi sangombakha khönia wa lafalua gangowuloa ba moto zatua sokubaloi. Imane Kiyoko, ”Satua sokubaloi daʼö, foʼomonia, yaʼo, ba samösa dalifusöda tanö böʼö sodadao ba moto. Öna-öna sibai gangowuloa nifaluama hulö dandra sahöli-höli dödö, taya ba wangera-ngerama tsunami. Ahono dödögu. Angowuloa daʼa zangoromaʼö wa mofaʼabölö wahasara dödö niha Keriso.” Imane talifusöda  böʼö si no mangondrasi angowuloa me no aefa bencana, ”Angowuloa-angowuloa daʼö böbö fangorifi khögu!”​—Rom. 1:11, 12; 12:12.

15, 16. (a) Hadia mbua nitema niha Keriso ba Gorindro hegöi ba nahia böʼö me no latuhini wameʼe fanolo ba waʼaniha? (b) Hewisa wa moguna khöda wameʼe fanolo ba waʼaniha iadaʼa?

¹⁵ Sanandrösa ba wameʼe fanolo andrö, itutunö Faulo ba niha Korindro hadia gunania khöra hegöi ba niha Keriso tanö böʼö na fao ira ba halöwö andre. Imane, ”Ba ba wangandröra, salahimi, [niha Keriso Yehuda ba Yeruzalema si no manema fanolo] me no humulu dödöra khömi, börö waʼebua dödö Lowalangi andrö khömi, si no fahöna.” (II Kor. 9:14) Faʼoböwö niha Korindro daʼö zamarou tödö niha Keriso Yehuda ba wangandrö salahi ndra talifusöda si so ba Gorindro hegöi niha si tenga Yehuda enaʼö itugu monönö waʼomasi ba gotaluara.

¹⁶ Iʼombakhaʼö The Watchtower 1 mbaŵa si Felendrua 1945 gunania wameʼe fanolo ba ginötöda andre, imane, ”Na so ösa nono mbanua Lowalangi zameʼe fanolo khö ndra talifusöra soʼamböta, angeraigö lua-luania ba wahasara dödö!” Daʼö nirasoi zameʼe fanolo ba waʼaniha ba ginötö andre. Imane talifusöda satua sokubaloi sanolo niha si göna molö, ”Itugu fahuwu ndraʼo khö ndra talifusöda börö me utolo ira.” Imane göi talifusöda ira alawe sangandrö saohagölö me no itema wanolo, ”Fakhili-khili sibai waʼafatalifusötada ba gulidanö Faradaiso.”​—Baso Gamaedola 17:17.

17. (a) Hewisa ngawua wehede ba Yesaya 41:13 moguna ba halöwö fanolo ba waʼaniha? (b) Tötöi duma-duma halöwö wameʼe fanolo ba waʼaniha tobali famolakhömi Yehowa ba möi fangaʼaro waʼafatalifusötada. (Faigi kotak ” Sohalöwö ba zi Sagörö Ulidanö Laʼasogö Waʼohahau Dödö”.)

 ¹⁷ Me tohare zameʼe fanolo ba mbanua si göna bencana, larasoi ira talifusöda si göna abula dödö wa sindruhu nifabuʼu Lowalangi, ”Yaʼodo saʼae, Yehowa, Lowalangimö andrö zololohe kambölöu, yaʼodo andre, sangumaʼö khöu: Böi busi dödöu, utoloʼö!” (Yes. 41:13) Imane talifusöda ira alawe si no teʼefaʼö ba bencana andrö, ”Atata dölagu wamaigi si tekiko, hizaʼi iʼoroʼö dangania Yehowa. Fanolo nibeʼe ndra talifusöda khögu lö uʼila ututunö faoma fehede.” Me alua bencana sabölö-bölö ba daʼö, darua zatua sokubaloi zanura sura sanandrösa ba mbanua niha Keriso nikubaloira, ”Duru danö andre sindruhu möi fangabu dödö, hizaʼi marasoi wanolo Yehowa moroi khö ndra talifusöda. No irai mabaso hewisa wameʼe fanolo, na iadaʼa no maʼila samösa.”

18. Hadia zinangea öfalua na omasi ndraʼugö fao ba halöwö wameʼe fanolo ba waʼaniha? (Faigi kotak ” Daʼö Zotatugöi Lala Waʼaurinia”.)

¹⁸ Hadia omasiʼö örasoi waʼomuso dödö ba wameʼe fanolo? Törö tödöu, ha ira talifusöda sohalöwö ba wamazökhi Balai Mbanua Lowalangi awai zi toʼölönia nifili. Ombakhaʼö khö zatua sokubaloi wa omasiʼö öfoʼösi formulir permohonan. Samösa zatua sokubaloi si no toʼölö ba halöwö andrö ibeʼe wamasugi ba dödö, ”Aeʼe ba nahia si göna bencana na no ötema zura resmi moroi khö Panitia Penanggulangan Bencana.” Na simanö, fangodödögö ba wameʼeda fanolo lö fawuka.

19. Hewisa halöwö wameʼe fanolo ba waʼaniha möi fangombakha wa sindruhu nifahaʼö Keriso ita?

¹⁹ Fameʼe fanolo no sambua lala sahöli-höli dödöda ba woloʼö fareta Yesu enaʼö ’faoma taʼomasiʼö nawöda’. Na tafalua waʼomasi, daʼö zangoromaʼö wa sindruhu nifahaʼö Keriso ita. (Yoh. 13:34, 35) Sindruhu wa ebua howu-howu nitemada iadaʼa börö me ato zameʼe inötöra wangai halöwö samolakhömi Yehowa, ba latolo göi niha si lö faröi ba wotuhini Banua Lowalangi!