1, 2. (a) Ndikyenga kinyi dibaadi nadyo beena Kidishitu ba mu Yuudeya? (b) Nkikitshino kinyi akilesha kifulo kibaadi beena Kidishitu ba mu Yuudeya bapete?

TWI pepi mu kipwa kya 46 kunyima kwa Yesu Kidishitu (B.B.), na Yuudeya e mu nsala i bukopo. Balongi ba Kidishitu beena Yuuda abaadi mwanka tabe na mushindo wa kuula bidibwa mwanda mbipeela na bi muulo ukile bukopo. Be na nsala ikile bukopo. Anka binobino abakyebe kumona bulami bwa mboko ya Yehowa mu mushindo ushibaadi mulongi su ngumune a Kidishitu mumone kala. Nkinyi akikyebe kukitshika?

² Pa mwanda wa makyenga abaadi nao beena Kidishitu beena Yuuda ba mu Yeelusaleme na mu Yuudeya, beena Kidishitu beena Yuuda na bashii beena Yuuda ba mu Antioshe, mu Sirii, bababungile makuta bwa kutumina beena Kidishitu nabo. Akupu abo nkusangula bakwetu balume babidi balombane, Barnabase na Saule, bwabadya kutwala bukwashi kwi bakulu ba mu kakongye ka mu Yeelusaleme. (Badika Bikitshino 11:27-30; 12:25.) Banda kupwandikisha muloo ubaadi ulombeene kwikala nao bakwetu ba mu Yuudeya pa mwanda wa kino kikitshino kya bakwabo ba mu Antioshe akilesha kifulo!

3. (a) Bafubi b’Efile Mukulu bakwete kulonda kileshesho kya beena Kidishitu ba kumpala ba mu Antioshe naminyi lelo? Tuusha kileshesho. (Tala dingi kashibo akamba shi: “ Musango wetu wa kumpala wa kukwasha bantu bebungi bapete masaku mu ano mafuku.”) (b) Nkonko kinyi y’atukyebe kutaluula mu uno shapitre?

³ Wawa mwanda ubakitshikile mu siekele a kumpala B.B., nyi mwanda wa kumpala aulesha beena Kidishitu ba kwiumbo kampanda abatumina beena Kidishintu be ku dingi eumbo bukwashi. Lelo uno tukwete kulonda kileshesho kya bakwetu ba mu Antioshe. Nsaa y’atupusha shi beena Kidishitu netu be ku mbalo kampanda abapete masaku sunga shi be mu dikyenga, atwendaa mu kwibakwasha. * Bwa kupusha mushindo wi buno bukwashi mbutale ingi midimo yetu, tubande kutaluula ino nkonko isatu itale mudimo wa kutuma bukwashi: Bwakinyi atumonaa kukwasha bantu bapete masaku bu mudimo wetu? Mudimo wetu wa kukwasha bantu bapete masaku wi na mpàngo kinyi? Miloo kinyi y’atupete ku mudimo wa kukwasha bantu bapete masaku?

4. Mpoolo balungwile beena Kodinto naminyi pabitale mudimo wa beena Kidishitu?

⁴ Mu mukanda waaye ubaadi mufundjile beena Kodinto, Mpoolo baadi mupatuule shi beena Kidishitu be na midimo ibidi. Sunga byekala shi mukanda wa Mpoolo baadi mwiufundjile penda beena Kidishitu bedibwe mwimu, lelo uno mayi aaye ngatale  mpa na “ingi mikooko.” (Yo. 10:16) Kipindji kimune kya ku mudimo wetu nyi “mudimo wa kulombasheena,” bino mbitale, mudimo wetu wa bulungudi na wa kulongyesha. (2 Kod. 5:18-20; 1 Tim. 2:3-6) Kingi kipindji nkitale mudimo watukwete kukitshina beena Kidishitu netu. Mpoolo baadi akula bikishekishe pabitale “mufubo wa kutuusha bintu bya kukwasha nabyo.” (2 Kod. 8:4) Bishima “mufubo wa kulombasheena” na “mufubo wa kutuusha bintu bya kukwasha nabyo,” byooso abituukila ku kishima kya mu ki na Greke kyabetamina bu di·a·ko·niʹa. Bwakinyi kipatulwilo kyakyo ki na muulo?

5. Bwakinyi Mpoolo baadi amono mudimo wa kukwasha bantu bu mudimo wiselele?

⁵ Nsaa ibaadi muteemune kishima kimune bwa ino midimo yooso, Mpoolo baadi mubungye mudimo wa kukwasha bantu be mu masaku na ungi mudimo ubaadi aukitshika mu kakongye ka beena Kidishitu. Ku mbangilo baadi muleshe shi: “Mifubo ngilekeene, anka Mwanana afubilwa ngumune; nfubilo ngiilekeene, . . . Anka byabya byooso nkikudi kimune’nka akibitushaa.” (1 Kod. 12:4-6, 11) Byabya, Mpoolo baadi apwandikisha midimo ya beena kakongye na “mudimo wiselele.” * (Lom. 12:1, 6-8, NW) Kushi mpaka, baadi mupushe shi bibaadi buuwa bwadya kukisha nsaa yaaye mu “kufubila bantu beselele”!​—Lom. 15:25, 26, NW.

6. (a) Muyiile bibaadi Mpoolo mupatuule, bwakinyi mudimo wa kukwasha bantu bapete masaku nkipindji kya mu lulangwilo lwetu? (b) Lesha mushindo ukwete kukitshika mudimo wetu wa kukwasha bantu bapete masaku mu nsenga ishima lelo. (Tala kashibo akamba shi “ Apatuuku masaku!”)

⁶ Mpoolo baadi mukwashe beena Kodinto bwabadya kumona shi mudimo wa kukwasha bantu be mu masaku wi na muulo mu mudimo wabo na lulangwilo lwabo lwa Yehowa. Pusha bibaadi binangu byaaye: Beena Kidishitu abatuusha bukwashi abakitshi byabya mwanda bakwete “kukookyela . . . ku mukandu wibuwa wa Kidishitu.” (2 Kod. 9:13) Byabya, pa mwanda wa lukalo lwabo lwa kulonda malongyesha a Kidishitu, beena Kidishitu bakwete kukwasha bakwabo. Mpoolo alesha shi, myanda yabakwete kukitshina bakwabo, ayilesha binyibinyi “mwabi ukata . . . w’Efile Mukulu.” (2 Kod. 9:14; 1 Mp. 4:10) Kitenta kya Mulami kya mu 1/12/1975 kibaadi kyakule bino pabitale mudimo wa kukwasha bakwetu bakwete kukyenga, mpa na, mudimo wa kukwasha bantu bapete masaku shi: “Atushinkamisha binyibinyi shi, Yehowa Efile Mukulu na Mwan’aaye Yesu Kidishitu abateyaa uno mudimo na muulo ukata.” Eyendo, mudimo wa kukwasha bantu bapete masaku ngumune wa ku midimo iselele.​—Lom. 12:1, 7; 2 Kod. 8:7; Eb. 13:16.

7, 8. Mudimo wa kukwasha bantu bapete masaku wi na mpàngo kinyi ya kumpala? Patuula.

⁷ Mudimo wetu wa kukwasha bantu bapete masaku wi na mpàngo kinyi? Mpoolo aluula luno lukonko mu mukanda waaye wa kabidi kwi beena Kodinto. (Badika 2 Beena-Kodinda 9:11-15.) Mu ano maverse, Mpoolo alesha patooka myanda isatu ayilesha mpàngo yatudi nayo mu “mufubo . . . wa lupungo,” mudimo wa kukwasha bantu bapete masaku. Tubande kutala yanka umune ku umune.

⁸ Kya kumpala, mudimo wetu wa kukwasha bantu bapete masaku autumbisha Yehowa. Tala misusa bungi i Mpoolo mu ano maverse atano atakula binangu bya bakwabo kwi Yehowa Efile mukulu. Mutumibwa akula pabitale ‘kutumbishisha . . . Efile  Mukulu” na “kufiimisha dimo ntumbo y’Efile Mukulu.” (Verse 11, 12) Alesha mushindo wi kukwasha bantu bapete masaku ‘akutumbisha Efile Mukulu’ na kusangeela “mwabi ukata . . . w’Efile Mukulu.” (Verse 13, 14) Mpoolo afudiisha mwisambo waaye pabitale mudimo wa kukwasha bantu bapete masaku shi: “Efile Mukulu atumbishiibwe.”​—Verse 15; 1 Mp. 4:11.

9. Mudimo wa kukwasha bantu bapete masaku aushintuula binangu bya bantu naminyi? Tuusha kileshesho.

⁹ Anka bu Mpoolo, bafubi b’Efile Mukulu lelo uno abamonaa mudimo wa kukwasha bantu bapete masaku bu mushindo wa kutumbisha Yehowa na kulongamisha malongyesha aaye. (1 Kod. 10:31; Tt. 2:10) Byabya, mudimo wa kukwasha bantu bapete masaku misusa ibungi wi na bukwashi bukata mu kukatusha binangu bibubi mu mitwe ya bantu pabitale Batemwe ba Yehowa. Twate kileshesho: Ungi mukashi baadi mushaale mu mbalo ibaabadi balwishe kwi kipapi kikata, baadi mufunde ku kibelo kyaaye shi: “Temwe a Yehowa tatwelanga.” Akupu dingi efuku bamwene bafubi abakwasha bantu bapete masaku abalumbuula mashibo aekalanga alwishibwe pepi n’eshinda dya kwaaye. Baadi atala munda mwa mafuku ebungi baaba be na mufubo be mu buumune, kunyima aye nkwisesela pepi bwa kuuka shi mbantu kinyi. Pabapushishe shi bano bantu bepaane, mBatemwe ba Yehowa, baadi mukanye ngofu aye nkwamba shi: “Nenwelelanga binangu bibubi.” Nkinyi kibaadi kikitshikye kunyima? Bakatwishe kantu kabaadi mufunde ku kibelo kyaaye.

10, 11. (a) Mbileshesho kinyi abilesha shi twi mu kipindji kyetu kya kabidi kya mpàngo ya mudimo wa kukwasha bantu bapete masaku? (b) Mukanda kinyi aukwashaa bafubi ba mu mudimo wa kukwasha bantu bapete masaku? (Tala kashibo akamba shi: “ Broshire a baaba abakitshi mudimo wa kukwasha bantu bapete masaku.”)

¹⁰ Kya kabidi, atutusha “bukwashi” kwi bakwetu beena Kidishitu. (2 Kod. 9:12a) Twi na lukalo lukata lwa kukimba bukwashi bulombane bwa kupudisha nkalo ya bakwetu balume na bakashi. Bwakinyi? Mwanda be mu Kakongye ka beena Kidishitu mbakite ‘mbidi imunenka,’ na “su kipindji kampanda akikumbu, bingi byooso abikumbu nakyo pamune.” (1 Kod. 12:20, 26) Byabya, kifulo na lusa lwa bu kifuko alutakula bakwetu bebungi balume na bakashi lelo uno bwa kubunga bintu byabo mususa umune, na kwenda mu kukwasha beena Kidishitu nabo. (Shak. 2:15, 16) Bu kileshesho, kunyima kwa kipapi kikata kyabetamina bu tsunami mu Japon mu 2011, filiale a mu États-Unis batumine mukanda ku Komitee a kwibaka mashibo mu États-Unis bwa kuteka su kwi “ndambo ya bakwetu balume abauku mudimo” balombeene kwenda mu kukwasha bwa kwibakuula Mashibo a Bufumu mu Japon. Lwalulo lubaadi naminyi? Mu lubingo lumune, bantu pepi 600 balume na bakashi abaadi bepaane bwa kufuta ndekye na makuta aabo bwa kwenda mu Japon! Ku filiale a mu États-Unis abalesha shi: “Lwalulo lubaadi lwitukanyishe ngofu. Ungi Temwe a mu Japon pabaadi mwipushe mukwetu baadi mufikye kula bwa kukwasha kimutakule bwa kufika, yawa mukwetu balulwile shi: “Bakwetu ba mu Japon nkipindji kimune kya ku bipindji bya ‘mbidi yetu.’ Tukwete kupusha malwa na makyenga aabo.” Pa mwanda wa kifulo kikata, bakwetu abafubu bwa kukwasha bantu bapete masaku ingi nsaa mbashimishe mpa na muwa waabo bwa kukwasha beena Kidishitu nabo. *​—1 Yo. 3:16.

¹¹ Mpa na bantu bashi Batemwe abasangelaa mudimo wetu wa kukwasha bantu bapete masaku. Bu kileshesho, kunyima kwa  masaku abaadi akwate kibundji kya Arkansas, mu États-Unis, mu 2013, ungi jurnale baadi mwakule pabitale Batemwe abafikile mususa umune mu kukwasha shi: “Batemwe ba Yehowa mbalumbuule bantu baabo abepaana bwa kukwasha mu mushindo wabadi balombeene kukwasha kalolo nsaa ayituuku masaku.” Eyendo, anka bibambile Mpoolo mutumibwa shi, atutuusha “bukwashi” kwi bakwetu be mu makyenga.

12-14. (a) Bwakinyi mpàngo ya kasatu ya mudimo wetu wa kukwasha bantu bapete masaku i na muulo? (b) Mbishima kinyi abilesha muulo wa kutungunuka na midimo ya mu kikudi?

¹² Kya kasatu, atukwasha bantu be mu mpombo bwabadya kwalukiila mu mudimo wabo wa mu kikudi. Bwakinyi bino bi na muulo? Mpoolo alesha shi baaba abapete bukwashi abekala na lukalo lwa “kufiimisha dimo ntumbo y’Efile Mukulu.” (2 Kod. 9:12b) Uno ta mushindo ukile buwa wa kumona bantu be mu mpombo abalesha lutumbu kwi Yehowa na kwalukila mu mudimo wabo wa mu kikudi mususa umune su? (Fid. 1:10) Kitenta kya Mulami kya mu 1945 kibaadi akilesha shi: “Mpoolo baadi mukumiine . . . lupungo lwa milambu mwanda ibaadi kwanka . . . bwa kukwasha bakwabo beena Kidishitu bwabadya kupeta bukwashi bwa bintu na bwa kwikala na mushindo wa kwipaana ngofu mu mudimo wa Batemwe ba Yehowa.” Twi na mpàngo imune lelo. Nsaa y’abalukiila mu mudimo wa bulungudi, bakwetu t’abanyingisha penda bakwabo be mu mpombo nya abenyingisha mpa na abo banabeene.​—Badika 2 Beena-Kodinda 1:3, 4.

¹³ Banda kutala abyamba bangi abaadi bapete bukwashi bwibungi mu nsaa ibaabadi bapete masaku, abo nkubanguula mudimo wa bulungudi, na abanyingile bwa kukita byabya, ungi mukwetu mulume alesha shi: “Kwenda mu mudimo wa bulungudi kubaadi bu mwabi ukata.” Ungi mukwetu mukashi alesha shi: “Kwenda mu bulungudi kubaadi kubatshikye mashimba etu bwa kupela kutuula binangu byetu ku nkalakasho yetu pabaatudi atukwasha bangi.” Mungi mukwetu mukashi alesha shi: “Kutuula binangu ku mudimo wa mu kikudi akunkatusha binangu ku kafutakanyi ke pepi nami. Nkungikashe mu kwiyikeela.” Ungi mukwetu mukashi dingi alesha shi: “Nsaa ibaadi myanda ibungi ayimweneka bukopo kwatudi, mudimo wa bulungudi ngwitukunkushe mu kifuko kyande. Kwisamba na bangi pabitale lukulupilo lwetu lwa ndumbulwilo mupya nkunyingishe lukumiino lwetu lwa shi, bintu byooso abakebiikasha bipya.”

¹⁴ Kingi kintu kya mu kikudi akitungu shi bakwetu beena Kidishitu babanguule bukidibukidi, nkutwela kwa mu bisangilo. Banda kutala bibaadi bikitshikile Kiyoko ungi mukwetu mukashi e na bipwa pepi 60. Kunyima kwa kushimisha bintu bibungi ku kipapi kikata kyabetamina bu tsunami bashadile penda na bilamba na bidyato bibaadi mufwale, tabaadi auku mushindo wa kupeta bukwashi nya. Akupu, mukulu umune mu kakongye nkumulungula shi mbalombeene kwikala abakitshiina bisangilo mu mootoka waye. Kiyoko alesha shi: “Ami na ungi mukulu na mukashi aaye na bangi bakwetu bakashi tubashaleele mu mootoka. Bisangilo bibaadi bipelepele, kadi mwanda wa kukanya, binangu bya tsunami bibaadi bishimine mu mutwe mwande. Napushishe kufukama mu binangu mwande. Byabya bisangilo bibaadi bindeeshe  bukome bwa kwikala munkatshi mwa beena Kidishitu.” Pabaadi akula pabitale bisangilo bibaadi mutwele kunyima kwa masaku abaadi atukye, ungi mukwetu mukashi amba shi: “Bibaadi binkwashe bwa kunyingiila!”​—Lom. 1:11, 12; 12:12.

15, 16. (a) Myabi kinyi ibaadi ilombeene kupeta beena Kidishitu ba mu Kodinto na bangi ku mudimo wa kukwasha bantu bapete masaku? (b) Mushindo kinyi watukwete kupeta myabi i byabya ku mudimo wa kukwasha bantu bapete masaku lelo uno?

¹⁵ Pabaadi akula pabitale mudimo wa kukwasha bantu bapete masaku, Mpoolo dingi baadi mupatulwile beena Kodinto myabi yabadi balombeene kupeta na bangi beena Kidishitu mu kukita kwa uno mudimo. Bambile shi: “Mu kwinutekyela, kwabo [beena Kidishitu beena Yuuda ba mu Yeelusaleme abaadi bapete bukwashi] abeenuleesha kifulo kyabo, bwa mwabi ukata winwelel’Efile Mukulu.” (2 Kod. 9:14) Eyendo, kalolo ka beena Kodinto kabaadi kalombeene kutakula beena Kidishitu beena Yuuda bwabadya kwela nteko bwa bakwabo ba ku Kodinto, mpa na bashi beena Yuuda, na kabaadi kalombeene kunyingisha kifulo kyabo bwabo.

¹⁶ Kitenta kya Mulami kya mu 1/12/1945 kibaadi kileshe bino pabitale bishima bya Mpoolo bwa miloo ayituuku mu mudimo wa kukwasha bantu bapete masaku lelo uno shi: “Nsaa i kisaka kimune kya bantu b’Efile Mukulu bepaane kwadi abatuusha bya buntu bwa kukwasha kingi kisaka kyabo, mbilombeene kwibekasha mu buumune ngofu!” Byabya ndjo bikwete kumona booso abafubu mu mudimo wa kukwasha bantu bapete masaku. Ungi mukulu baadi akwasha mu wawa mudimo alesha shi: “Kukita mudimo wa kukwasha bantu be mu masaku nkunkwashe bwa kwifubwila pepi ngofu na bakwetu kukila kumpala.” Ungi mukwetu mukashi baadi mupete bukwashi alesha shi: “Bakwetu batudi nabo, nkintu  kimune kikata kyatudi nakyo bwa kwikala mu Mpaladiiso pa nsenga.”​—Badika Nkindji 17:17.

17. (a) Mushindo kinyi wi mayi e mu Yeeshaya 41:13 ngatale mudimo wa kukwasha bantu bapete masaku? (b) Tuusha bingi bileshesho bya mushindo wi mudimo wa kukwasha bantu bapete masaku autumbisha Yehowa na kunyingisha buumune bwetu. (Tala dingi kashibo akamba shi: “ Bantu ba mu nsenga ishima bepaane bwa kukwasha mu mbalo i bantu bapete masaku.”)

¹⁷ Nsaa ayifiki bantu mu kukwasha pa mbalo ayikalanga masaku, bakwetu be mu mpombo abamono binyibinyi mulayilo w’Efile Mukulu wa’shi: “Ami Yehowa ne Efile Mukulu oobe, ne mukukwate kw’eyasa dyoobe dilume naakulungula’shi: ‘Totshinanga, nnami akukwasha.’” (Yesh. 41:13) Kunyima kwa kupanda ku masaku, ungi mukwetu mukashi bambile shi: “Panamwene bilwile bintu, ntshinaadi na lukulupilo dingi nya, kadi Yehowa baadi mwibweshe mboko yaaye. Napetele bukwashi bukile bungi kwi bakwetu.” Kunyima kwa masaku abaadi ebakwate mu mbalo yaabo, bakulu babidi abafundjile mukanda mwishina dya tukongye twa mu teritware aabo shi: “Kutshinkatshinka kwa nsenga nkufwishe mpombo ikata, kadi twi bamone bukwashi bwabadi betupe kwi Yehowa kukidila kwi bakwetu. Tubaadi atubadika myanda itale mudimo wa bukwashi, kadi bwa binobino tukwete kwibwimwena.”

18. We mulombeene kukita kinyi su okumina kukita mudimo wa kukwasha bantu bapete masaku? (Tala dingi kashibo akamba shi: “ Ngulumbuule nshalelo aaye.”)

¹⁸ Okumina kutompa bi muloo wa mudimo wa kukwasha bantu bapete masaku su? Su mbyabya, lamina shi bafubi ba ku mudimo wa kukwasha bantu bapete masaku abebasangulaa munkatshi mwa baaba bakwete kufuba mu mudimo wa kwibaka Mashibo a Bufumu. Byabya, tuusha eshina dyoobe kwi bakulu shi, okyebe kuwusha mukanda wa kwenda mu kukita mudimo wa kwibaka. Ungi mukulu mufube mafuku e bungi mu mudimo wa kukwasha bantu bapete masaku atuusha bino binangu: “Enda mususa umune pa mbalo ituukye masaku nka nsaa ibaabakwitamina kwi Komite a kukwasha bantu bapete masaku.” Kukita kwa byabya, akukwasha bwashi mudimo wetu ukitshikye mu kipaso kibuwa.

19. Mushindo kinyi wi mudimo wa kukwasha bantu bapete masaku aukwasha ngofu bwa kulesha binyibinyi shi twi balongi ba Kidishitu?

¹⁹ Mudimo wa kukwasha bantu bapete masaku aulesha binyibinyi shi, atukokyela mwiya wa Kidishitu wa “kwifuleena.” Su twi na kifulo ki byabya, atukyebe kulesha shi twi balongi ba Kidishitu binyibinyi. (Yo. 13:34, 35) Nyi mwanda wa muloo ukata wa kwikala na bantu bebungi abafubu bwa kutumbisha Yehowa nsaa yabakwete kutuusha bukwashi kwi baaba bakwete kukwatshishena Bufumu bw’Efile Mukulu na kululama kooso.